पहाडी तथा हिमाली क्षेत्रमा साधारणतया बादल लाग्ने
काठमाडौं । हाल नेपालमा पश्चिमी कमजोर वायुको प्रभाव रहेको छ । हाल तराई भू-भाग तथा उपत्यकाहरूमा तुवाँलो लागेको छ भने सुदूरपश्चिम र कर्णाली प्रदेशलगायत देशको उच्च पहाडी तथा हिमाली क्षेत्रमा साधारणतया बादल लागेको छ । जल तथा मौसम पूर्वानुमान महाशाखाका अनुसार आज दिउँसो तराई भू-भागका केही स्थानमा मध्यान्हसम्म कुहिरो लाग्नेछ । देशका उच्च पहाडी र हिमाली भू-भागमा साधारणतया बादल लाग्नेछ र बाँकी पहाडी भू-भागमा आंशिक बादल लाग्नेछ र तराई भू-भागमा मुख्यतया सफा रहनेछ । कोशी, बागमती, गण्डकी र कर्णाली प्रदेशको उच्च पहाडी र हिमाली भागका एक/दुई स्थानमा हल्का वर्षा र हिमपातको सम्भावना छ । त्यसैगरी, आज राति तराई भू-भागका केही स्थानमा तुवाँलो रहनेछ । देशको उच्च पहाडी र हिमाली भू-भागमा आंशिक बादल लाग्नेछ र बाँकी भू-भागको मौसम सफा रहने छ । कोशी, गण्डकी र कर्णाली प्रदेशको उच्च पहाडी र हिमाली भू-भागको एक/दुई स्थानमा हल्का वर्षा र हिमपातको सम्भावना छ । तराई भू-भागका केही स्थानमा मध्यान्हसम्म कुहिरोको सम्भावना रहेको तथा तत्काल वर्षा हुने सम्भावना नरहेकाले तराई भू-भाग र उपत्यकामा वायु प्रदूषण पनि रहिरहने भएकाले प्रदूषणबाट सुरक्षित रहन सर्वसाधारण तथा सबै सरोकारवाला निकायलाई महाशाखाले अनुरोध गरेको छ ।
खाना पकाउने ग्यासको अभाव देखिएपछि विभागले अनुगमन गर्दै
काठमाडौं । बजारमा खानेतेल, खाना पकाउने ग्यासलगायत सामग्रीको कृत्रिम अभाव देखिएपछि वाणिज्य, आपूर्ति तथा उपभोक्ता संरक्षण विभागले राजधानीका विभिन्न स्थानमा स्थलगत अनुमगन तथा निरीक्षणलाई तीव्रता दिएको छ । विभागले उपभोक्तालाई अतिआवश्यक तथा दैनिक उपभोग्य वस्तुका उत्पादक, विक्रेता, पैठारीकर्ता, सञ्चयकर्ता र सेवाप्रदायक फर्म एवं प्रतिष्ठानमा निरन्तर रुपमा अन्य सक्षम निकायको सहयोग लिइ संयुक्त बजार अनुमगन अगाडि बढाइएको उल्लेख गरेको छ । सहज रूपमा उपभोक्तालाई राहत दिन, उपभोग्य वस्तुको कृत्रिम अभाव गराउनेलाई कारबाहीको दायरामा ल्याउन विभागले प्रभावकारी रुपमा अनुमगन गरिरहेको उल्लेख गरेको छ । पछिल्ला दिनमा विशेष गरी खाना पकाउने ग्यासको अभाव देखाएर उपभोक्तालाई दुःख दिने काम भइरहको छ । कानुनविपरीतका काम गर्नेलाई विभागले कारबाहीको दायरामा ल्याइएको उल्लेख गरेको छ । विभागले प्रचलित कानुनविपरीतका कुनै पनि क्रियाकलाप भएको पाइएमा प्रचलित कानुनबमोजिम कडा कारबाही हुने स्मरण गराएको छ । उपत्यकाका कीर्तिपुर, कलंकी, नयाँ बसपार्क, बालाजु, कोटेश्वरलगायत मुख्य क्षेत्रमा ४ वटा विशेष टोली परिचालन गरिएको छ । विभागका अनुसार अनुगमन क्रममा अनावश्यक भण्डारण गरेको वा ग्यास लुकाएको पाइए ३ लाख रुपैयाँसम्म जरिवानासहित कडा