प्रदेश नं २ मा शुक्रबारको एसइई परीक्षा पनि स्थगित, विज्ञान र सामाजिक विषयको प्रश्नपत्र बाहिरियो
काठमाडौँ । प्रदेश २ मा शुक्रबार हुने सामाजिक विषयको प्रश्नपत्र आउट भएसँगै सामाजिक विषयको परीक्षा स्थगित भएको छ । परीक्षा अगावै प्रश्नपत्र बाहिरिनु एकदमै दुःखद रहेको बताउँदै राष्ट्रिय परीक्षा बोर्डले परीक्षा स्थगित गर्ने निर्णय गरेको हो । यता, राष्ट्रिय परीक्षा बोर्डले एसइई परीक्षाअन्तर्गत विहीबारको अनिवार्य विज्ञान विषयको परीक्षा प्रदेश नम्बर २ मा स्थगित भएको थियो । यस विषयको प्रश्नपत्र परीक्षा आगाडि नै बाहिरिएकाले भन्दै बोर्डको बिहीबार बसेको बैठकले परीक्षा स्थगित गर्ने निर्णय गरेको हो । बोर्डले सूचना जारी गर्दै बिहीबार स्थगित भएको परीक्षा आगामी २२ गते सोही केन्द्रमा नै सञ्चालन हुने जनाएको छ । प्रश्नपत्र सार्वजनिक भएको विषयमा छानविन हुने पनि बोर्डले जनाएको छ । देशभर यही चैत १० गतेदेखि शुरु भएको परीक्षा २१ गतेसम्म चल्नेछ । बोर्डले सातै प्रदेशमा अनिवार्य विषयको फरकफरक प्रश्नपत्र बनाएको थियो ।
ब्रिज कोर्समा करियर काउन्सिलिङलाई प्राथमिकतामा राखेका छौं-सौरभ श्रेष्ठ
सौरभ श्रेष्ठ-सिनियर अप्रेसन म्यानेजर, अल्फा बिटा काठमाडौं । हामीले अल्फा बिटा सन् १९९२ बाट सुरु गरेका हौं । विगतमा ब्रिज कोर्स त्यति प्रचलनमा थिएन । त्यतिबेला विद्यार्थीलाई खाली समयको उपयोग गर्न मात्र कोर्सहरु सञ्चालन गरिन्थे । नेपालमा पहिलो पटक ब्रिज कोर्स हामीले सञ्चालनमा ल्याएका हौं । नेपाली परम्परा अनुसार विज्ञान संकाय पढ्ने व्यक्तिले मात्र ब्रिज कोर्स अध्ययन गर्ने परिपाटी रहेको थियो । अहिले व्यवस्थापन, नर्सिङ विषयमा विद्यार्थीहरुले पनि कोर्स अध्ययन गर्न थालेका छन् । कतिपय विद्यार्थीहरु सही विषय छनोट गर्न नजान्दा केहि समय एक संकाय पढ्ने र यसपछि अर्को संकायमा अध्ययन गर्ने गर्दछन् । यसले विद्यार्थीहरुको समय खेर गइरहेको हुन्छ । विद्यार्थीको जीवनमा १० वर्षको अध्ययनपछि एउटा निश्चित आकार लिने बेला भनेको ११ कक्षाको अध्ययन गर्ने बेला हो । एसइईलाई त फलामे ढोका पनि भनिन्छ । यसबाट बाहिर निस्किएपछि कसरी आफ्नो करियरलाई अघि बढाउने भन्ने विषयमा राम्ररी सोच्नु पर्दछ । कक्षा १० सम्मको अध्ययनलाई हामीले सामान्य अध्ययन मानिन्छ भने यसपछिको अध्ययनलाई विशिष्ठीकृत अध्ययन मानिन्छ । १० कक्षासम्म अध्ययन गर्दा विद्यार्थीहरुले एउटा धार बनाइसकेका हुन्छन् । तर, यो धारलाई पहिचान गर्नु प्रमुख चुनौति हो । एउटा विद्यार्थीको शैक्षिक भविश्य सफल हुनको लागि उसको रुचि, क्षमता, परिवारको आर्थिक अवस्था, सामाजिक अवस्था सबै कुराले प्रभाव पारेको हुन्छ । हाम्रो २८ वर्षको अनुभवले के देखाएको छ भने विगतको दिनमा