उद्घाटन खेलमै सुदूरपश्चिमको कमजोर ब्याटिङ, लुम्बिनीलाई ८८ रनको सामान्य लक्ष्य
काठमाडौं । नेपाल प्रिमियर लिग (एनपीएल)को तेस्रो संस्करणको उद्घाटन खेलमा साविक उपविजेता सुदूरपश्चिम रोयल्सले साविक विजेता लुम्बिनी लायन्सलाई ८८ रनको सामान्य लक्ष्य दिएको छ । सोमबार (आज) कीर्तिपुरस्थित त्रिवि क्रिकेट रंगशालामा टस हारेर पहिले ब्याटिङ गरेको सुदूरपश्चिम १७.२ ओभरमा ८७ रनमै अलआउट भएको हो । सुदूरपश्चिमको ब्याटिङ कमजोर बन्दा लुम्बिनीले ८८ रनको सामान्य लक्ष्य पाएको हो । लुम्बिनीका लागि किशोर महतोले ४, शेर मल्लले ३, शाड्ली भानले १, तिलकराज भण्डारी र रोहितकुमार पौडेलले एक–एक विकेट लिए । सुदूरपश्चिमका लागि कप्तान दिपेन्द्रसिंह ऐरीले सर्वाधिक २७ रन जोडे । कप्तान ऐरीपछि शैफ अली जैबले १४ बलमा १३ जोडे । अन्य खेलाडीले दोहोरो अंकसमेत जोड्न सकेनन् । लुम्बिनीले टस जितेर पहिले फिल्डिङ रोजेको थियो ।
लुम्बिनीले टस जित्दै सुदूरपश्चिमलाई दियो ब्याटिङको निम्तो
काठमाडौं । नेपाल प्रिमियर लिग (एनपीएल) तेस्रो संस्करणको पहिलो खेलमा लुम्बिनी लायन्सले टस जितेर फिल्डिङ गर्ने भएको छ । कप्तान रोहित पौडेलले टस जितेर पहिले फिल्डिङ गर्ने निर्णय गरेका हुन् । लुम्बिनीले सुदूरपश्चिम रोयल्सलाई पहिले ब्याटिङको निम्तो दिएको हो । खेल साँझ ५ बजे सुरु हुँदैछ ।
एनपीएलको तेस्रो संस्करणअघि ‘एक्स्ट्रीम एन्थम’ सार्वजनिक
काठमाडौं । नेपाल प्रिमियर लिग (एनपीएल) को तेस्रो संस्करण सुरु हुनुअघि एक्स्ट्रीम इनर्जी ड्रिङ्कले क्रिकेटको उत्साहलाई संगीतसँग जोड्ने उद्देश्यले ‘एक्स्ट्रीम एन्थम’ सार्वजनिक गरेको छ । क्रिकेट मैदानमा खेलाडीहरूले प्रदर्शन गर्ने जोश, जितका लागि हुने प्रतिस्पर्धा र समर्थकहरूको उत्साहलाई समेटेर कम्पनीले एन्थम तयार पारेको हो । यसमार्फत क्रिकेटप्रेमीहरूलाई सांगीतिक रूपमा समेत जोड्ने लक्ष्य राखिएको कम्पनीले जनाएको छ । एनपीएलको तेस्रो संस्करणमा एक्स्ट्रीम इनर्जी ड्रिङ्कले सात टोलीसँग प्रायोजन साझेदारी गरेको छ । कम्पनीले काठमाडौं गोर्खाज, लुम्बिनी लायन्स, विराटनगर किङ्स, जनकपुर बोल्ट्स, चितवन राइनोज र कर्णाली याक्ससँग मुख्य प्रायोजकका रूपमा साझेदारी गरेको हो । त्यस्तै, पोखरा एभेन्जर्ससँग जर्सीको छातीमा लोगो रहने गरी प्रायोजन सम्झौता गरेको छ । सार्वजनिक एन्थममा युनिक पोयटको नामले परिचित उत्साह जोशीको स्वर तथा