औषधि पसलबाटै लागुऔषधको कारोबार, सञ्चालिका पक्राउ
कास्की । पोखरामा औषधि पसलको आवरणमा प्रतिबन्धित लागुऔषधको कारोबार हुने गरेको खुलेको छ । पोखरा महानगरपालिका–२६ कालिकाचोकस्थित जलधारे औषधि पसलबाट सात हजारभन्दा बढी लागुऔषधका चक्की बरामद भएपछि यस्तो कारोबार बाहिरिएको हो । जिल्ला प्रहरी कार्यालय कास्कीका अनुसार औषधि पसलकी सञ्चालिका २९ वर्षीया अमिसा ढुङ्गानालाई लागुऔषधका चक्कीसहित पक्राउ गरिएको छ । प्रहरी नायब उपरीक्षक वीरेन्द्रकुमार पासवानका अनुसार लागुऔषध ओसारपसार भइरहेको विशेष सूचनाका आधारमा बुधबार इलाका प्रहरी कार्यालय शिशुवाबाट खटिएको प्रहरी टोलीले औषधि पसलमा जाँच गरेको थियो । सो क्रममा चार प्रकारका लागुऔषध बरामद गरिएको हो । प्रहरीका अनुसार सञ्चालिका ढुङ्गानाको साथबाट कोडिप–पी (कोडिन) ६ हजार ४०० चक्की, प्रेगाबालिन ४५० चक्की, लोराजेपाम १५० चक्की र क्लोर्डियाजेपोक्साइड १६० चक्की बरामद गरिएको छ । बरामद चक्कीको कुल संख्या सात हजार १६० रहेको छ । प्रहरी नायब उपरीक्षक पासवानले विशेष सूचनाका आधारमा फार्मेसीमा छापा मार्दा ठूलो परिमाणमा लागुऔषधजन्य औषधि फेला परेको बताए । औषधि बिक्री तथा वितरणका लागि सञ्चालनमा रहेका फार्मेसीबाटै ठूलो परिमाणमा लागुऔषध बरामद हुनुले औषधिको बिक्री, वितरण र प्रयोगको नियमन तथा अनुगमन प्रभावकारी बनाउनुपर्ने आवश्यकता देखाएको उनले बताए । पक्राउ परेकी सञ्चालिकामाथि लागुऔषधसम्बन्धी कसुरमा थप अनुसन्धान अघि बढाइएको प्रहरीले जनाएको छ । पोखरामा यसअघि पनि विभिन्न समयमा फार्मेसीबाट लागुऔषधको कारोबार हुने गरेको फेला परेको थियो । प्रहरीले त्यस्ता औषधि पसलका सञ्चालकलाई नियन्त्रणमा लिएर कानुनी कारबाही अघि बढाउँदै आएको छ ।
एनपीएल तेस्रो सिजन जित्नैपर्ने दबाबमा सुदूरपश्चिम रोयल्स
काठमाडौं । नेपाली क्रिकेट प्रशंसकहरूको लामो प्रतीक्षालाई अन्त्य गर्दै नेपाल प्रिमियर लिग (एनपीएल) को तेस्रो संस्करण आगामी कात्तिक ९ गतेदेखि त्रिवि अन्तर्राष्ट्रिय क्रिकेट मैदान, कीर्तिपुरमा भव्य रूपमा सुरु हुने भएको छ । नेपाल क्रिकेट संघ (क्यान) को आयोजनामा हुन लागेको यसपटकको प्रतियोगिता नेपाली घरेलु क्रिकेट इतिहासकै सबैभन्दा आधुनिक, व्यावसायिक र प्रतिस्पर्धात्मक बन्ने देखिएको छ । उद्घाटन खेलमै साविक विजेता लुम्बिनी लायन्स र साविक उपविजेता सुदूरपश्चिम रोयल्स आमनेसामने हुने भएपछि प्रतियोगिताको पहिलो दिनदेखि नै क्रिकेट पारखीहरूले रोमाञ्चक खेलको आनन्द लिन पाउने भएका