सिटी एक्सप्रेसको आम्दानी ५६ करोड, बजार हिस्सा १४ प्रतिशत
काठमाडौं । सिटी एक्सप्रेस मनी ट्रान्सफर प्रालिको कुल सञ्चालन आम्दानी गत आर्थिक वर्ष २०८२/८३ मा १.०५ प्रतिशतले घटेको छ । कम्पनीले उक्त अवधिमा ५६ करोड १० लाख रुपैयाँ कुल सञ्चालन आम्दानी गरेको छ, जुन अघिल्लो आर्थिक वर्षको तुलनामा ६० लाख रुपैयाँ कम हो । आर्थिक वर्ष २०८१/८२ मा कम्पनीको कुल सञ्चालन आम्दानी ५६ करोड ७० लाख रुपैयाँ थियो । कम्पनीको आम्दानी पछिल्ला वर्षहरूमा निरन्तर घट्दै आएको छ । आर्थिक वर्ष २०८०/८१ मा ६६ करोड ४० लाख रुपैयाँ, आव २०७९/८० मा ७६ करोड ८० लाख रुपैयाँ र आव २०७८/७९ मा ८२ करोड ६० लाख रुपैयाँ कुल सञ्चालन आम्दानी गरेको थियो । आम्दानीमा आएको गिरावटको प्रमुख कारण कमिसन आम्दानीमा परेको दबाब रहेको कम्पनीले जनाएको छ । विप्रेषण बजारमा बढ्दो प्रतिस्पर्धा, आन्तरिक विप्रेषणसम्बन्धी नियामकीय प्रतिबन्ध तथा नगद भुक्तानीको सट्टा रकम सिधै बैंक खातामा जम्मा गर्ने प्रवृत्ति बढ्दा कमिसन आम्दानी प्रभावित भएको कम्पनीको भनाइ छ । बैंक खातामा प्रत्यक्ष रकम जम्मा गर्दा सामान्यतः कमिसन आम्दानी कम हुने भएकाले त्यसको असर कुल सञ्चालन आम्दानीमा परेको हो । यद्यपि, विदेशी विनिमयबाट प्राप्त आम्दानीमा भएको वृद्धिले कुल सञ्चालन आम्दानीमा थप गिरावट आउन नदिएको कम्पनीले जनाएको छ । पछिल्लो समय विदेशी विनिमयबाट प्राप्त आम्दानी कम्पनीको प्रमुख आयस्रोतका रूपमा देखिएको छ । गत आर्थिक वर्षमा कुल आम्दानीमध्ये कमिसनबाट २६ प्रतिशत र विदेशी विनिमयबाट ७४ प्रतिशत आम्दानी भएको छ । नेपाल राष्ट्र बैंकबाट इजाजतपत्र प्राप्त कम्पनीले विदेशबाट नेपालमा रकम भित्र्याउने विप्रेषण व्यवसाय सञ्चालन गर्दै आएको छ । सन् २००७ जुलाई ११ मा स्थापना भएको कम्पनी सिटी एक्सप्रेस ग्रुपअन्तर्गत सञ्चालित छ । कम्पनीको मुख्य कार्यालय काठमाडौंको कमलादीमा रहेको छ । सन् २०२६ जुलाईसम्म कम्पनीको चुक्ता पुँजी ५० करोड रुपैयाँ रहेको छ । कम्पनीमा डोलराज शर्मा, चन्द्र टण्डन, हेमबहादुर गुरुङ र महेश कुमार श्रेष्ठको समान २० प्रतिशत सेयर स्वामित्व छ । त्यस्तै, सुनील पाणी गौतमको १५.५० प्रतिशत र कृष्णराज पौडेलको ४.५० प्रतिशत सेयर स्वामित्व रहेको छ । कम्पनीको सञ्चालक समितिका अध्यक्ष डोलराज शर्मा हुन् । रेमिट्यान्स, लगानी, ऊर्जा तथा अन्य क्षेत्रमा चार दशकभन्दा बढीको उद्यमशीलता र व्यावसायिक नेतृत्वको अनुभव भएका शर्माले सिटी एक्सप्रेस ग्रुपमा पनि विभिन्न वरिष्ठ नेतृत्वदायी भूमिका निर्वाह गरेका छन् । कम्पनीका प्रबन्ध सञ्चालक चन्द्र टण्डनसँग रेमिट्यान्स, बैंकिङ तथा वित्तीय प्रविधिको क्षेत्रमा दुई दशकभन्दा बढीको अनुभव छ । उनीसँग सिटिजन्स बैंक र नेपाल विद्युत् प्राधिकरणमा सञ्चालकका रूपमा काम गरेको अनुभव छ । कम्पनीको व्यवस्थापनको नेतृत्व प्रमुख कार्यकारी अधिकृत (सीईओ) सुभाष घिमिरेले गरिरहेका छन् । उनीसँग रेमिट्यान्स तथा वित्तीय सेवा क्षेत्रमा २० वर्षभन्दा बढीको अनुभव रहेको छ । विशेषगरी व्यावसायिक साझेदारी, जोखिम व्यवस्थापन, नियामकीय अनुपालन तथा अन्तर्राष्ट्रिय विप्रेषण कारोबारमा उनको अनुभव रहेको छ । सिटी एक्सप्रेसको देशभर २५ हजारभन्दा बढी एजेन्टको सञ्जाल छ । आन्तरिक विप्रेषण कारोबारका आधारमा कम्पनीको बजार हिस्सा १४ प्रतिशत रहेको छ । कम्पनीले वित्तीय सेवा क्षेत्रका अन्य व्यवसायमा समेत लगानी विस्तार गरेको छ । स्मार्ट च्वाइस टेक्नोलोजिज प्रालिमा ८ करोड ७२ लाख रुपैयाँ र सिटी वालेट प्रालिमा १० करोड रुपैयाँ लगानी रहेको छ । रेमिट्यान्स वृद्धिमा डिजिटलको सहयोग वैदेशिक रोजगारीमा जाने नेपालीको निरन्तरता, डिजिटल भुक्तानी प्रणालीको विस्तार