‘सूचना चुहाउनेलाई कारबाही हुन्छ, प्रहरीले आचरण र कार्यशैली सुधार्नू’
काठमाडौं । गृहमन्त्री सुधन गुरुङले राज्यका संवेदनशील सूचना चुहाउनेमाथि कडा कारबाही गरिने चेतावनी दिएका छन् । ७१औं प्रहरी दिवसका अवसरमा शुक्रबार काठमाडौंमा आयोजित कार्यक्रममा बोल्दै गृहमन्त्री गुरुङले राज्यका गोप्य तथा संवेदनशील सूचना संरक्षण गर्न प्रहरीलाई निर्देशन दिँदै सूचना चुहाउनेलाई कारवाही गर्ने चेतावनी दिएका हुन् । सरकारी सूचनाको गोपनीयता कायम राख्नु सम्बन्धित निकाय र कर्मचारीको जिम्मेवारी भएको उल्लेख गर्दै उनले सूचना चुहावटमा संलग्न कसैले पनि उन्मुक्ति नपाउने स्पष्ट पारेका हुन् । उनले सूचनाको संवेदनशीलता बुझेर जिम्मेवारीपूर्वक काम गर्न र गोपनीयता भङ्ग हुन नदिन सचेत रहन आग्रह गरे । नेपाल प्रहरीलाई थप सक्षम, व्यावसायिक र आधुनिक संगठनका रूपमा विकास गर्न कानुनी सुधारको तयारी भइरहेको पनि उनले जानकारी दिए । प्रहरी कर्मचारीको मनोबल बढाउन र उनीहरूलाई सेवाप्रति उत्प्रेरित गर्न आवश्यक सेवासुविधा कानुनमार्फत थप गर्ने दिशामा सरकार अघि बढिरहेको उनको भनाइ थियो । अपराधको स्वरूप सीमाविहीन बन्दै गएको उल्लेख गर्दै गृहमन्त्री गुरुङले अन्तरदेशीय अपराधको नियन्त्रण र अनुसन्धान गर्न सक्ने क्षमतासहित नेपाल प्रहरीलाई स्थापित गर्नुपर्नेमा जोड दिए । बदलिँदो सुरक्षा चुनौतीअनुसार प्रहरीको क्षमता, दक्षता र कार्यशैलीमा सुधार आवश्यक रहेको उनले बताए । प्रहरीको बर्दी नागरिकका लागि भय र त्रासको प्रतीक नभई आशा, विश्वास र सुरक्षाको भरोसा बन्नुपर्ने उनको छ । नागरिक र प्रहरीबीच सहकार्य तथा विश्वासको वातावरण निर्माण गर्दै जनतामैत्री सेवा प्रवाह गर्न उनले प्रहरीलाई निर्देशन दिए । गृहमन्त्री गुरुङले विपद् उद्धारमा खटिने सुरक्षाकर्मीका लागि जोखिम भत्ता र खाजा खर्चको व्यवस्था गरिएको पनि बताए । त्यस्तै, नेपाल प्रहरीको संगठन तथा व्यवस्थापन सर्वेक्षणमार्फत जनशक्तिको दरबन्दी थप गर्ने प्रस्ताव अघि बढाइएको उनले जानकारी दिए । नयाँ सरकारले नयाँ ऊर्जा र प्रतिबद्धताका साथ जनताको सेवामा काम गरिरहेको उल्लेख गर्दै उनले प्रहरी कर्मचारीलाई आफ्नो आचरण र कार्यशैली सुधार गर्न आग्रह गरे । अपराध नियन्त्रण तथा अनुसन्धानमा कुनै प्रकारको सम्झौता नगर्न निर्देशन दिँदै उनले शून्य सहनशीलताको नीति अपनाएर नागरिकलाई सुरक्षित महसुस हुने वातावरण बनाउनुपर्नेमा जोड दिए ।
सिंहदरबारमा मन्त्रिपरिषद्को बैठक सुरु
काठमाडौं । मन्त्रिपरिषद्को बैठक सुरु भएको छ । सिंहदरबारस्थित प्रधानमन्त्री तथा मन्त्रिपरिषद्को कार्यालयमा केहीबेरअघि बैठक सुरु भएको हो । बैठकमा छलफल हुने विषय तथा निर्णयबारे विस्तृत विवरण आउन बाँकी छ ।
