मुक्तिनाथ विकास बैंकका ग्राहकलाई होटलमा ३० प्रतिशतसम्म छुट
काठमाडौं । मुक्तिनाथ विकास बैंक र केजीएच ग्रुप अफ होटल एण्ड रिसोर्टबीच बैंकका ग्राहकलाई विभिन्न सेवा तथा सुविधामा छुट दिने सम्बन्धमा व्यावसायिक सम्झौता भएको छ । सम्झौताअनुसार मुक्तिनाथ विकास बैंकका ग्राहकले काठमाडौंस्थित माया मनोर बुटिक होटल तथा पोखरास्थित वाटरफ्रन्ट रिसोर्ट र हिमालयन फ्रन्ट रिसोर्टमा विभिन्न सेवामा १० देखि ३० प्रतिशतसम्म विशेष छुट पाउनेछन् । त्यस्तै, १० जनाभन्दा बढीको समूहमा होटल बुकिङ गर्दा एक जनाका लागि बस्ने सुविधा निःशुल्क उपलब्ध गराइने बैंकले जनाएको छ । यो सुविधा लिन बैंकका ग्राहकले मुक्तिनाथ विकास बैंकको मान्य डेबिट कार्ड वा प्रिभिलेज कार्ड प्रयोग गर्नुपर्नेछ। ग्राहकले बैंकको मोबाइल बैंकिङमार्फत भुक्तानी गरेर पनि छुट तथा सुविधा लिन सक्नेछन् । बैंकले आफ्ना ग्राहकलाई थप सुविधा दिने उद्देश्यले होटल तथा रिसोर्टसँग यस्तो सम्झौता गरेको जनाएको छ । यसैबीच, मुक्तिनाथ विकास बैंकले आधारदरमा शून्य प्रतिशत प्रिमियममा लगानी गर्न सकिने कर्जासम्बन्धी सुविधा पनि सञ्चालनमा ल्याएको जनाएको छ ।
सिद्धार्थ बैंकको साधारण सभा असोज २८ मा, असोज १६ गते बुक क्लोज
काठमाडौं । सिद्धार्थ बैंक लिमिटेडले २५औँ वार्षिक साधारण सभा आगामी असोज २८ गते आयोजना गर्ने भएको छ । बैंकको सञ्चालक समितिको असोज ५ गते बसेको ४८३औँ बैठकले साधारण सभा र बुक क्लोजको मिति तय गरेको हो । बैंकले नेपाल स्टक एक्सचेन्ज (नेप्से) लाई दिएको जानकारीअनुसार वार्षिक साधारण सभा प्रयोजनका लागि असोज १६ गते एक दिन बुक क्लोज हुनेछ । यसअनुसार असोज १५ गतेसम्म नेप्सेमा कारोबार भई बैंकको सेयरधनी दर्ता किताबमा कायम रहेका सेयरधनीले मात्र साधारण सभामा सहभागी हुन, छलफल गर्न र मतदान गर्न पाउनेछन् । बैंकका अनुसार वार्षिक साधारण सभासम्बन्धी विस्तृत सूचना असोज ६ गते नयाँ पत्रिका राष्ट्रिय दैनिकमा प्रकाशित गरिनेछ । यस्तै, सञ्चालक समितिले ‘एसबिएल ८.२५% अविमोच्य असञ्चिति अग्राधिकार सेयर’ को नगद लाभांश वितरण प्रयोजनका लागि पनि असोज १६ गते नै दर्ता पुस्तिका (बुक क्लोज) बन्द गर्ने निर्णय गरेको जनाएको छ ।
सर्वसाधारणको सुविधाका लागि कामना सेवाले राख्यो यात्रु प्रतिक्षा बेन्च
काठमाडौं । कामना सेवा विकास बैंकले संस्थागत सामाजिक उत्तरदायित्व (सीएसआर) अन्तर्गत ललितपुरको कुमारीपाटी–जावलाखेल क्षेत्रमा पाँच वटा यात्रु प्रतिक्षा बेन्च स्थापना गरेको छ । बैंकले कुमारीपाटी–जावलाखेल व्यापार संघसँगको सहकार्यमा सर्वसाधारण तथा यात्रुहरूको सुविधा लक्षित गर्दै प्रतिक्षा बेन्च निर्माण तथा स्थापना गरेको जनाएको छ । प्रतिक्षा बेन्च स्थापना कार्यक्रम बैंकका काठमाडौं प्रदेश प्रमुख केदारनाथ शर्माको अध्यक्षता तथा कुमारीपाटी–जावलाखेल व्यापार संघका अध्यक्ष वीरेन्द्र शाक्यको प्रमुख आतिथ्यतामा सम्पन्न भएको थियो । बैंकका अनुसार दैनिक आवतजावत गर्ने यात्रु तथा स्थानीय बासिन्दालाई केही समय विश्राम गर्न सहज होस् भन्ने उद्देश्यले सार्वजनिक स्थानमा प्रतिक्षा बेन्च राखिएको हो । कार्यक्रममा व्यापार संघका अध्यक्ष शाक्यले सर्वसाधारणको प्रत्यक्ष उपयोगमा आउने संरचना निर्माण गरेकोमा कामना सेवा विकास बैंकलाई धन्यवाद दिँदै यसबाट स्थानीयवासी र यात्रु दुवैलाई सुविधा पुग्ने विश्वास व्यक्त गरे । काठमाडौं प्रदेश प्रमुख शर्माले बैंकले बैंकिङ सेवासँगै सामाजिक उत्तरदायित्वलाई पनि प्राथमिकतामा राख्दै समुदायको आवश्यकता अनुसार यस्ता सेवामूलक कार्यक्रम सञ्चालन गर्दै आएको बताए । उनले स्थानीय समुदायको हितमा यस्ता गतिविधिलाई आगामी दिनमा पनि निरन्तरता दिइने जानकारी दिए । कार्यक्रममा बैंकका कर्मचारी तथा कुमारीपाटी–जावलाखेल व्यापार संघका प्रतिनिधिहरूको सहभागिता रहेको थियो ।
