गौशालाको होटलबाट खैरो हेरोइनसहित दुई जना पक्राउ
काठमाडौं । काठमाडौंको गौशालाबाट खैरो हेरोइनसहित दुई जना पक्राउ परेका छन् । प्रहरीले बिहीबार राति पौने १२ बजे गौशालास्थित एक होटलबाट लागूऔषध र नगदसहित उनीहरूलाई नियन्त्रणमा लिएको हो । पक्राउ पर्नेहरूमा २६ वर्षीय माधव कुमार साह र ३२ वर्षीया मिना कुमारी अधिकारी रहेका छन् । उनीहरूको साथबाट ३०.४२ ग्राम खैरो हेरोइन बरामद गरिएको प्रहरीले जनाएको छ । काठमाडौं जिल्ला प्रहरी परिसरका प्रवक्ता एवं प्रहरी उपरीक्षक पवन कुमार भट्टराईका अनुसार प्रहरी प्रभाग कोटेश्वरबाट खटिएको विशेष टोलीले उनीहरूलाई पक्राउ गरेको हो । लागूऔषधका साथै उनीहरूको साथबाट नगद ५७ हजार रुपैयाँ समेत बरामद भएको छ । पक्राउ परेका दुवै जनालाई हिरासतमा राखी लागूऔषध नियन्त्रण ऐन अनुसार थप अनुसन्धान र कानुनी प्रक्रिया अगाडि बढाइएको प्रहरीले जानकारी दिएको छ ।
नयाँ वर्षदेखि काठमाडौंमा रात्रिकालीन बस सेवा सुरु हुँदै, २० मिनेटको अन्तरालमा पाइने
काठमाडौं । काठमाडौं उपत्यकामा आगामी नयाँ वर्ष अर्थात् २०८३ वैशाख १ गतेदेखि रात्रिकालीन बस सेवा सञ्चालनमा आउने भएको छ । साझा यातायातले काठमाडौं र ललितपुरका मुख्य रुटहरूमा रात्रिकालीन सेवा सञ्चालन गर्ने तयारी अन्तिम चरणमा पुर्याएको हो । सेवा सञ्चालनपूर्व साझा यातायातले रुटको अवस्था र समय तालिकाबारे अध्ययन (ट्रायल) समेत सम्पन्न गरिसकेको छ । अध्ययनअनुसार राति ८ बजे बुढानीलकण्ठबाट छुटेको बस १६ मिनेटमा महाराजगञ्ज र ४६ मिनेटमा लगनखेल पुगेको थियो भने थानकोटबाट छुटेको बस ४५ मिनेटमा विमानस्थल पुगेको थियो । बस सेवाहरु हरेक रुटका सुरु र अन्तिम विन्दुबाट गुड्नेछन् । अर्थात् दक्षिण रुटमा चल्ने एउटा सवारी साधन ललितपुरको लगनखेलबाट सुरु भएर पाटन अस्पताल, अल्का, नर्भिक, प्रसुति गृह, ट्रमा सेन्टर, वीर अस्पताल, कान्ति अस्पताल, टिचिङ् अस्पताल, गंगालाल हृदय केन्द्र हुँदै बुढानीलकण्ठसम्म पुग्नेछ । अर्को बस बुढानीलकण्ठबाट गंगालाल अस्पताल, महाराजगञ्ज चोक, पानीपोखरी, लाजिम्पाट, जमल,, थापाथली, पुल्चोक हुँदै लगनखेल पुग्नेछ । नयाँ सडक गेट अर्थात् एनएसी अगाडिबाट एउटा बस छुट्नेछ । यसरी ३ वटा विन्दुबाट बस गुडेपछि हरेक बस विसौनीमा २० मिनेटको अन्तरमा बस आइ पुग्नेछ । यो सडकको एकतर्फी दुरी १६ किलोमिटर हो । पूर्वपश्चिम रुटको दुरी २० किलोमिटर छ । यो रुटमा एउटा बस थानकोटदेखि सतुंगल, कलंकी, कालीमाटी, त्रिपुरेश्वर, सुन्धारा, नयाँ सडक, जमल, भद्रकाली, माइतीघर मण्डला, बानेश्वर, मीनभवन, तीनकुने हुँदै अन्तरराष्ट्रिय विमान स्थलका लागि छुट्नेछ । अर्को बस विमानस्थलबाट, तीनकुने, मीनभवन, नयाँ बानेश्वर, बबरमहल, थापाथली, त्रिपुरेश्वर, कालीमाटी, सोल्टीमोड, रविभवन, कलंकी हुँदै थानकोटतर्फ गुड्नेछ । नयाँ सडक गेट अगाडि अर्थात् एनएसीबाट एउटा बस थानकोटतर्फ र अर्को बस विमानस्थल तर्फ छुट्नेछ । यसरी ४ वटा विन्दुबाट ४ वटा बस छुटेपछि हरेक बस विसौनीमा हरेक २० मिनेटको अन्तरमा बस उपलब्ध हुनेछन् । यसरी बस सञ्चालन गर्दा नयाँ सडक गेट अगाडिको भाग मुख्य चोक बन्नेछ । यो ठाउँमा पुगेपछि यात्रीहरुले एउटा रुटबाट अर्को रुटमा जाने बस पाउनेछन् । रात्रिकालीन बस सेवा सञ्चालनका लागि बस गुड्ने क्षेत्रका नगर प्रमुखहरु र साझेदार कार्यालयका प्रमुख तथा प्रतिनिधि बिच बैठकमा साझा यातायातका सहायक प्रबन्धक जनक रिसालले प्रस्तुतिकरण मार्फत तयारीका क्रममा अभ्यासले देखाएको तथ्य र अवस्थाबारे जानकारी गराएको हो । बस सञ्चालनको प्रारम्भमा ७ वटा बसबाट सेवा सुरु हुनेछ । हरेक बस अगाडिको भाग देखिने एउटा, चालक देखिने एउटा र यात्रु देखिने २ वटा गरी ४ वटा सीसीटिभी क्यामराकबाट निगरानी हुनेछ । यो निगरानी नियन्त्रण कक्षबाट हेर्न सकिने भएकोले कसैले कुनै सामान छुटे प्राप्त गर्न सकिनेछ । कसैले दुव्र्यवहारको प्रयास गर्छ भने तत्काल नियन्त्रणमा लिन सकिनेछ । यात्रीहरुको सुरक्षाका लागि काठमाडौं महानगरपालिकाले हरेक बसका १ जना नगर प्रहरी खटाउनेछ । ‘यो सेवाका लागि नगर प्रमुखहरुका बिचमा सहकार्य र समन्वयका लागि बलियो प्रतिवद्धता छ । प्रारम्भमा ३ महिना सेवा सञ्चालन गरेपछि यसबाट प्राप्त अवस्थाको तथ्यका आधारमा थप निर्णय गर्नेछौं,’ बैठकमा कार्यवाहक प्रमुख डंगोलले भनिन्, ‘सेवालाई अत्याधुनिक, एकीकृत, सहज, सुरक्षित र भरपर्दो बनाउँदै लानेछौं । रात्रिकालीन बस नपाउँदा बस पाइएला कि नपाइएला भन्ने चिन्ताले श्रम तथा रोजगारी क्षेत्रका मानिसहरुको उत्पादनशीलता घटेको थियो । किशोरी र महिलालाई त बस नपाइएला भन्ने ठुलो चिन्ता हुन्थ्यो । साँझमा बस पाउने भएपछि ढुक्कसँग काम गर्न सकिन्छ । सुरक्षित भएर साँझमा घर फर्किन सकिन्छ ।’ यस्तै, ललितपुर महानगरपालिकाका प्रमुख महर्जनले भने, ‘महानगरपालिकाहरुमा पूर्वाधार विकासमा धेरै काम गर्न बाँकी नरहेकोले सुविधा वितरण र सहरी सौन्दर्यमा काम बढाउँदै लगेका छौं ।’ चन्द्रागिरि नगरपालिकाका प्रमुख गिरीले, ‘चन्द्रागिरी केवल कार चढेर भालेश्वर महादेव जाने आगन्तुक र त्रिभुवन पार्कमा वनभोजका लागि जानेहरुका लागि यो सेवाले महसुस हुने सेवा प्रदान गर्नेछ ।’ बैठकमा सुरक्षित यात्रा, गन्तव्य र बस पुग्ने समयका विषयमा जानकारी प्राप्त हुने प्रणाली, सहभागिता, नागरिकको बस सेवामा आकर्षण, सेवामा बसको संख्या र समय बढाउने, डिजिटल भुक्तानी प्रणालीलगायत विषयमा छलफल भएको थियो । यस्तै सेवा विस्तार गर्दा चक्रपथमा गाडी गुडाउन सकियो भने विमानस्थल र बसपार्क जोडिने विषयमा कुराकानी भएको थियो । काठमाडौं महानगरपालिकाका कार्यवाहक प्रमुख डंगोलको अध्यक्षतामा बसेको बैठकमा ललितपुर महानगरपालिकाका प्रमुख महर्जन, चन्द्रागिरी नगरपालिकाका प्रमुख धनश्याम गिरी, काठमाडौं महानगरपालिकाका प्रमुख प्रशासकीय अधिकृत सरोज गुरागाईँ, काठमाडौं उपत्यका प्रहरी कार्यालयका प्रहरी अतिरिक्त महानिरीक्षक ईश्वर कार्की, उपत्यका ट्राफिक प्रहरी कार्यालयका प्रहरी वरिष्ठ उपरीक्षक नवराज अधिकारी, साझा यातायात सञ्चालक समितिका अध्यक्ष शुशिल प्याकुरेलसहित पदाधिकारी सहभागी थिए । सार्वजनिक रुपमा सञ्चालन हुने बसले यात्रु कुर्ने प्रणालीले चाप बढाएको भन्दै अब बसले मान्छे होइन, मान्छेले बस कुर्नुपर्ने प्रणाली विकास गर्नुपर्नेमा अधिकारीहरुको साझा मत थियो ।
निषेधित क्षेत्रमा हेलिकप्टर उद्धार उडानको प्रक्रिया सहज, गृह मन्त्रालयको निर्णयलाई वायुसेवा संचालक संघद्वारा स्वागत
काठमाडौं । नेपालका निषेधित क्षेत्रहरूमा हेलिकप्टरमार्फत गरिने उद्धार उडानको प्रक्रियालाई सरकारले सहज बनाएको छ । लामो प्रशासनिक प्रक्रियाका कारण समयमा उद्धार हुन नसक्ने समस्यालाई सम्बोधन गर्दै गृह मन्त्रालयले उद्धार उडान अनुमति कार्यलाई छिटो-छरितो बनाउने निर्णय गरेको हो । वायुसेवा संचालक संघ नेपालले विगत लामो समयदेखि निषेधित क्षेत्रमा उडान गर्दा झेल्नुपर्ने झन्झटिलो कागजी प्रक्रियाका कारण स्वदेशी नागरिक र बिरामी पर्यटकहरूको ज्यान जोखिममा परेको भन्दै गृह मन्त्रालयको ध्यानाकर्षण गराउँदै आएको थियो । संघले चैत १७ गते गृहमन्त्रीलाई पत्र लेखी विद्यमान व्यवस्थामा सुधार गर्न माग गरेको थियो । सोही मागका आधारमा गृह मन्त्रालयमा भएको छलफलपछि 'निषेधित क्षेत्र हेलिकप्टर उडान सम्बन्धी कार्य प्रक्रिया २०७५' को बुँदा नम्बर ५ बमोजिम तत्काल उद्धार कार्य गरी मन्त्रालयलाई जानकारी गराउने गरी प्रक्रिया अगाडि बढाउन संघलाई पत्राचार गरिएको छ । यस निर्णयसँगै अब आकस्मिक अवस्थामा निषेधित क्षेत्रमा उडान गर्न अनुमति पर्खिरहनुपर्ने झन्झट हटेको छ । सरकारको यो कदमले विशेषगरी दुर्गम क्षेत्रका बिरामी र पर्यटकहरूको समयमै उद्धार गर्न ठूलो सहयोग पुग्ने विश्वास गरिएको छ । यसैबीच, वायुसेवा संचालक संघले बिहीबार एक विज्ञप्ति जारी गर्दै गृह मन्त्रालयको यो सकारात्मक पहलकदमीका लागि कृतज्ञता व्यक्त गरेको छ । प्रक्रियागत सरलीकरणले हवाई सेवा प्रदायकहरूलाई मानवीय सहायताका कार्यमा थप प्रभावकारी रूपमा खटिन मद्दत पुग्ने संघको भनाइ छ ।
नवनियुक्त दुई मन्त्रीद्वारा शपथ ग्रहण
