सोमबार झापा जाँदै मन्त्री रावल
काठमाडौं । भूमि व्यवस्था, सहकारी, संघीय मामिला तथा सामान्य प्रशासनमन्त्री प्रतिभा रावल सोमबार (कात्तिक १६ गते) झापा भ्रमणमा जाने भएकी छन् । भ्रमणका क्रममा मन्त्री रावलले जिल्ला भूमि समस्या समाधान समितिका पदाधिकारी तथा सहकारीपीडितहरूसँग छलफल गर्ने कार्यक्रम रहेको उनको सचिवालयले जनाएको छ । साथै स्थानीय नागरिकसँग अन्तरक्रिया गरी भूमिहीन तथा सुकुम्बासीका समस्या, सहकारीपीडितका गुनासा र भूमि व्यवस्थापनसँग सम्बन्धित विषयमा छलफल गर्ने जनाइएको छ । अन्तरक्रियाका क्रममा मन्त्रालयबाट हालसम्म भएका काम, समस्या समाधानका लागि अघि बढाइएका प्रयास, आगामी योजना तथा नागरिकका गुनासाको सम्बोधनका उपायबारे समेत जानकारी आदानप्रदान गरिने बताइएको छ ।
बाँकेको अम्बे स्टिलमा आगलागी, ८ जना घाइते
काठमाडौं । बाँकेको अम्बे स्टिल कम्पनीमा आगलागी हुँदा ८ जना घाइते भएका छन् । जानकी गाउँपालिका–५ बकसपुरस्थित अम्बे स्टिल सरिया कम्पनीमा आगलागी भएको हो । आइतबार (आज) बिहान फलाम पगाल्ने भट्टीमा विद्युत् सर्ट भएर अचानक आगलागी भएको जिल्ला प्रहरी कार्यालय, बाँकेले जनाएको छ । प्रहरीका अनुसार बिहान पौने ५ बजे दुर्घटना भएको हो । आगलागीमा परी घाइते हुनेमा बाँकेका ५ जना र भारतको बहराइच जिल्लाका ३ जना कामदार रहेका छन् । प्रहरीका अनुसार घाइतेमध्ये ४ जना डिस्चार्ज भइसकेका छन् । घाइतेहरूमध्ये दुई जनालाई भारतको लखनउ रिफर गरिएको प्रहरीले जनाएको छ । अन्य बाँकीको भेरी अस्पतालमा उपचार भइरहेको छ । नेपालगञ्ज उपमहानगरपालिका, कोहलपुर नगरपालिका, नेपाल प्रहरी, सशस्त्र प्रहरी बल तथा स्थानीयवासीको सहयोगमा बिहान सवा ८ बजे आगो पूर्ण रूपमा नियन्त्रणमा आएको थियो । आगलागीबाट भएको अन्य क्षतिको विवरण खुल्न बाँकी रहेको छ ।
बैंकहरूको खराब कर्जा १६.११ प्रतिशत बढ्यो, ८ बैंकले घटाए
काठमाडौं । चालु आर्थिक वर्ष २०८३/८४ को पहिलो त्रैमासमा वाणिज्य बैंकहरूको खराब कर्जा (एनपीएल) बढेको छ । गत आर्थिक वर्षको असोजमा औसत ४.८६ प्रतिशत विन्दु रहेको बैंकहरूको खराब कर्जा चालु आवको असोजसम्ममा बढेर ५.६४ प्रतिशत विन्दुमा पुगेको छ । गत वर्षको तुलनामा बैंकहरुको खराब कर्जा १६.११ प्रतिशतको वृद्धि हो । समीक्षा अवधिमा प्रभु बैंकको खराब कर्जा सबैभन्दा उच्च देखिएको छ । बैंकको खराब कर्जा ५.७८ प्रतिशत विन्दुबाट बढेर १४.८० प्रतिशत विन्दु पुगेको छ । यो १५६.०५ प्रतिशतको वृद्धि हो । त्यस्तै, एनआइसी एशिया बैंकको खराब कर्जा ६.९९ प्रतिशत विन्दुबाट बढेर ९.