पहिरो र लेदो खस्दा बिपी राजमार्ग अवरुद्ध
काठमाडौं । काभ्रेपलाञ्चोकमा पहिरो र लेदो खस्दा बीपी राजमार्ग पूर्ण रूपमा अवरुद्ध भएको छ । जिल्ला प्रहरी कार्यालय काभ्रेपलाञ्चोकका अनुसार राजमार्गअन्तर्गत रोशी गाउँपालिका-९ पिन्थलीमा खहरे खोलाबाट ढुङ्गा र माटोसहितको लेदो सडकमा आएको छ भने रोशी गाउँपालिका-८ गिम्दीबेसीमा पनि लगातार पहिरो खसिरहेको छ । सडक दुवैतर्फ पूर्ण रूपमा बन्द भएपछि र अझै पनि पहिरो तथा लेदो झर्ने उच्च जोखिम कायम रहेकाले प्रहरीले बीपी राजमार्ग हुँदै यात्रा गर्ने तयारीमा रहेका सबै यात्रुलाई तत्काल यात्रा सुरु नगर्न अनुरोध गरेको छ । सडक खुल्नेबारे आधिकारिक जानकारी नआएसम्म जोखिम मोलेर यात्रा नगर्न र सुरक्षित स्थानमै बस्न सम्बन्धित निकायले सबैमा आग्रह गरेको छ ।
एनपीएलमा आज दुई खेल हुँदै, वर्षाले खेल प्रभावित हुने सम्भावना
काठमाडौं । तेस्रो संस्करणको नेपाल प्रिमियर लिग (एनपीएल) अन्तर्गत आज कीर्तिपुरस्थित त्रिवि क्रिकेट मैदानमा दुईवटा रोमाञ्चक खेलहरू हुँदैछन् । निर्धारित खेलतालिका अनुसार पहिलो खेलमा साविक विजेता लुम्बिनी लायन्स र चितवन राइनोजबीच प्रतिस्पर्धा हुनेछ भने उक्त खेल दिउँसो साढे १२ बजे सुरु हुनेछ । त्यसैगरी, दिनको दोस्रो खेलमा विराटनगर र सुदूरपश्चिम रोयल्सबीच अपराह्न साढे ४ बजे प्रतिस्पर्धा हुनेछ । तथापि, पछिल्लो दुई दिनदेखि भइरहेको लगातारको वर्षाका कारण आजका दुवै खेल प्रभावित हुने सम्भावना उच्च रहेको छ । जारी प्रतियोगितामा टोलीहरूको प्रदर्शनलाई हेर्दा, लुम्बिनी र चितवनले यसअघिका खेलहरूमा एक/एक जित हात पारेका छन् भने विराटनगरले भने आफ्ना दुवै खेलमा हार बेहोरेको छ । यसैगरी, सुदूरपश्चिमले अहिलेसम्म खेलेका खेलमध्ये एकमा जित र अर्कोमा पराजय भोगिसकेको छ । विराटनगरले अघिल्लो सिजनको क्वालिफायर १ र क्वालिफायर २ तथा यस सिजनको सुरुवाती दुई खेल गरी लगातार चार खेल हारेको छ । सुदूरपश्चिमले भने अघिल्लो सिजनको फाइनलमा लुम्बिनी लायन्ससँग पराजित भएपछि यस संस्करणको पहिलो खेलमै फेरि लुम्बिनीसँगै हार बेहोरेको थियो । एनपीएलका अघिल्ला दुई संस्करणमा विराटनगर र सुदूरपश्चिम तीन पटक आमनेसामने भएका छन् ।
'अर्नब' चक्रवातले बदल्यो मौसम: कहाँ-कहाँ छ वर्षा र हिमपातको सम्भावना ?