हुन् । अघिल्लो सिजनको सनसनीपूर्ण फाइनल भिडन्तमा लुम्बिनी लायन्सले सुदूरपश्चिम रोयल्सलाई पराजित गर्दै उपाधि आफ्नो नाममा लेखाएको थियो । त्यसैले कात्तिक ९ गते हुने उद्घाटन भिडन्त केवल प्रतियोगिताको सुरुवात मात्र नभई सुदूरपश्चिमका लागि अघिल्लो सिजनको हारको बदला लिने र लुम्बिनीका लागि आफ्नो विजेताको साख जोगाउने प्रतिष्ठाको लडाइँ बन्नेछ । दुवै टोलीमा अन्तर्राष्ट्रिय स्तरका विदेशी स्टार र राष्ट्रिय टोलीका प्रभावशाली नेपाली खेलाडीहरूको उपस्थिति रहेकाले पहिलो खेल नै फाइनल सरह कडा र रोमान्चक हुने अनुमान गरिएको छ । यसपटकको एनपीएल क्रिकेटप्रेमीहरूका लागि थप खास हुनुको मुख्य कारण अन्तर्राष्ट्रिय क्रिकेट परिषद् (आईसीसी) ले दिएको औपचारिक मान्यता हो । आईसीसीको स्वीकृतिसँगै एनपीएलका सबै खेलहरूले आधिकारिक टी–२० हैसियत प्राप्त गरेका छन्, जसका कारण प्रतियोगितामा खेलाडीहरूले बनाउने व्यक्तिगत तथा टोलीगत कीर्तिमानहरू अब आइसीसीको आधिकारिक तथ्याङ्क मा दर्ता हुनेछन् । यस मान्यताले गर्दा विश्भरका स्थापित क्रिकेट बोर्डहरूबाट खेलाडीहरूलाई एनपीएल खेल्न नो अब्जेक्सन सर्टिफिकेट लिन सहज हुनुका साथै नेपाली घरेलु क्रिकेटलाई अन्तर्राष्ट्रिय मञ्चमा नयाँ पहिचान मिलेको छ । नेपाली क्रिकेट इतिहासमा अर्को ठूलो प्राविधिक फड्को मार्दै यस सिजनदेखि एनपीएलमा पहिलोपटक डिआरएस प्रविधिको प्रयोग गरिँदैछ । मैदानमा हुने अम्पायरिङका विवादित निर्णयहरूलाई सच्याउन र खेललाई पूर्ण रूपमा पारदर्शी तथा निष्पक्ष बनाउन डिआरएस सुविधा कोसेढुङ्गा साबित हुनेछ । विश्भरका ठूला लिगहरूमा प्रयोग हुने आधुनिक क्यामेरा, अल्ट्राएज र बल–ट्याकिङ प्रविधिसहितको डिआरएसले खेलको गुणस्तर बढाउनुका साथै नेपाली खेलाडीहरूलाई पनि अन्तर्राष्ट्रिय स्तरको खेल वातावरणसँग घुलमिल हुन ठूलो मद्दत पुर्याउनेछ । यसअघिका दुवै संस्करणमा सानदार प्रदर्शन गर्दै उपविजेतामा सीमित बनेको सुदूरपश्चिम रोयल्स यसपटक भने कुनै पनि हालतमा ट्रफी चुम्ने दृढ सङ्कल्पका साथ मैदानमा उत्रिँदैछ । उद्यमी स्वतन्त्र प्रताप शाहको स्वामित्व र पूर्वराष्ट्रिय मुख्य प्रशिक्षक जगत टमाटाको अनुभवी मार्गदर्शनमा रहेको सुदूरपश्चिमले यस सिजनका लागि टोलीको सन्तुलनमा विशेष ध्यान दिएको छ । टोलीले विश्वप्रसिद्ध विदेशी स्टारहरूसँगै घरेलु क्रिकेटमा छाप छाडेका प्रतिभावान युवा खेलाडीहरूलाई समेटेर उपाधि जित्न सक्ने मजबुत सेट तयार पारेको छ । सुदूरपश्चिमको विदेशी खेलाडीको सूची निकै आक्रामक र