प्रहरी अस्पताललाई मेडिकल कलेजका रूपमा विकास गर्छौँ : प्रधानमन्त्री
काठमाडौं । प्रधानमन्त्री बालेन्द्र साहले प्रहरी अस्पताललाई मेडिकल कलेजका रूपमा विकास गर्न सरकारले काम गरिरहेको बताएका छन् । शुक्रबार ७१औँ प्रहरी दिवसको अवसरमा आयोजित कार्यक्रममा शुभकामना सन्देश पठाउँदै प्रधानमन्त्री साहले यस्तो बताएका हुन् । प्रधानमन्त्री साहको सन्देश वाचन गर्दै प्रहरी महानिरीक्षक दानबहादुर कार्कीले नेपाल प्रहरीलाई विपद् व्यवस्थापन, आधुनिक प्रविधि, तालिम र पूर्वाधारका क्षेत्रमा अझ सक्षम बनाउन सरकार प्रतिबद्ध रहेको जानकारी दिए । प्रधानमन्त्री साहले प्रहरी अस्पताललाई मेडिकल कलेजका रूपमा विकास गर्ने, साइबर तथा वित्तीय अपराध नियन्त्रण गर्ने र कृत्रिम बुद्धिमत्ता एवं आधुनिक सुरक्षा प्रणालीको उपयोग बढाउने कार्यलाई प्राथमिकता दिइएको बताएका छन् । आन्तरिक शान्ति सुरक्षा कायम गर्न प्रहरीको भूमिका महत्त्वपूर्ण रहेको पनि उनले उल्लेख गरेका छन् । उनले भने, ‘नेपाल प्रहरीलाई विपद् व्यवस्थापन, आधुनिक प्रविधि, तालिम र पूर्वाधारका क्षेत्रमा अझ सक्षम बनाउन सरकार प्रतिबद्ध छ । प्रहरी अस्पताललाई मेडिकल कलेजका रूपमा विकास गर्ने, साइबर तथा वित्तीय अपराध नियन्त्रण गर्ने र कृत्रिम बुद्धिमत्ता एवं आधुनिक सुरक्षा प्रणालीको उपयोग बढाउने कार्यलाई प्राथमिकता दिइएको छ । आन्तरिक शान्ति सुरक्षा कायम गर्न प्रहरीको भूमिका महत्त्वपूर्ण छ ।’ प्रधानमन्त्री साहले सङ्कटका बेला धैर्य, सही निर्णय र कुशल कार्यसम्पादनमार्फत जनताको विश्वास कायम राख्न आवश्यक रहेको बताएका छन् ।
विपद्को वर्षः दलहरूले दशैं–तिहारको चियापान नगर्ने
काठमाडौं । बाढीपहिरोलगायत प्राकृतिक विपद्का कारण प्रमुख राजनीतिक दलहरूले यस वर्ष दशैं, तिहार र छठका अवसरमा केन्द्रीय तहमा औपचारिक चियापान तथा शुभकामना आदानप्रदान कार्यक्रम नगर्ने जनाएका छन् । राष्ट्रिय स्वतन्त्र पार्टी (रास्वपा) का प्रवक्ता जगदीश खरेलले जिल्ला, क्षेत्र र स्थानीय तहमा यस्ता कार्यक्रम भइरहे पनि केन्द्रीय स्तरमा कार्यक्रम गर्नेबारे कुनै निर्णय नभएको जानकारी दिए । नेपाली कांग्रेसका नवनिर्वाचित सहमहामन्त्री मनोजमणि आचार्यले पनि चियापानका विषयमा पार्टीले सोचिनसकेको बताए । नेकपा एमालेका प्रचार विभाग प्रमुख निरज आचार्यले कार्यक्रम नगर्नेबारे औपचारिक निर्णय नभएको भए पनि यसपटक केन्द्रीय तहमा चाडपर्वको उपलक्ष्यमा चियापान नहुने जानकारी दिए । नेपाली कम्युनिस्ट पार्टीका कार्यालय सचिव गणेशमान पुनले पनि यसपटक