अनलाइन ट्रेडिङ भोलिदेखि, अर्थमन्त्रीले उद्घाटन गर्ने
काठमाडौं । नेपाल स्टक एक्सचेञ्जले भोलि (मंगलबार) देखि दोस्रो बजारको शेयर खरिदबिक्री प्रक्रिया अनलाइन प्रक्रियामार्फत् गर्न सकिने प्रणाली (अनलाइन ट्रेडिङ)को सुरुवात गर्दैछ । भोलि बजार खुल्ने समयमा अर्थमन्त्री युवराज खतिवडाले उक्त कारोबार प्रणालीको उद्घाटन गर्ने नेप्सेले जनाएको छ । त्यसका लागि नेप्सेले दरबारमार्गस्थित होटल याक एण्ड यतिमा बिहान १०:३० बजे कार्यक्रमको आयोजना गरेको छ ।
अपर तामाकोशी हाइड्रोपावरको आईपीओ भर्ने आज अन्तिम दिन
काठमाडाैं । अपर तामाकोशी हाइड्रोपावर लिमिटेडले तेस्रो चरणमा सर्वसाधारण शेयरधनीका लागि निष्कासन गरेको प्रारम्भिक सार्वजनिक निष्कासन (आईपीओ)को सोमबार अन्तिम दिन हुने भएको छ । शेयर निष्कासन भएको तेस्रो दिनसम्ममा नै निष्कासन गरिएको कुल शेयर संख्याभन्दा बढी शेयरका लागि सर्वसाधारणको आवेदन परेपछि चौथो दिनमा नै उक्त शेयर निष्कासन बन्द हुने भएको हो । उक्त शेयरका लागि आइतबार कार्यालय समयसम्म २ लाख ६ हजार आवेदकमार्फत् करिब ४ अर्ब रुपैंयाको शेयरका लागि माग आवेदन भएको थियो । हाइड्रोपावरले तेस्रो चरणका लागि १ अर्ब ५८ करोड बराबरका १ करोड ५८ लाख कित्ता शेयर खुला गरेको छ । यसअघि स्थानीयवासी र सञ्चय कोषका सञ्चयकर्तालाई उक्त शेयर वितरण गरिसकिएको छ ।
स्पर्स लघुवित्तको ३२.५ प्रतिशत आईपीओ पारित, पुँजी ८ करोड २९ लाख पुग्ने
काठमाडौं । सपर्स लघुवित्त वित्तीय संस्थाको प्रस्तावित ३२.५ प्रतिशत साधारण सेयर (आईपीओ) जारी गर्ने प्रस्ताव पारित भएको छ । आइतबार सम्पन्न संस्थाको दोस्रो वार्षिक साधारण सभाले सञ्चालक समितिको उक्त प्रस्तावलाई पारित गरेको हो । सभाले पारित गरे बमोजिम जारी पुँजीको ३२.५ प्रतिशतले हुन आउने २ करोड ६९ लाख रुपैयाँ बराबरको २,६९,६३० कित्ता साधारण सेयर सर्वसधारणलाई निष्कासन गर्ने छ । हाल कम्पनीको जारी पुँजी ८ करोड २९ लाख रुपैयाँ रहेको छ । विशेष प्रस्ताव अन्तर्गत प्रबन्धपत्र तथा निमयावलीमा संसोधन, जारी पुजीलाई वृद्धि गर्दै संस्थापक तथा सर्वसाधारणको शेयर स्वामित्वलाई ७०ः३० को अनुपातबाट ६७.५०ः३२.५० हुने गरी संशोधन गर्ने तथा थप पाँच जिल्लामा कार्यक्रम विस्तार गर्ने प्रस्ताव पारित भएको छ । जनता बंैक नेपाल लि, मेगा बैंक नेपाल लि. र ७५ जना व्यवसायिक तथा प्रतिष्ठित व्यक्तित्वहरुले प्रर्वद्धन गरेको यो वित्तीय संस्थाले हाल २० वटा शाखा मार्फत करिब १२,००० सदस्यहरुलाई ४६ करोड कर्जा लगानी गरेको छ । साथै, कम्पनीले करीब ९ करोड रुपैयाँ बचत संकलन गरेको प्रमुख कार्यकारी अधिकृत तथा कम्पनी सचिव सजल खड्काले बताए । १० करोड रुपैयाँ अधिकृत पुँजी रहेको वित्तीय संस्थाको हाल चुक्ता पुँजी ५ करोड ६० लाख रुपैयाँ रहेको छ । सर्वसाधारणलाई सेयर जारी गरे पश्चात कम्पनीको चुक्ता पुँजी ८ करोड २९ लाख रुपैयाँ पुग्नेछ ।
