एक दिनमा ५० पटकसम्म वालेटमा रकम जम्मा गर्न सकिने
काठमाडौं । नेपाल राष्ट्र बैंकले ठूला चाडपर्वलाई लक्षित गरी वालेटमा रकम जम्मा गर्न सकिने सीमा बढाएको छ । केन्द्रिय बैंकले भुक्तानी प्रणालीसम्बन्धी एकीकृत निर्देशनमा संशोधन गर्दै चाडपर्वका बेला वालेटमा रकम जम्मा गर्ने सीमा बढाएको हो । अब दशैँ, तिहार र छठका बेला प्राकृतिक व्यक्तिको हकमा एक दिनमा ५० पटकसम्म वालेटमा रकम जम्मा गर्न सकिनेछ । यो सुविधा असोज ३१ गतेदेखि कात्तिक ८ गतेससम्म र कात्तिक २१ गतेदेखि कात्तिक २९ गतेसम्म लिन सकिन्छ । यसअघि एक दिनमा प्राकृतिक व्यक्तिको वालेटमा १० पटकसम्म रकम जम्मा गर्न सकिने सुविधा रहेको थियो । राष्ट्र बैंकले चाडपर्वका बेला नगद कारोबारभन्दा पनि डिजिटल कारोबारलाई जोड दिएको छ । दशैँ, तिहार र छठका बेला दक्षिणा दिँदा डिजिटल माध्यमको प्रयोग पनि हालै राष्ट्र बैंकले आग्रह गरेको थियो । वालेटमा रकम जम्मा गर्ने सीमा बढेसँगै राष्ट्र बैंकको कारोबारमा डिजिटल माध्यमको प्रयोग बढाउने नीति प्रभावकारी हुने देखिएको छ ।
वालेटमा रकम जम्मा गर्ने सीमा ५ गुणाले बढ्यो, विवरण राष्ट्र बैंकलाई पठाउनुपर्ने
काठमाडौं । नेपाल राष्ट्र बैंकले दशैं, तिहार र छठ पर्वलाई लक्षित गर्दै प्राकृतिक व्यक्तिको डिजिटल वालेटमा रकम जम्मा गर्न पाउने दैनिक सीमा बढाएको छ । केन्द्रीय बैंकले यसअघि दैनिक बढीमा १० पटकसम्म रकम जम्मा गर्न पाउने व्यवस्था रहेकामा निश्चित अवधिका लागि त्यसलाई बढाएर ५० पटकसम्म पु¥याएको हो । राष्ट्र बैंकको भुक्तानी प्रणालीसम्बन्धी एकीकृत निर्देशन अनुसार प्राकृतिक व्यक्तिको वालेटमा एक दिनमा बढीमा १० पटकसम्म रकम जम्मा गर्न सकिने व्यवस्था थियो । चाडपर्वका समयमा डिजिटल भुक्तानीको प्रयोग र कारोबार बढ्ने अवस्थालाई ध्यानमा राख्दै केन्द्रीय बैंकले उक्त सीमा बढाएको हो । दशैंको अवसरमा २०८३ असोज ३१ गतेदेखि कात्तिक ८ गतेसम्म दैनिक ५० पटकसम्म रकम जम्मा गर्न सकिनेछ । त्यस्तै, तिहार तथा छठ पर्वका अवसरमा कात्तिक २१ गतेदेखि कात्तिक २९ गतेसम्म पनि यही सुविधा लागू हुनेछ । उक्त अवधिबाहेक भने यससम्बन्धी विद्यमान व्यवस्था नै लागू हुने निर्देशनको आशय छ । राष्ट्र बैंकले सीमा बढाएको अवधिमा भएका कारोबारको विवरणसमेत अनिवार्य रूपमा बुझाउन सम्बन्धित निकायलाई निर्देशन दिएको छ । डिजिटल वालेटमा भएको कारोबारको संख्या र कारोबारको कुल रकमको विवरण