अभिवावकहरु मेरो छोरा छोरीले यो नै पढ्नपर्छ भनेर दवाव दिने गर्दथे, तर आजको दिनमा अभिभावकहरु सकारात्मक रहेका छन् । बालबालिकाको भविश्यप्रति उनीहरु निकै सजग रहेका छन् । यस विषयमा खुलेर कुरा गर्न चाहन्छन् । हिजोका दिनमा राम्रो भविश्यको लागि विज्ञान संकाय नै पढ्नु पर्छ भन्ने थियो, तर आजको दिनमा यो कुरा इतिहास भैसकेको छ । प्राविधिक शिक्षाका नयाँनयाँ विषयहरु थपिइरहेका छन् । हामीले साइन्स, म्यानेजमेन्ट, नर्सिङ, ए लेभल लगायतका विषयहरुको लागि कोर्स तयार गरेका छौं । पढाई मात्र नभई अतिरिक्त खेल, म्युजिक, अडियो, भिडियो, रोर्बटिक लगायतका माध्यमहरुबाट पनि सिकाई प्रक्रिया सञ्चालन गरिरहेका छौं । हामीले २ प्रकारको ब्रिज कोर्सको तयारी गरेको छौं । विषयगत र वस्तुगत । सेन्टजेभियर, बुढानिलकण्ठ लगायत उत्कृष्ट कजेजमा पढ्न चाहनेको लागि इन्ट्रान्स परीक्षामा पास हुने तरिकाले अध्ययपन गराउने छौं । विशेष संकाय पढ्न चाहाने विद्यार्थीलाई संकाय कै पाठ्यक्रमलाई ध्यान दिएका छौं । अहिलेको अवस्थामा साइन्स पढ्नेले मात्र ब्रिज कोर्स अध्ययन गर्ने होइन, जुनकुनै संकायको लागि यो कोर्स आवश्यक छ । ताकि कुन विषय अध्ययन गरेर कस्तो उपलब्धी हासिल गर्ने अग्रिम जानकारी लिन सकुन् । विद्यार्थीको क्षमता र रुचिलाई पहिचान गरी राम्रो सुझाव र शिक्षा दिनु आजको आवश्यकता हो । हामीले विगत केहि वर्षदेखि नै यस कुरालाई प्राथमिकतामा राखेर काम गरिरहेका छौं । हामीले विद्यार्थीको सेल्फ डिस्कभरीलाई महत्व दिएका छौं । यसको लागी यहि चैत २४ गतेदेखि करिब २ हजार विद्यार्थीहरुलाई काउन्सिलिङ गर्ने तयारी गरेका छौं । हामी सबैभन्दा पहिले विद्यार्थीको आचरण परीक्षण गर्छौँ । त्यसपछि क्षमता र अन्य कुराहरुलाई ध्यान दिनेछौं । १० हप्ताको कोर्समा हामीले विद्यार्थीलाई विभिन्न समूहमा विभाजन गरेर अध्ययपन गराउने तयारी गरेका छौं । १० हप्ताको कोर्सको लागि १० हजार रुपैयाँ तोकेका छौं । यो हामीले दिने क्वालिटीको आधारमा निकै सस्तो हो । यस्तै जेहेन्दार विद्यार्थीलाई शत प्रतिशत छुट र किताब तथा नोटको व्यवस्था गरेका छौं । हामीसँग विद्यार्थीले सजिलै सिक्न सक्ने वातावरण र उच्च व्यवसायिक शिक्षकहरु रहेका छन् । जसले गर्दा विद्यार्थीलाई थप उर्जा मिल्ने छ । हरेक विद्यार्थीको एक उत्कृष्ट कलेजमा पढ्ने सपना रहेको हुन्छ । त्यसको लागि हामीले विशेष कोर्सको तयारी गरेका छौं । कुनै विद्यार्थीले कुन विषयमा कति प्रगति गर्न सक्छ भनेर हामी करियर काउन्सिल गर्छौ । करियर काउन्सिलिङ महत्वपूर्ण विषय हो । हामीले विशेषगरी विद्यार्थीहरुलाई सेल्फ डिस्कभरी गर्ने गरि मोटिभेट गरिरेका हुन्छौं । एउटा विद्यार्थीले लिएको ज्ञानको १० वर्षपछिको बजार भविश्य के हो । यो कुरामा हामीले ध्यान दिइरहेका छौं । ताकि विद्यार्थीले लिएको ज्ञान सिपले उच्च व्यवसायिक सफलता हात पार्न सकोस् । यो कुरा हामीले कोर्समा दिनेछौं ।
