न्यादी हाइड्रोपावरको आइपिओ खुला, लमजुङ जिल्लावासीले भर्न पाउने
काठमाडाैं । न्यादी हाइड्रोपावर कम्पनी लिमिटेडको प्राथमिक सार्वजनिक निष्काशन (आइपिओ) बिक्री खुला भएको छ । कम्पनीले आयोजना प्रभावित क्षेत्र लमजुङका स्थानीय बासिन्दा तथा संस्थापक शेयर धनीका लागि आजबाट बिक्री खुला गरेको हो । सो आइपिओ छिटोमा यही भदौ १५ गतेसम्म र ढिलोमा भदौ ३० गतेसम्म बिक्री खुला हुने जनाइएको छ । कम्पनीले प्रतिशेयर १०० अङ्कित मूल्यका कूल १८ लाख कित्ता साधारण शेयर निष्काशन गर्न लागेको हो । यसमध्ये आयोजना प्रभावित स्थानीयवासीका लागि पाँच लाख, जिल्लावासीका लागि १० लाख र बाँकी तीन लाख कित्ता शेयर कम्पनीले आफ्ना संस्थापक शेयरधनी बुटवल पावर कम्पनी र लमजुङ विद्युत् विकास कम्पनीका कर्मचारीका लागि निष्काशन गर्न लागेको हो । कम्पनीले मस्र्याङ्दी गाउँपालिका–३ (साविक खुदी गाविसका वडा नं १, २, ३ र ६ मात्र) तथा मस्र्याङदी –६, ७ र ८ (साविक बाहुनडाँडा गाविस र साविक भुलभुले गाविसका सम्पूर्ण वडा) का स्थानीय बासिन्दाका लागि पाँच लाख कित्ता शेयर निष्काशन गरेको हो । आइपिओमा एनएमबि बैंकको बँेसीशहर शाखा, सिभिल बैंकको भुलभुले शाखा तथा ग्लोबल आइएमई बैंकको बेँसीशहर, उदिपुर, दोर्दी, भोर्लेटार, सुन्दरबजार र भोटेओडार शाखा कार्यालयबाट आवेदन दिन सकिनेछ । कम्पनीका संस्थापक शेयरधनी संस्थाका कर्मचारीले कम्पनीको कार्यालय बुद्धनगरबाट आवेदन दिन सक्नेछन् । कम्पनीको शेयर निष्काशन तथा बिक्री प्रबन्धक ग्लोबल आइमएई क्यापिटल छ । यससँगै इच्छुक स्थानीय बासिन्दाले न्यूनतम १० कित्ता र अधिकतम ५० हजार कित्ता शेयरका लागि आवेदन दिन सक्नेछन् ।
एनएमबि हाइब्रिड र एनएमबि फिफ्टी योजनाको लाभांश घोषणा, कुनको कति ?
काठमाडौं । एनएमबि क्यापिटलले सञ्चालनमा ल्याएको दुई फण्डको प्रतिफल घोषणा भएको छ । योजना व्यवस्थापक रहेको क्यापिटलले एनएमबि हाइब्रिड फण्ड एल १ र एनएमबि फिफ्टी नामक योजनाको लाभांश घोषणा गरेको हो । क्यापिटलले एनएमबि हाइब्रिड फण्ड एल १ योजनाको आर्थिक वर्ष २०७७/७८ को नाफाबाट योजनाका ईकाईधनीलाई कर समेत २० प्रतिशत प्रतिफल दिने प्रस्ताव गरेको छ । त्यस्तै, क्यापिटलले एनएमबि फिफ्टीको नाफाबाट इकाईधनीलाई ३० प्रतिशत (कर सहित) प्रतिफल दिने प्रस्ताव गरेको छ । साउन ३२ गते बसेको सञ्चालक समितिको बैठकले उक्त प्रस्ताव गरेको हो । उक्त प्रस्तावलाई क्यापिटलको सभाले पारित गरेपश्चात मात्रै सम्बन्धित योजनाका इकाईधनीले सो मात्राको प्रतिफल पाउने छन् । सो प्रयोजनको लागि क्यापिटलले भदौ १८ गते शुक्रबार एक दिनको लागि बुक क्लोज गर्ने निर्णय गरेको छ ।
बोनस र हकप्रद पारित गर्न अपि पावरले डाक्यो साधारणसभा
काठमाडौं । अपि पावर कम्पनीले आगामी भदौ २५ गते वार्षिक साधारण सभा आव्हान गरेको छ । कम्पनीले सो दिन बिहान ११ बजे भर्च्युअल माध्यम जुम मार्फत आफ्नो १८औं वार्षिक साधारण सभा गर्ने भएको हो । कम्पनीले प्रस्तावित बोनस र हकप्रद सेयर पारित गर्नको लागि उक्त सभाले आव्हान गरेको हो । कम्पनी सञ्चालक समितिको बैठकले आर्थिक वर्ष २०७७/७८ को नाफाबाट चुक्ता पुँजीको १०.५ प्रतिशतका दरले बोनस सेयर दिने विशेष प्रस्ताव गरेको छ । त्यस्तै, उक्त बोनस सेयर पश्चात कायम हुने चुक्ता पुँजीको ३९.३६ प्रतिशत अर्थात १ बराबर ०.३९३६ का दरले हकप्रद सेयर निष्काशन गर्ने प्रस्तावलाई सभाले स्वीकृति दिने भएको छ । प्रस्तावित हकप्रद सेयर निष्काशनबाट प्राप्त हुने रकम कम्पनीले निर्माण गरिरहेको ४० मेगावाट क्षमताको माथिल्लो चमेलिया जलविद्युत आयोजनामा थप लगानी गर्ने जानकारी गराएको छ । साथै, सभाले उक्त आवको नाफाबाट सेयरधनीलाई कर प्रयोजनको लागि ०.५५ प्रतिशत नगद लाभांश समेत वितरण गर्ने छ । १०.५ प्रतिशत बोनस सेयर पश्चात कम्पनीको चुक्ता पुँजी २ अर्ब ७५ करोड ८९ लाख रुपैयाँ कायम हुने छ । त्यसको ३९.३६ प्रतिशत हकप्रद पश्चात कम्पनीको चुक्ता पुँजी ३ अर्ब ८४ करोड रुपैयाँ नाघ्ने छ । उक्त सभामा जाने प्रयोजनको लागि कम्पनीको भदौ १८ गतेदेखि भदौ २४ गतेसम्म बुक क्लोज हुने छ । यससँगै भदौ १७ गतेसम्म कायम सेयरधनीले कम्पनीको प्रस्तावित बोनस र हकप्रद सेयर पाउने छन् ।