शब्द रहेको छ । यसको संगीत सिर्जना तथा संयोजन सुरज शाहीले गरेका हुन् भने निर्माण एनएफटीपी टिमले गरेको हो । विशेषगरी युवा पुस्ताको सांगीतिक रुचि र क्रिकेटप्रतिको बढ्दो आकर्षणलाई ध्यानमा राखेर एन्थम तयार गरिएको कम्पनीले जनाएको छ । हरेक बलसँगै बढ्ने उत्सुकता, चौका–छक्कामा दर्शकले व्यक्त गर्ने खुसी र आफ्नो टोलीको जितप्रतिको चाहनालाई संगीतमार्फत प्रस्तुत गरिएको छ । खेलाडीहरूको जित्ने अठोट र टोलीप्रति समर्थकहरूको विश्वासलाई एउटै सांगीतिक लयमा समेट्ने प्रयास गरिएको कम्पनीको भनाइ छ । कम्पनीका अनुसार ‘एक्स्ट्रीम एन्थम’ केवल सांगीतिक प्रस्तुति मात्र नभई क्रिकेट र संगीतलाई एउटै उत्सवमा जोड्ने सिर्जनात्मक प्रयास हो । यसले खेलाडी र समर्थकबीचको भावनात्मक सम्बन्धलाई थप बलियो बनाउनुका साथै नेपाली क्रिकेटको माहोललाई अझ ऊर्जावान् बनाउने अपेक्षा गरिएको छ । ‘एक्स्ट्रीम एन्थम’ कम्पनीको आधिकारिक युट्युब तथा टिकटकमार्फत हेर्न र सुन्न सकिनेछ ।
दशैं सकियो, सेयर बजारमा फर्किएन लगानीकर्ताको उत्साह
काठमाडौं । दशैं बिदापछि एक सातामा खुलेको सेयर बजारमा लगानीकर्ताको उत्साह न्यून देखिएको छ । बिदापछिको पहिलो कारोबार दिन सोमबार (आज) नेप्से परिसूचक सामान्य अंकले घटेर बन्द भएको छ। आज नेप्से नेप्से परिसूचक ४.३४ अंक घटेर २६२९.८२ विन्दुमा झरेको छ । त्यस्तै,सेन्सेटिभ इण्डेक्स २.१७ अंक घटेको छ भने फ्लोट इण्डेक्स ०.५३ अंक र सेन्सेटिभ फ्लोट इण्डेक्स ०.६६ अंक घटेको छ । आज ९९ कम्पनीको सेयरमूल्य बढेको छ भने १७१ कम्पनीको घटेको छ । ६ कम्पनीको सेयर मूल्य भने स्थिर देखिएको छ । दशैंअघिको अन्तिम कारोबार दिन (अक्टोबर १६) मा नेप्से ८.३३ अंकले बढेर २६३४.१७ विन्दुमा पुगेर बन्द भएको थियो । आज ४१ स्टकको ३८ हजार ७८८ पटकको कारोबारमा ४ अर्ब २४ लाख २१ हजार रुपैयाँबराबरको १ करोड ३ लाख ४३ हजार कित्ता सेयर खरिदबिक्री भएको छ । दशैंअघि ३४८ कम्पनीका १ करोड ३३ लाख कित्ता बढी ७६ हजार कित्ता सेयर खरिद बिक्री हुँदा ४ अर्ब ८८ करोड ८९ हजार रुपैयाँको कारोबार भएको थियो । जसमध्ये २२० कम्पनीको सेयरमूल्य बढेको थियो भने १०७ कम्पनीको घटेको थियो । आज ३ उपसमूहबाहेक उपसमूह घटेका छन् । व्यापार १.११, जलविद्युत ०.२४, उत्पादन १.०३ प्रतिशतले बढेको छ । होटल तथा पर्यटन ०.४८, विकास बैंक १.२१, वित्त ०.३५, निर्जीवन बीमा ०.२४, अन्य ०.३१, माइक्रोफाइनान्स ०.