फोकसवान नेशनल पेमेन्ट स्वीचमा आवद्ध, बन्यो पहिलो भुक्तानी सेवा प्रदायक
काठमाडौं । नेपाल क्लियरिङ्ग हाउस लिमिटेडले कार्यान्वयन गर्दै गरेको नेशनल पेमेन्ट स्वीचमा फोकसवान पेमेन्ट सोलुसन्स प्रा. लि आवद्ध भएको छ । नेशनल पेमेन्ट स्वीचको पहिलो चरणको थालनीका निम्ती एनसीएचएल र फोकसवान पेमेन्ट सोलुसन्सबीच सम्झौतापत्रमा हस्ताक्षर भएको हो । सो सम्झौतापत्रमा फोकसवान पेमेन्ट सोलुसन्सका तर्फबाट प्रमुख कार्यकारी अधिकृत प्रणय राजभण्डारी तथा एनसीएचएलका तर्फबाट प्रमुख कार्यकारी अधिकृत नीलेशमान सिंह प्रधानले हस्ताक्षर गरेका हुन् । उक्त सम्झौतासँगै फोकसवान पेमेन्ट सोलुसन्स, नेशनल पेमेन्ट स्वीचमा जोडिने पहिलो भुक्तानी सेवा प्रदायक बनेको छ । नेशनल पेमेन्ट स्वीचअन्तर्गत पहिलो चरणमा उपलब्ध हुने विभिन्न सेवा तथा उपकरणहरु फोकसवान आफूले प्रयोग गर्नुका साथै अन्य विभिन्न बैंक वित्तीय संस्थालाई पनि उपलब्ध गराउने छ । नेपाल सरकारको बजेट तथा मौद्रिक नीतिमा समेत उल्लेख भए बमोजिम नेशनल पेमेन्ट स्वीचको स्थापनाको लागी एनसीएचएललाई नेपाल राष्ट्र बैंकद्धारा पहिलो चरण कार्यान्वयनको लागि अन्तिम स्वीकृति प्राप्त भइसकेको तथा एनसीएचएले पहिलो चरणसंग सम्बन्धित कार्यहरु पूरा गरी संचालनको तयारीमा रहेको छ । यसै क्रममा नेशनल पेमेन्ट स्वीचको कार्यान्वयनका लागी एनसीएचएलले विभिन्न बैंक/वित्तीय संस्थाहरु तथा भुक्तानी सेवा प्रदायकहरुसँग आवश्यक सहकार्यता गरिरहेको छ । नेशनल पेमेन्ट स्वीचको पहिलो चरणमा रिटेल पेमेन्ट स्वीचअन्तर्गत नेपाल-क्युआर स्ट्याण्डर्ड बमोजिम नेपालपे क्युआर तथा इन्टरनेटवर्क क्युआर, डाइरेक्ट डेबिट रिक्वेस्ट-टु-पे तथा इ-म्यान्डेटका उपकरणहरु, वालेट-वालेट बीच अन्तर आवद्धता, विभिन्न भुक्तानीका लागि बिलर गेटवे मार्फत अन्तरआबद्धता लगायतका भुक्तानी उपकरणहरु उपलब्ध हुने छन् । उक्त स्वीच रिटेल भुक्तानीको प्राथमिक पूर्वाधारको रुपमा रही विभिन्न रियल टाइम, नन-रियल टाइम तथाओपन एपिआइकामार्फत बैंक वित्तिय संस्थातथा गैर बैंकिङ्ग संस्थाले आफ्ना ग्राहकलाई अन्य थप सेवा पनि प्रदान गर्न सक्नेछन् । त्यसै गरी दोश्रो चरणमा कार्ड र कार्डसँग सम्बन्धित भुक्तानीको लागी नेशनल कार्ड स्वीच र नेपाल पेमेन्ट कार्डको आवश्यक कार्य अघि बढाइएको छ । नेशनल पेमेन्ट स्वीचको कार्यान्वयन सँगै एनसीएचएलले नेपाल सरकार, नियामक तथा विभिन्न सरोकारवालाहरुसँग समन्वय गरी भुक्तानी प्रणाली तथा उपकरणको प्रयोगलाई थप सहज, सुलभ र सुरक्षित बनाउने अपेक्षा गरेको छ । फोकसवान पेमेन्ट सोलुसन्स प्रा. लि. नेपाल राष्ट्र बैंकबाट भुक्तानी सेवा प्रदायकको लाईसेन्स प्राप्त संस्था हो । स्थापनाकाल देखि नै फोकसवानले आफ्ना ग्राहकहरुका निम्ती सुरक्षित रुपमा कारोवार गर्नको लागी विभिन्न डिजिटल सेवा प्रदान गर्दै आएको छ । ग्राहकलाई थप सेवा सुविधा प्रदान गर्नका लागि फोकसवानले राष्ट्रिय तथा अन्तर्राष्ट्रिय संस्थाहरुसँग समन्वय गर्दै आएको छ ।
टेलिकमका एमडी अधिकारीको कार्यकाल सकिदै, नयाँ छनोटका लागि आवेदन खुल्ला