तथा औपचारिक विप्रेषण माध्यमको बढ्दो प्रयोगले नेपालको विप्रेषण उद्योगको वृद्धिमा सहयोग पुर्याउने कम्पनीले जनाएको छ । नेपालको कुल गार्हस्थ्य उत्पादन तथा घरपरिवारको आयमा विप्रेषणको महत्त्वपूर्ण योगदान रहँदै आएको छ । विशेषगरी खाडी मुलुक, मलेसिया तथा अन्य उदीयमान गन्तव्यमा नेपाली श्रमिकको निरन्तर उपस्थितिले विप्रेषण प्रवाहलाई सहयोग पुर्याउने कम्पनीको भनाइ छ । डिजिटल भुक्तानी प्रणाली र मोबाइल वालेटसँगको एकीकरणले विदेशबाट रकम पठाउने तथा नेपालमा रकम प्राप्त गर्ने प्रक्रियालाई सहज बनाउँदै लगेको छ । प्रविधिमा आधारित सेवाको विस्तारले विप्रेषण कारोबारलाई थप पहुँचयोग्य, सुविधाजनक र प्रभावकारी बनाउने अपेक्षा कम्पनीले गरेको छ । त्यस्तै, नेपाल सरकारका अनुकूल नीतिगत पहल, नेपाल राष्ट्र बैंकका नियामकीय सुधार तथा विप्रेषण कारोबारलाई औपचारिक माध्यममा आबद्ध गर्ने प्रयासले यस क्षेत्रको स्थायित्व र वृद्धिमा योगदान पुर्याउन सक्ने कम्पनीको भनाइ छ । औपचारिक माध्यमको प्रयोग बढ्दा कारोबारको पारदर्शिता र नियामकीय अनुपालनमा समेत सुधार आउने अपेक्षा गरिएको छ । प्रतिस्पर्धा र नियामकीय जोखिम चुनौती विप्रेषण बजारमा बढ्दो प्रतिस्पर्धा र नियामकीय जोखिम सिटी एक्सप्रेसका प्रमुख चुनौतीका रूपमा देखिएका छन् । बैंक, स्थापित विप्रेषण कम्पनी, डिजिटल भुक्तानी प्लेटफर्म तथा वित्तीय प्रविधिमा आधारित कम्पनीहरूबीच प्रतिस्पर्धा तीव्र बन्दै जाँदा कम्पनीको कमिसन आम्दानी र नाफा मार्जिनमा दबाब परेको छ । प्रतिस्पर्धाका कारण कमिसन आम्दानीमा आएको कमीले कुल सञ्चालन आम्दानी घट्न योगदान पुर्याएको छ । आगामी दिनमा प्रतिस्पर्धा थप तीव्र भएमा कम्पनीको आम्दानी वृद्धि र नाफा मार्जिनमा थप दबाब पर्न सक्ने देखिन्छ । नेपाल राष्ट्र बैंकका नियामकीय प्रावधान, आन्तरिक तथा अन्तर्राष्ट्रिय रकम स्थानान्तरणसम्बन्धी प्रतिबन्ध, वैदेशिक रोजगारीसम्बन्धी नीतिगत परिवर्तन र रकम पठाउने स्रोत मुलुकका अनुपालनसम्बन्धी व्यवस्थाले पनि कम्पनीको व्यवसायलाई प्रभावित गर्न सक्छन् । नियामकीय व्यवस्था परिवर्तन हुँदा त्यसअनुसार सेवा सञ्चालन र अनुपालनका लागि थप खर्च लाग्न सक्ने जोखिमसमेत रहन्छ । सिटी एक्सप्रेसको विप्रेषण व्यवसाय खाडी मुलुकबाट आउने रकममा तुलनात्मक रूपमा बढी निर्भर छ । नेपालमा विप्रेषण भित्रिने प्रमुख स्रोतका रूपमा रहेका ती मुलुकमा रोजगारीको अवस्था, आप्रवासन नीति, श्रम कानुन, आर्थिक गतिविधि वा भू-राजनीतिक परिस्थितिमा प्रतिकूल परिवर्तन आएमा नेपाली श्रमिकको रोजगारी र उनीहरूले पठाउने रकम प्रभावित हुन सक्छ । त्यसको असर कम्पनीको कारोबार र आम्दानीमा समेत पर्न सक्ने देखिन्छ । कम्पनीले विभिन्न बैंक तथा वित्तीय संस्थाबाट १ अर्ब रुपैयाँ अल्पकालीन ऋण लिएको छ । बैंकिङ सुविधाका लागि गरिएको रेटङमा इन्फोमेरिक्स क्रेडिट रेटिङ नेपाल लिमिटेडले कम्पनीलाई एटू प्लस रेटिङ प्रदान गरेको छ । यसले कम्पनीको ऋणसम्बन्धी दायित्व पूरा गर्ने क्षमता सहज रहेको संकेत गर्छ ।
चार पूर्वसचिवको प्रतिस्पर्धामा बाजी मार्दै घिमिरे बने स्टाफ कलेजको कार्यकारी निर्देशक
काठमाडौं । सचिवको पाँचवर्षे कार्यकाल पूरा गर्न नपाउँदै उमेरहदका कारण निजामती सेवाबाट अवकाशमा गएका डा. रामप्रसाद घिमिरे नेपाल प्रशासनिक प्रशिक्षण प्रतिष्ठान (स्टाफ कलेज) को कार्यकारी निर्देशक नियुक्त भएका छन् । गत फागुनमा सचिवबाट अनिवार्य अवकाशमा गएका घिमिरेले अवकाशको एक वर्ष नबित्दै प्रशासनिक प्रशिक्षणको नेतृत्व गर्ने जिम्मेवारी पाएका हुन् । घिमिरेले राजस्व सचिव र अर्थ सचिवका रूपमा काम गरिसकेका छन् । त्यसबाहेक उनले अख्तियार दुरुपयोग अनुसन्धान आयोग, राष्ट्रपति