१५ प्रतिशत बोनसपछि एनएमबी बैंकको सेयर मूल्य समायोजन
काठमाडौं । बिहीबार एनएमबी बैंक लिमिटेडको सेयर मूल्य समायोजन भएको छ । नेपाल स्टक एक्स्चेञ्ज(नेप्से)ले १५ प्रतिशत बोनस पश्चात बैंकको सेयरको मूल्य समायोजन गरेको हो । समायोजन पश्चात बैंकको सेयर मूल्य प्रतिकित्ता ३१७.३९ रुपैयाँ रहेको छ । जसको औसत आधार मूल्य प्रतिकित्ता ३९१.७ रुपैयाँ रहेको थियो ।
नयाँ लेखा प्रणालीमा ग्लोबल बैंकको वित्तिय विवरणः नाफा २ अर्ब १५ करोड
काठमाडौं । ग्लोबल आइएमई बैंकले २ अर्ब १५ करोड नाफा कमाएको छ । बैंकले आर्थिक बर्ष २०७३।७४ मा २ अर्ब ६ करोड नाफा आर्जन गरेको थियो । बैंकले एक खर्ब ६ अर्ब निक्षेप संकलन गरेर ९३ अर्ब कर्जा लगानी गरेको छ । एनएफआरएस प्रणाली अनुसार सार्वजनिक गरिएको वित्तिय विवरण अनुसार बैंकको प्रति सेयर आम्दानी २२.३० रुपैंयाँ छ । बैंकको खराब कर्जा १.६० बाट घटेर ०.६९ प्रतिशतमा आईपुगेको छ । बैंकले ११ अर्ब ५६ करोड ब्याज आम्दानी गरेर ७ अर्ब ६६ करोड ब्याज खर्च गरेको छ ।
ब्लु क्रस अस्पतालमा नेपाल बङ्गलादेश बैंकका ग्राहकलाई १० प्रतिशत छुट
काठमाडौं । नेपाल बङ्गलादेश बैंक लिमिटेडका ग्राहकले त्रिपुरेश्वरको ब्लु क्रस अस्पतालमा उपचार गराउँदा १० प्रतिशत छुट पाउने भएका छन् । बुधबार बैंक र अस्पतालबीच बैंकका ग्राहकहरुलाई अस्पतालद्वारा प्रदान गरिने विभिन्न सेवाहरुमा छुट दिने सम्बन्धी सम्झौता भएको छ । सम्झौता अनुसार बैंकका डेविट÷क्रेडिट कार्ड प्रयोग गर्ने ग्राहकहरु र बैंकका खातावालाहरुले क्रस अस्पतालको विभिन्न मेडिकल स्क्रीनिङ्गमा सो मात्राको छुट पाउने भएका हुन् । सम्झौता पत्रमा नेपाल बङ्गलादेश बैंकका प्रमुख व्यवसाय अधिकृत सलोनिका सिंह र ब्लु क्रस अस्पतालका कार्यकारी व्यवस्थापन समितिका सदस्य रजित श्रेष्ठले हस्ताक्षर गरेका थिए । उक्त सम्झौताले दुवै संस्थाका ग्राहकहरुलाई सुविधा पुग्ने बैंकले जनाएको छ ।
