पत्रकार पक्राउ गर्नु सर्वसत्तावादी प्रवृत्तिको पराकाष्ठा हो : नेपाली कांग्रेस
काठमाडौं । नेपाली कांग्रेसले समाचार संकलन तथा प्रकाशन गरेकै आधारमा पत्रकार पक्राउ गर्नु सर्वसत्तावादी प्रवृत्तिको पराकाष्ठा भएको बताएका छन् । पत्रकार पक्राउ गरिएको घटनाप्रति आपत्ति जनाउँदै महामन्त्री प्रदीप पौडेलले सरकारलाई तत्काल आफ्नो कदम सच्याउन आग्रह गरेका छन् । उनले पक्राउ परेका पत्रकारलाई अविलम्ब ससम्मान रिहा गर्नसमेत माग गरेका छन् । सार्वजनिक पदमा रहेका व्यक्तिका गतिविधि, न्यायिक शुद्धता र शक्तिको दुरुपयोगबारे खोजी गरी नागरिकलाई सुसूचित गराउनु प्रेसको संवैधानिक कर्तव्य भएको उनको भनाइ छ । कुनै समाचारप्रति आपत्ति वा असहमति भए त्यसको निरूपण गर्ने कानुनी बाटो खुला रहेको उनले बताएका छन् । तर, स्थापित कानुनी प्रक्रिया छाडेर प्रहरी परिचालन गरी पत्रकारलाई पक्राउ गर्नु विधिको शासनविपरीत भएको उनको टिप्पणी छ । ‘प्रश्न सोधेकै भरमा कलम चलाउने हातहरूमा हतकडी लगाउने दुस्साहसले सरकार स्वयंलाई निरंकुशताको कठघरामा उभ्याउँछ,’ पौडेलले भनेका छन् । उनले सञ्चारगृहमाथिको अनावश्यक हस्तक्षेप र निगरानी तत्काल बन्द गर्न पनि माग गरेका छन् । पत्रकारलाई पक्राउ गरेर तर्साउनुको सट्टा कानुनी प्रक्रियामार्फत सत्यतथ्य छानबिन गर्नुपर्ने उनको भनाइ छ । विगतमा पनि गाडी तेर्साएर पत्रकारलाई आतंकित बनाउने प्रयास भएको स्मरण गर्दै पौडेलले अहिले त्यस्तै प्रवृत्ति राज्यसंयन्त्रबाटै दोहोरिनु लज्जास्पद र अस्वीकार्य भएको बताएका छन् । आफ्ना कमजोरी लुकाउन सञ्चारमाध्यमलाई तर्साउने प्रयास नगर्न उनले सरकारलाई चेतावनीसमेत दिएका छन् । प्रहरी भन्छ : हामीविरुद्ध गलत समाचार लेख्नेलाई पक्राउ गर्छौं समाचार कक्षमा प्रहरी, पत्रकार धमाधम पक्राउ
पक्राउ गरिएका पत्रकारलाई तत्काल रिहा गर: प्रेस काउन्सिल
काठमाडौं । प्रेस काउन्सिल नेपालले विभिन्न सञ्चारमाध्यमका समाचार कक्षमा प्रवेश गरी प्रहरीले पत्रकारलाई नियन्त्रणमा लिएको तथा पक्राउ गर्ने प्रयास गरेको घटनाप्रति गम्भीर ध्यानाकर्षण भएको जनाएको छ । शुक्रबार सादा पोसाकका प्रहरीले नेपाल प्रेस, नयाँ पत्रिका लगायत विभिन्न सञ्चारमाध्यमका समाचार कक्षमै प्रवेश गरी पत्रकारलाई नियन्त्रणमा लिएको घटनाप्रति आपत्ति जनाउँदै काउन्सिलले पक्राउको स्पष्ट कारण र पूर्जी नदेखाइएको तथा अदालतको अनुमति लिइएको नदेखिएको जनाएको छ । अपराधको जाहेरी परेको विषयसमेत स्पष्ट नभएको अवस्थामा लगातार दुई दिन सार्वजनिक बिदा पर्नुअघि पत्रकारलाई नियन्त्रणमा लिनु गम्भीर आपत्तिको विषय भएको काउन्सिलको भनाइ छ । प्रहरी प्रधान कार्यालयबाट जारी विज्ञप्तिको पृष्ठभूमिमा भएको यस घटनाले प्रेस स्वतन्त्रता र पत्रकारको व्यावसायिक सुरक्षामाथि गम्भीर प्रश्न उठाएको काउन्सिलले जनाएको छ । सञ्चारमाध्यममा प्रकाशित समाचार सामग्रीप्रति असहमति वा पत्रकार आचारसंहितासम्बन्धी उजुरी भए त्यसको छानबिन, अनुगमन र निरूपण गर्ने कानुनी जिम्मेवारी प्रेस काउन्सिल नेपालको भएको विज्ञप्तिमा उल्लेख छ । समाचारकै विषयमा सिधै प्रहरी परिचालन गर्नुभन्दा काउन्सिलको स्थापित विधि र प्रक्रियामार्फत समाधान खोज्न नेपाल सरकार, प्रहरी प्रशासन तथा सम्बन्धित सबै पक्षलाई काउन्सिलले आग्रह गरेको छ । काउन्सिलले नियन्त्रणमा लिइएका पत्रकारको अवस्था र पक्राउको कानुनी आधार तत्काल सार्वजनिक गर्न पनि माग गरेको छ । कानुनी आधारबिना नियन्त्रणमा राखिएको भए पत्रकारलाई तत्काल रिहा गर्न आग्रह गर्दै काउन्सिलले पत्रकार तथा सञ्चारमाध्यमलाई सत्यतथ्यमा आधारित समाचार सम्प्रेषण गर्न र पत्रकार आचारसंहिताको पूर्ण पालना गर्न अनुरोध गरेको छ । प्रेस स्वतन्त्रताको संरक्षण र मर्यादित पत्रकारिताको संवद्र्धनका लागि सदैव प्रतिबद्ध रहेको काउन्सिलले जनाएको छ ।
प्रहरी भन्छ : हामीविरुद्ध गलत समाचार लेख्नेलाई पक्राउ गर्छौं
काठमाडौं । प्रहरी संगठनविरुद्ध झुटा अफवाह फैलाएको आरोपमा पत्रकारहरूलाई नियन्त्रणमा लिएको प्रहरीले जनाएको छ । काठमाडौं उपत्यका प्रहरी कार्यालयका प्रवक्ता गोविन्द थपलियाले प्रहरीविरुद्धका सामग्रीलाई गम्भीर अपराधका रूपमा लिएकाले पत्रकारहरूलाई पक्राउ गरिएको जानकारी दिए । ‘प्रहरी संगठनविरुद्ध समाचार लेख्ने सञ्चारमाध्यमविरुद्ध प्रहरी सक्रिय भएको छ,’ उनले विकासन्युजसँग भने । थपलियाका अनुसार प्रकाशित सामग्रीले नेपाल प्रहरीका करिब ८० हजार कर्मचारीविरुद्ध नकारात्मक सन्देश फैलाएको छ । त्यस्ता अफवाह फैलाउनेलाई प्रेस काउन्सिलको क्षेत्राधिकारभन्दा बाहिर रहेर पनि प्रचलित कानुनअनुसार कारबाही गरिने उनले बताए । समाचार गलत भए प्रेस काउन्सिलमार्फत जानु पर्दैन ? भन्ने विकासन्युजको प्रश्नमा उनले भने, ‘प्रेस काउन्सिलले हेर्ने छुट्टै विषय छ। प्रहरीले कानुनबमोजिम गर्नुपर्ने काम गर्छौं ।’ प्रहरीले नेपालप्रेसका पत्रकार विश्वमणि सुवेदीलाई पक्राउ गरेको छ । यस्तै, नेपाल प्रहरीको टोली नयाँ पत्रिकाको कार्यालयमा पनि पुगेको छ । प्रहरीले पत्रकार नवराज मैनालीलाई खोजिरहेको जनाइएको छ । यसैगरी डीएनए खबरका धिरज बस्नेत र मोटिभेटन्युजका अध्यक्ष तथा प्रधानसम्पादक शोभराज बराललाई पनि प्रहरीले पक्राउ गरेको छ । दियोपोस्टको कार्यालयमा समेत प्रहरी पुगेको जानकारी प्राप्त भएको छ । समाचार कक्षमा प्रहरी, पत्रकार धमाधम पक्राउ
ब्राजिलको राष्ट्रपति चुनावलाई ट्रम्पले भने– ‘लज्जास्पद र जनताको अपमान’
काठमाडौं । अमेरिकी राष्ट्रपति डोनाल्ड ट्रम्पले ब्राजिलमा सम्पन्न राष्ट्रपति चुनावलाई ‘लज्जास्पद’ र ब्राजिलका जनताका लागि ‘अपमानजनक’ भएको टिप्पणी गरेका छन् । वासिङ्टनमा पत्रकारहरूसँग कुरा गर्दै ट्रम्पले ब्राजिलको चुनावमा आफूले कुनै पनि उम्मेदवारको पक्ष नलिएको दाबी गरे । उनले भने, ‘मैले चुनावमा कसैको पक्ष लिएको थिइनँ । तर, ब्राजिलमा जे भयो, त्यो देखेपछि त्यसलाई शब्दमा व्यक्त गर्नै गाह्रो भयो ।’ ब्राजिलको राष्ट्रपति चुनावमा लुइज इनासियो लुला दा सिल्भाले शानदार पुनरागमन गर्दै जित हासिल गरेका छन् । यो जितसँगै वर्कर्स पार्टीका ८० वर्षीय नेता लुलालाई चौथोपटक राष्ट्रपति बन्ने अवसर मिलेको छ । उनले राष्ट्रपति चुनावमा कट्टर दक्षिणपन्थी प्रतिद्वन्द्वी तथा लिबरल पार्टीका नेता फ्लाभियो बोल्सोनारोलाई झिनो मतान्तरले पराजित गरेका हुन् । आइतबार सम्पन्न दोस्रो चरणको मतदानमा लगभग सबै मतगणना सकिँदा लुलाले ५१.७६ प्रतिशत मत प्राप्त गरेका छन् । उनका प्रतिद्वन्द्वी फ्लाभियो बोल्सोनारोले ४८.२४ प्रतिशत मत पाएका छन् । फ्लाभियो जेलमा रहेका ब्राजिलका पूर्वराष्ट्रपति जायर बोल्सोनारोका छोरा हुन् । लुलाको जित विभिन्न चुनावी सर्वेक्षणका अनुमानविपरीत आएको हो । ती सर्वेक्षणहरूले बोल्सोनारोले झिनो मतान्तरले अग्रता लिने अनुमान गरेका थिए । यसअघि अक्टोबरको सुरुवातमा भएको पहिलो चरणको मतदानमा ४५ वर्षीय सिनेटर फ्लाभियो बोल्सोनारोले करिब दुई प्रतिशत अंकको अग्रता हासिल गरेका थिए । तर, दोस्रो चरणको मतदानमा लुलाले नतिजा उल्ट्याउँदै जित हासिल गरेका हुन् ।
विकासन्युजको समाचारमा दीपक भट्टका बुबाको खण्डन