उल्लासको वातावरण नरहेकाले चियापान कार्यक्रम नहुने जानकारी दिए । देशका मुख्य राजनीतिक दलहरूले विगतमा जस्तो यस वर्ष भव्य चियापान कार्यक्रम आयोजना गर्ने तयारी गरेका छैनन् । विपद्बाट प्रभावित नागरिक राहत, पुनःस्थापना र पुनर्निर्माणको प्रतीक्षामा रहेका बेला उत्सवमूलक कार्यक्रम नगर्ने मनस्थितिमा दलहरू देखिएका हुन् । रास्वपाका प्रवक्ता खरेलले केन्द्रमा दशैं–तिहारका अवसरमा चियापान वा शुभकामना आदानप्रदान कार्यक्रम गर्नेबारे अहिलेसम्म कुनै निर्णय नभएको बताए । उनका अनुसार प्रदेश तथा जिल्लास्तरमा भने स्थानीय आवश्यकताअनुसार कार्यक्रम गर्न सकिनेछ । नेपाली कांग्रेसले पनि यस वर्ष केन्द्रीय स्तरमा चियापान आयोजना गर्ने निर्णय गरेको छैन । पार्टीका सहमहामन्त्री आचार्यका अनुसार महाधिवेशनलगायत आन्तरिक राजनीतिक गतिविधिका कारण कार्यक्रमबारे औपचारिक निर्णय हुन नसकेको हो । नेकपा एमालेले समेत यस वर्ष चियापान तथा शुभकामना आदानप्रदान कार्यक्रम गर्ने निर्णय गरेको छैन । एमालेले विगतमा दशैंको पूर्णिमाका दिन चियापान कार्यक्रम आयोजना गर्दै आए पनि पछिल्ला वर्षमा यस्तो कार्यक्रम नियमित हुन सकेको छैन । एमालेका प्रचार विभाग प्रमुख निरज आचार्यका अनुसार बाढी, पहिरो र विपद्का बेला पार्टी उत्सवको मुडमा छैन । पार्टी अध्यक्षसमेत बुवाको वार्षिकी बारेर सेतो कपडामै रहेकाले पनि यसपटक यस्ता उत्सवमय कार्यक्रम आयोजना नगर्ने आचार्यले जानकारी दिए । गत वर्ष पनि एमालेले चियापान कार्यक्रम गरेको थिएन । प्रमुख आचार्यका अनुसार गत वर्ष पार्टीको केन्द्रीय कार्यालयमा गरिएको आगजनीका कारण चियापान कार्यक्रम आयोजना गरिएको थिएन । त्यस्तै, नेपाली कम्युनिस्ट पार्टीले भोटेकोशी, बूढीगण्डकीलगायत क्षेत्रमा आएको विनाशकारी बाढीबाट भएको क्षतिलाई मध्यनजर गर्दै केन्द्रमा दशैं–तिहार लक्षित शुभकामना आदानप्रदान कार्यक्रम नगर्ने निर्णय गरिसकेको छ । पार्टीका कार्यालय सचिव गणेशमान पुनले विपद्को अवस्थालाई ध्यानमा राखेर यस्तो निर्णय गरिएको बताएका छन् । यस वर्ष बाढीपहिरोले देशका विभिन्न क्षेत्रमा ठूलो क्षति पुर्याएको छ । विशेषगरी भोटेकोशी–त्रिशूली क्षेत्रको बाढीपछि प्रभावित नागरिकको उद्धार, राहत, पुनःस्थापना र पुनर्निर्माणका विषयमा सरकार तथा राजनीतिक दलहरूबीच छलफल हुँदै आएको छ । विगतमा दशैं–तिहारको चियापान राजनीतिक दलका नेता, कार्यकर्ता तथा विभिन्न क्षेत्रका व्यक्तिबीच भेटघाट र शुभकामना आदानप्रदान गर्ने महत्त्वपूर्ण अवसरका रूपमा रहँदै आएको थियो । यस्ता कार्यक्रममार्फत दलहरूले आपसी सम्बन्ध सुधार गर्ने गर्दथे । कतिपय अवस्थामा यस्ता कार्यक्रमलाई राजनीतिक सम्बन्ध विस्तार र शक्ति प्रदर्शनको माध्यमका रूपमा समेत लिने गरिएको थियो । तर यस वर्ष प्राकृतिक विपद्बाट उत्पन्न परिस्थितिका कारण प्रमुख दलहरूको केन्द्रीय स्तरको चियापान कार्यक्रम प्रभावित हुने देखिएको छ ।
म्युचुअल फन्डमा नयाँ लगानीका ढोका खोल्दै धितोपत्र बोर्ड
काठमाडौं । नेपाल धितोपत्र बोर्डले म्युचुअल फन्डमा नयाँ लगानीका ढोका खोल्ने तयारी अघि बढाएको छ । सर्वसाधारणको बचतलाई पुँजी बजारमार्फत उत्पादनशील क्षेत्रमा परिचालन गर्ने र सामूहिक लगानी कोषलाई थप व्यवस्थित बनाउने उद्देश्यसहित धितोपत्र बोर्डले सामूहिक लगानी कोष नीति, २०८३ को मस्यौदा अघि सारेको हो । बोर्डले तयार पारेको प्रस्तावित नीतिले लगानीका नयाँ विकल्प विस्तार गर्नेदेखि कोष व्यवस्थापकको जवाफदेहिता बढाउने, लगानीकर्ताको हित संरक्षण गर्ने र कोषको सम्पत्तिको मूल्याङ्कन तथा जोखिम व्यवस्थापनलाई पारदर्शी बनाउनेसम्मका व्यवस्था समेटेको छ । प्रस्तावित नीतिमा हाल प्रचलित खुलामुखी तथा बन्दमुखी योजनासँगै एक्सचेन्ज ट्रेडेड फन्ड (ईटीएफ), ऋणपत्र तथा मुद्रा बजारमा आधारित कोष, पूर्वाधार तथा हरित कोष, साना तथा मझौला उद्यम (एसएमई) फन्ड र रियल इस्टेट इन्भेस्टमेन्ट ट्रस्ट (आरईआईटी) जस्ता लगानीका विकल्प विकास गर्ने उल्लेख छ । यसबाट लगानीकर्तालाई सीमित विकल्पमा निर्भर नराखी फरक प्रकृति, जोखिम र प्रतिफल भएका योजनामा लगानी गर्ने अवसर विस्तार गर्न खोजिएको छ । नियमित रूपमा एकाइ खरिद तथा पुनःखरिद गर्न सकिने व्यवस्था, अनलाइन सेवा, नियमित खुद सम्पत्ति मूल्य (एनएभी) प्रकाशन र तरलता व्यवस्थापनलाई व्यवस्थित बनाउने प्रस्ताव गरिएको छ । साथै, नियमित लगानी, लाभांश पुनःलगानी र निश्चित अवधिमा रकम झिक्न सकिने सुविधासमेत विस्तार गर्ने लक्ष्य राखिएको छ । किन आवश्यक पर्यो नयाँ नीति ? प्रस्तावित नीतिमा सामूहिक लगानी कोषको मुख्य उद्देश्य सर्वसाधारणको बचतलाई व्यावसायिक व्यवस्थापनमार्फत विविधीकृत लगानीमा परिचालन गर्नु रहेको बताइएको छ । प्रस्तावित नीतिमा कोष प्रवर्द्धक, योजना व्यवस्थापक, ट्रस्टी वा सुपरिवेक्षक, डिपोजिटरी वा कस्टोडियन, रजिस्ट्रार तथा ट्रान्सफर एजेन्ट र वितरकको भूमिका तथा उत्तरदायित्व स्पष्ट गर्ने उल्लेख छ । यी संस्थाबीच जिम्मेवारी दोहोरिने वा अस्पष्ट हुने अवस्था घटाउनु, स्वार्थको द्वन्द्व नियन्त्रण गर्नु र कोषको सम्पत्तिलाई व्यवस्थापक तथा प्रवर्द्धकको सम्पत्तिबाट अलग राख्नु नीतिको उद्देश्य रहेको उल्लेख छ । मस्यौदाले खुलामुखी योजनालाई प्राथमिकता दिएको छ । नीतिमा व्यवस्थित लगानी योजना (एसआईपी), लाभांश