पार्टीभित्रका असन्तुष्ट पक्षलाई समेटेर अघि बढ्छु : सभापति थापा
काठमाडौं । नेपाली कांग्रेसका सभापति गगनकुमार थापाले पार्टीभित्रको आन्तरिक प्रतिस्पर्धामा पराजित वा छुटेका योग्य नेतृत्वलाई समेटेर अघि बढ्ने बताएका छन् । काठमाडौंमा शुक्रबार आयोजित नेपाल पेसाकर्मी अभियान परिषद्को कार्यक्रममा बोल्दै उनले यस्तो बताएका हुन् । सभापति थापाले पार्टी केन्द्रीय समितिको प्रभावकारिताका लागि आफ्नो टिममा छुटेका नेताको भूमिका महत्त्वपूर्ण हुने उल्लेख गरे । थापाले पार्टीको आन्तरिक निर्वाचनलाई ‘जित र हार’को अन्तिम मानकका रूपमा नहेर्न आग्रह गरे । उनले पार्टीभित्रको लोकतान्त्रिक अभ्यास प्रतिस्पर्धाका लागि मात्र भएको भन्दै त्यसलाई थप सुदृढ बनाउन सबै पक्षको सहकार्य आवश्यक रहेको स्पष्ट पारे । थापाले आफूलाई केन्द्रीय समितिमा सहयोग गर्न सक्ने थुप्रै क्षमतावान् नेताहरू अहिलेको संरचनामा नअटाएको स्वीकार गर्दै उनीहरूलाई सङ्गठनको काममा सक्रिय रूपमा संलग्न गराउने कार्ययोजना रहेको बताए । उनले पार्टीको सङ्गठनात्मक संरचनालाई पूर्णता दिने प्रक्रिया छिट्टै अगाडि बढाउने विश्वास व्यक्त गरे । उनले भने, ‘केन्द्रीय समितिलाई प्रभावकारी रूपमा अगाडि बढाउनु मेरो महत्त्वपूर्ण जिम्मेवारी हो । पार्टीको केन्द्रीय कार्यसमितिमा रहेर मसँग काम गर्न योग्य र सक्षम धेरै साथीहरू यसपटक छुट्नुभएको छ । कोही प्रतिस्पर्धामा सहभागी हुनुभएन भने कोही प्रतिस्पर्धाबाट निर्वाचित हुन सक्नुभएन ।’ सभापति थापाले पार्टीभित्रको एकता नै अहिलेको मुख्य आवश्यकता रहेको भन्दै गुटगत प्रभावभन्दा माथि उठेर काम गर्ने सङ्केत गरे ।
कांग्रेस महाधिवेशनको मतगणना सकियो, एक सातामै गनिए १ लाख ६२ हजार मतपत्र
काठमाडौं । नेपाली कांग्रेसको १५औँ महाधिवेशनबाट नयाँ नेतृत्व चयनका लागि भएको निर्वाचनको सम्पूर्ण मतगणना शुक्रबार बिहान सम्पन्न भएको छ । मधेस र बागमती प्रदेशका अन्तिम परिणाम आएसँगै असोज २३ गते रातिदेखि सुरु भएको मतगणना झण्डै एक सातामा टुंगिएको हो । निर्वाचन समितिका सदस्यसचिव राजु कटुवालका अनुसार लुम्बिनी, गण्डकी, उपत्यका, श्रमिक, शहीद परिवार तथा द्वन्द्वपीडित समूहबाट निर्वाचित हुने केन्द्रीय सदस्यहरूको मतगणना यसअघि नै सम्पन्न भएको थियो । सहमहामन्त्रीसहित खस आर्य र थारू समूहका खुला तथा महिला केन्द्रीय सदस्यको मतगणना पनि राति अबेर सकिएको उनले जानकारी दिए । सबै पदको मतगणना सकिए पनि नतिजा रुजु गर्ने काम भइरहेको र त्यसपछि औपचारिक रूपमा परिणाम सार्वजनिक गरिने निर्वाचन समितिले जनाएको छ । असोज २३ गते मतदान सम्पन्न भएलगत्तै सभापति पदको मतगणना सुरु गरिएको थियो । राष्ट्रिय सभागृहमा गरिएको गणनाको परिणाम असोज २४ गते बिहान सार्वजनिक भएको थियो । अन्य पदको मतगणना भने असोज २४ गते रातिदेखि पार्टी केन्द्रीय कार्यालय बीपी नगर, सानेपामा गरिएको थियो । यसपटक कांग्रेसको मतगणना अघिल्लो महाधिवेशनको तुलनामा निकै छिटो सम्पन्न भएको निर्वाचन समितिको दाबी छ । १४औँ महाधिवेशनमा ४ हजार ७०० मतदाताको मत गणना गर्न १२ दिन लागेको थियो । तर, यसपटक ७ हजार ३९२ मतदाताको मतगणना एक सातामै सम्पन्न भएको कटुवालले बताए । उनका अनुसार मतगणनालाई तीव्रता दिन सुरुदेखि नै दिनरात गरी झण्डै २५ समूह परिचालन गरिएको थियो । यसपटक करिब एक लाख ६२ हजार मतपत्र गणना गरिएको उनले जानकारी दिए । महाधिवेशनमा कुल २२९ पदका लागि निर्वाचन भएको थियो । विभिन्न समूह र समावेशी क्लस्टरका कारण ७७ प्रकारका पदमा उम्मेदवारी परेको थियो भने प्रत्येक मतदाताले २३ वटा मतपत्रमार्फत मतदान गर्नुपर्ने व्यवस्था गरिएको थियो । कटुवालले मतदान तथा मतगणनाका क्रममा कुनै विवाद उत्पन्न नभएको र निर्वाचन प्रक्रिया सौहार्दपूर्ण रूपमा सम्पन्न भएको बताए । निर्वाचन समितिका अनुसार निर्वाचित पदाधिकारी तथा केन्द्रीय सदस्यलाई प्रमाणपत्र वितरण र शपथग्रहण कार्यक्रम दशैँलगत्तै गर्ने तयारी छ। त्यसपछि नयाँ कार्यसमितिको पहिलो बैठक बस्नेछ । उक्त बैठकमा पार्टीको आगामी कार्यदिशासँगै स्थानीय तह निर्वाचनको तयारीसम्बन्धी विषयमा समेत छलफल हुने अपेक्षा गरिएको छ ।
भारतसँगको व्यापार घाटा घटाउन र लगानी प्रवर्द्धन गर्न संयुक्त पहल आवश्यक : अध्यक्ष श्रेष्ठ
काठमाडौं । नेपाल उद्योग वाणिज्य महासंघका अध्यक्ष अञ्जन श्रेष्ठले नेपाल र भारतबीचको व्यापार घाटा न्यूनीकरण गर्न, लगानीका अवरोध हटाउन तथा द्विपक्षीय व्यापार र आर्थिक सहकार्य विस्तार गर्न दुवै देशले संयुक्त पहल गर्नुपर्ने बताएका छन् । नेपाल–भारत उद्योग वाणिज्य संघ (निक्की) को ३२औँ वार्षिक साधारणसभालाई सम्बोधन गर्दै उनले यस्तो बताएका हुन् । भारत नेपालको सबैभन्दा ठूलो व्यापारिक साझेदार र वैदेशिक लगानीको महत्त्वपूर्ण स्रोत रहेको उल्लेख गर्दै श्रेष्ठले सीमापार व्यापारका समस्या समाधान, भन्सार प्रक्रिया सरलीकरण, सीमा पूर्वाधार सुधार र यातायात सञ्जाल विस्तारमा जोड दिए । उनका अनुसार आर्थिक वर्ष २०२५/२६ मा नेपाल र भारतबीचको कुल द्विपक्षीय व्यापार करिब १०.१ अर्ब अमेरिकी डलर पुगेको छ, जुन अघिल्लो वर्षको तुलनामा ८.२ प्रतिशतले बढी हो । उक्त अवधिमा नेपालले भारततर्फ करिब १.७८ अर्ब अमेरिकी डलर बराबरका वस्तु निर्यात गरेको थियो भने भारतबाट करिब ८.