सामान्य प्रशासन मन्त्री प्रतिभा रावलको सम्पत्ति: श्रीमान्को आयबाट काठमाडौं र बारामा जग्गा, २५ तोला सुन
काठमाडौं । संघीय मामिला तथा सामान्य प्रशासन एवं भूमि व्यवस्था, सहकारी तथा गरिबी निवारण मन्त्री प्रतिभा रावलले आफ्नो सम्पत्ति विवरण सार्वजनिक गरेकी छिन् । आइतबार साँझ प्रधानमन्त्री तथा मन्त्रिपरिषद् कार्यालयले सार्वजनिक गरेको विवरण अनुसार मन्त्री प्रतिभा रावलको काठमाडौं र बारामा गरी १ करोड २० लाख बराबरको जग्गा र विलासी सवारी साधन रहेको देखिएको छ । मन्त्री रावलले बुझाएको विवरण अनुसार काठमाडौंको बूढानीलकण्ठमा ७० लाख रुपैयाँ र बारामा ५० लाख रुपैयाँ मूल्य पर्ने जग्गा रहेको छ । यी दुवै जग्गा खरिदको मुख्य स्रोत उनले आफ्नो श्रीमान्को आयलाई देखाएकी छिन् । त्यस्तै, उनीसँग २५ तोला सुन रहेको छ । उक्त सुनको प्राप्तिको स्रोत स्वआर्जन र परिवारबाट प्राप्त उपहार भएको विवरणमा उल्लेख छ । आर्थिक कारोबारका हकमा विभिन्न बैंकहरूमा उनको नाममा २४ लाख रुपैयाँभन्दा बढी बचत रहेको छ । यो रकम पनि श्रीमान्कै आम्दानीबाट जम्मा भएको उनले खुलाएकी छिन् । सवारी साधनतर्फ मन्त्रीसँग ४४ लाख रुपैयाँ मूल्यको गाडी रहेको छ । विवरणमा मन्त्रीले बैंक ऋणको दायित्व पनि उल्लेख गरेकी छिन् । उनले एभरेष्ट बैंकबाट २०८२ साल जेठ महिनामा २० लाख रुपैयाँ ऋण लिएको सम्पत्ति विवरणमा खुलाइएको छ । सरकारले पारदर्शिताका लागि प्रधानमन्त्री बालेन्द्र शाहसहित सबै मन्त्रीहरूको सम्पत्ति विवरण एकसाथ सार्वजनिक गरेको हो ।
शिक्षामन्त्री सस्मित पोखरेलको २३ करोड बढीको खुद सम्पत्ति: साढे २० करोडको घरजग्गा, ७५ लाख ऋण
काठमाडौं । प्रधानमन्त्री बालेन्द्र शाह नेतृत्वको सरकारका प्रवक्ता एवं शिक्षा, विज्ञान तथा प्रविधि र युवा तथा खेलकुद मन्त्री सस्मित पोखरेलको पनि सम्पत्ति विवरण सार्वजनिक भएको छ । आइतबार साँझ प्रधानमन्त्री तथा मन्त्रिपरिषद् कार्यालयले सार्वजनिक गरेको विवरण अनुसार मन्त्री पोखरेलले आफ्नो र परिवारको संयुक्त नाममा काठमाडौं, ललितपुर र मोरङका विभिन्न ७ स्थानमा घरजग्गा रहेको खुलाएका छन् । बुवा, आमा, मावली हजुरआमा र दिदीबहिनीको समेत संयुक्त स्वामित्वमा रहेको उक्त अचल सम्पत्तिको मूल्य करिब साढे २० करोड रुपैयाँ रहेको विवरणमा उल्लेख छ । साथै, २५ तोला सुन, सय तोला चाँदी रहेको विवरण उल्लेख गरेका छन् । उनले आफ्नो बैंक खातामा ४ लाख ४७ हजार ९९४ रुपैयाँ मौज्दात रहेको उल्लेख गरेका छन् भने डलर खातामा अमेरिकी डलर ५ रहेको उल्लेख छ । उनले पारिवारिक सदस्यसहितले संयुक्त रुपमा शेयर कारोबारमा पनि लगानी गरेको सम्पत्ति विवरणमा उल्लेख गरेका छन् । बुवा रमेशकुमार पोखरेलसहितका सदस्यहरूले पीएमएस