जलवायुजन्य विपद्का मुद्दा विश्वमञ्चमा उठाउन राष्ट्रसंघसँग सहकार्य बढाउँदै सरकार
काठमाडौं । नेपालले जलवायु परिवर्तनका कारण निम्तिएका विपद् र त्यसबाट उत्पन्न चुनौतीलाई अन्तर्राष्ट्रिय मञ्चमा प्रभावकारी रूपमा उठाउन संयुक्त राष्ट्रसंघसँग सहकार्य बढाउने भएको छ । कृषि, वन तथा पर्यावरणमन्त्री गीता चौधरी र संयुक्त राष्ट्रसंघकी नेपालस्थित आवासीय संयोजक लिला पिटर्स याहियाबीच भएको भेटवार्तामा नेपालको जलवायुसम्बन्धी कार्यसूची, जलवायुजन्य विपद्का असर तथा अन्तर्राष्ट्रिय सहयोग विस्तार गर्ने विषयमा छलफल भएको छ । भेटमा मन्त्री चौधरीले ‘लिभिङ सगरमाथा : पर्वतीय कार्यसूची’ स्वीकृत भइसकेको जानकारी दिइन् । उनले आगामी अक्टोबर २९ मा आयोजना हुने राष्ट्रिय जलवायु शिखर सम्मेलनका अवसरमा उक्त कार्यसूची सार्वजनिक गरिने बताइन् । त्यस्तै, जलवायु परिवर्तनसम्बन्धी संयुक्त राष्ट्रसंघीय ३१औं सम्मेलन (कोप–३१) मा नेपालले भोगेका जलवायुजन्य विपद्, तिनका असर र चुनौतीलाई अन्तर्राष्ट्रिय समुदायसमक्ष प्रस्तुत गर्न विशेष प्रदर्शनी कक्ष स्थापना गर्ने तयारीबारे पनि छलफल भएको छ । मन्त्री चौधरीले उक्त प्रदर्शनी कक्ष सञ्चालनका लागि आवश्यक खर्च व्यवस्थापनमा संयुक्त राष्ट्रसंघीय निकायहरूबाट सहयोगको अपेक्षा गरिएको बताइन् । उनले भोटेकोशी बाढीलगायत नेपालले भोगेका जलवायुजन्य विपद्का विषयलाई अन्तर्राष्ट्रियस्तरमा प्राथमिकताका साथ उठाउनुपर्नेमा जोड दिइन् । त्यसका लागि सम्बन्धित सरकारी निकायहरूको सक्रिय प्रतिनिधित्व र सहयोग आवश्यक रहेको उनको भनाइ थियो । यस विषयमा मन्त्रालयका सहसचिवले सम्बन्धित टोलीसँग समन्वय गरिसकेको जानकारीसमेत बैठकमा गराइएको थियो । बैठकमा कोप–३१ मा युवा पुस्ता, विशेषगरी जेन–जी युवा तथा सञ्चारकर्मीहरूको सहभागिता र प्रतिनिधित्व सुनिश्चित गर्ने विषयमा पनि छलफल भएको छ । उनीहरूको सहभागिताका लागि संयुक्त राष्ट्रसंघीय निकायहरूबाट आवश्यक सहयोग जुटाउने विषयमा कुराकानी भएको हो । त्यसैगरी, जलवायु परिवर्तनका असर न्यूनीकरण, नेपालले भोगेका जलवायुजन्य विपद्का अनुभव र चुनौतीलाई विश्व समुदायसमक्ष प्रभावकारी रूपमा प्रस्तुत गर्ने विषयमा दुवै पक्षले जोड दिएका छन् । जलवायु परिवर्तनका चुनौती सामना गर्न सरकार, विकास साझेदार, संयुक्त राष्ट्रसंघीय निकाय तथा नागरिक समाजबीचको सहकार्य थप सुदृढ बनाउने विषयमा पनि छलफल भएको थियो ।
भारत छाड्न इमरान खानलाई दिइएको सूचनाबारे बम्बई उच्च अदालतले के भन्यो ?
