इजरायलमा ७० प्रतिशतभन्दा बढी मतगणना सकिँदा पनि कसैले बहुमत पाएन
काठमाडौं । इजरायलमा सम्पन्न संसदीय निर्वाचनको ७० प्रतिशतभन्दा बढी मतगणना सकिँदा पनि कुनै गठबन्धनले स्पष्ट बहुमत हासिल गर्ने संकेत देखिएको छैन । इजरायलको केन्द्रीय निर्वाचन समितिका अनुसार हालसम्म ७० प्रतिशतभन्दा बढी मतगणना सम्पन्न भएको छ । तर, अहिलेसम्मको परिणामले कुनै पनि गठबन्धनले सरकार गठनका लागि आवश्यक बहुमत प्राप्त गर्ने अवस्था देखाएको छैन । प्रधानमन्त्री बेन्जामिन नेतन्याहु नेतृत्वको गठबन्धन अझै पनि सबैभन्दा अगाडि छ । यद्यपि, यस गठबन्धनले प्राप्त गर्ने अनुमानित सिट संख्या घटेर ५४ मा झरेको छ । त्यस्तै, गादी आइजेनकोट नेतृत्वको विपक्षी गठबन्धनको पनि दुई सिट घटेको छ । अब उक्त गठबन्धनले ४७ सिट प्राप्त गर्ने देखिएको छ । अर्कोतर्फ, अरब राजनीतिक दलहरूको सिट संख्या बढेर १९ पुगेको छ । इजरायलको संसद् ‘नेसेट’मा कुल १२० सिट छन् । सरकार गठन गर्न कुनै पनि गठबन्धनले कम्तीमा ६१ सिटको समर्थन जुटाउनुपर्छ । तर, अहिलेसम्मको मतगणनाले कुनै पनि प्रमुख गठबन्धनले एक्लै बहुमत प्राप्त गर्ने सम्भावना देखाएको छैन । यद्यपि, मतगणना जारी रहेकाले अन्तिम परिणाममा फेरबदल हुन सक्ने निर्वाचन समितिले जनाएको छ । यसैबीच, विपक्षी ‘चेन्ज ब्लक’ गठबन्धनमा आबद्ध डेमोक्रेट्स पार्टीका नेता याइर गोलानले अरब नेतृत्वका राजनीतिक दलहरूलाई समेत सहभागी गराएर नयाँ सरकार गठन गर्न आह्वान गरेका छन् । निर्वाचनअघि गोलान आफ्नो गठबन्धनका एकमात्र त्यस्ता नेता थिए, जसले अरब नेतृत्वका दलहरू जोइन्ट लिस्ट र रा’अमसँग सहकार्य गर्न तयार रहेको बताएका थिए । तर, आइजेनकोटसहित विपक्षी गठबन्धनका अन्य नेताहरूले ती दलहरूसँग साझा राजनीतिक मूल्य र मान्यताको अभाव रहेको भन्दै सहकार्य गर्न अस्वीकार गरेका थिए । पछिल्लो मतगणनाले कुनै पनि प्रमुख गठबन्धनलाई स्पष्ट बहुमत नदिने संकेत गरेसँगै इजरायलमा नयाँ सरकार गठनका लागि राजनीतिक दलहरूबीचको सहकार्य निर्णायक बन्न सक्ने देखिएको छ ।
कामना सेवा फुटसल कप सिजन ६ को टाइसिट ड्र र ट्रफी अनावरण
काठमाडौं । कामना सेवा विकास बैंक लिमिटेडले आयोजना गर्न लागेको ‘कामना सेवा फुटसल कप सिजन ६’ को टाइसिट ड्र, जर्सी तथा ट्रफी अनावरण र ब्रान्ड एन्थम सार्वजनिक कार्यक्रम सम्पन्न भएको छ। कात्तिक ११ गते आयोजित कार्यक्रममा प्रतियोगितामा सहभागी टोलीका प्रतिनिधि, टिम म्यानेजर, एन्फाका रेफ्री तथा बैंकका कर्मचारीको उपस्थिति थियो। कार्यक्रममा बैंकका प्रमुख सञ्चालन अधिकृत रघुनाथ त्रिपाठीले फुटसल कप बैंकका लागि प्रतियोगितामा मात्र सीमित नभई खेलकुदमार्फत समाज र युवासँग जोडिने माध्यम भएको बताए। खेलकुदले स्वस्थ जीवनशैली, अनुशासन