‘सरकारका राम्रा कामको श्रेय रास्वपालाई, गलत कामको जिम्मेवारी प्रधानमन्त्रीलाई मात्रै किन ?’
काठमाडौं । नेपाली कांग्रेसका सभापति गगनकुमार थापाले राष्ट्रिय स्वतन्त्र पार्टी (रास्वपा) ले सरकारका राम्रा कामको जस लिने तर विवादित र गलत कामको जिम्मेवारीबाट पन्छिने गरेको आरोप लगाएका छन् । आइतबार (आज) आयोजित पत्रकार सम्मेलनमा बोल्दै थापाले सञ्चारमाध्यममा प्रहरी प्रवेश गरी पत्रकार पक्राउ गरिएको घटनामा रास्वपाले विज्ञप्ति जारी गरेर सरकारलाई निर्देशन दिएको तर उक्त घटनाको राजनीतिक जिम्मेवारी भने नलिएको भन्दै प्रश्न उठाएका हुन् । ‘सरकारले कुनै राम्रो काम गर्यो भने रास्वपा, अनि कुनै काममा प्रश्न उठ्यो भने चाहिँ प्रधानमन्त्री? सरकारले गरेका कामको जिम्मेवारी रास्वपाले लिनुपर्दैन ?,’ थापाले प्रश्न गरे । उनले विगतमा नेपाली कांग्रेस सहभागी सरकारका निर्णय र काममाथि प्रश्न उठ्दा रास्वपाका नेताहरूले त्यसको जिम्मेवारी कांग्रेसले लिनुपर्ने बताउने गरेको स्मरण गराए । सरकारमा सहभागी दलले सरकारका कामको जिम्मेवारी लिनुपर्ने मान्यता अहिले रास्वपाको हकमा पनि लागू हुनुपर्ने उनको भनाइ थियो । ‘नेपाली कांग्रेसको सरकार हुँदा सरकारले कुनै कुरा गलत गर्यो भने रास्वपाको धारणा के हुन्थ्यो भने यो सरकार त नेपाली कांग्रेसको हो, त्यसैले गलत कामको जिम्मेवारी तिमीले लिनुपर्छ भन्ने हुन्थ्यो,’ उनले भने, ‘यो सिद्धान्त तपाईंहरूको हकमा लागू हुन्छ कि हुँदैन भन्ने हाम्रो प्रश्न हो ।’ थापाले सरकारका सकारात्मक कामको श्रेय लिने तर आलोचना वा विवाद उत्पन्न हुँदा जिम्मेवारी प्रधानमन्त्रीमाथि मात्रै थोपर्ने प्रवृत्ति स्वीकार्य नहुने बताए। सरकारका निर्णय र गतिविधिमा राजनीतिक स्वामित्व लिने जिम्मेवारी सरकारको नेतृत्व गर्ने दलका रूपमा रास्वपाले पनि लिनुपर्ने उनको तर्क थियो । पत्रकार पक्राउको घटनालाई लिएर रास्वपाले सरकारलाई दिएको निर्देशनप्रति प्रश्न उठाउँदै उनले सरकारका काममा आफ्नो भूमिका र जिम्मेवारीबारे पार्टी स्पष्ट हुनुपर्ने धारणा राखेका हुन् ।
सोमबार पृथ्वी राजमार्ग ३ घण्टा बन्द हुने
काठमाडौं । पृथ्वी राजमार्ग सोमबार (भोलि) ३ घण्टा बन्द हुने भएको छ । जिल्ला प्रशासन कार्यालय, धादिङले आइतबार सूचना जारी गर्दै भोलि बिहान ११ बजेदेखि दिउँसो २ बजेसम्म धादिङको बेनीघाट रोराङ गाउँपालिका–९ मझिमटार क्षेत्रमा सबै प्रकारका सवारी साधनको आवागमन बन्द रहने जनाएको हो । प्रशासनका अनुसार आकाशे पुल निर्माण तथा