काठमाडौं । बम्बई उच्च अदालतले भारत छाड्न दिइएको सूचनाविरुद्ध अभिनेता इमरान खानले दायर गरेको रिट निवेदनमाथिको सुनुवाइ नोभेम्बर २ सम्मका लागि स्थगित गरेको छ । उक्त सूचनामा इमरान खानलाई अक्टोबर २८ भित्र भारत छाड्न निर्देशन दिइएको थियो । केन्द्र सरकारका तर्फबाट अदालतमा उपस्थित सहायक सोलिसिटर जनरल (एएसजी) ले अर्को सुनुवाइसम्म इमरान खानविरुद्ध कुनै कारबाही नगरिने मौखिक आश्वासन दिएका छन् । अदालतले पनि अर्को सुनुवाइसम्म यस विषयमा थप कारबाही नगर्न आदेश दिएको छ । यसअघि इमरान खानले मुम्बईस्थित विदेशी क्षेत्रीय दर्ता अधिकारी (एफआरआरओ) ले अक्टोबर १४ मा जारी गरेको भारत छाड्न दिइएको सूचनालाई चुनौती दिँदै बम्बई उच्च अदालतमा रिट निवेदन दायर गरेका थिए । एफआरआरओका अनुसार अमेरिकी नागरिक इमरानले एउटा विरोध प्रदर्शनमा सहभागिता जनाएका थिए । अभिनेता इमरान खानको जनसम्पर्क टोलीले जारी गरेको विज्ञप्तिमा भनिएको छ, 'दुई वर्षको उमेरदेखि भारतमा बस्दै आएका अभिनेता तथा ओभरसिज सिटिजन अफ इन्डिया (ओसीआई) कार्डधारक इमरान खान पालले मुम्बईस्थित विदेशी क्षेत्रीय दर्ता अधिकारी (एफआरआरओ) ले अक्टोबर १४, २०२६ मा जारी गरेको भारत छाड्ने सूचनालाई बम्बई उच्च अदालतमा चुनौती दिएका छन् ।'
इजरायलमा आमनिर्वाचन : नेतन्याहूलाई पूर्वसेना प्रमुख आइजेनकोटको कडा टक्कर
काठमाडौं । इजरायलमा प्रधानमन्त्री चयनका लागि आमनिर्वाचनअन्तर्गत मतदान भइरहेको छ । सन् २०२३ को अक्टोबर ७ पछि इजरायलमा पहिलोपटक आमनिर्वाचन भइरहेको हो । निर्वाचनमा वर्तमान प्रधानमन्त्री बेन्जामिन नेतन्याहू र इजरायली सेनाका पूर्वप्रमुख गादी आइजेनकोट प्रमुख प्रतिस्पर्धीका रूपमा देखिएका छन् । स्थानीय समयअनुसार बिहान ७ बजेदेखि मतदान केन्द्रहरू खुलेका छन् । योग्य मतदाताले राति १० बजेसम्म मतदान गर्न सक्नेछन् । शुक्रबार सार्वजनिक गरिएको चुनावी सर्वेक्षणअनुसार नेतन्याहू र आइजेनकोटबीच कडा प्रतिस्पर्धा हुने देखिएको छ । इजरायलको संसद् ‘नेसेट’मा १२० सिट छन् । सरकार गठन गर्न कुनै पनि दल वा गठबन्धनले कम्तीमा ६१ सिट जित्नुपर्ने हुन्छ । तर, कुनै पनि राजनीतिक दल वा गठबन्धनले एक्लै बहुमत प्राप्त गर्न नसक्ने अनुमान गरिएको छ । यस्तो अवस्थामा विभिन्न दल मिलेर गठबन्धन सरकार बनाउनुपर्ने हुन सक्छ । नयाँ सरकार गठन हुन केही साता वा महिनासमेत लाग्न सक्ने बताइएको छ । सन् २०२३ अक्टोबर ७ मा हमासले इजरायलमा आक्रमण गरेको थियो । उक्त आक्रमणमा करिब एक हजार २०० जनाको मृत्यु भएको थियो । त्यसपछि इजरायलले गाजामा व्यापक सैन्य कारबाही सुरु गरेको थियो । उक्त सैन्य कारबाहीमा हालसम्म ७२ हजारभन्दा बढी मानिसको मृत्यु भएको बताइएको छ ।
ओली भन्छन् - पार्वतीले सराप दिएपछि देवता जन्मिन छाडे, अहिले नक्कली भगवान् जन्मिएर हैरान छ