३४, जीवन बीमा ०.४४ र लगानी ०.३१ प्रतिशतले घटेको छ । दशैंअघिको अन्तिम कारोबार दिन नेप्से उपसमूहका ८ वटा समूह बढेका थिए भने ५ वटा घटेका थिए । म्युचुअल फन्ड समूह सर्वाधिक ०.७६ प्रतिशत, बैंकिङ समूहले ०.७२ प्रतिशतले बढेको छ । व्यापार समूह सर्वाधिक ०.५४ प्रतिशतले घटेको थियो । कारोबार रकमका आधारमा आज घलेम्दी हाइड्रो शीर्ष स्थानमा रहेको छ । उक्त कम्पनीको २३ करोड ६६ लाख रुपैयाँबराबरको सेयर कारोबार भएको छ । त्यस्तै, शिवम् सिमेन्ट्सको कारोबार रकम साढे २० करोड रुपैयाँ नाघेको छ भने माउन्टेन इनर्जी नेपालको करिब १८ करोड रुपैयाँको सेयर किनबेच भएको छ । आज बेनी हाइड्रोपावरको सेयरमा सकारात्मक सर्किट लेभलमा कारोबार भएको छ । सो कम्पनीको सेयरमूल्य ५२ रुपैयाँ ९० पैसा बढेर ४०५ रुपैयाँ ९० पैसामा अन्तिम कारोबार भएको छ । त्यस्तै, माथिल्लो मैलुङ्ग खोला जलविद्युतको सेयरमूल्य करिब ५.८१ प्रतिशत बढेको छ भने सोनापुर मिनरल्स एण्ड आयलको सेयरमूल्य ५ प्रतिशत बढेको छ । सगरमाथा जलविद्युत कम्पनीको सेयरमूल्य ४.७२ प्रतिशत र घोराही सिमेन्टको ४.४७ प्रतिशतले बढेको छ । आज चिरख्वा हाइड्रोपावरको सेयरमूल्य यस दिन सर्वाधिक ७.९२ प्रतिशत घटेको छ । त्यस्तै, महिला लघुवित्तको ७.५७ प्रतिशत, १०.७५ डिवेञ्चरको ५.९१ प्रतिशत, गुराँस लघुवित्तको ५.८१ र ग्लोबल आईएमई बैंक डिवेञ्चरको ५.४७ प्रतिशतले घटेको छ ।
संघीय संसदमा ३६ विधेयक विचाराधीन, सात नयाँ विधेयक दर्ता
काठमाडौं । संघीय संसद्का दुवै सदनमा गरी ३६ वटा विधेयक विचाराधीन अवस्थामा रहेका छन् । तीमध्ये प्रतिनिधिसभाका विभिन्न विषयगत समितिमा २४ वटा विधेयक विचाराधीन रहेको संघीय संसद् सचिवालयले जनाएको छ । संसद् सचिवालयका अनुसार प्रतिनिधिसभाको शिक्षा, स्वास्थ्य तथा सूचना प्रविधि समितिमा पाँचवटा, अर्थ समितिमा चारवटा, अन्तर्राष्ट्रिय सम्बन्ध र पर्यटन समिति, महिला तथा सामाजिक मामिला समिति र कानुन, न्याय तथा मानव अधिकार समितिमा तीन–तीनवटा, उद्योग तथा वाणिज्य र श्रम तथा उपभोक्ता हित समिति र राज्य व्यवस्था तथा सुशासन समितिमा दुई–दुईवटा तथा कृषि तथा प्राकृतिक स्रोत समितिमा एउटा विधेयक विचाराधीन रहेको छ । संघीय संसद् सचिवालयका प्रवक्ता एकराम गिरीका अनुसार राष्ट्रिय सभाका समितिमा भने कुनै पनि विधेयक विचाराधीन छैनन् । प्रतिनिधिसभाबाट पारित भएर राष्ट्रिय सभामा प्रस्तुत हुन