८१ प्रतिशत विन्दु पुगेको छ । नेपाल इन्भेष्टमेन्ट मेगा बैंक (एनआईएमबि) बैंकको ६.६३ प्रतिशत विन्दुबाट बढेर ८.८७ प्रतिशत विन्दु र कुमारी बैंकको ६.९८ प्रतिशत विन्दुबाट बढेर ८.७२ प्रतिशत विन्दु पुगेको छ । प्राइम बैंकको खराब कर्जा ५.८६ प्रतिशत विन्दुबाट बढेर ७.१५ प्रतिशत विन्दुमा पुगेको छ भने हिमालयन बैंकको ७.३९ प्रतिशत विन्दुबाट बढेर ७.९८ प्रतिशत विन्दु कायम भएको छ । एनएमबि बैंकको खराब कर्जा ४.५८ प्रतिशत विन्दुबाट बढेर ४.९२ प्रतिशत विन्दु पुगेको छ । त्यस्तै, स्ट्याण्डर्ड चार्टर्ड बैंकको खराब कर्जा १.७१ प्रतिशत विन्दुबाट बढेर १.८३ प्रतिशत विन्दु पुगेको छ । नेपाल एसबिआई बैंकको ३.०१ प्रतिशत विन्दुबाट बढेर ३.१९ प्रतिशत विन्दु, लक्ष्मी सनराइज बैंकको ५.४२ प्रतिशत विन्दुबाट बढेर ५.५८ प्रतिशत विन्दु र राष्ट्रिय वाणिज्य बैंकको ३.८३ प्रतिशत विन्दुबाट बढेर ३.८९ प्रतिशत विन्दु पुगेको छ । कृषि विकास बैंकको खराब कर्जा पनि सामान्य बढेर ४.७८ प्रतिशत विन्दुबाट ४.७९ प्रतिशत विन्दु पुगेको छ । यता, २० वाणिज्य बैंकमध्ये सात बैंकले भने खराब कर्जा घटाएका छन् । सिटिजन्स बैंकको खराब कर्जा ६.८४ प्रतिशत विन्दुबाट घटेर ६.८० प्रतिशत विन्दु पुगेको छ । सिद्धार्थ बैंकको ३.८० प्रतिशत विन्दुबाट घटेर ३.७० प्रतिशत विन्दु र ग्लोबल आइएमई बैंकको ४.९८ प्रतिशत विन्दुबाट घटेर ४.७९ प्रतिशत विन्दु कायम भएको छ । माछापुच्छ्रे बैंकको खराब कर्जा ४.१३ प्रतिशत विन्दुबाट घटेर ३.९७ प्रतिशत विन्दु, नबिल बैंकको ४.३१ प्रतिशत विन्दुबाट घटेर ४.०६ प्रतिशत विन्दु र नेपाल बैंकको ५.४९ प्रतिशत विन्दुबाट घटेर ४.६१ प्रतिशत विन्दुमा झरेको छ । सानिमा बैंकको खराब कर्जा ३.९१ प्रतिशत विन्दुबाट घटेर २.८६ प्रतिशत विन्दु पुगेको छ भने एभरेष्ट बैंकको ०.७४ प्रतिशत विन्दुबाट घटेर ०.५० प्रतिशत विन्दुमा सीमित भएको छ । एभरेष्ट बैंकको खराब कर्जा सबैभन्दा कम रहेको छ ।
१० अर्ब डलर क्षतिपूर्ति मागेको ट्रम्पको मुद्दा खारेज
काठमाडौं । अमेरिकी राष्ट्रपति डोनाल्ड ट्रम्पले अमेरिकी पत्रिका ‘द वाल स्ट्रिट जर्नल’ विरुद्ध दायर गरेको १० अर्ब अमेरिकी डलर क्षतिपूर्ति मागसम्बन्धी मानहानि मुद्दा अदालतले खारेज गरेको छ । अमेरिकाको फ्लोरिडास्थित संघीय अदालतका न्यायाधीश ड्यारिन गेल्सले शनिबार ट्रम्पको मुद्दा खारेज गर्ने फैसला गरेका हुन् । अदालतले पत्रिकाले समाचार प्रकाशित गर्दा जानाजानी गलत सूचना दिएको वा सत्यताप्रति बेवास्ता गरेको प्रमाण ट्रम्पले पेस गर्न नसकेको ठहर गरेको छ। यो मुद्दा जेफ्री