टेलिकमले ल्यायो प्रमोसनल अफर, एफटीटीएच सेवामा निःशुल्क भ्वाइस सेवा
काठमाडौं । नेपाल टेलिकमले एफटीटीएच (फिफ्थ फाइबर टु द होम) सेवाको आरम्भको अवसरमा ३ महिनाको लागि प्रमोसनल अफर ल्याएको छ । उक्त अफरको रुपमा कम्पनीले यही साउन १० गतेदेखि कात्तिकसम्म कम्पनीको नेटवर्क भित्र भ्वाइस सेवा निःशुल्क गरेको छ । टेलिकमले वितरण गरिरहेको एफटीटीएच (फिफ्थ फाइबर टु द होम) सेवा अन्तर्गत इन्टरनेट सेवाको साथै आईपी प्रविधिमार्फत चल्ने भ्वाइस टेलिफोन सेवा पनि प्रदान गर्न शुरु गरेको छ । आईपी बेस प्रविधि अन्तर्गतको एफटीटीएच सेवामा उच्च गतिको गुणस्तरीय डाटा(हाई स्पीड इन्टरनेट) का साथसाथै सोही फाइबरबाट भ्वाइस सेवा समेत उपलब्ध हुन्छ । यसका लागि ग्राहकलाई नयाँ नम्बर प्रदान गरिने छ । हाल यो भ्वाइस सेवा एफटीटीएच सेवा वितरण भइरहेका स्थानहरुमा डाटाका साथ उपलब्ध गराइएको छ । बाँकी स्थानहरुमा पनि एफटीटीएच विस्तारसँगै क्रमशः उपलब्ध गराइने छ । हाल काठमाडौं उपत्यकाको कीर्तिपुर, सैंबु, गोंगबु, गोठाटार, दरबार मार्ग, ठमेल, हात्तीसार, जावलाखेल, लगनखेल, कलंकी र उपत्यका वाहिर भरतपुर राजमार्ग क्षेत्र, बुटवल, वीरगन्ज तथा पोखरा लेकसाइड क्षेत्रमा यो सेवा उपलब्ध छ । टेलिकमले मुलुकभर उच्च गतिको डाटा सेवा उपलब्ध गराउने योजना अनुरुप फाइबरबाट उच्च गतिको एफटीटीएच सेवा वितरण गरिरहेको छ । साथसाथै, कम्पनीले एफटीटीएच सेवा वृहत रुपमा विस्तारको लागि आवश्यक पूर्वाधार निर्माण गरिरहेको छ । परम्परागत कपर नेटवर्कको सट्टामा ग्राहकहरुको घरसम्म अप्टिकल फाइबर पुर्याई ट्रिपल प्ले(भ्वाइस, हाई स्पीड इन्टरनेट, भिडीयो) सेवाहरु प्रदान गर्न सकिने भएकोले यो सेवा प्रभावकारी हुन्छ । कम्पनीले एफटीटीएच सेवा उपलब्ध गराउनका लागि हाल मनसुन अफर अन्तर्गत विभिन्न प्याकेजको रुपमा सहुलियतपूर्ण महसुलमा सेवा उपलब्ध गराइएको छ । व्यक्तिगत र कर्पोरेट ग्राहकका लागि फरक फरक महसुल दर निर्धारण गरिएको छ ।
सात वर्ष अघिदेखिको पहलमा बल्ल ल्यान्डलाइन टेलिफोन जडान
काठमाडौं। छथर गाउँपालिकाको केन्द्र शुक्रबारे बजारमा सात वर्ष अघिदेखिको पहलमा बल्ल टेलिफोन जडान गरिएको छ । सञ्चारको बढ्दो विकास हुँदा समेत टेलिफोन नपुगेको शुक्रबारे बजारमा गाउँपालिकाको पहलमा गरिएको हो । गाउँवासीको सुविधालाई लक्षित गरी उक्त टेलिफोन जडान गरिएको गाउँपालिकाका अध्यक्ष सन्तवीर लिम्बूले बताए। पहिलो