बाँकी एउटा विधेयक रहेको छ । राष्ट्रिय सेवा दल विधेयकको सन्देश राष्ट्रिय सभामा प्रस्तुत हुन बाँकी रहेको उनले बताए । प्रतिनिधिसभाका समितिमा विचाराधीन विधेयकमा अर्थसम्बन्धी केही नेपाल ऐन संशोधन र खारेज गर्ने विधेयक, राहदानी (पहिलो संशोधन) विधेयक, भुक्तानी तथा फर्छ्योटसम्बन्धी विधेयक, फोहोरमैला व्यवस्थापनसम्बन्धी विधेयक, चलचित्र विधेयक तथा खानी तथा खनिज पदार्थसम्बन्धी विधेयकलगायत छन् । उनले भने, ‘हाल संघीय संसद्मा ३६ वटा विधेयक विचाराधीन अवस्थामा छन् । त्यसमध्ये प्रतिनिधिसभाका समितिमा २४ वटा विधेयक विचाराधीन छन् । खासगरी अर्थसम्बन्धी केही कानुनलाई संशोधन र खारेज गर्ने विधेयक, राहदानी पहिलो संशोधन विधेयक, भुक्तानी तथा फर्छ्योट, फोहोरमैला व्यवस्थापनलगायतका विभिन्न २४ वटा विधेयक प्रतिनिधिसभाका समितिमा विचाराधीन रहेका छन् । राष्ट्रिय सभाका समितिमा कुनै पनि विधेयक विचाराधीन छैनन् । तर, राष्ट्रिय सभामा प्रतिनिधिसभाबाट पारित भएको राष्ट्रिय सेवा दल विधेयकको सन्देश प्रस्तुत हुन बाँकी छ । अन्यथा राष्ट्रिय सभामा कुनै पनि विधेयक छैनन् ।’ संसद्मा नयाँ विधेयक दर्ताको संख्या सात पुगेको छ । अधिवेशन अन्त्य हुने दिन संघीय निजामती सेवा विधेयक, २०८३ दर्ता भएको थियो । सरकारको सिफारिसमा राष्ट्रपति रामचन्द्र पौडेलले असोज १६ गते राति १२ बजेदेखि लागू हुने गरी संघीय संसद्को अधिवेशन अन्त्य गरेका थिए । संसद्को अधिवेशन अन्त्य भएपछि थप छवटा विधेयक दर्ता भएको प्रवक्ता गिरीले जानकारी दिए । अधिवेशन अन्त्य भएपछि दर्ता भएका छवटा नयाँ विधेयकमा नेपाल नागरिक उड्डयन प्राधिकरण विधेयक, नेपाल हवाई सेवा प्राधिकरण विधेयक, सुशासन (व्यवस्थापन तथा सञ्चालन) (पहिलो संशोधन) विधेयक, भवन (दोस्रो संशोधन) विधेयक, राष्ट्रिय सडक सुरक्षा विधेयक तथा नवीकरणीय ऊर्जा तथा ऊर्जा दक्षतासम्बन्धी विधेयक रहेका छन् । त्यस्तै, सभामा प्रस्तुत भएर मात्रै रहेको एउटा विधेयक छ । डिप्लोमा इन्जिनियरिङ परिषद् विधेयक सभामा विचाराधीन रहेको प्रवक्ता गिरीले जानकारी दिए । उनका अनुसार समितिमा छलफल भएर प्रतिवेदन तयार भएका दुईवटा विधेयक रहेका छन् । संवैधानिक निकायका पदाधिकारीहरूको सेवा, सर्त र सुविधासम्बन्धी पहिलो संशोधन विधेयक, २०८३ को प्रतिवेदन समितिले सभामा पेस गरिसकेको छ । उक्त विधेयक सभामा विचाराधीन छ । नेपाल राष्ट्र बैंक तेस्रो संशोधन