एपस्टिनसँग जोडिएको समाचारलाई लिएर दायर गरिएको थियो । सन् २०२५ मा वाल स्ट्रिट जर्नलले एपस्टिनको ५०औं जन्मदिनका अवसरमा सन् २००३ मा तयार पारिएको एउटा एल्बममा ट्रम्पको नाम उल्लेख भएको पत्र र महिलाको नग्न चित्र समावेश रहेको समाचार प्रकाशित गरेको थियो । उक्त पत्रमा ट्रम्पको नाम रहेको र त्यसमा यौन संकेत झल्किने सन्देश लेखिएको पत्रिकाको दाबी थियो । तर, ट्रम्पले आफूले उक्त पत्र नलेखेको दाबी गर्दै समाचारलाई झुटो र मानहानिकारक बताएका थिए । त्यसपछि उनले पत्रिका, यसको प्रकाशक डाउ जोन्स, मिडिया व्यवसायी रूपर्ट मर्डोक र समाचार लेख्ने पत्रकारहरूविरुद्ध मुद्दा दायर गरेका थिए । ट्रम्पले सुरुमा दायर गरेको मुद्दा पनि गत अप्रिलमा अदालतले खारेज गरेको थियो । यद्यपि, संशोधित उजुरीसहित पुनः मुद्दा दायर गर्ने अवसर दिइएको थियो । यसपटक भने न्यायाधीश गेल्सले मुद्दा पुनः दायर गर्न नमिल्ने गरी खारेज गरेका हुन् । अदालतले पत्रिकाले समाचार प्रकाशन गर्नुअघि सम्बन्धित पक्षसँग प्रतिक्रिया मागेको र समाचारमा ट्रम्पको खण्डनसमेत समावेश गरेको विषयलाई पनि महत्त्व दिएको छ । यसैबीच ट्रम्पको कानुनी टोलीले फैसलाविरुद्ध पुनरावेदन गर्ने जनाएको छ ।
मिठाईको लेबलमा उत्पादनदेखि मूल्यसम्मको विवरण अनिवार्य गर्न विभागको निर्देशन
काठमाडौं । खाद्य प्रविधि तथा गुण नियन्त्रण विभागले बिक्रीका लागि राखिएका मिठाईमा उत्पादनसम्बन्धी सम्पूर्ण विवरण स्पष्ट रूपमा उल्लेख गर्न मिठाई व्यवसायीलाई निर्देशन दिएको छ । विभागले मिठाई व्यवसायीका नाममा सूचना जारी गर्दै उपभोक्ताको स्वास्थ्य सुरक्षा तथा हित संरक्षणका लागि मिठाईको सोकेस वा काउन्टरमा ग्राहकले देख्ने गरी लेबल राख्न निर्देशन दिएको हो । निर्देशनअनुसार मिठाईको नाम, मुख्य कच्चा पदार्थको सम्मिश्रण, तयार गर्न प्रयोग गरिएको तेल वा घिउको प्रकार तथा नाम, उपभोग गरिसक्नुपर्ने मिति र प्रतिकिलो मूल्य स्पष्ट उल्लेख गर्नुपर्नेछ । विभागले यसअघि २०८३ असोज ३० गते मिठाई व्यवसायीका लागि सूचना जारी गरेको थियो । उक्त सूचनाको कार्यान्वयनका लागि पुनः जानकारी गराउँदै होटल, मिठाई पसल तथा मिठाई भण्डारलगायतका व्यवसायीलाई निर्देशन पालना गर्न निर्देशन गरिएको हो । विभाग तथा मातहतका कार्यालयबाट नियमित निरीक्षण तथा अनुगमनका क्रममा निर्देशन कार्यान्वयन नभएको पाइएमा खाद्य स्वच्छता तथा गुणस्तर ऐन, २०८१ तथा प्रचलित कानुनबमोजिम कारबाही गरिने विभागले जनाएको छ । उपभोक्ताले आफूले खरिद गर्ने मिठाईमा प्रयोग भएका सामग्री, तेल तथा घिउको प्रकार, उपभोग्य मिति र मूल्यबारे जानकारी पाउने व्यवस्था गर्न विभागले यस्तो निर्देशन दिएको हो ।