राष्ट्र बैंकको सम्बन्धित विभागमा उपलब्ध गराउनुपर्नेछ । चाडपर्वका समयमा उपभोक्ताले किनमेल, रकम स्थानान्तरण तथा विभिन्न भुक्तानीका लागि डिजिटल वालेटको प्रयोग बढाउने गर्छन् । यस्तो समयमा वालेटमा रकम जम्मा गर्न पाउने दैनिक संख्यात्मक सीमा बढाउँदा प्रयोगकर्तालाई कारोबार गर्न सहज हुने अपेक्षा गरिएको छ । यद्यपि, राष्ट्र बैंकको निर्देशनले रकम जम्मा गर्न पाउने दैनिक कारोबारको संख्या १० बाट बढाएर ५० पु¥याएको हो । यसलाई वालेटमा जम्मा गर्न पाउने रकमको सीमा पनि बढाइएको अर्थमा बुझ्न हुँदैन ।
पूर्वराजा ज्ञानेन्द्रको चिन्ता : विपद्पीडितको पुनःस्थापना र राष्ट्रिय स्वाभिमानलाई प्राथमिकता दिन आग्रह
काठमाडौं । पूर्वराजा ज्ञानेन्द्र शाहले विजया दशमी २०८३ को अवसरमा शुभकामना सन्देश जारी गर्दै देशको राजनीतिक अस्थिरता, कमजोर बन्दै गएको आर्थिक तथा सामाजिक अवस्था र प्राकृतिक विपद्बाट नागरिकले भोग्नुपरेको समस्याप्रति चिन्ता व्यक्त गरेका छन् । शुक्रबार जारी सन्देशमार्फत उनले स्वदेश तथा विदेशमा रहेका सम्पूर्ण नेपालीलाई दसैँको शुभकामना दिँदै विपद्बाट प्रभावित नागरिकको पीडालाई साझा राष्ट्रिय समस्याका रूपमा लिनुपर्ने बताएका हुन् । भोटेकोशी र बूढीगण्डकी क्षेत्रमा आएको भीषण बाढी तथा निरन्तरको वर्षाले ठूलो जनधनको क्षति पुर्याएको उल्लेख गर्दै पूर्वराजा शाहले दुःख र निराशालाई आशा तथा शक्तिमा रूपान्तरण गरेर अघि बढ्नुपर्नेमा जोड दिएका छन् । उनले नागरिकको पीडा नै राष्ट्रको साझा पीडा भएको उल्लेख गर्दै आगामी दिनमा पनि नेपाल र नेपालीको हितमा आफ्नो भूमिका निरन्तर रहने बताएका छन् । विपद्बाट क्षतिग्रस्त भौतिक संरचनाको शीघ्र पुनर्निर्माण तथा प्रभावित परिवारको तत्काल पुनःस्थापनालाई प्राथमिकतामा राख्नुपर्ने उनको धारणा छ । साथै, पुनर्निर्माण र राहतका लागि बाह्य सहयोग लिँदा राष्ट्रिय स्वाभिमान, मौलिकता र स्थानीय परम्पराको संरक्षणमा विशेष ध्यान दिनुपर्ने उनले बताएका छन् । पूर्वराजा शाहको सन्देशमा विपद्को सामना, नागरिकको पीडा न्यूनीकरण र राष्ट्रिय हितको संरक्षणलाई विशेष महत्त्व दिइएको छ ।
असनमा दशैंको चहलपहल, महँगीको पर्वाह नगरी किनमेल (फोटो फिचर)
