अवरुद्ध बिपी राजमार्ग पुनः सञ्चालनमा
काठमाडौं । वर्षाका कारण अवरुद्ध बनेको बीपी राजमार्गका विभिन्न ठाउँमा पहिरो र लेदो पन्छाएपछि आइतबार बेलुकादेखि यातायात सञ्चालनमा आएका छन् । शुक्रबार र शनिबारको वर्षाका कारण काभ्रेपलाञ्चोकको चोकडाँडादेखि नेपालथोकसम्म विभिन्न स्थानमा पहिरो खस्नुका साथै सडकमा लेदो र ढुङ्गा थुप्रिएको थियो । यसरी सडक अवरुद्ध भएपछि शनिबार बिहानदेखि यातायात आवागमन पूर्ण रूपमा बन्द भएको थियो । जिल्ला प्रहरी कार्यालयका सूचना अधिकारी एवं प्रहरी नायब उपरीक्षक रबिन विष्टका अनुसार अवरुद्ध सडक खुलाउन आइतबार बिहानदेखि डोजरको सहायताले पहिरो र लेदो हटाउन सुरु गरिएको थियो । सडक खुलाउने कार्यका लागि सुरक्षाकर्मी तथा प्राविधिक टोलीसमेत परिचालन गरिएको थियो । रोशी गाउँपालिका-९ पिन्थलीमा खहरे खोलाको ढुङ्गा र माटो सहितको लेदो तथा वडा नम्बर ८ गिम्दीबेँसीमा खसेको पहिरो पन्छाएपछि अवरुद्ध सडक पुनः सञ्चालनमा आएको जिल्ला प्रहरी कार्यालयले जनाएको छ ।
दशौँ राष्ट्रिय खेलकुदको पूर्वाधारबारे मन्त्री पोखरेल र कर्णालीका मुख्यमन्त्रीबीच छलफल
काठमाडौं । आगामी दशौं राष्ट्रिय खेलकुद प्रतियोगिताको तयारीलाई थप तिब्रता दिने र व्यवस्थित बनाउने उद्देश्यले शिक्षा तथा खेलकुद मन्त्री सस्मित पोखरेलले कर्णाली प्रदेशका मुख्यमन्त्री र सामाजिक विकास मन्त्रीसँग सुर्खेतमा छलफल गरेका छन् । दशौं राष्ट्रिय खेलकुद प्रतियोगिताको आयोजना स्थलसमेत रहेको कर्णाली प्रदेशमा खेलकुद पूर्वाधार निर्माण, व्यवस्थापन र अन्य आवश्यक तयारीका सन्दर्भमा सो छलफल केन्द्रित रहेको हो । सुर्खेतमा सम्पन्न उक्त भेटमा शिक्षा तथा खेलकुद मन्त्री सस्मित पोखरेल, कर्णाली प्रदेशका मुख्यमन्त्री मंगलबहादुर शाही र सामाजिक विकास मन्त्री जीतबहादुर मल्लबीच प्रतियोगितालाई भव्य र ऐतिहासिक रूपमा सफल पार्न संघीय र प्रदेश सरकारबीच हुनुपर्ने समन्वय, पूर्वाधारहरूको अवस्था लगायतका विषयमा कुराकानी भएको हो । छलफलका क्रममा मन्त्री पोखरेलले तोकिएकै समयमा प्रतियोगिता सम्पन्न गर्न मन्त्रालयले सबै पक्षसँग सहकार्य गरिरहेको बताउँदै कर्णाली प्रदेशमा खेलकुद पूर्वाधारको विकास र व्यवस्थापनमा संघीय सरकारको तर्फबाट पूर्ण सहयोग रहने प्रतिबद्धता व्यक्त गरे । त्यस्तै, मुख्यमन्त्री मंगलबहादुर शाही र सामाजिक विकास मन्त्री जीतबहादुर मल्लले दशौं राष्ट्रिय खेलकुदलाई सफल बनाउन प्रदेश सरकार पूर्ण रूपमा लागिपरेको जानकारी गराउँदै आवश्यक तयारी अन्तिम चरणमा पुगेको बताएका थिए । मन्त्री पोखरेल दशौं राष्ट्रिय खेलकुद प्रतियोगिताको तयारी, पूर्वाधार निरीक्षण तथा सरोकारवालाहरूसँगको समन्वयका लागि हाल सुर्खेत भ्रमणमा छन् ।