काठमाडौं । विकास मिडियाद्वारा सञ्चालित विकासन्युज डटकममा मिति २०८३ असोज २१ गते प्रकाशित ‘चोलेन्द्रदेखि दीपक र वंशीराजसम्म फैलिएको लहरो’ शीर्षकको समाचारमा दीपक भट्टका बुबा चर्तुभुज भट्टले खण्डन पठाएका छन् । यवसायी दीपक भट्टले पूर्वप्रधानन्यायाधीश चोलेन्द्रशमशेर जबरालाई कारागारबाट फोन सम्पर्क गरी मुद्दामा चलखेल गरेको भन्ने समाचारमा प्रकाशित दाबीलाई चतुर्भुज भट्टले अस्वीकार गरेका हुन् । उनले अदालतबाट न्याय प्राप्त हुनेमा आफू पूर्ण विश्वस्त रहेको र आफूसँग जोडेर फैलाइएका अफवाह निराधार रहेको दाबी गरेका छन् । चतुर्भुज भट्टले आफ्नो खण्डन तथा प्रतिक्रियालाई सम्बन्धित सञ्चारमाध्यममा प्रमुखताका साथ प्रकाशित गर्न अनुरोध गरेका छन् । खण्डनपत्रको बोधार्थ प्रेस काउन्सिल नेपाललाई समेत दिइएको छ ।
समाचार कक्षमा प्रहरी, पत्रकार धमाधम पक्राउ
काठमाडौं । शुक्रबार साँझ नेपाल प्रहरी विभिन्न सञ्चारमाध्यमको समाचार कक्षमा पुगेर पत्रकारहरूमाथि धरपकड सुरु गरेको छ । सादा पोशाकका प्रहरीहरू समाचार कक्षमा प्रवेश गरेर पत्रकारलाई धमाधम पक्राउ गरिरहेको हो । प्रहरीले नेपालप्रेसका पत्रकार विश्वमणि सुवेदीलाई पक्राउ गरेको छ । नेपालप्रेसको कार्यालयमा पुगेर प्रहरीले उनलाई पक्राउ गरेको हो । सादा पोशाकमा पुगेका प्रहरीले सुवेदीलाई कार्यालयबाट पक्राउ गरेको नेपालप्रेसका प्रधानसम्पादक मातृका पौडेलले जानकारी दिए । उनका अनुसार समाचारको स्रोत पत्रकारको मृत्युसँगै समाप्त हुने बताएका छन् । बुट र धम्की अनि हतकडीको डरले स्रोतमाथिको विश्वासघात गर्न नसकिने उनको भनाइ छ । ‘समाचारको स्रोत सार्वजनिक गर्ने विषय हाम्रो आचारसंहिता र विश्वव्यापी नैतिकताले पनि दिँदैन,’ उनले भने,‘ नेपाल प्रेसको समाचार कक्षबाट पत्रकार विश्वमणि सुवेदीलाई पक्राउ गरेलगत्तै मलाई र अध्यक्ष विन्दु लम्साललाई साइबर ब्युरोमा बोलाइएकाले हामी यहाँ उपस्थित छौं ।’ नेपाल प्रहरीको साइबर ब्यूरोले सुवेदीलाई समाचारको विषयलाई लिएर नियन्त्रणमा लिएको बुझिएको छ । सुवेदीलाई पक्राउ नभई सोधपुछका लागि मात्र नियन्त्रणमा लिएको एक प्रहरी अधिकृतले विकासन्युजलाई जानकारी दिए । यस्तै, नेपाल प्रहरी नयाँ पत्रिकामा पनि पुगेको छ । प्रहरीले नवराज मैनालीलाई खोजिरहेको छ । नयाँ पत्रिकाले नेपाल प्रहरी अहिलेसम्म कार्यालयमै रहेको र प्रहरीले पत्रकारहरूसँग छलफलमा गरिरहेको जानकारी दिएको छ । ‘हुल बाँधेर एक जत्था नयाँ पत्रिकामा प्रवेश गरेको छ । सिभिल ड्रेसमा माथिको आदेश भन्दै सहकर्मी नवराज मैनालीलाई खोजिरहेको छ,’ एक नयाँ पत्रिकाकर्मीले भने । यस्तै, डीएनए खबरका धिरज बस्नेत, मोटिभेटन्युजका अध्यक्ष तथा प्रधान सम्पादक शोभराज बराललाई पनि पक्राउ गरेको छ । यस्तै, दियो पोष्टमा पनि प्रहरी पुगेको जानकारी दिएको छ ।