काठमाडौं । उपत्यकाको मुटु मानिने असन र इन्द्रचोकका गल्लीहरूमा दशैंको आगमन कुनै क्यालेन्डरको पाना पल्टिएर वा पात्रो हेरेर मात्र हुँदैन । यहाँ हावामा फैलिने सुकुमेल, ल्वाङ र दालचिनीको सुवास, झ्याल–कौसीबाट झुन्ड्याइएका राता कुर्ताहरू, मन्दिरमा बज्ने बिहानीको घण्टी र चङ्गाको धागो बेर्ने चर्खाको खस्रो आवाजले पर्वको शङ्खनाद गर्छन् । असोजको आकाश कञ्चन नीलो भएर जब चोभार र चन्द्रागिरिका डाँडाहरू मुस्कुराउँछन्, तब असनका ढुङ्गा छापिएका साँघुरा गल्लीहरू अचानक जागृत हुन्छन् । बिहानको पहिलो किरण अन्नपूर्ण मन्दिरको स्वर्ण गजुरमा ठोक्किन नपाउँदै असनको चौबाटोमा चहलपहल सुरु भइसकेको हुन्छ । पसलका पुराना काठे ढोकाहरू ‘च्यार्र’ आवाज निकाल्दै उघ्रिन्छन् । पसलेहरू अगरबत्तीको धुवाँ सल्काउँदै पसलको दैलोमा जल चढाउँछन् र आफ्नो इष्टदेवलाई स्मरण गर्छन्, ‘आजको दिन सबै ग्राहकलाई सन्तुष्ट बनाएर पठाउन सकूँ ।’ अनि सुरु हुन्छ उपत्यकाको सबैभन्दा जीवन्त सांस्कृतिक मेला । उपत्यकाका कुनाकाप्चा–भक्तपुर, ललितपुर, थानकोट, साँखुदेखि बाहिरी जिल्लाबाट काठमाडौंमा कर्मथलो बनाएका हजारौँ नागरिक दसैँको जोहो गर्न असन ओइरिन्छन् । कसैको हातमा रित्तो झोला छ, कसैको काँधमा सानी छोरी । ऐतिहासिक नेवारी वास्तुकलाले सजिएका तीन–चार तले इँटाका घरहरूको कौसीबाट तल हेर्दा देखिन्छ–मानवसागरको एक अविरल नदी, जो अन्नपूर्ण मन्दिरको परिक्रमा गर्दै भेडासिङ, जनबहाल, केलटोल र इन्द्रचोकतर्फ अनवरत बगिरहेको छ । गल्लीको साँघुरोपनलाई चिर्दै भारी बोक्ने भरियाहरू ‘दाइ, बाटो छोडिदिनुस्’ भन्दै निधारमा नाम्लो र ढाडमा कपडाका ठूला पोका लिएर पसिना बगाउँदै हिँडिरहेका छन् । मोटरसाइकलको हर्न, पसलेहरूको ‘आउनुस् दिदी, नयाँ डिजाइनको कुर्ता हेर्नुस्’ भन्ने निम्तो र ग्राहकहरूको मीठो मोलमोलाइले असनलाई एउटा खुला र विशाल सांस्कृतिक नाटकघर बनाइदिन्छ । ‘दशैं आउनु भनेको असनका गल्लीहरूमा रङ, भीड र मुस्कुराउने सपनाहरू भरिनु हो । यो केवल किनमेल होइन, वर्षभरिको थकाइ बिर्सिने साझा उत्सव हो ।’ असन बजार मल्लकालदेखि नै तिब्बत र भारत जोड्ने प्राचीन व्यापारिक मार्गको प्रमुख केन्द्र रहिआएको छ । दशैंमा यहाँ आउनु केवल सामान किन्नु मात्र नभई अन्नपूर्ण देवीको दर्शन गरी वर्षभरि अन्नको अभाव नहोस् भनी कामना गर्नु पनि हो । सूर्य पश्चिमका थानकोट र चन्द्रागिरिका डाँडाहरूमा अस्ताउँदै गर्दा असन, इन्द्रचोक र भेडासिङका पसलहरूमा पहेँला र सेता बिजुलीका चिमहरू झिलिमिली बल्न थाल्छन् । साँझको त्यो मन्द प्रकाशमा सामान किनेर फर्कनेहरूको अनुहारमा दिनभरिको