बेलकोटगढीमा गुरुङको अग्रता कायमै
काठमाडौं । नुवाकोटको बेलकोटगढी नगरपालिका मेयरमा गठबन्धनबाट नेपाल कम्युनिष्ट पार्टी (माओवादी केन्द्र) का उम्मेदवार जगतबाहदुर गुरुङले अग्रता कायम राखेका छन् । पछिल्लो मतगणना अनुसार उनले ४ हजार ६१६ मत ल्याई अग्रता कायम गरेका हुन् । उनका प्रतिस्पर्धी एमालेका उम्मेदवार राजेन्द्र रमण खनालले २ हजार ४६४ मत र राष्ट्रिय प्रजातन्त्र (रापरापा) का उम्मेदवार युवारज पाण्डेले ४ सय ७३ मत प्राप्त गरेका छन् । यस्तै, उपप्रमुखमा नेपाली कांग्रसका उम्मेदवार शिवप्रसाल दाहलले ३ हजार ३९७ मत ल्याई अग्रता कायम राखेका छन् । उनका प्रतिस्पर्धी ऐमालेकी उम्मेदवार रुपमा सापकोटाले २ हजार ९९६ मत र रापरापाकी उम्मेदवार यसोदा दहालले २४३ मत ल्याएकी छिन् । नगरपालिकाको उम्मेदवारहरुको मतगणना जारी छ ।
भरतपुरमा रेनुको अग्रता कायमै
चितवन । भरतपुर महानगरपालिकाको जारी मतगणनामा पाँच दलीय गठबन्धनका उम्मेदवारको अग्रता कायमै छ । पाँच दलीय गठबन्धनबाट प्रमुख पदको उम्मेदवार बनेकी नेकपा (माओवादी केन्द्र) की रेनु दाहालले छ हजार २०७ मतका साथ अग्रता लिएकी हुन् । नेकपा एमालेका उम्मेदवार विजय सुवेदीले छ हजार ११५ मतका साथ उनलाई पच्छ्याइरहेका छन् । त्यस्तै स्वतन्त्र उम्मेदवार जगन्नाथ पौडेलले तीन हजार २२ मत प्राप्त गरेका छन् । यसैगरी उपप्रमुखमा नेपाली कांग्रेसका चित्रसेन अधिकारीले सात हजार ५५८ र राप्रपाका हिमला गुरुङले पाँच हजार १० मत प्राप्त गरेका छन् । भरतपुर महानगरपालिका–५ को एक हजार ३१७ मत गणना हुँदा वडाध्यक्षमा गठबन्धनका युद्धप्रसाद श्रेष्ठले ५७८ मत र नेकपा एमालेका पदमपाणि सुवेदीले ५७२ मत प्राप्त गरेका छन् । यसअघि महानगरको वडा नं १, २ र ४ को वडाध्यक्षमा गठबन्धनबाट कांग्रेसका उम्मेदवार निर्वाचित भएको छ भने वडा नं ३ मा नेकपा एमालेका वडाध्यक्ष निर्वाचित भएका छन् । भरतपुर महानगरपालिकामा एक लाख २७ हजार ८३९ मत खसेको छ । यस्तै जिल्लाको माडी र इच्छाकामना बाहेकका चार पालिकामा पाँच दलीय गठबन्धनको अग्रता कायमै छ ।
रुपन्देहीको तिलोत्तमाको मतगणना स्थगित
रुपन्देही । यहाँको तिलोत्तमा नगरपालिकाको मतगणना अहिले रोकिएको छ । मतगणनामा धाँधली भएको भन्दै नेपाली कांग्रेसका कार्यकर्ताले विरोध जनाएपछि मतगणना रोकिएको हो । तिलोत्तमा नगरपालिकामा रहेको यातायात कार्यालयमा भएको वडा नम्बर १६ र २ को मतगणना रोकिएको हो । मतगणनापछि सङ्ख्या टिपोट गर्ने क्रममा गणक र पार्टी प्रतिनिधिबीच मत सङ्ख्यामा फरक पर्न गएकाले वास्तविक तथ्याङ्क हेरेर गणना अगाडि बढाइने सहमति भएको निर्वाचन अधिकृत माधवप्रसाद लोहनीले बताए । अहिले मतगणनास्थल बाहिर कांग्रेसका कार्यकर्ताले नाराबाजी गरिरहेका छन् ।
