एक वर्षमा १४ अर्ब ३४ करोड बराबरको आइपिओ बिक्रीका लागि अनुमति
काठमाडाैं । नेपाल धितोपत्र बोर्डले चालु आर्थिक वर्षको हालसम्म कूल १८ कम्पनीलाई साधारण शेयर (आइपिओ) बिक्रीको अनुमति दिएको छ । बोर्डको विवरणअनुसार पछिल्लोपटक युनियन लाइफ इन्स्योरेन्स कम्पनीले अनुमति पाएको छ । सो कम्पनीले ६४ करोड ५० लाख बराबरको ६४ लाख ५० हजार कित्ता साधारण शेयर बिक्री गर्न पाउने अनुमति पाएको छ । बोर्डले दिएका अनुमतिका आधारमा हेर्दा कूल रु १४ अर्ब ३४ करोड २३ लाख २५ हजार १०० बराबरको साधारण शेयर बिक्री हुनेछ । पछिल्ला दिनमा नेपालको धितोपत्र बजारमा विस्तारित भएको छ । बोर्डका अनुसार २०७७ असारमा कूल १७ लाखको हाराहारीमा रहेको हितग्राही खाताको सङ्ख्या शतप्रतिशतले वृद्धि भई ३५ लाख नाघेको अवस्था छ । यस्तै रु सात लाखको हाराहारीमा रहेको मेरो शेयर खाताको सङ्ख्यासमेत एक वर्षको अवधिमा साढे तीन गुणा बढीले वृद्धि भई २६ लाख पुगेको छ । यस्तै प्राथमिक सार्वजनिक निष्काशनमा मुस्किलले पाँच लाख जनाले भाग लिने गरेकामा पछिल्लो पटकसम्म आइपुग्दा त २१ लाखले आवेदन दिएका छन् । पछिल्लोपटक सार्वजनिक निष्काशन गरेको जीवन विकास लघुवित्तको साधारण शेयरमा २० लाख ८४ हजार ७६२ जनाले आवेदन दिएका छन् । यसअघि ज्योति लाइफ इन्स्योरेन्स कम्पनीको साधारण शेयरमा १८ लाख ४२ हजार ४८० ले आवेदन दिएको विवरण थियो । जीवन विकास लघुवित्तको बिक्री प्रबन्धक एनएमबी क्यापिटलका अनुसार साधारण शेयरमा लगानी गर्नेको रेकर्ड नै बनेको छ । धितोपत्र बजार अनलाइन कारोवारका लागि २०७७ असारमा मात्रै ३५ हजारले युजरआइडी लिएकाका हालसम्म त्यो सङ्ख्या बढेर छ लाख ६० हजार बढी पुगेको छ । दैनिक छ लाख बढीले कारोवारमा सक्रियता देखाएका छन् । बोर्डका अध्यक्ष भीष्मराज ढुङ्गानाका अनुसार प्रविधिमा भएको विस्तार तथा लगानी सहजीकरणका लागि भएका प्रयासका कारण धितोपत्र बजारमा लगानीकर्ताको सङ्ख्यामा उल्लेख्य वृद्धि भएको छ । बोर्डका अनुसार चालु आवको १० महिनामा नै धितोपत्रको प्राथमिक बजारमार्फत ७८ अर्ब बराबरको पूँजी परिचालन भएको छ । जुन विगत २८ वर्षकै इतिहासमा उच्च हो । प्राथमिक बजारमार्फत समाजमा छरिएर रहेको सानो बचत सङ्कलन गरी दीर्घकालीन पूँजी उत्पादनशील क्षेत्रमा परिचालन गर्न सहयोग पु¥याउने बोर्डको उद्देश्यमा सफलता हासिल भएको छ । बोर्डका अनुसार चालु आवको शुरुआतीमा नै रिलायन्स लाइफ इन्स्योरेन्स कम्पनीले रु ६३ करोड बराबरको ६३ लाख कित्ता साधारण शेयर बिक्री ग¥यो । यस्तै समाज लघुवित्तले रु ८६ लाख बराबरको आठ लाख ६० हजार कित्ता साधारण शेयर बिक्री गरेको थियो । बोर्डबाट अनुमति पाउनेमा पाँच जलविद्युत् कम्पनी छन् । त्यसमा सिङ्गटी हाइड्रोपावरले ४३ करोड ५० लाख