३२ अर्ब अमेरिकी डलर बराबरका वस्तु आयात गरेको थियो । श्रेष्ठले व्यापार असन्तुलन कम गर्न नेपालको निर्यात क्षमता अभिवृद्धि गर्नुपर्ने र भारतबाट उत्पादनमूलक क्षेत्रमा लगानी आकर्षित गर्नुपर्ने बताए । व्यापार नीतिमा पूर्वानुमानयोग्यता कायम गर्दै व्यवसायको लागत घटाउन सके दुवै देशका व्यवसायी र उपभोक्ता लाभान्वित हुने उनको भनाइ छ । श्रेष्ठले नेपाली उत्पादनले भारतीय बजारमा प्रवेश गर्दा सामना गर्नुपरेका गुणस्तर प्रमाणीकरणसम्बन्धी समस्याप्रति सरकारको ध्यानाकर्षण गराए । नेपाल गुणस्तर तथा नापतौल विभाग र भारतीय मानक ब्युरो (बीआईएस) बीच प्रभावकारी समन्वय आवश्यक रहेको उनले बताए । विशेषगरी स्टिल, जुत्ता तथा प्लाइवुडजस्ता उत्पादनको प्रमाणीकरण प्रक्रियामा देखिएको ढिलाइले नेपाली उद्योगी–व्यवसायी प्रभावित भएको उनको भनाइ छ । बीआईएस प्रमाणीकरण प्राप्त गर्न ६ महिनादेखि एक वर्षसम्म लाग्ने र प्रमाणपत्र प्राप्त हुँदासम्म नवीकरणको समय नजिकिने अवस्थाले स्थानीय उद्यमी निरुत्साहित भएको उनले बताए । यस समस्याको समाधानका लागि दुवै देशका सरकारबीच समन्वय गरी प्रमाणीकरण प्रक्रिया छिटो, सरल र प्रभावकारी बनाउनुपर्नेमा उनले जोड दिए। नेपाली जुट उत्पादनमा हालै लगाइएको एन्टिडम्पिङ शुल्कले नेपालको जुट उद्योगको वृद्धि र प्रतिस्पर्धात्मक क्षमतामा नकारात्मक असर पारेको पनि उनले उल्लेख गरे । नेपालले जलविद्युत्, विद्युत् प्रसारण पूर्वाधार, पर्यटन, सूचना प्रविधि तथा निर्यातमुखी उद्योगमा भारतीय लगानीलाई स्वागत गर्ने श्रेष्ठले बताए । बलियो प्रसारण पूर्वाधार, स्पष्ट नीति र दीर्घकालीन लगानी सुनिश्चित गर्न सके नेपालले भारततर्फ विद्युत् निर्यात बढाउनुका साथै स्वदेशमै रोजगारी सिर्जना र राजस्व वृद्धि गर्न सक्ने उनको भनाइ छ । पर्यटन क्षेत्रको विकासका लागि गन्तव्यहरूको स्तरोन्नति, यातायात तथा हवाई सम्पर्क विस्तार र भारतीय पर्यटकलाई आकर्षित गर्ने विशेष प्याकेज आवश्यक रहेको उनले बताए । धार्मिक तथा सांस्कृतिक पर्यटनअन्तर्गत रामायण सर्किट, बौद्ध सर्किट र वेलनेस पर्यटनको प्रवर्द्धनले दुई देशबीचको पर्यटन सहकार्यलाई थप बलियो बनाउन सक्ने उनले उल्लेख गरे । श्रेष्ठले भारत नेपालको सबैभन्दा ठूलो व्यापारिक साझेदार तथा वैदेशिक लगानीको महत्त्वपूर्ण स्रोत रहेको बताए । आर्थिक वर्ष २०२५/२६ मा दुई देशबीचको कुल व्यापार करिब १०.१ अर्ब अमेरिकी डलर पुगेको उल्लेख गर्दै उनले व्यापार घाटा न्यूनीकरण गर्न नेपाली निर्यात प्रवर्द्धन र भारतीय लगानी विस्तार आवश्यक रहेको बताए । उनले नेपाल–भारत संयुक्त व्यापार मञ्चले व्यापार तथा लगानीका अवरोध हटाउन, बजार पहुँच विस्तार गर्न र दुवै सरकारलाई नीतिगत सुझाव दिन महत्त्वपूर्ण भूमिका निर्वाह गर्दै आएको उल्लेख गरे । नेपाली वस्तुको भारतीय बजारमा सहज पहुँचका लागि गैरभन्सार अवरोध हटाउने, भन्सार प्रक्रिया सरल बनाउने र सीमावर्ती पूर्वाधार सुधार गर्न आवश्यक रहेको उनको भनाइ छ । श्रेष्ठका अनुसार सन् २०२५ मा २ लाख ९२ हजार ४३८ भारतीय पर्यटक नेपाल आएका थिए, जुन नेपालको कुल पर्यटक आगमनको २५.२ प्रतिशत हो । यसले नेपालको पर्यटन क्षेत्रमा भारतीय बजारको महत्त्व र द्विपक्षीय सहकार्यको सम्भावना स्पष्ट पार्ने उनले बताए ।
