सेयर बजारमा उछाल, २ अर्बमाथिको कारोबार
काठमाडौं । साताको पहिलो कारोबार दिन आइतबार सेयर बजारमा उछाल आएको छ । आइतबार नेपाल स्टक एक्सचेञ्जको मूल्य परिसूचक नेप्से ४७.७५ अंकले वृद्धि भएको हो । योसँगै नेप्से परिसूचक १९०७.९५ बिन्दुमा पुगेर बन्द भएको छ । आइतबार ६५ लाख ३० हजार ६ सय ४३ कित्ता सेयर खरिदबिक्री हुँदा २ अर्ब १ करोड १७ लाख रुपैयाँबराबरको कारोबार भएको छ । आज २१४ कम्पनीको सेयर मूल्य बढ्दा २३ कम्पनीको सेयर मूल्य भने घटेको छ । ३ कम्पनीको सेयर मूल्य भने स्थिर रह्यो । आज सबैभन्दा बढी छ्यांदी हाइड्रोपावर र भगवती हाइडेपावरको सेयर मूल्य १० प्रतिशत बढेको छ । त्यस्तै विजय लघुवित्त र स्वरोजगार लघुवित्तको सेयर मूल्य ९ प्रतिशतले बढेको छ । त्यसैगरी इन्फिनिटी लघुवित्त र एनएमबी सुलभ इन्भेस्टमेन्ट फन्ड–२ को सेयर साढे दुई प्रतिशतले घटेको छ । आज सबैभन्दा धेरै सोनापुर मिनरल्स एन्ड आयल कम्पनीको ११ करोड ६६ लाख रुपैयाँको सेयर किनबेच भएको छ ।
आजसम्म यी २ बैंकको सेयर खरिद गर्यो भने लाभांश पाइने, कुनको कति ?
काठमाडौं । आइतबार विभिन्न २ विकास बैंकको लाभांश सुरक्षित गर्ने अन्तिम दिन रहेको छ । सांग्रिला डेभलपमेन्ट बैंक र शाइन रेसुङ्गा डेभलपमेन्ट बैंकको लाभांश सुरक्षित गर्ने आज मंसिर १० गते अन्तिम दिन हो । साधारणसभा तथा लाभांश प्रयोजनार्थ सांग्रिला डेभलपमेन्ट बैंकले मंसिर ११ गतेदेखि मंसिर २४ गतेसम्म र शाइन रेसुङ्गा डेभलपमेन्ट बैंकले मंसिर ११ गतेदेखि मंसिर २३ गतेसम्म सेयरधनी किताब बन्द (बुक क्लोज) गर्ने निर्णय गरेका छन् । त्यसैले आजसम्म नेपाल स्टक एक्सचेञ्ज (नेप्से)मा आजसम्म सेयर खरिद गर्नेले लाभांश प्राप्त गर्नेछन् । सांग्रिला डेभलपमेन्ट बैंकले गत आर्थिक वर्ष २०७९/८० को नाफाबाट हाल कायम चुक्ता पुँजीको ५ प्रतिशत बोनस सेयर र कर प्रयोजनका लागि ०.२६३ प्रतिशत नगद गरी कूल ५.२६३ प्रतिशत लाभांश वितरण प्रस्ताव गरेको छ । लाभांश पारित गर्न बैंकले १९औं वार्षिक साधारणसभा मंसिर २४ गते लैनचौर ब्याङ्क्वेट काठमाडौंमा बिहान ११ बजे बोलाएको हो । यस्तै, शाइन रेसुङ्गा डेभलपमेन्ट बैंकले गत आर्थिक वर्ष २०७९/८० को नाफाबाट हाल कायम चुक्ता पुँजीको १०.५ प्रतिशत बोनस र कर प्रयोजनका लागि ०.५५ नगद गरी कूल ११.०५ प्रतिशत लाभांश वितरण गर्ने प्रस्ताव गरेको छ । लाभांश पारित गर्न बैंकले १५औं वार्षिक साधारणसभा मंसिर २३ गते रुपन्देहीमा बिहान ११ बजे बोलाएको हो
नेपाल इन्स्योरेन्सको लाभांश घोषणा
काठमाडौं । नेपाल इन्स्योरेन्स कम्पनीले लाभांश घोषणा गरेको छ । इन्स्योरेन्स सञ्चालक समितिको मंसिर ९ गते बसेको बैठकले गत वर्षको नाफाबाट १०.५२६३ प्रतिशत लाभांश वितरण गर्ने प्रस्ताव गरेको हो । इन्स्योरेन्स कम्पनीले गत आर्थिक वर्ष २०७९/८०को नाफाबाट हाल कायम चुक्ता पुँजी १ अर्ब ४९ करोड ४७ लाख ६५ हजार रुपैयाँको १० प्रतिशत बोनस सेयर र कर प्रयोजन सहित ०.५२६३ प्रतिशत नगद गरी कूल १०.५२६३ प्रतिशत लाभांश प्रस्ताव गरेको हो । इन्स्योरेन्स कम्पनीले प्रस्ताव गरेको उक्त लाभांश नेपाल बीमा प्राधिकरणबाट स्वीकृत भई आगामी वार्षिक साधारणसभाले पारित गरेपश्चात् सेयरधनीहरुलाई वितरण गरिनेछ ।
