एनपीएल डिसहोममा निःशुल्क हेर्न पाइने, एचडीमा प्रत्यक्ष प्रसारण
काठमाडौं । नेपाल प्रिमियर लिग (एनपीएल) को तेस्रो संस्करणका खेल डिसहोम डीटीएच तथा आईपीटीभीमार्फत अतिरिक्त शुल्कबिना एचडी गुणस्तरमा हेर्न पाइने भएको छ । डिसहोमका सक्रिय डीटीएच तथा आईपीटीभी ग्राहकले हिमालय स्पोर्ट्स, स्टार स्पोर्ट्स सेलेक्ट वान र स्टार स्पोर्ट्स सेलेक्ट टुमार्फत एनपीएलका खेल प्रत्यक्ष हेर्न सक्नेछन् । त्यसका लागि ग्राहकको सदस्यता सक्रिय रहेको हुनुपर्ने कम्पनीले जनाएको छ । सदस्यता अवधि समाप्त भएका ग्राहकले खल्ती तथा ईसेवामार्फत रिचार्ज गरेर खेलको प्रत्यक्ष प्रसारण हेर्न सक्नेछन् । प्रतियोगिताका दिन दुई खेल हुने अवस्थामा पहिलो खेल दिउँसो १२ः३० बजे र दोस्रो खेल साँझ ५ बजेबाट प्रत्यक्ष प्रसारण गरिनेछ । डिसहोमले क्रिकेटप्रेमी दर्शकलाई घरमै बसेर एनपीएलका चौका, छक्का र विकेटसहित खेलका रोमाञ्चक क्षणको आनन्द लिन सक्ने सुविधा उपलब्ध गराएको जनाएको छ । ‘एनपीएल सिजन ३, क्रिकेटको जोश, डिसहोमको साथ’ भन्ने नारासहित कम्पनीले प्रतियोगिताको प्रत्यक्ष प्रसारणमार्फत क्रिकेटप्रेमी दर्शकलाई जोड्ने जनाएको छ ।
डलर, युरो र पाउण्डसहित अधिकांश विदेशी मुद्राको भाउ बढ्यो
काठमाडौं । नेपाल राष्ट्र बैंकले मंगलबारका लागि निर्धारण गरेको विदेशी मुद्राको विनिमयदरअनुसार अमेरिकी डलर, युरो, पाउण्ड स्टर्लिङ र स्वीस फ्र्यांकसहित अधिकांश विदेशी मुद्राको भाउ बढेको छ। राष्ट्र बैंकका अनुसार आज अमेरिकी डलर एकको खरिददर १५२ रुपैयाँ र बिक्रीदर १५२ रुपैयाँ ६० पैसा रहेको छ। सोमबार डलरको खरिददर १५१ रुपैयाँ ६१ पैसा र बिक्रीदर १५२ रुपैयाँ २१ पैसा थियो। त्यस्तै, युरोपियन युरो एकको खरिददर १७० रुपैयाँ ३२ पैसा र बिक्रीदर १७० रुपैयाँ ९९ पैसा तोकिएको छ। अघिल्लो दिन युरोको खरिददर १६९ रुपैयाँ ८५ पैसा र बिक्रीदर १७० रुपैयाँ ५२ पैसा थियो। आज पाउण्ड स्टर्लिङ एकको खरिददर २०२ रुपैयाँ ८५ पैसा र बिक्रीदर २०३ रुपैयाँ ६५ पैसा पुगेको छ। सोमबार यसको खरिददर २०२ रुपैयाँ ७६ पैसा र बिक्रीदर २०३ रुपैयाँ ५६ पैसा थियो। स्वीस फ्र्यांक एकको खरिददर १८४ रुपैयाँ ३ पैसा र बिक्रीदर १८४ रुपैयाँ ७६ पैसा निर्धारण गरिएको छ। अघिल्लो दिन यसको खरिददर १८३ रुपैयाँ ७६ पैसा र बिक्रीदर १८४ रुपैयाँ ४९ पैसा थियो। यसैगरी, अष्ट्रेलियन डलर एकको खरिददर १०६ रुपैयाँ ९८ पैसा र बिक्रीदर १०७ रुपैयाँ ४० पैसा पुगेको छ। सोमबार यसको खरिददर १०६ रुपैयाँ ६७ पैसा र बिक्रीदर १०७ रुपैयाँ ९ पैसा थियो। क्यानेडियन डलरको भाउ पनि बढेको छ। आज यसको