कार्यालय तथा उद्योग, वाणिज्य तथा आपूर्ति मन्त्रालयमा सचिवको जिम्मेवारी सम्हालेका थिए । ५८ वर्षे उमेरहदका कारण सचिवको पाँचवर्षे कार्यकाल पूरा गर्न नपाउँदै अवकाशमा पुगेका घिमिरे अब स्टाफ कलेजको कार्यकारी नेतृत्वमा रहनेछन् । स्टाफ कलेजका तत्कालीन कार्यकारी निर्देशक रामशरण पुडासैनी पदमुक्त भएपछि उक्त पद रिक्त थियो । रिक्त पदमा नियुक्तिका लागि घिमिरेसहित पूर्वसचिवहरू डिल्लीराम शर्मा, गोकर्णमणि दुवाडी र बाबुराम अधिकारी प्रतिस्पर्धामा थिए । छनोट प्रक्रियामा घिमिरे, शर्मा र अधिकारी नियुक्तिका लागि सिफारिस भएका थिए । सिफारिसमा परेका तीन जनामध्ये घिमिरे कार्यकारी निर्देशक नियुक्त भएका हुन् । दुवाडी भने अन्तिम तीन जनाको सूचीमा समेत पर्न सकेनन् । यसपटक स्टाफ कलेजको कार्यकारी निर्देशक छनोटमा यसअघिको अभ्यासभन्दा फरक प्रक्रिया अपनाइएको थियो । विगतमा मन्त्रिपरिषदबाट सिधै नियुक्ति गर्ने अभ्यास रहेकामा यसपटक खुला प्रतिस्पर्धाबाट उम्मेदवार छनोट गरिएको हो । स्टाफ कलेजले सरकारी कर्मचारीको क्षमता अभिवृद्धि, प्रशासनिक प्रशिक्षण तथा सार्वजनिक प्रशासनसम्बन्धी अध्ययन र अनुसन्धान गर्दै आएको छ ।
कुशल मल्ल टिममा पनि परेनन्, विदेशी खेलाडी बोपाराले गरे कप्तानी
काठमाडौं । नेपाल प्रिमियर लिग (एनपीएल) को तेस्रो संस्करणमा चितवन राइनोजले विराटनगर किंग्सविरुद्धको खेलमा कप्तान परिवर्तन गरेको छ । चितवनको कप्तानी यसअघिका खेलमा कुशल मल्लले गर्दै आएकोमा आजको खेलमा रवि बोपाराले नेतृत्व गरिरहेका छन् । विराटनगरविरुद्धको खेलमा कुशल मल्ल प्लेइङ ११ मा परेका छैनन् । उनको अनुपस्थितिमा इंग्ल्यान्डका अनुभवी खेलाडी बोपाराले टोलीको नेतृत्व सम्हालेका हुन् । खेलमा विराटनगर किंग्सका कप्तान सन्दीप लामिछानेले टस जितेर पहिले बलिङ गर्ने निर्णय गरेका छन् । टस हारेपछि चितवनका कप्तान बोपाराले पहिले ब्याटिङ गर्दै राम्रो योगफल बनाउने र त्यसलाई जोगाउने रणनीति रहेको बताए । ‘मैले पछिल्ला खेलहरूमा नौ खेलमा टस हारेको छु । अब राम्रो स्कोर बनाएर त्यसलाई जोगाउने प्रयास गर्छौं,’ उनले भने । एनपीएलको तेस्रो संस्करणमा चितवन राइनोज र विराटनगर किंग्स दुवै टोलीले आज पहिलो खेल खेल्दैछन् । पहिलो खेलमै कप्तानी परिवर्तन र नयाँ रणनीतिका साथ मैदान उत्रिएको चितवनले बोपाराको नेतृत्वमा कस्तो प्रदर्शन गर्छ भन्ने चासो रहनेछ ।
ह्यारी केनले जिते बालोन डी’ओर
काठमाडौं । इंग्ल्यान्डका स्टार स्ट्राइकर ह्यारी केनले विश्व फुटबलको प्रतिष्ठित व्यक्तिगत पुरस्कार बालोन डी’ ओर जितेका छन् । गत सिजन क्लब र राष्ट्रिय टोलीबाट असाधारण प्रदर्शन गरेका केन सन् २०२६ को पुरुष बालोन डी’ओर विजेता बनेका हुन् । केनले गत सिजन जर्मन क्लब बायर्न म्युनिख र इंग्ल्यान्डको राष्ट्रिय टोलीबाट जम्मा ६५ खेलमा ७३ गोल गरेका थिए । उनले बायर्नबाट ६१ र इंग्ल्यान्डबाट १२ गोल गरेका हुन् । यससँगै केन सन् २००१ मा माइकल ओवेनपछि बालोन डी’ओर जित्ने पहिलो इंग्लिस खेलाडी बनेका छन् । इंग्ल्यान्डका खेलाडीले २५ वर्षपछि यो प्रतिष्ठित पुरस्कार जितेका हुन् । केनको यो सफलताले उनको फुटबल करिअरमा नयाँ इतिहास रचेको छ । लामो समय इंग्लिस क्लब टोटनहम हट्सपरमा बिताएर उपाधिको खोजीमा जर्मनी पुगेका उनले अन्ततः विश्व फुटबलको सबैभन्दा ठूलो व्यक्तिगत सम्मान हात पारेका हुन् । टोटनहम छाड्ने निर्णयले बदलियो करिअर केनको फुटबल यात्रामा सन् २०२३ को अगस्ट महत्त्वपूर्ण मोड बन्यो । उनले करिब १९ वर्ष बिताएको इंग्लिस क्लब टोटनहम हट्सपर छाडेर जर्मनीको बायर्न म्युनिख जाने निर्णय गरेका थिए । ११ वर्षको उमेरमा टोटनहमको युवा टोलीमा प्रवेश गरेका केन पछि क्लबका कप्तान