मौसम विभाग भन्छ– भोटेकोसी र त्रिशूलीमा जोखिम कायमै
काठमाडौं । जल तथा मौसम विज्ञान विभागले भोटेकोसी र त्रिशूली नदी आसपासको जोखिम अझै कायमै रहेको जनाएको छ । चीनतर्फ नदी थुनिएको स्थानमा बनेको ताल अझै पूर्ण रूपमा नखुलेकाले जोखिम अझै कायमै रहेको छ ।विभागलाई साढे १ बजे प्राप्त सूचनाअनुसार ताल अझै पनि पूर्ण रूपमा खुल्न सकेको छैन । विभागले अर्को सूचना जारी नभएसम्म भोटेकोसी र त्रिशूली नदीको आसपास तथा तल्लो तटीय क्षेत्रमा रहेका नागरिकलाई नदीबाट टाढा सुरक्षित स्थानमा रहन आग्रहसमेत गरेको छ । सम्भावित जोखिमलाई ध्यानमा राख्दै नदीको बहावमा आउने परिवर्तनप्रति सतर्क रहन र सम्बन्धित निकायले जारी गर्ने सूचनालाई पालना गर्न विभागले अनुरोध गरेको छ ।
बाढी प्रभावित क्षेत्रका सांसदसँग प्रधानमन्त्री शाहको छलफल, उद्धार र राहतमा तीव्रता दिन निर्देशन
काठमाडौं । प्रधानमन्त्री वालेन्द्र शाहले रसुवाको भोटेकोशी नदीमा आएको बाढीबाट प्रभावित क्षेत्रका संघीय सांसदहरूसँग भेट गरी क्षति, उद्धार तथा राहतका विषयमा छलफल गरेका छन् । प्रधानमन्त्री तथा मन्त्रिपरिषद्को कार्यालय, सिंहदरबारमा बुधबार (आज) भएको भेटमा रसुवा, नुवाकोट, धादिङ, गोरखा र चितवनका संघीय सांसदहरूसँग बाढीबाट भएको क्षति, तटीय क्षेत्रका बस्तीको अवस्था तथा खोज, उद्धार र राहत कार्यबारे छलफल भएको हो । भेटमा सांसदहरूले आ–आफ्नो क्षेत्रमा बाढीले पु‍र्याएको क्षति र प्रभावित नागरिकको उद्धार तथा राहतका लागि तत्काल चाल्नुपर्ने कदमबारे प्रधानमन्त्री शाहको ध्यानाकर्षण गराएका थिए । प्रधानमन्त्री शाहले सरकार प्रभावित नागरिकको सुरक्षा तथा राहतका लागि पूर्ण प्रतिबद्धताका साथ परिचालित रहेको बताए । उनले तल्लो तटीय क्षेत्रमा थप सतर्कता अपनाउन तथा जोखिममा रहेका र विस्थापित नागरिकलाई तत्काल सुरक्षित स्थानमा स्थानान्तरण गर्न सम्बन्धित निकायलाई निर्देशन दिइसकेको जानकारी गराए । यसअघि प्रधानमन्त्री शाहले विपद् जोखिम न्यूनीकरण तथा व्यवस्थापन राष्ट्रिय परिषद्को बैठक बोलाएर बाढी प्रभावित क्षेत्रको पछिल्लो अवस्था, खोज तथा उद्धार र राहत कार्यको प्रगतिबारे उच्चस्तरीय जानकारी लिएका थिए । सरकारले बाढीग्रस्त क्षेत्रमा सुरक्षा निकायका टोली परिचालन गरी खोज तथा उद्धार कार्यलाई तीव्र बनाएको जनाएको छ ।
गोसाइकुण्ड गाउँपालिकाबाट दुई भाग मानिस बेपत्ता