विधेयकको प्रतिवेदन भने तयार भएर सचिवालयमा प्राप्त भएको उनले बताए । उनका अनुसार संघीय संसद्का दुवै सदनबाट पारित भएर राष्ट्रपतिबाट प्रमाणीकरण भइसकेका विधेयकको संख्या १२ रहेको छ । त्यस्तै, संसद्मा प्रस्तुत भएका छवटा सन्धि तथा महासन्धि पारित भइसकेका छन् । उनले भने, ‘नयाँ दर्ता भएका विधेयकको सन्दर्भमा अधिवेशन अन्त्य हुने दिन संघीय निजामती सेवा विधेयक, २०८३ दर्ता भएको थियो । त्यसपछि छवटा विधेयक दर्ता भएका छन् । हाल सातवटा नयाँ विधेयक दर्ता भएका छन् । सभामा प्रस्तुत मात्रै भएर रहेको विधेयक एउटा छ, त्यो डिप्लोमा इन्जिनियरिङ परिषद् विधेयक हो । समितिको प्रतिवेदन पेस भएर सभामा विचाराधीन अवस्थामा संवैधानिक निकायका पदाधिकारीहरूको सेवा, सर्त र सुविधासम्बन्धी पहिलो संशोधन विधेयक, २०८३ रहेको छ । नेपाल राष्ट्र बैंक तेस्रो संशोधन विधेयकको समितिको प्रतिवेदन सचिवालयमा प्राप्त भएर बसेको छ । यसबीच संघीय संसद्का दुवै सदनबाट पारित भएर राष्ट्रपतिबाट १२ वटा विधेयक प्रमाणीकरण भइसकेका छन् ।’ समितिमा विचाराधीन विधेयकमाथि दसैँको बिदापछि छलफल अघि बढाउने तयारी गरिएको संसद् सचिवालयले जनाएको छ । दसैँको बिदाअघि समितिमा कतिपय विधेयकको दफावार छलफल भइरहेको थियो भने केही विधेयकको सैद्धान्तिक छलफल सुरु गरिएको थियो । बिदापछि विधेयकलाई टुंगोमा पुर्याउने गरी छलफल अघि बढाउने तयारी गरिएको छ ।
दशैंपछि खुलेको सेयर बजारमा सामान्य गिरावट, ४ अर्बको कारोबार
काठमाडौं । दशैं बिदापछिको पहिलो कारोबार दिन सोमबार नेपाल स्टक एक्सचेन्ज (नेप्से) परिसूचक सामान्य अंकले घटेर बन्द भएको छ । यस दिन नेप्से परिसूचक ४.३४ अंकले घटेर २ हजार ६२९.८२ विन्दुमा झरेको हो । सोमबार सेन्सेटिभ इन्डेक्स २.१७ अंकले घटेको छ । त्यस्तै, फ्लोट इन्डेक्स ०.५३ अंक र सेन्सेटिभ फ्लोट इन्डेक्स ०.६६ अंकले घटेका छन् । यस दिन ३४१ वटा कम्पनीका १ करोड ३ लाख ४३ हजार कित्ता सेयर ३८ हजार ७८८ पटकको कारोबारमा खरिदबिक्री भएका छन् । दिनभरमा कुल ४ अर्ब २४ लाख २१ हजार रुपैयाँबराबरको सेयर कारोबार भएको छ । कारोबारमा आएका कम्पनीमध्ये बेनी हाइड्रोपावरको सेयरमूल्य सकारात्मक सर्किट लेभलमा पुगेको छ । कम्पनीको सेयरमूल्य ५२ रुपैयाँ ९० पैसाले बढेर प्रतिकित्ता ४०५ रुपैयाँ ९० पैसा पुगेको छ । त्यस्तै, माथिल्लो मैलुङ खोला जलविद्युतको सेयरमूल्य करिब ६ प्रतिशत र सोनापुर मिनरल्स एन्ड आयलको करिब ५ प्रतिशत बढेको छ । यस दिन चिरख्वा हाइड्रोपावरको सेयरमूल्य सर्वाधिक ७.