काठमाडौं । नेकपा एमालेका अध्यक्ष केपी शर्मा ओलीले नक्कली भगवान् जन्मिएर हैरान पारेको टिप्पणी गरेका छन् । मदन भण्डारी स्मृति प्रतिष्ठानको स्मारिका लोकार्पण कार्यक्रममा बोल्दै ओलीले धार्मिक मान्यता, योग दर्शन र समाजमा देखिएको अन्धभक्तिप्रति व्यङ्ग्य गरेका हुन् । पार्वतीले देवताहरूलाई सराप दिएपछि देवताका सन्तान जन्मिने क्रम रोकिएको र त्यसपछि नक्कली भगवान् जन्मिन थालेको उनको टिप्पणी छ । भारततिरबाट आउने जोगीहरूलाई देख्नेबित्तिकै खुट्टा समातेर ढोग्ने प्रवृत्ति रहेको उनले बताए । उनले पछिल्लो समय योगलाई पनि ईश्वरसँग जोडेर भ्रम सिर्जना गर्न खोजिएको आरोप लगाए । योगको सुरुवाती चरणमा कुनै ईश्वरसँग सम्बन्धित नरहेको उनको दाबी छ । अष्टाङ्ग योगका यम र नियमले हिंसा नगर्न, असत्य नबोल्न, सत्य बोल्न, शान्तिको मार्गमा हिँड्न र अरूको सम्पत्तिमा लोभ नगर्न सिकाउने उनले बताए । यसलाई नै आधार बनाएर हिँड्नुपर्नेमा उनले जोड दिए । अरूको सम्पत्तिमा लोभ नगर्ने र आफ्नो जायज हकमा मात्र सीमित रहने मान्यता आफूहरूले खोजेको सामाजिक आदर्शसँग मेल खाने उनको भनाइ छ । अध्यक्ष ओलीले पतञ्जलिको योगमा आइपुग्दा योग दर्शन ईश्वरवादसँग मिसिएको दाबी गरे । त्यसअघि सांख्य र शैव परम्परामा योग ईश्वरवादसँग नमिसिएको उनको दाबी थियो । उनले भने, ‘सत्यबाट हामी आफ्ना विचार बनाउन प्रस्थान गर्न थाल्छौँ । त्यहीँबाट हाम्रा विचारको प्रस्थान हुन्छ, न्यायबाट र मानवतावादबाट । यसैकारण यो अष्टाङ्ग योगको अष्टाङ्गमध्येको पहिलोले के भन्छ भन्दाखेरि– यम, दोस्रोले के भन्छ– नियम । यो गर, यो नगर । यम, नियम भनेको त्यो । हिंसा नगर, असत्य नबोल, सत्य बोल, शान्तिको मार्गमा हिँड, सबैको सुरक्षा भन्छ । अस्तेय, अर्काको सम्पत्तिमा लोभ नगर । आफ्नो हकको, जायज हकको चीजमा बाहेक अन्त कुनै लोभ नगर भन्छ । हामीले खोजेकै त्यही त हो नि !' उनले योगले स्वस्थ शरीर र स्वस्थ मस्तिष्कको विकासमा सहयोग गर्ने बताए । उनले मदन भण्डारी स्मृति प्रतिष्ठानलाई नयाँ खोज, अनुसन्धान तथा रैथाने ज्ञान, सीप र परम्पराको खोजीमा ध्यान दिन पनि आग्रह गरे ।
न भिडियो छ, न आवाज : कहाँ छन् इरानका सर्वोच्च नेता खामेनेई ?
काठमाडौं । इरानको संसद्का सभामुख मोहम्मद बाघेर घालिबाफले देशका सर्वोच्च नेता मोजतबा खामेनेई पूर्ण रूपमा स्वस्थ रहेको बताएका छन् । मंगलबार संसद् बैठकलाई सम्बोधन गर्दै उनले खामेनेईको स्वास्थ्यबारे फैलिएका आशंकाबीच यस्तो जानकारी दिएका हुन् । उनले भने, ‘मलाई प्रायः सर्वोच्च नेताको स्वास्थ्यबारे प्रश्न सोधिन्छ । म संसद्का सदस्यहरूलाई जानकारी गराउन चाहन्छु कि मोजतबा खामेनेई पूर्ण रूपमा स्वस्थ हुनुहुन्छ ।’ पछिल्ला दिनहरूमा इरानी सञ्चारमाध्यमहरूले सभामुख घालिबाफले सर्वोच्च नेता खामेनेईसँग भेट गरेको समाचार प्रकाशित गरेका थिए । आफ्ना पिता अली खामेनेईको मृत्युपछि मोजतबा खामेनेई इरानको सर्वोच्च नेता बनेका थिए । तर, सर्वोच्च नेताको जिम्मेवारी सम्हालेयता उनको कुनै पनि भिडियो वा अडियो रेकर्डिङ सार्वजनिक भएको छैन । अहिलेसम्म उनको नाममा जारी गरिएका लिखित सन्देशहरू मात्रै सार्वजनिक भएका छन् । इरानी अधिकारीहरूले सुरक्षा कारणले उनको भिडियो वा अडियो सार्वजनिक नगरिएको बताएका छन् । यसैबीच, इरानका राष्ट्रपति मसुद पेजेस्कियानले पनि हालै सर्वोच्च नेताको जिम्मेवारी सम्हालेपछि आफूले मोजतबा खामेनेईसँग दुईपटक भेट गरिसकेको बताएका थिए ।
एनपीएलबाट खेलकुद पर्यटनको ढोका खोल्न सकिन्छ : अध्यक्ष शाह
काठमाडौं । अहिले नेपाल प्रिमियर लिग (एनपीएल) को तेस्रो संस्करण राजधानीमा चलिरहेको छ । एनपीएल जारी रहँदा यसको प्रत्यक्ष लाभ पर्यटन क्षेत्रले समेत लिइरहेको छ । एनपीएलअन्तर्गतका खेल खेल्न विभिन्न देशका दर्जनौँ खेलाडी नेपाल आएका छन् । उनीहरूको बसाइँ ठूला होटलमा भइरहेको छ । यसले होटल तथा पर्यटन क्षेत्रलाई माथि उठाउन सघाउ पुगेको होटल एसोसिएसन नेपाल (हान) का अध्यक्ष विनायक शाह बताउँछन् । शाहका अनुसार एनपीएलले नेपाली क्रिकेटलाई अन्तर्राष्ट्रिय स्तरमा चिनाउन सकारात्मक भूमिका खेलेको छ । प्रतियोगितामा सहभागी आठवटै फ्रेन्चाइज टिम ठूला होटलसँग आबद्ध हुनु र खेलाडी, प्रशिक्षक तथा अन्य सदस्यले लामो समयसम्म होटलमा सेवा लिनुले आतिथ्य उद्योगमा प्रत्यक्ष प्रभाव पारेको छ । एनपीएलमा सहभागी सुदूरपश्चिम, विराटनगर, लुम्बिनी र चितवनलगायतका फ्रेन्चाइज टिमका समर्थकहरू आफ्ना टिमको खेल हेर्न विभिन्न ठाउँबाट आएर होटलमै बसिरहेका छन् । यसले होटल तथा आवास, खानपान र यातायातलगायतका क्षेत्रमा आर्थिक गतिविधि बढाउन सहयोग पुर्याएको शाहको भनाइ छ । प्रतियोगिताका क्रममा स्वदेशी तथा विदेशी खेलाडी र प्रशिक्षकले महिनादिनसम्म होटलमा सेवा लिने भएकाले होटल व्यवसायलाई समेत लाभ पुगेको उनले बताए । शाहले एनपीएललाई केवल क्रिकेट प्रतियोगिताका रूपमा मात्र नहेरी पर्यटन प्रवर्द्धनको माध्यमका रूपमा विकास गर्नुपर्नेमा जोड दिए । नेपालमा खेलिने प्रतियोगितालाई अन्तर्राष्ट्रिय दर्शकमाझ पुर्याउन सके दक्षिण एसियाका क्रिकेटप्रेमीलाई नेपाल भ्रमणका लागि आकर्षित गर्न सकिने उनको भनाइ छ । उनका अनुसार अब एनपीएललाई आधार बनाएर स्पोर्ट्स टुरिजमलाई योजनाबद्ध रूपमा अघि बढाउनुपर्छ । अन्तर्राष्ट्रिय क्रिकेट परिषद् (आईसीसी) बाट एनपीएलले मान्यता पाउनु पनि नेपालको क्रिकेटलाई अन्तर्राष्ट्रिय स्तरमा स्थापित गर्ने अवसर हो । यसलाई उपयोग गर्दै विदेशी खेलाडी तथा टिमको सहभागिता बढाउन र नेपालमा थप अन्तर्राष्ट्रिय प्रतियोगिता आयोजना गर्न सके खेलकुद पर्यटनको दायरा विस्तार गर्न सकिन्छ । विशेषगरी दक्षिण एसियाका ठूला क्रिकेट राष्ट्रका फ्रेन्चाइज टिमलाई नेपालमा ल्याएर खेलाउने सम्भावनामा ध्यान