सडक स्तरोन्नतिको काम गर्नुपर्ने भएपछि सवारी आवागमन पूर्ण रूपमा रोक्न लागिएको हो । नागढुङ्गा–मुग्लिङ सडक योजना (पश्चिम खण्ड), मुग्लिङ, चितवनको सूचनाका आधारमा सडक बन्द गर्न लागिएको हो । निर्माण कार्यलाई सुरक्षित र व्यवस्थित रूपमा सम्पन्न गर्न निर्धारित समयका लागि सवारी आवागमन रोक्न लागिएको प्रशासनले जनाएको छ । दिउँसो २ बजेपछि भने सडकमा सवारी आवागमन खुल्ने जनाइएको छ ।
अर्थतन्त्रमा गगन थापाले देखेको समस्या
काठमाडौं । नेपाली कांग्रेसका सभापति गगनकुमार थापाले मुलुकको अर्थतन्त्र शिथिल बन्दै गएकोप्रति चिन्ता व्यक्त गरेका छन् । आइतबार पत्रकार सम्मेलनको आयोजना गरी सभापति थापाले अर्थतन्त्र सुधार्न सरकारले त्रास नभई विश्वासको वातावरण निर्माण गर्नुपर्ने बताएका हुन् । उनले सरकारका नीति तथा निर्णय अनुमानयोग्य नहुँदा निजी क्षेत्रदेखि राज्यका विभिन्न निकायसम्म त्रसित बनेको टिप्पणी गरेका छन् । थापाले अहिले मुलुकको सबैभन्दा ठूलो चुनौती अर्थतन्त्र रहेको बताए । अर्थतन्त्रमा देखिएका समस्या नयाँ नभए पनि सरकार परिवर्तनपछि त्यसमा अपेक्षित सुधार हुन नसकेको उनको भनाइ छ । ‘म फागुन २१ अघि पनि मुलुकको अर्थतन्त्र राम्रो अवस्थामा थियो भन्न पनि सक्दिनँ, थोरै राम्रो र धेरै नराम्रो थियो । त्यही असन्तुष्टि र समस्याका बीच नयाँ सरकार बनेको हो,’ त्यसैले सरकारले काम गर्नुपर्छ ।’ उनले मुलुकको अर्थतन्त्रमा कर्जा विस्तार हुन नसकेको, लगानीको वातावरण बन्न नसकेको र बाह्य लगानीसमेत भित्रिन नसकेको बताए । बैंक तथा वित्तीय संस्थाबाट कर्जा प्रवाह अपेक्षित रूपमा विस्तार हुन नसक्नु र निजी क्षेत्रले नयाँ लगानीका योजना अघि बढाउन नसक्नु अर्थतन्त्रका लागि चुनौती भएको उनको भनाइ छ । ‘कर्जा विस्तार भएन । लगानी विस्तार भएन । बाहिरबाट नयाँ लगानी एक पैसा पनि आएको छैन,’ थापाले भने । उनले विश्व बैंकको प्रतिवेदनलाई समेत उद्धृत गर्दै कर्जा असुलीमा समस्या रहेको बताए । कर्जा प्रवाह र असुलीमा देखिएका समस्या, कमजोर विकास खर्च तथा प्राकृतिक विपत्तिका कारण सरकारी वित्त व्यवस्थापनमा दबाब बढिरहेको उनको टिप्पणी थियो । विकास निर्माणका काममा सरकारी खर्च अपेक्षित रूपमा हुन नसकेको अवस्थामा प्राकृतिक विपत्तिले थप आर्थिक भार सिर्जना गरेको उनले बताए । यसले राष्ट्रिय ढुकुटीमाथि दबाब बढाएको भन्दै उनले अर्थतन्त्रलाई चलायमान बनाउन सरकारले आर्थिक गतिविधि विस्तार हुने वातावरण बनाउनुपर्नेमा जोड दिए । थापाले अर्थतन्त्रमा