काठमाडौं । बङ्गालको खाडीमा विकसित ‘अर्नब’ चक्रवात र पश्चिमी वायुको आंशिक प्रभावका कारण हाल देशका विभिन्न स्थानमा वर्षा र हिमपात भइरहेको छ । जल तथा मौसम विज्ञान विभाग, मौसम पूर्वानुमान महाशाखाका अनुसार हाल कोशी, मधेस, बागमती, गण्डकी र लुम्बिनी प्रदेशका धेरै स्थानमा मध्यम वर्षा तथा कर्णाली र सुदूरपश्चिम प्रदेशका केही स्थानमा हल्का वर्षा भइरहेको छ । आज अपराह्नदेखि उक्त चक्रवातको प्रभाव क्रमिक रूपमा कम हुँदै जाने महाशाखाले जनाएको छ । आज दिउँसो कोशी, मधेस र बागमती प्रदेशका धेरै स्थान, गण्डकी प्रदेशका केही स्थान तथा लुम्बिनी, कर्णाली र सुदूरपश्चिम प्रदेशका हिमाली र पहाडी भूभागका केही स्थानमा चट्याङ्गसहित मध्यम वर्षा र हिमपातको सम्भावना रहेको छ । यसैगरी, लुम्बिनी र सुदूरपश्चिम प्रदेशका तराई भूभागका थोरै स्थानमा हल्का वर्षा तथा कोशी, मधेस र बागमती प्रदेशका एकदुई स्थानमा भारी वर्षा र हिमपात हुन सक्नेछ । आज राति भने हिमाली क्षेत्रका थोरै स्थानमा मध्यम वर्षा र हिमपात तथा कोशी र गण्डकी प्रदेशका पहाडी भूभागका एक/दुई स्थानमा हल्का वर्षाको सम्भावना रहेको छ । सम्भावित वर्षा र खराब मौसमलाई मध्यनजर गर्दै महाशाखाले आज र भोलि धानबाली भित्र्याउनेलगायतका कृषि कार्य नगर्न अनुरोध गरेको छ । साथै, उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको उच्च जोखिम रहेकाले सतर्कता अपनाउन तथा पर्यटकलाई उच्च हिमाली क्षेत्रमा नजान आग्रह गरिएको छ । सो क्षेत्रमा पुगिसकेका पर्यटकलाई पनि मौसम अनुकूल नहुँदासम्म सुरक्षित स्थानमै रहन भनिएको छ । वर्षासँगै चिसो बढ्ने, जोखिमयुक्त स्थान र सडक छेउमा पहिरो खस्ने तथा सडक र हवाई यातायातलगायत दैनिक जनजीवन प्रभावित हुन सक्ने भएकाले आवश्यक पूर्वतयारी र सतर्कता अपनाउन सर्वसाधारण तथा सम्बन्धित निकायलाई आग्रह गरिएको छ ।
सुनकोशी मरिनसहित सिँचाइ र नदी नियन्त्रणका योजना तीव्र गतिमा, पुससम्म २८२ ठेक्का आह्वान गर्ने लक्ष्य
काठमाडौं । ऊर्जा, जलस्रोत तथा सिँचाइ मन्त्रालय अन्तर्गतको जलस्रोत तथा सिँचाइ विभागले चालु आर्थिक वर्ष २०८३/८४ को सुरुवाती महिनामै सिँचाइ विस्तार, नदी नियन्त्रण र जल उत्पन्न विपद् व्यवस्थापनका काममा उल्लेखनीय गति लिएको छ । विभागको प्रगति विवरणअनुसार भदौ मसान्तसम्म राष्ट्रिय गौरवका आयोजना, सिँचाइ तथा जलस्रोत व्यवस्थापन आयोजना, सिँचाइ व्यवस्थापन कार्यालय र भूमिगत जल सिँचाइ आयोजनाहरूबाट गरी १०२ वटा बोलपत्र