रसुवा–भोटेकोशी बाढीबाट ७९ अर्ब १७ करोडको क्षति, नुवाकोटमा सबैभन्दा बढी
काठमाडौं । रसुवा–भोटेकोशी नदीमा २०८३ भदौ १० गते आएको विनाशकारी बाढीबाट ७९ अर्ब १७ करोड रुपैयाँ बराबरको क्षति भएको प्रारम्भिक आकलन गरिएको छ । राष्ट्रिय योजना आयोगले गरेको सर्वेक्षणअनुसार बाढीबाट घरपरिवारतर्फ ६९ अर्ब ५७ करोड र व्यवसाय तथा प्रतिष्ठानतर्फ ९ अर्ब ६० करोड रुपैयाँ बराबरको क्षति भएको छ । बाढीबाट चार जिल्लाका ६ हजार ८१७ घरपरिवार र ४९९ व्यवसाय तथा प्रतिष्ठान प्रभावित भएका छन् । प्रभावित जनसङ्ख्या ३२ हजार ८७२ छ भने २ हजार ९८९ आवासीय संरचना पूर्ण रूपमा क्षतिग्रस्त भएका छन् । सर्वेक्षणको प्रारम्भिक विवरणअनुसार नुवाकोटमा बाढीबाट सबैभन्दा बढी क्षति पुगेको छ । नुवाकोटका ३ हजार ८४१ घरपरिवार प्रभावित भएका छन् । यस्तै, रसुवामा १ हजार ९२०, धादिङमा ९४८ र गोरखामा १०८ घरपरिवार प्रभावित भएको सर्वेक्षणमा उल्लेख छ । जग्गामा सबैभन्दा बढी क्षति आर्थिक क्षतिको विवरणअनुसार बाढीबाट सबैभन्दा ठूलो क्षति जग्गाजमिनमा पुगेको छ। ३ हजार ६१० परिवारको ५०७.९७ हेक्टर जग्गामा क्षति पुगेको र त्यसको प्रारम्भिक मूल्याङ्कन ३५ अर्ब ४४ करोड रुपैयाँ रहेको सर्वेक्षणको विवरणमा उल्लेख छ। आफ्नै स्वामित्वमा घर भएको जग्गाको घडेरीमा १३ अर्ब २६ करोड रुपैयाँ र घर निर्माण लागततर्फ ११ अर्ब ९५ करोड रुपैयाँ बराबरको क्षति आकलन गरिएको छ। यसले बाढीबाट जमिन गुमाउनेदेखि घर पूर्ण रूपमा नष्ट भएका परिवारसम्मको आर्थिक क्षति व्यापक रहेको देखाउँछ। बाढीबाट २ हजार ९८९ आवासीय संरचना पूर्ण रूपमा क्षतिग्रस्त भएका छन्। कुल ४ हजार १५१ क्षतिग्रस्त भवन संरचनामध्ये ३ हजार १९४ पुनःप्रयोग गर्न नसकिने अवस्थामा रहेको विवरण छ। ३३२ संरचना पूर्ण मर्मतसम्भारपछि, ३२० सामान्य मर्मतसम्भारपछि र ९७ संरचना मर्मत नगरी प्रयोग गर्न सकिने अवस्थामा छन्। खेतीबाली, पशुपन्छी र सवारीसाधनमा पनि क्षति बाढीले घरजग्गामा मात्र नभई कृषि उत्पादन र परिवारको जीविकोपार्जनमा समेत असर पारेको छ। खेतबारीमा लगाएको बालीमा २३ करोड २१ लाख रुपैयाँ बराबरको क्षति भएको छ। यसबाट २ हजार ९५१ परिवार प्रभावित भएका छन्। भण्डारमा रहेको खाद्यान्नमा १० करोड ४१ लाख रुपैयाँ र पशुपन्छी तथा माछामा २१ करोड ४२ लाख रुपैयाँ बराबरको क्षति भएको प्रारम्भिक विवरणमा उल्लेख छ। खाद्यान्नमा क्षति पुग्दा १ हजार ८७६ र पशुपन्छी तथा माछामा क्षति पुग्दा १ हजार ११ परिवार