अमेरिका र इरानलाई वार्तामा फर्कन संयुक्त राष्ट्र संघको आह्वान
काठमाडौं । संयुक्त राष्ट्र संघका महासचिव एन्टोनियो गुटेरेसले अमेरिका र इरानबीच जारी द्वन्द्व अन्त्य गर्न कूटनीतिक वार्ता पुनः शुरु गर्न आह्वान गरेका छन् । महासचिवका प्रवक्ता स्टेफन दुजारिकले शुक्रबार आयोजित एक पत्रकार सम्मेलनमा उक्त जानकारी दिएका हुन् । द्वन्द्व शुरु भएको छ महिना पुगेको सन्दर्भमा प्रवक्ता दुजारिकले महासचिवको धारणा सार्वजनिक गर्दै यस संकटको एक मात्र समाधान कुटनीति भएकोमा जोड दिए । उनले भने, ‘हामी संयुक्त राज्य अमेरिका र इस्लामिक गणतन्त्र इरान दुवैलाई अर्थपूर्ण वार्तामा संलग्न हुन आग्रह गर्दछौं ।’ महासचिवले कतार, पाकिस्तान, इजिप्ट, साउदी अरब र कुवेत लगायतका देशहरूले गरिरहेका मध्यस्थता प्रयासहरूको प्रशंसा गर्दै आफू ती देशहरूसँग निरन्तर सम्पर्कमा रहेको बताएका छन् । द्वन्द्वका कारण सिर्जना भएको विनाशकारी मानवीय र आर्थिक परिणामप्रति महासचिवले गहिरो चिन्ता व्यक्त गरेका छन् । विशेषगरी सर्वसाधारणमाथि भइरहेको बमबारी, भौतिक पूर्वाधारको विनाश र विश्वव्यापी रूपमा खाद्यान्न तथा मल आपूर्तिमा परेको अवरोधले निम्त्याएको संकटका बारेमा प्रवक्ताले स्पष्ट पारे । इन्धनको मूल्य वृद्धिले कमजोर अर्थतन्त्र भएका मुलुकहरूलाई झनै ठूलो झट्का दिएको राष्ट्र संघको ठहर छ । महासचिवका विशेष दूत जीन अर्नाल्टले दुवै पक्ष र मध्यस्थकर्ताहरूलाई दिगो समाधानमा पुग्न सहयोग गर्न आफू तयार रहेको र निरन्तर सम्पर्कमा रहेको जानकारी दिएका छन् । गत फेब्रुअरी २८ मा अमेरिका र इजरायलले इरानमाथि सैन्य आक्रमण गरेपछि तनाव उत्कर्षमा पुगेको थियो । यसको बदलामा इरानले इजरायल र खाडी क्षेत्रमा रहेका अमेरिकी सैन्य आधार शिविरहरूमा प्रत्याक्रमण गरेको थियो । यस द्वन्द्वका कारण विश्व ऊर्जा व्यापारको प्रमुख मार्ग ‘स्ट्रेट अफ हर्मुज’ अवरुद्ध हुँदा तेल र अन्य सामग्रीको आपूर्तिमा गम्भीर असर परेको छ । यसअघि, गत जुन १८ मा अमेरिका र इरानबीच ६० दिनभित्र वार्ता गरी अन्तिम सम्झौतामा पुग्ने गरी समझदारी पत्रमा हस्ताक्षर भएको थियो । यद्यपि, दुई देशबीच पुनः तनाव बढेसँगै प्रश्तावित वार्ताको भविष्य अन्योलमा परेको छ ।
रसुवाको बाढीले १९८ टेलिफोन टावरमा क्षति
काठमाडौं । रसुवामा आएको बाढी कारण १९८ वटा टेलिफोनमा क्षति भएको छ । रसुवा र नुवाकोट लगायका विभिन्न क्षेत्रमा भएका टेलिफोन टावरमा क्षति भएको राष्ट्रिय विपद जोखिम न्यूनीकरण तथा व्यवस्थापन प्राधीकरणले जनाएको छ । प्राधीकरणका अनुसार क्षति भएका टेलिफोन टावर मर्मतपश्चात १४५ वटा सञ्चालनमा आइसकेका छन्।प्राधीकरणका अनुसार ६२६ वटा शव फेला परेका छन् । विभिन्न मानव अंगसहित आठ जिल्लामा शव फेला परेको हो । बुधबार बिहान आएको बाढीले तीन जिल्लामा ठूलो धनजनको क्षति गरेको छ ।
चितवनमा २२९ शवको पहिचान भएन, डीएनए लिएर देवघाटमा व्यवस्थापन गरिने
