अपिको हकप्रद र सूर्योदय लघुवित्तको बोनस सेयर सूचीकृत
काठमाडौं । बिहीबार एकैदिन अपि पावर कम्पनी र सूर्योदय लघुवित्त वित्तीय संस्थाको सेयर सूचीकृत भएको छ । नेप्सेमा अपिको हकप्रद र सूर्योदय लघुवित्तको बोनस सेयर सूचीकृत भएको हो । जसमध्ये अपि पावरको २९.३८ प्रतिशत अर्थात ५६ लाख ७० हजार कित्ता हकप्रद सेयर सूचीकृत भएको छ । त्यस्तै, सूर्योदय लघुवित्तको ३ लाख ३० हजार कित्ता बोनस सेयर नेप्सेमा सूचीकृत भएको छ । जुन चुक्ता पुँजीको १५.३५ प्रतिशत हो ।
नेप्सेमा दोहोरो अंकको वृद्धि, १ अर्ब ३३ करोडले बढ्यो कारोबार, ११ कम्पनीमा लाग्यो सर्किट
काठमाडौं । पछिल्लो एक सातादेखि ओरोलो लागेको सेयर बजार बिहीबार भने उकालो लागेको छ । त्यसमा पनि मंगलबार र बुधबार उच्च अंकले घटेको बजार आज भने दोहोरो अंक अर्थात १७.६० अंकले उकालो लागेको हो । जुन अघिल्लो दिनको तुलनामा ०.५७ प्रतिशतले बढी हो । तीव्र उतारचढाव देखिएको बिहीबारको बजारमा सेयर कारोबार मापक नेप्से परिसूचक ३०९४.०५ बिन्दुमा पुगेको छ । परिसूचकसँगै सेयर कारोबारमा पनि सुधार भएको छ । बुधबारको तुलनामा बिहीबारको बजारमा एक अर्ब ३३ करोड रुपैयाँ बढी सेयर कारोबार भएको छ । बुधबार १२ अर्ब ९ करोड रुपैयाँको मात्रै सेयर किनबेच भएको बजारमा बिहीबार भने १३ अर्ब ४२ करोड रुपैयाँ बराबरको सेयर कारोबार भएको छ । बिहीबार २३२ कम्पनीको सेयर कारोबार भएको छ । जसमध्ये बढी कारोबार गर्नेको अग्रस्थानमा अधिकांश हाइड्रो कम्पनी रहेका छन् । त्यसमा पनि अरुण भ्याली हाइड्रोपावर कम्पनीको सबैभन्दा बढी रहेको छ । कम्पनीको एकैदिन ९३ करोड ८४ लाख रुपैयाँ बराबरको सेयर किनबेच भएको छ । जसको अन्तिम कारोबार प्रतिकित्ता ७२० रुपैयाँमा भएको छ । त्यस्तै, दोश्रोमा अरुण काबेली पावर र तेश्रोमा रिडी हाइड्रो पावर डेभलपमेन्ट कम्पनी रहेका छन् । यिनीहरुको क्रमशः ४५ करोड ६ लाख र ३४ करोड ५६ लाख रुपैयाँ बराबरको सेयर किनबेच भएको छ । र, अन्तिम सेयर कारोबार प्रतिकित्ता ८२७ र १०६३ रुपैयाँमा भएको छ । बजारमा केही समूह हरिया देखिएका छन् भने केही राताम्मे देखिएका छन् । विकास बैंक, फाइनान्स, होटल्स एण्ड टुरिजम, हाइड्रोपावर र माइक्रोफाइनान्स समूह हरिया देखिएका छन् भने बाँकी समूह राताम्मे देखिएका छन् । हरिया देखिनेमा पनि सबैभन्दा बढी विकास बैंक २३८.६३ अंकले उकालो लागेको छ । र, त्यसपछि हाइड्रो समूह १७७.८९ बिन्दुले उकालो लागेको छ । बजारमा अधिकांश कम्पनीको सेयर मूल्यमा सकारात्मक सर्किट लागेको छ । दिनभरको बजारमा ११ कम्पनीको सेयर मूल्य १० प्रतिशतले बढेको छ । जसमध्ये अधिकांश हाइड्रो समूहका कम्पनी रहेका छन् । अरुण भ्याली हाइड्रो, आँखुखोला जलविद्युत कम्पनी, घलेम्दी हाइड्रो, खानीखोला हाइड्रो, सिनर्जी पावर डेभलपमेन्ट र दिब्यश्वरी हाइड्रोपावरको सेयर मूल्य १० प्रतिशतले बढेको छ । त्यस्तै, नारायणी डेभलपमेन्ट बैंक, श्री इन्भेष्टमेन्ट फाइनान्स कम्पनी, गुहेश्वरी मर्चेन्ट बैंक एण्ड फाइनान्स कम्पनी, कर्पोरेट डेभलपमेन्ट बैंक र जीवन विकास लघुवित्त वित्तीय संस्थाको सेयर मूल्य १० प्रतिशतले बढेको छ ।
६ परिसूचकमा ८ विकास बैंकः सेयर किन्न कुन बैंक राम्रो ?