खरिददर १०८ रुपैयाँ ४५ पैसा र बिक्रीदर १०८ रुपैयाँ ८८ पैसा तोकिएको छ। अघिल्लो दिन क्यानेडियन डलरको खरिददर १०८ रुपैयाँ २६ पैसा र बिक्रीदर १०८ रुपैयाँ ६९ पैसा थियो। त्यस्तै, सिंगापुर डलरको भाउ पनि बढेको छ। आज सिंगापुर डलर एकको खरिददर ११८ रुपैयाँ ७६ पैसा र बिक्रीदर ११९ रुपैयाँ २३ पैसा निर्धारण गरिएको छ। सोमबार यसको खरिददर ११८ रुपैयाँ ६० पैसा र बिक्रीदर ११९ रुपैयाँ ७ पैसा थियो। राष्ट्र बैंकले विदेशी मुद्राको विनिमयदर आवश्यकताअनुसार जुनसुकै समयमा संशोधन गर्न सकिने जनाएको छ। वाणिज्य बैंकहरूले तोक्ने विनिमयदर फरक हुन सक्ने भएकाले अद्यावधिक दर सम्बन्धित बैंकबाट पनि बुझ्न सकिनेछ।
११ जना प्रहरी कर्मचारीलाई ७ दिनभित्र हाजिर हुन निर्देशन
काठमाडौं । नेपाल प्रहरीले लामो समयदेखि आफूखुसी कार्यालयमा गैरहाजिर रहेका ११ जना प्रहरी कर्मचारीलाई सात दिनभित्र हाजिर हुन निर्देशन दिएको छ । गैरहाजिर रहेका प्रहरी कर्मचारीमा प्रहरी हवल्दार दिलिपकुमार सिंह, प्रहरी जवानहरू अनिल परियार, संगम बिसी, सजीव राई, समिर लिम्बु, सन्तोष तामाङ, विनोद दरै, टोप बहादुर सुनार, यसोदा कुमारी बोगटी, करनबहादुर बिष्ट र अम्मर सिंह साउद रहेका छन् । सम्बन्धित कर्मचारी खोजतलास गर्दा तथा प्रहरी नियमावली, २०७१ (संशोधनसहित) बमोजिमको प्रक्रिया पूरा गरी सूचना टाँस गर्दा समेत कार्यालयको सम्पर्कमा नआएको उल्लेख जनाएको छ । गैरहाजिर रहेका प्रहरी कर्मचारीले बाटोको म्यादबाहेक सात दिनभित्र आफू गैरहाजिर रहनुको कारण खुलाएर सन्तोषजनक स्पष्टीकरणसहित सम्बन्धित कार्यालयमा हाजिर हुनुपर्नेछ । तोकिएको अवधिभित्र हाजिर नभएमा प्रहरी नियमावली बमोजिम सेवाबाट हटाउने कारबाही अघि बढाइने प्रहरीले जनाएको छ ।
सरकारले थप १० अर्ब रुपैयाँ ऋण उठाउँदै
काठमाडौं । सरकारले आन्तरिक स्रोतबाट थप १० अर्ब रुपैयाँ ऋण उठाउने भएको छ । अर्थ मन्त्रालयअन्तर्गतको सार्वजनिक ऋण व्यवस्थापन कार्यालयले विकास ऋणपत्र बिक्रीमार्फत उक्त रकम जुटाउन लागेको हो । कार्यालयका अनुसार ६ वर्ष अवधिको ‘विकास ऋणपत्र-२०८९’ बोलकबोल प्रक्रियामार्फत बिक्री गरिनेछ । ऋणपत्रका लागि कात्तिक ११ गते बोलकबोल हुने र कात्तिक १२ गते निष्कासन गरिने कार्यालयले जनाएको छ । ऋणपत्र खरिद गर्न इच्छुक लगानीकर्ताले बोलकबोल प्रक्रियामा सहभागी हुन सक्नेछन् । यसमा बैंक तथा वित्तीय संस्था, गैरबैंक वित्तीय संस्था, बीमा कम्पनी तथा नेपाली नागरिकले लगानी गर्न पाउनेछन् । सरकारले सार्वजनिक खर्च व्यवस्थापन तथा वित्तीय आवश्यकता पूरा गर्न विकास ऋणपत्रमार्फत आन्तरिक बजारबाट ऋण उठाउँदै आएको छ । यस्तो ऋणपत्रमा लगानीकर्ताले तोकिएको अवधिसम्म सरकारलाई रकम उपलब्ध गराउँछन् भने सरकारले निर्धारित सर्तअनुसार साँवा तथा ब्याज भुक्तानी गर्छ ।
