अमेरिकी होटल चेन रमडा अब ठमेलमा, २ अर्ब रुपैयाँ लगानी
काठमाडौं । काठमाडौंको ठमेलमा २ अर्ब रुपैयाँ लगातमा चार तारे होटल खुलेको छ । अमेरिकी चेन होटल रमडा इन्कोर वाई वाइनड्याम ठमेलमा आजदेखि औपचारिक रुपमा सञ्चालनमा आउने भएको हो । सो होटलका सञ्चालक सागर पँगेनीका अनुसार होटल २ अर्ब रुपैयाँको लगातमा निर्माण भएको हो । ९० वटा कोठा रहेको सो होटल ७ तले र २ वटा अन्डर ग्राउण्ड रहेको छ । अमेरिकी चेन होटल र्यामेड इन्कोर वाई वाइनड्याम विश्वको ८० देशको ९ हजार ठाउँमा विस्तार भएको छ । पँगेनीका अनुसार पर्यटक तथा होटलमा आउने पाहुनाले स्थानीय उत्पादनको स्वाद मात्र होइन विदेशी विभिन्न प्रकारका परिकारहरुको स्वाद लिन पाउने छन्। विशेष गरेर विदेशी पर्यटकलाई भित्र्याउनका लागि यो होटललले उल्लेख्य भूमिका खेल्न सक्ने उनको विश्वास रहेको छ । ‘धेरै होटलहरु भएपनि पर्यटककले चाहे र रोजे जस्तो सेवा सुविधा पान सकेका छैनन्, पर्यटकको चाहना अनुसार हामी सुविधा दिनछाैं,’ उनले भने । आधुनिक शैलिमा निर्माण गरिएको होटलमा डिलक्स र प्रिमिएर गरी सुबिधा सपन्न कोठा, सेमिनार हल, पार्टि प्यालेस, मिटिङ्ग हल, रेष्टुरेण्ट, स्विमिङ्पुलकाे रहेको बताइएको छ । यो कम्पनीले नेपालमा भने पहिलोपटक सेवा सञ्चालन गरेको घोषणा गरेको छ। नेपालसँगै भुटानमा पनि प्रवेश गरेको कम्पनीले विभिन्न वर्गका छुट्टै ब्रान्डमा होटल सञ्चालन गर्छ। नेपालमा भने रमडा ब्रान्ड प्रवेश गरेको हो। विन्डमको यो मध्यमवर्गीय ब्रान्ड हो । काठमाडौंको ठमेलमा रहेको यो होटल फ्रेन्चाइजी हो। होटलमा डिलक्स,सुपर डिलक्स, स्टुडियो,इन्टर कनेक्टिङ र फरक क्षमताका व्यक्तीमैत्री कोठा रहेका छन् । २ रेष्टुरेन्ट भएको होटलमा हल,स्पा जस्ता सुविधाहरु पनि रहेका छन्।
गोरखामा ७ करोडको लगानीमा तारे होटल बन्यो, होटलबाटै मनास्लु हेर्न पाइने
काठमाडाैं । गोरखाको लिगलिगकोट आउने पर्यटकलाई लक्षगरी पालुङटार नगरपालिकामा करिब सात करोड रुपैयाँकाे लागतमा सुविधासम्पन्न होटल सञ्चालनमा आएकाे छ । यसको प्रचारप्रसारसँगै पर्यटकको सङ्ख्या बढ्न थालेपछि ‘होटल लिगलिग मनास्लु भ्यू’ सञ्चालनमा ल्याइएको होटलका सञ्चालक मानबहादुर पौडेलले जानकारी दिए । “अहिलेसम्म कूल रु सात करोड १० लाख लगानी भइसकेको छ, अझै निर्माणको काम भइरहेको छ”, उनले भने,“लिगलिगकोट घुम्न आउने पर्यटक अब बास खोज्दै फर्कनुपर्ने बाध्यता हुने छैन ।” दश रोपनी क्षेत्रफलमा निर्माण गरी सञ्चालनमा ल्याइएको होटलमा २० आधुनिक र सुविधासम्पन्न आरामदायी कोठा रहेका छन् । होटलमा आधुनिक सुबिधासम्पन्न बैठक कक्ष, पार्टी प्यालेस, आवश्यकतानुसार बैठक कोठा तथा रेष्टुरेन्ट छन् । सञ्चालक पौडेलले भने, “अहिले स्विमिङ पुल निर्माणको काम पनि भइरहेको छ ।” उनले लिगलिगकोट र जिल्लाका आसपासका पर्यटकीय गन्तव्य घुम्न आउने पर्यटकलाई पर्यटकीयस्थलसम्म घुमाएर फर्काउनेसम्मको व्यवस्था होटलले मिलाएको जानकारी दिए । त्यस्तै, होटलमा आउने पाहुनाले स्थानीय उत्पादनको स्वाद चाख्न पाउनेछन् भने उनीहरुको चाहनाअनुसार स्थानीय कलासंस्कृतिको प्रस्तुतिसमेत देखाउने व्यवस्था