प्रभावित भएका छन्। परिवारले प्रयोग गर्ने सवारीसाधनमा १ अर्ब २४ करोड रुपैयाँ बराबरको क्षति भएको छ। यसबाट १ हजार ११५ परिवार प्रभावित भएका छन्। त्यस्तै, बहुमूल्य, सांस्कृतिक तथा पुरातात्त्विक वस्तुमा ५ अर्ब २ करोड रुपैयाँ बराबरको क्षति भएको विवरणमा उल्लेख छ। टिकाउ प्रकृतिका घरायसी सामग्रीमा १ अर्ब ४५ करोड र टिकाउ नहुने घरायसी सामग्रीमा ६६ करोड ३५ लाख रुपैयाँ बराबरको क्षति भएको छ। व्यापार तथा खाद्य सेवा क्षेत्र बढी प्रभावित बाढीबाट व्यवसाय तथा प्रतिष्ठानतर्फको क्षेत्रगत विवरणमा थोक तथा खुद्रा व्यापार सबैभन्दा बढी प्रभावित देखिएको छ। यस क्षेत्रमा ७७४ प्रतिष्ठान प्रभावित भएका छन्, जुन क्षेत्रगत विवरणमा समेटिएका प्रतिष्ठानको ४७.२५ प्रतिशत हो। आवास तथा खाद्य सेवा क्षेत्रका ३३७ प्रतिष्ठान प्रभावित भएका छन्। यो कुलको २०.५७ प्रतिशत हो। कृषि, वन तथा मत्स्यपालन क्षेत्रका १६६ र अन्य सेवा क्षेत्रका १३६ प्रतिष्ठान प्रभावित भएको विवरण छ। औद्योगिक उत्पादन क्षेत्रका ७०, निर्माण क्षेत्रका ४७ तथा यातायात र भण्डारण क्षेत्रका ३१ प्रतिष्ठानमा असर परेको छ। यसबाहेक वित्तीय सेवा, खानी तथा उत्खनन, सञ्चार, शिक्षा र स्वास्थ्य क्षेत्रका प्रतिष्ठान पनि प्रभावित भएका छन्। जिल्लागत विवरणअनुसार नुवाकोटमा ३२३, धादिङमा १०४, रसुवामा ५७ र गोरखामा १५ व्यवसाय तथा प्रतिष्ठान प्रभावित भएको उल्लेख छ। तर क्षेत्रगत विवरणमा प्रतिष्ठानको कुल सङ्ख्या १ हजार ६३८ देखिएकाले व्यवसायसम्बन्धी तथ्याङ्कमा थप स्पष्टता आवश्यक देखिएको छ। आधाभन्दा बढी परिवार सरकारी पुनःस्थापनाको पक्षमा बाढीपछि स्थायी रूपमा कहाँ बसोबास गर्ने भन्ने विषयमा प्रभावित परिवारको रोजाइले पुनःस्थापनाको चुनौती देखाएको छ। सर्वेक्षणको प्रारम्भिक विवरणमा ३ हजार ६७ परिवारको रोजाइ समेटिएको छ। तीमध्ये ७९७ परिवार अर्थात् २५.९९ प्रतिशतले बाढीअघि बसोबास गरिरहेको स्थानमै फर्कन चाहेको बताएका छन्। परिवारको स्वामित्वमा रहेको जिल्लाभित्रकै अन्य स्थानमा बस्न चाहने ५६५ परिवार छन् भने देशभित्रको अन्य स्थानमा रहेको आफ्नै जग्गामा बस्न चाहने परिवार १५९ छन्। सरकारले उपलब्ध गराउने स्थानमा बस्न चाहने परिवार ९३९ अर्थात् ३०.६२ प्रतिशत छन्। त्यस्तै, सरकारले उपलब्ध गराउने सामूहिक आवासमा बस्न चाहने परिवार ५९० अर्थात् १९.२४ प्रतिशत छन्। सरकारले उपलब्ध गराउने स्थान वा सामूहिक आवासमा बस्न चाहने परिवारको सङ्ख्या १ हजार ५२९ छ। यसले पुनःस्थापनामा सुरक्षित जग्गा, आवास र आधारभूत सेवा उपलब्ध गराउने सरकारी भूमिका महत्त्वपूर्ण हुने देखाउँछ। पुनर्निर्माणका लागि विस्तृत मूल्याङ्कन आवश्यक अहिले सार्वजनिक गरिएको प्रारम्भिक विवरण राष्ट्रिय योजना आयोगले अनलाइन एप र ट्याब्लेट प्रयोग गरी कर्मचारी परिचालन गरेर गरेको सर्वेक्षणको नतिजा हो। यसका लागि चार जिल्ला र १५ स्थानीय तहमा ५८ टोली तथा १५६ जनशक्ति परिचालन गरिएको आयोगले विज्ञप्तिमा उल्लेख गरेको छ। सर्वेक्षणमा ७ हजार ३१६ घरपरिवार तथा व्यवसाय र प्रतिष्ठानको विवरण सङ्कलन गरिएको बताइएको छ।
भिजन लुम्बिनी ऊर्जाले सेयरधनीलाई ७ करोड बढी नगद लाभांश दिने
काठमाडौं । भिजन लुम्बिनी ऊर्जा कम्पनी लिमिटेडले सेयरधनीलाई ३.६८४२ प्रतिशत नगद लाभांश वितरण गर्ने प्रस्ताव गरेको छ । कम्पनीको असोज ३० गते बसेको सञ्चालक समितिको बैठकले आर्थिक वर्ष २०८२/८३ को लेखापरीक्षण गरिएको वित्तीय विवरणअनुसार वितरणयोग्य रकमबाट नगद लाभांश दिने प्रस्ताव गरेको हो । कम्पनीले हाल कायम चुक्ता पुँजी १ अर्ब ९१ करोड २५ लाख रुपैयाँको ३.६८४२ प्रतिशतले हुन आउने ७ करोड ४ लाख ६० हजार ५२६ रुपैयाँ ३२ पैसा नगद लाभांश वितरण गर्ने प्रस्ताव गरेको छ । प्रस्तावित लाभांशमध्ये ०.१८४२ प्रतिशत अर्थात् ३५ लाख २३ हजार २६ रुपैयाँ ३२ पैसा कर प्रयोजनका लागि छुट्याइने कम्पनीले जनाएको छ । बाँकी रकम प्रचलित कानुनअनुसार कर कट्टी गरी सेयरधनीलाई वितरण गरिनेछ । कम्पनीले प्रस्तावित नगद लाभांशसम्बन्धी जानकारी नेपाल स्टक एक्सचेन्ज (नेप्से) लाई गराएको छ ।
एशियन लाइफका सीईओ श्रेष्ठले दिए राजीनामा
काठमाडौं । एशियन लाइफ इन्स्योरेन्स कम्पनी लिमिटेडका प्रमुख कार्यकारी अधिकृत (सीईओ) दिनेश लाल श्रेष्ठले आफ्नो पदबाट राजीनामा दिएका छन् । कम्पनीको सञ्चालक समितिको कात्तिक ८ गते बसेको २२३औं बैठकले श्रेष्ठले दिएको राजीनामा कात्तिक १० गतेदेखि लागू हुने गरी स्वीकृत गर्ने निर्णय गरेको छ। साथै अर्काे व्यवस्था नभएसम्मका लागि कम्पनीका नायव प्रमुख कार्यकारी अधिकृत होम बहादुर श्रेष्ठलाई कात्तिक १० गतेदेखि लागू हुने गरी कायम मुकायम सीईओको जिम्मेवारी प्रदान गर्ने निर्णय गरेको कम्पनीले जनाएको छ ।
मुखैमा आएको सचिव पद नपाई घर फर्किए दुई पाल्पाली सहसचिव
