नेकोले सर्वाधिक कमाउँदा सानिमा जनरलले ९८% ले बढायो नाफा, बीमा कोषमा जनरल एग्रेसिभ
काठमाडौं । गत वर्ष १६ वटा निर्जीवन बीमा कम्पनीले कूल ४ अर्ब ९ करोड रुपैयाँ बढी खुद नाफा आर्जन गरेका छन् । आर्थिक वर्ष २०७८/७९ को चौथौ त्रैमासको अपरिष्कृत वित्तीय विवरण अनुसार १६ वटा कम्पनीले सो मात्राको नाफा कमाउन सफल भएका हुन् । जुन अघिल्लो वर्षको तुलनामा ८.०६ प्रतिशतले बढी हो । यी कम्पनीले अघिल्लो आवमा ३ अर्ब ७८ करोड रुपैयाँ बराबरको नाफा आर्जन गरेका थिए । समीक्षा अवधिमा ४ वटा कम्पनीको नाफा घटेको छ । जसमा सगरमाथाको ८.७१, प्रिमियरको ३.५४, लुम्बिनी जनरलको २३.२२ र हिमालयन एभरेष्टको ५९.६१ प्रतिशतले नाफा घटेको छ । बाँकी सबै कम्पनीको अघिल्लो आवको तुलनामा नाफा बढेको देखिन्छ । सबैभन्दा बढी नाफा कमाउनेमा नेको इन्स्योरेन्स अगाडि देखिएको छ । नेकोले एक वर्षको अवधिमा ५५ करोड १ लाख रुपैयाँ बराबरको नाफा कमाएको छ । अघिल्लो आवमा ५० करोड ४५ लाख रुपैयाँ बराबरको नाफा कमाएको कम्पनीले एक वर्षमा ९.०३ प्रतिशतले वृद्धि गरेको छ । त्यस्तै, बढी नाफा कमाउनेको दोश्रो स्थानमा राष्ट्रिय बीमा कम्पनी देखिएको छ । कम्पनीले अघिल्लो आवको तुलनामा ३१.४१ प्रतिशतले नाफा बढाएर ४७ करोड ३४ लाख रुपैयाँ आर्जन गरेको छ । त्यस्तै, तेश्रोमा सगरमाथा इन्स्योरेन्स छ । समीक्षा अवधिमा कम्पनीले ४० करोड २२ लाख रुपैयाँ बराबरको नाफा कमाएको छ । रकमको आधारमा तेश्रोमा रहेको सगरमाथा अघिल्लो आवको तुलनामा ८.७१ प्रतिशतले घटी हो । अधिकांश स्थानमा शीर्ष स्थानमा हुने शिखर इन्स्योरेन्स नाफाको आधारमा चौथो स्थानमा देखिएको छ । अघिल्लो आवको तुलनामा शिखरको नाफा २८.९३ प्रतिशत बढेर ४० करोड १४ लाख रुपैयाँ पुगेको छ । प्रतिशतको आधारमा हेर्दा सबैभन्दा बढी एग्रेसिभ सानिमा जनरल देखिएको छ । सानिमा जनरलले एक वर्षको अवधिमा ९८.६४ प्रतिशत बढी नाफा कमाएको छ । अघिल्लो आवमा ७ करोड २९ लाख रुपैयाँ मात्रै नाफा आर्जन गरेको इन्स्योरेन्सले गत आवमा १४ करोड ४९ लाख रुपैयाँ कमाएको छ । कुनको कति ? (सूचीसहित) यससँगै अघिल्लो आवमा सबैभन्दा कम नाफा कमाउनेको सूचीमा परेको सानिमा जनरल अहिले १६ कम्पनीमध्ये ४ वटालाई उछिन्न सफल भएको देखिन्छ । १६ कम्पनीमध्ये सबैभन्दा कम नाफा हिमालयन एभरेष्ट इन्स्योरेन्सको छ । बीमा क्षेत्रमै पहिलो मर्जरमा गई एकीकृत कारोबार गरेको यो कम्पनीले गत असारसम्ममा ७ करोड ५ लाख रुपैयाँ बराबरको नाफा कमाएको छ । बीमा कोष बढाउन जनरल इन्स्योरेन्स एग्रेशिभ समीक्षा अवधिमा १६ निर्जीवन बीमा कम्पनीको बीमा कोषको आकार १४ अर्ब २ करोड रुपैयाँ बढी छ । जुन अघिल्लो आवको तुलनामा बढी हो । अघिल्लो आवमा यी १६ कम्पनीको बीमा कोषको आकार कूल ११ अर्ब ९१ करोड रुपैयाँ थियो । बीमाकोषको आधारमा सबैभन्दा बलियो सरकारी कम्पनी अर्थातर राष्ट्रिय बीमा कम्पनी देखिएको छ । कम्पनीले उक्त कोषको आकार ९.