पालिका

लमजुङ । सदरमुकामसमेत रहेको बेँसीसहर नगरपालिकामा नेकपा(एमाले)का उम्मेदावर विजयी भएका छन् । आज दिउँसो सम्पन्न मतगणनामा नगर प्रमुखमा पुनः एमालेकै गुमानसिंह अर्याल र उपप्रमुखमा एमालेकी पद्मा गुरुङ विजयी भएका हुन् । गठबन्धनका उम्मेदवार कांग्रेसका श्रीकान्त घिमिरेलाई दुई हजार आठ मतले पराजित गर्दै नगर प्रमुखमा पुनः अर्यालले जितेका हुन् । यसअघि पाँच वर्ष नगरपालिकाको प्रमुखमा रहेर काम गरेका अर्याल पुनः पाँच वर्षका लागि नगरप्रमुखमा निर्वाचित भएका हुन् । विजयी अर्यालले नौ हजार ४७९ मत प्राप्त गरे भने, उनको प्रतिद्वन्द्वी कांग्रेसका घिमिरेले सात हजार ४७१ मत प्राप्त गरे । त्यस्तै, प्रमुखमा राप्रपाका अजितबहादुर अधिकारीले १४६ मत प्राप्त गरेको छ भने मङ्गोल नेशनल अर्गनाइजेशनका कुलुकुमारी गुरुङले ५३ मत र जसपाका बलबहादुर रानाले ४३ मत प्राप्त गरेका छन् । विजयी अर्यालले विसं २०७४ को स्थानीय तह चुनावमा कांग्रेसका तत्कालीन सभापति भेषबहादुर पौडेललाई २९७ मतले हराउँदै निर्वाचित भएका थिए । त्यस्तै, उपप्रमुखमा निर्वाचित गुरुङले चार हजार १५ मतअन्तरले बढी ल्याउँदै भारी मतले विजयी भइन् । बेँसीसहर नगरपालिकामा ११ वटा वडा रहेकोमा एमालेबाट वडा नं १ मा दुर्गाबहादुर बुढाथोकी, २ मा मदनबहादुर राना, ५ मा इन्द्रबहादुर गुरुङ, वडा नं ७ मा ऋषि बस्नेत, वडा नं ८ मा पवित्रा थापा राना, वडा नं १० मा गंगाबहादुर थापा र वडा नं ११ मा शिवप्रसाद जोशी वडाध्यक्षमा निर्वाचित भएका छन् । वडा नं ६ मा एमालेबाट बागी उठेका स्वतन्त्र प्रकाश थापा वडाध्यक्ष बन्न सफल भए । सत्ता गठबन्धनबाट कांग्रेसतर्फ वडा नंं ४ मा गमबहादुर गुरुङ र वडा नं ९ मा खुसीजङ्ग गुरुङ वडाध्यक्षमा निर्वाचित भएका छन् । माओवादी केन्द्रबाट वडा नं ३ मा चित्र दनाइँ वडाध्यक्षमा निर्वाचित भएका छन् । बेँसीसहर नगरपालिकामा कूल मतदाता २६ हजार २०७ रहेकोमा १८ हजार १८५ मत खसेको थियो ।

काठमाडौं । बुढानिलकण्ठ नगरपालिका वडा नं १० मा नेकमा एमालेका उम्मेदवार नवराज भट्टराई पुन: वडा अध्यक्ष निर्वाचित भएका छन् । भट्टराई २५८१ मत ल्याएर विजयी भएका हुन् । उनका निकटतम प्रतिस्पर्धी नेपाली काँग्रेसका डोरप्रसाद आचार्यले १३ सय ११ मत ल्याई दोस्रो स्थान लिन सफल भए ।