बराबरको ४३ लाख ५० हजार कित्ता साधारण शेयर बिक्री गरेको थियो । उक्त परिमाणको शेयर आयोजना प्रभावित स्थानीयवासी र आम सर्वसाधारणलाई बिक्री गरिएको थियो । ग्रिन लाइफ हाइड्रोपावरले ३४ करोड ९६ लाख ४० हजार बराबरको ३४ लाख ९६ हजार ४०० कित्ता साधारण शेयर बिक्री ग¥यो । बोर्डले अनुमति दिएको जलविद्युत् कम्पनीमध्ये प्रिमियमसमेत जोडेर साधारण शेयर बिक्री गर्नेमा रुरु जलविद्युत् परियोजना हो । सो कम्पनीले आठ करोड १५ लाख ४१ हजार १०० बराबरको आठ लाख १५ हजार ४११ कित्ता साधारण शेयर बिक्री ग¥यो । सिइडिबी हाइड्रोपावर कम्पनीले पनि साधारण शेयर बिक्री गरिसकेको छ । यस्तै तेह्रथुम पावर साधारण शेयर बिक्रीका लागि अनुमति पाइसकेको छ । सो कम्पनीले १२ लाख कित्ता साधारण शेयर बिक्री गर्दैछ । साधारण शेयर बिक्री गर्ने कम्पनीमध्ये नेपाल पूर्वाधार बैंक ठूलो हो । सो बैंकले रु आठ अर्ब बराबरको साधारण शेयर चालु आवमा बिक्री गरेको हो । यस्तै जलविद्युत् कम्पनीमध्ये मध्यभोटेकोशीले साधारण शेयर बिक्रीको अनुमति पाएको छ । सो कम्पनीले रु एक अर्ब ५० करोड बराबरको साधारण शेयर बिक्री गर्दैछ । बोर्डका अध्यक्ष ढुङ्गानाका अनुसार बजारको बढ्दो स्वरुपका अनुसार सरकारको राजश्वमा समेत पूँजी बजार भरपर्दो स्रोतका रूपमा स्थापित भएको छ । गत वर्षसम्म पूँजीगत लाभकरवापत सरकारलाई वर्षमा मुस्किलले एक अर्ब बराबरको योगदान पु¥याउने गरेकामा हाल महिनामै सो भन्दा बढी रकम सङ्कलन हुन थालेको छ । लामो समयदेखि स्पष्ट नभएको पूँजीगत लाभकरसम्बन्धी व्यवस्थामा सुधार भएका कारण पनि बजार विस्तारित भएको बोर्डको बुझाइ छ । रासस
पौने १२ लाखले भरे मनकामना स्मार्ट लघुवित्तको आईपीओ
काठमाडौं । हालसम्म पौने १२ लाख जना आवेदकले मनकामना स्मार्ट लघुवित्त वित्तीय संस्थाको आईपीओ भरेका छन् । सेयर निष्काशन तथा बिक्री प्रबन्धक एनएमबि क्यापिटलका अनुसार शुक्रबार दिँउसो ३ बजेसम्ममा ११ लाख ७९ हजार ७१२ जना आवेदकले आवेदन दिएका हुन् । क्यापिटलका अनुसार सेयर निष्काशन गरेको आज(असार १८ गते) दोश्रो दिनसम्ममा १ करोड ५७ लाख २० हजार १२० कित्ता सेयर माग भइसकेको छ । जुन संस्थाले सर्वसाधारणमा माग गरेको भन्दा ४६.७२ गुणा बढी हो । संस्थाले सर्वसाधारणमा ३ लाख ३६ हजार ४९२ कित्ता सेयर मात्रै बिक्री गरेको हो । लघुवित्तले प्रतिकित्ता एक सय रुपैयाँ अंकित दरका ३ लाख ८९ हजार कित्ता साधारण सेयर बिक्री खुला गरेकाे हो । संस्थाले जारी पुँजी १२ करोड ११ लाख ५० हजार रुपैयाँको ३२.११ प्रतिशत सेयर निष्काशन गरेकाे हाे । जसमध्ये जारी पुँजीको ०.५ प्रतिशत अर्थात ६ हजार ५८ कित्ता सेयर कर्मचारीहरुका लागि र कुल निष्काशनको ५ प्रतिशत अर्थात १९ हजार ४५० कित्ता सेयर सामूहिक लगानी कोषका लागि छुट्याइएको छ । र, बाँकी रहेको ३ लाख ६३ हजार ४९२ कित्ता सेयर सर्वसाधारणमा बिक्री गरिएकाे हाे । यससँगै इच्छुक लगानीकर्ताले न्यूनतम १० कित्तादेखि अधिकतम १ हजार कित्तासम्मका लागि आवेदन दिन सक्नेछन् । उनीहरुले असार १७ गतेदेखि २१ गतेसम्म मेरो सेयर मार्फत आवेदन दिन सक्नेछन् ।
