एकैदिन साढे ३ अर्बले घट्यो सेयर कारोबार, एशियन लाइफको सर्वाधिक किनबेच
काठमाडौं । मंगलबार एकैदिन साढे ३ अर्बले सेयर कारोबार घटेको छ । सोमबारको तुलनामा मंगलबारको सेयर कारोबार ३ अर्ब ४९ करोड रुपैयाँले घटेको हो । सोमबार ८ अर्ब ८८ करोड रुपैयाँ बराबरको सेयर कारोबार भएको बजारमा मंगलबार भने ५ अर्ब ३९ करोड रुपैयाँमा सीमित भएको छ । मंगलबार कारोबार रकमसँगै कारोबार कित्ता पनि घटेको छ । सोमबार १ करोड ७० लाख कित्ता किनबेच भएको बजारमा मंगलबार ९७ लाख ८४ हजार ६५१ कित्ता मात्रै सेयर खरिद बिक्री भएको छ । कारोबार घटेको बजारमा सबैभन्दा बढी कारोबार गर्नेमा एशियन लाइफ इन्स्योरेन्स रहेको छ । इन्स्योरेन्सको एकैदिन २६ करोड ९४ लाख रुपैयाँ बराबरको सेयर कारोबार भएको छ । जसको सेयर मूल्य पनि बढेर प्रतिकित्ता १३२२ रुपैयाँ पुगेको छ । त्यस्तै, बढी कारोबार गर्नेको दोश्रो र तेश्रो स्थानमा क्रमशः अपि पावर र एनआईसी एशिया बैंक रहेका छन् । यी दुई कम्पनीको क्रमशः २२ करोड ८२ लाख र १९ करोड ६८ लाख रुपैयाँ बराबरको सेयर किनबेच भएको छ । बजारमा दुई कम्पनीको सेयर सकारात्मक सर्किट लेभलमा कारोबार भएको छ । वीन नेपाल लघुवित्त वित्तीय संस्थाको सेयर मूल्य १० प्रतिशतले बढेर प्रतिकित्ता ११०६ रुपैयाँ पुगेको छ । त्यस्तै, बुद्ध भूमि नेपाल हाइड्रोपावर कम्पनीको सेयर मूल्य ९.९८ प्रतिशतले बढेर प्रतिकित्ता ४२१.१० रुपैयाँ पुगेको छ । समग्रमा नेप्से परिसूचक ५.५९ अंकले घटेर २८१५.०६ बिन्दुमा झरेको छ । जुन अघिल्लो दिनको तुलनामा ०.२० प्रतिशतले घटी हो । बजारमा जीवन बीमा समूहबाहेक बाँकी समूह राताम्मे छन् । जीवन बीमा समूह भने ७२.१६ अंकले उकालो लागेको छ । मंगलबार सबैभन्दा बढी कृषि विकास बैंकको ऋणपत्रको भाउ घटेको छ । बैंकको ‘१०.३५ प्रतिशत कृषि बैंक ऋणपत्र २०८३’ को भाउ ८.३४ प्रतिशत अर्थात ९१ रुपैयाँले घटेर प्रति ऋणपत्र एक हजार रुपैयाँमा झरेको हो ।
बीमा कम्पनीहरुले जलवायु जोखिमको विवरण अनिवार्य सार्वजनिक गर्नुपर्ने
काठमाडौं । अब बीमा कम्पनीहरुले जलवायु जोखिमको विवरण अनिवार्य रुपमा सार्वजनिक गर्नुपर्ने भएको छ । नियामक निकाय बीमा समितिले जलवायु जोखिम सम्बन्धी निर्देशिका, २०७८ जारी गर्दै सो व्यवस्था अनिवार्य गरेको हो । उक्त निर्देशिका २०७९ साउन १ गतदेखि लागू हुने समितिले जनाएको छ । उक्त निर्देशिका लागू भएसँगै सञ्चालित जीवन तथा निर्जीवन बीमा कम्पनीहरु सबैले आफ्नो वार्षिक प्रतिवेदनमा जलवायु सम्बन्धी जोखिमबाट आफ्नो व्यवसायमा परेको प्रभाव खुलाउनु पर्ने भएको छ । यो निर्देशिका अनुसारको विवरणण् कुनै कारणले प्रकाशन नगरेमा कम्पनीले सोसम्बन्धी कुनै वैकल्पिक सूचना प्रकाशन गरेको छ वा छैन वा जलवायु जोखिम सम्बन्धी विवरण बीमकको पोर्टफोलियोसँग सान्दर्भिक भए वा नभएको वा त्यस्तो विवरण उपलब्ध हुन नसक्नाको कारण स्पष्ट खुलाउनु पर्ने जनाईएको छ । साथै, यो निर्देशिका लागू भएको मितिले ३ (तीन) वर्ष पूरा भएपछि बीमकले नयाँ बीमा योजना तयार गर्दा सोको बीमाशुल्क निर्धारणमा जलवायु जोखिमलाई कसरी समाविष्ट गरिएको छ, सोसमेत स्पष्टरुपमा खुलाउनुपर्ने निर्देशिकामा उल्लेख छ । त्यस्तै, बीमा कम्पनीहरुले जलवायु जोखिमको प्रभाव सम्बन्धी विवरण आफ्नो वेबसाइटमार्फत प्रकाशित गरी त्यस्तो जोखिम न्यूनीकरण कसरी गर्न सकिन्छ भन्ने सम्बन्धमा आफ्ना ग्राहकवर्गलाई सुझाव दिनुपर्नेछ । बीमा क्षेत्रमा जलवायु परिवर्तनको प्रभाव सम्बोधन गर्नका साथै जलवायु परिवर्तनबाट बीमकहरुमा आईपर्ने जोखिमहरु तथा त्यसको प्रतिकार्य स्वरुप उनीहरुबाट भएका कार्यको मूल्यांकन गर्न यो निर्देशिका जारी गरिएको हो । समितिका अनुसार जलवायु सम्बन्धी जोखिम तथा जलवायु जोखिम भन्नाले स्थिरता जोखिमको उपवर्गको रुपमा रहेका जलवायु परिवर्तन वा यससँग सम्बन्धित भौति, संंक्रमण वा दायित्व जोखिमका कारणले आईपर्ने जोखिम हो । यस्तो छ निर्देशिका [pdf id=312612]
सगरमाथा इन्स्योरेन्सको स्वतन्त्र सञ्चालक श्रेष्ठले सम्हालिन् कार्यभार
काठमाडौं । सगरमाथा इन्स्योरेन्सको नवनियुक्त स्वतन्त्र सञ्चालक शोभा श्रेष्ठले पदभार ग्रहण गरेकी छिन् । श्रेष्ठले माघ १० गते आफ्नो पदभार ग्रहण गर्दै कार्यभार सम्हालेकी हुन् । यससँगै उनले आगामी ४ वर्षसम्म इन्स्योरेन्सको स्वतन्त्र सञ्चालक पदमा हुनेछिन् । माघ ६ गते बसेको इन्स्योरेन्सको सञ्चालक समितिको बैठकले ललितपुरको सुनाकोठी निवासी श्रेष्ठलाई उक्त पदमा नियुक्त गरेको थियो ।