काठमाडौं । रसुवामा आएको बाढीले गोसाइकुण्ड गाउँपालिकाको २ र ५ वडालाई पूर्ण रुपमा क्षति गरेको छ । गोसाइकुण्ड गाउँपालिकाका अध्यक्ष कैसाङ नुर्पु तामाङले दुई वडामा क्षति गरेको जानकारी दिए । 'तीन भागको दुई भाग मानिस बेपत्ता भएका छन्,' उनले भने,'कैलाश पर्वत जाने पर्यटकहरू थिए । चीनको सीमाना भएकाले यस क्षेत्रका धेरै मानिस बेपत्ता भएका छन् ।' धेरै मानिसहरू बेपत्ता भएका र परिवारकै केही सदस्यहरूसमेत रहेको उनले बताए । खोजीकार्य जारी रहेको उनको भनाइ छ । 'हाम्रो बेहाल भएको छ । हामी सम्हाल्न सकिने अवस्थामा छैनौँ,’ उनी भन्छन,’ हामी निरन्तर खोजिरहेका छौँ । हाम्रो वशमा केही छैन ।' नेपाली सेना र निजी क्षेत्रका हेलिकोप्टरबाट उद्धार गरिरहेको तामाङले बताए। घाइतेहरूलाई जिल्ला अस्पतालमा उपचार भइरहेको र केही घाइतेलाई काठमाडाैँ पठाउने तयारी भइरहेको उनले बताए । बुधबार बिहान ९ बजे आएको बाढीले रसुवा, नुवाकोट र धादिङ लगायतका विभिन्न क्षेत्रमा असर गरिरहेको छ ।
बाढीपीडितका लागि डब्ल्युएचओले औषधी र आपतकालीन टेन्ट पठाउँदै
काठमाडौं । विश्व स्वास्थ्य संगठन (डब्ल्युएचओ)ले रसुवाको भोटेकोशी नदीमा आएको बाढीबाट प्रभावित नागरिकका लागि आवश्यक स्वास्थ्य तथा राहत सामग्री पठाउने भएको छ । स्वास्थ्य तथा खाद्य स्वच्छतामन्त्री निशा मेहतासँगको समन्वयपछि डब्ल्युएचओले बाढी प्रभावित करिब एक हजार जनालाई पुग्ने आधारभूत औषधि तथा स्वास्थ्य उपकरण पठाउन लागेको स्वास्थ्य तथा खाद्य स्वच्छता मन्त्रालयले जनाएको छ । प्रभावित क्षेत्रमा २४ वर्गमिटरका १५ वटा आपतकालीन टेन्टसमेत पठाउने तयारी गरिएको छ । बाढी प्रभावितको उपचारका लागि काठमाडौंस्थित वीर अस्पताल र राष्ट्रिय ट्रमा सेन्टरमा १०० वटा आपतकालीन शय्या छुट्याइएको मन्त्रालयले जनाएको छ । मन्त्रालयका अनुसार हालसम्म बाढीबाट घाइते भएका तीन जनालाई उद्धार गरी उपचारका लागि काठमाडौं ल्याइएको छ । आपतकालीन स्वास्थ्य सेवा प्रभावकारी बनाउन संघीय राजधानीका अस्पताल, रक्तसञ्चार केन्द्र, बागमती र गण्डकी प्रदेशका स्वास्थ्य मन्त्रालय, नेपाल रेडक्रस सोसाइटी, लायन्स क्लब तथा नेपाल स्काउटसँग समेत समन्वय भइरहेको मन्त्रालयले जनाएको छ । बाढीबाट प्रभावित क्षेत्रमा खोज, उद्धार तथा राहतसँगै स्वास्थ्य सेवा र आवश्यक औषधिको व्यवस्थापनलाई प्राथमिकतामा राखिएको मन्त्रालयको भनाइ छ ।
युवा संघ नेपाल बाढीपहिरो प्रभावित क्षेत्रमा उद्धार तथा राहतका लागि खटिँदै
