देउवा पक्षको महाधिवेशन पनि खुलामञ्चमै, मंसिर २१ देखि २३ सम्म
काठमाडौं । नेपाली कांग्रेसभित्र नेतृत्व र आधिकारिकताको विवाद चर्किरहेका बेला सभापति शेरबहादुर देउवा पक्षले पनि पार्टीको १५औँ महाधिवेशन गर्ने तयारी तीव्र पारेको छ । देउवा पक्षले आगामी मंसिर २१ देखि २३ गतेसम्म काठमाडौंमा महाधिवेशन गर्ने गरी तीनवटा सार्वजनिक स्थल बुक गरेको छ । डा. शशांक कोइराला नेतृत्वको महाधिवेशन संयोजन समितिले महाधिवेशनका लागि काठमाडौंको खुलामञ्च, राष्ट्रियसभा गृह र भृकुटीमण्डपको बगैँचा प्रयोग गर्ने निर्णय गरेको हो । योजनाअनुसार महाधिवेशनको उद्घाटन र समापन समारोह खुलामञ्चमा हुनेछ । पदाधिकारी तथा केन्द्रीय सदस्य चयनका लागि मतदान राष्ट्रियसभा गृहमा गरिने केन्द्रीय निर्वाचन समितिका सदस्यसचिव अमृत कार्कीले जानकारी दिए । उनले भने महाधिवेशन प्रतिनिधिका लागि खाना तथा खाजाको व्यवस्था भृकुटीमण्डपको बगैँचामा मिलाइनेछ । कार्कीले महाधिवेशन आयोजक समितिका नाममा मंसिर १९ देखि २३ गतेसम्मका लागि तीनवटै स्थान बुक गरिएको जानकारी दिए । देउवा पक्षले महाधिवेशनमा ६ हजारभन्दा बढी प्रतिनिधि सहभागी हुने दाबी गरेको छ । महाधिवेशनअघि कात्तिक १५ गते जिल्ला अधिवेशन गर्ने तयारीसमेत गरिएको कार्कीले जानकारी दिए । देउवा पक्षको यो तयारीसँगै नेपाली कांग्रेसमा एउटै महाधिवेशनका लागि दुईवटा समानान्तर प्रक्रिया अघि बढेका छन् । गगनकुमार थापा नेतृत्वको समूहले यसअघि नै असोज १८ देखि २२ गतेसम्म काठमाडौंको खुलामञ्चमा १५औँ महाधिवेशन सम्पन्न गरिसकेको छ । उक्त महाधिवेशनबाट गगन थापा सभापति र विश्वप्रकाश शर्मा वरिष्ठ उपसभापतिमा निर्वाचित भएका थिए ।
राष्ट्रिय वाणिज्य बैंक र ग्लोबल आइएमई बैंकमा निक्षेप ह्वात्तै बढ्याे
काठमाडौं । निक्षेप संकलनमा राष्ट्रिय वाणिज्य बैंक र ग्लोबल आइएमई बैंकबीच उच्च प्रतिस्पर्धा देखिएको छ । असोज मसान्तसम्मको तथ्यांकअनुसार राष्ट्रिय वाणिज्य बैंकको निक्षेप ७ खर्ब १६ अर्ब ९३ करोड रुपैयाँ पुगेको छ भने ग्लोबल आइएमई बैंकको निक्षेप ७ खर्ब १६ अर्ब ३९ करोड रुपैयाँ रहेको छ । अधिक तरलताको कारण निक्षेप वृद्धिका लागि बैंकहरुले मिहेनत गरेका छैनन । तर ठूलो शाखा सञ्जाल भएका यी दुई बैंकमा भने निक्षेप ह्वात्तै वृद्धि भईरहेको छ । असार मसान्तसम्म ग्लोबल आइएमई बैंकको निक्षेप ७ खर्ब ४४ करोड रुपैयाँ थियो । त्यतिबेला राष्ट्रिय वाणिज्य बैंकको निक्षेप ६ खर्ब ८१ अर्ब ६३ करोड रुपैयाँ थियो । त्यसपछि दुवै बैंकको निक्षेप बढ्दै गएको देखिन्छ । भदौ मसान्तसम्ममा राष्ट्रिय वाणिज्य बैंकको निक्षेप ७ खर्ब १ अर्ब ६७ करोड रुपैयाँ पुगेको थियो भने ग्लोबल आइएमई बैंकको ७ खर्ब १ अर्ब ७ करोड रुपैयाँ थियो । त्यसबेला पनि राष्ट्रिय वाणिज्य बैंकको निक्षेप ग्लोबल आइएमईभन्दा केही बढी थियो । असोजमा राष्ट्रिय वाणिज्य बैंकको निक्षेप १५ अर्ब २६ करोड रुपैयाँले बढेर ७ खर्ब १६ अर्ब ९३ करोड रुपैयाँ पुगेको छ । ग्लोबल आइएमई बैंकको निक्षेप भने १५ अर्ब ३२ करोड रुपैयाँले बढेर ७ खर्ब १६ अर्ब ३९ करोड रुपैयाँ पुगेको छ । असोज मसान्तसम्मको तथ्यांकमा राष्ट्रिय वाणिज्य बैंकले ग्लोबल आइएमई बैंकलाई ५४ करोड रुपैयाँले पछि पारेको छ । दुवै बैंकको निक्षेपबीचको अन्तर भने निकै कम रहेकाले आगामी महिनामा शीर्ष स्थानमा फेरबदल हुन सक्ने देखिन्छ ।
साढे २ खर्ब निक्षेप थपियो, लगानी डेढ खर्ब बढ्यो
काठमाडौं । चालु आर्थिक वर्ष २०८३/८४ को ३ महिनामा वाणिज्य बैंकहरूको निक्षेप संकलन तथा कर्जा लगानीमा वृद्धि भएको छ । असोज मसान्तसम्ममा २० वटा बैंकको निक्षेप ३.३५ प्रतिशत अर्थात् २ खर्ब ५१ अर्ब रुपैयाँ र कर्जा २.७५ प्रतिशत अर्थात् १ खर्ब ४५ अर्ब रुपैयाँ बढेको छ । चालु आवको असोजसम्म बैंकहरूले ७७ खर्ब ४९ अर्ब रुपैयाँ निक्षेप संकलन गरेका छन् । जबकी गत असारसम्म बैंकहरुले ७४ खर्ब ९८ अर्ब रुपैयाँ निक्षेप संकलन गरेका थिए । समीक्षा अवधिमा अधिकांश बैंकको निक्षेप संकलन बढेको छ भने ३ बैंकको घटेको छ । असोज मसान्तसम्ममा सबैभन्दा धेरै निक्षेप नेपाल एसबिआई बैंकले वृद्धि गरेको देखिन्छ । नेपाल एसबिआईको १२.५४ प्रतिशत अर्थात् २६ अर्ब रुपैयाँ बढेर २ खर्ब ३९ अर्ब रुपैयाँ निक्षेप पुगेको छ । यसअघि गत असारसम्म बैंकले २ खर्ब १२ अर्ब रुपैयाँ निक्षेप संकलन गरेको थियो । यस्तै, असोज मसान्तसम्ममा नबिल बैंकको ७.२२ प्रतिशत अर्थात् ४३ अर्ब रुपैयाँ बढेर ६ खर्ब ४५ अर्ब रुपैयाँ, एभरेस्ट बैंकको ६.६७ प्रतिशत अर्थात् २१ अर्ब रुपैयाँ बढेर ३ खर्ब ३९ अर्ब रुपैयाँ, कुमारी बैंकको ६.२० प्रतिशत अर्थात् २५ अर्ब रुपैयाँ बढेर ४ खर्ब ३८ अर्ब रुपैयाँ, राष्ट्रिय वाणिज्य बैंकको ५.१७ प्रतिशत अर्थात् ३५ अर्ब रुपैयाँ बढेर ७ खर्ब १६ अर्ब रुपैयाँ, नेपाल बैंकको ४.७२ प्रतिशत अर्थात् १९ अर्ब रुपैयाँ बढेर ४ खर्ब ३६ अर्ब रुपैयाँ निक्षेप संकलन गरेका छन् । यस्तै, माछापुच्छ्रे बैंकको ४.