सूर्या लाइफले पोहोरको भन्दा ३ करोड बढायो नाफा, यस्ता छन् १५ महिनाका मुख्य परिसुचक
काठमाडौ । सूर्या लाइफ इन्स्योरेन्स कम्पनीले चालु आर्थिक वर्षको पहिलो त्रैमास (साउनदेखि असोज मसान्तसम्म) मा ८३ करोड ६८ लाख रुपैयाँ खुद बीमा शुल्क संकलन गरेको छ । कम्पनीले गत आर्थिक वर्षको सोही अवधिमा ५७ करोड ९१ लाख रुपैयाँ बीमा शुल्क संकलन गरेको थियो । कम्पनीले दिएको जानकारी अनुसार चालु आर्थिक वर्षको पहिलो त्रैमासमा कम्पनीको नाफा १० करोड १६ लाख रुपैयाँ रहेको छ । कम्पनीको नाफा अघिल्लो आर्थिक वर्षको सोही समयमा भने ७ करोड ८७ लाख रुपैयाँ थियो । चालु आर्थिक वर्षको पहिलो त्रैमासमा कम्पनीको आम्दानी १२ करोड ८८ लाख रुपैयाँ छ । गत वर्ष सोही अवधिमा कम्पनीको आम्दानी ११ करोड २२ लाख रुपैयाँ रहेको थियो । चालु आर्थिक वर्षको पहिलो ३ महिनामा कम्पनीको खर्च २ करोड ७१ लाख रुपैयाँ रहेको छ । अघिल्लो आर्थिक वर्षको सोही अवधिमा कम्पनीको खर्च ३ करोड ३४ लाख रुपैयाँ रहेको थियो । सूर्या लाइफले कुल कायम गरेको बीमालेखको संख्या २ लाख ५५ हजार रहेको छ । हाल कम्पनीको चुक्ता पूँजी २ अर्ब १५ करोड रुपैयाँ रहेको छ । यस्तै, जगेडा कोषमा कम्पनीको ७६ करोड १ लाख रुपैयाँ रहेको छ । जीवन बीमा कोषमा ८ अर्ब ७ करोड रुपैयाँ रहेको छ भने महाविपत्ती कोषमा ११ करोड ९४ लाख रुपैयाँ रहेको छ । समस्या तथा चुनौति विश्वभर महामारीको रुपमा फैलिएको कोरोना भाइरस रोग नियन्त्रणका लागि लगाइएको बन्दा न्दीका कारण अर्थतन्त्रमा मन्दी देखिएको अवस्था छ । सोही कारणबीमा क्षेत्रको क्रयशक्तिमा ह्रास आएको छ । कम्पनी व्यवस्थापनका अनुसार जीवन बीमा सम्बन्धी जानकारीमुलक शिक्षाको कमी, दक्ष जनशक्तिको कमी, लगानीको क्षेत्र सिमीत हुनु लगायतका कारणले पनि जीवन बीमा क्षेत्रले प्राप्त गर्ने प्रतिफलमा उल्लेख्य कमी आएको छ । पछिल्लो समय नयाँ जीवन बीमा कम्पनीहरुको स्थापना, कर्मचारीहरुको टर्न ओभर र त्यसको व्यवस्थापन र तिब्र प्रतिस्पर्धा बीमा व्यवसायको चुनौतीको रुपमा रहेको कम्पनी व्यवस्थापनको विश्लेषण छ ।
क्षतिको फोटो र भिडियो नभई कृषि तथा पशुपन्छी बीमामा दाबी भुक्तानी नपाइने