आह्वान भइसकेका छन् । यीमध्ये सुनकोशी मरिन डाइभर्सन बहुउद्देश्यीय आयोजनाको करिब २० अर्ब ८५ करोड रुपैयाँ लागत अनुमानको एउटा ठूलो प्याकेज बाहेकका १०१ बोलपत्रको मात्रै कुल लागत अनुमान ३ अर्ब ६३ करोड ६२ लाख पुगेको छ । आर्थिक वर्षको पहिलो दुई महिनामै खरिद प्रक्रिया अघि बढ्नुले यस वर्ष निर्माण कार्य समयमै सुरु हुने र पुँजीगत खर्च बढ्ने अपेक्षा गरिएको विभागका महानिर्देशक दिनेश रजौरियाले बताए । भूमिगत जल सिँचाइमा ३५ बोलपत्र विभागकाअनुसार तराईका किसानलाई वर्षैभरि पानी उपलब्ध गराउने उद्देश्यले भूमिगत जल सिँचाइ आयोजनाहरू झापा, चितवन, रुपन्देही र कैलालीबाट ३१ करोड ७० लाख रुपैयाँ लागत अनुमानका ३५ वटा बोलपत्र आह्वान भएका छन् । यीमध्ये झापामा मात्रै २० वटा बोलपत्र आह्वान भएका छन् र झापा आयोजनाको भौतिक प्रगति भदौ मसान्तसम्म १० प्रतिशत पुगेको छ । यी चार आयोजनाले पुस मसान्तसम्म ८३५ हेक्टरमा भूमिगत जल सिँचाइ पुर्याउने लक्ष्य राखेको विभागका सूचना अधिकारी रामप्रसाद पौडेलले बताए । विभागकाअनुसार मनसुनअघि ८० भन्दा बढी आपतकालीन ठेक्का लागेका छन् । अर्थ मन्त्रालयको २०८३ जेठ ६ गतेको पत्रबाट आपतकालीन नदी नियन्त्रण कार्यका लागि १ अर्ब २४ करोड १२ लाख रुपैयाँ बराबरको बहुवर्षीय स्रोत सहमति प्राप्त भएको थियो । यसअन्तर्गत विभागका १६ वटा आयोजना र कार्यालयमार्फत ३० भन्दा बढी जिल्लामा नदी नियन्त्रणका काम अघि बढेको सूचना अधिकारी पौडेलले बताए । विभागकाअनुसार असार-भदौ अवधिमा मात्रै ८० भन्दा बढी ठेक्का सम्झौता भइसकेका छन्, जसको कुल सम्झौता रकम करिब ८५ करोड ४८ लाख रुपैयाँ छ । रौतहटको लालबकैया (तेजापाकर) र सर्लाहीको बागमती (ध्रुवा) मा कोटेशनमार्फत गरिएका संरक्षणका काम सम्पन्न भइसकेका छन् । धनुषा-महोत्तरी-सिराहाका कमला, रातु, मरहा र औरही नदीका ८ वटा ठेक्काको आशयको सूचना भदौ ५ गते प्रकाशित भइसकेको छ । चितवनमा नारायणी नदीको भरतपुर महानगरपालिका क्षेत्र र नवलपरासी (बर्दघाट सुस्ता पूर्व) तर्फ १८ करोड ४१ लाख रुपैयाँका ठेक्का लागेका छन् । सुनसरी, मोरङ र उदयपुरका सेउती, शेरा, बक्राहा, बुढी, चिसाङ र त्रियुगा खोलामा १४ करोड ४२ लाख रुपैयाँका १२ वटा ठेक्का सम्झौता भएका छन् । बर्दियामा कर्णाली, बबई, औरही र आम्बासा नदीमा ९ करोड ३८ लाख रुपैयाँ र मुस्ताङ, बाग्लुङ, म्याग्दी र पर्वतमा कालीगण्डकी तथा सहायक नदीमा ७ करोड ९९ लाख रुपैयाँका ठेक्का लागेका छन् । कैलाली र कञ्चनपुरमा