१० प्रतिशत अर्थात ९ अर्ब रुपैयाँ बढेर २ खर्ब ३१ अर्ब रुपैयाँ, सिटिजन्स बैंकको ३.८१ प्रतिशत अर्थात् ८ अर्ब रुपैयाँ बढेर २ खर्ब ४२ अर्ब रुपैयाँ, लक्ष्मी सनराइज बैंकको ३.७८ प्रतिशत अर्थात् १६ अर्ब रुपैयाँ बढेर ४ खर्ब ४५ अर्ब रुपैयाँ, नेपाल इन्भेष्टमेन्ट मेगा बैंक (एनआईएमबि)को २.७२ प्रतिशत अर्थात् १४ अर्ब रुपैयाँ बढेर ५ खर्ब ४३ अर्ब रुपैयाँ, ग्लोबल आईएमई बैंकको २.२७ प्रतिशत अर्थात् १५ अर्ब रुपैयाँ बढेर ७ खर्ब १६ अर्ब रुपैयाँ निक्षेप संकलन गरेका छन् । यस्तै, सानिमा बैंकको २ प्रतिशत अर्थात् ५ अर्ब रुपैयाँ बढेर २ खर्ब ५४ अर्ब रुपैयाँ, एनएमबि बैंकको १.८९ प्रतिशत अर्थात् ६ अर्ब रुपैयाँ बढेर ३ खर्ब २४ अर्ब रुपैयाँ, सिद्धार्थ बैंकको १.७८ प्रतिशत अर्थात् ५ अर्ब रुपैयाँ बढेर ३ खर्ब ३७ अर्ब रुपैयाँ, स्टान्डर्ड चार्टर्ड बैंकको १.३६ प्रतिशत अर्थात् २ अर्ब रुपैयाँ बढेर १ खर्ब ५२ अर्ब रुपैयाँ, हिमालयन बैंकको १.१५ प्रतिशत अर्थात् ४ अर्ब रुपैयाँ बढेर ३ खर्ब ६० अर्ब रुपैयाँ, प्रभु बैंकको ०.५० प्रतिशत अर्थात् १ अर्ब रुपैयाँ बढेर ३ खर्ब ५५ अर्ब रुपैयाँ निक्षेप संकलन गरेका छन् । तर, समीक्षा अवधिमा एनआईसी एशिया बैंक, कृषि विकास बैंक र प्राइम बैंकको निक्षेप भने घटेको छ । असोजसम्ममा प्राइम कमर्सियल बैंकको १.३८ प्रतिशत अर्थात् ३ अर्ब रुपैयाँ बढेर २ खर्ब ७९ अर्ब रुपैयाँ, कृषि विकास बैंकको ०.८६ प्रतिशत अर्थात् ३ अर्ब रुपैयाँ घटेर ३ खर्ब ४८ अर्ब रुपैयाँ र एनआईसी एसिया बैंकको ०.८४ प्रतिशत अर्थात् २ अर्ब रुपैयाँ घटेर ३ खर्ब ४२ अर्ब रुपैयाँ निक्षेप संकलन गरेका छन् । ३ महिनामा बढाए डेढ खर्ब लगानी असोज मसान्तसममा बैंकहरूले ५४ खर्ब ३५ अर्ब रुपैयाँ कर्जा प्रवाह गरेका छन् । यसअघि गत असारसम्ममा बैंकहरूले ५२ खर्ब ८९ अर्ब रुपैयाँ कर्जा लगानी गरेका थिए । तीन महिनाको अवधिमा बैंकहरुले २.७५ प्रतिशत अर्थात् १ खर्ब ४५ अर्ब रुपैयाँ लगानी बढाएका हुन् । समीक्षा अवधिमा १८ वटा बैंकको लगानी बढेको छ भने २ वटा बैंकको घटेको छ । समीक्षा अवधिमा सबैभन्दा धेरै कर्जा वृद्धि ग्लोबल आइएमई बैंकले गरेको छ । ग्लोबल आईएमईको ६.४९ प्रतिशत अर्थात् ३० अर्ब रुपैयाँ बढेर ५ खर्ब ७ अर्ब रुपैयाँ पुगेको छ । जबकि गत असारसम्म बैंकको कर्जा लगानी ४ खर्ब ७६ अर्ब रुपैयाँ थियो । असोज मसान्तसममा कुमारी बैंकको ६.२६ प्रतिशत अर्थात् १८ अर्ब रुपैयाँ बढेर ३ खर्ब २१ अर्ब रुपैयाँ, माछापुच्छ्रे बैंकको ४.