काठमाडौं । चितवनमा पहिचान नखुलेको शवको डिएनए लिएर शव व्यवस्थापन गरिने भएको छ । २ सय ३३ शवमध्ये ४ शवको मात्र पहिचान खुलेको छ । बाँकी २२९ शवको पहिचान खुल्न नसकेको जिल्ला प्रशासन कार्यालय चितवनले जनाएको छ । शव होल्डिङ सेन्टर तथा विभिन्न स्वास्थ्य संस्थामा राखिएको छ। चितवन जिल्ला प्रशासन कार्यालयका अनुसार होल्डिङ सेन्टर, स्वास्थ्य संस्थाहरू तथा नदी तटबाट संकलन गरिएका अधिकांश शव तथा शवका अवशेष सडेर–गलेका कारण अब पहिचान गर्न नसकिने अवस्थामा पुगेका छन्। तत्कालीन व्यवस्थापकीय प्रबन्धमार्फत राखिएका शवहरूबाट दुर्गन्ध फैलिन थालेको छ । संक्रमण तथा महामारी फैलिन सक्ने जोखिम रहेको स्वास्थ्य क्षेत्रका विज्ञहरूको राय तथा विश्लेषणपछि शव व्यवस्थापनको निर्णय गरिएको प्रशासनले जनाएको छ। शनिवार जिल्ला सुरक्षा समिति चितवनको निर्णयअनुसार पहिचान नभएका तथा बेवारिसे शव व्यवस्थापन (पहिलो संशोधन) निर्देशिका, २०८३ बमोजिम सबै पहिचान हुन नसकेका शवलाई जमिन मुनि व्यवस्थापन गरिने भएको छ। शव व्यवस्थापनअघि सबै शवको डीएनए नमूना संकलन गरिने र संकेत नम्बरका आधारमा विस्तृत अभिलेख राखिने प्रशासनले जनाएको छ। आजदेखि भरतपुर महानगरपालिका–१, देवघाटस्थित खुला स्थानमा शवहरूको सम्मानजनक, सुरक्षित तथा कानुनी प्रक्रियाअनुसार व्यवस्थापन गरिने प्रशासनले उल्लेख गरेको छ । बुधवार बिहान रसुवामा आएको बाढीले ठूलो जनधनको क्षति गरेको छ । रसुवा, नुवाकोट, धादिङ र गोर्खामा क्षति पुर्याएको छ । हालसम्म रसुवामा आएको बाढीका कारण ६२६ जनाको शव फेला परेको छ ।
आर्या फार्माल्याबद्वारा बाढी प्रभावितलाई ८२ लाखभन्दा बढीको औषधि सहयोग
काठमाडौं । बाढी तथा प्राकृतिक विपद्बाट प्रभावित नागरिकको उद्धार, राहत तथा स्वास्थ्य उपचारमा सहयोग पु¥याउने उद्देश्यले आर्या फार्माल्याबले नेपाल सरकारलाई ८२ लाख रुपैयाँभन्दा बढी मूल्यका औषधि सहयोग गरेको छ । कम्पनीले बाढी तथा विपद् प्रभावित क्षेत्रमा रहेका स्वास्थ्य चौकी तथा स्वास्थ्य स्वयंसेवकका लागि आवश्यक स्वास्थ्य उपचारसम्बन्धी ८२ लाख ५१ हजार ७५० रुपैयाँ बराबरका औषधि उपलब्ध गराएको जनाएको छ । प्रभावित नागरिकको स्वास्थ्य उपचारमा थप सहयोग आवश्यक परे उपचारमा प्रयोग हुने उपकरण तथा औषधिसमेत सहयोग गर्ने प्रतिबद्धता कम्पनीले जनाएको छ । विपद्को समयमा प्रभावित नागरिकलाई आवश्यक औषधि तथा स्वास्थ्य सेवामा सहज पहुँच सुनिश्चित गर्न गरिएको सहयोगबाट स्वास्थ्य चौकी तथा स्वास्थ्य स्वयंसेवकमार्फत प्रभावित समुदायलाई आवश्यक स्वास्थ्य सेवा उपलब्ध गराउन सहयोग पुग्ने कम्पनीको विश्वास छ । कम्पनीले बाढी तथा प्राकृतिक विपद्बाट प्रभावित नागरिकको स्वास्थ्य सुरक्षालाई प्राथमिकतामा राख्दै गरिएको सहयोगले राहत तथा पुनस्र्थापनाका कार्यमा समेत सकारात्मक योगदान पुग्ने अपेक्षा गरेको छ । आर्या फार्माल्याबले विपद्को कठिन घडीमा प्रभावित नागरिक तथा परिवारप्रति ऐक्यबद्धता जनाउँदै स्वास्थ्य सुरक्षाका लागि आवश्यक सहयोगमा निरन्तर साथ दिने प्रतिबद्धता व्यक्त गरेको छ ।
