मलेखु–मुग्लिङ सडकखण्ड आज चार घण्टा बन्द हुने
काठमाडौं । पृथ्वी राजमार्गअन्तर्गत मलेखु-मुग्लिङ सडकखण्ड आज चार घण्टा बन्द हुने भएको छ । धादिङको मझिमटारमा निर्माणाधीन आकाशे पुलको यात्रु आवागमन गर्ने भाग (गर्डर) राख्नुपर्ने भएकाले सडक बन्द गर्न लागिएको हो । नागढुंगा-मुग्लिङ सडक आयोजना पश्चिम खण्डका अनुसार आज बिहान ११ बजेदेखि दिउँसो ३ बजेसम्म उक्त सडकखण्डमा सवारी आवागमन पूर्ण रूपमा बन्द गरिनेछ । आयोजनाका अनुसार पुलको गर्डर राख्ने कामका लागि सडक बन्द गर्न लागिएको हाे । उक्त अवधिमा मलेखु–मुग्लिङ सडकखण्ड भएर आवतजावत गर्ने सबै प्रकारका सवारीसाधन सञ्चालनमा रोक लगाइनेछ । सडक बन्द रहने समयमा सवारी चालक तथा यात्रुलाई धैर्यपूर्वक यथास्थानमा रहन, लेन अनुशासन कायम गर्न र ट्राफिक नियम पालना गर्न आयोजनाले अनुरोध गरेको छ ।
एनआईसी एसियाको नाफा १२.७४ करोड रुपैयाँ, ईपीएस पनि उकालो
काठमाडौं । एनआईसी एसिया बैंकको चालु आर्थिक वर्ष २०८३/८४ को पहिलो त्रैमासमा खुद नाफा ४.३२ प्रतिशतले बढेर १२ करोड ७४ लाख रुपैयाँ आर्जन गरेको छ । गत आर्थिक वर्षको असोजसम्म बैंकले १२ करोड २१ लाख रुपैयाँ खुद नाफा कमाएको थियो । बैंकको खुद ब्याज आम्दानी १७.३६ प्रतिशतले घटेको छ । गत वर्षको असोजसम्म २ अर्ब २८ करोड ६० लाख रुपैयाँ रहेको खुद ब्याज आम्दानी चालु आर्थिक वर्षको सोही अवधिमा १ अर्ब ८८ करोड ९२ लाख रुपैयाँमा झरेको छ । बैंकको सञ्चालन मुनाफा १६.५९ प्रतिशतले घटेर १६ करोड १४ लाख रुपैयाँमा सीमित भएको छ । गत वर्षको सोही अवधिमा यस्तो मुनाफा १९ करोड ३५ लाख रुपैयाँ थियो । त्यस्तै, बैंकको कुल सञ्चालन आम्दानी १२.६८ प्रतिशतले घटेर २ अर्ब ४२ करोड ६८ लाख रुपैयाँ कायम भएको छ । गत वर्षको असोजसम्म यस्तो आम्दानी २ अर्ब ७७ करोड ९० लाख रुपैयाँ थियो । यद्यपि, खुद शुल्क तथा कमिसन आम्दानी भने ५.३२ प्रतिशतले बढेर ३५ करोड ६ लाख रुपैयाँ पुगेको छ । बैंकको कर्जा नोक्सानी व्यवस्थाबापतको रकम २१.६५ प्रतिशतले घटेको छ । गत वर्षको असोजसम्म १ अर्ब १८ करोड ६४ लाख रुपैयाँ रहेको यस्तो रकम चालु आर्थिक वर्षको सोही अवधिमा ९२ करोड ९४ लाख रुपैयाँमा झरेको छ । कर्मचारी खर्च भने ४.३३ प्रतिशतले बढेर ८३ करोड ६० लाख रुपैयाँ पुगेको छ । बैंकको निक्षेप र कर्जा दुवै घटेका छन् । गत वर्षको असोजसम्म ३ खर्ब ४३ अर्ब ६७ करोड रुपैयाँ निक्षेप संकलन गरेको बैंकको चालु आर्थिक वर्षको असोजसम्म निक्षेप ३ खर्ब ४१ अर्ब ८४ करोड रुपैयाँमा झरेको छ । यो ०.५३ प्रतिशतको गिरावट हो । त्यस्तै, बैंकको कर्जा तथा सापटी ०.४२ प्रतिशतले घटेर १ खर्ब ९१ अर्ब २० करोड रुपैयाँ कायम भएको छ । गत वर्षको असोजसम्म यस्तो कर्जा १ खर्ब ९२ अर्ब १ करोड रुपैयाँ थियो । बैंकको चुक्ता पुँजी १४ अर्ब ९१ करोड ७५ लाख रुपैयाँ र जगेडा कोष २.