७१ प्रतिशत अर्थात् ८ अर्ब रुपैयाँ बढेर १ खर्ब ७९ अर्ब रुपैयाँ, लक्ष्मी सनराइज बैंकको ४.४७ प्रतिशत अर्थात् १४ अर्ब रुपैयाँ बढेर ३ खर्ब ३४ अर्ब रुपैयाँ, सिद्धार्थ बैंकको ३.६० प्रतिशत अर्थात् ८ अर्ब रुपैयाँ बढेर २ खर्ब ५७ अर्ब रुपैयाँ, एभरेस्ट बैंकको ३.५० प्रतिशत अर्थात् ८ अर्ब रुपैयाँ बढेर २ खर्ब ५६ अर्ब रुपैयाँ कर्जा लगानी गरेका छन् । यस्तै, सिटिजन्स बैंकको ३.४७ प्रतिशत अर्थात् ६ अर्ब रुपैयाँ बढेर १ खर्ब ८३ अर्ब रुपैयाँ, नबिल बैंकको ३.३६ प्रतिशत अर्थात् १६ अर्ब रुपैयाँ बढेर ५ खर्ब ४ अर्ब रुपैयाँ, एनएमबि बैंकको ३ प्रतिशत अर्थात् ८ अर्ब रुपैयाँ बढेर २ खर्ब ७६ अर्ब रुपैयाँ, नेपाल बैंकको २.६७ प्रतिशत अर्थात् ७ अर्ब रुपैयाँ बढेर २ खर्ब ६८ अर्ब रुपैयाँ, प्राइम बैंकको २.५५ प्रतिशत अर्थात् ६ अर्ब रुपैयाँ बढेर २ खर्ब ५० अर्ब रुपैयाँ, नेपाल एसबिआई बैंकको १.९४ प्रतिशत अर्थात् २ अर्ब रुपैयाँ बढेर १ खर्ब ५६ अर्ब रुपैयाँ, हिमालयन बैंकको १.८६ प्रतिशत अर्थात् ४ अर्ब रुपैयाँ बढेर २ खर्ब ६१ अर्ब रुपैयाँ कर्जा लगानी गरेका छन् । सानिमा बैंकको १.७९ प्रतिशत अर्थात् ३ अर्ब रुपैयाँ बढेर २ खर्ब १० अर्ब रुपैयाँ, कृषि विकास बैंकको १.६३ प्रतिशत अर्थात् ४ अर्ब रुपैयाँ बढेर २ खर्ब ४९ अर्ब रुपैयाँ, स्टान्डर्ड चार्टर्ड बैंकको १.३१ प्रतिशत अर्थात् ९३ करोड रुपैयाँ बढेर ७१ अर्ब रुपैयाँ, राष्ट्रिय वाणिज्य बैंकको ०.७८ प्रतिशत अर्थात् २ अर्ब रुपैयाँ बढेर ३ खर्ब ४९ अर्ब रुपैयाँ र नेपाल इन्भेष्टमेन्ट मेगा बैंकको ०.६६ प्रतिशत अर्थात् २ अर्ब रुपैयाँ बढेर ३ खर्ब ६२ अर्ब रुपैयाँ कर्जा लगानी गरेका छन् । तर, समीक्षा अवधिमा प्रभु बैंक र एनआईसी एशिया बैंकको कर्जा लगानी घटेको देखिन्छ । एनआईसी एसिया बैंकको २.२२ प्रतिशत अर्थात् ४ अर्ब रुपैयाँ घटेर २ अर्ब ६ अर्ब रुपैयाँ र प्रभु बैंकको २.१४ प्रतिशत अर्थात् ४ अर्ब रुपैयाँ घटेर २ खर्ब २७ अर्ब रुपैयाँ लगानी घटेको छ ।
सीएनआईवाईईएफ र द स्टार्टअप नेटवर्क नेपालको आयोजनामा स्टार्टअप ह्याकाथन हुँदै
काठमाडौं । नेपालमा स्टार्टअप उद्यमशीलताको विकास र नवप्रवर्तनलाई प्रोत्साहन गर्ने उद्देश्यले २४ घण्टे स्टार्टअप ह्याकाथन आयोजना हुने भएको छ । नेपाल उद्योग परिसंघ युवा उद्यमी मञ्च (सीएनआईवाईईएफ) र द स्टार्टअप नेटवर्क नेपालको संयुक्त आयोजनामा आगामी नोभेम्बर ५ र ६ (कात्तिक १९ र २०) मा ह्याकाथन आयोजना हुन