काठमाडौं । सचिव बन्ने पालो नजिकै आए पनि सहसचिवबाट सचिवमा बढुवा हुने प्रतीक्षामा रहेका पाल्पाका दुई वरिष्ठ सहसचिव इमनारायण श्रेष्ठ र श्रीकृष्ण नेपाल भने सचिवको कुर्सीमा पुग्न पाएनन् । ५८ वर्षे उमेरहद पूरा भएपछि दुवै जना सहसचिवबाटै अवकाशमा गए । श्रेष्ठको सचिव बन्ने सम्भावना भ्रष्टाचार मुद्दाका कारण रोकियो भने नेपालले बढुवाको अवसर नपाउँदै अवकाश लिनुपर्यो । श्रेष्ठलाई भ्रष्टाचार मुद्दा सचिव बन्ने बाटोमा तगारो बन्यो भने नेपाल सचिवमा बढुवा हुनुअघि नै उमेरहदका कारण सेवाबाट बाहिरिए । नेपाल सचिवमा बढुवाका लागि पहिलो नम्बरमा सिफारिस भएर पनि सचिव बन्न नपाएका वरिष्ठ सहसचिव हुन् । २०२४ चैत २६ गते पाल्पामा जन्मिएका इमनारायण श्रेष्ठ शिक्षा प्रशासनतर्फका सहसचिव थिए । आदिवासी जनजाति कोटाबाट २०७१ माघ २९ गते सहसचिव बनेका उनी सचिवमा बढुवा हुने सम्भावना भएका अधिकारीमध्ये थिए । मधेश प्रदेशको सामाजिक विकास मन्त्रालयको सचिव हुँदा श्रेष्ठ जनस्वास्थ्य प्रयोगशालाका लागि स्वास्थ्य उपकरण खरिदसम्बन्धी भ्रष्टाचार मुद्दामा मुछिएका थिए । अख्तियार दुरुपयोग अनुसन्धान आयोगले उक्त खरिदमा भ्रष्टाचार भएको अभियोग लगाउँदै श्रेष्ठसहित आपूर्तिकर्ता हस्पिटेक इन्टरप्राइजेजका सञ्चालक विशाल पण्डितविरुद्ध समेत विशेष अदालतमा मुद्दा दायर गरेको छ । अख्तियारले उक्त मुद्दामा २१ करोड ९ लाख ३९ हजार ७० रुपैयाँ बिगो मागदाबी गरेको थियो । मुद्दा दायर भएपछि श्रेष्ठ निलम्बनमा परेका थिए । त्यससँगै सचिवमा बढुवा हुने उनको सम्भावना रोकिएको थियो । श्रेष्ठ निलम्बनमा परेपछि राजेन्द्रकुमार पौडेल सचिवमा बढुवा भएका हुन् । श्रेष्ठ निलम्बनमा नपरेको भए पौडेलको ठाउँमा उनी बढुवा हुन सक्ने सम्भावना थियो । तर, भ्रष्टाचार मुद्दा परेपछि सचिव बन्ने प्रतीक्षामा रहेका श्रेष्ठले सहसचिवकै हैसियतमा अवकाश लिनुपर्यो । यसअघि पाल्पाकै अर्का सहसचिव नेपाल पनि सचिवमा बढुवाका लागि पहिलो नम्बरमा सिफारिस भएका थिए । तर, नियमित मन्त्रिपरिषद्को बैठक नबस्दा उनी सचिवमा बढुवा हुन पाएनन् । सचिवमा बढुवाका लागि सिफारिस भए पनि बढुवा हुने अवसर आउनुअघि नै ५८ वर्षे उमेरहद पूरा भएपछि उनले पनि सहसचिवबाटै सरकारी सेवा टुंग्याएका थिए । सचिवको एक नम्बरमा सिफारिस भएका नेपाल अनिवार्य अवकाशमा
सिँगारियो त्रिवि क्रिकेट मैदान, यस्तो बन्यो भीआईपी बक्स (फोटो फिचर )