सन्तुलित देखिन्छ । टोलीमा वेस्ट इन्डिजका विष्फोटक ब्याटर तथा म्याच फिनिसर शेरफेन रदरफोर्ड, अघिल्लो सिजनका सर्वश्रेष्ठ खेलाडी घोषित इङ्गल्याण्डका अलराउन्डर सैफ अली जेब, न्युजिल्याण्डका तीव्र गतिबलर स्कट कुगेलेन तथा स्कटल्याण्डका भरपर्दा अलराउन्डर ब्रान्डन म्याकमुलन जोडिएका छन् । यसका साथै शीर्ष क्रममा टोलीलाई आक्रामक सुरुवात दिलाउन अस्ट्रेलियाका क्रिस लिन र जोस ब्राउनजस्ता अन्तर्राष्ट्रिय टी–२० विशेषज्ञहरूको उपस्थितिले सुदूरपश्चिमको ब्याटिङ आक्रमणलाई निकै भरपर्दो बनाउने देखिन्छ । नेपाली खेलाडीहरूको उपस्थितिमा पनि सुदूरपश्चिम रोयल्स उत्तिकै बलियो र परिपक्व देखिएको छ । टोलीको नेतृत्व राष्ट्रिय टोलीका स्टार अलराउन्डर दीपेन्द्र सिंह ऐरीले गरिरहेका छन् भने मुख्य नेपाली खेलाडीका रूपमा अनुभवी ब्याटर तथा विकेटकिपर विनोद भण्डारी, आरिफ शेख, इशान पाण्डे, डेथ ओभर विशेषज्ञ अविनाश बोहरा, नरेन साउद र हेमन्त धामी रहेका छन् । यसका साथै अक्सन र ट्यालेन्ट हन्टमार्फत टोलीमा भित्रिएका अनिल खरेल, दीपक बोहरा, मिलन बोहरा, टेक रावत, दीपेन्द्र थापा, सचिन भट्ट, आयुव चन्द र हिक्मत महराजस्ता युवा प्रतिभाहरूले टोलीको बेन्च स्ट्रेन्थलाई थप मजबुत बनाएका छन् । सुदूरपश्चिम रोयल्स यस सिजनको सबैभन्दा सन्तुलित र उपाधिको बलियो दावेदार टोलीका रूपमा खडा भएको छ । दीपेन्द्र सिंह ऐरी र शेरफेन रदरफोर्डजस्ता खेलाडीको उपस्थितिले टोलीको फिनिसिङ लाइन-अप मजबुत छ भने स्कट कुगेलेन र अविनाश बोहराको पेस जोडीले पावरप्ले र डेथ ओभरमा विपक्षी ब्याटरहरूलाई दबाबमा राख्न सक्छ । यदि टोलीले अघिल्ला संस्करणहरूमा फाइनलमा भोगेको दबाबलाई सही तरिकाले व्यवस्थापन गर्न सक्यो भने, आइसीसीको मान्यता र डिआरएस प्रविधिसहित सुरु हुन लागेको यो ऐतिहासिक एनपीएलको ट्रफी पहिलोपटक सुदूरपश्चिम रोयल्सले आफ्नो नाममा लेख्ने सम्भावना निकै प्रबल छ ।
ई-स्कुटर दुर्घटनामा घाइते हुनेको संख्या तीन गुणाभन्दा बढी
एजेन्सी । अस्ट्रेलियामा विद्युतीय स्कुटर (ई–स्कुटर) दुर्घटनामा परी अस्पताल भर्ना हुनेको संख्या सन् २०१९ यता तीन गुणाभन्दा बढीले बढेको छ । अस्ट्रेलियन इन्स्टिच्युट अफ हेल्थ एन्ड वेलफेयर (एआईएचडब्ल्यू) ले सार्वजनिक गरेको सरकारी प्रतिवेदनले यस्तो देखाएको हो । प्रतिवेदनअनुसार, सन् २०२४–२५ मा ई–स्कुटरबाट लडेर घाइते भएका चार हजार ८९ जना अस्पताल भर्ना भएका थिए । यो संख्या सन् २०१९–२० मा अस्पताल भर्ना भएका एक हजार २९१ जनाको तुलनामा २१६.