होल्डिङ्समा विभिन्न कम्पनीका शेयरहरू करिब ३० लाख बराबरको लगानी गरेको उल्लेख गरेका छन् । बुवा रमेशकुमारकै राष्ट्रिय बचत पत्रमा ९६ लाख ९० हजार रुपैयाँ बराबरको रकम राष्ट्र बैंकबाट निवृत्त हुँदा पाएको रकमलाई शेयर खरिदको रुपमा राखेका छन् । आमा मिनाक्षी ओझा पोखरेलको नाममा राष्ट्रिय बचत पत्रमा ५० लाख रुपैयाँ बराबरको शेयर रहेको उल्लेख गरेका छन् । उनले आफू र आमा मिनाक्षीको नाममा ७५ लाख ऋण रहेको विवरण देखाएका छन् । हिमालयन बैंकमा आफ्नो नाममा २५ लाख र माच्छापुच्छ्रे बैंकमा आमाको नाममा ५० लाख कर्जा रहेको उल्लेख छ । बुवा र आफ्नो नाममा दुईवटा सवारी साधन रहेको उनले सम्पत्ति विवरणमा उल्लेख गरेका छन् । सम्पत्ति विवरणमा कूल सम्पत्ति २४ करोड १६ लाख २७ हजार र ऋण ७५ लाख रहेको उल्लेख गरेका छन् । उनको खुद सम्पत्ति २३ करोड ४१ लाख २७ हजार रहेको उल्लेख छ ।
कृषि र वनमन्त्री गीता चौधरीको सम्पत्ति: माइतीको बाख्रादेखि ऋणको स्कुटरसम्म
काठमाडौंं । प्रधानमन्त्री तथा मन्त्रिपरिषद् कार्यालयले आइतबार सार्वजनिक गरेको मन्त्रीहरूको सम्पत्ति विवरण अनुसार कृषि तथा पशुपन्छी र वन तथा वातावरण मन्त्री गीता चौधरीको सम्पत्ति विवरणमा केही रोचक तथ्यहरू देखिएका छन् । मन्त्री चौधरीले आफ्नो सम्पत्ति विवरणमा घडीदेखि ल्यापटपसम्मको मूल्य स्पष्टसँग उल्लेख गरेकी छिन्। उनले ५० हजारको घडी लाउने गरेको पाइएको छ । यस्तै, स्वआर्जनबाट ५० हजार रुपैयाँ पर्ने घडी रहेको छ भने मोबाइल ९० हजार रुपैयाँ र ल्याप्टप ७५ हजार रुपैयाँ रहेको पाइएको छ । उनको नाममा ५ तोला सुन र १०० तोला चाँदी रहेको छ । उक्त सुन र चाँदीको आयस्रोत पैतृक र स्वआर्जन रहेको जनाइएको छ । ५ वटा बैंकमा गरी मन्त्री चौधरीको नाममा १ लाख २६ हजार रुपैयाँ रहेको विवरणमा उल्लेख छ । मन्त्री चौधरीले ऋण काढेर एउटा स्कुटर खरिद गरेको उल्लेख छ । स्कुरट खरिद गर्दा लिएको १ लाख ५० हजार मध्ये ८४ हजार रुपैयाँ भुक्तानी गरिसकेको उल्लेख छ । स्वआर्जनबाट ३ लाख ३० हजार मूल्यको अर्को पनि स्कुटर रहेको सम्पत्ति विवरणमा उल्लेख छ । सम्पत्तिको नाममा माइतीले दिएको २ वटा बाख्रा र १० कुखुरा रहेको विवरणमा उल्लेख छ ।
ऊर्जामन्त्री विराजभक्त श्रेष्ठको सम्पत्ति: ५८ लाख बैंक ब्यालेन्स, १.४५ करोडको सेयर र १५ तोला सुन
काठमाडौं । ऊर्जामन्त्री विराजभक्त श्रेष्ठले आफूसँग १५ तोला सुन र ५० तोला चाँदी रहेको खुलाएका छन् । सार्वजनिक सम्पत्ति विवरणमा उनले सुन र चाँदी पैतृक र विवाहबाट प्राप्त भएको खुलाएका छन् । त्यस्तै, उनले विभिन्न बैंकमा ५८ लाख ६४ हजार ६३६ रुपैयाँ ब्यालेन्स रहेको उल्लेख गरेका छन् । त्यस्तै, सेयरमा १ करोड ४५ लाख ४८ हजार ४२० रुपैयाँ रहेको विवरण छ । उनीसँग गाडी, स्कुटर र इभी गाडी रहेको पनि उल्लेख छ ।