र सर्वाधिक गोलकर्ता बने । तर, लामो समय क्लबमा बिताउँदा पनि उनले प्रमुख उपाधि जित्न सकेका थिएनन् । टोटनहम छाड्दा उनी इंग्लिस प्रिमियर लिगमा एलन सियररको सर्वाधिक गोलको कीर्तिमान तोड्न केवल ४७ गोलले पछाडि थिए । त्यसैले उनको जर्मनी जाने निर्णयलाई धेरैले आश्चर्यका रूपमा लिएका थिए । तर, केन व्यक्तिगत कीर्तिमानभन्दा टोलीको सफलता चाहन्थे । यही उद्देश्यले बायर्न पुगेका उनी अहिले फुटबलको सबैभन्दा प्रतिष्ठित व्यक्तिगत पुरस्कार जित्न सफल भएका छन् । एकै सिजन ६१ गोल, रोनाल्डोको कीर्तिमानसँग बराबरी सन् २०२५–२६ को सिजन केनको करिअरकै उत्कृष्ट रह्यो । उनले बायर्न म्युनिखबाट सबै प्रतियोगितामा ६१ गोल गरे । यो युरोपका प्रमुख पाँच लिगका अन्य कुनै पनि खेलाडीको भन्दा १९ गोल बढी हो । सन् २०१४–१५ मा क्रिस्टियानो रोनाल्डोले रियल मड्रिडका लागि ६१ गोल गरेयता युरोपका शीर्ष पाँच लिगका कुनै पनि क्लबका खेलाडीले एकै सिजन यति धेरै गोल गरेका थिएनन् । केनका ६१ गोलमध्ये १७ पेनाल्टीमार्फत भएका थिए । ती गोल हटाउँदासमेत उनको संख्या ४४ पुग्छ । यो दोस्रो स्थानमा रहेका किलियन एम्बाप्पेको कुल ४२ गोलभन्दा बढी हो । केनले जर्मन बुन्डेसलिगामा मात्रै ३६ गोल गर्दै लगातार तेस्रोपटक गोल्डेन बुट जिते । बुन्डेसलिगाको इतिहासमा लगातार तीन वा त्यसभन्दा बढी सिजन सर्वाधिक गोलकर्ता बन्ने उनी रोबर्ट लेवान्डोस्कीपछि दोस्रो खेलाडी हुन् । बुन्डेसलिगाको इतिहासमा एकै सिजन ३६ भन्दा बढी गोल गर्ने उपलब्धि यसअघि तीनपटक मात्रै हासिल भएको थियो । लेवान्डोस्कीले सन् २०२०–२१ मा ४१ तथा गर्ड मुलरले सन् १९७१–७२ मा ४० र १९६९–७० मा ३८ गोल गरेका थिए । गत सिजन केनले पाँच ह्याट्रिकसमेत गरे । तीमध्ये चार बुन्डेसलिगामा थिए । च्याम्पियन्स लिगदेखि विश्वकपसम्म उत्कृष्ट प्रदर्शन केनले युरोपेली च्याम्पियन्स लिगमा पनि उत्कृष्ट प्रदर्शन गरे । उनले प्रतियोगितामा १४ गोल गर्दै आफ्नो व्यक्तिगत कीर्तिमान बनाए । च्याम्पियन्स लिगमा सर्वाधिक १५ गोल गरेका एम्बाप्पेभन्दा उनी एक गोलले मात्रै पछाडि रहे । यद्यपि, एकै सिजन च्याम्पियन्स लिगमा कम्तीमा १४ गोल गर्ने उनी इतिहासकै छैटौं खेलाडी बने । राष्ट्रिय टोलीबाट पनि केनको प्रदर्शन उत्तिकै प्रभावशाली रह्यो । उनले सन् २०२६ को विश्वकपमा इंग्ल्यान्डका लागि ६ गोल गरे । यससँगै विश्वकपमा इंग्ल्यान्डका लागि सर्वाधिक गोल गर्ने खेलाडीको कीर्तिमान उनले आफ्नो नाममा लेखाए । केनले विश्वकपमा कुल १४ गोल गर्दै ग्यारी लिनेकरको १० गोलको कीर्तिमान तोडे । उनी पाँच फरक प्रमुख अन्तर्राष्ट्रिय प्रतियोगितामा गोल गर्ने इंग्ल्यान्डको पुरुष टोलीका पहिलो खेलाडीसमेत बने । लगातार उत्कृष्ट प्रदर्शन नै केनको सबैभन्दा ठूलो विशेषता केनको सफलताको प्रमुख आधार उनको निरन्तर उत्कृष्ट प्रदर्शन हो । उनी कुनै एक सिजन मात्रै चम्किएका खेलाडी होइनन् । सन् २०१४–१५ देखि २०२५–२६ सम्म लगातार १२ सिजन उनले क्लब फुटबलमा कम्तीमा २० गोल गरे । तीमध्ये आठ सिजनमा उनको गोल संख्या ३० वा त्यसभन्दा बढी रह्यो । यस अवधिमा युरोपका शीर्ष पाँच लिगका क्लबबाट सबै प्रतियोगितामा केनले ४२१ गोल गरे । उनीभन्दा बढी गोल गर्ने खेलाडी रोबर्ट लेवान्डोस्की मात्रै थिए, जसले ४६४ गोल गरेका थिए । गत सिजन केनले क्लब र राष्ट्रिय टोलीबाट ४७ फरक खेलमा गोल गरे । उनी लगातार दुई खेलभन्दा बढी गोलविहीन रहेनन् । गोल गर्ने अवसर सदुपयोग गर्ने क्षमतामा पनि केन उत्कृष्ट देखिए । गत सिजन पेनाल्टीबाहेकका उनका २४.१ प्रतिशत प्रहार गोलमा परिणत भए । यो दर एम्बाप्पेको १५.८ प्रतिशत, मिकेल ओयारजाबालको १६.३ प्रतिशत र फेरान टोरेसको १८.