र सामूहिक कार्यको सन्देश दिने भएकाले बैंकले यस्ता कार्यक्रमलाई निरन्तरता दिँदै आएको उनको भनाइ थियो। कार्यक्रममा त्रिपाठीले प्रतियोगिताको ब्रान्ड एन्थम सार्वजनिक गर्नुका साथै सहभागी टोलीका टिम म्यानेजरलाई जर्सी हस्तान्तरण गरे। सोही अवसरमा प्रतियोगिताको टाइसिट ड्र पनि सार्वजनिक गरिएको थियो। कार्यक्रममा गत सिजन अर्थात् सिजन ५ का पुरुषतर्फका विजेता सिद्धार्थ बैंक र महिलातर्फका विजेता लुम्बिनी विकास बैंकका प्रतिनिधिहरूले मन्तव्य राखेका थिए। उनीहरूले बैंकले आयोजना गरेको प्रतियोगिताले बैंक तथा वित्तीय संस्थाका कर्मचारीबीच आपसी सद्भाव र भाइचारा विकास गर्न सहयोग पुग्ने भन्दै कामना सेवा विकास बैंकलाई धन्यवाद दिए। साथै, सहभागी सबै टोलीलाई शुभकामना व्यक्त गरे। त्यसैगरी, एन्फाका सहायक रेफ्री हरिश कार्कीले प्रतियोगिताका खेल नियमबारे विस्तृत जानकारी गराए। उनले खेलको अनुशासन, फाउल तथा निर्णयसम्बन्धी नियम बुझेर स्वच्छ र रोमाञ्चक प्रतिस्पर्धा गर्न सबै टोलीलाई आग्रह गरे। कार्यक्रममा एन्फा फुटसल रेफ्री सङ्गीता सुनुवारको पनि उपस्थिति थियो। यस वर्षको प्रतियोगितामा पुरुषतर्फ २० र महिलातर्फ १० गरी ३० टोलीले प्रतिस्पर्धा गर्नेछन्। प्रतियोगिता कात्तिक १४ र १५ गते शनिबार र आइतबार धन्वन्तरी फुटसल कोर्टमा सञ्चालन हुने बैंकले जनाएको छ। खेलकुद प्रवर्द्धन, युवा प्रतिभालाई मञ्च प्रदान तथा महिला सहभागितालाई प्रोत्साहन गर्ने उद्देश्यले प्रतियोगिता आयोजना गरिएको बैंकले जनाएको छ। बैंकले आगामी दिनमा पनि यस्ता कार्यक्रमलाई निरन्तरता दिने बताएको छ।
स्पेनमा दुई रेल ठोक्किँदा कम्तीमा १० जनाको मृत्यु
काठमाडौं । स्पेनमा दुई रेल आपसमा ठोक्किँदा कम्तीमा १० जनाको मृत्यु भएको छ । राजधानी म्याड्रिडबाट करिब १४० किलोमिटर दक्षिणमा पर्ने उर्दा सहरनजिक दुर्घटना भएको हो । बीबीसीका संवाददाता गाय हेजकोका अनुसार दुर्घटनामा भएको मानवीय क्षति प्रारम्भिक विवरणभन्दा निकै बढी हुन सक्ने अनुमान गरिएको छ । केही सञ्चारमाध्यमले मृतकको संख्या ४६ पुगेको उल्लेख गरे पनि अधिकारीहरूले हालसम्म कम्तीमा १० जनाको मृत्यु भएको पुष्टि गरेका छन् । म्याड्रिडबाट स्पेनको दक्षिणी क्षेत्रतर्फ गइरहेको तीव्र गतिको रेल रोकिराखिएको अर्को रेलसँग ठोक्किएको बताइएको छ । ठक्करपछि रेलका कम्तीमा दुईवटा डिब्बा लिकबाट उछिट्टिएर तल खसेका छन् । दुर्घटनामा परेको एउटा रेलका यात्रुले स्थानीय सञ्चारमाध्यमलाई बताएअनुसार यात्रा सुरु भएको करिब ४० मिनेटपछि ठूलो आवाजसहित शक्तिशाली धक्का महसुस भएको थियो । दुर्घटनास्थलमा अग्निनियन्त्रक, स्वास्थ्यकर्मी तथा आपत्कालीन उद्धार टोली परिचालन गरिएको छ । घाइतेहरूको उपचार तथा