देखिएको अहिलेको समस्याको जड विश्वासको संकट भएको बताए । उनका अनुसार सरकारका नीति, निर्णय र कार्यशैलीबारे निजी क्षेत्र तथा राज्यका विभिन्न निकायमा स्पष्टता नहुँदा आर्थिक गतिविधि प्रभावित भएका छन् । लगानीकर्ताले भविष्यमा कस्तो नीति आउँछ भन्ने अनुमान गर्न नसक्ने अवस्था बनेमा लगानी विस्तार हुन नसक्ने उनको तर्क छ । ‘समस्या भनेकै विश्वासको संकट हो । सरकारको नीति अनुमानयोग्य छैन । सबै थुरथुर छन् । व्यवसायी, प्रहरी, निजामती कर्मचारी, अदालत र संवैधानिक आयोगहरू सबै थुरथुर छन्,’ उनले भने । उनले सरकारको कार्यशैलीका कारण व्यवसायी र लगानीकर्तामा मात्र नभई राज्य सञ्चालनमा संलग्न निकायहरूमै त्रासको वातावरण बनेको टिप्पणी गरे । सरकारका निर्णय र गतिविधिबारे अनिश्चितता रहँदा कर्मचारीतन्त्रले जोखिम लिन नचाहने, निजी क्षेत्रले लगानी गर्न हिचकिचाउने र आर्थिक गतिविधि थप सुस्त हुने उनको आशय थियो । थापाले अर्थतन्त्र सुधारको नाममा त्रास सिर्जना गर्ने, दबाब दिने वा अनिश्चितता बढाउने कामले आर्थिक गतिविधि विस्तार हुन नसक्ने बताए । व्यवसायीलाई लगानी गर्न प्रोत्साहित गर्ने, नीतिगत स्थिरता कायम गर्ने र राज्यका निकायलाई जिम्मेवारीपूर्वक काम गर्न सक्ने वातावरण दिनुपर्ने उनको धारणा छ । ‘शिथिल भएको अर्थतन्त्र सुधार गर्न त्रर्साएर होइन, विश्वास दिसक्नुपर्छ,’ उनले सरकारलाई आग्रह गर्दै भने । सरकारको ध्यान लाइक र कमेन्टमा थापाले सरकारको प्राथमिकतामाथि पनि प्रश्न उठाए । सरकार सामाजिक सञ्जालमा लाइक र कमेन्ट प्राप्त गर्ने विषयमा बढी केन्द्रित भएको टिप्पणी गर्दै उनले जनताले भोगिरहेका वास्तविक समस्या समाधानमा ध्यान दिनुपर्ने बताए । उनका अनुसार सरकारको लोकप्रियता सामाजिक सञ्जालमा प्राप्त हुने प्रतिक्रिया वा प्रचारबाट मात्रै मापन हुँदैन । अर्थतन्त्रको अवस्था सुधार, लगानी विस्तार, रोजगारी सिर्जना र नागरिकमा विश्वास कायम गर्न सक्नु सरकारको मुख्य जिम्मेवारी हो । उनले सञ्चारमाध्यमका कार्यालयमा पुगेर पत्रकार तथा सञ्चारकर्मीमाथि धरपकड गर्ने गतिविधिप्रति पनि आपत्ति जनाए । प्रेस स्वतन्त्रता र सञ्चारमाध्यमको व्यावसायिक काममा हस्तक्षेप हुने गतिविधि स्वीकार्य नहुने उनको भनाइ थियो । ‘लाइक र कमेन्टमा सरकार व्यस्त छ । प्रेसको अफिसमा पुगेर धरपकड गर्ने काम स्वीकार्य छैन,’ उनले भने । उनले प्रेसमाथिको हस्तक्षेपलाई सामान्य घटनाका रूपमा लिन नसकिने संकेत गर्दै सरकारलाई आफ्नो कार्यशैली सच्याउन