८ प्रतिशतभन्दा निकै माथि थियो । एर्लिङ हालान्डको गोल रूपान्तरण दर भने २५.२ प्रतिशत थियो । त्यस्तै, सन् २०२१–२२ देखि २०२५–२६ सम्मको पाँच सिजनमा केनले पेनाल्टीबाहेकका प्रहारबाट अपेक्षित गोल (एक्सजी) ९०.२ हुँदा वास्तविक रूपमा ११२ गोल गरे । अर्थात् उनले अपेक्षाभन्दा २२।८ गोल बढी गरेका थिए । यसले केन गोल गर्ने अवसरलाई परिणाममा बदल्न कति सक्षम छन् भन्ने देखाउँछ । खेल निर्माणमा पनि उत्तिकै सक्रिय केनलाई केवल गोल गर्ने स्ट्राइकरका रूपमा मात्रै हेर्न मिल्दैन । उनी मैदानमा पछाडि झरेर टोलीको आक्रमण निर्माणमा समेत महत्त्वपूर्ण भूमिका खेल्छन् । गत सिजन उनले बल छोएका कुल अवसरमध्ये १४.८ प्रतिशत मात्रै विपक्षीको पेनाल्टी क्षेत्रभित्र थिए । तुलनात्मक रूपमा हालान्डको यो दर २६.८ प्रतिशत थियो । केनले विपक्षीको पेनाल्टी क्षेत्रबाहिर प्रतिखेल औसत ३७.१ पटक बल छोएका थिए भने हालान्डको संख्या १६.४ थियो । केन पछाडि झर्दा विपक्षी डिफेन्डरलाई आफ्नो स्थान छाड्ने वा उनलाई खाली ठाउँ दिने भन्ने समस्या पर्छ । यसबाट बायर्नका तीव्र गतिका अन्य आक्रमणकारीले फाइदा उठाउँछन् । गत सिजन केनले ६ असिस्ट गर्नुका साथै खुला खेलबाट ६७ गोलका अवसर सिर्जना गरेका थिए । बायर्नका माइकल ओलिसे र लुइस डियाजको सफलतामा पनि केनको भूमिका महत्त्वपूर्ण रह्यो । ओलिसेले २६ र डियाजले १९ असिस्ट गरेका थिए । टोटनहममा रहँदा प्रमुख उपाधि जित्न नसकेपछि नयाँ चुनौती स्वीकार गर्दै जर्मनी पुगेका केनको निर्णय अहिले सार्थक बनेको छ । व्यक्तिगत कीर्तिमानभन्दा टोलीको सफलतालाई प्राथमिकता दिएका उनले आफ्नो करिअरकै सबैभन्दा ठूलो व्यक्तिगत सम्मान जितेका छन् । (अन्तर्राष्ट्रिय सञ्चारमाध्यमहरूकाे सहयाेगबाट)
विराटनगर किङ्स भर्सेज चितवन राइनोज, कसले मार्ला बाजी ?
काठमाडौं । नेपाल प्रिमियर लिग (एनपीएल) को तेस्रो संस्करणमा आज दिउसो साढे १२ बजे विराटनगर किङ्स र चितवन राइनोजबीच प्रतिस्पर्धा हुँदैछ । कीर्तिपुरस्थित त्रिवि अन्तर्राष्ट्रिय क्रिकेट मैदानमा दिउँसो १२ः३० बजे सुरु हुने खेलमा दुवै टोलीको लक्ष्य जितसहित प्रतियोगितामा बलियो सुरुआत गर्नु हुनेछ । विराटनगरको नेतृत्व सन्दीप लामिछाने र चितवनको नेतृत्व कुशल मल्लले गरिरहेका छन् । यो खेलको आकर्षण विदेशी खेलाडीको अन्तर्राष्ट्रिय अनुभव मात्रै होइन, नेपाली खेलाडीको क्षमता, टोलीको सन्तुलन र दबाबमा प्रदर्शन गर्ने सामथ्र्य पनि हो । विराटनगरसँग आन्द्रे रसेल, एन्जेलो म्याथ्युज र चरिथ असलंकाजस्ता चर्चित खेलाडी छन् । चितवनले सिकन्दर राजा, रवि बोपारा, कलीम सना र अन्य विदेशी खेलाडीको अनुभव तथा नेपाली खेलाडीको प्रदर्शनमा भरोसा गर्न सक्छ । टी–२० क्रिकेटमा केही ओभरमै खेलको दिशा बदलिन सक्छ । त्यसैले आजको प्रतिस्पर्धामा कुन टोलीले आफ्नो बलियो पक्षलाई प्रभावकारी रूपमा प्रयोग गर्छ र विपक्षीको कमजोरीमा प्रहार गर्छ भन्ने कुराले नतिजामा महत्त्वपूर्ण भूमिका खेल्नेछ । विराटनगर किङ्स : रसेलको विस्फोटक शक्ति, सन्दीपको स्पिन विराटनगर किङ्सको टोलीमा ब्याटिङ, बलिङ र अलराउन्ड क्षमताको मिश्रण देखिन्छ । विदेशी खेलाडीमा आन्द्रे रसेल, एन्जेलो म्याथ्युज, चरिथ असलंका र शुबम रञ्जने प्रमुख नाम हुन् । नेपाली खेलाडीमध्ये कप्तान सन्दीप लामिछाने, लोकेश बम, बसिर अहमद, प्रतिश जीसी र नारायण जोशी महत्त्वपूर्ण विकल्प हुन् । आन्द्रे रसेल विराटनगरका लागि सबैभन्दा आकर्षक खेलाडीमध्ये एक हुन् । वेस्ट इन्डिजका रसेल टी–२० क्रिकेटमा आक्रामक ब्याटिङ र उपयोगी तीव्र बलिङका लागि परिचित छन् । उनले ब्याटिङमा तीव्र रन बनाउने, छक्का प्रहार गर्ने र बलिङमा विकेट निकाल्ने क्षमता राख्छन् । उनी क्रिजमा टिकेमा केही ओभरमै