काठमाडौं । नेपाल प्रिमियर लिग (एनपीएल) को तेस्रो संस्करण आजदेखि सुरु हुँदैछ । नेपाल क्रिकेट संघ (क्यान) को आयोजनामा हुने प्रतियोगिता मंसिर ५ गतेसम्म सञ्चालन हुनेछ । प्रतियोगिताका सबै खेल कीर्तिपुरस्थित त्रिभुवन विश्वविद्यालय (त्रिवि) अन्तर्राष्ट्रिय क्रिकेट मैदानमा हुनेछन् । प्रतियोगितामा आठ टोलीले उपाधिका लागि प्रतिस्पर्धा गर्नेछन् । विराटनगर किंग्स, चितवन राइनोज, जनकपुर बोल्ट्स, कर्णाली याक्स, काठमाडौं गोर्खाज, लुम्बिनी लायन्स, पोखरा एभेन्जर्स र सुदूरपश्चिम रोयल्सले प्रतियोगितामा सहभागिता जनाउँदैछन् । एनपीएलको यस संस्करणमा पहिलोपटक डिसिजन रिभ्यु सिस्टम (डीआरएस) प्रयोग हुँदैछ। प्रतियोगिताको उद्घाटन खेलमा साविक विजेता लुम्बिनी लायन्स र उपविजेता सुदूरपश्चिम रोयल्स आमनेसामने हुँदैछन् । र्तिपुरस्थित त्रिवि अन्तर्राष्ट्रिय क्रिकेट मैदानमा हुने उद्घाटन खेल साँझ ५ बजे सुरु हुनेछ ।
एनपीएल हेर्न एक्सट्रीमका १० फ्यान जोन, प्रवेश निःशुल्क
काठमाडौं । नेपाल प्रिमियर लिग (एनपीएल) को तेस्रो संस्करणको रौनक देशभर फैलाउने उद्देश्यले एक्सट्रीम इनर्जी ड्रिङ्कले ९ सहरका १० स्थानमा फ्यान जोन सञ्चालन गर्ने भएको छ। कात्तिक ९ गतेदेखि मंसिर ५ गतेसम्म सञ्चालन हुने प्रतियोगिताका खेल यी फ्यान जोनमा ठूला एलईडी स्क्रिनमार्फत प्रत्यक्ष प्रसारण गरिनेछन्। फ्यान जोनमा प्रवेश निःशुल्क हुनेछ। एक्सट्रीमले क्रिकेटप्रेमीलाई आफ्नै सहरमा बसेर एनपीएलको रोमाञ्च अनुभव गराउने उद्देश्यले फ्यान जोनको व्यवस्था गरेको हो। यहाँ समर्थकले साथीभाइसँगै बसेर खेल हेर्न, मनपर्ने टोलीको समर्थनमा हुटिङ गर्न र प्रतियोगिताको उत्साह साटासाट गर्न सक्नेछन्। काठमाडौंको सिफल मैदान, कीर्तिपुरको माइक्रो पार्क र त्रिभुवन विश्वविद्यालय (टीयू) क्रिकेट मैदानको दोस्रो गेटअगाडिको मैदानमा फ्यान जोन रहनेछन्। टीयू क्रिकेट मैदानको दोस्रो गेटअगाडि छुट्टै स्थानमा पनि फ्यान जोनको व्यवस्था गरिएको छ। उपत्यकाबाहिर धनगढीको कभर्ड हल क्षेत्र, सुर्खेतको घण्टाघर डबली, बुटवलको सिद्धेश्वरी ग्राउन्ड, पोखराको मालेपाटन चौर र चितवनको वीरेन्द्र बहुमुखी क्याम्पसको डिग्री कलेज परिसरमा फ्यान जोन सञ्चालन हुनेछन्। त्यस्तै, मधेश प्रदेशको जनकपुरस्थित बाह्रबिघा चौर र पूर्वी नेपालको विराटनगरस्थित पुरानो गुद्री मैदानमा पनि क्रिकेटप्रेमीले ठूलो स्क्रिनमा एनपीएलका खेल हेर्न सक्नेछन्। एक्सट्रीमले फ्यान जोनलाई खेल हेर्ने स्थानमा मात्र सीमित नराखी मनोरञ्जन र सामूहिक उत्सवको केन्द्र बनाउने तयारी गरेको छ। खेलको प्रत्यक्ष प्रसारणसँगै साङ्गीतिक प्रस्तुति, विभिन्न मनोरञ्जनात्मक गतिविधि र रमाइला खेलकुद कार्यक्रम