एलडीसी स्तरोन्नतिको तयारी अवधि थप गर्ने निर्णयको महासंघले गर्यो स्वागत
काठमाडौं । नेपाललाई अति कम विकसित मुलुक (एलडीसी) को सूचीबाट स्तरोन्नति हुने प्रक्रियाका लागि आवश्यक तयारी अवधि सन् २०२९ नोभेम्बर २४ सम्म थप गर्ने संयुक्त राष्ट्रसंघको महासभाको निर्णयलाई नेपाल उद्योग वाणिज्य महासंघले स्वागत गरेको छ । संयुक्त राष्ट्रसंघको ८१औं महासभाले बिहीबार नेपाल र बङ्गलादेशको स्तरोन्नतिका लागि तयारी अवधि थप गर्ने निर्णय गरेको हो । यस निर्णयले नेपाललाई स्तरोन्नतिपूर्व आवश्यक आर्थिक, संरचनात्मक तथा संस्थागत सुधार अघि बढाउन थप तीन वर्षको महत्त्वपूर्ण अवसर प्रदान गरेको महासंघको धारणा छ । स्तरोन्नतिपछि हाल प्राप्त भइरहेका अन्तर्राष्ट्रिय व्यापार सुविधा, सहुलियतपूर्ण बजार पहुँच तथा प्राविधिक र वित्तीय सहयोगमा आउन सक्ने परिवर्तनले नेपाली उत्पादन र निर्यातमा पार्न सक्ने प्रभावलाई ध्यानमा राख्दै महासंघले लामो समयदेखि तयारी अवधि थप गर्न आग्रह गर्दै आएको थियो । यस विषयमा महासंघले संयुक्त राष्ट्रसंघका लागि नेपाली स्थायी नियोगका प्रमुख तथा नेपाल सरकारका सम्बन्धित निकायहरूलाई निरन्तर ध्यानाकर्षण गराउँदै आएको थियो । विशेषगरी, स्तरोन्नतिपछि नेपाली वस्तुले अन्तर्राष्ट्रिय बजारमा पाइरहेको भन्साररहित तथा कोटारहित बजार पहुँचलगायतका सुविधा प्रभावित हुन सक्ने, उत्पादन लागत उच्च रहेको, औद्योगिक आधार कमजोर रहेको तथा निर्यातका वस्तु र बजार सीमित रहेको अवस्थालाई महासंघले प्रमुख चुनौतीका रूपमा उठाउँदै आएको थियो । उत्पादन क्षमता, औद्योगिक पूर्वाधार, प्रविधि, उत्पादकत्व र गुणस्तरमा पर्याप्त सुधार नगरी स्तरोन्नति हुँदा नेपाली उद्योग, निर्यात तथा रोजगारीमा प्रतिकूल असर पर्न सक्ने महासंघको चिन्ता रहँदै आएको थियो । महासंघका अध्यक्ष अञ्जन श्रेष्ठले संयुक्त राष्ट्रसंघको निर्णयले नेपाललाई आफ्नो आर्थिक आधार बलियो बनाउँदै स्तरोन्नतिका लागि आवश्यक तयारी गर्ने महत्त्वपूर्ण अवसर प्रदान गरेको बताए । ‘एलडीसीबाट स्तरोन्नति हुनु नेपालको विकास यात्राको महत्त्वपूर्ण उपलब्धि हो । तर, स्तरोन्नतिको वास्तविक सफलता त्यसपछि हाम्रो अर्थतन्त्रले अन्तर्राष्ट्रिय बजारमा कति प्रतिस्पर्धा