धपेडीपछि पनि एउटा अनौठो सन्तोष र उज्यालो देखिन्छ । दिनभरिको हिँडडुल, धुलो र भीडभाडपछि मानिसहरू दुवै हातमा झोला झुन्ड्याएर मन्दिरको पेटीमा एकछिन थकाइ मारिरहेका छन् । कसैले चिसो पानी पिएर लामो सास फेर्दै छन् । झोलामा बाबुका लागि ढाका टोपी छ, आमाका लागि चोली, छोरीका लागि रातो कुर्ता, छोराका लागि नयाँ जुत्ता र भान्साका लागि मसला र चिउरा । ती झोलाहरू भौतिक रूपमा जतिसुकै गह्रुँगा भए पनि बोक्नेहरूको मन भने अत्यन्त हलुङ्गो छ । महँगीको चौतर्फी गुनासो, खल्तीको सीमितता, ट्राफिक जाम र दैनिक जीवनका सयौँ तनावहरूलाई बिर्सिएर जब मानिसहरू घरको ढोका टेक्छन्, उनीहरूसँगै दसैँको वास्तविक उमङ्ग पनि घर भित्रिन्छ । सानी छोरीले नयाँ लुगा लगाएर ऐनाअगाडि नाच्दा र छोराले चङ्गा उडाउने योजना बनाउँदा त्यो घरमा संसारकै सबैभन्दा ठूलो खुसी छाउँछ । यही त हो नेपाली दशैं–हजारौँ अभाव र सङ्घर्षका बाबजुद पनि आफ्ना प्रियजनको मुहारमा हाँसो फुलाउने अद्भुत जिजीविषा र प्रेमको महाकुम्भ ।
इरानमा परमाणु हतियार प्रयोग नगर्ने ट्रम्पको स्पष्टीकरण
काठमाडौं । अमेरिकी राष्ट्रपति डोनाल्ड ट्रम्पले इरानविरुद्ध परमाणु हतियार प्रयोग नगर्ने बताएका छन् । इरानमाथि सम्भावित थप सैन्य आक्रमणका लागि अमेरिकाले शक्तिशाली बम प्रयोग गर्ने तयारी गरिरहेको खबर सार्वजनिक भइरहेका बेला ट्रम्पले परमाणु हतियार आवश्यक नरहेको स्पष्ट पारेका हुन् । समाचार संस्था अनादोलुका अनुसार ट्रम्पले बिहीबार न्युजम्याक्ससँगको अन्तर्वार्तामा इरानविरुद्ध परमाणु हतियार प्रयोग गर्ने सम्भावनाबारे सोधिएको प्रश्नमा त्यसलाई अस्वीकार गरेका थिए । ‘होइन, म परमाणु हतियार प्रयोग गर्दिनँ । हामीलाई त्यसको आवश्यकता छैन,’ ट्रम्पले भनेका थिए । अमेरिकी सेनाले प्रयोग गर्ने सम्भावित शक्तिशाली बमबारे चर्चा गर्दै उनले ‘मदर अफ अल बम्ब्स’ परमाणु बम नभएको बताए । ‘यो अत्यन्त ठूलो बम मात्र हो,’ उनले भने । यसअघि सीएनएनले अमेरिकी अधिकारीहरूलाई उद्धृत गर्दै इरानमाथि सम्भावित थप आक्रमणका क्रममा अमेरिकाले जीबीयू–४३रबी म्यासिभ अर्डनेन्स एयर ब्लास्ट (एमओएबी) बम प्रयोग गर्ने विकल्पमाथि विचार गरिरहेको समाचार सार्वजनिक गरेको थियो । उक्त बमलाई ‘मदर अफ अल बम्ब्स’ पनि भनिन्छ । यो अमेरिकी सेनाको सबैभन्दा शक्तिशाली गैरपरमाणु बममध्ये एक हो । यसको प्रयोगबारे ट्रम्पले अन्तर्वार्तामा प्रत्यक्ष पुष्टि