काठमाडौं विश्वविद्यालयको उपकुलपतिमा प्राडा भोला थापा नियुक्त
काठमाडौं । काठमाडौं विश्वविद्यालयको उपकुलपतिमा प्राडा भोला थापा नियुक्त भएका छन् । विश्वविद्यालयका कुलपति एवं प्रधानमन्त्री केपी शर्मा ओलीले आज उहालाई उपकुलपति नियुक्त गरेका हुन् । शिक्षामन्त्री एवं विश्वविद्यालयका सहकुलपति कृष्णगोपाल श्रेष्ठको अध्यक्षतामा गठित तीन सदस्यीय सर्च कमिटीले गरेको सिफारिसको आधारमा नलाई उपकुलपति नियुक्त गरेको हो ।उपकुलपति छनोट गर्न गठित समितिले डा. रामकण्ठ मकाजू, प्रा. डा. भोला थापा र प्रा. डा. बालचन्द्र लुइँटेलको नाम सिफारिस गरेको थियो । सर्च कमिटीमा मन्त्री श्रेष्ठ, पूर्वसभामुख दमननाथ ढुंगाना र पूर्वउपकुलपति सुरेशराज शर्मा रहेका थिए । काठमाडौं विश्वविद्यालय स्थापना भएदेखि सो विश्वविद्यालयमा प्रध्यापन पेशा गर्दै आएका प्राडा थापाले सो विश्वविद्यालयमा २७ वर्ष काम गरेका छन् । नवनियुक्त थापा ९ वर्ष डीन र ५ वर्ष रजिष्ट्रार भएका थिए । पेशामा मेकानिकल इन्जिनियर उपकुलपति प्राडा थापाले नर्वेमा नेपालको हाइड्रोपावर डेभलपमेन्टमा विद्यावारिधी गरेका हुन् । थापाले विश्वविद्यालयको शैक्षिक उन्नयनमा आफु लागि पर्ने र हाल देखिएका समस्या समाधान गर्न आफु हर सम्भव लागि पर्ने बताउदै त्यसको लागि पुर्व उपकुलपति, प्राध्यापक संघ लगायतसंग सहकार्य गरी अघि बढ्ने बताए । मन्त्री श्रेष्ठको अध्यक्षतामा गठित समितिमा ४४ जनाले उपकुलपति हुन आवेदन दिएका थिए ।
माघ १५ बाट सिमकोटका विद्यालय सञ्चालनमा आउने
सिमकाेट । कोरोना महामारीले बन्द रहेका सिमकोट गाउँपालिकाभित्रका भित्रका विद्यालय यही माघ १५ गतेबाट सञ्चालनमा आउने भएको छ । आइतबार बसेको कार्यपालिकाको शिक्षा समितिको बैठकले विद्यालय सञ्चालन गर्ने निर्णय गरेको हो । पालिकामा सामुदायिक २३ र निजी पाँच गरी २८ विद्यालय छन् । ती सबै विद्यालयले सामाजिक दूरी कायम गरी स्वास्थ्य सुरक्षा मापदण्डको पालना गरी सञ्चालन गर्ने निर्णय भएको सिमकोट गाउँपालिका निमित्त प्रमुख प्रशासकीय अधिकृत उजिर रोकायाले जानकारी दिए । गाउँपालिकाले निजी तथा सामुदायिक ती विद्यालयका लागि स्यानिटाइजर उपलब्ध गराउने भएको छ भने मास्क स्वयं विद्यार्थीले आफ्नै खर्चमा लगाएर विद्यालय उपस्थित हुनुपर्ने जनाएको छ । यसभन्दा अगाडि गाउँपालिकाले गत कात्तिक १९ गतेबाट विद्यालय सञ्चालन गरेर एक हप्तासम्म पठनपाठन गरेको भए पनि उत्तरी नाम्खा गाउँपालिकाको महाबौद्ध माध्यमिक विद्यालय याल्वाङमा अध्ययनरत विद्यार्थीमा कोरोना देखिएपछि बन्द गरिएको थियो । जिल्लामाा फागुन पहिलो सातामा नयाँ शैक्षिक सत्र शुरु भई मङ्सिरमा वार्षिक परीक्षा भएर हिउँदे तीन महिना बिदा हुने गर्दथ्यो । विद्यार्थीको पढाइमा बाधा पुगेपछि १५ दिन अगाडि नै विद्यालय सञ्चालन गरिने भएको उनले जानकारी दिए । यस्तै जिल्लाका अन्य गाउँपालिकाका विद्यालय कोरोना त्रासले बन्द रहेका छन् । जिल्लामा हालसम्म ९१ मा कोरोना सङ्क्रमण देखिएको थियो ती मध्ये ९० निको भएर घर फिर्ता भइसकेका जिल्ला अस्पतालका सूचना अधिकारी भक्ति फडेराले जानकारी दिए । रासस
इक्यानकाे चारदिने मेला सम्पन्नः अनलाइनबाट ४५ हजार सहभागी