चार दिन उपत्यकाको फोहर नउठ्ने
काठमाडौं । काठमाडौ उपत्यकाको फोहोर व्यवस्थापन प्रभावित हुने भएको छ । काठमाडौं महानगरपालिकाले आगामी १–४ कात्तिकसम्म उपत्यकाको फोहोर प्रभावित हुने जानकारी दिएको छ । महानगरका अनुसार फोहोर व्यवस्थापनस्थल बञ्चरेडाँडामा फोहोर व्यवस्थापन कार्य प्रभावित हुने भएपछि फोहोर नउठ्ने भएको हो । १ देखि ४ गते नेपालीहरूको महान् पर्व दसैँको मुख्य दिन परेकाले सफाइ कर्मचारीहरू पनि पर्व मनाउन जाने हुँदा फोहोर व्यवस्थापन प्रभावित हुने महानगरले जनाएको छ । चार दिनसम्म फोहोर नउठ्ने भएपछि महानगरले उत्पादन भएको फोहोरलाई कुहिने र नकुहिने वर्गमा वर्गीकरण गरी छुट्टाछुट्टै रूपमा राख्न आग्रह गरेका छन् ।
हाईलाइफले ३५० भन्दा बढीलाई दियो रोजगारी, नेपाली उत्पादन विदेशमा विस्तार
काठमाडौं । हाइलाइफ एग्रो एण्ड फुड्स इण्डष्ट्रिज लिमिटेडले नेपाली खाद्य उत्पादनको बजार अमेरिका, युरोप, अस्ट्रेलिया र जापानसम्म विस्तार गरेको छ । कम्पनीले दक्षिण कोरिया र संयुक्त अरब इमिरेट्स (यूएई) लगायतका मुलुकमा समेत आफ्ना उत्पादन पुर्याउँदै अन्तर्राष्ट्रिय बजार विस्तारलाई प्राथमिकता दिएको छ । कम्पनीको ११औँ वार्षिक साधारणसभा सम्पन्न भएको छ । साधारणसभामा अध्यक्ष अम्बिकाप्रसाद पौडेलले प्रस्तुत गरेको प्रतिवेदनअनुसार प्रतिकूल व्यावसायिक वातावरणका बाबजुद कम्पनीले आफ्नो बजार पहुँच कायम राख्दै दीर्घकालीन व्यावसायिक आधार बलियो बनाउने प्रयास गरेको छ । कम्पनीले ३५० भन्दा बढीलाई प्रत्यक्ष रोजगारीसमेत दिएको छ । अध्यक्ष पौडेलले ‘जहाँ नेपाली त्यहाँ नेपाली उत्पादन’ भन्ने नारासहित नेपाली उत्पादनलाई अन्तर्राष्ट्रिय बजारमा स्थापित गर्ने प्रयासले सकारात्मक गति लिएको बताए । उनका अनुसार निर्यातले कम्पनीको बजार विस्तार गर्नुका साथै विदेशी मुद्रा आर्जनमार्फत राष्ट्रिय अर्थतन्त्रमा योगदान पुर्याउँछ । यसले एउटै बजारमाथिको निर्भरता घटाउनसमेत सहयोग गर्छ । काठमाडौंको बुढानीलकण्ठस्थित होटल लेमन ट्री प्रिमियरमा सम्पन्न साधारणसभामा कम्पनीको आर्थिक वर्ष २०८२/८३ को कार्यसम्पादन, वित्तीय अवस्था र आगामी व्यावसायिक रणनीतिबारे छलफल भएको थियो । अध्यक्ष पौडेलले आर्थिक वर्ष २०८२/८३ मुलुक र विश्व अर्थतन्त्रका लागि उतारचढावपूर्ण रहेको उल्लेख गरे । भदौमा भएको जेनजी आन्दोलनले देशको सामाजिक, राजनीतिक तथा आर्थिक वातावरणमा प्रभाव पारेको र अन्तर्राष्ट्रिय स्तरमा बढेको भूराजनीतिक तनाव, विशेषगरी