भग्नावशेषमा फसेका यात्रुको खोजी र उद्धार कार्य जारी छ । उद्धारका लागि तीनवटा हेलिकोप्टरसमेत परिचालन गरिएको छ । प्रारम्भिक विवरणअनुसार रेल सञ्चालनका क्रममा संकेत प्रणालीसँग सम्बन्धित मानवीय त्रुटिका कारण दुर्घटना भएको हुन सक्ने सरकारी अनुमान छ । यद्यपि दुर्घटनाको वास्तविक कारण पुष्टि भइसकेको छैन । स्पेनको रेल पूर्वाधार व्यवस्थापन निकाय एडिफका अनुसार दुर्घटना सरकारी रेल कम्पनी रेनेफे र निजी रेल कम्पनी इर्योका रेलबीच भएको हो । इर्योले म्याड्रिडदेखि सेभियासम्म रेल सेवा सञ्चालन गर्दै आएको छ । एडिफले सामाजिक सञ्जाल एक्समार्फत दुर्घटना भएको मार्गमा सञ्चालित सबै रेललाई बीचका स्टेसनमै रोकिएको जानकारी दिएको छ । कास्तिया–ला मान्चा क्षेत्रीय सरकारकी प्रवक्ता एस्तेर पाडियाले स्थानीय टेलिभिजनसँग कुरा गर्दै दुर्घटनामा कम्तीमा १० जनाको मृत्यु भएको पुष्टि गरेकी छन् । उनले उद्धार कार्य जारी रहेकाले मृतकको संख्या बढ्न सक्ने बताएकी छन् । स्पेनका प्रधानमन्त्री पेद्रो सान्चेजले टोलेडोमा भएको भीषण रेल दुर्घटनाप्रति दुःख व्यक्त गरेका छन् । उनले दुर्घटनाको खबरले आफू स्तब्ध भएको बताएका छन् । सामाजिक सञ्जाल एक्समा सन्देश लेख्दै सान्चेजले आफू यातायातमन्त्री र कास्तिया–ला मान्चा क्षेत्रीय सरकारका प्रमुखसँग निरन्तर सम्पर्कमा रहेको जानकारी दिएका छन् । उनले दुर्घटनाबाट प्रभावित व्यक्तिहरूको उद्धार, उपचार र सुरक्षा सुनिश्चित गर्न सबै सम्बन्धित सरकारी निकायबीच समन्वय भइरहेको बताएका छन् । सान्चेजले भनेका छन्, ‘सबै पीडित र उनीहरूका परिवारप्रति मेरो गहिरो समवेदना, ऐक्यबद्धता र समर्थन छ ।’ दुर्घटनापछि प्रधानमन्त्री सान्चेजसहित स्पेनका अन्य राजनीतिक नेताहरूले बुधबारका लागि तय गरिएका सबै सार्वजनिक कार्यक्रम रद्द गरेका छन् । ती कार्यक्रममा आगामी महिना हुने संसदीय निर्वाचनका प्रचारप्रसार कार्यक्रमसमेत समावेश थिए । यसअघि जनवरीमा पनि यही रेलमार्गमा दुई रेल ठोक्किँदा ४६ जनाको मृत्यु भएको थियो ।
एनएमबि बैंक र भिजाबीच अन्तर्राष्ट्रिय रकम स्थानान्तरणका लागि सम्झौता
काठमाडौं । एनएमबि बैंक लिमिटेडले अन्तर्राष्ट्रिय रकम स्थानान्तरण सेवा विस्तार गर्न भिजासँग सम्झौता गरेको छ । बैंकले ‘भिजा डाइरेक्ट टू एकाउन्ट’ सेवा सञ्चालनका लागि भिजासँग सम्झौता गरेको हो । भिजाको यो प्रविधि विश्वका १९५ भन्दा बढी देश तथा क्षेत्रमा सञ्चालनमा रहेको बैंकले जनाएको छ । सम्झौतापछि एनएमबि बैंकका ग्राहकले विदेशमा रकम पठाउन थप सहज विकल्प प्राप्त गर्नेछन् । यो प्रविधिमार्फत ग्राहकले झन्झटविना थप भरपर्दो र सुरक्षित रूपमा रकम स्थानान्तरण गर्न सक्ने बैंकको विश्वास छ । एनएमबि बैंकले हाल देशभर १९७ शाखा, १७६ एटीएम र नौ एक्सटेन्सन काउन्टरमार्फत बैंकिङ सेवा प्रदान गर्दै आएको छ ।
