सामुदायिक विद्यालयका प्राचार्यले थप १ हजार रुपैयाँ तलब पाउने
फाइल फाेटाे काठमाडौं । काठमाडौं महानगरले सामुदायिक विद्यालयका प्रधानाध्यापकलाई थप एक हजार रुपैयाँ तलब उपलब्ध गराउने भएको छ । बिहीबार महानगरको आगामी आर्थिक वर्षको नीति तथा कार्यक्रम सार्वजनिक गर्दै महानगरका मेयर विद्यासुन्दर शाक्यले नेपाल सरकारले दिएको सेवासुविधामा महानगरले मासिक रुपमा उक्त रकम थप गर्ने जनाएका हुन । ‘महानगरपालिका क्षेत्रभित्रका सबै विद्यालयहरूमा पूर्व प्राथमिक तहदेखि कक्षा ८ सम्म स्थानीय विषयको रूपमा नेपाल भाषाको पाठ्यक्रम अनुरूप पठनपाठन कार्यलाई निरन्तरता दिइनेछ । नेपाल भाषाको विकास र प्रवद्र्धनका लागि नेपाल भाषा प्रवद्र्धन समितिमार्फत कार्यक्रम सञ्चालन गर्ने व्यवस्था मिलाइने छ,’ नीति तथा कार्यक्रममा भनिएको छ, ‘सामुदायिक विद्यालयका प्रधानाध्यापकहरुलाई जिम्मेवार एवं थप उत्प्रेरित गराउन नेपाल सरकारले प्रदान गर्दै आएको मासिक सुविधाको अतिरिक्त प्रोत्साहन स्वरुप मासिक रु. १००० उपलब्ध गरिनेछ । ’ महानगरपालिकाले आफ्नो नीति तथा कार्यक्रममा महानगरपालिका क्षेत्रभित्रका सबै विद्यालयहरूको गुणस्तर सुधार गरी समयानुकुल बनाउन शिक्षाविद् तथा संस्कृतिविद् सम्मिलित एकीकृत शिक्षा व्यवस्थापन योजना तर्जुमा समिति गठन गरी शिक्षा योजना तर्जुमा गर्ने नीति लिएको छ । त्यसैगरी महानगरपालिकाले आफ्नो नीति तथा कार्यक्रममा ‘एक वडा एक नमूना विद्यालय कार्यक्रम’ अघि सारेको छ । जस अन्तर्गत छनौट भएका ३२ नमुना विद्यालयहरूलाई नमुना सिकाई केन्द्र र तालिम हवका रूपमा विकास गरिने उल्लेख छ । ‘महानगर क्षेत्रभित्र प्रत्येक वडामा कम्तिमा एउटा सुविधा सम्पन्न एवं उच्च प्रविधियुक्त पुस्तकालयको स्थापना गरी पुस्तकालयको प्रयोगमा सबैको पहुंच सुनिश्चित गरिनेछ,’ नीतिमा भनिएको छ, ‘महानगर भित्रका प्रत्येक विद्यालयमा कक्षा ४ देखि नैतिक शिक्षालाई समावेश गरी पठनपाठन प्रारम्भ गरिनेछ ।’
कर्णाली प्रदेश सरकारले सहिद परिवारलाई स्नातक तहसम्म नि:शुल्क पठाउने
काठमाडौं । कर्णाली प्रदेश सरकारले जनयुद्ध र प्रदेश प्राप्तिको आन्दोलनमा सहिद भएका परिवारका सन्तानलाई स्नातक तहसम्म निःशुल्क पढाउने भएको छ । प्रदेश सरकारको आगामी आव ०७८/७९ को बजेट प्रस्तुत गर्दै आर्थिक मामिला तथा योजना मन्त्री गोपाल शर्माले निःशुल्क अध्ययनका लागि बजेट विनियोजन गरिएको बताए । यस्तै प्रदेश सरकारले विद्यालय क्षेत्रको गुणस्तरीय विकासका लागि एक स्थानीय तहमा एक नमुना विद्यालय सञ्चालन गर्ने भएको छ । जसका लागि ३९ करोड ५० लाख बजेट विनियोजन गरिएको मन्त्री शर्माले बताए ।
कोभिडले आमाबाबु गुमाएका बालबालिकाले मासिक ३ हजार भत्ता पाउने
काठमाडौं । कोभिड संक्रमणबाट आमाबाबु गुमाएका बागमती प्रदेशभित्रका बालबालिकाले प्रदेश सरकारबाट मासिक भत्ता पाउने भएका छन् । आर्थिक मामिला तथा योजना मन्त्री कैलाश ढुंगेलले आगामी आर्थिक वर्षको बजेट सार्वजनिक गर्दै कोभिडका कारणले आमाबाबु दुबै गुमाएका बालबालिकाको पालन पोषण र शिक्षाको लागि मासिक ३ हजार रुपैयाँ भत्ता दिने जानकारी दिए । यस्तै, अन्य कुनै पनि कारणले आमाबाबु दुबै गुमाएका बालबालिकाले मासिक २ हजार रुपैयाँका दरले सरकारबाट भत्ता पाउने भएका छन् । यस्तै, बागमती प्रदेश सरकारले सांसदको लागि प्रदान गर्दै आएको प्रदेश पूर्वाधार विकास कार्यक्रम (प्रदेश सांसद विकास कोष) खारेज गरिदिएको छ । सो कार्यक्रम खारेज गरी कोभिड लगायत संक्रामक रोग नियन्त्रण र रोकथामको लागि स्वास्थ्य पूर्वाधार विकासमा लगानी गर्ने व्यवस्था मिलाइएको मन्त्री ढुंगेलले जानकारी दिए । यस्तो कार्यक्रमका लागि बागमती प्रदेशले २ अर्ब ४२ करोड रुपैयाँ बजेट विनियोजन गरेको छ ।