मध्यपूर्वको द्वन्द्वले ऊर्जा, ढुवानी, कच्चा पदार्थ र खाद्य आपूर्ति शृङ्खलामा दबाब सिर्जना गरेको उनको भनाइ छ । कम्पनीले स्वदेशी बजारमा स्थापित ‘हाईलाइफ’ ब्रान्डको पहिचानलाई अन्तर्राष्ट्रिय बजारसम्म पुर्याउने लक्ष्य लिएको छ । अमेरिका, जापान, अस्ट्रेलिया, युरोप, दक्षिण कोरिया र यूएईलगायतका बजारमा उत्पादन पुर्याउनुलाई कम्पनीले बजार विस्तारको महत्त्वपूर्ण उपलब्धिका रूपमा लिएको छ ।
खुलामञ्च मर्मत गर्न कांग्रेसले गर्यो सम्झौता, ४५ दिनभित्र हराभरा बनाइने
काठमाडौं । नेपाली कांग्रेसले १५औँ महाधिवेशनका क्रममा क्षति पुगेको काठमाडौंको खुलामञ्चलाई आफ्नै खर्चमा मर्मतसम्भार गरी पुरानै अवस्थामा फर्काउने भएको छ । त्यसका लागि कांग्रेसले ४५ दिनको समयसीमा निर्धारण गर्दै दुबो रोप्ने, सिँचाइ गर्ने र मैदानलाई पुनः हराभरा बनाउने योजना अघि सारेको छ । असोज १८ देखि २३ गतेसम्म खुलामञ्चमा आयोजित महाधिवेशनका क्रममा क्षति पुगेका संरचना तथा मैदानको मर्मतका लागि कांग्रेसले सेवा प्रदायक संस्था माउन्ट एभरेस्ट स्पोर्टस् एन्ड इभेन्ट्स प्रालिसँग सम्झौता गरेको हो । सम्झौताअनुसार खुलामञ्चको क्षतिग्रस्त भाग सम्याएर उच्च गुणस्तरको दुबो रोपिनेछ । रोपिएको दुबोको प्राविधिक निगरानीमा स्याहार, सिँचाइ तथा संरक्षणसमेत गरिनेछ । मर्मतसम्भारमा लाग्ने सम्पूर्ण खर्च कांग्रेसले नै बेहोर्ने सहमति भएको कार्यवाहक मुख्यसचिव कृष्णप्रसाद दुलालले जानकारी दिए । पुनःस्थापनाका लागि छुट्याइएको ४५ दिनमध्ये पहिलो १५ दिनमा दुबो रोप्ने काम सम्पन्न गरिनेछ । त्यसपछिका ३० दिन दुबो हुर्काउने, आवश्यक सिँचाइ गर्ने र मैदानलाई हराभरा बनाउने काममा खर्च गरिनेछ । सम्झौतापत्रमा कांग्रेस महाधिवेशनबाट वरिष्ठ उपसभापतिमा निर्वाचित विश्वप्रकाश शर्माको रोहवरमा कार्यवाहक मुख्यसचिव दुलाल र माउन्ट एभरेस्ट इभेन्ट्सका प्रतिनिधि थमन भुषालले हस्ताक्षर गरेका छन् । मर्मत तथा संरक्षण कार्यमा कांग्रेस केन्द्रीय कार्यालयले नेपाली कांग्रेस काठमाडौं महानगर समितिलाई स्वयंसेवक परिचालनको जिम्मेवारी दिएको छ । उक्त कार्यको संयोजन काठमाडौं महानगर समितिका सभापति इन्जिनियर सुसन वैद्यले गर्नेछन् । काम सम्पन्न भएपछि काठमाडौं महानगरपालिकाको मापदण्डअनुसार खुलामञ्चलाई पूर्ववत् अवस्थामा फर्काएर महानगरपालिकालाई हस्तान्तरण गरिने वैद्यले बताए ।
आरविवि मर्चेन्ट बैंकिङको ४ करोड नगद लाभांश प्रस्ताव पारित