सिटिजन्स् बैंकका ग्राहकलाई एथलीट ल्यान्डमा १५ प्रतिशतसम्म छुट
काठमाडौं । सिटिजन्स् बैंक इन्टरनेसनल लिमिटेडका ग्राहकले ललितपुरको बालकुमारीस्थित एथलीट ल्यान्ड प्रालिमा १५ प्रतिशतसम्म छुट पाउने भएका छन् । यससम्बन्धी समझदारीपत्रमा सिटिजन्स् बैंक र एथलीट ल्यान्डबीच हस्ताक्षर भएको हो। समझदारीअनुसार बैंकका कार्डवाहक तथा मोबाइल बैंकिङका ग्राहकले एथलीट ल्यान्डमा खरिद तथा उपलब्ध सेवामा तोकिएको सर्तअनुसार १५ प्रतिशतसम्म छुट पाउनेछन्। यस सहकार्यबाट बैंकका ग्राहक लाभान्वित हुनुका साथै नगद कारोबारबाट डिजिटल कारोबारतर्फ आकर्षित हुने विश्वास बैंकले लिएको छ। बैंकले डिजिटल बैंकिङ माध्यमको प्रयोग बढाउन र ग्राहकलाई डिजिटल भुक्तानी गर्न प्रोत्साहित गर्ने उद्देश्यले समय–समयमा विभिन्न ग्राहकमैत्री सुविधा सञ्चालन गर्दै आएको जनाएको छ। डिजिटल कारोबार गर्दा उपलब्ध हुने छुटसम्बन्धी विस्तृत विवरण बैंकको वेबसाइटमा हेर्न सकिनेछ। सिटिजन्स् बैंकले यसअघि फोनपेसँगको सहकार्यमा नेपालमै पहिलो पटक ‘सिटिजन्स् फोनपे क्रेडिट कार्ड’ भर्चुअल क्रेडिट कार्ड सञ्चालनमा ल्याएको थियो। बैंकले युवालाई लक्षित ‘सिटिजन्स् जेन–जी सेभिङ्स अकाउन्ट’ र ‘सिटिजन्स् डिजी बैंक सेवा’ नामक एकीकृत अनलाइन प्लेटफर्म पनि सञ्चालनमा ल्याएको छ। त्यसैगरी, बैंकले फ्रिलान्सरलाई लक्षित गरी ‘फ्रिलान्सर सेभिङ्स अकाउन्ट’ नामक बचत खाता सुरु गरेको छ। नेपालमै पहिलो पटक मोबाइल बैंकिङ एपमार्फत सेयर आवेदन र सीआरएन नम्बरसम्बन्धी सेवा लिन सकिने सुविधा पनि बैंकले उपलब्ध गराएको जनाएको छ। बैंकले क्रस बैंक टेलर सुविधा पनि सञ्चालनमा ल्याएको छ। यस सुविधामार्फत अन्य बैंकका ग्राहकले सिटिजन्स् बैंकको शाखामा टेलर क्यूआर स्क्यान गरी नगद प्राप्त गर्न सक्छन्। बैंकका अनुसार देशभरका ६१ जिल्लामा फैलिएका २०० शाखा, १६७ एटीएम, तीन विस्तारित काउन्टर र ४२ शाखारहित बैंकिङ इकाइमार्फत २० लाख ८२ हजार ग्राहकलाई आधुनिक बैंकिङ सेवा प्रदान गर्दै आएको छ। बैंकले ‘बैंक अफ द इयर २०२४’ र ‘बैंक अफ द इयर २०२५’ को उपाधिसमेत प्राप्त गरेको जनाएको छ।
सलिकोको गल्फ प्रतियोगितामा टाटा नेक्सन कार जित्ने अवसर
काठमाडौं । सगरमाथा लुम्बिनी इन्स्योरेन्स कम्पनी लिमिटेड (सलिको) ले आगामी शनिबार ‘सलिको गल्फ टुर्नामेन्ट २०२६’ आयोजना गर्ने भएको छ । प्रतियोगिता अक्टोबर ३१ अर्थात् कात्तिक १५ गते काठमाडौंको गोकर्ण फरेस्ट रिसोर्टस्थित गल्फ कोर्समा हुनेछ । कम्पनीका अनुसार प्रतियोगितामा करिब १०० जना एमेच्योर गल्फ खेलाडी सहभागी हुने अपेक्षा गरिएको छ । प्रतियोगितामा मुख्यतः नेपालको