महाकाली, मोहना, कान्द्रा, दोधा लगायतका नदीमा ६ करोड ९३ लाख रुपैयाँका ठेक्का सम्झौता भएका छन् । सिन्धुपाल्चोकको हेलम्बु, मेलम्ची र याङ्ग्री-लार्के क्षेत्रमा विद्यालय, स्वास्थ्य चौकी, अस्पताल भवन, क्याम्पस र बस्ती संरक्षणका लागि ६ करोड ८३ लाख रुपैयाँका १६ वटा ठेक्का सम्झौता भएको विभागले जनाएको छ । पुस मसान्तसम्म २८२ ठेक्काको लक्ष्य विभागकाअनुसार पुस मसान्तसम्म २८२ वटा बोलपत्र आह्वान गर्ने लक्ष्य राखेको छ, जसको लागत अनुमान करिब ९ अर्ब १६ करोड ४७ लाख रुपैयाँ छ । सोही अवधिमा थप २ हजार ५४९ हेक्टर क्षेत्रमा सिँचाइ सुविधा पुर्याउने लक्ष्य छ । यसमा सतह सिँचाइ १ हजार ९८ हेक्टर, भूमिगत जल सिँचाइ १ हजार १३५ हेक्टर, लिफ्ट सिँचाइ १९६ हेक्टर र जलाशय सिँचाइ १२० हेक्टर समावेश छन् । यसका साथै राजापुर प्रणालीको १४ हजार १३८ हेक्टरमा मर्मत सम्भारमार्फत सिँचाइ सेवा निरन्तर राख्ने, २२.३३ किलोमिटर तटबन्ध निर्माण गर्ने र २११.५ हेक्टर जग्गा उकास गर्ने लक्ष्य छ । ऊर्जा, जलस्रोत तथा सिँचाइमन्त्री विराज भक्त श्रेष्ठले राष्ट्रिय गौरवका आयोजनालाई प्राथमिकतामा राखेर गति दिइएको बताए ।
पत्रकारहरूलाई पक्राउ गरिएपछि कांग्रेसले भन्यो- ‘शाहीकालीन निरङ्कुशताको झल्को दियो’
काठमाडौं । विभिन्न सञ्चारगृहमा प्रहरी प्रवेश गरी पत्रकारहरूलाई नियन्त्रणमा लिने र जनदबाब आएपछि मात्र रिहा गर्ने प्रवृत्तिप्रति नेपाली कांग्रेसले गम्भीर ध्यानाकर्षण गराउँदै कानुनी दायराबाहिरका पक्राउ र ‘ह्यारेसमेण्ट’ तुरुन्त बन्द गर्न सरकारसँग माग गरेको छ । पार्टी सभापति गगनकुमार थापाद्वारा जारी विज्ञप्तिमा समाचार कक्षमै प्रहरी परिचालन गरेर पत्रकारहरूलाई धरपकड गर्ने शैलीले शाही कालको निरङ्कुशताको झल्को दिएको टिप्पणी गरिएको छ । विगतमा पनि शासकहरूमाथि प्रश्न उठ्दा सत्ता र शक्तिको दुरुपयोग गरी सञ्चार क्षेत्रमाथि धाबा बोलिएका घटना स्मरण गराउँदै कांग्रेसले आज पुनः तिनै निरङ्कुश प्रवृत्ति दोहोरिनु लोकतन्त्रका लागि अत्यन्त दुःखद र चिन्ताजनक विषय भएको बताएको छ । स्थापनाकालदेखि नै प्रेस स्वतन्त्रता, नागरिक अधिकार र कानुनको शासनको रक्षाका निम्ति लड्दै आएको स्पष्ट पार्दै कांग्रेसले यस्ता स्वेच्छाचारी कदमविरुद्ध अनवरत उभिने प्रतिबद्धता व्यक्त गरेको छ । स्वतन्त्र पत्रकारितालाई लोकतन्त्रको आधारस्तम्भका रूपमा उल्लेख गर्दै विज्ञप्तिमा कुनै सञ्चार माध्यम वा पत्रकारबाट त्रुटि भएको भए त्यसको निरूपणका लागि प्रेस काउन्सिलजस्ता