काठमाडौं । नवनियुक्त दुई मन्त्रीहरूले पद तथा गोपनीयताको शपथ लिएका छन् । राष्ट्रपति निवास शीतलनिवासमा शुक्रबार आयोजित एक विशेष समारोहका बीच राष्ट्रपति रामचन्द्र पौडेलले नवनियुक्त मन्त्रीद्वय गौरीकुमारी यादव र रामजी यादवलाई शपथ गराएका हुन् । प्रधानमन्त्री बालेन्द्र शाह (बालेन) ले शुक्रबार नै उनीहरूलाई मन्त्री पदमा नियुक्त गरेका थिए । जसअनुसार रामजी यादवलाई श्रम, रोजगार तथा सामाजिक सुरक्षा मन्त्रालय र गौरीकुमारी यादवलाई उद्योग, वाणिज्य तथा आपूर्ति मन्त्रालयको जिम्मेवारी दिइएको छ । रामजी यादव सप्तरी क्षेत्र नम्बर २ बाट निर्वाचित सांसद हुन् भने गौरीकुमारी यादव महोत्तरी क्षेत्र नम्बर ४ बाट निर्वाचित सांसद हुन् ।
उपसभामुख रुबीकुमारी ठाकुरले लिइन् शपथ, पार्टीको जिम्मेवारीबाट अलग
काठमाडौं । नवनिर्वाचित प्रतिनिधिसभाकी उपसभामुख रुबीकुमारी ठाकुरले पद तथा गोपनियताको शपथ ग्रहण गरेकी छिन् । राष्ट्रपति कार्यालय शीतलनिवासमा आयोजित विशेष समारोहकाबीच ठाकुरलाई सभामुख डोल प्रसाद अर्यालले शपथ ग्रहण गराएका हुन् । शपथ ग्रहण समारोहमा उपराष्ट्रपति रामसहाय प्रसाद यादव, राष्ट्रिय सभाका अध्यक्ष नारायण दाहाल, प्रधानमन्त्री बालेन्द्र शाह (बालेन) लगायत उच्च पदस्थ व्यक्तित्वहरूको उपस्थिति रहेको थियो । शुक्रबार नै भएको निर्वाचनमा राष्ट्रिय प्रजातन्त्र पार्टी (राप्रपा) की उम्मेदवार सरस्वती लामालाई पराजित गर्दै रुबीकुमारी उपसभामुख पदमा निर्वाचित भएकी हुन् । उपसभामुखमा निर्वाचित भए लगत्तै रुबीकुमारीले आफ्नो दल श्रम संस्कृति पार्टीको सबै जिम्मेवारीबाट अलग भएको घोषणा गरेकी छन्। उनले शुक्रबार नै पार्टी अध्यक्ष हर्क साम्पाङलाई आफ्नो राजीनामा पत्र बुझाएकी छन् । राजीनामा पत्रमा उनले उपसभामुख जस्तो गरिमामय र तटस्थ पदको जिम्मेवारी सम्हाल्न लागेकाले संविधान र कानुनको मर्यादा राख्दै एक तटस्थ व्यक्तिको हैसियतले काम गर्न पार्टी परित्याग गरेको उल्लेख गरेकी छन् । अब उनले सभाको कामकारबाहीमा कुनै दल विशेषको पक्ष नलिई स्वतन्त्र भूमिका निर्वाह गर्नेछिन् ।
एआई प्रविधिबाट चितवनमा ७२ जना क्षयरोगी फेला
काठमाडौं । चितवनका विभिन्न पालिकामा गरिएको एआई एक्सरे क्याम्पबाट ७२ जनामा क्षयरोग पुष्टि भएको छ । जनस्वास्थ्य कार्यालय चितवनले भरतपुर महानगरपालिका, कालिका नगरपालिका, राप्ती नगरपालिका, माडी नगरपालिका र इच्छाकामना गाउँपालिकामा उक्त उपकरणको सहायताले क्षयरोगको पहिचान गरेको हो । कार्यालयका क्षयकुष्ठ अधिकृत जयराम दुवाडीले साउनयता एआई एक्सरे उपकरणको सहायताले चार हजार ७१ को परीक्षण गर्दा ७२ जनामा क्षयरोग पुष्टि भएको जानकारी दिए । ‘परीक्षण गरिएकामध्ये दुई सय नौ जनामा क्षयरोगको लक्ष्यण देखिएको थियो । लक्ष्यण देखिएकाको थप परीक्षण गर्दा ७२ जनामा सङ्क्रमण पुष्टि भएको हो’, उनले भने । भरतपुर