राष्ट्रिय वाणिज्य बैंकको ऋणपत्रमा आवेदन दिने आज अन्तिम दिन
काठमाडौं । राष्ट्रिय वाणिज्य बैंकको ऋणपत्रमा आवेदन दिन आज कात्तिक १० गते अन्तिम दिन रहेको छ । असोज २९ गतेदेखि निष्काशन तथा बिक्री खुला गरेको बैंकको ऋणपत्रमा लगानीकर्ताहरूले आजसम्म आवेदन दिन सक्नेछन् । बैंकले ७ वर्ष अवधि रहेको वार्षिक ६ प्रतिशत ब्याजदरमा ‘६ प्रतिशत आरबिबिएल डिबेन्चर २०८९’ बिक्री खुला गरेको हो । बैंकले प्रतिऋणपत्र एक हजार अंकित दरका ३ अर्ब रुपैयाँ बराबरको ३० लाख कित्ता ऋणपत्र निष्काशन गरेको हो । जसमध्ये ६० प्रतिशत अर्थात १ अर्ब ८० करोड रुपैयाँको १८ लाख कित्ता ऋणपत्र व्यक्तिगत र ४० प्रतिशत अर्थात १ अर्ब २० करोड रुपैयाँको १२ लाख कित्ता सर्वसाधारणलाई बिक्री गरिएको बैंकले जनाएको छ । सर्वसाधारणलाई छुट्याएको ऋणपत्रमध्ये ५ प्रतिशत अर्थात् ६० हजार कित्ता ऋणपत्र सामूहिक लगानी कोषलाई छुट्याइएको छ । बैंकको ऋणपत्रमा लगानीकर्ताले न्यूनतम २५ कित्तादेखि अधिकतम सम्पूर्ण कित्ताका लागि आवेदन दिन सक्नेछन् । बैंकको ऋणपत्र निष्काशन तथा बिक्री प्रबन्धकमा कुमारी क्यापिटल लिमिटेड रहेको छ । लगानीकर्ताले सि-आस्बा सेवामा सहभागी बैंक तथा वित्तीय संस्था तथा सिडिएस एण्ड क्लियरिङ्गले निर्माण गरेको मेरो सेयरमार्फत आवेदन दिन सक्नेछन् ।
आज विराटनगर–चितवन र कर्णाली–जनकपुर आमनेसामने हुँदै
काठमाडौं । नेपाल प्रिमियर लिग (एनपीएल) अन्तर्गत आज दुई खेल हुँदैछन् । पहिलो खेलमा विराटनगर किंग्स र चितवन राइनोज आमनेसामने हुनेछन् भने दोस्रो खेलमा कर्णाली याक्स र जनकपुर बोल्ट्सबीच प्रतिस्पर्धा हुनेछ । त्रिवि क्रिकेट मैदानमा हुने पहिलो खेल मध्याह्न साढे १२ बजे सुरु हुनेछ । यस्तै, आजको दोस्रो खेल साँझ ५ बजे सुरु हुनेछ । उक्त खेलमा कर्णाली याक्स र जनकपुर बोल्ट्स भिड्नेछन् । एनपीएलको उद्घाटन खेलमा हिजो लुम्बिनी लायन्सले सुदूरपश्चिम रोयल्सलाई ७ विकेटले पराजित गरेको थियो । कात्तिक ९ गतेदेखि सुरु भएको एनपीएल मंसिर ५ गते सम्पन्न हुनेछ ।
सर्वोच्चमा सिफारिस ४ न्यायाधीशविरुद्ध उजुरी दिन १० दिनको मौका