खेलको अवस्था बदलिन सक्छ । रसेलको अर्को महत्त्वपूर्ण पक्ष उनको अलराउन्ड क्षमता हो । ब्याटिङमा मात्र नभई बलिङमा पनि योगदान दिन सक्ने भएकाले उनको उपस्थितिले टोलीलाई रणनीतिक विकल्प दिन्छ । तर, उनलाई प्रभावकारी हुन दिनु विपक्षीका लागि जोखिमपूर्ण हुनेछ । चितवनले उनको लय बिगार्न सके विराटनगरको आक्रामक योजनामा दबाब पर्न सक्छ । एन्जेलो म्याथ्युज अनुभवका हिसाबले विराटनगरका महत्त्वपूर्ण खेलाडी हुन् । श्रीलङ्काका पूर्वकप्तानसमेत रहेका म्याथ्युजले मध्यक्रममा इनिङ्स सम्हाल्ने, आवश्यकताअनुसार रनगति बढाउने र बलिङमा योगदान दिने क्षमता राख्छन् । सुरुआती विकेट गुमेको अवस्थामा उनको अनुभव उपयोगी हुन सक्छ । चरिथ असलंका श्रीलङ्काका आक्रामक मध्यक्रमका ब्याटर हुन् । उनले स्पिन र तीव्र बलिङ दुवैविरुद्ध रन बनाउन सके विराटनगरको ब्याटिङ थप बलियो हुनेछ । रसेलले आक्रामक खेल्ने र असलंकाले इनिङ्सलाई गति दिने संयोजन विराटनगरका लागि उपयोगी हुन सक्छ । शुबम रञ्जने अलराउन्डरका रूपमा टोलीका अर्का विकल्प हुन् । उनले ब्याटिङ र बलिङ दुवैमा योगदान दिन सके विराटनगरको टोली सन्तुलन बलियो हुन सक्छ । विदेशी खेलाडीको प्रदर्शनसँगै उनीहरूको भूमिकाको उचित प्रयोग गर्नु टोली व्यवस्थापनका लागि महत्त्वपूर्ण हुनेछ । विराटनगरको बलिङको प्रमुख आधार कप्तान सन्दीप लामिछाने हुन् । उनको लेग स्पिनले मध्य ओभरमा विपक्षीको रनगति नियन्त्रण गर्न र महत्त्वपूर्ण विकेट निकाल्न सक्छ । टी–२० खेलमा मध्य ओभरमा विकेट लिन सक्नु विपक्षीलाई ठूलो योगफल बनाउनबाट रोक्ने प्रमुख उपाय हो । सन्दीपले रसेल र म्याथ्युजजस्ता खेलाडीको आक्रामक क्षमतालाई सन्तुलित गर्दै बलिङ आक्रमणको नेतृत्व गर्नुपर्नेछ । विपक्षीका ब्याटरले सहज रूपमा रन बनाउन थालेमा उनले बलिङ परिवर्तन र क्षेत्ररक्षणको संयोजनमार्फत दबाब सिर्जना गर्नुपर्ने हुन्छ । यस्तै, लोकेश बम विराटनगरका लागि ब्याटिङमा महत्त्वपूर्ण खेलाडी हुन् । उनी आक्रामक खेलमा सफल भए टोलीले पावरप्ले वा मध्य ओभरमा राम्रो रनगति हासिल गर्न सक्छ । बसिर अहमदले अलराउन्ड भूमिका निर्वाह गर्न सक्छन् भने प्रतिश जीसी, नारायण जोशी र सुभाष भण्डारीजस्ता खेलाडीले बलिङमा योगदान दिन सक्छन् । विराटनगरको टोली सूचीमा अपराजित पौडेल, नरेन साउद, इमरान शेख, रुपेश सिंह, प्रतीक श्रेष्ठ, सुजन थापालिया र दिलशाद अली पनि छन् । अन्तिम खेल्ने ११ मा कसले स्थान पाउँछ भन्ने कुरा खेलअघि हुने छनोटमा निर्भर हुनेछ । विराटनगरको बलियो पक्ष र कमजोरी विराटनगरको मुख्य शक्ति आक्रामक ब्याटिङ र कप्तान सन्दीपको स्पिन बलिङ हो । रसेल, असलंका र म्याथ्युजले आ–आफ्नो भूमिकाअनुसार योगदान दिए टोलीले ठूलो योगफल बनाउन वा कठिन लक्ष्य पछ्याउन सक्छ । तर, विदेशी स्टारको नाम ठूलो हुँदैमा जित सुनिश्चित हुँदैन । रसेल र असलंकाले सुरुआती ओभरमै विकेट गुमाएमा विराटनगरको ब्याटिङमा दबाब बढ्न सक्छ । त्यस्तै, सन्दीपले विकेट निकाले पनि अन्य बलरले रन नियन्त्रण गर्न नसके विपक्षीले ठूलो योगफल बनाउन सक्छ । विराटनगरले आफ्नो बलियो पक्षलाई जितमा बदल्न सुरुआती ब्याटिङमा स्थिरता, मध्यक्रममा साझेदारी र अन्तिम ओभरमा प्रभावकारी बलिङ देखाउनुपर्नेछ । चितवन राइनोज : सिकन्दर राजाको अलराउन्ड क्षमता, विदेशी बलरको साथ चितवन राइनोज पनि अनुभवी विदेशी खेलाडी र प्रतिभाशाली नेपाली खेलाडीको संयोजनमा मैदान उत्रँदैछ । टोलीका कप्तान कुशल मल्ल हुन् । विदेशी खेलाडीमा सिकन्दर राजा, रवि बोपारा, कलीम सना, आसिफ अली, उसामा मीर र कमिल मिसाराजस्ता खेलाडीको नाम टोली सूचीमा छ । विदेशी खेलाडी : ब्याटिङ र बलिङ दुवैमा विकल्प सिकन्दर राजा चितवनका सबैभन्दा महत्त्वपूर्ण