बाढीले बगाएर ल्याएको सेफ फोडेर पैसा चोर्ने २९ जना पक्राउ
काठमाडौं । भोटेकोशीले बगाएर ल्याएको सेफबाट पैसा चोरी गर्ने व्यक्तिहरू पक्राउ परेका छन् । धादिङ जिल्ला प्रहरी कार्यालयका अनुसार सेफ फुटाएर पैसा चोरी गर्ने २९ जना पक्राउ परेका हुन् । धादिङको गल्छी गाउँपालिका ४ बेल्खुखोलास्थित त्रिशुली नदीको किनारमा फेला पारी सेफ तोडफोड गरी सेफ भित्र रहेको पैसा केही व्यक्तिहरूले आफूखुसी निकाली लगेका थिए । शुक्रबार सेफ फोडेर पैसा लगेको खबर आएपछि प्रहरीले उनीहरुको खोजी गरेको थियो । प्रहरीले उनीहरूको साथबाट ९२ लाख ६८ हजार ५०५ रुपैयाँ फेला पारेको छ । पैसा चोरीमा संलग्न हुने अन्य व्यक्तिहरुको खोजी भइरहेको प्रहरीले जनाएको छ । बरामद नगद र नियन्त्रणमा लिएका व्यक्तिहरुलाई थप अनुसन्धान कार्य भइरहेको धादिङ जिल्ला प्रहरी कार्यालयका प्रवक्ता प्रकाश दाहालले जानकारी दिए । गत बुधबार बिहान रसुवामा आएको बाढीले सेफ बगाएको थियो । रसुवा, नुवाकोट, धादिङ र गोर्खा लगायतका स्थानमा ठूलो धनजनको क्षति गरेको छ । सेफ फोडेर चोरी गरेर यी हुन २९ जना ः
चौधरी फाउन्डेसन र नबिल बैंकको १५ करोडको राहत, ५०० अस्थायी आवास निर्माण गर्ने
काठमाडौं । चौधरी फाउन्डेसन र नबिल बैंकले रसुवाको भोटेकोशी नदीमा आएको बाढीबाट प्रभावित समुदायका लागि करिब १५ करोड रुपैयाँ लागतको राहत तथा पुनःस्थापना कार्यक्रम घोषणा गरेका छन् । दुई संस्थाले बाढी प्रभावित परिवारका तत्कालीन आवश्यकता सम्बोधन गर्नुका साथै सुरक्षित आवास, पुनस्र्थापना र दीर्घकालीन सामुदायिक उत्थानशीलताका लागि बहुचरणमा कार्यक्रम सञ्चालन गर्ने जनाएका छन् । पहिलो चरणमा प्रभावित परिवारलाई खाद्यान्न, खोप तथा स्वास्थ्य सामग्री उपलब्ध गराइनेछ । राहत प्याकेजमा तयार खाना, खानेपानी, बिस्कुट, लत्ताकपडा, तिरपाल र व्यक्तिगत सरसफाइका सामग्रीलगायत अत्यावश्यक वस्तु समावेश छन् । राहत सामग्री भदौ ११ गतेदेखि प्रभावित क्षेत्रमा पु¥याउन थालिएको हो । स्थानीय प्रशासनसँगको सहकार्यमा नुवाकोट र रसुवामा एक–एक वटा राहत शिविर स्थापना गरिनेछ । ती शिविरमा प्रभावित समुदायलाई दैनिक भोजन उपलब्ध गराइनुका साथै बालबालिकाका लागि सुरक्षित स्थान, स्वच्छ खानेपानी र सरसफाइको व्यवस्था गरिने छ। त्यस्तै, चौधरी फाउन्डेसन र नबिल बैंकले धुलिखेल अस्पतालसँगको सहकार्यमा प्रभावित क्षेत्रमा प्राथमिक स्वास्थ्य सेवा तथा रोग रोकथामका लागि स्वास्थ्य शिविर सञ्चालन गर्ने जनाएका छन् । बाढीका कारण घर पूर्ण रूपमा क्षतिग्रस्त भएका वा बस्न अयोग्य भएका परिवारका लागि ५०० वटा अस्थायी आवास एकाइ निर्माण गर्न सरकार तथा स्थानीय तहसँग सहकार्य गरिनेछ । स्थायी पुनर्निर्माण सम्पन्न नभएसम्म प्रभावित परिवारलाई सुरक्षित र व्यवस्थित आवास उपलब्ध गराउने योजना छ । अस्थायी आवास एकाइ नेपालमा भूकम्पपीडितका लागि राहत तथा पुनःस्थापनाका क्रममा चौधरी फाउन्डेसनले प्रयोग गरेको प्रविधिमा आधारित हुने जनाइएको छ । यसैगरी, प्रभावित समुदायका