मन्त्री सीता वादीको सम्पत्ति : २० कुखुरा र एउटा कुकुरदेखि १८ तोला सुनसम्म
काठमाडौं । महिला, बालबालिका तथा ज्येष्ठ नागरिक मन्त्री सीता वादीको सम्पत्ति विवरण सार्वजनिक भएको छ । प्रधानमन्त्री तथा मन्त्रिपरिषद् कार्यालयले आइतबार सार्वजनिक गरेको विवरणमा मन्त्री वादीको सम्पत्ति अन्य मन्त्रीहरूको तुलनामा केही भिन्न देखिएको छ । मन्त्री वादीले आफ्नो सम्पत्ति विवरणमा घरमा पालिएका पशुपन्छीको समेत फेहरिस्त बुझाएकी छिन् । विवरण अनुसार उनीसँग २० वटा कुखुरा र एउटा कुकुर रहेको छ। यसका साथै उनीसँग अन्य विद्युतीय र सवारी साधनहरू छन् । मन्त्री वादीको नाममा एउटा स्कुटर र श्रीमानको नाममा एउटा पल्सर मोटरसाइकल तथा ३ वटा ल्यापटप र २ वटा मोबाइल छन् । आर्थिक कारोबारका हकमा उनीसँग नगद ५० हजार रुपैयाँ रहेको छ भने बैंक खातामा उनी र श्रीमानको नाममा गरी कुल १५ लाख रुपैयाँ मौज्दात रहेको छ । गरगहनातर्फ मन्त्री वादीसँग १८ तोला सुन र १५ तोला चाँदी रहेको उल्लेख छ । यो सुनचाँदी उनले विवाहको समयमा उपहार स्वरूप प्राप्त गरेको विवरणमा खुलाइएको छ । जग्गाजमिनको विवरण अनुसार मन्त्री वादीको नाममा सुर्खेतमा ८९.६५ वर्ग मिटर क्षेत्रफलको एउटा जग्गा रहेको छ । सरकारले पारदर्शिताका लागि सार्वजनिक गरेको यस विवरणले मन्त्रीहरूको आर्थिक अवस्था र जीवनशैलीको झलक दिएको छ । मन्त्री वादीको विवरणमा घरपालुवा पशुपन्छी समेत उल्लेख हुनुलाई धेरैले उनको सरल र व्यावहारिक पक्षका रूपमा लिएका छन् ।
गृहमन्त्री सुधन गुरुङसँग साढे ४ करोडको सेयर, धनकुटामा जग्गा
काठमाडौं । गृहमन्त्री सुधन गुरुङको ४ करोड ३१ लाख रुपैयाँभन्दा बढी सेयरमा लगानी रहेको छ। प्रधानमन्त्री तथा मन्त्रिपरिषद् कार्यालयले सार्वजनिक गरेको सम्पत्ति विवरणअनुसार गुरुङको कुल ४ करोड ३१ लाख रुपैयाँ बराबरको लगानी रहेको देखिएको हो। विवरणअनुसार, होप होल्डिङ्स प्रालिमा ३० हजार कित्ता सेयर रहेको छ, जसको मूल्य करिब ३० लाख रुपैयाँ रहेको छ। त्यस्तै, लगुम प्रिमियम अपार्टमेन्ट्स प्रालिमा ५ हजार ७ सय कित्ता सेयर रहेको छ, जसको मूल्य ५७ लाख रुपैयाँ बराबर रहेको उल्लेख गरिएको छ। पुँजी बजारमा कारोबार हुने अन्य सेयरहरूमा उनले २ करोड ७४ लाख ५६ हजार २ सय रुपैयाँ लगानी गरेको जनाएका छन्, जसको स्रोत व्यवसायीक तथा पैतृक सम्पत्ति रहेको उल्लेख छ। साथै, एड्भेन्चर भिल्ला प्रालिमा ७० हजार कित्ता सेयर रहेको छ, जसको मूल्य करिब ७० लाख रुपैयाँ रहेको छ। सवारी साधनतर्फ, लगुम प्रिमियम अपार्टमेन्ट्सको नाममा करिब ४७ लाख ९९ हजार रुपैयाँ मूल्य बराबरको एमजी-एस५ कार रहेको छ। जग्गातर्फ, गुरुङको नाममा धनकुटाको कार्कीछापमा १९ रोपनी १५ आना जग्गा रहेको छ। साथै उनका बुवा दिलबहादुर गुरुङको नाममा चितवनको भरतपुर-१८ मा ३० कट्ठा तथा हजुरबुबा रामसल गुरुङको नाममा गोरखामा २२१ रोपनी जग्गा रहेको विवरणमा उल्लेख गरिएको छ।