कर्पोरेट क्षेत्रका प्रतिनिधिहरू सहभागी हुनेछन् । १८ होलको गल्फ कोर्समा सञ्चालन हुने प्रतियोगितामा विभिन्न विधामा पुरस्कार प्रदान गरिनेछ । प्रतियोगितामा उत्कृष्ट प्रदर्शन गर्ने खेलाडीलाई मेन्स विनर, रनरअप, बेस्ट ग्रस, लेडिज विनर, लेडिज रनरअप, सिनियर विनर, सुपर सिनियर विनर, मोस्ट बर्डिज, क्लोजेस्ट टु द पिन, लोङ्गेस्ट ड्राइभलगायतका विधामा पुरस्कृत गरिनेछ । प्रतियोगिताको विशेष आकर्षणका रूपमा होल नम्बर १० मा ‘होल इन वन’ गर्ने पहिलो खेलाडीले टाटा नेक्सन कार जित्ने अवसर पाउनेछन् । यस पुरस्कारले प्रतियोगितालाई थप रोमाञ्चक बनाउने कम्पनीको अपेक्षा छ । सलिकोका प्रमुख कार्यकारी अधिकृत चंकी क्षेत्रीले प्रतियोगिताले कम्पनीका सरोकारवाला र कर्पोरेट क्षेत्रका प्रतिनिधिबीच सम्बन्ध विस्तार गर्न सहयोग पुग्ने बताए । उनका अनुसार खेलकुदका यस्ता कार्यक्रमले प्रतिस्पर्धासँगै आपसी सद्भाव, सहकार्य र व्यावसायिक सम्बन्धलाई बलियो बनाउँछन् । कम्पनीले खेलकुदका माध्यमबाट सरोकारवालासँग विश्वास र दीर्घकालीन साझेदारी सुदृढ गर्ने उद्देश्यले प्रतियोगिता आयोजना गर्न लागेको जनाएको छ । सलिकोले विगत तीन दशकदेखि नेपालमा निर्जीवन बीमा सेवा प्रदान गर्दै आएको छ । कम्पनीले व्यक्तिगत ग्राहक, व्यवसाय तथा कर्पोरेट क्षेत्रलाई लक्षित गरी विभिन्न बीमा सेवा उपलब्ध गराउँदै आएको छ ।
मोरङको केरौन १३२ केभी सबस्टेसन निर्माण सम्पन्न
काठमाडौं । मोरङको कानेपोखरी गाउँपालिका–२ मा केरौन सबस्टेसनको निर्माण सम्पन्न भएको छ । मोरङ जिल्ला तथा आसपासका क्षेत्रको विद्युत मागलाई सम्बोधन गर्न र आपूर्तिलाई पर्याप्त, भरपर्दो तथा गुणस्तरीय बनाउन १३२ केभी क्षमताको सबस्टेसनको निर्माण सम्पन्न भएको हाे । सबस्टेसनलाई कात्तिक १४ र १५ गते चार्ज गर्नेगरी काम अगाडि बढाइएको छ । दुवै दिन पूर्व–पश्चिम १३२ केभी प्रसारण लाइनअन्तर्गत दुवही–दमक खण्डमा पर्ने केरौन सबस्टेसनमा लाइनलाई भित्र छिराउने (लुप इन) र बाहिर निकाल्ने (लुप आउट) कार्य गरिने छ । दुहवी–दमक १३२ केभी प्रसारण लाइनबाट सबस्टेसनमा विद्युत आपूर्ति हुनेछ । दुहवी–दमक प्रसारण लाइनलाई शनिबार र आइतबार बिहान ४ बजेदेखि मध्यान्ह १२ बजेसम्म बन्द गरी लुप इन र लुप आउटको कार्य गरिनेछ । जसकारण उक्त समयमा झापा, इलाम, पाँचथर ताप्लेजुङ जिल्लाका सम्पूर्ण भागहरू र मोरङको उर्लाबारी, पथरी आसपासका क्षेत्रमा विद्युत आपूर्ति बन्द हुने छ । सबस्टेसनमा १३२/३३ केभी, ६३ एमभिएका दुईवटा र ३३/११ केभी, २२.५ एमभिएको एउटा पावर ट्रान्सफर्मर राखिएको छ । सबस्टेसनको कुल क्षमता १४८.