सानिमा जनरल इन्स्योरेन्सलाई मर्जर तथा प्राप्तिको लागि बाटो खुला
काठमाडौं । सानिमा जनरल इन्स्योरेन्सलाई मर्जर तथा प्राप्तिको लागि बाटो खुला भएको छ । असार १५ गते सम्पन्न इन्स्योरेन्सको विशेष साधारण सभाले कम्पनीलाई मर्जर तथा प्राप्तिको लागि सम्पूर्ण अख्तियारी दिएसँगै इन्स्योरेन्सलाई बाटो खुला भएको हो । इन्स्योरेन्सको विशेष साधारण सभा असार १५ गते काठमाडौंको धुम्वाराहीस्थित धुम्रबराह पार्टी प्यालेसमा सम्पन्न भएको हो । जसको अध्यक्षता इन्स्योरेन्सका अध्यक्ष खेमराज लामिछानेले गरेका हुन् । उक्त सभाले कम्पनीले भविष्यमा कुनै निर्जीवन बीमा कम्पनीसँग एक आपसमा गाभ्ने/गाभिने तथा प्राप्ति गर्ने सम्बन्धी निर्णय गर्न तथा तत् सम्बन्धी समझदारी पत्रमा हस्ताक्षर गर्न, चल अचल सम्पत्ति र दायित्व मुल्याङ्कन (डीडीए) गर्नको लागि मान्यता प्राप्त मुल्याङ्कनकर्ता नियुक्त गर्न, निजको पारिश्रमिक तोक्न लगायतका मर्जर सम्बन्धी सम्पूर्ण अन्य आवश्यक प्रक्रिया पूरा गर्न संचालक समितिलाई अख्तियारी प्रदान गर्ने सम्बन्धी प्रस्ताव सर्वसम्मत रुपमा पारित गरेको छ ।
सरकारकै पैसाबाट नागरिकको जीवन तथा सम्पत्तिको बीमा हुने
काठमाडौं । बीमा समितिका अध्यक्ष सूर्यप्रसाद सिलवालले सरकारले विपद्का समयका लागि छुट्याएको रकमबाट नागरिकको जीवन तथा सम्पत्तिको बीमा गर्न सकिने बताएका छन् । असार १५ गते लुम्बिनी प्रदेश सरकारसँगको अन्तरक्रिया कार्यक्रममा बोल्दै उनले सो बताएका हुन् साथै, त्यसरी गरिएको बीमाबाट नै विपद्का समयमा हुने क्षतिको क्षतिपूर्ति हुने उनले जानकारी दिए । अध्यक्ष सिलवालले प्रदेश सरकारले नागरिकका साथै सरकारी सम्पत्तिको बीमा गराउन पहल गर्नुपर्ने उल्लेख गर्दै बीमालाई सेवा प्रवाहसँग जोडेर पनि बीमाको पहुँच विस्तार गर्न सकिने बताए । कार्यक्रममा लुम्बिनी प्रदेशका मुख्यमन्त्री कुलप्रसाद केसीले प्रदेश सरकारले बीमा सम्बन्धी नीतिगत व्यवस्थाका साथ धेरै कार्यक्रमहरु ल्याएको र अब ती कार्यक्रमहरुको कार्यान्वयनमा जोड दिने बताए । मुख्यमन्त्री केसीले बीमा कम्पनीहरुबाट बीमा दाबी भुक्तानी नभएको भन्ने धेरै गुनासाहरु आउने गरेको उल्लेख गर्दै समयमै सहजरुपमा बीमा दावी पाउने व्यवस्था गर्न र बीमा कम्पनीहरुमा सुशासन कायम गर्न आग्रह गरेका छन् । उनले बीमाको दायरा विस्तारका लागि बीमा सम्बन्धी जनचेतना अभिवृद्धिमा जोड दिन र बीमा समितिको प्रदेश कार्यालय विस्तार गर्न पनि आग्रह गरेका छन् । कार्यक्रममा बीमा समितिका निर्देशक सुशीलदेव सुवेदीले बीमा सम्बन्धी समग्र विषयवस्तु समेटिएको प्रस्तुती गरेका थिए । कार्यक्रममा गण्डकी प्रदेशका विभिन्न मन्त्रालयका मन्त्री, मन्त्रिपरिषद् तथा मुख्यमन्त्रीको कार्यालयका प्रमुख सचिव, विभिन्न प्रदेश मन्त्रालयका सचिव, बीमा समितिका कार्यकारी निर्देशक राजुरमण पौडेल, सगरमाथा इन्सुरेन्स कं.लि. का प्रमुख कार्यकारी अधिकृत, बीमा समितिका सहायक निर्देशक केदारनाथ भट्ट, विभिन्न बीमा कम्पनीका प्रदेशस्थित शाखा कार्यालयका प्रमुखहरु लगायतको उपस्थिति रहेको थियो ।