कुमारी बैंकको विजनेश ग्रोथ ७.६८ प्रतिशत, नाफा १ अर्ब ७ करोड रुपैयाँ
काठमाडौं । कुमारी बैंकले चालु आर्थिक वर्ष २०८३/८४ को पहिलो त्रैमासमा १ अर्ब ७ करोड ४५ लाख ५ हजार रुपैयाँ खुद नाफा आर्जन गरेको छ । यो गत आर्थिक वर्षको सोही अवधिको तुलनामा १.७० प्रतिशतले बढी हो । गत वर्षको पहिलो त्रैमासमा बैंकले १ अर्ब ५ करोड ६५ लाख ३१ हजार रुपैयाँ खुद नाफा कमाएको थियो । समीक्षा अवधिमा बैंकको कर्जा नोक्सानी व्यवस्था (इम्पेयरमेन्ट चार्ज) ६४.४० प्रतिशतले घटेर ४४ करोड ९९ लाख ५४ हजार रुपैयाँमा झरेको छ । गत वर्षको सोही अवधिमा यस्तो रकम १ अर्ब २६ करोड ४१ लाख ७ हजार रुपैयाँ थियो । इम्पेयरमेन्ट चार्जमा करिब ८१ करोड ४१ लाख रुपैयाँले कमी आएपछि बैंकको सञ्चालन मुनाफा ३२.४० प्रतिशतले बढेर १ अर्ब ८८ करोड ५३ लाख रुपैयाँ पुगेको छ । बैंकको खुद ब्याज आम्दानी भने २८.१९ प्रतिशतले घटेको छ । गत वर्षको पहिलो त्रैमासमा २ अर्ब ९१ करोड २० लाख ५० हजार रुपैयाँ रहेको खुद ब्याज आम्दानी चालु आवको सोही अवधिमा घटेर २ अर्ब ९ करोड १२ लाख ८२ हजार रुपैयाँमा सीमित भएको छ । यस अवधिमा बैंकको ब्याज आम्दानी ७ अर्ब ३३ करोड ६१ लाख रुपैयाँबाट घटेर ६ अर्ब १८ करोड ५९ लाख रुपैयाँमा झरेको छ । ब्याज खर्च पनि ४ अर्ब ४२ करोड ४० लाख रुपैयाँबाट घटेर ४ अर्ब ९ करोड ४६ लाख रुपैयाँ कायम भएको छ । बैंकको खुद शुल्क तथा कमिसन आम्दानी ३.९० प्रतिशतले बढेर ८८ करोड २३ लाख ५५ हजार रुपैयाँ पुगेको छ । गत वर्षको पहिलो त्रैमासमा यस्तो आम्दानी ८४ करोड ९१ लाख ९६ हजार रुपैयाँ थियो । त्यस्तै, खुद ट्रेडिङ आम्दानी २५ करोड ७१ लाख रुपैयाँ र अन्य सञ्चालन आम्दानी ४४ करोड ११ लाख रुपैयाँ पुगेको छ । व्यवसाय विस्तारतर्फ बैंकको निक्षेप र कर्जा दुवै बढेका छन् । गत असार मसान्तको तुलनामा चालु आवको पहिलो तीन महिनामा निक्षेप संकलन ६.३६ प्रतिशतले बढेर ४ खर्ब २८ अर्ब ३४ करोड १२ लाख रुपैयाँ पुगेको छ । असार मसान्तमा यस्तो निक्षेप ४ खर्ब २ अर्ब ७३ करोड ६२ लाख रुपैयाँ थियो । त्यस्तै, ग्राहक कर्जा प्रवाह ७.६८ प्रतिशतले बढेर २ खर्ब ९३ अर्ब ९ करोड ६२ लाख रुपैयाँ पुगेको छ । गत असार मसान्तमा बैंकको कर्जा प्रवाह २ खर्ब ७२ अर्ब २० करोड २३ लाख रुपैयाँ थियो । गत आर्थिक वर्षको पहिलो त्रैमासमा ६.९८ प्रतिशत रहेको कुल निष्क्रिय कर्जा (एनपीएल) चालु आवको सोही अवधिमा बढेर ८.७२ प्रतिशत पुगेको छ । त्यस्तै, खुद निष्क्रिय कर्जा पनि १.