काठमाडौं । पछिल्लो समय सेयर बजारमा लगानीकर्ताहरुका लागि विकास बैंकहरु प्रमुख क्षेत्रका रुपमा देखिएका छन् । केही सातादेखि विकास बैंकहरुकाे सेयरकाे माग बढ्दाे छ । गत आर्थिक वर्षको वित्तीय विवरण अनुसार राष्ट्रिय स्तरका ८ विकास बैंकले राम्रै प्रगति गरेका छन् । ८ वटै बैंकको प्रतिसेयर आम्दानीदेखि लाभांश दिने क्षमतामा वृद्धि भएकाे छ । गत आर्थिक वर्षको असार मसान्तसम्मको वित्तीय विवरण अनुसार ८ विकास बैंकहरुको प्रतिसेयर आम्दानी (ईपीएस), खराब खर्जा (एनपीएल), चुक्ता पूँजी, जगेडा कोष, बैंकको आधार दर र लाभांश क्षमताको बारेमा यहाँ प्रस्तुत गरिएको छ । ईपीएसमा कामना सेवा अगाडि ८ वटा राष्ट्रिय बैंकहरुमा सबैभन्दा बढी प्रतिसेयर आम्दानी (ईपीएस) हुने बैंकको सूचीमा कामना सेवा विकास बैंक देखिएको छ । कामना सेवा विकास बैंकको प्रतिसेयर आम्दानी (ईपीएस) २६.४० रुपैयाँ छ । यस्तै, दोस्रो बढी ईपीएस हुने बैंकको सूचीमा मुक्तिनाथ विकास बैंक रहेको छ । यो बैंकको ईपीएस २३.९२ रुपैयाँ छ । गरिमा विकास बैंकको २२.४५, ज्योति विकास बैंकको १९.२९, महालक्ष्मीको २१.९३, लुम्बिनीको १७.७६, साँग्रिलाको १५.२३ र साइन रेसुङ्गा बैंकको १५.१० रुपैयाँ ईपीएस रहेको छ । मुक्तिनाथको खराब कर्जा कम सबैभन्दा कम खराब कर्जा (एनपीएल) हुने बैंकको सूचीमा मुक्तिनाथ विकास बैंक रहेको छ । मुक्तिनाथ विकास बैंकको एनपीएल ०.२५ प्रतिशत छ । सबैभन्दा बढी एनपीएल हुने विकास बैंक भने महालक्ष्मी विकास बैंक देखिएको छ । महालक्ष्मी विकास बैंकको एनपीएल ३.३२ प्रतिशत रहेको बैंकले सार्वजनिक गरेको वित्तीय विवरणले देखाएको छ । यस्तै, लम्बिनी विकास बैंकको एनपीएल २.१३ प्रतिशत, साँग्रिला विकास बैंकको १.४ प्रतिशत, कामना सेवाको १.५ प्रतिशत, साइन रेसुङ्गाको ०.९९, ज्योतिको ०.८० र गरिमा विकास बैंकको ०.७२ प्रतिशत एनपीएल देखिएको छ । चुक्ता पुँजीमा पनि मुक्तिनाथ अगाडि बैंकहरुले सार्वजिनक गरेको गत आर्थिक वर्षको वित्तीय विवरण अनुसार सबैभन्दा बढी चुक्ता पुँजी हुने बैंक मुक्तिनाथ विकास बैंक देखिएको छ । यो बैंकको चुक्ता पूँजी ४ अर्ब ८१ करोड रुपैयाँ छ । ज्योति विकास बैंकको चुक्ता पुँजी ३ अर्ब ८४ करोड रुपैयाँ, गरिमा विकास बैंकको चुक्ता पूँजी ३ अर्ब ६७ करोड रुपैयाँ र महालक्ष्मी विकास बैंकको कुल चुक्ता पुँजी ३ अर्ब ३४ करोड रुपैयाँ देखिएको छ । यस्तै, साइन