लागेको हो । कार्यक्रम काठमाडौं वर्ल्ड स्कुलमा हुनेछ । ह्याकाथनमार्फत नवीन व्यावसायिक अवधारणा, प्रविधिमा आधारित समाधान तथा बजारमा विस्तार गर्न सकिने सम्भावना भएका स्टार्टअप पहिचान गरिने आयोजकले जनाएका छन् । कार्यक्रममा सहभागी टोलीले २४ घण्टाभित्र आफ्ना व्यावसायिक अवधारणालाई परिष्कृत गरी निर्णायकमण्डलसमक्ष प्रस्तुत गर्नुपर्नेछ । त्यसक्रममा व्यवसायको सम्भाव्यता, व्यावसायिक मोडेल, बजारको आवश्यकता र विस्तारको योजनालाई मुख्य आधार बनाइनेछ । कार्यक्रमबाट उत्कृष्ट तीन स्टार्टअप टोली छनोट गरिनेछ । छनोट भएका टोलीले लगानीकर्ता, मार्गदर्शक तथा उद्यमशीलता क्षेत्रका सरोकारवालासमक्ष आफ्ना व्यावसायिक अवधारणा प्रस्तुत गर्ने अवसर पाउनेछन् । ह्याकाथनको उद्देश्य उत्कृष्ट व्यावसायिक विचार पहिचान गर्नुका साथै तिनलाई दिगो व्यवसायमा रूपान्तरण गर्न आवश्यक लगानी, मार्गदर्शन र व्यावसायिक सञ्जालसँग जोड्नु रहेको आयोजकले बताएका छन् । नेपालका प्रारम्भिक चरणका स्टार्टअपले लगानीमा पहुँच, बजारमा पहिचान, अनुभवी मार्गदर्शक तथा व्यावसायिक सञ्जालको अभावजस्ता चुनौती सामना गरिरहेका छन् । यस्तो अवस्थामा ह्याकाथनले उद्यमीलाई आफ्ना व्यावसायिक अवधारणा परीक्षण र सुधार गर्ने तथा सम्भावित लगानीकर्तासमक्ष पुग्ने अवसर प्रदान गर्ने अपेक्षा गरिएको छ । यस सहकार्यले युवा उद्यमीलाई प्रोत्साहन गर्नुका साथै नेपालमा नवप्रवर्तनमा आधारित उद्यमशीलताको वातावरण विकास गर्न सहयोग पुग्ने आयोजकको विश्वास छ । कार्यक्रममा सहभागी हुन इच्छुक स्टार्टअप तथा नवप्रवर्तकले आयोजकले उपलब्ध गराएको माध्यमबाट आवेदन दिन सक्नेछन् । थप जानकारी तथा दर्ताका लागि ९८४३८७२८७० मा सम्पर्क गर्न सकिनेछ ।
एनप्याब्सन निलम्बनमा
काठमाडौं । गृह मन्त्रालयले राष्ट्रिय निजी तथा आवासीय विद्यालय एसोसिएसन नेपाल (एन–प्याब्सन) लाई अर्को निर्णय नभएसम्मका लागि निलम्बन गरेको छ । मन्त्रालयले शुक्रबार सार्वजनिक सूचना जारी गर्दै राष्ट्रिय निर्देशन ऐन, २०१८ को दफा ६ को उपदफा (२) बमोजिम एन–प्याब्सनलाई निलम्बन गरिएको जनाएको छ । मन्त्रालयका अनुसार राष्ट्रिय निर्देशन ऐन, २०१८ को दफा ५ बमोजिम दिइएको निर्देशन पटक-पटक पालना नगरेको तथा संगठनका पदाधिकारीहरूले नेपाल सरकारबाट स्वीकृत विधान र संगठनको मूल उद्देश्यविपरीतका गतिविधि गरेको पाइएको छ । यस विषयमा मन्त्रालयले गत असोज २३ गते सम्बन्धित सरोकारवाला पक्षसँग छलफलसमेत