काठमाडौं । नेपाल शैक्षिक परामर्श सङ्घ (इक्यान)ले आयोजना गरेको १४औं इक्यान मेलामा ४५ हजार विद्यार्थी तथा अभिभावक भर्चुअल रुपमा सहभागी भएका छन् । कोभिड-१९ को महामारीका कारण यस वर्षको मेला अनलाइन माध्यमबाट गरिएको उक्त चार दिने मेलामा साे मात्राकाे विद्यार्थी तथा अभिभावक सहभागी भएका हुन् । इक्यानका अध्यक्ष प्रकाश पाण्डेले कोभिडको समयमा उच्च शिक्षाबारे विद्यार्थी तथा अभिभावकमा उत्पन्न कौतुलहता मेटाउन मेला सफल भएको बताए । उनका अनुसार मेलामा उल्लेख्य सहभागिताले भर्चुअल माध्यम पनि मेलाका लागि प्रभावकारी विकल्प बन्न सफल भएको छ । ‘कोभिडका कारण यस क्षेत्रमा ठूलो असर परेको छ । तर पनि हाम्रा अगाडि अनलाइनको माध्यमबाट मेला आयोजना हुनु र विद्यार्थीहरुले पनि अनलाइनबाट कक्षा लिन सक्नछन भन्ने सन्देश पनि दिएको छ । यस अर्थमा कोभिडले निम्ताएको असरसँगै केही सकारात्मक पक्ष पनि देखिएको छ,’ उनले भने । मेलामा १०० भन्दा बढी इक्यानका सदस्य परामर्श दातृ संस्था, विदेशी विश्वविद्यालय तथा कलेजका प्रतिनिधिहरु सहभागी थिए । मेलामा विद्यार्थी तथा उनीहरुका अभिभावकहरुले उच्च शिक्षाका लागि गन्तव्य विभिन्न देशहरुले कोरोनापछि लिएको नीतिका विषयमा जानकारी प्राप्त गरेका थिए । साथै, मेलामा विद्यार्थी तथा अभिभावकले विभिन्न देश, त्यहाँका विश्वविद्यालय तथा कलेजका साथै कोर्स, त्यसका लागि लाग्ने शुल्क, छात्रवृत्ति, भिसा प्रोसेसिङ्ग लगायतका विभिन्न जानकारी लिएका थिए । ईक्यानका महासचिव दिपक राज भुसालका अनुसार मेला विश्वव्यापीरुपमा फैलिएको कोरोना महामारीपछिको अवस्थाबारे समेत जानकारी गराइएको थियो । ‘कोरोना महामारीपछिको अवस्थामा अहिले एनओसी खुलिसकेको छ, विभिन्न देशका भिसा कार्यालयहरु पनि खुलिसकेको अवस्था छ । र, विद्यार्थीहरुले कार्यालयमै आएर परामर्श लिन सक्ने अवस्था सिर्जना भएको छ । मेलाले यी लगायत यावत विषयमा स्पष्ट पार्न प्रभावकारी भूमिका खेलेको छ,’ भुसालले भने । मेला संयोजक बासुदेव दाहालका अनुसार शैक्षिक परामर्श क्षेत्रलाई रिभाइभ गराउनका लागि सबैभन्दा जेठो र ठूलो संघ इक्यानले आफ्नो जिम्मेवारी समेत पूरा गरेको छ । साथै इक्यानका सदस्य संस्थाहरुलाई फेरि परामर्श क्षेत्रलाई सामान्य अवस्थामा सञ्चालन हुने अवस्था आएको जानकारी गराउन सफल भएको उनले बताए । यसपटकको मेलाको सबैभन्दा राम्रो पक्ष विद्यार्थी र अभिभावकले आफू बसेकै ठाउँबाट परामर्श लिन सक्नु हो । कोरोना महामारीका कारण भौतिक रुपमा उपस्थित हुन नसक्नेहरुका लागि मोबाइल, ल्यापटप, कम्प्युटरलगायतका डिभाइसबाट लगइन गरेर जानकारी लिन सक्नु रहेको इक्यानको भनाइ छ । इक्यानका अनुसार यसपटकको मेलामा देशभर सञ्चालनमा रहेको इक्यानका सदस्य संस्था सहभागी थिए । मेलामा विद्यार्थीहरुले आफूले रोजेको ठाउँ अनुसारका संस्थाका बारेमा जानकारी लिन पाएका थिए । मेलाको व्यवस्थापन वान अप प्रालिले गरेको थियो । कम्पनीले मेलाका लागि डेडिकेटड वेवसाइट बनाएर विद्यार्थीहरुलाई परामर्श लिनका लागि सहज बनाउन महत्वपूर्ण भूमिका निर्वाह समेत गर्न सफल भएको छ । शैक्षिक मेलाको प्रिजेन्टरमा ब्रिटिस काउन्सिल थियो भने इन एसोसिएसन विथमा वेद इन्टरनेशनल एजुकेशन कन्सलटेन्सी, अर्बिट इन्टरनेशनल एजुकेशन, क्विन्सफोर्ड कलेज, ग्रेस इन्टरनेशनल एजुकेशन, सक्सेस अब्रोड स्टडी, नेप्कोम्स एजुकेशन थिए ।