रेसुङ्गा बैंकको ३ अर्ब ४० करोड, कामनासेवा विकास बैंकको कुल चुक्ता पुँजी २ अर्ब ६५ करोड, लुम्बिनीको २ अर्ब ९० करोड र साँग्रिला विकास बैंकको २ अर्ब ७३ करोड रुपैयाँ चुक्ता पुँजी रहेको छ । लुम्बिनीको जगेडा बढी राष्ट्रिय स्तरका ८ वटा विकास बैंकहरुको तुलनामा सबैभन्दा ठूलो जगेडा कोष लुम्बिनी विकास बैंककाे देखिएको छ । लुम्बिनी विकास बैंकको जगेडा कोषमा १ अर्ब ९९ करोड रुपैयाँ रहेको छ । दोस्रो बढी जगेडा कोष हुने विकास बैंकको रुपमा महालक्ष्मी विकास बैंक रहेको छ । यो बैंकको जगेडा कोषमा १ अर्ब ५९ करोड रुपैयाँ छ । यस्तै, मुक्तिनाथ विकास बैंकको जगेडा कोषमा १ अर्ब १२ करोड, साइनरेसुङ्गाको १ अर्ब ३ करोड, गरिमाको १ अर्ब, ज्योति विकास बैंकको ८७ करोड, कामना सेवाको ८४ करोड र साँग्रिलाको ६७ करोड रुपैयाँ रहेको छ । आधारदरमा साइन रेसुङ्गा राम्रो आधार दर सबैभन्दा कम हुने बैंकको सूचीमा साइन रेसुङ्गा बैंक रहेको छ । सो बैंकको आधार दर ६.७१ प्रतिशत छ । मुक्तिनाथ र महालक्ष्मी विकास बैंकको आधारदर ७.२८ प्रतिशत छ । यस्तै, अन्य ५ वटा विकास बैंकको आधार दर ८.१७ प्रतिशतदेखि ८.५४ प्रतिशतसम्म रहेको छ । लाभांशमा कुन बैंक राम्रो ? सार्वजनिक भएका वित्तीय विवरण अनुसार सबैभन्दा बढी लाभांश दिन सक्ने बैंकका रुपमा मुक्तिनाथ विकास बैंक रहेको छ । ८ वटै विकास बैंकहरुको औसत लाभांश क्षमता १४.७१ प्रतिशत देखिएका छ । मुक्तिनाथ विकास बैंकको लाभांश क्षमता १७.८८ प्रतिशत रहेको छ । गत आर्थिक वर्षको चौथो त्रैमासको वित्तीय विवरणका अनुसार मुक्तिनाथ विकास बैंकको कुल वितरणयोग्य नाफा ८६ करोड ५ लाख रुपैयाँ छ भने बैंकको चुक्ता पूँजी ४ अर्ब ८१ करोड रुपैयाँ छ । यसको आधारमा मुक्तिनाथ विकास बैंकको कुल लाभांश क्षमता १७.८८ प्रतिशत छ । यस्तै, लाभांश बढी दिने विकास बैंकको रुपमा गरिमा विकास बैंक देखिएको छ । गरिमा विकास बैंकको वितरणयोग्य नाफा ६० करोड रुपैयाँ छ भने लाभांश क्षमता १६.४७ प्रतिशत रहेको छ । लाभांश बढी दिने बैंकको तेस्रो नम्बरमा महालक्ष्मी विकास बैंक रहेको छ । बैंकको वितरणयोग्य नाफा ५६ करोड रुपैयाँ छ । यसको आधारमा बैंकको लाभांश क्षमता १६.८६ प्रतिशत छ । यस्तै, कामना सेवा बैंकको लाभांश क्षमता १६.३८ प्रतिशत छ । ज्योति विकास बैंकको पनि कुल वितरणयोग्य नाफा ६० करोड रुपैयाँ छ । बैंकले १५.६८ प्रतिशत लाभांश दिने क्षमता राख्छ ।