२० प्रतिशतले बढेर २६ अर्ब २१ करोड रुपैयाँ पुगेको छ । बैंकको खराब कर्जा अनुपात उल्लेख्य बढेको छ । गत आर्थिक वर्षको असोजसम्म ६.९९ प्रतिशत रहेको निष्क्रिय कर्जा (एनपीएल) अनुपात चालु आर्थिक वर्षको असोजसम्म बढेर ९.८१ प्रतिशत पुगेको छ । त्यस्तै, पूँजी पर्याप्तता अनुपात १४.०३ प्रतिशतबाट घटेर ११.१२ प्रतिशतमा झरेको छ । बैंकको प्रतिसेयर आम्दानी (ईपीएस) ३.२१ रुपैयाँबाट बढेर ३.३५ रुपैयाँ पुगेको छ । बैंकको प्रतिसेयर नेटवर्थ १७२.५३ रुपैयाँ रहेको छ ।
करदाता प्रोत्साहन पुरस्कारका १६ विजेता घोषणा हुँदै, क्रिकेट खेलाडीले छनोट गर्ने
काठमाडौं । आन्तरिक राजस्व विभागले कात्तिक महिनाको पहिलो पाक्षिक करदाता प्रोत्साहन पुरस्कार कार्यक्रमका विजेता आज घोषणा गर्ने भएको छ । कात्तिक १ देखि १५ गतेसम्मको अवधिका लागि १५ जना नियमित विजेता र एक जना बम्पर विजेता गरी कुल १६ जनाको नाम सार्वजनिक गर्न लागिएको हो । विभागका अनुसार पुरस्कार विजेता छनोट कार्यक्रममा नेपाल प्रिमियर लिग (एनपीएल) खेलिरहेका क्रिकेट खेलाडी सहभागी हुनेछन् । उनीहरूको सहभागितामा विजेता छनोट गरिने विभागले जनाएको छ । विजेता घोषणा कार्यक्रम आज बिहान ९:३० बजे अर्थ मन्त्रालयको सिंहदरबारस्थित सुवर्ण हलमा आयोजना हुँदैछ ।
सिद्धार्थ बैंकको नाफामा १६२.७१ प्रतिशत उछाल, व्यवसाय वृद्धि ४.२५ प्रतिशत
काठमाडौं । सिद्धार्थ बैंकको चालु आर्थिक वर्ष २०८३/८४ को पहिलो त्रैमासमा खुद नाफा १६२.७१ प्रतिशतले बढेर ८५ करोड १५ लाख ६५ हजार रुपैयाँ आर्जन गरेको छ । गत आर्थिक वर्षको सोही अवधिमा बैंकले ३२ करोड ४० लाख ९१ हजार रुपैयाँ खुद नाफा कमाएको थियो । चालु आर्थिक वर्षको पहिलो त्रैमासमा बैंकको सञ्चालन मुनाफासमेत १४७.१० प्रतिशतले बढेर १ अर्ब २५ करोड ५ लाख २७ हजार रुपैयाँ पुगेको छ । गत वर्षको सोही अवधिमा यस्तो मुनाफा ५० करोड ६० लाख ९२ हजार रुपैयाँ थियो । बैंकको खुद ब्याज आम्दानी १०.५० प्रतिशतले बढेर २ अर्ब ३८ करोड ९६ लाख रुपैयाँ पुगेको छ । गत वर्षको असोजसम्म यस्तो आम्दानी २ अर्ब १६ करोड २५ लाख रुपैयाँ थियो । त्यस्तै, खुद शुल्क तथा कमिसन आम्दानी १०.९४ प्रतिशतले बढेर ५७ करोड ७ लाख रुपैयाँ पुगेको छ । बैंकको कुल सञ्चालन आम्दानी ७.५३ प्रतिशतले बढेर ३ अर्ब ३२ करोड ३४ लाख रुपैयाँ पुगेको छ । गत वर्षको सोही अवधिमा यस्तो आम्दानी ३ अर्ब ९ करोड ६ लाख रुपैयाँ थियो । यस अवधिमा बैंकको कर्जा नोक्सानी व्यवस्थाबापतको रकम भने ५१.४७ प्रतिशतले घटेको छ । गत वर्षको असोजसम्म १ अर्ब ३८ करोड ८७ लाख रुपैयाँ रहेको यस्तो रकम चालु आर्थिक वर्षको सोही अवधिमा ६७ करोड ३९ लाख रुपैयाँमा झरेको छ । यता, कर्मचारी खर्च भने २१.