काठमाडौं । कृषि तथा पशुन्छी बीमाको दाबी भुक्तानी लिनको लागि फोटो र भिडियो अनिवार्य रुपमा चाहिने भएको छ । यसअघिसम्म भिडियो अनिवार्य नगरिएको भएपनि नियामक निकाय बीमा समितिले यस्तो व्यवस्था थप गरेको हो । बीमा समितिले कृषि तथा पशुपन्छी बीमा निर्देशिका २०७७ संशोधन गर्दै नयाँ व्यवस्था थप गरेको छ । समितिका कार्यकारी निर्देशक राजुरमण पौडेलले दिएको जानकारी अनुसार कृषि बीमा कार्यक्रमलाई थप प्रभावकारी बनाउन यस्तो व्यवस्था गरिएको हो । ‘कृषि बीमालाई हामीले प्राविधिक पक्षबाट समेत मध्यजनर गरी यसपालीको निर्देशिका तयार पारेका छौं, बीमा कम्पनीले बीमालेख जारी गर्नुअघि बीमा गरिएका वस्तु समेटिएको विभिन्न कोणबाट खिचिएकोे स्थिर फोटो कम्तिमा ५ वटा र ३ मिनेटसम्मको भिडियो क्लिप प्रस्ताव फारम कम्पनीमा बुझाउनु पर्नेछ, उक्त फोटो तथा भिडियो प्राविधिकले नै खिच्नु पर्ने व्यवस्था गरिएको छ,’ कार्यकारी निर्देशक पौडेलले भने ।
शिखर इन्स्योरेन्सकाे सेवा अब भाइबर र फेसबुक मेसेन्जर मार्फत लिन सकिने
काठमाडौं । शिखर इन्स्योरेन्स कम्पनीले डिजिटल इन्स्योरेन्समा फड्को मार्दै सम्पुर्ण बीमा क्षेत्रमै पहिलो पटक भाइबर र फेसबुक मेसेन्जरमा च्याटबटको प्रयोग मार्फत आफ्ना बीमा सेवाहरु उपलब्ध गराउने भएकाे छ । वर्तमान अवस्थामा बीमा कम्पनीसम्म पुगी बीमा सेवा प्राप्त गर्न असहज परिस्थिति रहेको अवस्थामा ग्राहकहरुले अब कम्पनीसम्म नगइकनै फेसबुक मेसेन्जर र भाइबरबाट कम्पनीका विभिन्न सेवाहरु लिन भएका हुन् । यसका लागि फेसबुक मेसेन्जरमा लगइन गर्नु पर्नेछ भने भाइबरमा कम्पनीको क्युआर कोड स्क्यान गर्नुपर्ने हुन्छ । इन्टरनेटमा पहुँच रहेका ग्राहकहरुका लागि च्याटबट सेवा अति नै सहज, सरल र प्रभावकारी हुने कम्पनीले जनाएकाे छ । यस च्याटबट मार्फत ग्राहकले आफुले लिन चाहेका सेवा बारे जानकारी दिनासाथ शिखर इन्यारेन्सको सम्बन्धित विभागले ग्राहकलाई सम्पर्क गर्नेछन् । यसले गर्दा ग्राहकहरुको समय बचत हुनुका साथै इच्छा अनुसारका सेवा तत्कालै लिन पाइने कम्पनीले जनाएकाे छ । ग्राहकहरुले उक्त माध्यमबाट बीमा पोलिसी खरिद, दाबीको जानकारी, बीमा पोलिसीको प्रति इमेल, बीमा नविकरण, बीमा सम्पुष्टि, केवाईसी अपडेट जस्ता सेवाहरु लिन सक्नेछन् साथै आफ्ना सुझावहरु समेत दिन सक्नेछन् । यसका साथै अन्य सुविधाहरु समयसापेक्ष अपग्रेड गरी समावेश गर्दै लाने र निकट भविष्यमा ग्राहकले सोही माध्यमबाटै बीमालेख प्राप्त गर्न सक्ने व्यवस्था समेत मिलाउने शिखर इन्स्योरेन्सले जनाएको छ । कोभिडको कारणले सम्पूर्ण विश्व नै प्रभावित भइरहेको अवस्थामा यस किसिमको सेवाको शुरुवातसँगै ग्राहकहरुले अब घरमै बसी सुरक्षित तवरले बीमा सेवाहरु लिन सक्ने र स–सानो कुराकोे लागि कम्पनी धाउनुपर्ने बाध्यताको अन्त्य हुने शिखर इन्स्योरेन्स बताउँछ ।