वा खण्डन नगरे पनि परमाणु हतियार प्रयोग नगर्ने बताएका हुन् । ट्रम्पले इरानमा अमेरिकी स्थल सेना पठाउने तत्काल कुनै योजना नरहेको पनि बताएका छन् । इरानको आणविक कार्यक्रमलाई लिएर अमेरिका र इरानबीच लामो समयदेखि तनाव रहँदै आएको छ । इरानले आणविक हतियार विकास गर्न खोजेको आरोप अमेरिकाले लगाउँदै आएको छ भने तेहरानले आफ्नो आणविक कार्यक्रम शान्तिपूर्ण उद्देश्यका लागि भएको दाबी गर्दै आएको छ ।
‘प्रधानमन्त्री अम्बानी’ भन्दै मस्कले गरे कटाक्ष, रिलायन्सले दियो यस्तो जवाफ
काठमाडौं । अमेरिकी अर्बपति व्यवसायी एलन मस्कले आफ्नो कम्पनी स्टारलिंकलाई भारतमा प्रवेश गर्नबाट रोक्ने प्रयास भइरहेको आरोप लगाएपछि रिलायन्स इन्डस्ट्रिजले त्यसको जवाफ दिएको छ । मस्कले भारतीय अर्बपति मुकेश अम्बानीप्रति व्यंग्य गर्दै उनलाई ‘प्रधानमन्त्री अम्बानी’ समेत भनेका थिए । उनले अम्बानीलाई स्टारलिंकले भारतमा निष्पक्ष रूपमा प्रतिस्पर्धा गर्न पाउँछ कि पाउँदैन भनेर प्रश्न गरेका थिए । मस्कको उक्त टिप्पणीपछि रिलायन्स इन्डस्ट्रिजले शुक्रबार आधिकारिक विज्ञप्ति जारी गर्दै आफू प्रतिस्पर्धासँग कहिल्यै नडराएको स्पष्ट पारेको हो । रिलायन्सले भनेको छ, ‘अन्य भारतीय कम्पनीहरूजस्तै रिलायन्स पनि स्वदेशी तथा विदेशी लगानी र नयाँ विचारलाई स्वागत गर्ने देशमा विकसित भएको हो । विशेषगरी मानिसहरूको जीवनस्तर सुधार गर्ने प्रयासलाई भारतले सधैं प्रोत्साहन गर्दै आएको छ ।’ कम्पनीले यस्तो स्वतन्त्रता कानुनी शासनमा आधारित रहेको उल्लेख गरेको छ । विज्ञप्तिमा भनिएको छ, ‘भारत सरकारले स्वदेशी वा विदेशी जुनसुकै कम्पनीले आवेदन दिए पनि सबैका लागि समान प्रक्रिया अपनाइने स्पष्ट पारेको छ । जियोको आफ्नै स्याटेलाइट सेवाले समेत अहिलेसम्म स्वीकृति पाउन सकेको छैन ।’ रिलायन्सले आफूले प्रतिस्पर्धालाई ग्राहकलाई उत्कृष्ट सेवा कसले दिन सक्छ भन्ने कुराको सबैभन्दा ठूलो परीक्षाका रूपमा लिने गरेको जनाएको छ । ‘रिलायन्स प्रतिस्पर्धासँग कहिल्यै डराएको छैन । ग्राहकलाई सबैभन्दा राम्रो सेवा कसले दिन सक्छ भन्ने कुराको वास्तविक परीक्षा नै प्रतिस्पर्धा हो,’ कम्पनीले भनेको छ । रिलायन्सका अनुसार सन् २०१६ मा जियोले भारतीय दूरसञ्चार बजारमा प्रवेश गर्दा त्यहाँ पहिल्यै धेरै कम्पनीहरू सञ्चालनमा थिए । त्यतिबेला जियोसँग एक जना पनि ग्राहक थिएनन् । तर, पछिल्लो १० वर्षमा जियोले ५३ करोडभन्दा