सन नेपाल लाइफद्वारा समता फाउण्डेसनलाई पाँच लाख सहयोग
काठमाडौं । सन नेपाल लाइफ इन्स्योरेन्स कम्पनी लिमिटेडले आफ्नो संस्थागत सामाजिक उत्तरदायित्वअन्तर्गत समता फाउण्डेसनलाई पाँच लाख रुपैयाँ आर्थिक सहायता प्रदान गरेको छ । उक्त सहयोग फउण्डेसनमा अध्यनरत विद्यार्थीहरुको शिक्षामा खर्च हुने जनाइएको छ । बुधबार कम्पनीका प्रमुख कार्यकारी अधिकृत राजकुमार अर्यालले उक्त रकम फाउण्डेसनका प्रतिनिधि दिपक बस्नेतलाई हस्तान्तरण गरेका छन् । सबैका लागि शिक्षा सहज र सुलभ बनाउन समर्पित समता फाउण्डेसनलाई दिएको यस योगदानले विद्यार्थीहरूको उज्जवल भविष्य निर्माणमा सहयोग पुग्ने विश्वास कम्पनीले गरेको छ । कम्पनीले १३९ शाखा तथा उपशाखा कार्यालयबाट जीवन बीमा सेवा प्रदान गर्दे आईरहेको छ । सन नेपाल लाइफले आगामी दिनहरूमा पनि संस्थागत सामाजिक उत्तरदायित्व बहन गर्ने प्रतिबद्धता व्यक्त गरेको छ ।
सम्पत्ति शुद्धिकरण निवारणका लागि छुट्टै विभाग खडा गर्न बीमा कम्पनीलाई निर्देशन
काठमाडौं । नेपाल बीमा प्राधिकरणले बीमा कम्पनीहरुलाई सम्पत्ति शुद्धिकरण निवारणका लागि विभिन्न ५ वटा निर्देशन दिएको छ । प्राधिकरणले जारी गरेको एएमएल सीएपफटी सम्बन्धी उक्त निर्देशनमा कम्पनीहरुले सम्पत्ति शुद्धिकरण निवारणका लागि छुट्टै विभाग तथा एकाइ गठन गर्नुपर्नेदेखि ठूला सेयरधनीहरुका लागि तालिम दिनुपर्ने निर्देशन दिएकाे छ । यस्तै, सम्पत्ति शुद्धीकरण तथा आतङ्ककारी क्रियाकलापमा वित्तीय लगानी निवारण निर्देशिका, २०८१ दफा १७ बमोजिम व्यवस्थापन स्तरको कर्मचारी रहने गरी एक कार्यान्वयन अधिकारी नियुक्त गर्ने, आवश्यक संख्यामा कर्मचारी खटाई जिम्मेवारी प्रदान गर्ने, तथा कम्तिमा २ वर्षसम्म सरुवारजिम्मेवारी परिवर्तन नगर्न प्राधिकरणले निर्देशन दिएको हो । यसैगरी, कार्यान्वयन अधिकारीले ऐन, नियमावली तथा निर्देशिका बमोजिमका विषय कार्यान्वयन गर्ने सिलसिलामा माग गरेको आवश्यक सूचना, कागजात, अभिलेख वा विवरण उपलब्ध नगर्ने/नगराउने बीमकका पदाधिकारी वा कर्मचारीलाई विभागीय कारवाहीको सिफारिस गर्नु पर्ने उल्लेख छ। यसरी गरिएको कारवाहीको जानकारी प्राधिकरणलाई गराउनु पर्नेछ । बीमकको संस्थागत सुशासन निर्देशिका, २०८० को दफा १० (ङ) बमोजिमको सम्पत्ति शुद्धीकरण निवारण सम्बन्धी समिति गठन गर्दा स्वतन्त्र सञ्चमलकको संयोजकत्त्वमा परिपालना विभागका विभागीय प्रमुख, जोखिम व्यवस्थापन तथा वित्तीय स्वस्थता (सोल्भेन्सी) विभागका विभागीय प्रमुख सदस्य तथा सम्पत्ति शुद्धीकरण तथा आतङ्ककारी क्रियाकलापमा वित्तीय लगानी निवारण निर्देशिका, २०८१ को दफा (१७) बमोजिम नियुक्त कार्यान्वयन अधिकारी सदस्य सचिव रहने गरी गठन गर्नु पर्नेछ । समितिको बैठक आवश्यकता अनुसार बस्न सक्ने र समितिले सम्पत्ति शुद्धीकरण तथा आतङ्ककारी क्रियाकलापमा वित्तीय लगानी निवारण सम्बन्धी नीति, कार्यविधि तथा योजना