५६ प्रतिशतबाट बढेर २.१७ प्रतिशत पुगेको छ । बैंकको निक्षेपको लागत (कस्ट अफ फण्ड) ४.२९ प्रतिशतबाट घटेर ३.४३ प्रतिशतमा झरेको छ भने आधार दर ५.८२ प्रतिशतबाट घटेर ४.८० प्रतिशत कायम भएको छ । औसत ब्याजदर अन्तर (स्प्रेड दर) पनि ३.५३ प्रतिशतबाट घटेर ३.०३ प्रतिशतमा सीमित भएको छ । बैंकको कर्जा–निक्षेप अनुपात (सीडी रेसियो) ७१.७१ प्रतिशत रहेको छ । नाफामा सामान्य सुधार भएसँगै बैंकको प्रतिसेयर आम्दानी (ईपीएस) १६.११ रुपैयाँबाट बढेर १६.३९ रुपैयाँ पुगेको छ । पुँजीमा प्रतिफल (आरओई) ११.१० प्रतिशतबाट घटेर ९.५१ प्रतिशत र सम्पत्तिमा प्रतिफल (आरओए) ०.९६ प्रतिशतबाट घटेर ०.८२ प्रतिशतमा झरेको छ । बजारमा बैंकको प्रतिसेयर मूल्य २३८.४० रुपैयाँ रहँदा मूल्य आम्दानी अनुपात १४.५५ गुणा कायम भएको छ । हाल २६ अर्ब २२ करोड ५८ लाख रुपैयाँ चुक्ता पुँजी रहेको बैंकको प्रतिसेयर नेटवर्थ १७२ रुपैयाँ ३१ पैसा, पुँजी पर्याप्तता अनुपात १२.६७ प्रतिशत र तरलता अनुपात ३५.४९ प्रतिशत रहेको छ । चालु आवको पहिलो त्रैमाससम्ममा बैंकको वितरणयोग्य नाफा १४ करोड ७१ लाख रुपैयाँ रहेको छ । जबकि गत वर्षको सोही अवधिमा बैंकको वितरणयोग्य नाफा ३ अर्ब ९१ करोड ९९ लाख रुपैयाँ ऋणात्मक थियो ।
जेनजी आन्दोलनको रापमा जर्मनी
काठमाडौं । युरोपेली मुलुक जर्मनीमा जेनजी (युवापुस्ता) को नेतृत्वमा भएको प्रदर्शन हिंसात्मक बनेको छ । शनिबार राति देशको वित्तीय केन्द्र र्फ्यांकफर्टमा प्रदर्शनकारीले पसलहरूमा लुटपाट गर्नुका साथै तोडफोड गरेका छन् । शिक्षाको गुणस्तर सुधार गर्न र बढ्दो महँगी नियन्त्रण गर्न माग गर्दै जर्मनीका प्रमुख सहरमा हजारौं युवा सडकमा उत्रिएका थिए । प्रदर्शनका क्रममा नकाब लगाएका केही व्यक्तिले र्फ्यांकफर्टका कम्तीमा दुईवटा पसल लुटेका थिए । अन्य पसलमा समेत तोडफोड भएको थियो । जर्मनीको ‘जेनजी रेगेल्ट’ नामक अभियान समूहको आयोजनामा बर्लिन, र्फ्यांकफर्ट र म्युनिखसहित ३४ सहरमा प्रदर्शन भएको थियो । समूहले अनिवार्य सैनिक सेवा लागू गर्ने योजनाको विरोध गर्दै शिक्षा क्षेत्रमा थप लगानी गर्न माग गरेको छ । र्फ्यांकफर्ट प्रहरीले प्रदर्शनका क्रममा केही पसलका सिसा फुटाइएको र सुरक्षाकर्मी तथा उद्धार टोलीलाई लक्षित गरी पेट्रोल बम प्रहार भएको जनाएको छ । प्रहरीले सहरको केन्द्रमा नजान र त्यहाँ रहेका मानिसलाई सुरक्षित स्थानमा जान आग्रह गरेको थियो । आयोजकले एक लाख ८२ हजार जनाको सहभागिता हुने अनुमान गरे पनि प्रहरीका अनुसार र्फ्यांकफर्ट, म्युनिख र बर्लिनमा गरी करिब १८ हजार जना