विदेशी खेलाडीमध्ये एक हुन् । जिम्बाब्वेका अनुभवी अलराउन्डर राजा ब्याटिङ र बलिङ दुवैमा योगदान दिन सक्छन् । उनी आवश्यकताअनुसार इनिङ्स सम्हाल्न वा आक्रामक ब्याटिङ गर्न सक्षम छन् र बलिङमा पनि विकेट निकाल्न सक्ने भएकाले उनको उपस्थितिले चितवनलाई एकै खेलाडीबाट दुई क्षेत्रमा फाइदा लिन सक्ने अवसर दिन्छ । राजाले मध्यक्रममा राम्रो साझेदारी बनाएमा चितवनको ब्याटिङलाई स्थिरता मिल्न सक्छ । त्यस्तै, विपक्षी टोलीका ब्याटरले रनगति बढाइरहेका बेला उनको बलिङ उपयोगी हुन सक्छ । त्यसैले विराटनगरविरुद्ध चितवनको रणनीतिमा राजाको भूमिका निर्णायक हुन सक्छ । रवि बोपारा अनुभवी अलराउन्डर हुन् । उनले ब्याटिङमा परिस्थिति बुझेर खेल्ने र आवश्यकताअनुसार रनगति बढाउने भूमिका निर्वाह गर्न सक्छन् । चितवनले सुरुआती विकेट गुमाएको अवस्थामा बोपाराले इनिङ्स सम्हाल्न सके टोलीलाई फाइदा हुनेछ । कलीम सना बायाँहाते तीव्र बलर हुन् । नयाँ बलमा स्विङ र गति प्रयोग गर्दै विकेट निकाल्नु उनको प्रमुख भूमिका हुन सक्छ । विराटनगरका आक्रामक ब्याटरलाई सुरुआती ओभरमा नियन्त्रण गर्न सके चितवनले खेलमा राम्रो पकड बनाउन सक्छ । कुशल मल्लको नेतृत्वमा चुनौती चितवनका कप्तान कुशल मल्ल टोलीका प्रमुख नेपाली खेलाडी हुन् । उनी आक्रामक ब्याटिङ र बायाँहाते स्पिन बलिङ दुवैमा योगदान दिन सक्छन् । कुशलले सुरुआती वा मध्यक्रममा रन बनाउन सके चितवनको ब्याटिङले गति लिन सक्छ । आवश्यक पर्दा उनको बलिङ पनि उपयोगी हुन सक्छ । देव खनाल चितवनका लागि महत्त्वपूर्ण नेपाली ब्याटर हुन् । उनले इनिङ्सलाई स्थिरता दिन र साझेदारी बनाउन सके टोलीको ब्याटिङ बलियो हुन सक्छ । बिबेक यादव अलराउन्ड भूमिकामा उपयोगी हुन सक्छन् भने बिपिन रावल र अर्जुन साउद विकेटकिपिङ तथा ब्याटिङका विकल्प हुन् । चितवनको टोलीमा कमलसिंह ऐरी, दीपक बोहरा, रिजन ढकाल, मौसम ढकाल, अशोक धामी, गौतम केसी, रञ्जित कुमार र सलाउद्दिन खान पनि छन् । यी खेलाडीको भूमिकाले बलिङ आक्रमण, क्षेत्ररक्षण र ब्याटिङको गहिराइमा प्रभाव पार्न सक्छ । चितवनको बलियो पक्ष र कमजोरी चितवनको प्रमुख शक्ति अलराउन्डरको उपलब्धता हो । सिकन्दर राजा, रवि बोपारा र कुशल मल्लजस्ता खेलाडीले ब्याटिङसँगै बलिङमा योगदान दिन सके टोलीले विभिन्न परिस्थितिमा रणनीति बदल्न सक्छ । कलीम सना र उसामा मीरले तीव्र तथा स्पिन बलिङका विकल्प दिन सक्छन्। तर, चितवनको सफलता विदेशी खेलाडीको नाममा मात्रै निर्भर रहनु हुँदैन । सुरुआती ब्याटरले विकेट गुमाएमा मध्यक्रममा दबाब बढ्न सक्छ । त्यस्तै, बलिङमा विपक्षीलाई नियन्त्रण गर्न नसके राम्रो ब्याटिङले बनाएको योगफल पनि पर्याप्त नहुन सक्छ । विराटनगरको आक्रामक ब्याटिङ रोक्न चितवनले पावरप्लेमा विकेट निकाल्न, मध्य ओभरमा रनगति नियन्त्रण गर्न र अन्तिम ओभरमा अनुशासित बलिङ गर्नुपर्नेछ ।
गुल्मी कांग्रेसको निर्वाचनमा २१५ भन्दा बढी फर्जी मत खसेको आरोप, पुनः मतगणनाको माग
काठमाडौं । नेपाली कांग्रेसको १५औँ महाधिवेशनअन्तर्गत गुल्मी क्षेत्र नम्बर १ मा सम्पन्न निर्वाचनमा २१५ भन्दा बढी फर्जी मत खसालिएको आरोप सार्वजनिक भएको छ । केन्द्रीय महाधिवेशन प्रतिनिधि खुलातर्फका उम्मेदवार होविन्द्र कार्कीले विदेश तथा निर्वाचन क्षेत्रबाहिर रहेका मतदाताका नाममा फर्जी मत खसालिएको दाबी गर्दै पुनः मतगणना र निष्पक्ष छानबिनको माग गरेका छन् । कार्कीले सामाजिक सञ्जाल र प्रेस विज्ञप्तिमार्फत निर्वाचनमा धाँधली भएको दाबी गरेका हुन् । उनले यस विषयमा पत्रकार सम्मेलन गरेरसमेत तथ्य सार्वजनिक गर्ने र छानबिनका लागि दबाब दिने बताएका छन् । कार्कीका अनुसार क्षेत्रीय अधिवेशन सुरुमा रिडीमा गर्ने निर्णय