७४ प्रतिशतले बढाई २ अर्ब ६६ करोड रुपैयाँ बढी पुर्याएको छ । त्यस्तै, शिखरको १ अर्ब ४१ करोड, नेकोको १ अर्ब ३७ करोड र सगरमाथाको १ अर्ब २२ करोड रुपैयाँ बढी बीमा कोषमा सञ्चित छ । जुन प्रतिशतको आधारमा क्रमशः १६.५८, २५.०२ र १७.८९ प्रतिशतले बढी हो । कुनको कति ? (सूचीसहित) त्यसैगरी, एग्रेसिभ रुपमा कोषको आकार बढाउनेमा जनरल इन्योरेन्स देखिएको छ । कम्पनीले अघिल्लो आवको तुलनामा १४२.५७ प्रतिशतले बीमा कोष बढाई २४ करोड ६५ लाख रुपैयाँ सञ्चित गर्न सफल भएको छ । अघिल्लो आवमा कम्पनीको उक्त कोषमा १० करोड १६ लाख रुपैयाँ सञ्चित थियो । त्यस्तै, सानिमा जनरलको बीमा कोषमा सबैभन्दा थोरै रकम छ । २०७९ असारसम्म कम्पनीको कोषमा १६ करोड ४३ लाख रुपैयाँ सञ्चित छ । जुन २०७८ असारसम्मको तुलनामा ७७.१८ प्रतिशतले बढी हो । सो अवधिमा कम्पनीको कोषको आकार ९ करोड २७ लाख रुपैयाँ थियो ।
यूनाइटेड इन्स्योरेन्सको वित्तीय सूचक सन्तोषजनक, व्यवसायसँगै ३५% ले बढायो नाफा
काठमाडौं । यूनाइटेड इन्स्योरेन्स कम्पनी नेपालको गत आर्थिक वर्षको वित्तीय स्थिति सन्तोषजनक देखिएको छ । कम्पनीले प्रकाशित गरेको आर्थिक वर्ष २०७८/७९ को चौथो त्रैमासिक वित्तीय विवरण अनुसार अधिकांश सूचकमा सुधार देखिएको हो । गत आवमा कम्पनीले १ अर्ब ५३ करोड रुपैयाँ बराबरको बीमाशुल्क आर्जन गरेको छ । जुन अघिल्लो आवको तुलनामा ४१.८१ प्रतिशतले बढी हो । जुन आर्थिक वर्ष २०७७/७८ मा १ अर्ब १० करोड रुपैयाँ थियो । बीमाशुल्क निरन्तर बढ्दै गएकोले कम्पनीले आगामी दिनमा नयाँ सेवा सुविधा शुरु गरी कम्पनीलाई थप वित्तीय रुपमा सबल बनाउने योजना बनाएको छ । त्यस्तै, खुद नाफा पनि ३२.५९ प्रतिशतले बढेर १३ करोड ९६ लाख रुपैयाँ पुगेको छ । जुन अघिल्लो आवमा १० करोड ५२ लाख रुपैयाँ थियो । हाल इन्स्योरेन्सको प्रतिसेयर आम्दानी १३.५८ रुपैयाँ, मूल्य आम्दानी अनुपात २५.७७, प्रतिसेयर नेटवर्थ १६०.४० रुपैयाँ र प्रतिसेयर कूल सम्पत्तिको मूल्य ३०३.०१ रुपैयाँ छ । त्यस्तै, बीमा कोषको आकार पनि बढेको छ । अघिल्लो आवमा ३५ करोड ४ लाख रुपैयाँ रहेको कम्पनीको उक्त कोषमा गत आवमा ४२ करोड २ लाख रुपैयाँ सञ्चित छ । १ अर्ब २ करोड रुपैयाँ चुक्ता पुँजी रहेको इन्स्योरेन्सको जगेडा कोष बढेर १९ करोड ३८ लाख रुपैयाँ पुगेको छ । हालसम्म इन्स्योरेन्सले १ लाख ३७ हजार बढी बीमालेख जारी गरेको छ भने १५ हजार ५६५ वटा नविकरण गर्न सफल भएको छ । त्यसैगरी, कम्पनीले ६९ करोड ४२ लाख रुपैयाँ बराबरको ४ हजार ५१९ वटा दावी भुक्तानी गरेको छ । हालसम्म ७ ह जार ३२४ वटा दावीबाट ९५ करोड ५५ लाख रुपैयाँ भने भुक्तानी गर्न बाँकी रहेको इन्स्योरेन्सले जानकारी गराएको छ ।