रहेको उहाँको भनाइ छ । पालुङटार क्षेत्रमा सुविधा सम्पन्न होटल नहुँदा घुम्न आउने पर्यटकलाई समस्या हुँदै आएको थियो । लिगलिगकोट आउने पर्यटक लिगलिगकोट आसपासका क्षेत्रमा बस्नका लागि उपयुक्त बासस्थान नहुँदा फर्कनुपर्ने बाध्यता रहदै आएको थियो । पालुङटार–२ आँपपीपलमा पर्ने लिगलिगकोटमा अहिले दैनिक एक हजारसम्म आन्तरिक तथा बाह्य पर्यटक घुम्न आउने गरेका छन् । दौडिएर राजा हुने परम्परा भएको लिगलिगकोट अध्ययन र अवलोकनका लागि पर्यटक आउने गरेको लिगलिगकोट विकास अभियानका अध्यक्ष पूर्णबहादुर रानाले जानकारी दिए । तत्कालीन समयमा लिकलिगकोटमा प्रत्येक वर्ष बडादशैँको नवमीका दिनमा नयाँ राजा छान्ने चलन रहेको इतिहास रहेको छ । “आवश्यक भौतिक पूर्वाधार निर्माण नहुँदा यहाँ आउने पर्यटकलाई समस्या हुँदै आएको थियो ”, उनले भने, “पर्यटकलाई लक्ष्यगरी होटल सामुदायिक घरबासलगायत सञ्चालन हुन थालेपछि सजिलो भएको छ ।” लिगलिगकोटमा स्थानीय मगर समुदाय मिलेर भर्खरै मात्र सामुदायिक घरबाससमेत सञ्चालन गरिएको अध्यक्ष रानाकोे भनाइ छ । करिब १० रोपनी क्षेत्रफलमा आधुनिक शैलिमा निर्माण गरिएको होटलमा डिलक्स र प्रिमिएर गरी २० वटा सुबिधा सपन्न कोठा, सेमिनार हल, पार्टि प्यालेस, मिटिङ्ग हल, रेष्टुरेन्ट बार सञ्चालनमा रहेको होटल लिगलिग मनास्लु भ्यूका सञ्चालक मान बहादुर पौडेलले जानकारी दिए । साथै स्वमिङ्ग पुल को निर्माण कार्य पनि भै रहेको उनले बताए । ‘यस क्षेत्रमा घुम्न आउने प्रर्यटकका लागि यहा बस्ने ठाउँ नभएर बैकल्पिक ठाउँमा जानू पर्ने समस्या थियो, अब प्रर्यटकका लागि पालुङटार आउन र बस्नमा कुनै समस्या हुँदैन,’ उनले भने । गोरखाको पालुङटार नगरपालिका वडा नम्बर ४ मा होटल सञ्चालन गरिएको हो । पालुङटार नगरपालिकालाई नेपाल सरकारले स्मार्ट सिटीको रुपमा अगाडि सारेको छ, राष्ट्रिय गौरवको आयोजना मध्य पहाडी लोकमार्ग पनि पालुङटार हुँदै सञ्चालनमा आउँदै छ । २०३/३१ सालबाट रोकिएको पालुङटार एर्पोट पनि संघिय र प्रदेश सरकारले सञ्चालनमा ल्याउनका लागि तयारी गरिएको छ । जसले गर्दा यस्ता होटलहरु सञ्चालनमा आउँदा विकासमा टेवा पुग्ने छ । नेपाल एकीकरणको उद्मस्थलका रुपमा लिगलिगकोटलाई लिइन्छ ।
पर्यटकीय क्षेत्रका होटल पुनः सञ्चालन
रसुवा । हिमाली क्षेत्रमा कोभिड–१९ को सङ्क्रमण नदेखिएपछि पाहुनाको सेवाका लागि स्थापित पर्यटकीय होटल तथा लज पुनः सञ्चालनमा आएका छन् । बाह्य पर्यटकको आगमन बन्द भए पनि पछिल्लो समय फाट्टफुट्टरूपमा आन्तरिक पर्यटक आउन थालेकाले लामो समय बन्द रहेको पर्यटकीय एवं व्यापारिक मार्गका होटल तथा लजले आफ्ना नियमित सेवा दिन थालेका हुन् । धुञ्चेदेखि लाङटाङ तथा गोसाइँकुण्ड, तामाङ सम्पदामार्ग, नेपालको उत्तरी नाकाको रसुुवागढीलगायत हेलम्बु, डाडेपाटीलगायतका स्थानमा सञ्चालित करिब २०० पर्यटकीय होटल तथा लज पुनः सञ्चालनमा आइसकेको होटल तथा पर्यटन व्यवसायी सङ्घ रसुवाका अध्यक्ष निशान उपनामले परिचित रामशरण गजुरेलले जानकारी दिए । हिमाली जिल्ला रसुवामा कोरोनाको खासै प्रभाव नपरेको र पर्यटकीय क्षेत्रको बढी हिस्सा ओगटेको गोसाइँकुण्ड गाउँपालिकाभित्र