आग्रह गरे । लोकतान्त्रिक व्यवस्थामा सञ्चारमाध्यमले सरकारका कामकारबाहीमाथि प्रश्न उठाउन र आलोचना गर्न पाउनुपर्ने उनको धारणाको आशय थियो । सरकारसँग प्रतिवाद र सहकार्य दुवै गर्न तयार थापाले सरकारका गलत गतिविधिमा खबरदारी गर्ने र आवश्यक परे प्रतिवाद गर्ने बताए । तर, सरकारसँग संवाद र सहकार्यको ढोका बन्द नगरेको पनि उनले स्पष्ट पारे । सरकारले सबै पक्षसँग संवाद गरेर अघि बढ्नुपर्ने उल्लेख गर्दै उनले सरकार एकपक्षीय ढंगले चल्न नहुने बताए । सरकारका निर्णय र कार्यशैलीबारे असहमति भए त्यसलाई संवादमार्फत राख्ने र आवश्यक परे विरोध गर्ने कांग्रेसको नीति रहेको उनको भनाइ थियो । ‘खबरदारी गर्छौं । सरकार मौनमौजीमा चलेको स्वीकार्य छैन । सरकारसँग पनि कुरा गर्छौं । आँखामा आँखा जुधाएर कुरा गर्न तयार छौं । प्रतिवाद र सहकार्य गर्न पनि तयार छौं,’ उनले भने । उनले सरकारलाई समर्थन वा विरोधको एउटै कित्तामा सीमित भएर हेर्न नहुने संकेत गर्दै मुलुकको हितमा हुने काममा सहकार्य र गलत काममा प्रतिवाद गर्ने बताए । सरकारका राम्रा काममा सहयोग गर्न र गलत निर्णयमा प्रश्न उठाउन कांग्रेस तयार रहेको उनको भनाइ छ । थापाले विभिन्न राजनीतिक दल, सरकार र नयाँ पुस्तासँग समेत संवाद गर्न चाहेको बताए । मुलुकको वर्तमान राजनीतिक तथा आर्थिक चुनौती समाधानका लागि राजनीतिक दलहरूबीच संवाद आवश्यक रहेको उनको भनाइ छ । नयाँ पुस्ताको अपेक्षा, राजनीतिक दलहरूको भूमिका र सरकारको कार्यशैलीबीच समन्वय हुनुपर्ने उल्लेख गर्दै उनले सबै पक्षसँग संवाद गरेर अघि बढ्नुपर्ने धारणा राखे ।
सत्ताको सनक र सामाजिक सञ्जालको प्रतिक्रियाका आधारमा राज्य चलाउन खोजियो : थापा
काठमाडौं । नेपाली कांग्रेसका सभापति गगनकुमार थापाले सरकारमा रहेकाहरूमा ‘हामी नै राज्य (स्टेट) हौं’ भन्ने अहङ्कार पलाएको बताएका छन् । कांग्रेस मुख्यालयमा आयाेजित पत्रकार सम्मेलनलाई सम्बोधन गर्दै थापाले यस्तो बताएका हुन् । उनले भने, ‘राज्यका निकाय र शक्तिको स्वेच्छाचारी प्रयोग भइरहेको छ । सरकारमा बसेकाहरूलाई मेरो इच्छा नै कानुन हो भन्ने लाग्न थालेपछि समस्या सुरु हुन्छ । यसलाई सामान्यीकरण गर्न मिल्दैन, अब हद नाघेको छ ।’ लोकतन्त्र, नागरिक अधिकार र प्रेस स्वतन्त्रतामाथि सरकारले सीमा नाघेको भन्दै सभापति थापाले कांग्रेस चुप लागेर नबस्ने चेतावनी दिएका छन् । समाचार लेखेकै आधारमा सञ्चारगृहभित्र प्रवेश गरी पत्रकार पक्राउ गर्ने सरकारी कदमले शाही शासनकालको झल्को दिएको उनको भनाइ छ । गगनले पत्रकार पक्राउ प्रकरणमा प्रधानमन्त्रीको सचिवालय र प्रहरीको गतिविधि विचित्र र शङ्कास्पद देखिएको बताए । ‘पहिले प्रहरीले पत्रकार पक्राउ गर्यो, प्रधानमन्त्रीको सचिवालयबाट ‘हामीलाई केही थाहा छैन’ भन्ने वक्तव्य आयो । फेरि प्रहरीले मध्यराति प्रधानमन्त्री कार्यालयको चासोलाई सम्बोधन गर्न पक्राउ गरिएको भन्यो र शनिबार बिहान त्यो वक्तव्य पनि डिलिट गरियो,’ उनले भने । यस घटनाले सरकारले राज्य, नागरिक अधिकार र प्रेस स्वतन्त्रतालाई कसरी बुझेको छ भन्ने गम्भीर प्रश्न खडा गरेको उनको भनाइ छ । प्रहरी आफै निर्णय गरेर मिडिया हाउस नगएको ठोकुवा गर्दै थापाले सत्ताको सनक र सामाजिक सञ्जालको प्रतिक्रियाका आधारमा राज्य चलाउन खोजिएको आरोपसमेत लगाए ।
सरकारलाई देखेर सबै थुरथुर छन् : गगन थापा
काठमाडौं । नेपाली कांग्रेसका सभापति गगन थापाले सरकारको कार्यशैलीका कारण व्यवसायीदेखि राज्यका विभिन्न निकायसम्म त्रासको वातावरण सिर्जना भएको बताएका छन् । आइतबार सम्बोधन गर्दै थापाले सरकारका नीति तथा निर्णय अनुमानयोग्य नहुँदा निजी क्षेत्र, प्रहरी, निजामती कर्मचारी, अदालत र संवैधानिक आयोगहरू त्रसित रहेको टिप्पणी गरे । ‘सरकारको नीति अनुमानयोग्य छैन । सबै थुरथुर छन् । व्यवसायी, प्रहरी, निजामती कर्मचारी, अदालत र संवैधानिक आयोगहरू सबै थुरथुर छन्,’ उनले भने । उनले अहिले मुलुकको सबैभन्दा ठूलो चुनौती अर्थतन्त्र रहेको बताए । कर्जा तथा लगानी विस्तार हुन नसकेको, बाह्य लगानी भित्रिन नसकेको र विकास खर्च कमजोर रहेको उनको भनाइ छ । प्राकृतिक विपत्तिका कारण राष्ट्रिय ढुकुटीमाथि समेत दबाब परेको उल्लेख गर्दै थापाले अर्थतन्त्रको शिथिलता हटाउन सरकारले विश्वासको वातावरण बनाउनुपर्ने बताए । ‘शिथिल भएको अर्थतन्त्र सुधार गर्न त्रर्साएर होइन, विश्वास दिनुहोस्,’ उनले भने ।
म्याक्स टाइगरको दशैं धमाकामा ९ जनाले जिते मोटरसाइकल तथा स्कुटी
काठमाडौं । म्याक्स टाइगर इनर्जी ड्रिङ्कसको ‘एनर्जाइज्ड दशैं धमाका २०२६’ अभियानअन्तर्गत हालसम्म ९ जना उपभोक्ताले यामाहाका मोटरसाइकल तथा स्कुटर जितेका छन् । अभियानअन्तर्गत सुर्खेतका किशोर जंग शाहले यामाहा रे जेडआर स्कुटर जितेका छन् । त्यस्तै, बनेपाका राजकुमार तामाङ र धादिङका सञ्जोग रिमालले यामाहा एफजेड एफआई मोटरसाइकल जितेका छन् । यसैगरी, बुटवलका नरबहादुर फौगाडले यामाहा स्कुटर र धनगढीका मोहन श्रेष्ठले मोटरसाइकल जितेका छन् । पछिल्लो चरणमा सार्वजनिक भएका चार