चरमा गाउँपालिकाको केन्द्रमा रहेको शुक्रबारे बजार क्षेत्रमा ३५ वटा टेलिफोन र १७ वटा एडिएसएल इन्टरनेट सेवा जडान गरी टेलिकमले सेवा शुरु गरेको छ । अहिले १५ वटा लाइन जडानको प्रक्रियमा रहेको नेपाल टेलिकम लेखा कार्यालय धनकुटाका प्राविधिक रिजेन्द्र दुलालले बताउनुभयो । वर्षांदेखिको जनप्रतिनिधिको सक्रियतामा फोन जडान भएपछि बजारमा खुलेका सरकारी तथा गैसरकारी कार्यालयलाई समेत सहज भएको छ। मोवाइलको सेवा भरपर्दो नहुने र ल्याण्डलाइन फोन समेत नभएका कारण कठिनाइ भोग्दै आएका यहाँका बासिन्दालाई उक्त फोन सेवाले सहज बनाएकोे स्थानीय बजार व्यवस्थापन समितिका अध्यक्ष नारायण सुब्बाले बताए । फोनसँगै एडिएसएलको इन्टरनेट सेवा समेत पाइने भएपछि बजारवासी हर्षित छन् । रासस
६ महिनामा एप्पलको नाफा ११ अर्ब ५० करोड डलर, सेयर मूल्य ४ प्रतिशत बढ्यो
एजेन्सी । आईफोन निर्माता एप्पल इंकको नाफा ३० प्रतिशत बढेको छ । एप्पलको नाफा बढेर ११ अर्ब ५० करोड डलर पुगेको छ । यो हालसम्मको सर्वाधिक नाफा हो । प्रक्षेपण भन्दा आईफोनको बिक्रीमा केही कमी आएपनि कम्पनीले नाफा बढाएको छ । एप्पलको आम्दानी १७ प्रतितश बढेर ५३ अर्ब ३० करोड डलर पुगेको भारतको फाइनान्सियल एक्सप्रेसले बताएको छ । “नाफाबाट हामी अति उत्साहित भएका छौ । चौथो त्रैमाशमा आम्दानी दोहोर अंकमा पुग्ने छ” एप्पलका प्रमुख कार्यकारी अधिकृत (सीईओ) टिमी कुकले भने । एप्पले गत जुनको वित्तीय विवरण मंगलबार सार्वजनिक गरेको हो । गत जुनसम्म एप्पलले ४१ करोड ३० लाख थान आईफोन बिक्री गरेको छ । नाफामा वृद्धि भएपछि अमेरिकाको सिलिकन भ्यालीमा रहेको प्रविधि कम्पनी एप्पलको सेयर मूल्य ४ प्रतिशत बढेर १९८ डलर पुगेको छ । एप्पलको नाफा बढेपछि सेयर लगानीकर्ता खुसी भएका छन् । यसले अर्बौ डलर बजार मूल्य बढाएको छ । अमेरिका र चीनबीचको जारी व्यापार युद्धले एप्पलका उत्पादन बिक्रीमा खासै फरक नपर्ने सीईओ कुकको भनाई छ । चीनको स्मार्टफोन उत्पादकले हुवावेले पनि एप्पलसंग टक्कर गरिरहेको छ । दक्षिण कोरियाको टिटान सामसुङ अझै पनि धेरै स्मार्टफोन बिक्री गर्नेमा परेको छ । उसले ७१ करोड ७५ थान सेट बिक्रीका लागि बजारमा गइसकेका छन् । हुवावे दोस्रो ५४ करोड २० लाख थान बिक्रीका लागि सिपमेन्ट भएको मोवाइल ट्रयाकर आईडीसीले जनाएको छ । विश्व मोवाइल बजारमा सामसुङको २०.९, हुवावेको १५.८ र १२.१ प्रतिशत आईफोनको बजार हिस्सा रहेको छ ।