५७ प्रतिशतले बढेर ९४ करोड ९३ लाख रुपैयाँ पुगेको छ । बैंकको निक्षेप र कर्जा दुवै बढेका छन् । गत वर्षको असोजसम्म ३ खर्ब २७ अर्ब १ करोड रुपैयाँ निक्षेप संकलन गरेको बैंकले चालु आर्थिक वर्षको असोजसम्म ३ खर्ब ३४ अर्ब ८२ करोड रुपैयाँ निक्षेप संकलन गरेको छ । यो २.३९ प्रतिशतको वृद्धि हो । त्यस्तै, बैंकको कर्जा तथा सापटी ४.२५ प्रतिशतले बढेर २ खर्ब ४४ अर्ब ४ करोड रुपैयाँ पुगेको छ । गत वर्षको सोही अवधिमा यस्तो कर्जा २ खर्ब ३४ अर्ब १० करोड रुपैयाँ थियो । बैंकको चुक्ता पुँजी १९ अर्ब ७७ करोड रुपैयाँ पुगेको छ । बैंकको जगेडा कोष भने ६.५० प्रतिशतले घटेर १५ अर्ब ८१ करोड रुपैयाँमा सीमित भएको छ । गत वर्षको सोही अवधिमा जगेडा कोषमा १६ अर्ब ९१ करोड रुपैयाँ थियो । बैंकको खराब कर्जा अनुपात सामान्य घटेको छ । गत वर्षको असोजसम्म ३.८० प्रतिशत रहेको निष्क्रिय कर्जा (एनपीएल) अनुपात चालु आर्थिक वर्षको असोजसम्म ३.७० प्रतिशत कायम भएको छ । त्यस्तै, पूँजी पर्याप्तता अनुपात १२.२१ प्रतिशतबाट घटेर ११.४७ प्रतिशतमा झरेको छ । बैंकको प्रतिसेयर आम्दानी (ईपीएस) ७.८२ रुपैयाँबाट बढेर १८.७६ रुपैयाँ पुगेको छ । बैंकको प्रतिसेयर नेटवर्थ भने १९९.६१ रुपैयाँ रहेको छ । बैंकको वितरणयोग्य मुनाफा ३ अर्ब ५७ करोड ३७ लाख रुपैयाँ पुगेको छ । गत आर्थिक वर्षको असोजसम्म यस्तो मुनाफा १ अर्ब ६१ करोड ६१ लाख रुपैयाँ थियो ।
एनपीएलमा आज काठमाडौं-कर्णाली र सुदूरपश्चिम-चितवन भिड्दै
काठमाडौं । नेपाल प्रिमियर लिग (एनपीएल) अन्तर्गत आज सोमबार दुई खेल हुँदैछन् । कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने पहिलो खेलमा काठमाडौं गोर्खाज र कर्णाली याक्स तथा दोस्रो खेलमा सुदूरपश्चिम रोयल्स र चितवन राइनोजबीच प्रतिस्पर्धा हुनेछ । पहिलो खेल दिउँसो साढे १२ बजे र दोस्रो खेल साँझ ५ बजे सुरु हुनेछ । आजको पहिलो खेलमा काठमाडौं गोर्खाज पहिलो जितको खोजीमा मैदान उत्रनेछ । पहिलो खेलमा काठमाडौं जनकपुर बोल्ट्ससँग पराजित भएको थियो । यता, कर्णाली याक्स भने लगातार तेस्रो जित निकाल्ने लक्ष्यमा हुनेछ । यसअघिका दुवै खेलमा जित हात पारेको कर्णालीले जनकपुर बोल्ट्स र विराटनगर किंग्सलाई हराएको थियो । दोस्रो खेलमा सुदूरपश्चिम रोयल्स र चितवन राइनोजबीच प्रतिस्पर्धा हुनेछ । सुदूरपश्चिमका लागि यो खेल अंकतालिकामा आफ्नो स्थिति सुधार गर्ने अवसर हुनेछ । उसले हालसम्म खेलेका तीन खेलमध्ये एकमा जित र दुईमा हार व्यहोरेको छ । अर्कोतर्फ, चितवन राइनोज प्रतियोगितामा अपराजित छ । पहिलो खेलमा जित हात पारेको चितवनको दोस्रो खेल वर्षाका कारण रद्द भएपछि दुवै टोलीले अंक बाँडेका थिए । आजको खेल जित्दै चितवन अपराजित यात्रा कायम राख्न चाहन्छ ।
श्रेष्ठ दम्पत्तिलाई अदालतको २१ दिने म्याद, के हो कर्जा विवाद ?