पुनःलगानी योजना, एक योजनाबाट अर्को योजनामा रकम स्थानान्तरण गर्ने सुविधा (एसटीपी) र निश्चित अवधिमा रकम झिक्ने सुविधा (एसडब्ल्यूपी) विस्तार गर्ने प्रस्ताव छ । प्रस्तावित नीतिले इक्विटी, ऋणपत्र, मुद्रा बजार, फन्ड अफ फन्ड्स, ईटीएफ, पूर्वाधार, हरित तथा दिगो लगानी, एसएमई फन्ड र आरईआईटीजस्ता योजनाको विकासलाई समेटेको छ । मस्यौदाले कार्यान्वयनलाई चरणबद्ध बनाएको छ । पहिलो १२ महिनामा आधारभूत सुधार, १२ देखि २४ महिनामा ऋणपत्र तथा मुद्रा बजारसम्बन्धी योजना र फन्ड अफ फन्ड्सको विस्तार तथा २४ देखि ३६ महिनामा ईटीएफ र विशिष्टीकृत कोष विकास गर्ने प्रस्ताव छ । त्यसपछि अन्य योजना र नियामकीय प्रविधि विकास गर्ने लक्ष्य राखिएको छ । शुल्क र जोखिमबारे लगानीकर्तालाई स्पष्ट जानकारी कोषमा लगानी गर्ने व्यक्तिले प्रतिफलको सम्भावना मात्र होइन, त्यससँग जोडिएको जोखिम र लागत पनि बुझ्न पाउनुपर्ने मान्यतालाई मस्यौदाले प्राथमिकता दिएको छ । जोखिम, शुल्क, कुल खर्च अनुपात, बेन्चमार्क, विगतको कार्यसम्पादन, पोर्टफोलियो र पुनःखरिदका सर्त सार्वजनिक गर्ने व्यवस्था प्रस्ताव गरिएको छ । व्यवस्थापन शुल्कलाई कार्यसम्पादनसँग आबद्ध गर्ने, कुल खर्च अनुपातको सीमा निर्धारण गर्ने तथा कार्यसम्पादनमा आधारित शुल्क लगाउँदा बेन्चमार्क, हर्डल रेट र हाई–वाटर मार्क लागू गर्ने विषय पनि मस्यौदामा समेटिएका छन् । त्यसैगरी, बजार मूल्य उपलब्ध नभएका, सूचीकृत नभएका वा कारोबार स्थगित भएका धितोपत्रको निष्पक्ष मूल्याङ्कन, स्वतन्त्र मूल्याङ्कनको व्यवस्था र एकल कम्पनी, समूह, क्षेत्र वा उपकरणमा लगानी केन्द्रित हुँदा उत्पन्न हुने जोखिम नियन्त्रण गर्ने विषय पनि प्रस्ताव गरिएको छ । मस्यौदाले अनलाइन खाता खोल्ने, डिजिटल ग्राहक पहिचान (डिजिटल केवाईसी), विद्युतीय भुक्तानी, अनलाइन एकाइ खरिद तथा पुनःखरिद र डिजिटल रूपमा प्रतिवेदन उपलब्ध गराउने प्रणालीको विकासलाई प्राथमिकता दिएको छ । बजार, कर्जा, तरलता, सञ्चालन, लगानी केन्द्रित हुने अवस्था तथा साइबर जोखिमको निगरानीका लागि सूचक र प्रतिवेदन प्रणाली विकास गर्ने प्रस्तावसमेत गरिएको छ ।
प्रधानमन्त्री शाहको अध्यक्षतामा चिकित्सा शिक्षा आयोगको बैठक सुरु
काठमाडौं । प्रधानमन्त्री बालेन्द्र शाहको अध्यक्षतामा चिकित्सा शिक्षा आयोगको बैठक सुरु भएको छ । सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोगको बैठक सुरु भएको हो । बैठकमा छलफल हुने विषय तथा निर्णयबारे थप विवरण आउन बाँकी छ ।
प्रहरीको बर्दी डरको होइन, भरोसा र सुरक्षाको प्रतीक बन्नुपर्छ : गृहमन्त्री
