बजार दोहोरो अंकले ओरालो लाग्दा ३७ करोडको सेयर किनबेच, सबै समूह राताम्मे
काठमाडौं । बुधबारको सेयर बजार दोहोरो अंकले ओरालो लागेको छ । साताको शुरुदेखि लगातार उकालो लागेको नेप्से परिसूचक आज भने १५.७८ अंकले ओरालो लागेर १४४०.२९ अंकमा झरेको छ । बजारमा परिसूचक सँगै सेयर कारोबारमा पनि गिरावट आएको छ । मंगलबार ५० करोडको सेयर किनबेच भएको बजारमा बुधबार जम्मा ३७ करोडको सेयर कारोबार भएको छ । बुधबार १५८ कम्पनीका १५ लाख ७४ हजार कित्ता सेयर बिक्री भएका छन् । दोहोरो अंकले घटेको बजारमा कारोबारमा आएका सबै सूचकहरु राताम्मे भएका छन् । बुधबार सबैभन्दा बढी बीमा समूहको परिसूचक १६९ अंकले ओरालो लागेका छन् । त्यस्तै, उत्पादनमूलक २७, माइक्रोफाइनान्स २३ र होटल समूह २० अंकले घटेका छन् । बजारमा सबैभन्दा बढी नेपाल लाइफ इन्स्योरेन्सको सेयर कारोबार भएको छ । यस कम्पनीको ३ करोड रुपैयाँ बराबरको सेयर बिक्री भएका छन् । बुधबार यस कम्पनीको सेयर मूल्य प्रतिकित्ता १८२२ रुपैयाँ रहेको छ । १५ अंकले झरेको बजारमा सबैभन्दा बढी एभरेष्ट इन्स्योरेन्सका लगानीकर्ताले १० प्रतिशत गुमाएका छन् । यस कम्पनीको सेयर मूल्य प्रतिकित्ता १९७१ रुपैयाँ रहेको छ । जुन रकम अघिल्लो दिनको तुलनामा २१९ रुपैयाँले घटी हो । उता फर्वाड कम्यूनिटी माइक्रोफाइनान्स वित्तीय संस्थाका लगानीकर्ताले भने ५.१६ प्रतिशत कमाएका छन् ।
नेको इन्स्योरेन्सलाई ५० प्रतिशत हकप्रद निष्कासन गर्न बोर्डकाे अनुमति
काठमाडौं । नेको इन्स्योरेन्सलाई ५० प्रतिशत हकप्रद सेयर निष्कासन गर्न नेपाल धितोपत्र बोर्डले अनुमति दिएको छ । कम्पनीले अंकित मूल्य १०० रुपैयाँका दरले ३९ लाख २० हजार कित्ता सेयर निष्कासन गर्ने भएको छ । इन्स्योरेन्सले बिक्री प्रबन्धक एनएमबी क्यापिटल मार्फत ३९ करोड २० लाख रुपैयाँ बराबरको सेयर जारी गर्न बोर्डको अनुमति पाएको हो । मंगलबार मात्रै कम्पनीलाई सो मात्राको हकप्रद निष्कासन गर्न बोर्डले अनुमति दिएको हो । हाल कम्पनीको चुक्ता पुँजी ७८ करोड ४१ लाख रुपैयाँ रहेको छ । ५० प्रतिशत हकप्रद पश्चात कम्पनीको पुँजी एक अर्ब १७ करोड रुपैयाँ पुग्ने छ । मंगलबार कम्पनीको सेयर मूल्य प्रतिकित्ता ८६२ रुपैयाँ रहेको थियो ।
एसियन लाइफ इन्स्योरेन्सको माघ ८ गते बुक क्लोज, ५० प्रतिशत हकप्रद जारी गर्दै
काठमाडौं । एसियन लाइफ इन्स्योरेन्स कम्पनीको आगामी माघ ८ गते बुक क्लोज हुने भएकाे छ । गत २५ गते बसेको कम्पनी सञ्चालक समितिको बैंठकले हकप्रद सेयर जारी गर्ने प्रयोजनको लागि बुक क्लोज गर्ने निर्णय गरेको हो ।कम्पनीले ५० प्रतिशत हकप्रद सेयर जारी गर्दै छ । हाल कम्पनीको चुक्ता पुँजी ८० करोड ५५ लाख रुपैयाँ रहेको छ । ५० प्रतिशत हकप्रद पश्चात कम्पनीको पुँजी एक अर्ब २० करोड रुपैयाँ पुग्ने छ । बुधबार कम्पनीको सेयर मूल्य करिब प्रतिकित्ता १४४८ रुपैयाँमा कारोबार भइरहेको छ ।