कानुनी तथा संस्थागत प्रक्रियाहरू विद्यमान रहेको स्मरण गराइएको छ । ती प्रक्रियालाई बेवास्ता गर्दै सञ्चारगृहमा सोझै प्रहरी हस्तक्षेप गर्नु ‘कानुनको शासन’लाई लत्याएर कानुनलाई शासनको औजार बनाउने प्रवृत्तितर्फ उन्मुख हुनु रहेको भन्दै कांग्रेसले यस दमनकारी कदमको कडा शब्दमा भत्र्सना गरेको छ । कांग्रेसले नियन्त्रणमा लिइएका व्यक्तिहरूको संवैधानिक अधिकारको रक्षा गर्न, सञ्चारगृहमा भइरहेको अनावश्यक प्रहरी हस्तक्षेप तुरुन्त रोक्न र कानुनी प्रक्रियाभन्दा बाहिर गएर गरिएका यस्ता कदमहरू तत्काल सच्याउन सरकारसँग जोडदार माग गरेको छ ।
दुग्ध विकास संस्थानका तत्कालीन महाप्रबन्धकसहित ८ जना पक्राउ
काठमाडौं । नेपाल सरकारको स्वामित्वमा रहेको दुग्ध विकास संस्थान (डीडीसी) मा १२ करोड १३ लाख रुपैयाँभन्दा बढीको आर्थिक हानि-नोक्सानी पुर्याई गैरकानुनी लाभ लिएको अभियोगमा संस्थानका तत्कालीन महाप्रबन्धकसहित ८ जना उच्च अधिकारी तथा कर्मचारीहरूलाई प्रहरीको केन्द्रीय अनुसन्धान ब्युरो (सिआइबी) ले पक्राउ गरेको छ । पूर्व-नियोजित योजना र मिलेमतोमा सङ्गठित सञ्जालको आवरणमा विभिन्न समूह खडा गरी संस्थानलाई प्रत्यक्ष १२ करोड १३ लाख ४३ हजार ५ सय ३० रुपैयाँ हानि-नोक्सानी पुर्याएको प्रारम्भिक छानबिनबाट पुष्टि भएपछि उनीहरूलाई पक्राउ गरिएको हो । काठमाडौं जिल्ला अदालत बबरमहलबाट पक्राउ अनुमति लिई मिति २०८३ कात्तिक १३ गते देशका विभिन्न स्थानबाट उनीहरूलाई नियन्त्रणमा लिई मुलुकी अपराध संहिता, २०७४ को ‘आपराधिक विश्वासघात गर्न नहुने कसूर’ तथा ‘सङ्गठित अपराध निवारण ऐन, २०७०’ अन्तर्गत थप अनुसन्धान भइरहेको छ । पक्राउ पर्नेहरूमा सर्लाही बलरा-३ घर भई काठमाडौं लैनचौरस्थित संस्थानको प्रशासन तथा व्यवस्थापन विभाग प्रमुख (तत्कालीन महाप्रबन्धक) ४५ वर्षीय संजिव झा रहेका छन् । उनलाई काठमाडौंको लैनचौरबाट नियन्त्रणमा लिइएको हो। त्यसैगरी, तत्कालीन सिम्ले चिस्यान केन्द्रका इन्चार्ज तथा हाल काठमाडौं दुग्ध वितरण आयोजना बालाजुमा जुनियर टेक्निकल असिस्टेन्टका रूपमा कार्यरत ४६ वर्षीय बिजय कुमार यादव (बालाजु, काठमाडौंबाट) र तत्कालीन भक्तपुर चिस्यान केन्द्रका इन्चार्ज तथा हाल केन्द्रीय कार्यालय लैनचौरमा जेटीएका रूपमा कार्यरत ५५ वर्षीय मनहरी शर्मा (पोखरा, कास्कीबाट) पक्राउ परेका छन् । यसैगरी, तत्कालीन चनौलि चिस्यान केन्द्र इन्चार्ज तथा हाल काठमाडौं दुग्ध वितरण आयोजना सङ्कलन केन्द्रमा जेटीएका रूपमा