काठमाडौं । नेकपा (एमाले) निकट युवा संगठन युवा संघ नेपालले बाढीपहिरोबाट प्रभावित क्षेत्रमा उद्धार तथा राहतका लागि टोली परिचालन गर्ने तयारी गरेको छ । युवा संघ नेपालका अध्यक्ष महाराज गुरुङको नेतृत्वमा प्रारम्भिक टोली प्रभावित क्षेत्रतर्फ जान लागेको हो । अध्यक्ष गुरुङका अनुसार पहिलो चरणमा प्रभावित क्षेत्रको स्थलगत अनुगमन गरी त्यहाँको वास्तविक अवस्था र आवश्यकताको पहिचान गरिनेछ । अनुगमनपछि प्रभावित क्षेत्रको आवश्यकता र अवस्थाका आधारमा थप टोली परिचालन गरी उद्धार तथा राहत कार्यमा खटाइने युवा संघले जनाएको छ । आवश्यकताअनुसार विभिन्न समूह बनाएर स्वयंसेवक परिचालन गर्ने तयारी गरिएको अध्यक्ष गुरुङले बताए । प्रभावित क्षेत्रमा उद्धार तथा राहत कार्य प्रभावकारी बनाउन स्थानीय पार्टी नेतृत्व, जनप्रतिनिधि र सुरक्षा निकायसँग आवश्यक समन्वय भइरहेको गुरुङले जानकारी दिए । उनका अनुसार विपद्बाट प्रभावित नागरिकलाई तत्काल आवश्यक सहयोग उपलब्ध गराउने उद्देश्यले युवा संघले स्वयंसेवक परिचालनदेखि राहत सामग्री व्यवस्थापनसम्मको तयारी गरिरहेको छ ।
बाढीले विभिन्न बैंकका ९ बढी शाखामा क्षति, कर्मचारी सम्पर्कमा आउँदै
काठमाडौं । रसुवामा बाढीपहिरोले ठूलो क्षति पुर्याएपछि बैंकिङ क्षेत्रमा समेत गम्भीर असर परेको नेपाल बैंकर्स संघका अध्यक्ष सन्तोष कोइरालाले बताएका छन् । उनका अनुसार बाढीपहिरोका कारण बैंकिङ क्षेत्रमा कति क्षति पुगेको छ भन्ने यकिन विवरण अहिले नै भन्न सकिने अवस्था छैन । रसुवाको टिमुरेमा वाणिज्य बैंकका ९ वटा शाखा सञ्चालनमा रहेको र टिमुरेभन्दा तलका क्षेत्रमा समेत शाखा रहेकामा तीमध्ये अधिकांश बाढीले बगाएको सूचना आएको उनले बताए । ‘मानवीय क्षति नभए हुन्थ्यो भन्ने लागेको छ । कतिपय कर्मचारी साथीहरू सम्पर्कमा आउँदै हुनुहुन्छ भने केही सम्पर्कमा आउने प्रयासमा हुनुहुन्छ,’ अध्यक्ष कोइरालाले भने । बाढीका कारण प्रभावित क्षेत्रमा जान सक्ने अवस्था नरहेको भन्दै उनले बैंकका शाखामा रहेको नगदसमेत बाढीले बगाएको प्रारम्भिक सूचना आएको बताए । बैंकिङ क्षेत्रको क्षतिको विस्तृत विवरण संकलन भइरहेको र बुधबार साँझसम्म प्रारम्भिक रिपोर्ट आउन सक्ने अध्यक्ष कोइरालाले बताए ।
रसुवाको बाढी प्रभावित क्षेत्रमा नेपाली सेनाको मेडिकल टिम जाँदै