७ प्रतिशतले बढी हो । ई–स्कुटरबाट लडेर अस्पताल भर्ना हुनेको जनसंख्यामा आधारित दर पनि उल्लेख्य रूपमा बढेको छ । सन् २०१९–२० मा प्रतिएक लाख जनामा ५.१ रहेको यस्तो दर सन् २०२४–२५ मा बढेर १४.९ पुगेको प्रतिवेदनमा उल्लेख छ । यसको विपरीत, विद्युतीय शक्ति प्रयोग नगर्ने सामान्य स्कुटरबाट लडेर अस्पताल भर्ना हुनेको दर भने घटेको छ । सन् २०१९–२० मा प्रतिएक लाख जनामा ६.८ रहेको यस्तो दर सन् २०२४–२५ मा घटेर ४.९ मा झरेको छ । एआईएचडब्ल्यूकी प्रवक्ता ज्याकलिन रेकले अस्पताल भर्ना हुनेको संख्या बढ्नुमा ई–स्कुटरको प्रयोग विस्तारको योगदान कति छ भन्ने कुरा उपलब्ध तथ्यांकबाट यकिन गर्न नसकिने बताएकी छन् । यद्यपि, पछिल्ला वर्षमा अस्ट्रेलियामा ई–स्कुटरको लोकप्रियता बढ्दै गएको प्रवृत्तिसँग दुर्घटनासम्बन्धी तथ्यांक मेल खाने उनको भनाइ छ । प्रतिवेदनमा दुर्घटनासम्बन्धी तथ्यांकलाई थप स्पष्ट रूपमा वर्गीकरण गर्न नयाँ व्यवस्था लागू गरिएको पनि उल्लेख छ । गत जुलाईदेखि लागू गरिएका नयाँ अस्पताल कोडमार्फत ई–स्कुटर, विद्युतीय साइकल तथा अन्य आवागमनका साधनसँग सम्बन्धित दुर्घटनालाई छुट्टाछुट्टै पहिचान गर्न सकिनेछ । नयाँ व्यवस्थाले विद्युतीय सवारीसाधनसँग सम्बन्धित दुर्घटना र त्यसबाट उत्पन्न स्वास्थ्य जोखिमको विश्लेषण गर्न थप सहयोग पुग्ने अपेक्षा गरिएको छ ।
बाढीपहिरोले मुख्य सडक प्रभावित, गोरखामा साना सवारी मात्रै चल्दै
काठमाडौं । देशका विभिन्न स्थानमा आएको बाढीपहिरोका कारण मुख्य राजमार्ग तथा सडकखण्डमा आवागमन प्रभावित भएको छ । गण्डकी र कर्णाली प्रदेशका केही प्रमुख सडकखण्ड अझै पूर्ण तथा आंशिक रूपमा अवरुद्ध रहेका छन् । नेपाल प्रहरीले आज बिहान ६ बजेसम्म सार्वजनिक गरेको अद्यावधिक विवरणअनुसार गोरखा र सुर्खेतका सडकखण्डमा बाढीपहिरोले क्षति पुर्याउँदा यातायात सञ्चालनमा समस्या भएको हो । प्रहरीका अनुसार गोरखाको आरुघाट गाउँपालिकामा गत असोज २५ गते बिहान आएको बाढीले सडक सञ्जालमा ठूलो क्षति पुर्याएको थियो । आरुघाट गाउँपालिका–२, ३ र ९ स्थित नयाँपुल क्षेत्रमा बाढीले सोतीमा रहेको फलामे पुल तथा आरुघाटबाट धादिङ जोड्ने सडक अवरुद्ध बनाएको थियो । उक्त सडकखण्डको नयाँपुल क्षेत्रमा अहिले साना सवारीसाधन मात्रै सञ्चालन हुन थालेका छन् । यसैगरी, पहिरोका कारण कर्णाली राजमार्ग पनि प्रभावित भएको छ । सुर्खेतको बराहताल गाउँपालिका–७ स्थित औलिसेमा पहिरो खसेपछि अवरुद्ध बनेको राजमार्ग पहिरो पन्छाएर एकतर्फी रूपमा सञ्चालनमा ल्याइएको प्रहरीले जनाएको छ । बाढीपहिरो प्रभावित सडकखण्डमा यात्रा गर्दा सावधानी अपनाउन तथा सडकको अवस्थाबारे जानकारी लिएर मात्रै यात्रा गर्नुपर्ने देखिएको छ ।