बढी ग्राहकको विश्वास जितेको कम्पनीको दाबी छ । यस अवधिमा जियोले भारतीय नागरिकलाई विश्वकै उत्कृष्ट डिजिटल पूर्वाधारमध्ये एक उपलब्ध गराउनुका साथै सबैभन्दा सस्तो डेटा सेवा प्रदान गरेको रिलायन्सले जनाएको छ । रिलायन्सले स्टारलिंकसहित स्याटेलाइट सञ्चार क्षेत्रमा प्रवेश गर्न चाहने सबै कम्पनीसँग प्रतिस्पर्धा गर्न आफू तयार रहेको स्पष्ट पारेको छ । कम्पनीले भनेको छ, ‘हामी स्टारलिंकसहित स्याटेलाइट सञ्चार क्षेत्रमा हुने प्रतिस्पर्धालाई स्वागत गर्छौं ।’ विज्ञप्तिमा जियोसहित सबै कम्पनीले भारतका नागरिकलाई सेवा उपलब्ध गराउँदा देशको कानुन र नीतिको पालना गर्नुपर्नेमा समेत जोड दिइएको छ ।
पार्टीभित्रका असन्तुष्ट पक्षलाई समेटेर अघि बढ्छु : सभापति थापा
काठमाडौं । नेपाली कांग्रेसका सभापति गगनकुमार थापाले पार्टीभित्रको आन्तरिक प्रतिस्पर्धामा पराजित वा छुटेका योग्य नेतृत्वलाई समेटेर अघि बढ्ने बताएका छन् । काठमाडौंमा शुक्रबार आयोजित नेपाल पेसाकर्मी अभियान परिषद्को कार्यक्रममा बोल्दै उनले यस्तो बताएका हुन् । सभापति थापाले पार्टी केन्द्रीय समितिको प्रभावकारिताका लागि आफ्नो टिममा छुटेका नेताको भूमिका महत्त्वपूर्ण हुने उल्लेख गरे । थापाले पार्टीको आन्तरिक निर्वाचनलाई ‘जित र हार’को अन्तिम मानकका रूपमा नहेर्न आग्रह गरे । उनले पार्टीभित्रको लोकतान्त्रिक अभ्यास प्रतिस्पर्धाका लागि मात्र भएको भन्दै त्यसलाई थप सुदृढ बनाउन सबै पक्षको सहकार्य आवश्यक रहेको स्पष्ट पारे । थापाले आफूलाई केन्द्रीय समितिमा सहयोग गर्न सक्ने थुप्रै क्षमतावान् नेताहरू अहिलेको संरचनामा नअटाएको स्वीकार गर्दै उनीहरूलाई सङ्गठनको काममा सक्रिय रूपमा संलग्न गराउने कार्ययोजना रहेको बताए । उनले पार्टीको सङ्गठनात्मक संरचनालाई पूर्णता दिने प्रक्रिया छिट्टै अगाडि बढाउने विश्वास व्यक्त गरे । उनले भने, ‘केन्द्रीय समितिलाई प्रभावकारी रूपमा अगाडि बढाउनु मेरो महत्त्वपूर्ण जिम्मेवारी हो । पार्टीको केन्द्रीय कार्यसमितिमा रहेर मसँग काम गर्न योग्य र सक्षम धेरै साथीहरू यसपटक छुट्नुभएको छ । कोही प्रतिस्पर्धामा सहभागी हुनुभएन भने कोही प्रतिस्पर्धाबाट निर्वाचित हुन सक्नुभएन ।’ सभापति थापाले पार्टीभित्रको एकता नै अहिलेको मुख्य आवश्यकता रहेको भन्दै गुटगत प्रभावभन्दा माथि उठेर काम गर्ने सङ्केत गरे ।
कांग्रेस महाधिवेशनको मतगणना सकियो, एक सातामै गनिए १ लाख ६२ हजार मतपत्र