आर्थिक मन्दीबीच २५ प्रतिशतले बढ्दै बीमा बिजनेश
काठमाडौं । पछिल्लो समय नेपालको आर्थिक अवस्था खस्कँदो अवस्थामा छ । अर्थतन्त्रका सूचकहरु जस्तै विनिमय सञ्चिति तथा मुद्रास्फितीमा दबाब छ । बजारमा तरलताको दबाब छ । राष्ट्र बैंकका गर्भनर महाप्रसाद अधिकारीले पनि अहिले नेपालको अर्थतन्त्र संकटमा रहेको धारणा व्यक्त गर्दै आएका छन् । जसको सामना गर्न अर्थतन्त्रका लागि जिम्मेवार सबै पक्षहरु आ-आफ्ना दायित्वमा इमान्दार बन्न आवश्यक रहेको उनको भनाई छ । अर्थतन्त्रको ऐना मानिने सेयर बजार निरन्तर घट्दो छ । बैंकहरुसँग लगानीयोग्य रकम छैन । आयात उल्लेख्य रुपमा बढ्दो छ । विदेशी मुद्राको सञ्चिती भने घट्दो क्रममा छ । यससँगै आयात बराबरको विदेशी मुद्रा ल्याउन नसके नेपाल पनि श्रीलंकाकै अवस्थामा पुग्न सक्ने समेत गर्भनर अधिकारीले सूचित गराइसकेका छन् । तर यता बीमाको व्यवसाय भने फस्टाउँदै गएको छ । यो वर्ष गत वर्षकोभन्दा बढी बिजनेश भइरहेको जीवन तथा निर्जीवन बीमा कम्पनीका प्रमुख कार्यकारीहरु बताउँछन् । र, चालु आर्थिक वर्षको अन्त्यमा कम्पनीहरुको व्यवसाय औषतमा २० देखि २५ प्रतिशतसम्म बढ्ने उनीहरुको अनुमान छ । निर्जीवन बीमा व्यवसाय गर्दै आएको सगरमाथा इन्स्योरेन्सले आर्थिक वर्ष २०७७/७८ को असार मसान्तसम्ममा २ अर्ब ६१ करोड रुपैयाँ बराबरको बीमाशुल्क आर्जन गरेको थियो । जसको तुलनामा अहिले चालु आर्थिक वर्ष २०७८/७९ मा कम्पनीको बिजनेस २० प्रतिशतले ग्रोथ भइसकेको सीईओ चंकी क्षेत्री बताउँछन् । ‘बिजनेस राम्रै छ, गत वर्षको तुलनामा २० प्रतिशत ग्रोथ छ,’ सीईओ चंकी क्षेत्रीले विकासन्युजसँग भने । नेपाल इन्स्योरेन्सका नायब प्रमुख कार्यकारी अधिकृत ईश्वर पोखरेल पनि कम्पनीको व्यवसाय बढ्दो क्रममा रहेको बताउँछन् । ‘बिजनेशमा पोहोरको भन्दा ग्रोथ नै छ, सम्भवतः यो वर्ष २५ प्रतिशतले बढ्ने देखिन्छ’ उनले भने । डिसीईओ पोखरेलका अनुसार २०७८ असारमा १ अर्ब २७ करोड रुपैयाँ रहेको नेपाल इन्स्योरेन्सको बीमाशुल्क हालसम्ममा बढेर १ अर्ब ४५ करोड रुपैयाँ पुगिसकेको छ । यता जीवन बीमा व्यवसाय गर्दै आएको महालक्ष्मी लाइफ इन्स्योरेन्सको हकमा पनि कम्पनीको बिजनेस राम्रो रहेको र खासै चिन्ता नभएको सीईओ रमेश कुमार भट्टराई बताउँछन् । गत आर्थिक वर्षमा इन्स्योरेन्सको खुद बीमाशुल्क १ अर्ब २३ करोड रुपैयाँ थियो भने कूल बीमाशुल्क २ अर्ब ६१ करोड रुपैयाँ थियो । तर चालु वर्षमा कम्पनीहरुको रिपोर्ट त्यत्ति उत्साहजनक नहुने पनि सीईओ भट्टराईले बताए । मुलुकको आर्थिक अवस्था खस्कँदै गएकोले पनि त्यसको असर कम्पनीहरुमा पनि पर्ने उनको भनाई छ । त्यसैले अहिले कम्पनीहरुले विकास सोच्ने भन्दा पनि कसरी सस्टेन हुने भन्ने तिर लाग्नुपर्ने उनले जनाए । बीमा समितिको तथ्यांकअनुसार जीवन बीमा कम्पनीले आर्थिक वर्ष २०७७/७८मा कूल १ खर्ब २१ अर्ब १२ करोड रुपैयाँ बराबरको बीमाशुल्क आर्जन गरेका थिए । त्यस्तै, निर्जीवन बीमा कम्पनीहरुले कूल ३१ अर्ब ८१ करोड रुपैयाँ बराबरको बीमाशुल्क अर्थात बिजनेस गरेका समितिको तथ्यांकले देखाउँछ ।