दिनुपर्ने शाहको भनाइ छ । त्रिभुवन विश्वविद्यालयको अन्तर्राष्ट्रिय क्रिकेट मैदानको स्तरोन्नतिसँगै नेपालमा अन्तर्राष्ट्रिय क्रिकेट प्रतियोगिता आयोजना गर्ने सम्भावना बढेको उल्लेख गर्दै उनले यसलाई पर्यटनसँग जोडेर अगाडि बढाउनुपर्ने बताए । स्पोर्ट्स टुरिजम प्रवर्द्धनका लागि विभिन्न क्षेत्रबीच सहकार्य भइरहेको भए पनि त्यसलाई ठोस योजना र व्यवस्थित कार्यक्रममार्फत अगाडि बढाउन आवश्यक रहेको उनको भनाइ छ । उनका अनुसार नेपाल प्रिमियर लिग (एनपीएल) र क्रिकेटलाई आधार बनाएर स्पोर्ट्स टुरिजम प्रवर्द्धन गर्नुपर्छ । अध्यक्ष शाहले भने, ‘एनपीएलले एउटा राम्रो सकारात्मक सन्देश दिएको छ । राष्ट्रिय तथा अन्तर्राष्ट्रिय खेलकुदमा नेपालले क्रिकेटमार्फत राम्रो प्रदर्शन गरिरहेको छ । यसले पर्यटनमा पनि प्रत्यक्ष प्रभाव पार्ने र फाइदा पुर्याउने देखिन्छ । अहिले एनपीएलका आठवटा फ्रेन्चाइज टिम छन् । तीमध्ये प्रत्येक टिम कुनै न कुनै ठूला होटलसँग आबद्ध छ । यो आफैँमा राम्रो कुरा हो । देशभरिका फ्रेन्चाइज टिमहरू छन् । सुदूरपश्चिम, विराटनगर, लुम्बिनी, चितवनलगायतका टिमका समर्थकहरू आफ्नो टिमको खेल हेर्न आउँछन् । त्यसले नेपालको आतिथ्य उद्योग, आवास, खानपान र यातायातलगायतका क्षेत्रमा प्रत्यक्ष प्रभाव पार्छ ।' अध्यक्ष शाहले अहिले नेपालमा पर्यटक भित्र्याउन अनुकूल मौसम रहेको पनि बताए । उनका अनुसार दसैँ सकिएर तिहार नजिकिएको यस समयमा विदेशी पर्यटकको रुचि विशेषगरी पदयात्रा तथा साहसिक पर्यटनमा रहने गरेको छ । मौसम अनुकूल भएकाले यस अवधिमा धेरैभन्दा धेरै पर्यटक आकर्षित गर्न सकिन्छ । तर, रसुवा र भोटेकोशी क्षेत्रमा बाढीका कारण उत्पन्न परिस्थितिले पर्यटक आगमनमा केही असर पारेको छ । उक्त घटनापछि नेपाल भ्रमण गर्न सुरक्षित छ कि छैन भन्ने विषयमा विदेशी पर्यटकले बढी सोधपुछ गरिरहेका छन् । मौसमसम्बन्धी अनिश्चितताले पनि पर्यटकको निर्णयमा प्रभाव पार्न सक्ने भएकाले नेपालका पर्यटन गन्तव्यको अवस्था, सुरक्षा र उपलब्ध सेवाबारे अन्तर्राष्ट्रिय बजारमा स्पष्ट सूचना प्रवाह गर्नुपर्ने उनको बुझाइ छ । कुनै एउटा क्षेत्रमा समस्या देखिँदैमा समग्र नेपालकै पर्यटन प्रभावित हुने गरी सन्देश जान नदिन सरकारी निकायले समन्वय गर्न आवश्यक रहेको शाहले बताए । शाहका अनुसार नेपालमा पर्यटनको सम्भावना र सेवा दिन सक्ने क्षमता बढे पनि अपेक्षाअनुसार पर्यटक भित्र्याउन सकिएको छैन । यसको मुख्य कारण अन्तर्राष्ट्रिय हवाई कनेक्टिभिटीको सीमितता हो । पोखरा अन्तर्राष्ट्रिय विमानस्थलमा फ्लाई दुबईले करिब एक महिनाअघि उडान सुरु गरेको बताउँदै उनले अन्य अन्तर्राष्ट्रिय उडान विस्तार गर्न सके पर्यटक आगमन बढाउन सहयोग पुग्ने बताए । उनका अनुसार अन्तर्राष्ट्रिय हवाई सम्पर्क विस्तार हुन नसक्दा नेपालले पर्यटनको सम्भावनाअनुसार लाभ लिन सकेको छैन । नेपालका होटलहरूले वार्षिक ३५ देखि ४० लाखसम्म पर्यटकलाई सेवा दिन सक्ने क्षमता बनाइसकेका छन् । तर, नेपाल आउने पर्यटकको संख्या भने वार्षिक ११ देखि १२ लाखको हाराहारीमा रहेको छ । होटल तथा पर्यटन क्षेत्रमा भएको लगानीको प्रतिफल प्राप्त गर्न पर्यटकको संख्या बढाउनु आवश्यक रहेको उनको भनाइ छ । त्यसका लागि अन्तर्राष्ट्रिय हवाई सम्पर्क विस्तार, पर्यटन गन्तव्यको प्रभावकारी प्रचारप्रसार र अन्तर्राष्ट्रिय स्तरका खेलकुद प्रतियोगितालाई पर्यटनसँग जोड्ने रणनीति एकसाथ अघि बढाउनुपर्ने उनले बताए ।
तीन दिन निषेधित क्षेत्रमा पदयात्रा अनुमति रोक
काठमाडौं । अध्यागमन विभागले उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिम बढेपछि निषेधित क्षेत्रमा पदयात्रा गर्न रोक लगाएको छ । विभागले १२, १३ र १४ गतेका लागि जोखिमयुक्त क्षेत्रमा पदयात्रा नगर्न पर्यटक तथा पदयात्रीलाई आग्रह गरेको हो । राष्ट्रिय विपद् जोखिम न्यूनीकरण तथा व्यवस्थापन प्राधिकरणले उक्त तीन दिन उच्च पहाडी तथा हिमाली क्षेत्रमा भारी हिमपात, हिमआँधी तथा हिमपहिरोको उच्च जोखिम रहेको भन्दै पर्यटकलाई त्यस्ता क्षेत्रमा नजान अनुरोध गरेको थियो । सम्भावित जोखिम न्यूनीकरणका लागि पदयात्रासम्बन्धी सूचना जारी गरेको हो । विभागका अनुसार उक्त अवधिमा उच्च पहाडी तथा हिमाली क्षेत्रका निषेधित क्षेत्रमा पदयात्राको अनुमति लिइसकेका पदयात्रीले समेत यात्रा नगर्न र पदयात्रामा गइसकेकाले सुरक्षित स्थानमा बस्नुपर्नेछ । जोखिमको अवधि कायम रहेसम्म निषेधित क्षेत्रमा जाने पदयात्राको अनुमति आजैदेखि जारी नगरिने विभागले जनाएको छ । विभागले ट्रेकिङ एजेन्सी, पदयात्री, पथप्रदर्शक तथा पर्यटन क्षेत्रका अन्य सरोकारवालालाई सूचनाको पालना गर्न र गराउन आग्रह गरेको छ । विभागका निर्देशक सूर्यप्रसाद चापागाईंले जारी गरेको सूचनामा सम्भावित प्राकृतिक विपद्बाट हुन सक्ने जोखिम न्यूनीकरण गर्न सबै सरोकारवालालाई आवश्यक सतर्कता अपनाउन अनुरोध गरिएको छ ।
मञ्जुश्री फाइनान्स र बरुण हाइड्रोपावरको सेयर मूल्य समायोजन
काठमाडौं । नेपाल स्टक एक्सचेन्ज (नेप्से) ले मञ्जुश्री फाइनान्स र बरुण हाइड्रोपावर कम्पनीको बोनस सेयरका लागि सेयर मूल्य समायोजन गरेको छ । नेप्सेका अनुसार मञ्जुश्री फाइनान्स लिमिटेडको ५ प्रतिशत बोनस सेयरका लागि मूल्य समायोजन गरी प्रतिकित्ता ७२३ रुपैयाँ ३३ पैसा कायम गरिएको छ । समायोजनअघि कम्पनीको अन्तिम कारोबार मूल्य प्रतिकित्ता ७५९ रुपैयाँ ५० पैसा थियो । त्यस्तै, बरुण हाइड्रोपावर कम्पनी लिमिटेडको ४.७५ प्रतिशत बोनस सेयरका लागि मूल्य समायोजन गरी प्रतिकित्ता ३२३ रुपैयाँ ५३ पैसा कायम गरिएको छ । समायोजनअघि कम्पनीको अन्तिम कारोबार मूल्य प्रतिकित्ता ३३८ रुपैयाँ ९० पैसा थियो । दुवै कम्पनीको सेयर मूल्य समायोजन कात्तिक १० गते गरिएको हो ।