पोखरामाथि ९ रनको रोमाञ्चक जित निकाल्दै जनकपुर बोल्ट्सको लगातार दोस्रो जित
काठमाडौं । जनकपुर बोल्ट्सले तेस्रो संस्करणको नेपाल प्रिमियर लिग (एनपीएल) टी-२० क्रिकेट प्रतियोगितामा दोस्रो जित दर्ता गरेको छ । त्रिवि क्रिकेट मैदानमा आइतबार भएको रोमाञ्चक खेलमा पोखरालाई ९ रनले पराजित गर्दै जनकपुरले आफ्नो दोस्रो जित निकालेको हो । यता पराजित पोखराले भने प्रतियोगितामा लगातार दोस्रो हार बेहोरेको छ । जनकपुरले जितका लागि दिएको १४८ रनको मध्यम लक्ष्य पछ्याएको पोखरा निर्धारित २० ओभरमा ९ विकेट गुमाउँदै १३८ रनमा समेटियो । पोखराका लागि कप्तान कुशल भुर्तेलले २४ बलमा ५ चौका प्रहार गर्दै सर्वाधिक ३५ रनको योगदान दिए पनि टोलीलाई जित दिलाउन सकेनन् । त्यसैगरी विपिन आचार्यले २०, किरण ठगुन्नाले १५ तथा अविजित रहेका विपिन खत्रीले १७ रन बनाए । टोलीका अन्य ब्याटरहरू- दिनेश खरेल (३), महेदी हसन (८), शाकिब अल हसन (९), अर्जुन घर्ती (७), चमिका करुणारत्ने (४) र मोहम्मद सैफुद्दिन (०) सस्तैमा आउट भए भने प्रतिक पोखरेल २ रनमा अविजित रहे । पोखराको इनिङ्सलाई ध्वस्त पार्न जनकपुरका स्पिनरहरू हाबी भए । जनकपुरका मोइन अलीले उत्कृष्ट बलिङ गर्दै ३ विकेट लिए भने कप्तान हर्मीत सिंह र सैफ हसनले दुई/दुई विकेट हात पारे । साथै जिम्मी निशम र ललित राजवंशीको नाममा एक/एक विकेट रह्यो । यसअघि टस हारेर पहिले ब्याटिङको निम्तो पाएको जनकपुरले निर्धारित २० ओभरमा ७ विकेट गुमाएर १४७ रन बनाएको थियो । जनकपुरका लागि ओपनर त्रितराज दासले ५५ बलमा ७ चौका र १ छक्काको मद्दतले सर्वाधिक ६१ रनको अर्धशतकीय इनिङ्स खेले । उनले पहिलो विकेटका लागि मोइन अलीसँग ४७ रनको महत्वपूर्ण साझेदारी गरेका थिए । मोइनले १६ बलमा २१ रन जोडे । यस्तै तल्लो क्रममा अभिषेक तिवारीले १० बलमा आक्रामक २४ रनको अविजित योगदान दिए । अन्य ब्याटरहरूमा जिम्मी निशमले ११, हर्मीत सिंह र अनिलकुमार शाहले समान ९–९ रन जोडे भने सैफ हसन (१) र अमरसिंह रौटेला (०) आउट भए । पोखराका लागि सबै विकेट विदेशी खेलाडीहरूले हात पारे। जसमध्ये बङ्गलादेशी स्टार शाकिब अल हसनले कसिलो बलिङ गर्दै ४ ओभरमा १५ रन मात्र खर्चेर सर्वाधिक ३ विकेट लिए । चमिका करुणारत्नेले २ विकेट तथा महेदी हसन र मोहम्मद सैफुद्दिनले एक/एक विकेट लिए । एनपीएलमा सोमबार २ खेल हुनेछ । दिनको पहिलो खेलमा काठमाडौँ गोखार्ज र कर्णाली याक्स खेल्नेछन् । सो खेल मध्यान्ह साढे १२ बजे सुरु हुनेछ । दिनको दोस्रो खेलमा सुदूरपश्चिम रोयल्स र चितवन राइनोज खेल्ने तालिका छ। सो खेल साँझ ५ बजे सुरु हुनेछ ।
आज राति कहाँ कहाँ हुनेछ वर्षा ?