आयोजना गरिनेछन्। साथै, गिभअवे कार्यक्रममार्फत दर्शकले आकर्षक उपहारसमेत जित्न सक्नेछन्। रंगशालामा पुगेर खेल हेर्न नसक्ने क्रिकेटप्रेमीलाई समेत प्रतियोगिताको माहोलमा जोड्ने लक्ष्यसहित फ्यान जोन सञ्चालन गर्न लागिएको एक्सट्रीमले जनाएको छ। यी फ्यान जोनले विभिन्न सहरका समर्थकलाई एकै ठाउँमा भेला भएर क्रिकेटको उत्सव मनाउने अवसर प्रदान गर्ने अपेक्षा गरिएको छ। मैदानमा खेलाडीबीच प्रतिस्पर्धा चलिरहँदा फ्यान जोनमा समर्थकको हुटिङ, सङ्गीत र मनोरञ्जनले एनपीएलको रौनक थप्ने विश्वास गरिएको छ।
एनपीएलको उद्घाटन प्रधानमन्त्री शाहले गर्ने
काठमाडौं । नेपाल प्रिमियर लिग (एनपीएल) को तेस्रो संस्करणको उद्घाटन प्रधानमन्त्री वालेन्द्र शाह (बालेन) ले गर्ने भएका छन् । एनपीएल आजदेखि कीर्तिपुरस्थित त्रिभुवन विश्वविद्यालयको अन्तर्राष्ट्रिय क्रिकेट मैदानमा सुरु हुँदैछ । प्रधानमन्त्री शाहले एनपीएललाई नेपालको सबैभन्दा ठूलो खेलकुद प्रतियोगिताको संज्ञा दिँदै नेपाली क्रिकेटलाई शुभकामना दिएका छन् । उनले प्रतियोगितामा सहभागी हुन आएका अन्तर्राष्ट्रिय खेलाडी तथा कमेन्टेटरलाई स्वागत गर्दै प्रतियोगिताको सफलताका लागि खेलाडी, आयोजक र नेपाल क्रिकेट संघ (क्यान) लाई शुभकामना दिएका छन् । प्रधानमन्त्री शाहले भनेका छन्, 'एनपीएलमा सहभागी हुन आउनुभएका सबै अन्तर्राष्ट्रिय खेलाडी तथा कमेन्टेटरलाई हार्दिक स्वागत गर्दछु । यस सुन्दर खेल उत्सवको सफलताका लागि सम्पूर्ण नेपाली खेलाडी, आयोजक तथा नेपाल क्रिकेट संघ (क्यान) लाई हार्दिक शुभकामना ।' एनपीएलको उद्घाटन खेल आज साँझ ५ बजे सुरु हुनेछ । उद्घाटन खेलमा दोस्रो संस्करणको विजेता लुम्बिनी लायन्स र उपविजेता सुदूरपश्चिम रोयल्सबीच प्रतिस्पर्धा हुनेछ ।
दशैँमा कपडा र सुनचाँदी व्यापारमा मन्दी
काठमाडौं । यस पटकको दशैँमा फेन्सी, कपडा तथा सुनचाँदीको व्यापार नभएको व्यवसायीहरुले गुनासो गरेका छन् । काठमाडौंको न्युरोड, ललितपुरको पाटन क्षेत्रका व्यवसायीहरुले यस पटकको दशैंमा कपडा तथा सुनचाँदीको व्यापार सोचेजस्तो हुन नसकेको गुनासो गरेका हुन् । गत वर्षहरुमा न्युरोड तथा पाटन क्षेत्रमा दशैँभर किनमेल गर्नेको बाक्लो भीड हुने गर्दथ्यो । व्यवसायीहरुले समेत मनग्य आम्दानी गर्दथे । यस वर्ष रसुवाको भोटेकोशी तथा त्रिशूली नदीमा गएको बाढीका कारण सिर्जित समस्या र सामनमा भएको मूल्यवृद्धिको कारण व्यापार प्रभावित भएको व्यवसायीहरुको अनुभव छ । कतिपय व्यवसायीले