काठमाडौं । गृहमन्त्री सुधन गुरुङले जनतालाई केन्द्रमा राखेर काम गर्न सुरक्षा निकायलाई निर्देशन दिएका छन् । शुक्रबार ७१औँ प्रहरी दिवसको अवसरमा आयोजित कार्यक्रममा बोल्दै उनले यस्तो निर्देशन दिएका हुन् । उनले प्रहरी कर्मचारीहरूले नागरिकमैत्री व्यवहार, निष्पक्ष अनुसन्धान र जवाफदेहितालाई आत्मसात् गर्दै भ्रष्टाचार, शक्तिको दुरुपयोग र पक्षपातविरुद्ध शून्य सहनशीलता अपनाउनुपर्ने बताए । साइबर अपराध, वित्तीय अपराध र आधुनिक अनुसन्धान प्रविधिमा क्षमता बढाउँदै नागरिकको विश्वास जित्न आवश्यक रहेको उनको भनाइ थियो । प्रहरीको बर्दी डरको होइन, आशा, भरोसा र सुरक्षाको प्रतीक बन्नुपर्ने उनले बताए । उनले भने, ‘प्रहरी कर्मचारीहरूले नागरिकमैत्री व्यवहार, निष्पक्ष अनुसन्धान र जवाफदेहितालाई आत्मसात् गर्दै भ्रष्टाचार, शक्तिको दुरुपयोग र पक्षपातविरुद्ध शून्य सहनशीलता अपनाउनुपर्छ । साइबर अपराध, वित्तीय अपराध र आधुनिक अनुसन्धान प्रविधिमा क्षमता बढाउँदै नागरिकको विश्वास जित्न आवश्यक छ । प्रहरीको बर्दी डरको होइन, आशा, भरोसा र सुरक्षाको प्रतीक बन्नुपर्छ ।’ गृहमन्त्री गुरुङले सही कार्य गर्ने प्रहरीको साथमा सरकार सधैँ रहने तर गलत कार्यको संरक्षण नगरिने स्पष्ट पारे ।
राजपरिवारबाट टाढिए पनि ह्यारी–मेघनको शाही छवि कायमै
काठमाडौं । बेलायतको राजपरिवारबाट अलग भएर आफ्नै बाटो रोजेका राजकुमार ह्यारी र उनकी पत्नी मेघन मार्कलको बेलायत भ्रमणले उनीहरूको लोकप्रियता र राजपरिवारसँगको जटिल सम्बन्धलाई फेरि चर्चामा ल्याएको छ । नटिङ्घममा आयोजित विभिन्न कार्यक्रममा उनीहरूको सहभागिता औपचारिक शाही भ्रमणजस्तो नभए पनि त्यसको शैली र जनताको आकर्षणले पुराना दिनको झल्को दिने देखिन्छ । सन् २०१७ मा विवाहको घोषणा गरेलगत्तै पहिलोपटक सँगै नटिङ्घम पुगेका ह्यारी र मेघन यसपटक पनि विभिन्न सामाजिक संस्था र परोपकारी अभियानसँग जोडिएका कार्यक्रममा सहभागी भए । उनीहरूले स्वयंसेवकहरूसँग भेटघाट गरे, कपकेक बनाए, पश्चिम अफ्रिकी परिकार तयार पारे तथा बिलियड्र्स र बास्केटबल खेले । कार्यक्रममा सहभागी हुन आएका अधिकांश मानिस युवा थिए । उनीहरूको उपस्थितिमा औपचारिकताभन्दा प्रत्यक्ष संवाद र सामाजिक गतिविधिलाई प्राथमिकता दिइएको थियो । परोपकारी कार्यक्रममा ह्यारी र मेघनले सहज सहभागिता जनाउँदै आएका छन् । बीबीसीका अनुसार मेघनको बेलायतमा भएको यो सार्वजनिक उपस्थितिलाई उनको पुनरागमनका रूपमा पनि हेर्न सकिन्छ । उनी धेरै वर्षपछि बेलायती भूमिमा यस स्तरका सार्वजनिक कार्यक्रममा सहभागी भएकी हुन् । उनीनिकट स्रोतका अनुसार जनताको प्रतिक्रियालाई लिएर उनी चिन्तित थिइनन् र