काठमाडौं । सर्वोच्च अदालतमा नियुक्तिका लागि सिफारिस भएका चार न्यायाधीशबारे कुनै गुनासो वा आपत्ति भए प्रमाणसहित उजुरी दिन सङ्घीय संसद्को संसदीय सुनुवाइ समितिले सार्वजनिक आह्वान गरेको छ । समितिले सर्वोच्च अदालतका लागि सिफारिस भएका डा. रत्नबहादुर बागचन्द, चन्द्रबहादुर सारु, जनक पाण्डे र गोकर्ण डाँगीका सम्बन्धमा उजुरी मागेको हो । डा. बागचन्दलाई मुख्य न्यायाधीश तथा अन्य तीन जनालाई न्यायाधीशमा सिफारिस गरिएको हो । समितिका अनुसार प्रस्तावित नियुक्ति उपयुक्त छैन भन्ने लाग्ने व्यक्तिले १० दिनभित्र कार्यालय समयमा उजुरी दिन सक्नेछन् । उजुरी शिष्ट र मर्यादित भाषामा लेखिएको हुनुपर्ने तथा त्यसमा स्पष्ट आधार र प्रमाण खुलाउनुपर्नेछ । उजुरी संसदीय सुनुवाइ समितिको सचिवालय, सिंहदरबारमा बुझाउन सकिनेछ । त्यसैगरी, सम्बन्धित जिल्ला प्रशासन कार्यालयमार्फत पनि उजुरी दिन सकिने व्यवस्था गरिएको छ । जिल्ला प्रशासन कार्यालयमा प्राप्त उजुरी तोकिएको समयभित्र समितिको सचिवालयमा पुग्ने गरी पठाउन समितिले आग्रह गरेको छ । उजुरीकर्ताले आफ्नो नाम, थर, ठेगाना र फोन नम्बर स्पष्ट रूपमा खुलाउनुपर्नेछ । तर, उजुरीकर्ताले चाहेमा निजको नाम गोप्य राखिने समितिले जनाएको छ ।
सुदूरपश्चिमविरुद्ध लुम्बिनीको शानदार जित
काठमाडौं । साविक विजेता लुम्बिनी लायन्सले नेपाल प्रिमियर लिग (एनपीएल) को तेस्रो संस्करणको पहिलो खेलमा सुदूरपश्चिमलाई ७ विकेटले हराएको छ । सोमबार कीर्तिपुरस्थित त्रिवि क्रिकेट रंगशालामा लुम्बिनीले एनपीएलको लिग चरणमा सुदूरपश्चिमविरुद्ध पहिलो पटक जित निकालेको हो । यसअघि दुई संस्करण खेल्दा टोलीले सुदूरपश्चिमलाई लिग चरणमा हराउन सकेको थिएन । लुम्बिनीले जित निकाल्ने क्रममा सुदूरपश्चिमले प्रस्तुत गरेको ८८ रनको लक्ष्य ९.४ ओभरमा तीन विकेट गुमाएर पूरा गरेको हो । लुम्बिनीको जितमा डार्सी सर्टले सर्वाधिक ४० रन बनाए । उनले १८ बलमा ४ चौका र ३ छक्का प्रहार गरे । आसिफ शेखले ३२ रन बनाए । निरोशन डिक्वेला ७ रनमा बोल्ड हुँदा शमिम हुसेन एक र कप्तान रोहित पौडेल ५ रनमा अविजित रहे । त्यसअघि टस हारेर पहिला ब्याटिङ गरेको सुदूरपश्चिम १७ ओभर २ बलमा ८७ रनमा समेटिएको थियो । सुदूरपश्चिमलाई सुरुवातमै धारासायी बनाउने क्रममा लुम्बिनीका किशोर महतोले ४ विकेट लिँदा शेर मल्लले ३ तथा स्याड्ली भान सल्कवाए र तिलक भण्डारीले १-१ विकेट लिए । जितसँगै लुम्बिनीले प्रतियोगितामा दुई अंक जोडेको छ । अब लुम्बिनीले दोस्रो खेलमा आगामी अक्टोबर ३१ मा चितवन राइनोजविरुद्ध खेल्ने तालिका छ । सुदूरपश्चिमले भने अक्टोबर २८ मा पोखरा एभेन्जसविरुद्ध खेल्नेछ । भोलि (मंगलबार) एनपीएलका दुई खेल हुनेछन् । पहिलो खेल अपरान्ह साढे १२ बजे विराटनगर किंग्स र चितवन राइनोजबीच हुनेछ । भाेलि नै साँझ ५ बजे कर्णाली याक्स र जनकपुर बोल्ट्स भिड्नेछन् ।