कानुनी कारबाही गरिनेछ । नेपाल आयल निगमले बजारमा खाना पकाउने ग्यासको सहज आपूर्ति भएको दाबी गरिरहेको भए पनि उपभोक्ताले सहज रूपमा पाउन नसकेको गुनासो गरेका छन् । अत्यधिक गुनासो बढेपछि विभागले आवश्यक सक्रियता देखाएको हो । यस्तै, नेपाल आयल निगमले सोमबार विज्ञप्ति जारी गर्दै तत्काल आवश्यक मात्रै ग्यासको खरिद गर्न तथा अनावश्यक सञ्जिती नगर्न आग्रह गरेको छ । आसन्न आमनिर्वाचनलाई मध्यनजर गर्दै ग्यासको बढीभन्दा बढी आयात गर्न फ्रेबुअरी महिनाको निर्धारित कोटामा दुई हजार मेट्रिक टन थप गरिएको निगमका प्रवक्ता मनोजकुमार ठाकुरले जानकारी दिए । हाल दैनिक औसत ११० बुलेट ग्यास नियमित रूपमा आयात भइरहेको उनले बताए । काठमाडौं उपत्यकामा बजारीकरण गर्ने करिब २३ मध्ये केही ग्यास उद्योगले दैनिक करिब ४० हजार सिलिण्डर बजारमा उपलब्ध गराइरहेका निगमले जनाएको छ ।
देशकै पहिलो बलम्बु ‘फ्लाइओभर’ तयार (फोटो फिचर)
काठमाडौं । नेपालको सडक सञ्जालमा बहुप्रतीक्षित नागढुङ्गा-सिस्नेखोला सुरुङमार्ग आयोजना अन्तर्गत बलम्बुस्थित ‘फ्लाइओभर’ को निर्माण सम्पन्न भएको छ । मुलुककै पहिलो आधुनिक फ्लाइओभरका रूपमा रहेको यस संरचनाले काठमाडौंको प्रवेशद्वारमा हुने ट्राफिक जामको समस्यालाई सदाका लागि अन्त्य गर्ने विश्वास गरिएको छ । आयोजनाका अनुसार फ्लाइओभरको कालोपत्रे गर्ने काम सकिएसँगै सडक बत्ती, ट्राफिक लाइट, सडक चिह्न र डिभाइडर राख्ने जस्ता सबै फिनिसिङका कामहरू सम्पन्न भइसकेका छन् । अहिले यो फ्लाइओभर सञ्चालनका लागि पूर्ण रूपमा तयारीअवस्थामा रहेको छ । १८० मिटर लम्बाइ र ७ मिटर चौडाइ रहेको यस फ्लाइओभरले त्रिभुवन राजमार्गलाई सुरुङमार्गसँग सिधा जोड्नेछ । यसले गर्दा काठमाडौं भित्रिने र बाहिरिने सवारीसाधनहरू कुनै अवरोध बिना सुचारु रूपमा गुड्न पाउनेछन् । नागढुङ्गाको घुमाउरो र जोखिमपूर्ण सडकको विकल्पका रूपमा तयार भइरहेको सुरुङमार्ग आयोजनाको यो एउटा महत्वपूर्ण हिस्सा हो । फ्लाइओभर सञ्चालनमा आएपछि थानकोट-बलम्बु क्षेत्रमा हुने सवारी चाप उल्लेख्य रूपमा घट्ने र इन्धन तथा समयको समेत ठुलो बचत हुने अपेक्षा गरिएको छ ।
महिला उम्मेदवारहरू जो चुनावी मैदानमा जित खोजिरहेका छन्
काठमाडौं । आसन्न प्रतिनिधि सभा निर्वाचनमा मुख्य राजनीतिक दलहरूबाट र स्वतन्त्र गरेर ३८८ महिला निर्वाचनको मैदानमा उत्रिएका छन् । दलहरूमा सवैभन्दा धेरै राष्ट्रिय स्वतन्त्र पार्टी (रास्वपा) ले १६ जना महिलालाई प्रत्यक्षतर्फ मैदानमा उतारेको छ । नेपाली कांग्रेसले ११, नेकपा एमाले र नेपाली कम्युनिस्ट पार्टी (नेकपा)ले १०–१० महिला उम्मेदवारलाई निर्वाचनको प्रतिस्पर्धामा उतारेका छन् । त्यसैगरी, ६० जना महिलाले स्वतन्त्र उम्मेदवारी दिएका छन् । राष्ट्रिय स्वतन्त्र पार्टी (राप्रपा) ले ८ जना महिलालाई मैदानमा ल्याउँदा तराईकेन्द्रित मानिएको जनता समाजवादी पार्टी (जसपा) ले पनि ८ जना महिलालाई नै उम्मेदवार बनाएको छ । कांग्रेसले सहमहामन्त्रीसमेत रहेकी महालक्ष्मी उपाध्याय डिनालाई मकवानपुर‑१ बाट मैदानमा उतारेको छ । यस्तै, सरिता प्रसाईं झापा‑२, मन्धरा चिमरिया झापा‑५ बाट प्रतिस्पर्धामा रहेका छन् । चन्द्रकलाकुमारी यादवले सिराहा‑४ बाट कांग्रेसको प्रतिनिधित्व गर्दै प्रतिनिधि सभामा पुग्ने अपेक्षा गर्दा किरण यादव महोत्तरी‑२ बाट मैदानमा रहेकी छन् । सुशीला थिङ सिन्धुली‑२ र सपना राजभण्डारी काठमाडौं‑८ बाट निर्वाचनको महायुद्घमा रहेका छन् । नानु बस्तोला काठमाडौं‑९, मीनाकुमारी खरेल चितवन‑२ कुसुमदेवी थापामगर रुकुम–पूर्व र बास्ना थापा दैलेखबाट कांग्रेसको निर्वाचन प्रतिक वोकेर सँसद भवनको यात्रा तय गर्ने अपेक्षमा छन्। एमालेले प्रत्यक्ष निर्वाचनमा १० महिला उम्मेदवार मैदानमा उतारेको छ । एमालेको तर्फबाट बर्दिया–२ मा विमला विक, बागलुङ–२ मा मञ्जु शर्मा र तनहुँ–१ मा भगवती न्यौपाने मैदानमा छन् । यस्तै, पर्सा–२ बाट रिमाकुमारी यादव, बारा–३ बाट ज्वालाकुमारी साह र महोत्तरी–४ बाट नीलम अधिकारी प्रतिस्पर्धामा छन् । धनुषा–३ बाट जुलीकुमारी महतो महासेठ, ओखलढुङ्गा बाट अस्मिता थापा, सोलुखुम्बु बाट कल्पना राई र सुनसरी–३ बाट भगवती चौधरी एमालेका महिला उम्मेदवार रहेका छन् । नेकपाबाट बीना मगर कञ्चनपुर –१, सिन्धु जलेसा नवलपरासी पश्चिम –१ र यशोदा सुवेदी गुरुङ मनाङबाट पार्टीको प्रतिनिधित्व गरिरहेका छन् । रेनु दाहाल चितवन–३, रूपा महर्जन काठमाडौँ–१०, मेनका भण्डारी काठमाडौं–१ बाट मैदानमा रहेका छन् । रुवीकुमारी कर्ण सप्तरी–४, सरिता खड्का थापा सङ्खुवासभा–१ र धर्मशिला चापागाइ झापा–२ मैदानमा रहेका छन् । त्यस्तै, रामकुमारी चौधरी सुनसरी–२, पुनम देवी रौतहट–३ र बसुन्धरा हुमागाईँ काभ्रेपलाञ्चोक–२ बाट मैदानमा रहेका छन् । रास्वपाले १६ महिलाहरूलाई मैदानमा पठाएको छ । निशा डाँगीलाई झापा–१ बाट रास्वपाले प्रत्यक्ष टिकट दिएको छ । त्यस्तै, इन्दिरा रानामगर झापा–२, आशा झा मोरङ–५, रुबिना आचार्य मोरङ–६, सरिन तामाङ सुनसरी–१ आशिका तामाङ धादिङ–१, रञ्जु दर्शना काठमाडौ–१, तोसिमा कार्की ललितपुर–३ र सोविता गौतम चितवन–३ मा उम्मेदवार रहेका छन् । प्रतिनिधि सभा निर्वाचनको अभियानमा महिला उम्मेदवारहरूले मैदानमा सक्रिय हुँदै माहोल सिर्जना गरिरहेका छन् । बर्दिया–२ की विमला विक, बागलुङ–२ की मञ्जु शर्मा, तनहुँ–१ की भगवती न्यौपाने लगायतका नेतृहरू अहिले मैदानमै छन् । गाउँ–गाउँ, सडक–सडक, बजार–बजार पुगेर मतदातासँग संवाद गर्दै स्थानीय विकास, शिक्षा, स्वास्थ्य र रोजगारीका विषयमा आफ्नो एजेन्डा प्रस्तुत गरिरहेकाले अभियानमा