विजेतामध्ये जनकपुरका कौटल्य कुमार सिंह र बिर्तामोडका तेज नारायण सिंहले यामाहा एफजेड एफआई मोटरसाइकल जितेका छन् । धरानका मनोज कुमार अधिकारी र वीरगञ्जका रमेश बस्नेतले भने यामाहा रे जेडआर स्कुटर जितेका छन् । कम्पनीका अनुसार अभियानअन्तर्गत १८ जनालाई यामाहा एफजेड एफआई मोटरसाइकल र १८ जनालाई यामाहा रे जेडआर स्कुटर प्रदान गरिनेछ । त्यस्तै, एक जना भाग्यशाली उपभोक्ताले बम्पर पुरस्कारस्वरूप प्रोटोन कार जित्नेछन् । यसरी अभियानमा मोटरसाइकल, स्कुटर र कार गरी कुल ३७ वटा सवारीसाधन पुरस्कारका रूपमा राखिएका छन् । हालसम्म नौ जना विजेता सार्वजनिक भइसकेका छन् भने बाँकी २८ वटा सवारीसाधनका विजेता घोषणा हुन बाँकी छन् । दशैंलाई लक्षित गरी सञ्चालन गरिएको उक्त अभियानमार्फत उपभोक्ताले म्याक्स टाइगर इनर्जी ड्रिङ्कस खरिद गर्दा मोटरसाइकल, स्कुटर तथा कार जित्ने अवसर पाउने कम्पनीले जनाएको छ । अभियानअन्तर्गत आगामी दिनमा थप विजेताहरू सार्वजनिक गरिनेछ ।
६ अर्ब डलरको क्रिप्टो चोरीमा उत्तर कोरियाको हात रहेको एफबीआईको आरोप
काठमाडौं । उत्तर कोरियाले बाइनान्समा साइबर हमला गरी ६ अर्ब डलरभन्दा बढी मूल्यको क्रिप्टोकरेन्सी चोरी गरेको अमेरिकी अनुसन्धान निकाय फेडरल ब्युरो अफ इन्भेस्टिगेसन (एफबीआई) ले आरोप लगाएको छ । यो खबर सार्वजनिक भएपछि बिटक्वाइन र इथेरियमलगायत प्रमुख क्रिप्टोकरेन्सीको मूल्यमा तीव्र गिरावट आएको छ । यद्यपि, बाइनान्सले चोरी भएको रकमबाट भएको सम्पूर्ण आर्थिक क्षति कम्पनी आफैले बेहोर्ने जनाएको छ । एफबीआईका अनुसार उत्तर कोरियासँग सम्बन्धित ह्याकर समूह ‘ट्रेडरट्रेटर’ ले बाइनान्समाथि साइबर हमला गरेको थियो । ह्याकरहरूले चोरी गरेको डिजिटल मुद्रा इथेरियममा रूपान्तरण गरिरहेको अनुसन्धान निकायले जनाएको छ । त्यसपछि उनीहरूले विकेन्द्रीकृत वित्तीय प्लेटफर्म (डिफाई) तथा तत्कालै क्रिप्टोकरेन्सी साट्न मिल्ने सेवाहरू प्रयोग गरेर उक्त रकमको स्रोत लुकाउने प्रयास गर्न सक्ने एफबीआईको भनाइ छ । एफबीआईले क्रिप्टो कम्पनी तथा अन्य वित्तीय संस्थालाई ह्याकरसँग सम्बन्धित डिजिटल वालेटमा हुने कारोबार रोक्न आग्रह गरेको छ । उक्त समूह यसअघि पनि ठूला क्रिप्टो प्लेटफर्मबाट रकम चोरी गरेको आरोपमा मुछिएको थियो । बाइनान्सले साइबर हमलाबाट भएको क्षतिपूर्ति गर्न ६ अर्ब ३४ करोड डलरभन्दा बढी रकम छुट्याएको जनाएको छ । कम्पनीका अनुसार आफ्नै स्रोतबाट टोकन खरिद गरेर चोरी भएको रकमको करिब ९० प्रतिशत पुनः जुटाइसकेको