यातायातमन्त्री सुनिल लम्सालको सम्पत्ति: ९० लाख बैंक ब्यालेन्स, ३० तोला सुन र विभिन्न जिल्लामा जग्गा
काठमाडौं । भौतिक पूर्वाधार तथा यातायात एवं सहकारी विकास मन्त्री सुनिल लम्सालको सम्पत्ति विवरण सार्वजनिक भएको छ । प्रधानमन्त्री तथा मन्त्रिपरिषद् कार्यालयले आइतबार सार्वजनिक गरेको मन्त्रिपरिषद्का सदस्यहरूको सम्पत्ति विवरण अनुसार मन्त्री लम्सालसँग उल्लेख्य बैंक मौज्दात, सुनचाँदी र विभिन्न जिल्लामा घरजग्गा रहेको छ । लम्सालसँग ९० लाख रुपैयाँ बैंक ब्यालेन्स रहेको उल्लेख गरेका छन् । सार्वजनिक सम्पत्ति विवरणमा उनीसँग ३० तोला सुन र ५० तोला चाँदी रहेको उल्लेख छ । उनले परिवारका सदस्यका नाममा रुपन्देहीमा १ कठ्ठा १० धुर जग्गामा घर, नवलपरासीमा १० कठ्ठा १५ धुर जग्गा, स्याङ्जामा ७ रोपनी खेत, २२ रोपनी बारी रहेको उल्लेख गरेका छन् ।
कानुनमन्त्री सोविता गौतमको सम्पत्ति : १५ तोला सुन, बैंकमा १० लाख मौज्दात र दुईवटा गाडी
काठमाडौं । नेपाल सरकारका कानुन, न्याय तथा संसदीय मामिला मन्त्री सोविता गौतमको सम्पत्ति विवरण सार्वजनिक भएको छ। प्रधानमन्त्री तथा मन्त्रिपरिषद् कार्यालयले आइतबार सार्वजनिक गरेको मन्त्रिपरिषद् सदस्यहरूको सम्पत्ति विवरण अनुसार मन्त्री गौतमसँग सुन, चाँदी, नगद मौज्दात र सवारी साधन रहेको छ । गौतमले बैंक ब्यालेन्स स्वरुप १० लाख ५० हजार ३३५ रुपैयाँ मौज्दात रहेको उल्लेख गरेकी छिन् । त्यस्तै, उनले दुईवटा बैंकबाट ऋण पनि लिएको आफ्नो सम्पत्ति विवरणमा उल्लेख गरेकी छिन् । जस अनुसार, गाडी खरिदका लागि राष्ट्रिय वाणिज्य बैंकबाट २० लाख लिएको र त्यसमा ७ लाख तिरेको उल्लेख गरेकी छिन् । एभरेष्ट बैंकबाट गाडी खरिदकै लागि २५ लाख ऋण लिएको उनले आफ्नो सम्पत्ति विवरणमा उल्लेख गरेकी छिन् । उनले १५ तोला सुन, ९ तोला चादी र १ तोला हिरा पनि रहेको सम्पत्ति विवरणमा उल्लेख गरेकी छिन् । उनले आफ्नो सम्पत्ति विवरणमा सवारी साधन खरिद गरेको विषय पनि उल्लेख गरेकी छिन् । राष्ट्रिय वाणिज्य बैंकबाट २६ लाख ऋण लिएर बा ०१-०२९ च ४३३६ नम्बरको गाडी खरिद गरेको उल्लेख गरेकी छिन् । उक्त सम्पत्ति प्राप्तिको स्रोत ऋण र तलब भएको सम्पत्ति विवरणमा उल्लेख छ । श्रीमान गृहेन्द्र घिमिरेले एभरेष्ट बैंकबाट ९५ लाख ऋण लिएर बा ३ च ६७२२ नम्बरको गाडी खरिद गरेको उल्लेख छ । उक्त गाडी ऋण, तलब र पुरानो गाडी एक्सचेन्ज गरेर खरिद गरिएको विवरणमा उल्लेख छ ।