उनीहरूको जोश र ऊर्जा देखेर स्थानीय मतदाताले सकारात्मक प्रतिक्रिया दिएको बर्दियाकी विकले बताइन् । बर्दिया–२ मा विकले आफ्नो क्षेत्रका महिला, युवाहरू र दलित समुदायसँग भेटघाट गर्दै सामाजिक न्याय र समानतामाथि जोड दिइरहेकी छन् । बागलुङ–२ की मञ्जु शर्माले स्थानीय सडक, विद्यालय र स्वास्थ्य चौकीहरूको निरीक्षण गर्दै आफूले अघि सारेको विकास योजना बुझाइरहेकी छन् । उनले महिला सशक्तिकरण र युवाहरूको रोजगारीमा जोड दिँदै मतदाताको मन जित्ने प्रयास गरिरहेको बताएकी छन् । बीना मगर कञ्चनपुर–१ र रेणु दाहाल चितवन–३ नेकपाका उम्मेदवार हुन् । मगर आफ्नो निर्वाचन क्षेत्रमा स्थानीय विकास र आधारभूत सेवामा सुधार गर्ने एजेन्डा अघि सार्दैछिन् । उनका अनुसार सडक, शिक्षा, स्वास्थ्य र खानेपानी जस्ता प्राथमिक सेवामा निरन्तरता र सुधार आवश्यक छ । यसैगरी, उनी समावेशी विकास र समुदायको सुरक्षामा पनि जोड दिन चाहन्छिन् । यद्यपि उनको विस्तृत चुनावी घोषणापत्र सार्वजनिक भएको छैन । दाहालले चितवन–३ मा आफ्नो पूर्वमेयरको अनुभव मतदातासँग प्रस्तुत गर्दैछिन् । भरतपुरमा आफ्नो कार्यकालको समयमा उनले सम्पन्न गरेका परियोजनाहरू र स्थानीय पूर्वाधार सुधारलाई उनले मतदातामा विश्वास बढाउने आधार बनाइरहेकी छिन् । उनले स्थानीय सेवाहरू, सहरी सुविधा र समृद्धि विस्तारमा विशेष ध्यान दिने प्रतिवद्धता व्यक्त गरेकी छन् । मकवानपुर–१ मा महालक्ष्मी उपाध्याय डिनाले सडक, खानेपानी, विद्युत र सञ्चार जस्ता आधारभूत सेवामा सुधारका साथै महिला र युवाको सशक्तिकरण र समावेशी विकासमा जोड दिइरहेकी छन्।् । झापा‑२ की सरिता प्रसाईंले कृषि उत्पादन वृद्धि, सिँचाइ सुविधा, स्थानीय बजार सुधार र गुणस्तरीय शिक्षा तथा स्वास्थ्य सेवाको पहुँच विस्तारमा ध्यान केन्द्रित गरेको बताएकी छन् । पूर्वप्रधानमन्त्री ओलीसँग भिडिरहेकी झापा‑५ की मन्धरा चिमरिया पनि कृषि विकास, पूर्वाधार सुधार, शिक्षा र स्वास्थ्य सेवाका साथै सामाजिक समावेशीतामा जोड दिँदै मतदातासँग प्रत्यक्ष संवाद गरिरहेकी छन् । निशा डाँगीले आफ्नो चुनावी अभियानमा युवा नेतृत्व, सामाजिक परिवर्तन र नवप्रवर्तनमा जोड दिइरहेकी छन् । उनी मतदातासँग प्रत्यक्ष संवाद गर्दै स्थानीय पूर्वाधार, शिक्षा, स्वास्थ्य र रोजगारी सुधारका मुद्दा उठाउँदै निर्वाचनको माहोल बनाउँदै छन् । उनका योजनाले झापाको युवा मतदातालाई आकर्षित गर्ने उनको दाबी रहेको छ । इन्दिरा रानामगर पूर्वउपसभामुखसमेत रहिसकेकी छन् । उनले आफ्नो अनुभव र नेतृत्व क्षमतामा जोड दिँदै चुनावी मैदानमा सक्रियता जनाएकी छन् । उनका एजेन्डामा महिला अधिकार, सामाजिक न्याय, समावेशी विकास र सुशासन मुख्य प्राथमिकतामा छन् । पूर्वसांसदको अनुभवले उनलाई मतदान क्षेत्रमा विश्वासयोग्य