छ । बाँकी १० प्रतिशत रकम जुटाउन भने समय लाग्न सक्ने कम्पनीले जनाएको छ । त्यसमा संलग्न केही टोकन बजारमा सहजै उपलब्ध नहुनु यसको मुख्य कारण हो । सामाजिक सञ्जाल एक्समार्फत कम्पनीले चोरीबाट भएको सम्पूर्ण आर्थिक क्षतिको जिम्मेवारी बाइनान्सले नै लिने स्पष्ट पारेको छ । साइबर हमलापछि बाइनान्सले आफ्नो प्लेटफर्मबाट प्रयोगकर्ताले रकम झिक्न पाउने सुविधा अस्थायी रूपमा बन्द गरेको थियो। कम्पनीले पछिल्लो जानकारी दिँदै आइतबारदेखि निकासी सुविधा पुनः सञ्चालन गर्ने तयारी भइरहेको जनाएको छ । बाइनान्स विश्वकै सबैभन्दा ठूलो क्रिप्टोकरेन्सी एक्सचेन्ज हो । यस प्लेटफर्ममा दैनिक ठूलो परिमाणमा डिजिटल मुद्राको कारोबार हुन्छ । त्यसैले यसमाथि भएको साइबर हमलाले क्रिप्टो बजारको सुरक्षालाई लिएर थप चिन्ता बढाएको छ । बाइनान्समाथि साइबर हमला भएको खबर सार्वजनिक भएयता प्रमुख क्रिप्टोकरेन्सीको मूल्य घटेको छ । अक्टोबर २९ यता बिटक्वाइनको मूल्य करिब ५ प्रतिशतले घटेको छ । आइतबार बिहान १० बजेसम्म यसको मूल्य प्रतिगोटा ७७ हजार ६७५ डलर हाराहारीमा थियो । त्यस्तै, बाइनान्सको मूल्य करिब ६ प्रतिशतले घटेर ७०४ डलर आसपास पुगेको छ । इथेरियमको मूल्य पनि ४ प्रतिशतभन्दा बढीले घटेको छ । आइतबार यसको मूल्य प्रतिगोटा करिब २ हजार २६५ डलर थियो । यसअघि पनि ठूला क्रिप्टो चोरीमा संलग्न ट्रेडरट्रेटर समूह क्रिप्टोकरेन्सी चोरीमा मुछिएको यो पहिलो घटना होइन । यसअघि पनि उक्त समूह विभिन्न ठूला साइबर हमलामा संलग्न भएको आरोप लागेको थियो । सन् २०२५ फेब्रुअरीमा बाइबिट प्लेटफर्मबाट करिब १ अर्ब ५० करोड डलर बराबरको क्रिप्टोकरेन्सी चोरी भएको थियो । त्यतिबेला यसलाई इतिहासकै सबैभन्दा ठूलो क्रिप्टो चोरी मानिएको थियो । त्यस्तै, सन् २०२४ मेमा जापानको क्रिप्टो एक्सचेन्ज डीएमएम बिटक्वाइनबाट करिब ३० करोड ८० लाख डलर बराबरको बिटक्वाइन चोरी भएको थियो । उक्त घटनामा पनि ट्रेडरट्रेटर समूहको संलग्नता रहेको आरोप लागेको थियो । ट्रेडरट्रेटर समूह उत्तर कोरियाको चर्चित ह्याकर संगठन ‘लाजरस ग्रुप’सँग सम्बन्धित रहेको विश्वास गरिन्छ । सन् २०१४ मा पनि लाजरस ग्रुप चर्चामा आएको थियो । त्यतिबेला उक्त समूहले सोनी पिक्चर्सको कम्प्युटर प्रणालीमा साइबर हमला गरेको आरोप लागेको थियो । उत्तर कोरियाली नेता किम जोङ उनको विषयवस्तुमा आधारित फिल्म ‘द इन्टरभ्यु’लाई लिएर विवाद उत्पन्न भएपछि सोनी पिक्चर्समाथि उक्त हमला भएको थियो । यी घटनाले क्रिप्टोकरेन्सी बजारमा साइबर सुरक्षा अझै ठूलो चुनौतीका रूपमा रहेको देखाउँछ । जेनजी आन्दोलनको रापमा जर्मनी इजरायलको चुनावी नतिजा र अबका चुनौती चिनियाँ अर्बपतिहरूमा नागरिकता त्याग्नेको संख्या बढ्दै एम्बाप्पेको अभिव्यक्तिले ला–लिगाको ४० करोड युरोको कारोबार जोखिममा ब्राजिलमा लुलाको ऐतिहासिक जित, चौथो कार्यकाल अहिलेसम्मकै कठिन