गरेको थियो । छलफलका क्रममा राष्ट्रिय निर्देशन ऐन, २०१८ तथा मन्त्रालयले गत मंसिर १२ गते जारी गरेको निर्देशनअनुसार काम गर्न आग्रह गरिएको थियो । तर, उक्त निर्देशनबमोजिम काम गरेको नदेखिएपछि मन्त्रालयले निलम्बनको निर्णय गरेको सूचनामा उल्लेख छ । मन्त्रालयले निलम्बन अवधिमा संस्थाको नाममा कुनै समूह वा गुटबाट गतिविधि सञ्चालन भएमा गैरकानुनी मानिने र प्रचलित कानुनबमोजिम कारबाही हुने चेतावनीसमेत दिएको छ ।
सेयर बजारमा ८ अर्ब ८९ करोडको कारोबार
काठमाडौं । शुक्रबार सेयर बजारमा सामान्य अंकको गिरावट आएको छ । नेपाल स्टक एक्सचेन्ज (नेप्से) परिसूचक ५.४५ अंकले घटेर २६९० बिन्दुमा झरेको छ । नेप्सेका अनुसार १०२ कम्पनीको सेयर मूल्य बढ्दा १६९ कम्पनीको सेयर मूल्य घटेको छ । ८ कम्पनीको सेयर मूल्यमा भने कुनै परिवर्तन आएको छैन । शुक्रबार ३४८ कम्पनीको २ करोड कित्ता सेयर किनबेच हुँदा ८ अर्ब ८९ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार लुम्बिनी विकास बैंकको भएको छ । लुम्बिनीको ३८ करोड रुपैयाँ बराबरको कारोबार भएको छ । साथै, शिवम् सिमेन्टको ३० करोड, घलेम्दी हाइड्रोको २७ करोड, ग्रिन भेन्चरको २६ करोड र सोलु हाइड्रोको १९ करोड रुपैयाँ बराबरको कारोबार भएको छ । आज बेनी हाइड्रोको सेयर मूल्य १४.९९ प्रतिशतले बढेर सकारात्मक सर्किट लागेको छ । सेयर बजारमा कारोबार हुने अधिकांश उपसूचकमा गिरावट आएको छ । शुक्रबार विकास बैंक समूहको उपसूचक सबैभन्दा धेरै १.६१ प्रतिशतले बढ्दा बैंकिङ, वित्त, होटल तथा पर्यटन, जलविद्युत्लगायतका उपसूचक घटेका छन् । नेप्सेका अनुसार विकास बैंक उपसूचक ८९.८४ अंकले बढेर ५ हजार ६५४.७२ विन्दुमा पुगेको छ । त्यस्तै, निर्जीवन बीमा उपसूचक २९.२३ अंकले बढेर ९ हजार ५८९.१८ विन्दुमा पुगेको छ । व्यापार उपसूचक ८.०४ अंक, अन्य समूह २.७६ अंक र म्युचुअल फण्ड उपसूचक ०.०५ अंकले बढेका छन् । यता, उत्पादन तथा प्रशोधन समूहको उपसूचक सबैभन्दा धेरै ४१.५५ अंकले घटेर १० हजार ७२९.८० विन्दुमा झरेको छ । त्यसैगरी, जीवन बीमा उपसूचक २०.२३ अंक, जलविद्युत् २१.४९ अंक, होटल तथा पर्यटन १६.५२ अंक, वित्त १०.७४ अंक र बैंकिङ उपसूचक ७.१५ अंकले घटेका छन् । लघुवित्त उपसूचक ५.६७ अंक र लगानी उपसूचक ०.२१ अंकले घटेका छन् ।
डिबानको अध्यक्ष बने थकाली, कार्यसमितिमा समेटिए यी ९ बैंक