६ सूचकमा नेशनल लाइफको उत्कृष्ट प्रफर्मेन्स, यस्तो छ प्रतिस्पर्धी ४ कम्पनीको बिजनेस
काठमाडौं । जीवन बीमा कम्पनीमध्ये नेशनल लाइफ इन्स्योरेन्स अघिकांश सूचकमा अग्रस्थानमा रहेको छ । सम्बन्धित कम्पनीले प्रकाशित गरेका गत वर्षको चौथो त्रैमासको अपरिष्कृत वित्तीय विवरण अनुसार शीर्ष चार कम्पनीमध्ये नेशनल लाइफ अगाडि देखिएको छ । नेपाल लाइफ, लाइफ इन्स्योरेन्स कर्पोरेसन र एशियन लाइफमध्ये नेशनल लाइफ मूख्य सूचकमा अगाडि छ । गत असारसम्मको विवरण अनुसार नेशनल लाइफ खुद नाफा, जगेडा कोष, प्रिमियम वृद्धिदर, प्रोभिजन फर लस, प्रतिसेयर आम्दानी र बोनसदरमा सबैभन्दा शीर्ष स्थानमा देखिन्छ । खुद नाफा कुनै पनि कम्पनी वा संस्थाले वर्षभरी आर्जन गरेको रकम जसमा खर्च भएको रकम कटाएर बाँकी रहेको रकमलाई खुद नाफा भनिन्छ । यसको आधारमा नेशन लाइफ अगाडि देखिन्छ । आर्थिक वर्ष २०७८/७९ मा नेशनल लाइफले ४० करोड ८८ लाख रुपैयाँ बराबरको खुद नाफा आर्जन गरेको छ । अधिकांश सूचकमा अग्रस्थानमा रहेको नेपाल लाइफ भने नोक्सानमा रहेको छ । सो अवधिमा कम्पनी ३५ करोड २७ लाख रुपैयाँ नोक्सानमा छ । त्यस्तै, लाइफ इन्स्योरेन्स कर्पोरेशन पनि ८ करोड ७४ लाख रुपैयाँ नोक्सानमा देखिएको छ । एशियन लाइफले भने १६ करोड ९४ लाख रुपैयाँ नाफामा छ । यद्यपि यो नाफा एक्चुरी अघिको हो । जीवन बीमा कम्पनीको हकमा कम्पनीहरुले प्रत्येक वर्ष एक्चुरी भ्यालुएसन गर्नुपर्ने हुन्छ । उक्त भ्यालुएसन पश्चात भने कम्पनीहरुको नाफा बढ्ने गरेको पाइन्छ । जगेडा कोष जगेडा कोष एउटा यस्तो सूचक हो, जसको कोषको आकार जति बढी हुन्छ, त्यतिनै कम्पनीहरुको जोखिम वहन क्षमता बलियो भएको मानिन्छ । साथै, लगानीकर्ताको साइडबाट हेर्दा पनि यो एकदमै महत्वपूर्ण वित्तीय सूचक हो । यो सूचकको आधारमा पनि नेशनल लाइफ नै अगाडि छ । २०७९ असारसम्ममा कम्पनीको उक्त कोषमा ६६ करोड ७१ लाख रुपैयाँ सञ्चित छ । त्यस्तै, लाइफ इन्स्योरेन्स कर्पोरेशनको जगेडा कोषमा ६१ करोड ५५ लाख रुपैयाँ सञ्चित छ । त्यसैगरी, एशियन लाइफको जगेडा कोषको आकार ५८ करोड ३६ लाख र नेपाल लाइफको २८ करोड ८३ लाख रुपैयाँ बराबरको छ । प्रिमियम वृद्धिदर कम्पनीहरुले बिजनेश गरे बापत आम्दानी हुने अर्थात वर्षभरीमा बिक्री गरेको बीमालेखमार्फत आर्जन हुने रकमलाई प्रिमियम अर्थात बीमाशुल्क भनिन्छ । अघिल्लो वर्षको तुलनामा नेशनल लाइफको प्रिमियम वृद्धिद्धर उच्च छ । कम्पनीले अघिल्लो वर्षको तुलनामा गत वर्षमा १७.८८ प्रतिशतले प्रिमियम बढाएको छ । जबकी एशियन लाइफको १७.१९ प्रतिशत, नेपाल लाइफको ९.