भएको थियो । तर, भारी वर्षाका कारण अधिवेशनस्थल परिवर्तन गरी रानीबासमा निर्वाचन गराइएको थियो । स्थान परिवर्तनका कारण कतिपय वास्तविक मतदाता उपस्थित हुन नसकेको अवस्थामा उनीहरूकै नाममा मत खसालिएको कार्कीको आरोप छ । २१५ भन्दा बढी फर्जी मत खसेको आफूले पाएको कार्कीले बताए । उनले आरोपको सत्यतथ्य पत्ता लगाउन मतदाता विवरण, मतदानसम्बन्धी अभिलेख र मतगणनाको प्रक्रियाबारे छानबिन गर्नुपर्ने माग गरेका छन् । निर्वाचन मण्डलले छानबिन गर्दै विवाद सार्वजनिक भएपछि निर्वाचन मण्डलका संयोजक अधिवक्ता भीम न्यौपानेले आरोपबारे आफूले छानबिन गरिरहेको बताए । मतदाता प्रमाणित गर्ने जिम्मेवारी आफ्नो भएको स्वीकार गर्दै उनले सामाजिक सञ्जालमा सार्वजनिक भएको दाबीको सत्यतथ्य जाँच भइरहेको बताएका हुन् । नेपाली कांग्रेस गुल्मीका जिल्ला सभापति खिलध्वज पन्थीले आफूले सामाजिक सञ्जालबाटै घटनाबारे जानकारी पाएको बताए । निर्वाचनमा फर्जी मत खसेको विषयमा क्षेत्रीय निर्वाचन मण्डलसँग बुझ्नुपर्ने उनको भनाइ छ । पन्थीका अनुसार निर्वाचनको प्रक्रिया नै सकिएको अवस्थामा अन्य विषय उठाउनु सान्दर्भिक हुँदैन । कार्कीले लगाएको आरोप पुष्टि भएमा त्यसले क्षेत्रीय निर्वाचनको विश्वसनीयतामाथि गम्भीर प्रश्न उठाउने जिल्ला कांग्रेसका नेताहरूले बताएका छन् । विवाद निरूपणका लागि मतदाता नामावली, मतदानका क्रममा गरिएको प्रमाणीकरण, मतपत्रको अभिलेख र निर्वाचन परिणामको विवरण जाँच गर्नुपर्ने देखिएको ती नेताहरूले बताएका छन् ।
एनपीएलका लागि टेलिकमको ५९९ रुपैयाँको अनलिमिटेड प्याकेज
काठमाडौं । नेपाल टेलिकमले नेपाल प्रिमियर लिग (एनपीएल) सिजन–३ लाई लक्षित गर्दै ‘एनपीएल अनलिमिटेड प्याकेज’ सञ्चालनमा ल्याएको छ । कम्पनीले प्रिपेड तथा पोस्टपेड मोबाइल प्रयोगकर्तालाई लक्षित गरी ५९९ रुपैयाँमा उक्त प्याकेज उपलब्ध गराएको हो । प्याकेजअन्तर्गत प्रयोगकर्ताले ३३३ मिनेट अल–नेट भ्वाइस कल गर्न पाउनेछन् भने प्रतिदिन ८ जीबी डाटा उपलब्ध हुनेछ । प्याकेजको समयावधि ३० दिनको रहने नेपाल टेलिकमले जनाएको छ । कात्तिक १० गतेदेखि मंसिर ५ गतेसम्म उक्त प्याकेज खरिद गर्न सकिनेछ । पोस्टपेड मोबाइल प्रयोगकर्ताले खरिद गरेको प्याकेजको शुल्क मासिक रेन्टल चार्जमै समावेश गरिने कम्पनीले जनाएको छ । प्याकेज लिन मोबाइलबाट *१४१५# डायल गर्न सकिनेछ। साथै नेपाल टेलिकमको एपमार्फत पनि प्याकेज खरिद गर्न सकिनेछ । नेपाल टेलिकम एनपीएल सिजन–३ को आधिकारिक टेलिकम पार्टनरसमेत रहेको छ । नेपाली खेलकुद क्षेत्रको विकासमा सहयोग पुर्याउने उद्देश्यले कम्पनीले विभिन्न गतिविधिमा सहभागिता जनाउँदै आएको जनाएको छ ।
विराटनगर किंग्सको टुर एन्ड ट्राभल पार्टनरमा 'रुप्से होलिडेज'
काठमाडौं । नेपाल प्रिमियर लिग (एनपीएल) मा विराटनगर किंग्सको आधिकारिक टुर एन्ड ट्राभल पार्टनरमा रुप्से होलिडेज बनेको छ । विराटनगर किंग्सले रुप्से होलिडेजलाई टोलीको आधिकारिक टुर एन्ड ट्राभल पार्टनरका रूपमा घोषणा गरेको हो। टोलीले साझेदारीको घोषणा गर्दै रुप्से होलिडेजलाई ‘किंग्स परिवार’मा स्वागत गरेको जनाएको छ। एनपीएलमा सहभागी फ्रेन्चाइज टोलीहरूले प्रतियोगिताको तयारी, व्यवस्थापन तथा व्यावसायिक साझेदारीलाई प्राथमिकता दिँदै आएका छन्। विराटनगर किंग्स र रुप्से होलिडेजबीचको साझेदारी पनि टोलीको व्यावसायिक सहकार्य विस्तार भएको रुप्से होलिडेजले जनाएको छ । काठमाडौंको हात्तीसारस्थित रुप्से होलिडेजको कार्यालय रहेको छ । होलिडेजले नेपाल तथा अन्तर्राष्ट्रिय क्षेत्रको पर्यटन प्रवर्द्धनमा काम गर्दै आएको छ । रुप्से होलिडेजले आन्तरिक पर्यटन र ट्राभल एण्ड टुरिज्मको क्षेत्रमा लामो समयदेखि सेवा दिँदै आएको छ ।
