आईपीओ निष्कासनको तयारीमा रहेको सिटिजन लाइफकाे जीवन बीमाकोष १५० प्रतिशतले बढ्याे, फेरी पनि व्यवसायमा छलाङ
काठमाडौं । सिटिजन लाइफ इन्स्योरेन्स कम्पनीले आर्थिक वर्ष २०७७/०७८ को पहिलो त्रैमासिक (आश्विन मसान्त) सम्मको वित्तीय विवरण सार्वजनिक गरेको छ । सार्वजनिक गरिएको वित्तीय विवरण अनुसार कम्पनीले आफ्नो व्यवसाय वृद्धिसँगै जीवन बीमाकोष बलियो बनाउँदै सो मा १५० प्रतिशतले वृद्धि गरेको छ । गत आर्थिक वर्ष को आश्विन मसान्तमा कम्पनीको जीवन बीमा कोष ८० करोड ३८ लाख रूपैयाँ रहेकोमा यस आश्विन मसान्तमा सो रकम २ अर्व ८२ लाख रूपैयाँ पुगेको छ । यसका साथै कम्पनीले गत आवको आश्विन मसान्तसम्ममा कुल बीमाशुल्क ३३ करोड ९४ लाख रूपैयाँ संकलन गरेकोमा यस आव को सोही अवधिमा ६२ करोड ८ लाख रूपैयाँ संकलन गर्न सफल भएको छ । यसरी हेर्दा बीमा शुल्क आर्जन ८३ प्रतिशतले बढेको देखिन्छ । समीक्षा अवधिमा जीवन बीमा कोषमा १५० प्रतिशतको वृद्धि गराउन सफल कम्पनीले जगेडा तथा कोषको आकार पनि ४१ करोड ५१ लाखबाट ४२ प्रतिशतले बढाएर ५९ करोड १० लाखको उचाई चुमाएको छ । साथै कम्पनीले लगानी र बीमालेखको धितो तथा अन्य कर्जाबाट प्राप्त हुने आयमा ४७ प्रतिशतको वृद्धी गरी १० करोड ९६ लाख रूपैयाँ पुर्याएको छ । जीवन बीमा व्यवसायमा लगानीको अवधिले कम्पनीको आयमा प्रत्यक्ष प्रभाव पार्ने भएकोले कम्पनीले दीर्घकालीन लगानी तथा कर्जालाई प्राथमिकता दिई कुल लगानी तथा कर्जा रकम रु ४ अर्व ५१ करोड मध्ये करिब ८८.३१ प्रतिशत रकम विभिन्न बैंक तथा वित्तीय संस्थाको दीर्घकालीन अवधिको ऋणपत्र तथा मुद्धती निक्षेपमा लगानी गर्न सफल भएको छ । यस अघि गरिएको दीर्घकालीन लगानीले भविष्यमा समेत उच्च दरमा प्रतिफल प्रदान गरी कम्पनीको स्थायित्वका लागि आधार स्तम्भ निर्माणमा प्रत्यक्ष भूमिका निर्वाह गर्ने देखिन्छ । हरेक विषम परिस्थितिलाई अवसरको रुपमा लिदै आगामी दिनमा कम्पनीले उपलब्ध गराउने सेवाहरुलाई अझै ग्राहक केन्द्रित र प्रविधिमुखी वनाउदै लैजाने उद्धेश्यका साथ डिजिटल सिटिजन कार्यक्रम, हरेक व्यक्तिलाई स्वरोजगार बनाउने सिटिजन स्वरोजगार अभियान र बीमाको सचेतना वढाउन विद्यार्थीसंग बीमा जस्ता विभिन्न कार्यक्रमहरु लगायत नवीनतम बीमा योजना र व्यवसायिक तथा दक्ष सिटिजन लिडरहरु सहितको सिटिजन टिम मार्फत कम्पनीले भविष्यमा वित्तीय तथा सामाजिक लक्ष्य हासिल गर्दै उत्कृष्ट सेवा प्रदान गर्ने प्रतिबद्धता जाहेर गरेको छ ।
पोलिसी बोनस घोषणा गर्नेमा महालक्ष्मी लाईफ इन्स्योरेन्स पहिलाे, सीईओ भन्छन्- भनेका थियाैं, गरेर देखायाैं’