रहेका निजी तथा सरकारी विद्यालयले समेत बालबालिकाकोे नियमित पठनपाठन निर्वाधरूपमा पुनः सञ्चालन गराइसकेकाले रोगप्रति आशङ्का गर्ने ठाउँ नभएको होटल तथा पर्यटन व्यवसायी सङ्घले स्पष्ट पारेको छ । पर्यटकका लागि सेवा दिन अहोरात्र तल्लीन यहाँका व्यवसायीले कोरोनाको सङ्क्रमण शुरू भएयता मासिक छ करोड ७० लाख घाटा व्यहोर्दै जानुपरेको अवस्थामा पाहुनाको आगमनले केही आशा पलाउँदै गएको होटल तथा लज सञ्चालकले बताएका छन् । कोरोनाको असरले यस भेकमा पर्यटनसँग जोडिएका ७० भन्दा बढी पथ प्रदर्शक एवं करिब ४०० मजदुरसमेत बेरोजगार बन्न पुगेको सङ्घका पदाधिकारीले निचोड निकालेका छन् । माओवादी द्वन्द्व र विसं २०७२ को विनाशकारी भूकम्पभन्दा अहिलेको कोरोनाको असरले पर्यटन व्यवसायी जटिलरूपले धरासायी मोडमा पुगेको उनीहरूको ठूलो गुनासो बढेको पाइन्छ । एक सयको हाराहारीमा रहेका ससाना साधारण होटल पनि कोरोनाको असरले ठूलो मर्कामा परेका छन् । व्यवसायमार्फत पर्यटकलाई प्रदान गरेको सेवाबाट प्राप्त आयले बालबालिकालाई गुणस्तरीय शिक्षा दिलाई जीविकोपार्जनमा सरलता ल्याउने ठूलो अभिलाषाका साथ होटल तथा लज सञ्चालनका लागि बैंक तथा वित्तीय संस्था र गाउँघरका साहुबाट लिइएका ऋणको साँवा तथा ब्याजका किस्तासमेत तिर्ने उपाय नभएको होटल तथा पर्यटन व्यवसायी सङ्घले जनाएको छ । पाहुनालाई खानेबस्ने सुविधा पुर्याउन भाडामा घर लिने व्यवसायीले मासिक ५० हजारदेखि डेढ लाखसम्म घरधनीलाई तिर्नुपर्ने बाध्यता भएकाले आन्तरिक पर्यटनको प्रवद्र्धनलाई बढावा दिन माग गरिएको लाङटाङका व्यवसायीले बताएका छन् । काबुभन्दा बाहिरको परिस्थितिले उत्पन्न गराएको आर्थिक सङ्कट समाधान गर्न राहत वा निश्चित अवधिका लागि निब्र्याजी ऋण उपलब्ध गराई नेपालको दोस्रो पर्यटकीय क्षेत्रका व्यवसायीलाई उत्थान गरिदिन सरकारसमक्ष आग्रह गरिएको उक्त सङ्घका अध्यक्ष गजुरेलले बताए । पर्यटकको आगमन बन्द भएपछि यहाँका कृषि तथा फलफूलका साथै करेसाबारीमा सागसब्जी उत्पादन गराउने, चौँरी पालेर दुग्ध उत्पादन गर्ने किसानसमेत ठूलो मर्कामा परेका छन् । राजधानीको नजिक रहेको हिमाली क्षेत्र धुञ्चेबाट नजिकै देख्न सकिने लाङटाङ हिमाल, पवित्र तीर्थ गोसाइँकुण्ड, गणेश हिमाल, पर्वतीकुण्ड, नेपालको पहिलो तामाङ सङ्ग्रहालय, कुण्ड, ताल, झरना, हरिया वनस्पतिलगायतका जैविक विविधताले भरिपूर्ण स्वच्छ वातावरण भएको क्षेत्रमा भ्रमण गरी हिमाली प्रकृतिका छटाको रसास्वादन लिइदिन र यहाँका व्यवसायीलाई हौसला बढाइदिन पाहुनामाझ पर्यटन सङ्घले निम्तोसमेत गरेको छ । शिशिर ऋतुको हिमपातले चारैतिर सेताम्य हिजोआज सबैको मन लोेभ्याउन थालिसकेको र धुञ्चे क्षेत्रमात्रै पुग्दा पनि घले राजाले वासस्थान लिएको ऐतिहासिक स्थान, गोसाइँकुण्ड पुग्न नसक्ने भक्तजनका लागि शिवपादुका कुण्डको स्नान, तामाङ सङ्ग्रहालयको अवलोकन गर्न सकिने बताइएको छ । आगन्तुक पाहुनाको सुविधाका लागि शौचालयसहितको स्तरीय सुत्ने कोठा, न्यानो कपडा, तातो चिसोपानी, वाइफाइ, टेलिभिजनको सुविधा र मागअनुसारका मिठास भोजन तयार हुने व्यवसायी ढिण्डुप तामाङ बताउँछन् । रासस
