नेपालको भू–उपग्रहसम्बन्धी अध्ययन गर्न चार कम्पनी छानिए
काठमाडाैं । नेपालको आफ्नै भू–उपग्रह (स्याटेलाइट) राख्न आवश्यक अध्ययनका लागि चार कम्पनी छनोट भएका छन् । अन्तरिक्षमा आफ्नै भू–उपग्रह (स्याटेलाइट) प्रक्षेपण गर्ने सरकारको नीतिअनुसार परामर्श सेवा दिन गत कात्तिकमा आठ अन्तर्राष्ट्रिय कम्पनीले प्राविधिक र आर्थिक प्रस्ताव पेस गरेका थिए । प्रस्ताव पेस गरेका सो कम्पनीमध्येबाट प्राधिकरणले चार कम्पनी छनोट गरेको हो । प्राधिकरणले फ्रान्सको युरोकन्सल्ट, टर्कीको टर्कस्याट, युएईको एसथ्री टेल इङ्क र थाइल्यान्डको थाइकमलाई सट लिस्टमा राखेको हो । यी चार कम्पनीले बुझाएको प्राविधिक र आर्थिक मूल्याङ्कनका आधारमा उत्कृष्ट एक कम्पनीलाई स्याटेलाइट प्रक्षेपणसम्बन्धी काम सुरु गर्न प्राधिकरणले अनुमति दिनेछ । यसअघि उत्कृष्ट कम्पनी नआएको भन्दै प्राधिकरणले स्याटेलाइट जडानको प्रक्रिया नै रद्द गरेको थियो । गत वर्षको मङ्सिरमा पुरानो प्रस्ताव रद्द गरेर प्राधिकरणले भू–उपग्रह स्थापनाको नियमन तथा सुरक्षा, व्यापार र सञ्चालन मोडालिटीको नीति तय गर्न नयाँ प्रस्ताव आह्वान गरेको थियो । प्राधिकरणको प्रस्तावअनुसार गत पुसमा विभिन्न देशका नौवटा कम्पनीले आशयपत्र बुझाएका थिए । आशयपत्र पेस गरेका नौ कम्पनीमध्ये प्राधिकरणले पाँच कम्पनीलाई प्राविधिक रुपमा योग्य ठहर गर्दै आर्थिक प्रस्ताव माग गरेको थियो । गत वर्ष अयोग्य भएको फालिएका फ्रान्सको युरो कन्सल्ट र युएईको एसथ्री टेल इङ्क पुनः छनोटमा परेका छन् । गत वर्ष दुई कम्पनीसहित अन्य चार कम्पनीले पठाएको आर्थिक प्रस्ताव अयोग्य भएको भन्दै प्राधिकरणले स्याटेलाइट जडानको प्रक्रिया नै रद्द गरेको थियो । प्राधिकरणका प्रवक्ता सन्तोष पौडेलले छनोटमा परेका चार कम्पनीसँग पहिलो चरणमा प्राविधिक र वित्तीय प्रस्तावको माग गरिने जानकारी दिए । उनका अनुसार सो कम्पनीबाट आएको प्रस्तावको अध्ययन गरी प्राधिकरणले भू–उपग्रह स्थापनासम्बन्धी आधारभूत कामहरूको जिम्मा एक कम्पनीलाई दिनेछ । सन् २०२२ भित्र आफ्नै स्याटेलाइट सञ्चालमा ल्याउने भन्दै गत वर्ष भू–उपग्रहसम्बन्धी नीति सार्वजनिक गरिएको थियो । यसअघि नेपालको आफ्नै स्याटेलाइट राख्ने गरी प्राधिकरणले २०७३ साल असोज २० गते आह्वान गरेको आशयपत्रमा १२ देशका २२ कम्पनीले स्याटेलाइट राख्न रुचि देखाएका थिए । अमेरिका, चीन, भारत, थाइल्यान्ड, सिङ्गापुर, क्यानडा, फ्रान्स, जापान, कोरिया, साउदी अरेबिया, रुस र इजरायलका गरी २२ कम्पनीले नेपालका लागि स्याटेलाइट राखिदिने रुचिसहित प्रस्ताव पेस गरेका थिए । दूरसञ्चार सेवा प्रदायक रेडियो तथा टेलिभिजन विदेशी स्याटेलाइटबाट सञ्चालित हुँदै आएकामा आफ्नै स्याटेलाइट जडान गरी सञ्चालन गर्ने सरकारको लक्ष्य छ । रासस
वीर, मनमोहन र सिभिल अस्पतालमा मिदासको अनलाइन अपोइन्टमेन्ट सेवा सुरु
काठमाडौं । वीर अस्पताल, मनमोहन कार्डियो अस्पताल र बानेश्वरस्थित सिभिल सर्भिस अस्पतालमा मिदासले अनलाइन अपोइन्टमेन्ट सेव सुरु गरेको छ । आइएमई ग्रुपद्वारा संचालित मिदास टेक्नोलोजी यि ३ वटा अस्पातालहरूमा दीर्घकालीन उपचार र चिकित्सकसँग परामर्शका लागि मोबाइल एप्लिकेसनमार्फत अनलाइन अपोइन्टमेन्ट लिन सकिने गरी व्यवस्था मिलाएको हो । अनलाइन अपोइन्टमेन्ट सेवाले अस्पतालको ओपीडी सेवालाई सहज बनाउने र बिरामीको सन्तुष्टि बढाउने मिदासले जनाएको छ । सम्बन्धित अस्पतालको मोबाइल एप्लिकेसन वा मिदास टेक्नोलोजीको मेरो डाक्टर मोबाइल एप तथा वेभ मार्फत अनलाइन ओ.पी.डी. टिकट सेवा लिन सकिनेछ ।