मात्रै प्रदर्शनमा सहभागी भएका थिए । आयोजकले भने करिब ३६ हजार सहभागी भएको दाबी गरेका छन् । जर्मन अधिकारीहरूले शनिबारका अधिकांश प्रदर्शन शान्तिपूर्ण रहेको बताएका छन् । तर, अतिवादी समूहले प्रदर्शनलाई आफ्नो स्वार्थमा प्रयोग गर्न सक्ने भन्दै सचेत गराएका छन् । ह्याम्बर्गमा भने केही अवरोधमा आगजनी गरिएको थियो । प्रदर्शनकारीले युद्ध र जबर्जस्तीको सट्टा शान्ति र स्वतन्त्रताको पक्षमा आवाज उठाएको बताएका छन् । अभियानकी प्रवक्ता लिना फ्रेडरिकले स्वास्थ्य र शिक्षा क्षेत्रमा पर्याप्त लगानी हुनुपर्ने तथा अनिवार्य सैनिक सेवा लागू गर्न नहुने बताइन् । यसैबीच, सम्भावित हिंसात्मक गतिविधिको आशंकामा जर्मनीका विभिन्न सहरका व्यवसायीले पसलका सिसामा सुरक्षा प्रबन्ध मिलाएका थिए । बर्लिनको महँगा ब्रान्डका पसलहरू रहेका कुर्फ्युर्स्टेन्डाम क्षेत्रमा समेत पसलहरू चाँडै बन्द गर्ने तयारी गरिएको थियो । जर्मनीको अर्थतन्त्रले पछिल्लो समय सुस्त वृद्धिको सामना गरिरहेको छ । बढ्दो जीवनयापन खर्च, सार्वजनिक सेवामा दबाब र पेन्सन प्रणालीको चुनौतीले युवा पुस्तामा असन्तुष्टि बढाएको छ । प्रदर्शनमा सहभागी १८ वर्षीय विद्यार्थी स्टिभले सरकारलाई युवाका समस्या बेवास्ता नगर्न आग्रह गरेका छन् । माग सम्बोधन नभएसम्म शान्तिपूर्ण रूपमा भेला हुने अधिकार प्रयोग गरिरहने उनको भनाइ छ । जर्मनीमा भएको प्रदर्शन यस वर्ष युरोपका विभिन्न देशमा देखिएका युवा नेतृत्वका आन्दोलनको पछिल्लो शृङ्खला हो । युरोपका विभिन्न मुलुकमा बढ्दो महँगी, बेरोजगारी, कमजोर सार्वजनिक सेवा र राजनीतिक नेतृत्वप्रति असन्तुष्टि जनाउँदै युवा पुस्ता सडकमा उत्रिने क्रम बढेको छ । सामाजिक सञ्जालको प्रयोगमार्फत संगठित भएका युवाले शिक्षा, रोजगारी, जीवनयापनको खर्च र राजनीतिक जवाफदेहिताका विषयलाई आन्दोलनको मुख्य मुद्दा बनाउँदै आएका छन् । यसअघि सर्बियामा विद्यार्थी नेतृत्वको आन्दोलनले लामो समयदेखि सत्तामा रहेको नेतृत्वलाई निर्वाचनमार्फत हटाउन भूमिका खेलेको थियो । त्यहाँ भ्रष्टाचार र सरकारी जवाफदेहिताको माग गर्दै सुरु भएको विद्यार्थी आन्दोलनले व्यापक जनसमर्थन पाएको थियो । यस्तै, फ्रान्समा पनि युवा तथा अन्य प्रदर्शनकारीले सरकारका नीति र बढ्दो जीवनयापन खर्चको विरोधमा प्रदर्शन गरेका थिए । ती प्रदर्शनका क्रममा केही स्थानमा हिंसा, आगजनी र लुटपाटका घटना भएका थिए । युरोपको सबैभन्दा ठूलो अर्थतन्त्र मानिने जर्मनीमा पनि अहिले युवा पुस्ता बढ्दो आर्थिक दबाब र भविष्यप्रतिको अनिश्चिततासँग जुधिरहेको छ । शिक्षा