लागि स्थायी आवास तथा आवश्यक सामुदायिक पूर्वाधार निर्माणमा समेत सहयोग गरिनेछ। दीर्घकालीन कार्यक्रम अन्तर्गत संक्रामक रोग रोकथाम तथा नियन्त्रण केन्द्र स्थापना गर्न धुलिखेल अस्पतालसँग सहकार्य गर्ने योजना पनि अघि सारिएको छ । चौधरी फाउन्डेसन तथा नबिल बैंकका अध्यक्ष निर्वाण चौधरीले उद्धार तथा राहतदेखि अस्थायी आवास, स्थायी पुनःस्थापना र जनस्वास्थ्य तयारीसम्मको काममा प्रतिबद्ध रहेको बताए । ‘हाम्रो तत्कालीन प्राथमिकता जीवनको रक्षा गर्नु र प्रभावित परिवारलाई खाना, आवास, स्वास्थ्य सेवा तथा सम्मान सुनिश्चित गर्नु हो । तर हाम्रो जिम्मेवारी आपत्कालीन राहतमा मात्र सीमित हुनु हुँदैन,’ उनले भने, ‘उद्धार तथा राहतदेखि अस्थायी आवास, स्थायी पुनःस्थापना र सुदृढ जनस्वास्थ्य तयारीसम्मको सम्पूर्ण यात्रामा हामी प्रतिबद्ध छौँ ।’
हिमनदी पहिरो पर्यटकको क्यामरामा कैद, सोही कारण केरुङमा बाढी आएको पुष्टि
काठमाडौं । चीनको सिजाङ (तिब्बत) स्वायत्त क्षेत्रस्थित केरुङ (ग्याइरोङ) काउन्टीमा दृश्य कैद गरिरहेका एक पर्यटकले नेपालतर्फको उच्च हिमाली क्षेत्रमा भएको हिमनदी पहिरो (ग्लेसियर कोल्याप्स) को दृश्य दुर्घटनावश आफ्नो क्यामरामा कैद गरेका छन् । चिनियाँ एकेडेमी अफ साइन्सेजअन्तर्गतको ‘इन्स्टिच्युट अफ माउन्टेन हाजाड्र्स एण्ड इन्भायरोन्मेन्ट’ का निर्देशक काङ सिचाङले उक्त भिडियोमा देखिएको हिमनदी पहिरोको स्थान ‘रिमोट–सेन्सिङ’ उपग्रह चित्रहरूसँग मेल खाएको पुष्टि गरेका छन् । विज्ञहरूकाअनुसार सोही हिमनदी पहिरोका कारण केरुङ नाकामा लेदोसहितको ठूलो बाढी (मुडस्लाइड) आएको हो । पर्यटकले खिचेको उक्त भिडियोमा देखिएको हिमनदीको क्षय नै केरुङ बन्दरगाहमा आएको बाढीको मुख्य कारण भएको अधिकारीहरूले बताएका छन् ।
जिरोङ नाकामा ड्रोनमार्फत राहत सामग्री आपूर्ति, ५५४ जना अझै बेपत्ता
काठमाडौं । चीनको सिजाङ (तिब्बत) स्वायत्त क्षेत्रस्थित जिरोङ नाकाको अति प्रभावित क्षेत्रमा उद्धारकर्ताहरूका लागि ड्रोनमार्फत आवश्यक राहत सामग्री पुर्याइएको छ । भौगोलिक विकटता र अवरुद्ध सडक सञ्जालका कारण ड्रोनको प्रयोग गरी सामग्री ढुवानी गरिएको हो । सिजाङको आपतकालीन व्यवस्थापन विभागकाअनुसार शुक्रबार अपराह्न करिव ४ः३० बजे पहिलो व्यावसायिक उद्धार टोली विपद् प्रभावित मुख्य क्षेत्रमा पुगेको थियो । माथिल्लो तटीय क्षेत्रमा बनेको कृत्रिम ताल (ब्यारियर लेक), निरन्तरको मुसलधारे वर्षा र सडक तथा सञ्चार सम्पर्क विच्छेद भएका कारण उद्धार कार्यमा गम्भीर चुनौती उत्पन्न भएको अधिकारीहरूले जनाएका छन् । शनिवार बिहान १ बजेसम्मको पछिल्लो तथ्याङ्कअनुसार उक्त क्षेत्रमा सात जनाको मृत्यु भएको पुष्टि भएको छ भने ५५४ जना अझै बेपत्ता रहेका छन् । सडक मार्ग पूर्ण रूपमा अवरुद्ध भएपछि उद्धार टोलीलाई आवश्यक खाद्यान्न तथा उपकरणहरू ड्रोनमार्फत उपलब्ध गराइएको हो । बेपत्ताहरूको खोजी र राहत कार्यलाई तिब्रता दिन स्थानीय प्रशासनले थप जनशक्ति परिचालन गरेको छ ।