चतुर्दशीमा पनि दशैंको रौनक, आफन्तकहाँ टीका थाप्ने क्रम जारी
काठमाडौं । विजयादशमीको मुख्य दिनदेखि सुरु भएको बडादशैंको टीका लगाउने क्रम आज चतुर्दशीका दिन पनि जारी छ । निधारमा रातो अक्षताको टीका र कानमा पहेँलो जमरा सिउरिएर मान्यजनबाट आशीर्वाद लिन नेपालीहरू आफन्त तथा इष्टमित्रको घरमा पुगिरहेका छन् । बडादशैंको मुख्य दिन विजयादशमीमा मान्यजनबाट टीका, जमरा र आशीर्वाद ग्रहण गर्ने विशेष परम्परा छ । तर, टाढा रहेका माइती, मावली तथा अन्य आफन्तकहाँ विजयादशमीकै दिन पुगेर टीका थाप्न सम्भव नहुने भएकाले त्यसपछिका दिनमा पनि टीका लगाउने चलन रहिआएको छ । नेपाली परम्पराअनुसार विजयादशमीदेखि सुरु हुने टीका लगाउने क्रम कोजाग्रत पूर्णिमासम्म जारी रहन्छ । यस अवधिमा आफन्त तथा इष्टमित्रको घरमा पुगेर टीका, जमरा र आशीर्वाद लिने गरिन्छ ।
उपत्यकामा २४ घण्टामा ३३६ चालक कारबाहीमा, मापसे गर्ने १०२ जना
काठमाडौं । काठमाडौं उपत्यकामा पछिल्लो २४ घण्टामा ट्राफिक नियम उल्लङ्घन गर्ने ३३६ जना सवारी चालक कारबाहीमा परेका छन् । शनिबार बिहानसम्म उपत्यकाका विभिन्न स्थानमा ट्राफिक प्रहरीले गरेको सवारी जाँचका क्रममा मादक पदार्थ सेवन (मापसे) गरी सवारी चलाउने १०२ जना चालक कारबाहीमा परेका हुन् । ट्राफिक प्रहरीका अनुसार सिसिटिभीमार्फत निगरानी गरी ३९ जना र रातो बत्ती उल्लङ्घन गर्ने २० जना चालकलाई पनि कारबाही गरिएको छ । त्यसैगरी, तीव्र गतिमा सवारी चलाउने ५७ जना, हर्न निषेधित क्षेत्रमा हर्न बजाउने आठ जना, लेन अनुशासन पालना नगर्ने तीन जना र सवारीको यान्त्रिक अवस्था ठीक नराखी चलाउने दुई जना चालक कारबाहीमा परेका छन् । यस्तै, अन्य विविध ट्राफिक नियम उल्लङ्घन गर्ने १०५ जना चालकलाई पनि कारबाही गरिएको प्रहरीले जनाएको छ ।
सात जिल्लाबाट अवैध लागूऔषधसहित नौ जना पक्राउ
काठमाडौं । प्रहरीले देशका विभिन्न सात जिल्लाबाट अवैध लागूऔषधसहित नौ जनालाई पक्राउ गरेको छ । प्रहरीका अनुसार कैलाली, नवलपरासी पश्चिम, मोरङ, कञ्चनपुर, सुनसरी, पर्सा र चितवनबाट उनीहरूलाई पक्राउ गरिएको हो । कैलालीको भजनी नगरपालिका–३ बाट २८ वर्षीय हरिप्रसाद डगौरा ७७० मिलिग्राम ब्राउनसुगरजस्तो देखिने पदार्थसहित पक्राउ परेका छन् । यस्तै, धनगढी उपमहानगरपालिका–७ बाट ७० मिलिग्राम ब्राउनसुगरजस्तो पदार्थसहित १८ वर्षीय किशोरलाई प्रहरीले नियन्त्रणमा लिएको छ । नवलपरासी पश्चिमको सुनवल नगरपालिका–१० बाट २३ वर्षीय सन्दीप चौधरी २८८ ट्याब्लेट स्पास्मो, १७० ट्याब्लेट नाइट्रोजन, २४० ग्राम गाँजा र २४ हजार १५० रुपैयाँसहित पक्राउ परेका छन् । मोरङको सुन्दरहरैँचा नगरपालिका–१० बाट २७ वर्षीय समिर राई ३८० ट्याब्लेट ट्रामाडोल र ३७० ट्याब्लेट स्पास्पेनसहित पक्राउ परेका छन् । त्यसैगरी, कञ्चनपुरको पुनर्वास नगरपालिका–११ बाट १९ वर्षीय कुशल विष्ट ४५० मिलिग्राम खैरो हेरोइनजस्तो देखिने पदार्थसहित पक्राउ परेका छन् । सुनसरीको धरानबाट २६ वर्षीय उत्तम राईसहित दुई जना ३६० ट्याब्लेट ट्रामाडोल र ३६२ ट्याब्लेट स्पास्पेनसहित पक्राउ परेका छन् । पर्साको वीरगन्जबाट २१ वर्षीय गणेश साह कलवार दुई ग्राम ३८० मिलिग्राम ब्राउनसुगरजस्तो देखिने पदार्थसहित पक्राउ परेका छन् । यस्तै, चितवनको रत्ननगरबाट २२ वर्षीय अभिजित नेपाल १५० ट्याब्लेट ट्रामाडोलसहित पक्राउ परेका छन् । प्रहरीले पक्राउ परेकाहरूमाथि थप अनुसन्धान भइरहेको जनाएको छ ।
दशैं मनाएर उपत्यका फर्किने बढे, प्रमुख नाकामा सवारी चाप
काठमाडौं । दशैं मनाउन काठमाडौं उपत्यकाबाट बाहिरिएका यात्रुहरू फर्किन थालेसँगै उपत्यका भित्रिने प्रमुख नाकाहरूमा सवारीसाधनको चाप बढ्न थालेको छ । दशैंको टीका र आशीर्वाद थापेर घरबाट फर्किने यात्रुको सङ्ख्या बढेपछि नागढुङ्गा–कलङ्की, जडीबुटी–कोटेश्वर, तीनपिप्ले, भक्तपुरको जगाती, भट्टेडाँडा तथा दक्षिणकाली–फर्पिङलगायत सडकखण्डमा सवारी चाप बढेको काठमाडौँ उपत्यका ट्राफिक प्रहरी कार्यालयले जनाएको छ । कार्यालयका प्रमुख प्रहरी वरिष्ठ उपरीक्षक सुरेशप्रसाद काफ्लेले यात्रुको आवागमन सहज बनाउन तथा सवारी चाप व्यवस्थापन गर्न ट्राफिक प्रहरीलाई सक्रिय रूपमा परिचालन गरिएको बताएका छन् । कार्यालयका प्रहरी प्रवक्ता नरेशराज सुवेदीका अनुसार उपत्यका फर्किने यात्रुको चाप दिनहुँ बढ्न थालेपछि आवागमन सहज बनाउने, सवारी चाप व्यवस्थापन गर्ने र सम्भावित दुर्घटना न्यूनीकरण गर्ने उद्देश्यले सडकमा निगरानी बढाइएको छ । उपत्यकाका प्रमुख नाकाहरूमा दैनिक निजी कार, जिप, मोटरसाइकल तथा साना–ठूला सार्वजनिक सवारीसाधन गरी करिब एक हजार सवारीसाधन आवतजावत गर्ने गरेका छन् । काठमाडौं उपत्यका ट्राफिक प्रहरी कार्यालयको तथ्याङ्कअनुसार यस वर्ष दसैँ मनाउन घटस्थापनादेखि कात्तिक ३ गतेसम्म ७९ हजार ६७६ वटा सवारीसाधनमार्फत पाँच लाख ७६ हजार ५७८ जना उपत्यकाबाट बाहिरिएका थिए ।