कृषि विकास बैंकको नाफा १ हजार ८०३ प्रतिशत बढ्यो, ब्याज आम्दानी २.३६ अर्ब
काठमाडौं । कृषि विकास बैंकले चालु आर्थिक वर्ष २०८३÷८४ को पहिलो त्रैमासमा १० करोड ९२ लाख ३५ हजार रुपैयाँ खुद नाफा आर्जन गरेको छ । यो गत आर्थिक वर्ष २०८२÷८३ को सोही अवधिको तुलनामा १ हजार ८०३.७१ प्रतिशतले बढी हो । गत वर्षको पहिलो त्रैमासमा बैंकले ५७ लाख ३८ हजार रुपैयाँ खुद नाफा कमाएको थियो । चालु आवको असोजसम्ममा बैंकको खुद ब्याज आम्दानी २ अर्ब ३६ करोड २५ लाख ७० हजार रुपैयाँ रहेको छ । गत वर्षको सोही अवधिमा बैंकले २ अर्ब ४५ करोड ३७ लाख ३४ हजार रुपैयाँ खुद ब्याज आम्दानी गरेको थियो । यसअनुसार बैंकको खुद ब्याज आम्दानी ३.७२ प्रतिशतले घटेको छ । समीक्षा अवधिमा बैंकले ४७ करोड ९७ लाख २१ हजार रुपैयाँ खुद शुल्क तथा कमिसन आम्दानी गरेको छ । त्यस्तै, बैंकको कुल सञ्चालन आम्दानी २ अर्ब ८८ करोड ७४ लाख ७५ हजार रुपैयाँ र सञ्चालन नाफा १५ करोड ६० लाख ३९ हजार रुपैयाँ रहेको छ । बैंकको वितरणयोग्य नाफा ७८ करोड ८० लाख २९ हजार रुपैयाँ रहेको छ । यसका आधारमा बैंकको लाभांश क्षमता ५.५१ प्रतिशत देखिएको छ । बैंकको चुक्ता पुँजी १९ अर्ब ७३ करोड ८२ लाख ३१ हजार रुपैयाँ र जगेडा कोषमा १८ अर्ब १७ करोड ७९ लाख २ हजार रुपैयाँ रहेको छ । असोजसम्ममा बैंकको निक्षेप संकलन ०.३० प्रतिशतले बढेर ३ खर्ब ४८ अर्ब २७ करोड ७६ लाख रुपैयाँ पुगेको छ । गत वर्षको असोजसम्ममा बैंकले ३ खर्ब ४७ अर्ब २१ करोड ९८ लाख रुपैयाँ निक्षेप संकलन गरेको थियो । त्यस्तै, बैंकको कर्जा प्रवाह १.३३ प्रतिशतले बढेर २ खर्ब ५० अर्ब ४२ करोड ८४ लाख रुपैयाँ पुगेको छ । गत वर्षको सोही अवधिमा बैंकले २ खर्ब ४७ अर्ब १४ करोड ५२ लाख रुपैयाँ कर्जा लगानी गरेको थियो । समीक्षा अवधिमा बैंकको निक्षेप तथा कर्जा अनुपात (सीडी रेसियो) ६७.५० प्रतिशत रहेको छ । बैंकको प्रतिसेयर आम्दानी ०.१७ रुपैयाँबाट बढेर ३.०५ रुपैयाँ पुगेको छ । बैंकको खराब कर्जा भने सामान्य बढेको छ । गत आर्थिक वर्षको असोजमा ४.७८ प्रतिशत रहेको खराब कर्जा चालु आवको असोजमा बढेर ४.७९ प्रतिशत पुगेको छ ।