तयार गरी संचालक समिति समक्ष पेश गर्नुपर्ने निर्देशनमा उल्लेख छ। नेपाल फाइनान्सियल एक्सन टाक्स फोर्स (एफएटीएफ) को ग्रे लिष्टमा पर्ने सम्भावना उच्च छ । प्रधानमन्त्री केपी शर्मा ओलीले पनि केही दिनअघि संसदमा सम्बोधन गर्दै नेपाल ग्रे लिष्टमा पर्ने सम्भावना रहेकाे बताएका थिए । प्रधानमन्त्री ओलीले प्रचण्ड सरकारले सम्पत्ति शुद्धिकरण निवारण सम्बन्धी कानुन बनाउँन ढिला गर्दा नेपाल ग्र लिष्टमा पर्ने सम्भावना रहेकाे आरोप लगाएको थिए । नेपाल ग्रे लिष्टमा पर्ने सम्भावना बढेसँगै नेपाल बीमा प्राधिकरण पनि एक्सनमा उत्रिएको हाे । साेहीअनुसार प्राधिकरणले कम्पनीहरुलाई यस्तो निर्देशन जारी गरेको हो । प्राधिकरणले भने बीमा क्षेत्रबाट सम्पत्ति शुद्धिकरण नहोस भन्ने उद्देश्यका साथ यो निर्देशन जारी गरेको जानकारी दिएकाे छ । प्राधिकरणको नियमन शाखाका प्रमुख तथा उपनिर्देशक पदम प्रसाद सोडारीले गैरकानूनी माध्यमबाट आर्जित सम्पत्तिहरु बीमा कम्पनीबाट शुद्धिकरण नहोस् भन्ने मनसायले यस्तो निर्देशन जारी गरिएको बताए ।
नेपाल माइक्रो इन्स्योरेन्स र मुक्तिनाथ विकास बैंकबीच व्यावसायिक सहकार्यसम्बन्धी सम्झौता
काठमाडौं । नेपाल माइक्रो इन्स्योरेन्स र मुक्तिनाथ विकास बैंकबीच बीमा व्यवसाय सहकार्यसम्बन्धी सम्झौता भएको छ । बीमा व्यवसायका विषयमा बैंकको केन्द्रीय कार्यालय समझदारी भएको हो । समझदारी पत्रमा विकास बैंकका नायब प्रमुख कार्यकारी अधिकृत (डीसीईओ) समीर शेखर बज्राचार्य र इन्स्योरेन्सका प्रमुख कार्यकारी अधिकृत (सीईओ) मृगेन्द्र रिमालले हस्ताक्षर गरेका हुन् । सीईओ रिमालले यस सहकार्यले निर्जीवन लघु बीमा सेवाहरू विस्तार गर्न नयाँ सम्भावनाहरू खोल्ने उल्लेख गर्दै व्यक्तिहरू र साना व्यवसायहरूलाई अप्रत्याशित जोखिमबाट जोगाउन सहयोग पुग्ने बताउनुका साथै नेपाल माइक्रो इन्स्योरेन्स कम्पनी लिमिटेडको लघु बीमाको अनुभव र मुक्तिनाथ विकास बैंकको बैंकिङ पहुँचलाई समाहित गरेर सीमान्तकृत लगायत समुदायलाई सशक्त बनाउने लक्ष्य लिएको उल्लेख गरे । सम्झौता कार्यक्रममा बोल्दै डीसीईओ बज्राचार्यले उक्त साझेदारी व्यवसायका लागि मात्र नभई नवीन कार्य र प्रभावका लागि भएको बताए । यसका साथै उनले कम आय भएका मानिसहरूको वित्तीय चुनौतीहरूको समाधान गर्ने ग्राहक केन्द्रित उत्पादनहरू विकास गर्ने प्रतिबद्धता जाहेर गरे । यसले दिगो विकासलाई टेवा पुर्याउने उनको दाबी छ । यसैगरी, सीईओ रिजालले सहकार्यबाट नवीन उत्पादनहरूको विकास, संयुक्त बजारीकरण पहलको प्रवर्द्धन र सेवा प्रवाहलाई सरल बनाउन खोजिएको उल्लेख गरे । जसले लघु बीमा सम्बन्धि वित्तीय समाधानहरूको सहज पहुँच सुनिश्चित गर्ने उनको भनाइ छ । कार्यक्रममा इन्स्योरेन्सका डीसीईओ अनिल राज गिरी, प्रमुख विकास अधिकृत मनोजकुमार चौधरी र विकास बैंकका ट्रान्जेक्सन हेड राजेन्द्र पाण्डेको समेत उपस्थिति रहेको थियो ।