गर्न सक्छ, उत्पादन र निर्यात कति बढाउन सक्छ र कति दिगो रोजगारी सिर्जना गर्न सक्छ भन्ने कुराले निर्धारण गर्छ,’ उनले भने । महासंघले यस विषयमा लामो समयदेखि कुरा उठाउँदै आएको हो,’ अध्यक्ष श्रेष्ठले थपे । उनले थपिएको अवधिलाई प्रभावकारी रूपमा उपयोग गर्न सरकार र निजी क्षेत्रबीच प्रभावकारी सहकार्य आवश्यक रहेको उल्लेख गर्दै स्पष्ट कार्ययोजना, समयसीमा र जिम्मेवारीसहित उत्पादन क्षमता, उत्पादकत्व, गुणस्तर, र निर्यात प्रतिस्पर्धात्मकता अभिवृद्धिका कार्यक्रम अघि बढाउनुपर्नेमा जोड दिए । विशेषगरी औद्योगिक उत्पादन तथा पूर्वाधार विकास, उत्पादन लागत न्यूनीकरण, निर्यात प्रवद्र्धन, अन्तर्राष्ट्रिय बजार पहुँचको संरक्षण, प्रविधि हस्तान्तरण, क्वारेन्टाइन सुविधाको स्तरोन्नति, एक्रिडेटेड ल्याबको स्थापना, गैरभन्सार अवरोधहरू (एसपीएस/टीबीटी ) हटाउने तथा साना तथा मझौला उद्यम, तथा महिला उद्यमीहरुको क्षमता अभिवृद्धि लगायतका कामलाई प्राथमिकतामा राख्नु पर्ने महासंघको धारणा छ । स्तरोन्नतिको तयारी सरकारको मात्र जिम्मेवारी नभई सरकार, निजी क्षेत्र, विकास साझेदार र अन्तर्राष्ट्रिय समुदायको साझा प्रयासबाट सम्पन्न हुनुपर्ने महासंघको धारणा छ । महासंघले थपिएको अवधिमा आवश्यक नीतिगत सुधारका लागि सरकारसँग सहकार्य गर्नुका साथै स्तरोन्नतिपछिको अवस्थाबारे उद्योगी व्यवसायीलाई सचेत गराउने, क्षेत्रगत प्रभावको अध्ययन गर्ने, निर्यातकर्ताको क्षमता अभिवृद्धि गर्ने तथा नेपाली उत्पादनको अन्तर्राष्ट्रिय बजार विस्तारका लागि पहल गर्ने प्रतिबद्धता व्यक्त गरेको छ । एलडिसीबाट स्तरोन्नति हुनु केवल वर्गीकरण परिवर्तनको विषय नभई नेपालको अर्थतन्त्रलाई उत्पादनमुखी, प्रतिस्पर्धी र दिगो बनाउने अवसर भएको उल्लेख गर्दै महासंघले थपिएको समयको प्रभावकारी उपयोगका लागि सरकार र निजी क्षेत्रबीच परिणाममुखी सहकार्य आवश्यक रहेको जनाएको छ ।
दशैँमा ११५ जनाले सडकमा गुमाए ज्यान
काठमाडौं । यस वर्षको दशैँ अवधिमा देशभर सडक दुर्घटनामा परी ११५ जनाले ज्यान गुमाएका छन् । गत असोज २५ गतेदेखि कात्तिक ९ गतेसम्म देशभर सडक दुर्घटनामा परी २ हजार ९१९ जना घाइते भएका छन् । काठमाडौं उपत्यका ट्राफिक प्रहरी कार्यालयका सूचना अधिकारी तथा प्रहरी उपरीक्षक नरेशराज सुवेदीका अनुसार सडक दुर्घटनाका प्रमुख कारण मानवीय कमजोरी, तीव्र गति, मादक पदार्थ सेवन गरेर सवारी चलाउनु र सडकको