अपर तामाकोशी सहित ७ कम्पनीको करोडौँको सेयर कारोबार, सबैभन्दा बढी कसको ?
काठमाडौं । आइतबारको सेयर बजारमा विभिन्न ७ कम्पनीको करोडौँ बढीको सेयर कारोबार भएको छ । सो दिन नेपाल बैंक, एनआईसी एशिया बैंक, बैंक अफ काठमाण्डू, नेपाल लाइफ इन्स्योरेन्स, नागरिक लगानी कोष, अपर तामाकोशी हाइड्रोपावर र कुमारी बैंकको एक करोड रुपैयाँ बढीको सेयर किनबेच भएको छ । सो मध्ये सबैभन्दा बढी नेपाल बैंकको सेयर कारोबार भएको छ । जसको एकैदिन ११ करोड ५९ लाख रुपैयाँ बराबरको सेयर किनबेच भएको छ । बैंकको सेयर मूल्य प्रतिकित्ता ३०० रुपैयाँ रहेको छ । त्यस्तै, एनआईसी एशिया बैंक र बैंक अफ काठमाण्डूको २ करोड रुपैयाँ बराबरको सेयर कारोबार भएको छ । त्यस्तै, नेपाल लाइफ इन्स्योरेन्स, नागरिक लगानी कोष, अपर तामाकोशी हाइड्रोपावर र कुमारी बैंकको एक करोड बराबरको सेयर किनबेच भएको छ । आइतबारदेखि नेपाल स्टक एक्स्चेञ्जमा कारोबार खुल्ला गरिएको अपर तामाकोशी एकैदिन करोडौँको सेयर कारोबार भएको छ । जसको आइतबार मात्रै एक करोड १६ लाख रुपैयाँ बराबरको सेयर बिक्री भएको छ । सो दिन हाइड्रोको सेयर मूल्य प्रतिकित्ता २२४ रुपैयाँ रहेको छ । २२४ मा कारोबार भएसँगै आईपीओका लगानीकर्ताले केही महिनाभित्रै १२४ प्रतिशत नाफा कमाएका छन् । हाइड्रोपावरको सेयरका लागि नेप्सेले ७४.८९ रुपैंया देखि २२४.६७ रुपैंयासम्मका कारोबार गर्न सकिने गरी प्रारम्भिक रेञ्ज तोकिदिएको थियो । जसमा उच्चतम मूल्यमा कारोबार भएको छ । समग्रमा आइतबारको बजारमा कुल १५८ कम्पनीको ३७ करोड २९ लाख रुपैयाँ बराबरको सेयर कारोबार भएको छ । सो दिनको नेप्से परिसूचक ५.७८ अंकले घटेर ११७५ अंकमा झरेको छ । बजारमा उत्पादनमूलक र अन्य समूह बाहेक बाँकी समूहको सूचक राताम्मे भएका छन् । सबैभन्दा बढी निर्जीवन बीमा समूह ७१.२७ अंकले घटेको छ ।
सेन्ट्रल फाइनान्सले ७ प्रतिशत नगद लाभांश दिने, सेयर मूल्य बढ्यो
काठमाडौं । सेन्ट्रल फाइनान्स लिमिटेडले सेयरधनीलाई ७ प्रतिशत नगद लाभांश दिने भएको छ । संस्थाको हालै सम्पन्न सञ्चालक समितिको बैठकले सेयरधनीलाई सो मात्रा अर्थात ५ करोड ७६ लाख रुपैयाँ बराबर नगद लाभांश दिने प्रस्ताव गरेको हो । सञ्चालक समितिको उक्त प्रस्तावलाई नेपाल राष्ट्र बैंकले स्वीकृत तथा संस्थाको आगामी वार्षिक साधारणसभाले पारित गर्नुपर्ने छ । संस्थाले गत आर्थिक वर्षको नाफाबाट हालको चुक्ता पुँजीको ७ प्रतिशत नगद लाभांश दिन लागेको हो । हाल संस्थाको चुक्ता पुँजी ८४ करोड ७३ लाख रुपैयाँ रहेको छ । संस्थाले नगद लाभांश घोषणा गरेपछि संस्थाको सेयर मूल्य बढेको छ । बिहीबार प्रतिकित्ता ११० रुपैयाँ रहेको फाइनान्सको सेयर मूल्य आइतबार बढेर ११७ रुपैयाँसम्म कारोबार भएको छ । अन्ततः आइतबार संस्थाको सेयर मूल्य अघिल्लो दिनको तुलनामा ४ रुपैयाँले बढेर प्रतिकित्ता ११४ रुपैयाँ पुगेको छ ।
८ प्रतिशत बोनसपछि कालिका लघुवित्तको सेयर मूल्य समायोजन
काठमाडौं । आइतबार कालिका लघुवित्त वित्तीय संस्थाको सेयर मूल्य समायोजन भएको छ । संस्थाको ८ प्रतिशत बोनसपछिको सेयरको मूल्य समायोजन भएको हो । मूल्य समायोजन पश्चात बैंकको सेयर मूल्य प्रतिकित्ता ९१२.०४ रुपैयाँ तोकिएको छ । जसको आधार मूल्य प्रतिकित्ता ९९४.०२ रुपैयाँ रहेको थियो ।