२० वटा वाणिज्य बैंकलाई ८ विकास बैंकले उछिने
काठमाडौं । नेपाली सेयर बजारमा वाणिज्य बैंकहरुको तुलनामा विकास बैंकहरुको सेयर मूल्य निकै माथि देखिएको छ । वाणिज्य बैंकहरुको तुलनामा विकास बैंकहरुमा लगानीकर्ताको आकर्षण बढ्दा विकास बैंकहरुको सेयर वाणिज्य बैंकहरुको तुलनामा माथि देखिएको हो । नेपाल राष्ट्र बैंकबाट ‘क’ वर्गको अनुमति पाएका २० वटा वाणिज्य बैंकहरुको तुलनामा ‘ख’ वर्गको अनुमति पाएका ८ विकासहरुको सेयर मूल्य बढेकाे छ । असार १७ गते बिहीबारको सेयर मूल्यलाई हेर्दा विकास बैंकहरुको न्यूनतम सेयर मूल्य ३ सय ३२ रुपैयाँ रहेको छ भने सबैभन्दा बढी सेयर मूल्य ७ सय ८१ रुपैयाँ छ । यस्तै, वाणिज्य बैंकहरुको सबैभन्दा कम सेयर मूल्य १ सय ७१ रुपैयाँ रहेको छ । असार १७ गतेको सेयर बजार अनुसार विकास बैंकहरुमा सबैभन्दा बढी सेयर मूल्य एक्सले डेभलपमेन्ट बैंकको छ । सो बैंकको सेयर मूल्य ७ सय ८१ रहेको छ । यस्तै, दोस्रोमा रहेको कर्पोरेट डेभलपमेन्ट बैंकको ७ सय ३१, नारायणी डेभलपमेन्ट बैंकको ६ सय ५४, मुक्तिनाथ विकास बैंकको ६ सय ३२, लुम्बिनी विकास बैंकको ५ सय ७८, मितेरी डेभलपमेन्ट बैंकको ५ सय ५९, कामना सेवा विकास बैंकको ५ सय २६ र गरिमा विकास बैंकको ५ सय २० रुपैयाँ रहेको छ । यस्तै, २० वटा वाणिज्य बैंकहरुको सेयर मूल्य ८ वटा वाणिज्य बैंकहरुको तुलनामा कम छ । वाणिज्य बैंकहरुमा नबिल बैंकको सबैभन्दा बढी १२ सय ९६ रुपैयाँ सेयर मूल्य छ । यस्तै, एनआईसी एशिया बैंकको ९ सय ११, एभरेष्ट बैंकको ७ सय ३० र स्ट्यान्डर्ड चार्टर्ड बैंकको ५ सय ८९ रुपैयाँ सेयर मूल्य रहेको छ । यी ४ चार बैंक वाहेक सबै वाणिज्य बैंकहरुको सेयर मूल्य ८ वटा विकास बैंकहरुको तुलनामा कम छ । सबैभन्दा कम सेयर मूल्य भएको वाणिज्य बैंक भने सिभिल बैंक देखिएको छ । जसको सेयर मूल्य २ सय ८५ रुपैयाँ मात्रै रहेको छ । ३ सयदेखि ४ सयसम्म सेयर मूल्य भएका विकास बैंकहरुको संख्या पाँच, ४ सयदेखि ५ सयसम्म सेयर मूल्य भएका विकास बैंकहरुको संख्या तीन वटा र ५ सयदेखि ७ सय ८१ रुपैयाँ सेयर मूल्य भएका विकास बैंकहरुको संख्या ८ वटा रहेको छ । यस्तै, १ सयदेखि ४ सयसम्म सेयर मूल्य भएका वाणिज्य बैंकहरुको संख्या १० वटा, ४ सयदेखि ५ सयसम्म सेयर मूल्य भएका वाणिज्य बैंकहरुको संख्या १० वटा र ५ सयदेखि १२ सय ९५ रुपैयाँसम्म सेयर मूल्य भएका वाणिज्य बैंकहरुको संख्या ४ वटा रहेको छ ।