काठमाडौं । हाल नेपालमा पश्चिमी वायुको आंशिक प्रभाव परेको मौसम पूर्वानुमान महाशाखाले जनाएको छ । जसका कारण देशभर आंशिक बदली हुनुका साथै दार्चुला, बझाङ र हुम्लाका एक/दुई स्थानमा हल्का वर्षा र हिमपात भइरहेको छ । महाशाखाका अनुसार आज राति देशभर आंशिक बादल लाग्नेछ । यस क्रममा कोसी, बागमती, गण्डकी, कर्णाली र सुदूरपश्चिम प्रदेशका हिमाली भू-भागका एक/दुई स्थानमा हल्का वर्षा र हिमपातको सम्भावना रहेको छ । साथै, तराई भू-भाग, उपत्यका तथा खोँचहरूमा बिहानीपख केही स्थानमा हुस्सु तथा कुहिरो लाग्ने पूर्वानुमान छ । त्यस्तै, सोमबार हिमाली र पहाडी भू-भागका साथै लुम्बिनी प्रदेशको तराई भू-भागका एक/दुई स्थानमा हल्का वर्षाको सम्भावना रहेको छ । मंगलबार भने कोसी प्रदेशका हिमाली तथा पहाडी भू-भागका एकाध ठाउँमा हल्का वर्षा र हिमपातको सम्भावना देखिएको छ । यसैगरी, बुधबार कोसी, बागमती र गण्डकी प्रदेशका हिमाली र पहाडी भू-भागमा हल्का वर्षा र हिमपात हुन सक्ने महाशाखाले जनाएको छ । आगामी बिहीबारसम्म नै देशका तराई भू-भाग, उपत्यका तथा खोँचहरूमा बिहानीपख हुस्सु र कुहिरो लाग्ने सम्भावना रहेकाले चिसोबाट बच्न आवश्यक सतर्कता अपनाउन महाशाखाले अनुरोध गरेको छ ।
फ्रान्समा प्रदर्शनका क्रममा हिंसा भएपछि ७७९ जना पक्राउ
काठमाडौं । फ्रान्समा लगातार तेस्रो सातासम्म जारी विरोध प्रदर्शनका क्रममा हिंसा भड्किएपछि प्रहरीले झन्डै ८०० जनालाई पक्राउ गरेको छ । शनिबार देशका विभिन्न सहरमा भएको प्रदर्शनमा ३ लाख २० हजारभन्दा बढी मानिस सहभागी भएका थिए । फ्रान्सको गृह मन्त्रालयका अनुसार अधिकांश प्रदर्शन शान्तिपूर्ण रहे पनि केही स्थानमा प्रदर्शनकारी र प्रहरीबीच झडप भएको थियो । त्यसपछि प्रहरीले देशभरबाट ७७९ जनालाई पक्राउ गरेको हो । प्रदर्शनका क्रममा केही समूहले प्रहरीमाथि ढुंगा, बोतल र पेट्रोल बम प्रहार गरेका थिए। प्रहरीले भिड नियन्त्रण गर्न अश्रुग्यास र पानीको फोहोरा प्रयोग गरेको थियो । झडपका क्रममा तीन प्रहरी घाइते भएका छन् । हिंसाका क्रममा केही सवारीसाधन र पसलमा समेत क्षति पुगेको छ । प्रदर्शनलाई ध्यानमा राख्दै फ्रान्स सरकारले देशभर करिब ७० हजार सुरक्षाकर्मी परिचालन गरेको थियो । राजधानी पेरिसमा मात्रै करिब ७० हजार मानिस प्रदर्शनमा सहभागी भएको सरकारी तथ्यांक छ । पछिल्ला तीन सातादेखि फ्रान्समा लगातार प्रदर्शन हुँदै आएको छ । अक्टोबर १७ मा भएको पहिलो ठूलो प्रदर्शनमा ५ लाख ५० हजार र अक्टोबर २४ मा भएको दोस्रो प्रदर्शनमा ४ लाख १० हजार मानिस सहभागी भएका थिए । ती प्रदर्शनका क्रममा पनि तोडफोड र लुटपाटका घटना भएका थिए । विद्यालयको कमजोर पूर्वाधार, शिक्षक