कार्यरत ४९ वर्षीय रामकेवल रायलाई सर्लाहीको मोहनपुरबाट, बागमती धुलो दूध कारखाना हेटौंडाका भरपाई पदका कर्मचारी २८ वर्षीय जितेन्द्र कुमार यादवलाई चितवनको भरतपुरबाट र नवलपुर/गरुडा चिस्यान केन्द्रका इन्चार्ज (डेरी ब्वाई पद) ३२ वर्षीय नविन राय यादवलाई सर्लाहीको लालबन्दीबाट नियन्त्रणमा लिइएको छ । अन्य पक्राउ पर्नेहरूमा माडी चिस्यान केन्द्र चितवनमा कार्यरत दैनिक पारिश्रमिक पदका कर्मचारी ४६ वर्षीय शिव नन्दन राय र सोही चिस्यान केन्द्रका इन्चार्ज (जेटीए) ४८ वर्षीय विख बहादुर भण्डारी रहेका छन् । उनीहरू दुवै जनालाई चितवनको माडीबाट पक्राउ गरिएको प्रहरीले जनाएको छ । संस्थानलाई गंभीर हानि-नोक्सानी पुर्याउने गरी भएको यस ठगी तथा सङ्गठित अपराधसम्बन्धी घटनामा पक्राउ परेका सबैमाथि थप कानुनी प्रक्रिया अगाडि बढाइएको छ ।
पक्राउ परेका सबै पत्रकार रिहा
काठमाडौं । प्रहरी नियन्त्रणमा परेका सम्पूर्ण पत्रकारहरू रिहा भएका छन् । सञ्चार तथा सूचना प्रविधि मन्त्री डा. विक्रम तिमिल्सिनाले शुक्रबार साँझ सामाजिक सञ्जाल फेसबुकमार्फत पक्राउ परेका सबै पत्रकारहरू रिहा भइसकेको जानकारी दिएका हुन् । मन्त्री तिमिल्सिनाले सरकार प्रेस स्वतन्त्रताप्रति पूर्ण रूपमा प्रतिबद्ध रहेको स्पष्ट पार्दै प्रेस स्वतन्त्रता र जिम्मेवार पत्रकारिता लोकतन्त्रका आधारस्तम्भ भएको उल्लेख गरेका छन् । यसअघि शुक्रबार प्रहरीले विभिन्न सञ्चारमाध्यमका समाचार कक्षमै पुगेर धमाधम पत्रकारहरूलाई नियन्त्रणमा लिएको थियो । प्रहरी टोलीले नेपालप्रेसमा कार्यरत पत्रकार विश्वमणि सुवेदी, डीएनखबरका पत्रकार धीरज बस्नेत र मोटिभेट न्युजका पत्रकार शोभराज बराललाई नियन्त्रणमा लिएको थियो । यसैगरी, नयाँ पत्रिकामा कार्यरत पत्रकार नवराज मैनालीलाई नियन्त्रणमा लिन सादा पोशाकमा खटिएका प्रहरीहरू पत्रिकाको कार्यालयमै प्रवेश गरेका थिए । मैनालीलाई नलगी नजाने भन्दै प्रहरी टोली दुई घण्टाभन्दा बढी समय कार्यालयमै बसेको थियो । पछि साँझपख प्रहरी टोलीले पत्रकार मैनाली र सम्पादक खगेन्द्र पन्तलाई भोलिपल्ट साइबर ब्युरोमा हाजिर हुन उर्दी दिँदै कार्यालयबाट निस्किएको थियो ।
प्रहरीद्वारा समाचार कक्षमै पुगेर पत्रकार पक्राउ गरिएको घटनाप्रति अनलाइन पत्रकार संघको भर्त्सना