काठमाडौं । डेभलपमेन्ट बैंकर्स एशोसिएसन नेपाल (डिबान)को अध्यक्षमा कामना सेवा विकास बैंकका प्रमुख कार्यकारी अधिकृत (सीईओ) दिनेश थकाली निर्विरोध निर्वाचित भएका छन् । एशोसिएसनको २१औं वार्षिक साधारण सभाले आगामी दुई वर्षका लागि थकालीलाई अध्यक्ष चयन गरेको हो । कार्तिक १३ गते शुक्रबार सम्पन्न साधारण सभाले थकालीको नेतृत्वमा नौ सदस्यीय नयाँ कार्यसमिति पनि निर्विरोध चयन गरेको छ । यसअघि एशोसिएसनको कार्यवाहक अध्यक्षको जिम्मेवारीमा रहेका थकालीलाई साधारण सभाले सर्वसम्मत रूपमा अध्यक्ष चयन गरेको हो । नयाँ कार्यसमितिको उपाध्यक्षमा गरिमा विकास बैंकका सीईओ माधवप्रसाद उपाध्याय, सचिवमा ज्योति विकास बैंकका सीईओ कपिल ढकाल र कोषाध्यक्षमा महालक्ष्मी विकास बैंकका सीईओ दिपेश लम्साल चयन भएका छन् । त्यस्तै, सदस्यहरूमा मुक्तिनाथ विकास बैंकका सीईओ तारामान मानन्धर, लुम्बिनी विकास बैंकका सीईओ सुमन आचार्य, सांग्रिला डेभलपमेन्ट बैंकका सीईओ रबिन सिजापति, ग्रिन डेभलपमेन्ट बैंकका सीईओ हरिबहादुर बुढाथोकी र मितेरी डेभलपमेन्ट बैंकका सीईओ अनन्तकुमार चापागाईं निर्विरोध चयन भएका छन् । अनुभवी चार्टर्ड एकाउन्टेन्ट तथा बैंकर थकालीले बैंकिङ क्षेत्रमा वित्तीय कार्यसम्पादन, संस्थागत सुधार, डिजिटल रूपान्तरण, जोखिम व्यवस्थापन र सुशासनका क्षेत्रमा काम गर्दै आएका छन् । नवनिर्वाचित अध्यक्ष थकालीले विकास बैंकहरूको साझा हित र बैंकिङ क्षेत्रका समसामयिक मुद्दालाई प्राथमिकतामा राखेर काम गर्ने प्रतिबद्धता जनाएका छन् । उनले सुशासन, जोखिम व्यवस्थापन, प्रविधि र मानव संसाधनको क्षमता अभिवृद्धि, डिजिटल रूपान्तरण, कर्जा गुणस्तर सुधार तथा कर्जा असुलीलाई प्रभावकारी बनाउने विषयलाई प्राथमिकतामा राख्नुपर्ने बताए । त्यस्तै, सदस्य बैंकहरूबीच ज्ञान, अनुभव र उत्कृष्ट अभ्यासको आदानप्रदानलाई थप प्रभावकारी बनाउने उनको भनाइ छ । नियामक निकाय र अन्य सरोकारवालासँग समन्वय तथा सहकार्य गर्दै विकास बैंकहरूको हित प्रवद्र्धनमा सक्रिय रहने प्रतिबद्धता पनि उनले व्यक्त गरेका छन् । साधारणसभाले आर्थिक वर्ष २०८२/८३ को वार्षिक प्रतिवेदन पारित गर्नुका साथै लेखापरीक्षकको प्रतिवेदनसहित असार मसान्तसम्मको वासलात, नाफा–नोक्सान हिसाब र नगद प्रवाह विवरणलगायत वित्तीय विवरणमाथि छलफल गरी स्वीकृत गरेको छ । साथै, आर्थिक वर्ष २०८३/८४ का लागि लेखापरीक्षक नियुक्ति र पारिश्रमिक निर्धारणसम्बन्धी प्रस्तावसमेत पारित गरेको छ । सभाले निवर्तमान कार्यसमितिले एशोसिएसनको संस्थागत विकास, बैंकिङ क्षेत्रका