अभाव, विश्वविद्यालय भर्ना प्रणालीमा देखिएको असमानता र बढ्दो महँगीको विरोधमा सुरु भएको आन्दोलनमा पछिल्लो समय विभिन्न श्रमिक संगठन तथा सरकारप्रति असन्तुष्ट समूह पनि सहभागी भएका छन् । यसैबीच जर्मनीका ३० भन्दा बढी सहरमा पनि शनिबार युवाहरूले प्रदर्शन गरेका छन् । उनीहरूले शिक्षा, स्वास्थ्य, आवास र जलवायु संरक्षणमा सरकारी लगानी बढाउन तथा दैनिक जीवनयापन सहज बनाउन माग गरेका छन् । जर्मनीमा पनि अधिकांश प्रदर्शन शान्तिपूर्ण रहे पनि फ्र्यांकफर्ट, कोलोन र बर्लिनलगायत सहरमा राति हिंसा भड्किएको थियो । फ्र्यांकफर्टमा केही समूहले पसलमा तोडफोड र लुटपाट गर्नुका साथै प्रहरीमाथि ढुंगा र पेट्रोल बम प्रहार गरेका थिए । उक्त घटनामा ३० जनालाई नियन्त्रणमा लिइएको छ । युरोपका विभिन्न देशमा फैलिएको पछिल्लो प्रदर्शनमा युवाहरूको सहभागिता उल्लेख्य देखिएको छ ।
सही समय आएपछि सबैको गलत समय आउँछ, उम्किन्छु भनेर सपना नदेखे हुन्छ : प्रधानमन्त्री
काठमाडौं । प्रधानमन्त्री वालेन्द्र शाह (बालेन) ले गल्ती वा गलत काम गर्ने जोकसैलाई पनि सही समय आएपछि कारबाहीको दायरामा ल्याइने चेतावनी दिएका छन् । सामाजिक सञ्जाल फेसबुकमार्फत एक सन्देश जारी गर्दै उनले एक/दुई जना उम्किने सपना नदेख्न चेतावनी दिएका हुन् । कुनै विशिष्ट प्रसंग उल्लेख नगरीकन प्रधानमन्त्री शाहले सामाजिक सञ्जालमा लेखेका छन्, ‘सही समय आएपछि, सबैको गलत समय आउँछ, एक/दुई जना उम्किन्छु भनेर सपना नदेखे हुन्छ ।’ अदालतका न्यायाधीशहरूसँग बिचौलियाहरूको अस्वाभाविक सम्पर्क र हालै मिडिया हाउसहरूमा प्रहरी परिचालन गरिएको विषयलाई लिएर चौतर्फी रूपमा सरकारको आलोचना भइरहेका बेला प्रधानमन्त्रीको यो कडा टिप्पणी सार्वजनिक भएको हो ।
एनपीएलको अफिसियल राइड-हेलिङ पार्टनर बन्यो ‘इनड्राइभ’
काठमाडौं । विश्वव्यापी मोबिलिटी तथा डेलिभरी प्लेटफर्म इनड्राइभ नेपाल प्रिमियर लिग (एनपीएल) को तेस्रो संस्करणको आधिकारिक राइड-हेलिङ पार्टनर बनेको छ । अक्टोबर २६ देखि नोभेम्बर २१, २०२६ सम्म आयोजना हुने नेपालको प्रतिष्ठित टी-२० क्रिकेट प्रतियोगितामा इनड्राइभले आधिकारिक राइड-हेलिङ पार्टनरका रूपमा सहकार्य गरेको छ । यस साझेदारीमार्फत इनड्राइभले नेपालमा आफ्नो उपस्थिति थप विस्तार गर्नुका साथै खेलकुद क्षेत्र र युवा पुस्तासँगको सम्बन्धलाई अझ प्रगाढ बनाउने लक्ष्य राखेको छ । यात्रु र चालकबीचको आपसी सहमतिमा भाडा निर्धारण गर्ने प्रणालीमा आधारित इनड्राइभले निष्पक्षता, पारदर्शिता र छनोटको स्वतन्त्रतालाई प्राथमिकता दिँदै आएको छ । यी मूल्यहरू क्रिकेटको खेल भावना र एनपीएलको उद्देश्यसँग मेल खाने कम्पनीको विश्वास छ । प्रतियोगिता अवधिभर क्रिकेटप्रेमीहरूले इनड्राइभ एपमार्फत खेलस्थलसम्म आवतजावत गर्न सक्नेछन् । यात्रुले एपमा आफूले तिर्न चाहेको भाडा प्रस्ताव गर्न सक्नेछन् भने चालकले उक्त प्रस्ताव स्वीकार गर्न वा वैकल्पिक भाडा प्रस्ताव गर्न सक्नेछन् । यसरी दुवै पक्षको सहमतिमा यात्रा सुरु हुनुअघि नै भाडा निर्धारण गर्न सकिनेछ । दर्शकहरूको आवतजावतलाई थप सहज बनाउन इनड्राइभले त्रिभुवन विश्वविद्यालय क्रिकेट मैदान परिसरमा निःशुल्क फ्यान सटल सेवा पनि गरि रहेको छ । उक्त सेवाअन्तर्गत गेट नम्बर २ नजिकै रहेको इनड्राइभ पिकअप स्टेसनबाट दर्शकहरूलाई उनीहरूका लागि तोकिएका प्रवेशद्वारसम्म पुर्याइनेछ । यातायात सुविधासँगै इनड्राइभले यस सिजन दर्शकहरूको अनुभवलाई थप मनोरञ्जनात्मक बनाउन विभिन्न गतिविधि पनि सञ्चालन गर्ने भएको छ । मैदान परिसरमा रहने इनड्राइभका एक्टिभेसन स्टलहरूमा दर्शकहरूले निःशुल्क स्लोगन कार्ड, चियरिङ स्टिक र फेस स्टिकर प्राप्त गर्न सक्नेछन् । साथै, इनड्राइभको मस्कटसँग तस्बिर खिचाउने, मनोरञ्जनात्मक खेलमा सहभागी हुने तथा दैनिक आकर्षक उपहार जित्ने अवसरसमेत पाउनेछन् । यसैगरी, प्रत्येक खेलमा क्यामेरामार्फत एक जना उत्साही दर्शकलाई ‘कुल फ्यान अफ द म्याच’ का रूपमा छनोट गरिनेछ । छनोट भएका दर्शकलाई इनड्राइभको तर्फबाट विशेष उपहार ह्याम्पर प्रदान गरिनेछ । इनड्राइभ नेपालकी मार्केटिङ म्यानेजर श्रेया मानन्धरले एनपीएलसँगको सहकार्यप्रति उत्साह व्यक्त गर्दै भनिन्, ‘नेपालको लोकप्रिय क्रिकेट प्रतियोगिता एनपीएलसँग साझेदारी गर्न पाउँदा हामी अत्यन्त उत्साहित छौँ । क्रिकेटले देशभरका लाखौँ नेपालीलाई एउटै उत्साहमा जोड्ने काम गरेको छ । यस साझेदारीमार्फत हामी क्रिकेटप्रेमीहरूसँग अझ नजिक हुन चाहन्छौँ । साथै, दर्शकहरूलाई आपसी सहमतिमा तय गरिएको उचित भाडामा खेलस्थलसम्म पुग्न र फर्कन सहज बनाउने हाम्रो उद्देश्य हो ।’ उनले थपिन्, ‘इनड्राइभको सेवा प्रणाली निष्पक्षता, पारदर्शिता र छनोटको स्वतन्त्रतामा आधारित छ । यी मूल्यहरू क्रिकेटको खेल भावना र एनपीएलको मर्मसँग पनि मेल खान्छन् । यस सहकार्यमार्फत दर्शकहरूको यात्रालाई सहज बनाउनुका साथै मैदानमा उनीहरूको अनुभवलाई थप रोमाञ्चक र अविस्मरणीय बनाउन चाहन्छौँ ।’ नेपाल क्रिकेट संघ (क्यान) का सचिव पारस खड्काले इनड्राइभलाई एनपीएलको आधिकारिक राइड–हेलिङ पार्टनरका रूपमा स्वागत गर्दै भने, ‘नेपाल प्रिमियर लिगको तेस्रो संस्करणमा इनड्राइभलाई आधिकारिक राइड–हेलिङ पार्टनरका रूपमा स्वागत गर्न पाउँदा हामी खुसी छौँ । समुदायलाई सशक्त बनाउने र सेवामा सहज पहुँच विस्तार गर्ने इनड्राइभको प्रतिबद्धता क्रिकेटमार्फत समावेशिता र खेल भावनालाई प्रवद्र्धन गर्ने हाम्रो उद्देश्यसँग मेल खान्छ । यस साझेदारीले प्रतियोगिताको व्यवस्थापनमा सहयोग पुग्नुका साथै दर्शकहरूको समग्र अनुभवलाई अझ उत्कृष्ट बनाउन महत्त्वपूर्ण योगदान पुर्याउने विश्वास लिएका छौँ ।’ एनपीएलसँगको यो साझेदारीलाई इनड्राइभले नेपालमा खेलकुद प्रवद्र्धन र समुदायसँगको सम्बन्ध विस्तार गर्ने आफ्नो प्रतिबद्धताको निरन्तरताका रूपमा लिएको छ । स्थानीय चालकहरूका लागि आम्दानीका अवसरसँगै यात्रुहरूलाई सहज र पारदर्शी यातायात विकल्प उपलब्ध गराउँदै आएको कम्पनीले यस सहकार्यबाट चालक, यात्रु तथा क्रिकेटप्रेमीहरूसँगको सम्बन्ध थप सुदृढ हुने अपेक्षा गरेको छ ।
अब भाटभटेनीको ढुवानीमा १४ फोटोन विद्युतीय सवारी प्रयोग हुने
काठमाडौं । फोटोन मोटर्स नेपालले भाटभटेनी सुपरमार्केटलाई १४ वटा विद्युतीय व्यावसायिक सवारीसाधन हस्तान्तरण गरेको छ । भाटभटेनीले आफ्नो ढुवानी तथा वितरण प्रणालीमा प्रयोग गर्न ती सवारीसाधन लिएको हो । एमएडब्लु वृद्धि कमर्सियल भेइकल्स प्रालिअन्तर्गत सञ्चालित फोटोन मोटर्स नेपालले व्यावसायिक ढुवानीमा विद्युतीय सवारीको प्रयोग विस्तार गर्ने उद्देश्यसहित सहकार्य गरिएको जनाएको छ । कम्पनीका अनुसार विद्युतीय सवारीले इन्धनमा आधारित ढुवानीको विकल्प दिनुका साथै सञ्चालन खर्च न्यूनीकरणमा सहयोग पुर्याउनेछन् । हस्तान्तरण कार्यक्रममा एमएडब्लु वृद्धि कमर्सियल भेइकल्सका प्रमुख कार्यकारी अधिकृत (सीइओ) अनिलकुमार बरालले भाटभटेनीसँगको सहकार्यले नेपालमा विद्युतीय व्यावसायिक सवारीसाधनको प्रयोग विस्तार गर्न योगदान दिने बताए । उनले एकैपटक १४ वटा सवारी हस्तान्तरण हुनुलाई दिगो यातायातप्रतिको व्यावसायिक क्षेत्रको बढ्दो विश्वासका रूपमा व्याख्या गरे । नेपाली व्यवसायको आवश्यकताअनुसार विश्वसनीय र आधुनिक विद्युतीय सवारी उपलब्ध गराउनु कम्पनीको प्राथमिकता रहेको उनको भनाइ छ । भाटभटेनी सुपरमार्केटका निर्देशक पहलमान गुरुङले वातावरणमैत्री व्यवसाय सञ्चालनलाई संस्थाले प्राथमिकता दिँदै आएको बताए । फोटोनसँगको सहकार्यले दिगो ढुवानी प्रणाली विकासमा सहयोग पुग्ने विश्वास उनले व्यक्त गरे । उनका अनुसार ढुवानी तथा वितरणमा विद्युतीय सवारी समावेश गर्ने पहलले अन्य व्यवसायलाई पनि यस्ता सवारी प्रयोग गर्न प्रोत्साहित गर्न सक्छ । कम्पनीले वातावरणमैत्री प्रविधि, सञ्चालन खर्चमा बचत र कार्यक्षमताका आधारमा आफ्ना विद्युतीय सवारी व्यावसायिक ढुवानीका लागि उपयोगी हुने दाबी गरेको छ । भाटभटेनीसँगको सहकार्यबाट विद्युतीय व्यावसायिक सवारी बजारमा आफ्नो उपस्थिति विस्तार हुने अपेक्षा फोटोन मोटर्स नेपालले गरेको छ ।