सार्वजनिक रूपमा उपस्थित हुन चाहन्थिन् । यद्यपि, यो कुनै आधिकारिक शाही कार्यक्रम थिएन । बकिङ्घम दरबारले ह्यारी र मेघनलाई निजी नागरिकका रूपमा हेर्ने स्पष्ट पारिसकेको छ । कार्यक्रममा शाही तामझाम, विशिष्ट व्यक्तिहरूको औपचारिक स्वागत तथा देखिने गरी सुरक्षाकर्मीको उपस्थिति थिएन । तर कार्यक्रमको योजनाबद्ध व्यवस्थापन, सञ्चारमाध्यमबीचको सहकार्य र सर्वसाधारणसँगको प्रत्यक्ष भेटघाटले शाही भ्रमणको झल्को दिएको हो । ह्यारी र मेघनको बेलायत आगमनले राजपरिवारभित्रको सम्बन्धलाई पनि पुनः चर्चामा ल्याएको छ । उनीहरू आफ्ना सन्तान आर्ची र लिलिबेटसहित बेलायत फर्कने योजनाको खबर सार्वजनिक हुनुभन्दा केही दिनअघि मात्र राजा चार्ल्स तृतीयले यसबारे जानकारी पाएको बीबीसीले उल्लेख गरेको छ । ह्यारी र मेघन नटिङ्घममा व्यस्त रहँदा राजा चार्ल्स भने कार्डिफमा वेल्सको संसद् सेनडको औपचारिक उद्घाटन कार्यक्रममा सहभागी थिए । उनले समुदाय, पहिचान र चरित्रको महत्त्व उल्लेख गर्दै कठिन परिस्थितिमा टिकिरहन सक्ने क्षमताबारे सम्बोधन गरेका थिए । राजपरिवारका सदस्यबीचको सम्बन्धमा देखिएको तिक्तता भने अझै समाधान भइसकेको छैन । ह्यारी र मेघनको पारिवारिक विग्रह, आरोप–प्रत्यारोप र सार्वजनिक रूपमा व्यक्त हुने कटुतासँग पनि जोडिएको छ । उनीहरूको सम्बन्धमा देखिएको दरारले पारिवारिक विवादले व्यक्तिगत जीवनमा पार्ने गहिरो असरलाई समेत उजागर गरेको बीबीसीको विश्लेषण छ । राजपरिवारका सक्रिय सदस्य नरहे पनि ह्यारी र मेघनप्रति सञ्चारमाध्यम तथा सर्वसाधारणको चासो कायमै छ । उनीहरूलाई समर्थन गर्ने वा आलोचना गर्ने दुवै पक्षका मानिसले उनीहरूको गतिविधिलाई चासोका साथ हेर्ने गरेका छन् । राजपरिवारको पछिल्लो समयको सबैभन्दा उथलपुथलपूर्ण अवधिमध्ये एकसँग उनीहरूको सम्बन्ध जोडिएकाले पनि उनीहरू समाचारको विषय बनिरहेका छन् । ह्यारी र मेघनका संयुक्त सार्वजनिक कार्यक्रम नियमित रूपमा नहुने भए पनि आगामी दिनमा कहिलेकाहीँ यस्ता कार्यक्रम आयोजना हुन सक्ने उनीहरूका प्रतिनिधिले बताएका छन् । दुवैका आ–आफ्नै रुचि र काम रहेकाले उनीहरूले छुट्टाछुट्टै गतिविधिमा ध्यान दिनेछन् । मेघनले आफ्नो जीवनशैलीसम्बन्धी ब्रान्डलाई बेलायतमा विस्तार गर्ने तयारी गरिरहेकी छन् । यो योजना क्रिसमसभन्दा अघि नै अघि बढ्न सक्ने सम्भावना रहेको बीबीसीले जनाएको छ । यस वर्षको क्रिसमसमा भने ह्यारी र मेघन स्यान्ड्रिङ्घममा राजपरिवारका अन्य सदस्यसँग सहभागी हुने अपेक्षा गरिएको छैन । उनीहरूले मेघनकी आमा डोरिया र्यागल्यान्डसँग समय बिताउन सक्ने सम्भावना छ । (बीबीसीबाट अनुदित तथा सम्पादित)