९२ प्रतिशत घटेको छ । कारोबार रकमका आधारमा घलेम्दी हाइड्रोपावर शीर्ष स्थानमा रहेको छ । कम्पनीको २३ करोड ६६ लाख रुपैयाँबराबरको सेयर कारोबार भएको छ । त्यस्तै, शिवम् सिमेन्ट्सको २० करोड ५० लाख रुपैयाँभन्दा बढी र माउन्टेन इनर्जी नेपालको करिब १८ करोड रुपैयाँबराबरको सेयर किनबेच भएको छ । नेप्सेमा कारोबार भएका १३ उपसमूहमध्ये चार उपसमूहको परिसूचक बढेको छ भने नौ उपसमूहको घटेको छ । व्यापार उपसमूहको परिसूचक सर्वाधिक १.११ प्रतिशत बढेको छ । उत्पादन तथा प्रशोधन उपसमूहको परिसूचक पनि १ प्रतिशतभन्दा बढीले उकालो लागेको छ । यता, विकास बैंक उपसमूहको परिसूचक सर्वाधिक १.२१ प्रतिशत घटेको छ ।
सन नेपाल लाइफको ‘ट्रिपल बी प्लस’ रेटिङ पुनः पुष्टि
काठमाडौं । सन नेपाल लाइफ इन्स्योरेन्स कम्पनीको रेटिङ पुनः पुष्टि भएको छ । केयर रेटिङ्स नेपाल लिमिटेडले कम्पनीको रेटिङ पुनः पुष्टि गरेको हो । यसअघि कम्पनीले ‘केयर–एनपी ट्रिपल बी प्लस’ रेटिङ प्रदान गरेको थियो जसलाई यथावत् कायम गरेको छ । यस रेटिङले कम्पनीले नेपालमा आफ्नो वित्तीय दायित्वहरू समयमै पूरा गर्न सक्ने मध्यमस्तरको सुरक्षा प्रदान गर्ने र यसमा मध्यम क्रेडिट जोखिम रहेको देखाउँछ । आर्थिक वर्ष २०८२/८३ मा कम्पनीको कुल आर्जित बीमाशुल्क ५ अर्ब ९ करोड ६० लाख रुपैयाँ पुगेको छ । जुन अघिल्लो वर्षको तुलनामा १२ प्रतिशतले वृद्धि हो । अघिल्लो आवमा कम्पनीको कुल आर्जित बीमा शुल्क ४ अर्ब ५३ करोड ९० लाख रुपैयाँ थियो । नवीकरण प्रिमियम संकलनमा आएको वृद्धिका कारण कुल आर्जित प्रिमियम बढ्न मद्दत पुगेको हो । आव २०८२/८३ मा कम्पनीको खुद आर्जित बीमाशुल्क करिब १३ प्रतिशतले बढेर ४ अर्ब ८९ करोड ५० लाख रुपैयाँ पुगेको छ । अघिल्लो आवमा कम्पनीको खुद आर्जित बीमाशुल्क ४ अर्ब ३२ करोड ६० लाख रुपैयाँ थियो । त्यस्तैबीमितको प्रतिफललाई सुरक्षित गर्न जीवन बीमा कोषको आकार बढाएर १२ अर्ब ९३ करोड १० लाख रुपैयाँ पुर्याइएको छ । अन्डरराइटिङ नतिजामा सुधार आए तापनि जीवन बीमा कोषमा गरिएको उच्च रकम हस्तान्तरणका कारण समीक्षा अवधिमा कम्पनीको करअघिको नाफा भने घटेको छ । अघिल्लो आवमा ५८ करोड २० लाख रुपैयाँ नाफा कमाएकोमा गत आवमा कम्पनीले ३६ करोड ६० लाख रुपैयाँ मात्रै नाफा आर्जन गरेको छ । जोखिममा आधारित पुँजी तथा सोल्भेन्सी निर्देशन, २०२४ बमोजिम गत आवमा कम्पनीको सोल्भेन्सी मार्जिन २.