नुवाकोट । नुवाकोटको पाँच स्थानीय तहमध्ये चारमा नेपाली कांग्रेस र एउटामा नेकपा एमाले विजयी भएका छन् । नेपाली कांग्रेसबाट म्यागङ गाउँपालिकाको अध्यक्षमा आशा तामाङले तीन हजार २०९ मत ल्याएर निर्वाचित भएकी छिन् । उनको निकटतम प्रतिद्वन्द्वी नेकपा (माओवादी केन्द्र)का सुकबहादुर तामाङले दुई हजार ५९२ मत ल्याएका छन् । आशा तामाङ अध्यक्षमा पुनः दोहोरिएकी छिन् । यसैगरी उपाध्यक्षमा कांग्रेसका सीता तामाङले तीन हजार ७३१ मत ल्याएर निर्वाचित भएकी छिन् । उनको निकटतम प्रतिद्वन्द्वी नेकपा एमालेका गङ्गामाया तामाङ दुई हजार ४२ मत ल्याएकी छिन् । त्यस्तै सोही गाउँपालिकको वडा नं १ मा कांग्रेसका जीमाबहादुर तामाङ, वडा नं २ मा नेकपा एमालेका सन्तवीर तामाङ, वडा नं ३ मा कांग्रेसका हरिबहादुर तामाङ, वडा नं ४ मा स्वतन्त्र उम्मेदवार कमलबहादुर तामाङ र वडा नं ५ मा नेपाली कांग्रेसका जीतबहादुर तामाङ अध्यक्षमा निर्वाचित भएका छन् । यस्तै, सूर्यगढी गाउँपालिकामा कांग्रेसका सन्तबहादुर तामाङ तीन हजार ७५९ मत ल्याएर निर्वाचित भएका छन् । उनको निकटतम प्रतिद्वन्द्वी नेकपा एमालेका राजेन्द्र रिजालले दुई हजार ८८९ मत ल्याएका छन् । उपाध्यक्षमा कांग्रेसका मन्जु बुढाथोकीले तीन हजार २०३ मत ल्याएर निर्वाचित भएका छन् । उनका निटकतम प्रतिद्वन्द्वी नेकपा एमालेका गङ्गा आचार्यले दुई हजार ९३२ मत ल्याएका छन् । अध्यक्ष र उपाध्यक्षमा निर्वाचित तामाङ र बुढाथोकी दुवैले दोस्रो कार्यकालको लागि निर्वाचित भएका हुन् । सूर्यगढीको वडा नं १ मा माओवादी केन्द्रका राजकुमार तामाङ, वडा नं २ मा कांग्रेसका दीपक अधिकारी, वडा नं ३ मा एमालेका पिङ्गलबहादुर थापामगर, वडा नं ४ मा नेपाली कांग्रेसका रामशरण राई र वडा नं ५ मा नेपाली कांग्रेसकै अच्युतराज ढकाल अध्यक्षमा निर्वाचित भएका छन् । यस्तै, तादी गाउँपालिकाको अध्यक्षमा कांग्रेसका सन्तमान तामाङ निर्वाचित भएका छन् । तामाङले जिल्ला समन्वय समितिको प्रमुखबाट राजीनामा दिएर पालिकाको अध्यक्षमा उम्मेदवार बनेका थिए । तामाङले तीन हजार २४१ मत ल्याएर निर्वाचित भएका हुन् । उनको निकटतम प्रतिद्वन्द्वी नेकपा माओवादी केन्द्रका किरणकुमार रिजालले दुई हजार ५१८ मत ल्याएका छन् । यसैगरी उपाध्यक्षमा माओवादी केन्द्रका सन्जु प्याकुरेल विजयी भएकी छिन् । उनले तीन हजार तीन सय ९७ मत ल्याएकी छिन् । उनका निकटतम प्रतिद्वन्द्वी नेपाली कांग्रेसकी ईश्वरी उप्रेतीले दुई हजार ७७८ मत ल्याएका हुन् । यसैगरी सो गाउँपालिकाको वडा नं १ मा कांग्रेसका नकुरदोङ तामाङ, वडा नं २ मा माओवादी केन्द्रका बच्चुराम तामाङ, वडा नं ३ मा कांग्रेसका सोनाम थिङ तामाङ, वडा नं ४ मा माओवादी केन्द्रका अश्विनकुमार पाण्डे, वडा नंं ५ का एमालेका सरोज भण्डारी र वडा नं ६ मा माओवादी केन्द्रका शेरमान तामाङ निर्वाचित भएका छन् । यस्तै, तारकेश्वर गाउँपालिकामा कांग्रेसका शिव अधिकारीले पाँच हजार ६६५ मत ल्याएर अध्यक्षमा विजयी भएका छन् । उनका निकटतम प्रतिद्वन्द्वी नेकपा एमालेका रमेशबहादुर वस्तीले तीन हजार ३४१ मत ल्याएका छन् । वस्ती २०७४ सालमा एमालेबाट अध्यक्षमा विजयी भएका थिए । यसैगरी उपाध्यक्षमा माओवादी केन्द्रका हरिप्रसाद रिमालले चार चार ६५८ मत ल्याएर निर्वाचित भएका छन् । उनका निकटतम प्रतिद्वन्द्वी नेकपा एमालेका कोपिता भट्टले तीन हजार ३९२ मत ल्याएकी छिन् । यो गाउँपालिकाको अध्यक्ष उपाध्यक्षमा कांग्रेस, माओवादी, नेकपा एसबीच गठबन्धन भएको थियो । वडाध्यक्षमा वडा नं १ मा कांग्रेसका चक्रबहादुर तामाङ, वडा नं २ मा एमालेका शिव पनेरु, वडा नं ३ मा कांग्रेसका सूर्यमान श्रेष्ठ, वडा नं ४ मा एमालेका हरिबहादुर पौडेल, वडा नं ५ मा कांग्रेसका अशोक तामाङ र वडा नं ६ एमालेका नारायणप्रसाद रिमाल निर्वाचित भएको सहायक निर्वाचन अधिकृत राजु अधिकारीले जानकारी दिए । यसैगरी किस्पाङको अध्यक्षमा एमालेका वीरबल तामाङ विजयी भएका छन् । उनले तीन हजार ६३८ मत ल्याएर निर्वाचित भएका हुन् । उनको निटकतम प्रतिद्वन्द्वी कांग्रेसका छत्रबहादुर लामाले तीन हजार ४५२ मत ल्याएका छन् । लामा यसअघि किस्पाङको अध्यक्ष थिए । त्यस्तै उपाध्यक्षमा माओवादी केन्द्रका अर्जुन न्यौपानेले तीन हजार ७१२ मत ल्याएर निर्वाचित भएका छन् । उनको निकटतम प्रतिद्वन्द्वी कांग्रेसका दीलकुमारी मोक्तानले तीन हजार १७७ मत ल्याएका छन् । किस्पाङमा नेकपा एमाले र नेकपा माओवादी केन्द्रबीच गठबन्धन भएको थियो । किस्पाङको वडाध्यक्षमा वडा नं १ मा कांग्रेसका पशुपति घले, वडा नं १ मा माओवादी केन्द्रका बद्रीप्रसाद देवकोटा, वडा नं ३ मा माओवादी केन्द्रका सुरेन्द्र तामाङ, वडा नं ४ कांग्रेसका विनोद तामाङ र वडा नं ५ मा कांग्रेसकै प्रकाश तामाङ निर्वाचित हुनुभएको निर्वाचन अधिकृत टेकराज भुसालले जानकारी दिए । जिल्लाका अन्य स्थानीय तहमा मत गणना भइरहेको छ । रासस