साना लगानीकर्तालाई सेयर कर्जा प्रोत्साहित, ठूलालाई बढीमा ४ करोड
काठमाडौैं । नेपाल राष्ट्र बैंकले सेयर बजारका साना लगानीकर्तालाई कर्जा प्रवाहमा प्रोत्साहित गर्ने नीति लिएको छ । मौद्रिक नीति सार्वजनिक गर्दै गभर्नर महाप्रसाद अधिकारीले ठूला लगानीकर्तामा प्रवाह हुने सेयर कर्जा नियन्त्रण गर्न सीमा तोकेका छन् । एक व्यक्तिले बढीमा ४ करोड र समग्र वित्तीय प्रणालीबाट १२ करोड रुपैयाँ मात्र सेयर धितो कर्जा लिन पाउने व्यवस्था गरिएको गभर्नर अधिकारीले जानकारी दिए । बैंक तथा वित्तीय संस्थाबाट प्रवाह गर्ने सेयर धितो कर्जा साना लगानीकर्तालाई प्रोत्साहित गर्ने उदेश्यले यस्तो व्यवस्था गरिएको उनले बताए । सेयरधितो मूल्यांकन विधि पुरानै हुने उनले बताए । १८० दिनेको औषत मूल्यको ७० प्रतिशतसम्म सेयर धितो कर्जा प्रवाह गर्ने नीति राष्ट्र बैंकले लिएको छ ।
नबिल बैंकको सेयर नेप्सेमा सूचीकृत, आइतबारदेखि किनबेच गर्न पाइने
काठमाडौं । नबिल बैंकको ३६ लाख ४२ हजार ९२१ कित्ता सेयर नेप्सेमा सूचीकृत भएको छ । युनाइटेड फाइनान्सलाई प्राप्ति गरेपछि बैंकको सो मात्राको सेयर साउन २९ गते नेप्सेमा सूचीकृत भएको हो । यससँगै अब उक्त सेयर डिम्याट खातामा हस्तान्तरण हुने छ । र, आगामी आइतबारदेखि दोश्रो बजारमा किनबेच गर्न पाइने छ । नबिल बैंकले युनाइटेडलाई १ बराबर ०.३५ को स्वाप अनुपातमा प्राप्ति गरेको हो ।
साहस उर्जाको आईपीओ खुल्यो, क-कसले भर्न पाउँछन् ?
काठमाडौं । साहस उर्जाले साउन २९ गतेदेखि प्राथमिक सार्वजनिक निष्काशन (आईपीओ)को बिक्री खुला गरेकाे छ । कम्पनीले आयोजना प्रभावित क्षेत्र सोलुखुम्बु जिल्लाका बासिन्दाहरुका लागि ३५ लाख कित्ता साधारण सेयर निष्काशन खुला गरेकाे हाे । कम्पनीले प्रतिसेयर १०० अंकित मूल्यका दरले ३५ लाख कित्ता अर्थात ३५ करोड रुपैयाँ बराबरको सेयर जारी गरेकाे छ । यससँगै इच्छुक स्थानीय बासिन्दाले न्यूनतम १० कित्ता र अधिकतम १० लाख ५० हजार कित्ता सेयर जारी गर्ने छन् । उनीहरुले साउन २९ गतेदेखि छिटोमा भदौ ११ गतेसम्ममा आवेदन दिइसक्नुपर्ने छ । यदि सो अवधिसम्म माग बमोजिमको आवेदन नपरेमा ढिलोमा भदौ २७ गतेसम्म सेयर निष्काशन तथा बिक्री खुला हुने छ । आईपीओमा ग्लोबल आईएमई बैंकको सल्लेरी शाखा, नेपाल इन्भेष्टमेन्ट बैंकको लुक्ला शाखा, लक्ष्मी बैंकको मुग्ली र नेले शाखा, माछापुच्छ्रे बैंकको सल्लेरी शाखा र प्राइम बैंकको रमिते शाखामार्फत आवेदन दिन सकिने छ । कम्पनीको सेयर निष्काशन तथा बिक्री प्रबन्धकमा एनआईबिएल एस क्यापिटल रहेको छ । आईपीओ निष्काशनका लागि गराएको रेटिङ्गमा कम्पनीलाई इक्रा नेपालले इक्रा एनपी आईआर डबल बी प्लस रेटिङ्ग प्रदान गरेको छ । यसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्दछ । आयोजनाको निर्माण अवधिको ब्याजसहित प्रतिमेगावाट लागत १३ करोड ७९ लाख ७ हजार रुपैयाँ मात्र हुने अनुमान गरिएको छ । त्यस्तै, आयोजनाको इजाजतपत्र वहाल रहने अवधि २०७१ असोज २ गतेदेखि २१०६ असोज १ गतेसम्म रहेकोले विद्युत उत्पादन अनुमति पत्र २९ वर्ष बाँकी रहेको छ । र, साधारण लगानी फिर्ता हुने अवधि ८.०२ वर्ष र डिस्काउन्टमा लगानी फिर्ता हुने अवधि १०.१३ वर्ष रहेको छ । आर्थिक वर्ष २०७७/७८ को अपरिष्कृत वित्तीय विवरएक अर्बण अनुसार कम्पनीको प्रतिसेयर नेटवर्थ १५७.४३, प्रतिसेयर आम्दानी २२.४२ र सञ्चित नाफा ४० करोड १६ लाख रुपैयाँ रहेको छ । त्यस्तै, आर्थिक वर्ष २०७८/७९ मा कम्पनीको प्रतिसेयर नेटवर्थ १६४.५६, प्रतिसेयर आम्दानी २१.८७ र सञ्चित नाफा २ अर्ब २५ करोड ४३ लाख रुपैयाँ पुग्ने प्रक्षेपण गरिएको छ ।