काठमाडौं । नेपाली कांग्रेसको १५औँ महाधिवेशनबाट नयाँ नेतृत्व चयनका लागि भएको निर्वाचनको सम्पूर्ण मतगणना शुक्रबार बिहान सम्पन्न भएको छ । मधेस र बागमती प्रदेशका अन्तिम परिणाम आएसँगै असोज २३ गते रातिदेखि सुरु भएको मतगणना झण्डै एक सातामा टुंगिएको हो । निर्वाचन समितिका सदस्यसचिव राजु कटुवालका अनुसार लुम्बिनी, गण्डकी, उपत्यका, श्रमिक, शहीद परिवार तथा द्वन्द्वपीडित समूहबाट निर्वाचित हुने केन्द्रीय सदस्यहरूको मतगणना यसअघि नै सम्पन्न भएको थियो । सहमहामन्त्रीसहित खस आर्य र थारू समूहका खुला तथा महिला केन्द्रीय सदस्यको मतगणना पनि राति अबेर सकिएको उनले जानकारी दिए । सबै पदको मतगणना सकिए पनि नतिजा रुजु गर्ने काम भइरहेको र त्यसपछि औपचारिक रूपमा परिणाम सार्वजनिक गरिने निर्वाचन समितिले जनाएको छ । असोज २३ गते मतदान सम्पन्न भएलगत्तै सभापति पदको मतगणना सुरु गरिएको थियो । राष्ट्रिय सभागृहमा गरिएको गणनाको परिणाम असोज २४ गते बिहान सार्वजनिक भएको थियो । अन्य पदको मतगणना भने असोज २४ गते रातिदेखि पार्टी केन्द्रीय कार्यालय बीपी नगर, सानेपामा गरिएको थियो । यसपटक कांग्रेसको मतगणना अघिल्लो महाधिवेशनको तुलनामा निकै छिटो सम्पन्न भएको निर्वाचन समितिको दाबी छ । १४औँ महाधिवेशनमा ४ हजार ७०० मतदाताको मत गणना गर्न १२ दिन लागेको थियो । तर, यसपटक ७ हजार ३९२ मतदाताको मतगणना एक सातामै सम्पन्न भएको कटुवालले बताए । उनका अनुसार मतगणनालाई तीव्रता दिन सुरुदेखि नै दिनरात गरी झण्डै २५ समूह परिचालन गरिएको थियो । यसपटक करिब एक लाख ६२ हजार मतपत्र गणना गरिएको उनले जानकारी दिए । महाधिवेशनमा कुल २२९ पदका लागि निर्वाचन भएको थियो । विभिन्न समूह र समावेशी क्लस्टरका कारण ७७ प्रकारका पदमा उम्मेदवारी परेको थियो भने प्रत्येक मतदाताले २३ वटा मतपत्रमार्फत मतदान गर्नुपर्ने व्यवस्था गरिएको थियो । कटुवालले मतदान तथा मतगणनाका क्रममा कुनै विवाद उत्पन्न नभएको र निर्वाचन प्रक्रिया सौहार्दपूर्ण रूपमा सम्पन्न भएको बताए । निर्वाचन समितिका अनुसार निर्वाचित पदाधिकारी तथा केन्द्रीय सदस्यलाई प्रमाणपत्र वितरण र शपथग्रहण कार्यक्रम दशैँलगत्तै गर्ने तयारी छ। त्यसपछि नयाँ कार्यसमितिको पहिलो बैठक बस्नेछ । उक्त बैठकमा पार्टीको आगामी कार्यदिशासँगै स्थानीय तह निर्वाचनको तयारीसम्बन्धी विषयमा समेत छलफल हुने अपेक्षा गरिएको छ ।