४४ गुणा बलियो स्थितिमा रहेको देखिएको छ । कम्पनीले आफ्नो कुल लगानीको करिब ५८ प्रतिशत हिस्सा विभिन्न बैंक तथा वित्तीय संस्थाका मुद्दती तथा ब्याज दिने निक्षेपहरूमा सुरक्षित गरेको छ, जसले पर्याप्त तरलता प्रदान गरेको छ । यसका साथै कम्पनीले देशका ७ वटै प्रदेशका ७० जिल्लाहरूमा आफ्ना ४८ शाखा, १०२ उपशाखा तथा ३० हजारभन्दा बढी अभिकर्ताहरू मार्फत आफ्नो सेवा विस्तार गर्दै आएको छ । कम्पनीको अध्यक्षको जिम्मेवारी अनुज केयालले निभाउँदै आएका छन् भने प्रमुख कार्यकारी अधिकृत (सीईओ) मा राजकुमार अर्याल छन् ।
हिन्दु–बौद्ध आस्थाको संगम आदिनाथमा एकमहिने मेला सुरु
काठमाडौं । काठमाडौंको चोभारडाँडास्थित ऐतिहासिक आदिनाथ मन्दिरमा धार्मिक र सांस्कृतिक विशिष्टतासहित एकमहिने मेला सुरु भएको छ । आश्विन शुक्ल पूर्णिमा (आज) देखि सुरु भएको मेला कात्तिक शुक्ल पूर्णिमासम्म सञ्चालन हुने जनाएको छ । मेलाको अवसरमा काठमाडौं उपत्यका र आसपासका क्षेत्रबाट भक्तजन मन्दिरमा पुगेर पूजाआजा तथा दर्शन गर्ने गर्छन् । लिच्छवीकालीन सम्पदाका रूपमा परिचित आदिनाथ मन्दिर धार्मिक आस्थासँगै ऐतिहासिक र पुरातात्विक महत्त्वका कारण पनि विशिष्ट मानिन्छ । मन्दिरमा शिव र पार्वतीको संयुक्त स्वरूप झल्काउने मूर्ति रहेकाले यसलाई अर्धनारीश्वर मन्दिरका रूपमा समेत चिनिन्छ । हिन्दू धर्मावलम्बीले आदिनाथलाई शिवशक्तिका रूपमा पूजा गर्छन् भने बौद्ध धर्मावलम्बीले करुणाका प्रतीक लोकेश्वरका रूपमा आराधना गर्छन् । धार्मिक सहअस्तित्वको प्रतीकका रूपमा रहेको यस मन्दिरमा वार्षिक मेलाका बेला भक्तजनको विशेष चहलपहल हुने गर्छ । मन्दिरको दर्शन र पूजाआजा गरेमा भय, रोग तथा विघ्नबाधाबाट मुक्ति मिल्ने र पारिवारिक सुख, शान्ति एवं समृद्धि प्राप्त हुने जनविश्वास छ । मेलासँग छालासम्बन्धी रोगबाट बच्ने किंवदन्तीसमेत जोडिएको छ । त्यस्तै, बौद्ध धर्मावलम्बीले दीर्घायु, अकाल मृत्युबाट सुरक्षा र धनसम्पत्ति प्राप्तिको कामनासहित लोकेश्वरको पूजा गर्ने परम्परा छ । यी विश्वास र परम्पराले आदिनाथ मन्दिरलाई धार्मिक आस्थाको महत्त्वपूर्ण केन्द्र बनाएका छन् । हिन्दू र बौद्ध धर्मावलम्बीले आ–आफ्नै धार्मिक मान्यताअनुसार एउटै मन्दिरमा पूजा गर्ने परम्पराले आदिनाथको महत्त्वलाई थप विशिष्ट बनाएको आयोजकले जनाएको छ ।