आइएमई डबलको डबलको डबल अफरको विजेता बने दोलखाका दाहाल, जिते साढे १२ लाख
काठमाडाैं । आईएमईले चाडपर्व लक्षित गरी ल्याएको आईएमई डबलको डबलको डबल अफरको विजेत जिवेश दाहाल भएका छन् । आईएमईले बिहीबार एक कार्यक्रमको आयोजना गरी उनलाई विजेता घोषणा गरेको हो । उनले दुबईबाट १ लाख ५६ हजार ५५८ रुपैयाँ रेमिट्यान्समार्फत पठाएकोमा उनले कुल १२ लाख ५२ हजार ४६४ रुपैयाँ प्राप्त गरेका हुन् । आईएमई गु्रपका ब्राण्ड एम्बेस्डर दीपकराज गिरी र दीपाश्री निरौलाले लक्की ड्रमार्फत् विजेता घोषणा गरेका थिए । उनी हाल दुवईमा भएपनि दाहालकी श्रीमतिलाई गिरी र निरौलाले फोन गरी बधाई दिएका थिए । उनीसँगै आईएमईले ८ औं साताको लक्की ड्र मार्फत मसनाल क्षेत्रीलाई पनि पुरस्कार प्रदान गरेको छ । उनले पनि लक्की ड्र मार्फत कुल ८६ हजार रुपैयाँ हात पारेका छन् । उनले ४३ हजार रुपैयाँ रेमिट्यान्स पठाएका थिए । आईएमर्ईले दशैं, तिहार तथा छठ पर्वलाई लक्षित गर्दै ‘डबलको डबलको डबल’ अफर सञ्चालन गरेको थियो । कार्यक्रममा आइएमई ग्रुपका अध्यक्ष चन्द्र प्रसाद ढकालले आइएमईले व्यवसायिक नाफाभन्दा पनि संस्थागत सामाजिक उत्तरदायित्वको क्षेत्रमा काम गरिरहेको बताए । अब नेपालमा डिजिटल माध्यमबाट रेमिट्यान्स भित्र्याउने प्रक्रिया पनि सुरु भइसकेकोले यसमा साथ दिन सबैलाई आग्रह गरे । ‘आजभन्दा २० वर्ष अगाडि नेपालमा २० प्रतिशत औपचारिक रुपमा र बाँकी अनौपचारिक रुपमा स्वदेशमा पैसा आउँथ्यो, तर अहिले ठ्याक्कै उल्टो भएको छ, यसमा हामीले महत्वपूर्ण काम गरेको आभास भएको छ, देशमा रेमिट्यान्स भित्र्याउन र समग्र अर्थतन्त्रमा योगदान पुर्याउनका लागि महत्वपूर्ण काम गरेको हाम्रो बुझाई छ,’ उनले भने । यस्तै, उनले अहिले रेमिट्यान्स लगानीमा भन्दा पनि उपभोगमा गइरहेको बताउँदै अब भविश्यका लागि पनि ‘लङ्ग टर्म इन्भेष्टमेन्ट’ गर्नु पर्ने बताए । लगानीबाट राम्रो प्रतिफल आउने भएकोले पनि रेमिट्यासन्लाई सही सदुपयोग गर्न उनले सबैलाई आग्रह गरे । यस्तै, कार्यक्रममा आईएमईका प्रमुख कार्यकारी अधिकृत (सीईओ) सुमन पोखरेलले आईएमई जहिले पनि हाम सर्वसनधारणको सहजका लागि काम गर्ने संस्थाका रुपमा विकास भएको बताए । उनका अनुसार संस्थागत सामाजिक उत्तरदायित्वको रुपमा होस् वा अन्य समयमा पनि आम सर्वसाधारणहरुका समस्या समाधान गर्ने प्रयास आईएमईले वर्षेनी गर्दै आएको बताए । उनले पनि आईएमईले औपचारिक क्षेत्रबाट रेमिट्यान्स भित्र्याउनका लागि गरेको पहल स्मरण गर्दै अब डिजिटल रेमिट्यान्सको विकल्प नरहेको पनि प्रष्ट पारे । ‘अबको प्रविधिको हो, हामीले डिजिटल रेमिट्यान्सको सुरुवात गरिसकेका छौं ,यसको राम्रो प्रतिक्रिया आइरहेको छ, कोठामै बसेर कम खर्चमा रेमिट्यान्स पठाउन सकिन्छ,’ उनले भने । यस्तै, उनले कार्यक्रममा नेपालमा रेमिट्यान्स कम आउनुको कारण पनि बताएका थिए । कार्यक्रममा ब्राण्ड एम्बेस्डर द्वय गिरी र निरौलाले पनि धारणा राखेका थिए ।