साझा मुद्दाको सम्बोधन र नीतिगत पैरवीमा पु¥याएको योगदानको प्रशंसा पनि गरेको छ । ८० लाख ग्राहकलाई सेवा दिँदै विकास बैंक नेपालमा हाल सञ्चालनमा रहेका १७ विकास बैंकमध्ये आठ राष्ट्रियस्तरका र नौ क्षेत्रीयस्तरका छन् । यी बैंकहरूले २०८३ असार मसान्तसम्म १ हजार ११२ शाखा र ३३६ एटीएममार्फत करिब ८० लाख ग्राहकलाई बैंकिङ सेवा प्रदान गर्दै आएका छन् । विकास बैंकहरूको साझा संस्था डेभलपमेन्ट बैंकर्स एशोसिएसन नेपालले सदस्य बैंकहरूको हित संरक्षण तथा बैंकिङ क्षेत्रको विकासका लागि नेपाल राष्ट्र बैंकलगायत नियामक निकाय र सम्बन्धित संस्थासँग समन्वय गर्दै आएको छ । एशोसिएसनले सदस्य बैंकहरूबीच सहकार्य, समन्वय र ज्ञान आदानप्रदानका साथै साझा समस्या पहिचान र समाधानका लागि पहल गर्दै आएको छ । समयसापेक्ष बैंकिङ विषयमा कार्यशाला तथा क्षमता अभिवृद्धिका कार्यक्रम पनि सञ्चालन गर्दै आएको छ । त्यसैगरी, सदस्य बैंकहरूलाई प्रविधिमा आधारित सेवा उपलब्ध गराउन एशोसिएसनले विभिन्न साझा प्रणाली विकास तथा सञ्चालन गर्दै आएको छ । यसले विकास बैंकहरूबीच संस्थागत सहकार्य र सेवा प्रवाहलाई सहज बनाउन सहयोग पु¥याउँदै आएको छ । थकालीको नेतृत्वमा नयाँ कार्यसमितिले यी गतिविधिलाई निरन्तरता दिँदै बदलिँदो बैंकिङ परिवेशमा विकास बैंकहरूको प्रतिस्पर्धात्मक क्षमता, संस्थागत सुशासन र वित्तीय सेवाको गुणस्तर अभिवृद्धिमा काम गर्ने अपेक्षा गरिएको छ ।
औषधि व्यवस्था विभागका कर्मचारीहरूको जिम्मेवारी हेरफेर
काठमाडौं । स्वास्थ्य तथा खाद्य स्वच्छता मन्त्रालयले औषधि व्यवस्था विभागका अधिकृतस्तरका कर्मचारीहरूको जिम्मेवारी हेरफेर गरेको छ । मन्त्रालयले विभाग र मातहतका कार्यालयमा कार्यरत केही अधिकारीहरूको सरुवा गरेको हो । मन्त्रालयले औषधि व्यवस्था विभागमा कार्यरत केशु गिरी, अच्युत रेग्मी र निकेश श्रेष्ठलाई राष्ट्रिय औषधि प्रयोगशालामा सरुवा गरेको छ । यस्तै, निशा श्रेष्ठ र सुस्मिता मरासिनीलाई भने प्रयोगशालाबाट औषधि व्यवस्था विभागमा ल्याइएको छ । यसैगरी, स्वास्थ्य सेवा विभागमा कार्यरत सञ्जिब कट्टेललाई औषधि व्यवस्था विभागमा पठाइएको छ भने विभागमा कार्यरत वर्षा शाक्यलाई स्वास्थ्य सेवा विभागमा सरुवा गरिएको छ । मन्त्रालयका अनुसार राजेश श्रेष्ठलाई विराटनगर सरुवा गरिएको छ भने प्रशासनिक तथा सेवा प्रवाहलाई थप प्रभावकारी बनाउने उद्देश्यले अन्य केही सुपरभाइजरहरूको जिम्मेवारी हेरफेर गरिएको छ।