काठमाडौं । नेपाल प्रहरीले विभिन्न सञ्चारमाध्यमका कार्यालय तथा समाचार कक्षमै प्रवेश गरी पत्रकारलाई नियन्त्रणमा लिएको, खोजी गरेको र त्रसित बनाएको घटनाप्रति अनलाइन पत्रकार संघले गम्भीर ध्यानाकर्षण गराउँदै घोर भर्त्सना गरेको छ । समाचार संकलन, सम्पादन र प्रकाशनको संवेदनशील कार्य भइरहेको अवस्थामा सादा पोशाकका प्रहरी सञ्चारगृहमै पुगेर धरपकड गर्नु प्रेस स्वतन्त्रता र स्वतन्त्र पत्रकारिताको स्थापित मान्यताविपरीत भएको संघका सचिव सन्तोष रोकायाद्वारा जारी विज्ञप्तिमा उल्लेख छ । समाचारको विषयलाई लिएर अनुसन्धान गर्नुपरे कानुनी प्रक्रिया र स्थापित विधि अवलम्बन गरिनुपर्नेमा सञ्चारगृहमा प्रवेश गरेर भयभीत बनाउने शैली कुनै पनि अवस्थामा स्वीकार्य हुन नसक्ने संघको स्पष्ट पार्दै भनाइ छ । विज्ञप्तिमा समाचारको स्रोत खुलाउन दबाब दिने, धम्की दिने वा स्रोतको गोपनीयता भङ्ग गर्न बाध्य पार्ने कार्य पत्रकारिताको आधारभूत मूल्य र मान्यताविरुद्ध भएको औंल्याइएको छ । समाचारको स्रोतको गोपनीयता पत्रकारको व्यक्तिगत सुविधा मात्र नभई स्वतन्त्र पत्रकारिता र नागरिकको सूचनाको हकसँग जोडिएको महत्त्वपूर्ण विषय भएकाले स्रोतको सुरक्षा सुनिश्चित नभए खोजमूलक पत्रकारिता र सत्तालाई जवाफदेही बनाउने अभ्यास नै कमजोर हुने संघले चेतावनी दिएको छ । नेपालको संविधानले प्रेस तथा अभिव्यक्ति स्वतन्त्रताको प्रत्याभूति गरेको स्मरण गराउँदै संघले प्रकाशित समाचारप्रति कसैको असहमति वा गुनासो भए त्यसको निरूपणका लागि प्रेस काउन्सिल नेपालमा उजुरी दिने जस्ता कानुनसम्मत प्रक्रियाहरू विद्यमान रहेको बताएको छ । तर, ती प्रक्रियालाई छलेर प्रहरी प्रयोग गर्ने, समाचार कक्षमै नियन्त्रणमा लिने र सञ्चारमाध्यमको नियमित काममा अवरोध पुर्याउने कदमले प्रेस स्वतन्त्रतामाथि गम्भीर प्रश्न खडा गरेको उल्लेख छ । पत्रकारिताका नाममा हुने गैरजिम्मेवार गतिविधिप्रति असहमति राख्दै आएको स्पष्ट पार्दै संघले समाचारमा चित्त नबुझ्ने वा राज्य पक्षले विद्यमान कानुन अनुसार नै व्यवहार गर्नुपर्नेमा जोड दिएको छ । व्यावसायिक पत्रकारिता गरिरहेका पत्रकार र सञ्चारमाध्यममाथि समाचारको स्रोत खोज्ने वा विमति राख्ने बहानामा राज्यको तर्फबाट हुने फौजदारी प्रकृतिको व्यवहार कदापि सह्य नहुने विज्ञप्तिमा भनिएको छ । सञ्चारमाध्यमको संवैधानिक अधिकार, प्रेस स्वतन्त्रता, समाचार स्रोतको गोपनीयता र कानुनी प्रक्रियाको पूर्ण सम्मान हुनुपर्ने मान्यता दोहोर्याउँदै अनलाइन पत्रकार संघले पत्रकारमाथि हुने जुनसुकै प्रकारको गैरकानुनी धरपकड, धम्की र प्रेस स्वतन्त्रतामाथिको हस्तक्षेपविरुद्ध दृढतापूर्वक उभिने प्रतिबद्धता व्यक्त गरेको छ ।