क्षेत्रमा पर्याप्त लगानी नहुनु, जीवनयापन खर्च बढ्नु र अनिवार्य सैनिक सेवाको सम्भावित व्यवस्थाले युवामा असन्तुष्टि बढाएको छ । यही असन्तुष्टि प्रदर्शनका रूपमा सडकमा देखिएको हो । अन्य पठनीय सामग्रीहरू : इजरायलको चुनावी नतिजा र अबका चुनौती चिनियाँ अर्बपतिहरूमा नागरिकता त्याग्नेको संख्या बढ्दै एम्बाप्पेको अभिव्यक्तिले ला–लिगाको ४० करोड युरोको कारोबार जोखिममा ब्राजिलमा लुलाको ऐतिहासिक जित, चौथो कार्यकाल अहिलेसम्मकै कठिन
मुक्तिनाथ विकास बैंकको नाफा ४३.४४ प्रतिशत बढ्यो, कर्जा विस्तार ५ प्रतिशत
काठमाडौं । मुक्तिनाथ विकास बैंकले चालु आर्थिक वर्ष २०८३/८४ को पहिलो त्रैमासमा ३२ करोड २४ लाख रुपैयाँ खुद नाफा आर्जन गरेको छ । यो गत आर्थिक वर्षको सोही अवधिको तुलनामा ४३.४४ प्रतिशतले बढी हो । गत वर्षको असोजसम्ममा बैंकले २२ करोड ४७ लाख ७४ हजार रुपैयाँ खुद नाफा कमाएको थियो । समीक्षा अवधिमा बैंकको खुद ब्याज आम्दानी १ अर्ब २१ करोड ७६ लाख रुपैयाँ पुगेको छ । गत वर्षको सोही अवधिमा बैंकले १ अर्ब १८ करोड ५५ लाख १० हजार रुपैयाँ खुद ब्याज आम्दानी गरेको थियो । त्यस्तै, बैंकको खुद शुल्क तथा कमिसन आम्दानी २२ करोड रुपैयाँ नाघेको छ । गत वर्षको असोजसम्ममा यस्तो आम्दानी १२ करोड ७० लाख ८३ हजार रुपैयाँ रहेको थियो । बैंकको वितरणयोग्य नाफा ६१ करोड ५६ लाख ६ हजार रुपैयाँ रहेको छ । यस आधारमा बैंकको लाभांश क्षमता ७.६९ प्रतिशत छ । बैंकको प्रतिसेयर आम्दानी ११.२४ रुपैयाँबाट बढेर १६.१२ रुपैयाँ पुगेको छ । प्रतिसेयर नेटवर्थ १६५.६७ रुपैयाँ र मूल्य आम्दानी अनुपात २१.३४ गुणा रहेको छ । असोजसम्ममा बैंकले १ खर्ब २६ अर्ब २५ करोड ८२ लाख रुपैयाँ निक्षेप संकलन गरेको छ । गत वर्षको सोही अवधिमा बैंकको निक्षेप १ खर्ब २३ अर्ब ५३ करोड ९४ लाख रुपैयाँ थियो । यसअनुसार बैंकको निक्षेप २.२० प्रतिशतले बढेको छ । त्यस्तै, बैंकको कर्जा तथा सापट रकम ४.९४ प्रतिशतले बढेर १ खर्ब ५ अर्ब ४७ करोड रुपैयाँ पुगेको छ । गत वर्षको असोजसम्ममा बैंकले १ खर्ब ५० करोड रुपैयाँ कर्जा लगानी गरेको थियो । समीक्षा अवधिमा बैंकको कर्जा लगानी ४ अर्ब ९६ करोड ४५ लाख रुपैयाँले बढेको हो । बैंकको कुल सम्पत्ति १ खर्ब ४४ अर्ब २२ करोड रुपैयाँ पुगेको छ । सञ्चालन खर्च नियन्त्रण र कर्जा नोक्सानी व्यवस्थामा सुधारका कारण सञ्चालन मुनाफा बढेको बैंकले जनाएको छ । यद्यपि, बैंकको खराब कर्जा भने बढेको छ । गत वर्षको असोजमा ४.०३ प्रतिशत रहेको खराब कर्जा चालु आवको असोजसम्ममा बढेर ४.७३ प्रतिशत पुगेको छ ।