जीर्ण अवस्था हुन् । सवारीसाधनको सङ्ख्या बढ्दै गए पनि सोही अनुपातमा सडक पूर्वाधार विकास हुन नसक्दा दुर्घटना बढेको सुवेदीले बताए । दुईपाङ्ग्रे, तीनपाङ्ग्रे र चारपाङ्ग्रे सवारीसाधनसँगै पैदलयात्रीले पनि एउटै सडक प्रयोग गर्नुपर्ने अवस्थाले दुर्घटना बढाएको उनको भनाइ छ । उनका अनुसार काठमाडौं उपत्यकामा विगतका वर्षको तुलनामा दुर्घटना कम भए पनि देशभरको अवस्था चिन्ताजनक छ । दुर्घटना न्यूनीकरणका लागि ट्राफिक प्रहरीले सवारीसाधनको ब्रेक, टायर र इन्जिनको अवस्था जाँच गर्ने, मादक तथा लागू पदार्थ सेवन गरेर सवारी चलाए/नचलाएको परीक्षण गर्ने, सवारीको गति नियन्त्रण गर्ने र क्षमताभन्दा बढी भार बोक्न नदिने कार्यलाई निरन्तरता दिएको छ । लामो दूरीको यात्रामा दुई जना चालक अनिवार्य राख्नुपर्ने व्यवस्थाको पालना गर्नुपर्नेमा पनि उनले जोड दिए । चालकले यात्रुसँग र यात्रुले चालकसँग सम्मानजनक व्यवहार गर्नुपर्ने उनको भनाइ छ । ट्राफिक प्रहरीले पनि सवारी जाँचका क्रममा नागरिकसँग सम्मानजनक व्यवहार गर्ने उनले बताए । यात्रुका समस्या सम्बोधन गर्न ट्राफिक प्रहरीले यात्रु सहायता कक्षसमेत सञ्चालन गरेको सुवेदीले जानकारी दिए । नेपाल प्रहरी र ट्राफिक प्रहरीले सडक सुरक्षालाई थप प्रभावकारी बनाउन क्यामेरा तथा ड्रोनको प्रयोगलगायतका उपाय अपनाइरहेको उनले बताए । नेपाल प्रहरीका अनुसार असोज २५ गते सडक दुर्घटनामा परी ६ जनाको मृत्यु भएको थियो भने १३१ जना घाइते भएका थिए । असोज २६ गते १४ जनाको मृत्यु र १९१ जना घाइते भएका थिए । असोज २७ गते ७ जनाको मृत्यु र १३६ जना घाइते भएका थिए भने असोज २८ गते १७ जनाको मृत्यु र ३५४ जना घाइते भएका थिए । असोज ३१ गते दुर्घटनामा परी ४ जनाको मृत्यु र २५७ जना घाइते भएका थिए । कात्तिक १ गते ९ जनाको मृत्यु र १९६ जना घाइते भएका थिए । कात्तिक २ गते ९ जनाको मृत्यु र १७३ जना घाइते भएका थिए भने कात्तिक ३ गते ६ जनाको मृत्यु र २३८ जना घाइते भएका थिए । त्यस्तै, कात्तिक ४ गते ५ जनाको मृत्यु र ३१३ जना घाइते भएका थिए । कात्तिक ५ गते ८ जनाको मृत्यु र २०५ जना घाइते भएका थिए भने कात्तिक ६ गते ६ जनाको मृत्यु र २२९ जना घाइते भएका थिए । कात्तिक ७ गते दुर्घटनामा परी १० जनाको मृत्यु र १४१ जना घाइते भएका थिए । कात्तिक ८ गते २ जनाको मृत्यु र १९३ जना घाइते भएका थिए भने कात्तिक ९ गते १२ जनाको मृत्यु र १६२ जना घाइते भएका थिए ।