४४ र लाइफ इन्स्योरेन्स कर्पोरेशनको प्रिमियम ६.४० प्रतिशतले बढेको छ । तर रकमको आधारमा भने नेशनल लाइफको प्रिमियम नेपाल लाइफ र लाइफ इन्स्योरेन्स कर्पोरेशनभन्दा कम छ । नेपाल लाइफले एक वर्षमा ३५ अर्ब ३८ करोड रुपैयाँ, लाइफ इन्स्योरेन्स कर्पोरेशनले १८ अर्ब २२ करोड रुपैयाँ बराबरको बीमाशुल्क संकलन गरेका छन् भने नेशनल लाइफले १४ अर्ब ३३ करोड रुपैयाँ बराबरको प्रिमियम संकलन गरेको छ । यता एशियन लाइफले गत वर्षमा ६ अर्ब ८७ करोड रुपैयाँ बराबरको बीमाशुल्क संकलन गर्न सफल भएको छ । प्रतिसेयर आम्दानी (ईपीएस) लगानीकर्तालाई प्रतिफल दिने आधारलाई प्रतिसेयर आम्दानी भनिन्छ । यसको आम्दानी जसको बढी छ सो कम्पनी तुलनात्मक रुपमा राम्रो मानिन्छ । साथै, कम्पनीको सेयरमा लगानी गर्दा त्यो कम्पनीले लगानीको प्रतिफल कति दिन्छ भन्ने आधारमा पनि लगानी गर्ने अभ्यास छ । यी चार कम्पनीमध्ये नेशनल लाइफको सबैभन्दा बढी अर्थात १०.१३ प्रतिशत प्रतिसेयर आम्दानी छ । त्यसपछि एशियन लाइफको ६.६७ प्रतिशत प्रतिसेयर आम्दानी रहेको छ । तर नेपाल लाइफ र लाइफ इन्स्योरेन्स भने यो सूचकमा नोक्सानमा देखिएका छन् । नेपाल लाइफको प्रतिसेयर आम्दानी ४.३ प्रतिशत र लाइफ इन्स्योरेन्स ३.३ प्रतिशत ऋणात्मक रहेको छ । बोनसदर बीमा गरेका बीमितिहरुलाई कम्पनीले दिने बोनसदर एक प्रमुख सूचक हो । प्राय जो कोहिले बीमा गर्दा कम्पनीले दिने गरेको बोनसदरलाई नै आधार मानेर बीमा गर्ने गरेको जानकारहरु बताउँछन् । बोनसदरको आधारमा नेशनल, नेपाल, लाइफ इन्स्योरेन्स र एशियन लाइफ इन्स्योरेन्सलाई हेर्दा सबैभन्दा बढी बोनसदर नेशनलले दिएको छ । नेशनल लाइफले हालै सार्वजनिक गरेको नयाँ बोनसदर अनुसार कम्पनीले आफ्ना बीमितहरुलाई प्रतिहजार न्यूनतम ६५ देखि अधिकतम ८५ रुपैयाँसम्म बोनस दिने भएको छ । त्यसपछि सबैभन्दा बढी नेपाल लाइफका बीमितले पाउने भएका छन् । सो कम्पनीका बीमितले प्रतिहजार न्यूनतम ५६ देखि अधिकतम ८२ रुपैयाँ पाउने छन् । त्यस्तै, एलआईसीले न्यूनतम ५४ देखि अधिकत ७० रुपैयाँ र एशियन लाइफले आफ्ना बीमितलाई प्रतिहजार न्यूनतम ४० देखि अधिकतम ७५ रुपैयाँ बोनसदर दिने भएको छ । प्रोभिजन फर लस सामान्यतः कुनै पनि कम्पनीको प्राभिजन नभएको राम्रो मानिन्छ । यदि छ भने पनि सबैभन्दा कम जसको छ त्यो राम्रो मानिन्छ । यो सूचकको आधारमा यी चार कम्पनीलाई दाँजेर हेर्दा नेशनल लाइफले सबैभन्दा कम रकम छुट्टाएको छ । समीक्षा अवधिमा नेशनल लाइफले खाटा बापत ८३ लाख ५४ हजार रुपैयाँ मात्रै छुट्टाएको देखिन्छ । सबैभन्दा बढी नेपाल लाइफले ७७ करोड ८० करोड रुपैयाँ छुट्टाएको छ । त्यस्तै, नेशनल लाइफले २९ करोड ५९ लाख र एशियन लाइफले ११ करोड ५८ लाख रुपैयाँ उक्त शीर्षकमा छुट्याएको छ ।