काठमाडौं । तिसा बचत तथा ऋण सहकारी संस्था लिमिटेडले दायर गरेको कर्जा लेनदेनसम्बन्धी मुद्दामा काठमाडौं जिल्ला अदालतले शिवकुमार श्रेष्ठ र उनकी श्रीमती बिनु श्रेष्ठका नाममा २१ दिने म्याद जारी गरेको छ । अदालतको सूचनाअनुसार सहकारी संस्थाले श्रेष्ठसहितका प्रतिवादीविरुद्ध कर्जा लेनदेनसम्बन्धी मुद्दा दायर गरेको हो । उक्त मुद्दामा अदालतले गत असार २६ गते दिएको आदेशअनुसार प्रतिवादीका नाममा पत्रिकामार्फत म्याद सूचना प्रकाशित गरिएको हो । सूचनामा प्रकाशित भएको मितिले बाटोको म्यादबाहेक २१ दिनभित्र प्रतिउत्तरपत्रसहित अदालतमा उपस्थित हुन भनिएको छ । तोकिएको अवधिभित्र उपस्थित भए प्रतिवादीको व्यहोरा बुझी कानुनबमोजिम कारबाही अघि बढाइने सूचनामा उल्लेख छ । तोकिएको म्यादभित्र अदालतमा उपस्थित नभए कानुनबमोजिम हुने र पछि उजुर गर्न नपाइने पनि सूचनामा जनाइएको छ । अदालतको सूचनाअनुसार धादिङ जिल्लाको साविक निलकण्ठ गाविस-५ घर भई हाल काठमाडौं महानगरपालिका-१, गैरीधारामा बस्दै आएका ४५ वर्षीय शिवकुमार श्रेष्ठ र उनकी ३५ वर्षीया श्रीमती बिनु श्रेष्ठका नाममा म्याद जारी गरिएको हो । ०८२-सीपी-०५०९ नम्बरको उक्त मुद्दामा तिसा बचत तथा ऋण सहकारी संस्था लिमिटेड वादी र शिवकुमार श्रेष्ठसमेत प्रतिवादी रहेका छन् ।
रेल चलाउन चालक खोज्दै सरकार
काठमाडौं । सरकारले रेल चालक (लोको पाइलट) सूचीकृत गर्न आवेदन माग गरेको छ । नेपालमा रेल सेवा सञ्चालनलाई थप व्यवस्थित र प्रभावकारी बनाउने उद्देश्यसहित नेपाल रेल्वे बोर्डले नेपाली नागरिकबाट रेल चालकको सूची तयार गर्न आवेदन आह्वान गरेको हो । बोर्डले दक्ष, योग्य, इमानदार र जिम्मेवार रेल चालक आवश्यक रहेको भन्दै इच्छुक नेपाली नागरिकलाई ३५ दिनभित्र आवश्यक कागजातसहित दरखास्त पेस गर्न आग्रह गरेको छ । बोर्डका अनुसार यो आवेदन नयाँ नियुक्तिका लागि नभई रेल चालकको सूची तयार गर्ने प्रयोजनका लागि माग गरिएको हो । रेल चालकका रूपमा सूचीकृत हुन इच्छुकले नेपाली नागरिकताको प्रमाणपत्रको प्रतिलिपि, शैक्षिक योग्यताको प्रमाणपत्र, मान्यताप्राप्त संस्थाबाट जारी रेल चालकको लाइसेन्सको प्रतिलिपि तथा अनुभव र तालिमसम्बन्धी प्रमाणपत्र पेस गर्नुपर्नेछ । बोर्डले आवेदन पेस गर्ने अन्तिम मिति मंसिर २१ गते तोकेको छ । इच्छुक नेपाली नागरिकले नेपाल रेल्वे बोर्डको केन्द्रीय कार्यालयमा दरखास्त पेस गर्न सक्नेछन् ।