काठमाडौं । रसुवाको बाढी पीडितको क्षेत्रमा नेपाली सेनाको मेडिकल टीम जाने तयारी गरेको छ । नेपाली सेनाको प्रवक्ता राजाराम बस्नेतले बाढी प्रभावित क्षेत्रमा सेनाको मेडिकल टिम जाने तयारी भइरहेको जानकारी दिए । नेपाली सेनाले १२ जनाको उद्धार गरेको छ । नेपाली सेनाले हेलिकप्टरमार्फत स्याप्रुबेसीबाट ६, मैलुङबाट २ र धुन्चेबाट ४ गरेर जम्मा १२ जना जनालाई उद्धार गरिसकेको छ । नेपाली सेनाको ४ र निजी कम्पनीका ८ गरी जम्मा १२ वटा हेलिकोप्टर उद्धार कार्यमा खटिएको नेपाली सेनाले जनाएको छ । नेपाली सेनाको मेडिकल टिमद्वारा त्रिशुलीस्थित नम्बर १ सैन्य तालिम केन्द्रमा आकस्मिक उपचार सेवा प्रदान गरिरहेको सेनाले बताएको छ । बुधबार बिहान ९ बजे आएको बाढीले रसुवाका विभिन्न क्षेत्रमा असर गरिरहेको छ ।
बाढीले ठूलो क्षति गरेको छ, जतिसक्दो छिटो उद्धार गरौँ : मोहन आचार्य
काठमाडौं । रसुवाका सांसद एवं नेपाली कांग्रेसका नेता मोहन आचार्यले रसुवामा आएको बाढीले ठूलो क्षति पुर्याएको बताएका छन् । गत वर्षको तुलनामा यसपटकको बाढी अझ ठूलो र विनाशकारी रहेको उनले बताए । बाढीका कारण रसुवा, नुवाकोट र धादिङमा ठूलो क्षति भएको उनको भनाइ छ । बुधबार सिंहदरबारमा प्रधानमन्त्री बालेन्द्र शाहसँग भेट गरेपछि पत्रकारहरूसँग कुरा गर्दै सांसद आचार्यले बाढी प्रभावित नागरिकलाई जतिसक्दो छिटो उद्धार गर्न सरकारसँग आग्रह गरे । सडकमार्ग पूर्ण रूपमा अवरुद्ध भएकाले प्रभावित क्षेत्रमा तत्काल राहत र उद्धारका लागि हेलिकप्टर प्रयोग गर्नुपर्ने उनले बताए । उनका अनुसार प्रभावित क्षेत्रमा नागरिक त्रसित छन् । धेरै परिवार आफ्ना आफन्तसँग सम्पर्कविहीन भएपछि चिन्तित बनेका छन् । टेलिफोन सम्पर्कसमेत अवरुद्ध भएकाले प्रभावित क्षेत्रको अवस्था बुझ्न कठिनाइ भइरहेको उनले बताए । ‘अहिले त्यहाँका आम नागरिक एकदमै त्रसित छन् । सोचेको र अनुमान गरेको भन्दा पनि धेरै ठूलो क्षति भएको छ । धेरै परिवारका सदस्य सम्पर्कविहीन भएपछि परिवारजन आत्तिनुभएको छ,’ उनले भने, ‘टेलिफोन कनेक्सन पनि छैन । अब त्यहाँ सडकबाट जान सकिने अवस्था छैन। त्यसैले हवाई माध्यमबाट गएर उद्धार गर्न र सक्दो सहयोग गर्नुपर्छ ।’ आचार्यले प्रभावित क्षेत्रमा तत्काल उद्धार, राहत र पुनःस्थापनाको काम अघि बढाउनुपर्नेमा जोड दिए । उनका अनुसार तिब्बती क्षेत्रमा हिमताल विस्फोट भएपछि बाढी आएको हो । बाढीले रसुवाका टिमुरे, स्याफ्रुबेसी, मैलुङबेसी, त्रिशूली बजारलगायत क्षेत्रमा ठूलो क्षति पुर्याएको छ । टेलिफोन सम्पर्क विच्छेद भएकाले बाढीबाट भएको क्षतिको यकिन विवरण संकलन गर्नसमेत कठिनाइ भइरहेको उनले जानकारी दिए ।