दस हजार अस्थायी शिक्षक बिदाइ गरिने, पाँच अर्ब २५ करोड रुपियाँ उपदान
भक्तपुर । स्थायी शिक्षकका लागि लिइएको लिखित परीक्षामा असफल भएका करिब १० हजार अस्थायी शिक्षकलाई उपदानसहित बिदाइ गरिने भएको छ । शिक्षा तथा मानव स्रोत विकास केन्द्र (साविकको शिक्षा विभाग)ले ती शिक्षकलाई उपदान दिन पाँच अर्ब २५ करोड रुपियाँ राखेको छ । केन्द्रले मङ्गलबार आयोजना गरेको पत्रकार सम्मेलनमा केन्द्रका महानिर्देशक बाबुराम पौडेलले त्यस्ता शिक्षकहरू तत्कालै कक्षाकोठाबाट बाहिरिँदा समस्या पर्ने भएकाले आगामी असार मसान्तसम्म काममा लगाउन सकिने गरी व्यवस्था गर्न शिक्षा मन्त्रालयसँग आग्रह गरिएको जानकारी दिए । सरकारले केही समयअघि गठन गरेको कार्यदलले देशभरिका सामुदायिक विद्यालयमा ४७ हजार १०२ शिक्षक अपुग भएको तथ्याङ्कसहितको प्रतिवेदन मन्त्रिपरिषद्मा बुझाएको थियो । शिक्षा नियमावलीले कायम गरेको शिक्षक अनुपातअनुसार अझै ३४ हजार ४०८ शिक्षक अपुग छन् । उनले मन्त्रिपरिषद्ले निर्णय गरिदिए आफूहरूले शिक्षक पदस्थापन र दरबन्दी मिलान तत्काल अगाडि बढाउने बताए । कर्मचारी समायोजनमा ढिलाइ हुँदा काममा निकै समस्या परेको बताउँदैउहाँले शिक्षामा गरिएको लगानी र सम्पन्न भएका कार्यको विवरण सङ्कलन गर्न समस्या भएको गुनासो गरे । विद्यालय क्षेत्र विकास कार्यक्रम (एसएसडीपी) अन्तर्गत विदेशी दाताले दिएको रकम खर्चका बारेमा नियमितरूपमा विवरण केन्द्रमा पठाउनुपर्ने र केन्द्रले दातृ निकायलाई दिनुपर्ने वाध्यात्मक व्यवस्था छ । यसैगरी, सामुदायिक विद्यालयको सुधारका लागि सार्वजनिक शिक्षा रूपान्तरण अभियान नामक राष्ट्रिय सम्मेलनको आयोजना गरिने भएको छ । कमजोर विद्यालयका समस्या र राम्रो गरेका विद्यालयको अनुभव सुन्न चैतको अन्तिम सातामा सम्मेलनको आयोजना गर्न लागिएको छ । केन्द्रका उपमहानिर्देशक चुडामणि पौडेलले आगामी वैशाख १ गतेबाट सुरु हुने विद्यार्थी अभियानअन्तर्गत भर्ना कम भएका १५ जिल्ला र १३६ पालिकामा सघन कार्यक्रम सञ्चालन गरिने बताए । उनले बर्दियाको बाँसगढी नगरपालिकाले जीवनमा पहिलोपटक विद्यालय भर्ना हुन आएका सबै बालबालिकालाई पोशाक निःशुल्कमा उपलब्ध गराउनुका साथै सबैभन्दा बढी विद्यार्थी भर्ना गराउने विद्यालयलाई पोशाकको व्यवस्था गर्ने निर्णय गरेको बताए । उपमहानिर्देशक दीपक शर्माले केन्द्रले आयोजना गर्ने शैक्षिक सम्मेलनमा राम्रा काम गरिरहेका र राम्रो गर्न नसकेका विद्यालयहरूको अनुभव साटासाट गर्दा त्यसबाट शिक्षामा सुधारको प्रयास हुने बताए । आजको गोरखापत्र दैनिकमा समाचार छ ।