काठमाडौं । राष्ट्रिय वाणिज्य बैंक लिमिटेडको शतप्रतिशत लगानीमा स्थापित आरविवि मर्चेन्ट बैंकिङ लिमिटेडले सेयरधनीलाई २० प्रतिशत नगद लाभांश वितरण गर्ने भएको छ । कम्पनीको एघारौं वार्षिक साधारण सभाले आर्थिक वर्ष २०८२/८३ को वितरणयोग्य मुनाफाबाट चुक्ता पुँजीको २० प्रतिशत अर्थात् करसहित ४ करोड रुपैयाँ नगद लाभांश वितरण गर्ने निर्णय गरेको हो । राष्ट्रिय वाणिज्य बैंकको केन्द्रीय कार्यालय सिंहदरबारस्थित सभाहलमा सम्पन्न साधारण सभामा कम्पनीका अध्यक्ष विनय रमण पौडेलले आर्थिक वर्ष २०८२/८३ को वार्षिक प्रतिवेदन प्रस्तुत गरेका थिए । प्रतिवेदनमाथि छलफलपछि सभाले लाभांश वितरणसम्बन्धी प्रस्ताव पारित गरेको हो । सभाले आर्थिक वर्ष २०८३/८४ का लागि बाह्य लेखापरीक्षक नियुक्त गर्ने र निजको पारिश्रमिक निर्धारण गर्ने निर्णयसमेत गरेको छ । साथै, कम्पनीका नवनियुक्त सञ्चालकहरूको नियुक्ति पनि अनुमोदन गरिएको छ । सभामा राष्ट्रिय वाणिज्य बैंकका उपकार्यकारी अधिकृत निम्बल श्रेष्ठले बैंकको शतप्रतिशत सेयर प्रतिनिधित्व गर्दै सहभागिता जनाएका थिए । कार्यक्रममा प्रमुख अतिथिका रूपमा राष्ट्रिय वाणिज्य बैंकका प्रमुख कार्यकारी अधिकृत देवेन्द्र रमण खनाल उपस्थित थिए । सभामा कम्पनी रजिस्ट्रारको कार्यालय, नेपाल स्टक एक्सचेन्ज (नेप्से), सीडीएस एन्ड क्लियरिङ लिमिटेडका प्रतिनिधि, बाह्य लेखापरीक्षक तथा आरविवि म्युचुअल फण्ड १ र २ का लेखापरीक्षकहरूको पनि उपस्थिति थियो । कम्पनीका प्रमुख कार्यकारी अधिकृत बद्रीप्रसाद प्याकुरेलका अनुसार आर्थिक वर्ष २०८२/८३ मा आरविवि म्युचुअल फण्ड १ ले २.७५ प्रतिशत र आरविवि म्युचुअल फण्ड २ ले ६ प्रतिशत नगद लाभांश वितरण गरेका छन् । सोही अवधिमा आरविवि मर्चेन्ट बैंकिङले २० प्रतिशत नगद लाभांश वितरण गर्ने निर्णय गरेको हो ।
पूर्वाधार मन्त्रालयद्वारा ३६ इन्जिनियरको सरुवा, कसले पाए नयाँ जिम्मेवारी ?
काठमाडौं । पूर्वाधार विकास मन्त्रालयले नेपाल इन्जिनियरिङ सेवाका ३६ जना इन्जिनियरको सरुवा, पदस्थापन तथा कामकाजको जिम्मेवारी हेरफेर गरेको छ । मन्त्रालयले २०८३ असोज २७ गते गरेको निर्णयअनुसार नेपाल इन्जिनियरिङ सेवा, सिभिल इन्जिनियरिङ समूह, जनरल उपसमूहका राजपत्राङ्कित द्वितीय र तृतीय श्रेणीका कर्मचारीको जिम्मेवारी परिवर्तन गरेको हो । निर्णयअनुसार स्थानीय पूर्वाधार विकास विभाग, विभिन्न पूर्वाधार विकास डिभिजन, पूर्वाधार सुपरिवेक्षण तथा अनुगमन कार्यालय र सडक सुधार आयोजनामा कार्यरत इन्जिनियरहरूको कार्यक्षेत्र फेरिएको छ । मन्त्रालयले केही वरिष्ठ डिभिजनल इन्जिनियरलाई विभिन्न पूर्वाधार विकास डिभिजनको प्रमुखका रूपमा खटाएको छ भने केही इन्जिनियरलाई निमित्त डिभिजन प्रमुखको जिम्मेवारी दिएको छ । सरुवा तथा पदस्थापनमार्फत मन्त्रालयले मातहतका कार्यालय र आयोजनामा प्राविधिक जनशक्तिको जिम्मेवारी पुनर्व्यवस्थित गरेको जनाएको छ । यस निर्णयबाट विभिन्न कार्यालय तथा आयोजनामा कार्यरत ३६ जना इन्जिनियरको कार्यक्षेत्र र जिम्मेवारीमा परिवर्तन भएको छ ।