उम्मेदवारको रूपमा प्रस्तुत गरेको छ । विश्लेषकहरूका अनुसार महिला उम्मेदवारहरूको सक्रियता र सकारात्मक अभियान शैलीले निर्वाचन क्षेत्रमा उत्साह बढाएको छ । यो निर्वाचन महिला नेतृत्वको प्रतिनिधित्व र स्थानीय विकास प्राथमिकतामा जनताले कत्तिको विश्वास गर्छन् भन्ने परीक्षण पनि बन्ने उनीहरूको बुझाइ छ । सम्पूर्ण महिला उम्मेदवारहरूले प्रत्यक्ष संवाद र स्थानीय आवश्यकताअनुसार योजनालाई अभियानको मुख्य रणनीति बनाएका छन् । यसले निर्वाचनको माहोल सिर्जना गर्नुका साथै महिला नेतृत्वको सशक्तिकरणलाई पनि स्पष्ट रुपमा देखाइरहेको छ । विश्लेषक पर्शुराम घिमिरे पार्टीको संगठनात्मक बल, स्थानीय परिचित नेटवर्क र सामाजिक पहिचान भएका उम्मेदवारहरूले भोट संकलनमा तुलनात्मक लाभ लिन सक्ने बताउँछन् । ‘महिला उम्मेदवारहरूले महिला र युवा मतदातालाई लक्षित गरेर प्रचार अभियान सञ्चालन गरिरहेका छन् । जसले मतदातासँग प्रत्यक्ष सम्बन्ध निर्माण गर्नेछ,’ घिमिरेले भने । तर धेरै उम्मेदवार उच्च प्रतिस्पर्धात्मक क्षेत्रमा रहेका कारण जातीय, सामाजिक समीकरण र विपक्षी दलको बलियो उपस्थितिले परिणाममा ठूलो प्रभाव पार्ने उनको भनाइ छ । विश्लेषक घिमिरे यो निर्वाचन महिला नेतृत्वको प्रतिनिधित्व र स्थानीय आवश्यकतामा मतदाताको धारणा परीक्षण गर्ने मौका पनि हुने जनाउँछन् ।
चक्रपथ विस्तारको दोस्रो खण्डमा भएको ढिलाइ कुटनीतिक प्रोटोकलको विषय हो : सचिव शर्मा
काठमाडौं । भौतिक पूर्वाधार तथा यातायात मन्त्रालयका सचिव केशवकुमार शर्माले देशको पूर्वाधार विकास, ठेक्का व्यवस्थापन र वैदेशिक सहयोगमा सञ्चालित आयोजनाहरूमा देखिएका अन्यौलताबारे स्पष्ट पारेका छन् ।नेपाल उद्योग परिसंघले सोमबार (आज) आयोजना गरेको अन्तरक्रिया कार्यक्रममा सचिव शर्माले तीनकुने पुलको ढिलाइदेखि चक्रपथ (रिङरोड) विस्तारमा देखिएका कुटनीतिक जटिलतासम्मका विषयमा चर्चा गरे । सचिव शर्माका अनुसार हाल सडक विभाग र मन्त्रालयअन्तर्गत करिब ३ हजार २०० वटा ठेक्का सञ्चालनमा छन् । तीमध्ये करिब ३०० वटा ठेक्का समस्याग्रस्त देखिएका छन् । ‘हामीले ती समस्याग्रस्त ठेक्काहरूको समय-समयमा मूल्याङ्कन गरिरहेका छौं,’ सचिव शर्माले भने, ‘यस वर्ष ४२ वटा ठेक्का तोडिएका छन् । यो एक नियमित प्रक्रिया हो, अघिल्लो वर्ष ७९ वटा ठेक्का तोडिएका थिए ।’ कतिपय अवस्थामा सरकारी डिजाइनमा समस्या, मुआब्जा विवाद र रुख कटानजस्ता कारणले पनि ठेक्का ढिलाइ हुने गरेको उनले बताए । तीनकुनेको निर्माणाधीन पुलको काम रोकिएको विषयमा सचिव ढकालले पुरानो ठेक्का तोडेर नयाँ प्रक्रिया सुरु भइसकेको जानकारी दिए । ‘ठेक्का तोड्नु दुखद र झन्झटिलो प्रक्रिया हो । यो अदालत र क्लेममा जाने हुनाले सेटलमेन्ट नभई अर्को ठेकेदार ल्याउन मिल्दैन,’ उनले भने, ‘कष्ट बढ्ने र प्राविधिक जोखिम हुने डरले गर्दा पनि ठेक्का तोड्न केही समय कुर्नुपर्ने बाध्यता हुन्छ।’ चिनियाँ सहयोगमा बन्ने भनिएको चक्रपथ विस्तारको दोस्रो खण्डमा भएको ढिलाइबारे बोल्दै सचिव शर्माले यसलाई कुटनीतिक प्रोटोकलको विषय भएको बताए । उनले वैदेशिक सहयोगका आयोजनामा एक देशले बनाएको संरचना अर्को देश वा नेपाल आफैले चलाउँदा पनि समन्वयको आवश्यकता पर्ने उल्लेख गरे । ‘कुनै देशले सहयोगमा बनाइदिएको चिज सोध्दै नसोधी उखेल्दा कुटनीतिक असन्तुष्टि आउन सक्छ,’ उनले भने, ‘त्यसैले केही समय कुर्नुपरेको हो । तर, उनीहरूले नगर्ने सेक्सनमा हामीले आफै काम सुरु गरिसकेका छौं ।’ नेपालमा उत्पादित बिजुली खपत बढाउन औद्योगिकीकरण नै मुख्य उपाय भएको सचिव शर्माको तर्क छ । ट्रान्सपोर्ट सेक्टरमा विद्युतीय सवारीसाधन (ईभी)लाई सरकारले प्रोत्साहन गरिरहेको र पूर्व-पश्चिम राजमार्गमा बन्ने रेलमार्ग पनि विद्युतीय नै हुने उनले स्पष्ट पारे । ‘इभीले मात्र ठुलो मात्रामा बिजुली खपत गर्न सक्दैन, त्यसका लागि हामीले विद्युतीय रेलमा जानैपर्छ,’ उनले थपे । बजेट विनियोजनमा राजनीतिक नेताहरूको हालीमुहाली हुने गरेको भन्ने प्रश्नमा सचिव शर्माले बजेट एक राजनीतिक दस्तावेज पनि भएको स्वीकार गरे । उनले भने, ‘राजनीतिक नेतृत्व जनताबाट चुनिएर आएको हुन्छ, उनीहरूको भिजन हुनु स्वभाविक हो । तर, कर्मचारीतन्त्रले पनि विज्ञताका आधारमा आफ्ना अडानहरू राख्ने गरेको छ । बजेट निर्माणमा विज्ञको भ्यु र राजनीतिक भिजनको राम्रो सम्मिश्रण हुनुपर्छ ।’ उनले आयोजना छनोट गर्दा अबदेखि आर्थिक लाभ मात्र नहेरी त्यसले पुर्याउने सामाजिक प्रभाव (स्वास्थ्य, शिक्षा र उत्पादकत्व) लाई पनि आधार मान्न थालिएको बताए ।
जेनजी आन्दोलन जाँचबुझ आयोगको म्याद पुनः २५ दिन थप गर्ने सरकारको निर्णय
काठमाडौं । सरकारले जेनजी आन्दोलनको घटनाको छानबिन गर्न गठित जाँचबुझ आयोगको म्याद पुनः २५ दिन थप गर्ने भएको छ । सोमवार सिंहदरबारस्थित प्रधानमन्त्री तथा मन्त्रिपरिषदको कार्यालयमा बसेको मन्त्रिपरिषद् बैठकले तेस्रो पटक सो आयोगको म्याद थप गर्ने निर्णय गरेको हो । सो आयोगको दोस्रो पटक थप गरिएको म्याद माघ २८ गते बुधवार सकिँदैछ । सो आयोगको म्याद पुनः थप गर्ने निर्णय गरिएको नेपाल सरकारका प्रवक्तासमेत रहेका गृहमन्त्री ओमप्रकाश अर्यालले जानकारी दिए । उनले भने, ‘नेपाल सरकार मन्त्रिपरिषदको २०८२ असोज ५ गतेको निर्णय अनुसार भदौ २३ र २४ गतेको प्रदर्शनको क्रममा भएको भौतिक एवं मानवीय क्षतिको यथार्थ छानबिन गरी प्रतिवेदन पेश गर्न गठित जाँचबुझ आयोगको समय अवधि २५ दिन थप गर्ने निर्णय गरियो ।’ सरकारले गत असोज ५ गते जेनजी आन्दोलनको क्रममा भएको भौतिक तथा मानवीय क्षतिको घटनाको छानविन गर्न विशेष अदालतका पूर्व न्यायाधीश गौरीबहादुर कार्कीको नेतृत्वमा ३ सदस्यीय आयोग गठन गरेको थियो । ३ महिनाको कार्यादेशसहित गठित सो आयोगले आफ्नो काम पूरा गर्न नसकेपछि पुस ८ गते बसेको मन्त्रिपरिषद बैठकले एक महिनाको लागि आयोगको म्याद थप गरेको थियो । आयोगले आफ्नो काम पूरा गर्न नसकेपछि माघ ८ गते बसेको मन्त्रिपरिषद बैठकले पुन २० दिन आयोगको म्याद थप गरेको थियो । तर दोस्रो पटक थपिएको समयावधि भित्र पनि आयोगले आफ्नो प्रतिवेदन बुझाउन नसकेपछि पुन तेस्रो पटक २५ दिन सरकारले म्याद थप गरेको हो । त्यस्तै, मन्त्रिपरिषद बैठकले आर्थिक वर्ष २०८१/०८२ को वार्षिक प्रतिवेदन राष्ट्रपतिसमक्ष पेश गर्ने निर्णय गरेको छ । संवैधानिक व्यवस्थाअनुसार सरकारले हरेक वर्षको आफ्नो वार्षिक प्रतिवेदन राष्ट्रपति समक्ष पेश गर्नुपर्ने हुन्छ । त्यसैगरी, बैठकले राष्ट्रिय आर्थिक गणना २०८२ को तथ्यांक संकलन गर्ने आदेश पनि स्वीकृत गरेको छ ।
नेपालमा साना गाडीको कथा बदल्ने ह्युन्डाई स्यान्ट्रो
काठमाडौं । नेपाली साना गाडीको बजारमा नयाँ पहिचान स्थापित गर्न सफल ह्युन्डाई स्यान्ट्रोले २५ वर्षे यात्रा पूरा गरेको छ । सन् १९९९ मा ह्युन्डाई इन्डियाले पहिलो मोडेलका रूपमा सार्वजनिक गरेको स्यान्ट्रो नेपालमा प्रवेश गर्दा साना गाडीको बजारमा जापानी ब्रान्डहरूको प्रभुत्व रहेको थियो । स्यान्ट्रो नेपालमा प्रवेश गरेसँगै भारतमा उत्पादन भएका गाडीप्रतिको विश्वास विस्तारै विकास हुँदै थियो । दैनिक प्रयोगलाई ध्यानमा राखी डिजाइन गरिएको आरामदायी स्यान्ट्रो सुरुदेखि नै फरक पहिचान बनाउन सफल भयो । नेपाल ह्युन्डाई स्यान्ट्रोको पहिलो निर्यात बजार बनेसँगै यो मोडेल ह्युन्डाई र नेपाल दुवैका लागि गर्वको विषय बनेको थियो । स्यान्ट्रोले नेपाली ग्राहकहरूको ह्याचब्याकप्रतिको धारणा परिवर्तन गर्न महत्वपूर्ण भूमिका खेलेको छ । सानो गाडी पनि भरपर्दो, आकर्षक, मर्मतमा सजिलो तथा नेपाली सडक र पारिवारिक आवश्यकताअनुसार उपयुक्त हुन सक्छ भन्ने सन्देश स्यान्ट्रोले दिएको थियो । समयसँगै स्यान्ट्रो केवल एउटा सवारीसाधन मात्र नभई नेपाली परिवारहरूको विश्वासिलो साथीका रूपमा स्थापित भयो । स्यान्ट्रोबाट सुरु भएको यही भरोसाको आधारमा ह्युन्डाईले नेपालमा आफ्नो बजार विस्तार गर्दै आएको छ । आज स्यान्ट्रोको २५ वर्ष पूरा भएको अवसरमा ह्युन्डाईले एक प्रतिष्ठित मोडेल मात्र होइन, त्यसबाट सुरु भएको विश्वासको विरासतलाई समेत सम्मान गरिरहेको जनाएको छ । यस विशेष अवसरमा ह्युन्डाई इन्डिया र ह्युन्डाई नेपालको सहकार्यमा सन् २००० मोडेल वर्षका ह्युन्डाई स्यान्ट्रो प्रयोगकर्ताहरूलाई ह्युन्डाई नेपालसँग सम्पर्क गर्न अनुरोध गरिएको छ । छनोटमा परेका ग्राहकहरूले ह्युन्डाईद्वारा तयार गरिएको विशेष सरप्राइजको अनुभव गर्ने अवसर पाउने कम्पनीले जनाएको छ ।