काठमाडौं । सरकारले नेपाल दूरसञ्चार कम्पनी लिमिटेड (नेपाल टेलिकम) को नयाँ प्रबन्ध निर्देशक (एमडी) छनोटको प्रक्रिया अघि बढाएको छ । टेलिकमका प्रबन्ध निर्देशक डिल्लीराम अधिकारीको कार्यकाल सकिन लागेसँगै नयाँ एमडी छनोटको प्रक्रिया अघि बढाईएको हो । सञ्चार तथा सूचना प्रविधि मन्त्रालयले टेलिकमको नयाँ एमडी छनोट तथा सिफारिसका लागि मंगलबार एक समिति गठन गरेको छ । मन्त्रालयका सचिव डा. बैकुण्ठ अर्यालको संयोजकत्वमा छनौट तथा सिफारिस समिति गठन गर्दै सरकारले टेलिकममा नयाँ प्रबन्ध निर्देशक ल्याउने तयारी अघि बढाएको हो । अर्यालको संयोजकत्वमा गठित उक्त समितिमा मन्त्रालयकै एकजना सहसचिव र एक जना विज्ञ रहनेछन् । सो समितिले आज एक सूचना जारी गर्दै कम्पनीको नयाँ प्रबन्ध निर्देशकका लागि खुल्ला दरखास्त माग गरेको छ । सूचना अनुसार एमडीका लागि आवेदन दिनका लागि ३५ वर्षपूरा भई ५६ वर्ष ननाघेको हुनुपर्नेछ । यस्तै, टेलिकम, सोही प्रकृतिका दूरसञ्चार सेवा प्रदायक संस्था वा नेपाल सरकारको पूर्ण वा आंशिक स्वामित्व भएका संस्था र निकायको व्यवस्थापकीय पदमा कम्तीमा ३ वर्ष सहित १२ वर्षको कार्यअनुभव भएको हुनुपर्नेछ । उम्मेदवारले पेस गरेको व्यवसायिक कार्ययोजना र सोको प्रस्तुती, शैक्षिक योग्यता, अनुभव र अन्तर्वार्ताको मूल्यांकनका आधारमा नियुक्तिका लागि मन्त्रालय समक्ष पेश गर्ने जनाएको छ । तोकिएको कागजपत्रका साथमा नयाँ एमडीका लागि पुस ७ गतेसम्म आवेदन दिइसक्नुपर्नेछ । हालका एमडी अधिकारीको पदावधि पुस २२ गते सकिदैछ ।
काठमाडौं महानगरले हाइम्याक्स बत्ती जडान गर्दै, ८० स्थानमा राख्ने योजना
काठमाडौं । काठमाडौं महानगरपालिकाले काठमाडौं महानगरपालिकाका विभिन्न स्थानमा हाइम्याक्स बत्ती जडान गर्ने भएको छ । महानरगले महानगरको विभिन्न ८० वटा स्थानमा हाइम्याक्स बत्ती जडान गर्नको लागि प्रक्रिया अगाडि बढाएको बताएको हो । महानगरपालिकाका अनुसार ९ करोड ९० लाख रुपैयाँ लागतमा काठमाडौंका ८० ठाउँमा हाइमेक्स बत्ती जडान गर्न लागिएको हो । महानगरपालिकालाई उज्यालो सहरको रूपमा विकास गर्ने परिकल्पना साथ महानगरले विभिन्न ठाउँमा हाइमेक्स बत्ती जडान गर्न लागेको हो । यसअघि नै सो काम सक्ने महानगरको योजना भएपनि ठेक्का हुन नसक्दा काम रोकिएको महानगरको भनाई छ । महानगरका सूचना अधिकारी बसन्त आचार्यले उच्चस्तरको हाइम्याक्स बत्ती ५० फिट अग्लो पोल गाडेर जडान गरिने बताए । उनका अनुसार यस्ता बत्ती अहिले विमानस्थलमा मात्रै जडान गरिएका छन् । ‘हामीले काठमाडौं महानगरका विभिन्न ८० ठाउँमा ८८ वटा हाइमेक्स बत्ती जडान गर्दैछौं, त्यसका लागि प्रक्रिया सुरु भइसकेको छ, हालसम्म ठेक्का लगाउन नसक्दा काम रोकिएको थियो, अब टेन्डरको काम पनि भइसकेको छ,’ अब छिट्टै काम हुन्छ,’ उनले भने । उनका अनुसार काठमाडौंलाई उज्यालो शहरको रुपमा अगाडि बढाउनको लागि हाइम्याक्स बत्तीले धेरै भूमीका खेल्नेछ । ‘अहिले नेपाल विद्युत प्राधिकरण विद्युत खपत बढाउनका लागि लागि परेको छ, हाम्रो यो योजनाले पनि विद्युत खपतमा सहयोग पुग्छ, यस्तो बत्ती जडान गरेपछि नागरिकको सुरक्षा पनि हुन्छ, आवतजावतमा पनि सहज हुन्छ,’ उनले भने । उनका अनुसार हाइमेक्स बत्तीको केन्द्रबाट ५ सय मिटरसम्म देख्न सकिन्छ । यसले शान्ती सुरक्षासँगै चोरीका घटनामा पनि कमि आउने उनको भनाई छ । महानगरका मेयर विद्यासुन्दर शाक्यले आफू निर्वाचित भएसँगै काठमाडौं महानगरको ३२ वडाका १० हजार स्थानमा हाइमाक्स बत्ति जडान गर्ने र महानगरपालिकालाई उज्यालो शहरको रुपमा विकास गर्ने परिकल्पना अगाडि सारेका थिए । तर, उनको त्यो काम अहिलेसम्म अगाडि बढ्न सकेको थिएन । अब कार्यकाय सकिने केही महिना मात्रै बाँकी रहँदा उनी यो योजनालाई पूर्णता दिन लागि परेका हुन् ।