३.९० प्रतिशत बढ्यो प्राइम बैंकको विजनेश, नाफा १.१८ अर्ब रुपैयाँ
काठमाडौं । प्राइम कमर्सियल बैंकको चालु आर्थिक वर्ष २०८३/८४ को पहिलो त्रैमासमा खुद नाफा ५.६२ प्रतिशत घटेर १ अर्ब १८ करोड ७६ लाख ५७ हजार रुपैयाँमा सीमित भएको छ । बैंकले गत आर्थिक वर्षको पहिलो त्रैमासमा १ अर्ब २५ करोड ८४ लाख ३० हजार रुपैयाँ खुद नाफा कमाएको थियो । बैंकको सञ्चालन मुनाफासमेत ५.४८ प्रतिशतले घटेको छ । गत वर्षको पहिलो त्रैमासमा २ अर्ब ७ करोड ५८ लाख रुपैयाँ रहेको सञ्चालन मुनाफा चालु आर्थिक वर्षको सोही अवधिमा १ अर्ब ९६ करोड १९ लाख रुपैयाँमा सीमित भएको छ । बैंकको खराब कर्जा अनुपात भने बढेको छ । गत आर्थिक वर्षको पहिलो त्रैमासमा ५.८६ प्रतिशत रहेको निष्क्रिय कर्जा (एनपीएल) अनुपात चालु आर्थिक वर्षको पहिलो त्रैमासमा बढेर ७.१५ प्रतिशत पुगेको छ । बैंकको कर्जा नोक्सानी व्यवस्थाबापतको रकम २८.३० प्रतिशतले बढेको छ । गत वर्षको पहिलो त्रैमासमा ४८ करोड ९ लाख रुपैयाँ रहेको यस्तो रकम चालु आर्थिक वर्षको सोही अवधिमा बढेर ६१ करोड ७० लाख रुपैयाँ पुगेको छ । समीक्षा अवधिमा बैंकको खुद ब्याज आम्दानी भने ८.२४ प्रतिशतले बढेको छ । गत वर्षको पहिलो त्रैमासमा २ अर्ब ४० करोड ७४ लाख रुपैयाँ रहेको खुद ब्याज आम्दानी चालु आर्थिक वर्षको पहिलो त्रैमासमा बढेर २ अर्ब ६० करोड ५७ लाख रुपैयाँ पुगेको छ । बैंकको निक्षेप संकलनमा सामान्य गिरावट आएको छ भने कर्जा लगानी बढेको छ । गत आर्थिक वर्षको पहिलो त्रैमासमा २ खर्ब ७७ अर्ब ७४ करोड रुपैयाँ निक्षेप रहेको बैंकको चालु आर्थिक वर्षको पहिलो त्रैमासमा २ खर्ब ७५ अर्ब ६५ करोड रुपैयाँ निक्षेप रहेको छ । यो ०.७५ प्रतिशतको गिरावट हो । त्यस्तै, बैंकको कर्जा तथा सापटी ३.९० प्रतिशतले बढेर २ खर्ब ३५ अर्ब २७ करोड रुपैयाँ पुगेको छ । गत वर्षको पहिलो त्रैमासमा यस्तो कर्जा २ खर्ब २६ अर्ब ४४ करोड रुपैयाँ थियो । बैंकको चुक्ता पुँजी २० अर्ब ९५ करोड ४७ लाख रुपैयाँ र सञ्चित मुनाफा ५.६८ प्रतिशतले बढेर २ अर्ब १ करोड ५७ लाख रुपैयाँ पुगेको छ भने जगेडा कोष ६.८८ प्रतिशतले बढेर १४ अर्ब ९३ करोड ७४ लाख रुपैयाँ पुगेको छ । बैंकको पूँजी पर्याप्तता अनुपात १२.१७ प्रतिशतबाट बढेर १२.४२ प्रतिशत पुगेको छ । बैंकको प्रतिसेयर आम्दानी (ईपीएस) २४.०२ रुपैयाँ पैसाबाट घटेर २२.६७ रुपैयाँ कायम भएको छ । प्रतिसेयर नेटवर्थ भने १७५.८० रुपैयाँ बढेर १८०.९० रुपैयाँ पुगेको छ ।