५ एमभिए रहेको छ । नेपाल विद्युत प्राधिकरणका कार्यकारी निर्देशक दीर्घायुकुमार श्रेष्ठले केरौन सबस्टेसन सञ्चालनमा आएपछि मोरङ जिल्लाको विद्युत आपूर्ति सुरक्षित, भरपर्दो हुने र प्राविधिक चुहावटसमेत घट्ने बताए । अहिले त्यस क्षेत्रमा विद्युत आपूर्तिका ३३ केभी लाइन धेरै लामो हुँदा प्राविधिक चुहावट बढी रहेको र उपभोक्ताले छिनछिनमा लाइन जाने (ट्रिपिङ)को समस्या भोगिरहेको कार्यकारी निर्देशक श्रेष्ठले उल्लेख गरे । अब ३३ केभी लाइनको लम्बाइ घट्दा हुँदा चुहावट पनि घट्ने साथै भोल्टेजनमा सुधार भई विद्युत आपूर्ति विश्वसनीय र गुणस्तरीय बन्ने उनको भनाइ छ । हाल उक्त क्षेत्रमा लागि दुहवी–रानी–रङ्गेली ३३ केभी करिब ५० किलोमिटर लामो लाइनबाट विद्युत आपूर्ति हुँदै आएको थियो । अब लाइनको लम्बाइ घट्ने हुँदा विद्युत आपूर्तिमा सुधार हुनेछ । सबस्टेसनबाट स्थानीय रुपमा विद्युत आपूर्तिका लागि ११ केभीका ५ वटा फिडर लाइनहरू निकालिएको छ । त्यस्तै, करौन–रङ्गेली र केरौन–विराटचोक ३३ केभी डबल सर्किट लाइन निर्माण गरिएको छ । सबस्टेसन सञ्चालनमा आएपछि उक्त लाइन पनि चार्ज गरिने केरौन सबस्टेसन आयोजना प्रमुख दर्शन राय यादवले बताए । आयोजना निर्माणका लागि २०७८ असारमा ठेक्का सम्झौता भएको थियो । अनुमानित लागत करिब एक अर्ब रुपैयाँ रहेको आयोजना नेपाल सरकार तथा विद्युत प्राधिकरणको लगानी र एसियाली विकास बैंक (एडिबी)को सहुलितपूर्ण ऋणमा निर्माण गरिएको हो ।
घर किन्न वा बनाउन नेपाल बैंकको विशेष कर्जा योजना, क्रेडिट कार्ड निःशुल्क
काठमाडौं । नेपाल बैंक लिमिटेडले आफ्नो ९०औँ वार्षिकोत्सवको अवसरमा विशेष सुविधासहितको आवास कर्जा योजना सार्वजनिक गरेको छ । बैंकले ९० दिनका लागि ‘नेपाल बैंक सर्वसुलभ आवास कर्जा योजना’ ल्याएको हो । बैंकका अनुसार यस योजनाअन्तर्गत ग्राहकले घर खरिद, घर निर्माण, मर्मत तथा अपार्टमेन्ट खरिदका लागि कर्जा लिन सक्नेछन् । कर्जाको ब्याजदर आधार दरमा ०.५ प्रतिशत प्रिमियमबाट सुरु हुनेछ । कर्जाको अवधि अधिकतम २५ वर्षसम्म रहनेछ भने सेवा शुल्क ०.२५ प्रतिशत मात्रै लाग्ने बैंकले जनाएको छ । यस योजनाअन्तर्गत कर्जा लिने ग्राहकले बैंकबाट ५ लाख रुपैयाँसम्मको लाइफटाइम निःशुल्क क्रेडिट कार्ड सुविधा पाउनेछन् । साथै, लकर सुविधाको वार्षिक शुल्कमा ५० प्रतिशत छुटसमेत उपलब्ध हुनेछ । बैंकका अनुसार यो योजना २०८३ कात्तिक १५ गतेदेखि २०८३ माघ १५ गतेसम्म लागू हुनेछ । नेपाल बैंक आगामी कात्तिक ३० गते आफ्नो स्थापनाको ९०औँ वर्षमा प्रवेश गर्दैछ । नेपालको पहिलो बैंकका रूपमा परिचित नेपाल बैंकले देशभर २३१ शाखा, २५० एटीएम र ५८ एक्सटेन्सन काउन्टरमार्फत करिब ३० लाख ग्राहकलाई वित्तीय सेवा प्रदान गर्दै आएको छ । बैंकले आधुनिक बैंकिङ प्रविधिको प्रयोग र ग्राहक सेवामा सुधार गर्दै सेवा विस्तार गरिरहेको जनाएको छ ।