दशैँका लागि लाखौं रुपैयाँको सामान तयारी अवस्थामा राखेपनि अपेक्षित विक्री हुन नसकेको गुनासो गरेका छन् । कपडा व्यवसायी प्रमिला श्रेष्ठले यस वर्ष दशैँका लागि चारदेखि पाँच लाख रुपैयाँ बराबरको सामान विक्रीका लागि राखे पनि सोचेजस्तो व्यापार नभएको बताइन्। रसुवामा आएको बाढीको कारण आम नागरिकको दशैं नै प्रभावित भएको कारण अपेक्षित व्यापार नभएको उनको बुझाइ छ । उनले विगतकाम वर्षहरुभन्दा झन्डै आधा जति मात्र व्यापार भएको सुनाइन् । उनले भनिन्, ‘यो पालीको दशैँमा खासै राम्रो व्यापार भएन । ४–५ लाखको सामान निकालेका थिएँ । तर सोचेजस्तो भएन । अहिले नागरिक सबै पीडामा भएर पनि यस पटक सोचेजस्तो व्यापार हुन सकेन ।’ कपडा व्यवसायी प्रचण्डराज जोशीले यस वर्षको दशैंमा व्यापार व्यवसाय अघिल्ला वर्षको तुलनामा निकै खस्किएको बताए । उनले सधैं लाखौँ फाइदा हुने गरे व्यापार गर्ने गरेपनि यसपटक लगानी समेत उठ्न नसकेको गुनासो गरे । उनले भने, ‘अहिले व्यापार व्यवसाय पहिलेको भन्दा धेरै नै खस्किएको छ । विशेषगरी रसुवा बाढी आएपछि व्यापार नराम्रोसँग प्रभावित भयो । यो पटक दशैं घाटामै गयो ।’ अर्का कपडा व्यवसायी राम नेपालीले पनि यस वर्षको दशैँमा अघिल्लो वर्षको तुलनामा करिव आधा कम व्यापार भएको बताए । नागरिकमा उल्लासको कमी तथा विपद्जन्य घटनाको कारण दशैंमा व्यापार खस्किएको उनको अनुभव छ । उनले भने, ‘सधैँको दशैंमा एकदमै राम्रो व्यापार हुन्थ्यो । अहिले त एकदम कम भयो । पछिल्लो समय विभिन्न नदीमा आएको बाढी र सामान पनि महंगिएको कारणले सोचेजस्तो व्यापार हुन सकेन । पोहोर सालभन्दा झण्डै आधा कम व्यापार भयो यो पटक ।’ सुनचाँदी व्यवसायी जेनी शाक्यले पनि दशैंमा सुनचाँदीका गरगहनाको कारोबार अपेक्षाअनुसार हुन नसकेको गुनासो गरिन् । बाढीबाट प्रभावित भएका नागरिकले दशै समेत मनाउन नपाएको कारण सुनचाँदीको मात्र नभई सबै क्षेत्रमा अपेक्षाकृत व्यापार हुन नसकेको उनको अनुभव छ । उनले भनिन्, ‘यो पटकको दशैंमा सुनचाँदीका गरगहनाको सोचेजस्तो व्यापा भएन, धेरै मानिस पीडामा परेको तथा धेरै जनाले दशैं नै नमनाएको कारणले पनि हुनसक्छ व्यापार खस्किएको हो । अन्य व्यवसायको तुलनामा सुनको व्यापार अलि थोरै नै हुने भएपनि यस पटकको केही कुराको पनि व्यापार त्यस्तो सोचेजस्तो भएको छैन ।’ व्यवसायीहरुले दशैँलाई लक्षित गरेर सामानको मौज्दात तथा तयारी गरिए पनि बजारमा माग अपेक्षाअनुसार नबढ्दा व्यापारमा कमी आएको छ ।