काठमाडाैं । नयाँ कम्पनीहरुमध्ये महालक्ष्मी लाईफ इन्स्योरेन्स पोलिसी बोनस घोषणा गर्नेमा पहिलाे बन्न सफल भएकाे छ । कम्पनीले बीमा समितिकाे नयाँ व्यवस्था सहितको मुल्याङ्कन गरी आर्थिक वर्ष २०७५/७६ को पोलिसी बोनस घोषणा गरेको हाे । कम्पनीले उक्त आवको आर्थिक स्थितिको लेखाजोखा र दायित्वको बीमांङ्किय मूल्याँकन गरी बीमितहरुलाई प्रदान गरिने पोलिसी बोनस घोषणा गरेको हो । बीमा समितिको गत कार्तिक २८ गतेको पत्रबाट स्वीकृति प्राप्त भए बमोजिम कम्पनीले सञ्चालनमा ल्याएको तथा मुनाफामा सरिक हुने महालक्ष्मी सावधिक, महालक्ष्मी सरल र महालक्ष्मी जीवन हेरचार बीमाको २०७५/७६ को लागि न्यूनतम ५० रुपैयाँ (प्रतिहजार बीमाङ्कमा) को दरले बोनस घोषणा गरेको हो । बीमा समितिले हालै जारी गरेको संसोधित बीमाङ्किय मुल्याङ्कन निर्देशिकामा सो अवधिसम्म जारी पोलिसीको बिमाङ्किय मुल्याङ्कन गर्दा जारी पोलिसीको अवधि भुक्तानी नभएसम्मको लागि बोनस व्यवस्था गर्नुपर्ने व्यवस्था रहेको छ । कम्पनीको आगामी बिमाङ्किय मुल्याङ्कन नभएसम्मको लागि यही बोनस दरले अन्तरिम बोनस भुक्तानी गरिनेछ । बीमा समितिबाट स्वीकृत बोनस निम्न बमोजिम रहेको छ । नयाँ भ्यालुएशन निर्देशिका आएपछि कष्ट अफ फ्युचरको व्यवस्था गरेर नयाँ कम्पनीमा संभवतः सबै पोलिसीहरुमा शुरु मै सबैभन्दा अत्यधिक बोनस घाेषणा गर्न महालक्ष्मी लाईफ सफल भएको कम्पनीका प्रमुख कार्यकारी अधिकृत रमेश कुमार भट्टराई बताउँछन् । साथै, जीवन बीमामा कसले कति व्यापार गर्यो भन्दा पनि पोलिसी होल्डरलाई कति बोनस र लगानिकर्तालाई कति लाभांश दियो भन्ने कुराले महत्व राख्ने उनको भनाई छ । ‘बीमामा ५-१५ वर्षे पोलिसी नै ९० प्रतिशत बिक्री हुने गर्छ । २ वर्ष भित्र हामी उत्कृष्ट हुने घोषणा गरेका थियौं, गरेर देखायौं । सबैलाई बधाई छ ।’, उनले भने ।
युनाईटेड इन्स्योरेन्सकाे निमित्त सीईओमा उपासना पौडेल नियुक्त
काठमाडौं । युनाईटेड इन्स्योरेन्स कम्पनी (नेपाल) को निमित्त प्रमुख कार्यकारी अधिकृत( निमित्त सीईओ) मा उपासना पौडेल नियुक्त भएकी छिन् । कम्पनी सञ्चालक समितिको बैठकले कम्पनीको नायब प्रमुख कार्यकारी अधिकृतमा कार्यरत पौडेललाई निमित्त सीईओकाे पदमा नियुक्त गरेको हो । कम्पनीको कायम मुकायम प्रमुख कार्यकारी अधिकृत रमेश कुमार भट्टराईको करार अवधि समाप्त भएपछि इन्स्योरेन्सले उक्त पदमा पौडेललाई नियुक्त गरेको हो । भट्टराईको करार अवधि गत कार्तिक २४ गतेबाट समाप्त भएको थियो । साथै, उनको नेतृत्वमा कम्पनीले प्रथम त्रैमासको अवधिमा गत वर्षको तुलनामा बीमाशुल्क आर्जनमा ४४ प्रतिशतको वृद्धि गर्न सफल भएको इन्स्योरेन्सले जनाएको छ ।