पर्यटन प्रवर्द्धन गर्न नेपाल राइडर्स मिट हुँदै, ५५० भन्दा बढी राइडर सहभागी हुने
काठमाडौं । नेपालको साहसिक तथा अनुभवमा आधारित पर्यटन प्रवर्द्धन गर्ने उद्देश्यले ललितपुरमा आठौँ नेपाल राइडर्स मिट आयोजना हुने भएको छ । आगामी फागुन २ देखि ४ गतेसम्म ललितपुरको गोदावरी नगरपालिका–२ स्थित चापाखर्कमा कार्यक्रम सञ्चालन हुने आयोजकले जानकारी दिएका छन् । नेपाल पर्यटन बोर्डको सभाहलमा सोमबार आयोजित पत्रकार सम्मेलनमार्फत द हिमालयन मोटरसाइकल एक्सपेरियन्सका संयोजक अर्जुन थापाले नेपाल राइडर्स मिटबारे जानकारी गराएका हुन् । उनका अनुसार कार्यक्रममा नेपालसहित भारत, भुटान र म्यानमारलगायत मुलुकबाट ५५० भन्दा बढी राइडर सहभागी हुनेछन् । कार्यक्रमलाई सम्बोधन गर्दै नेपाल पर्यटन बोर्डका वरिष्ठ प्रबन्धक सूर्य थपलियाले मोटरसाइकल राइडिङ नेपालको पर्यटन प्रवर्द्धनका लागि महत्वपूर्ण माध्यम हुने बताए । उनले यस्ता कार्यक्रमले परम्परागत पदयात्रा र पर्वतारोहणभन्दा बाहिरका पर्यटन उत्पादनलाई प्रवर्द्धन गर्दै रोड ट्रिप, साहसिक पर्यटन तथा सीमापार पर्यटन विस्तारमा सहयोग पुग्ने उल्लेख गरे । थपलियाले भने, 'नेपाल राइडर्स मिटले साहसिक र अनुभवमा आधारित पर्यटन प्रवर्द्धनमा महत्वपूर्ण योगदान गर्नेछ । भारतमा बढ्दो बाइक राइडिङ संस्कृतिलाई लक्षित गरी नेपालमा राइडर भित्र्याउन सके पर्यटक आगमनमा उल्लेखनीय वृद्धि हुनेछ । यसले नेपालको संस्कृति र प्रकृतिसँग नजिकबाट साक्षात्कार गर्ने अवसर पनि प्रदान गर्छ ।' त्यसैगरी आयोजक संस्था फोरे नेपालका सकिल गौचन, सहयोगी संस्था रोयल इन्फिल्डका निर्देशक मेगराज पौडेल तथा द हिमालयन क्लबका प्रमुख अनिल काफ्लेले नेपाल राइडर्स मिट राइडिङ समुदायको महत्वपूर्ण पर्व भएको बताउँदै बाइक राइडिङलाई पर्यटन प्रवर्द्धनको प्रमुख उत्पादनका रूपमा विकास गर्नुपर्नेमा जोड दिए । उनीहरूले यस कार्यक्रमले राइडरबीच भाइचारा विकास गर्नुका साथै नेपालको संस्कृति र पहिचान प्रवर्द्धनमा टेवा पुग्ने विश्वास व्यक्त गरे । सन् २०१३ मा बर्दियाबाट सुरु भएको नेपाल राइडर्स मिट सुरुआतमा सीमित सहभागिताबाट सुरु भएको भए पनि हाल ५०० भन्दा बढी राइडर सहभागी हुने स्तरमा विस्तार भएको छ । यस कार्यक्रममार्फत नेपालको प्राकृतिक सौन्दर्य, सांस्कृतिक विविधता, रमणीय राजमार्ग तथा आतिथ्य संस्कृतिको प्रचार–प्रसार गर्ने लक्ष्य लिइएको आयोजकले जनाएको छ । यसअघि बर्दिया, चितवन, मनाङलगायत विभिन्न स्थानमा आयोजना भइसकेको नेपाल राइडर्स मिटले डिजिटल प्लेटफर्म, राइडर नेटवर्क तथा सञ्चारमाध्यममार्फत नेपाली पर्यटन गन्तव्यहरूको अन्तर्राष्ट्रिय प्रवर्द्धनमा सहयोग पुर्याउने अपेक्षा गरिएको छ ।