महानगरपालिकामा १६, कालिका नगरपालिकामा १७, माडी नगरपालिकामा १६ र इच्छाकामना गाउँपालिकामा २३ जनामा यो रोगको सङ्क्रमण पुष्टि भएको क्षयकुष्ठ अधिकृत दुवाडीले जानकारी दिए । उक्त एक्सरे उपकरणमा एआई प्रविधिको जडान गरिनुका साथै उक्त उपकरणले बिरामीको अवस्थासहितको जानकारी दिने बताउँदै उनले उपकरणको सही प्रयोग गर्ने उद्देश्यले विशेषज्ञ चिकित्सकको सहायतामा क्षयरोग पहिचानसम्बन्धी शिविर सञ्चालन गरिएको उल्लेख गरे । क्षयकुष्ठ अधिकृत दुवाडीका अनुसार यो रोग माइक्रोब्याक्टेरियम ट्युबरकुलोसिस नामक व्याक्टेरियाको सङ्क्रमणका कारण हुन्छ । ‘रोग लागेको सुरुआती अवस्थामा थोरै काम गर्दा पनि थकान महसुस हुने र कमजोरी महसुस हुन थाल्छ । मानिसले यस्ता लक्ष्यणलाई गम्भीरतापूर्वक लिँदैनन् । विस्तारै क्षयरोगको व्याक्टेरियाले सङ्क्रमणको रूप लिई म्भीर समस्या निम्त्याउने गर्दछ’, उनले भने । रुघाखोकी लाग्नु, ज्वरो आउनु क्षयरोगको प्रारम्भिक लक्षण हो । सामान्यतया यस्ता समस्या पाँच दिनभित्रमा ठिक पनि हुन्छन् । तर, लगातार रुघाखोकी लागिरह्यो, ज्वरो कम भएन, दुई हप्तासम्म पनि खोकी रहिरह्यो भने तुरुन्तै चिकित्सककहाँ जानुपर्ने क्षयकुष्ठ अधिकृत दुवाडीले सुझाव दिए । यो रोग लागेमा सुर्ती मिसाएर बनेका कुनै पनि पदार्थ सेवन नगर्ने, सुरु गरेको भए तुरुन्तै छोड्नुपर्छ । अधिक मदिरा, लागुपदार्थ वा औषधि सेवन गर्न नहुने क्षयकुष्ठ अधिकृत दुवाडीले बताए । स्वास्थ्यकर्मीको परामर्श लिई नियमित रूपमा पूरा समय (छदेखि आठ महिना)सम्म निःशुल्क प्राप्त हुने औषधि सेवन गर्ने, औषधि सेवन गर्न सुरु गरेपछि स्वास्थ्यकर्मीको सल्लाहअनुसार समयसमयमा परीक्षण गर्नेलगायत कार्य गर्न आवश्यक रहेको उनले सुझाव दिए ।
बालेनको मन्त्रिपरिषदमा ३७.५ प्रतिशत महिला सहभागिता
काठमाडौं । प्रधानमन्त्री बालेन्द्र शाह नेतृत्वको सरकारले समावेशी शासनलाई केन्द्रमा राख्दै मन्त्रिपरिषदमा महिलाको सहभागिता करिब ४० प्रतिशत गराएको छ । कुल १६ सदस्यीय मन्त्रिपरिषदमा छ जना महिला मन्त्री नियुक्त भएका छन् । यसले ३७ दशमलव पाँच (करिब ४०) प्रतिशत प्रतिनिधित्व कायम गरेको छ । यो अनुपातले नेपालमा मन्त्रिपरिषद्स्तरमा महिला सहभागिताको नयाँ मानक स्थापित गरेको प्रधानमन्त्री शाहकी प्रेस तथा अनुसन्धानविज्ञ दीपा दाहालले बताइन् । ‘वर्तमान सरकार समावेशी र समतामूलक शासन प्रणालीमा विश्वास गर्छ । मन्त्रिपरिषदमा ३७ दशमलव पाँच प्रतिशत महिला मन्त्रीको उपस्थिति हुनुले हामीले भन्दै आएको रूपान्तरणकारी राजनीतिलाई व्यवहारमा उतारेको पुष्टि गर्छ,’ उनले भनिन् । अधिवक्ता तथा अधिकारकर्मीले पनि सरकारको यो कदमको प्रशंसा गरेका छन् । गत चैत १३ गते प्रधानमन्त्री शाह नेतृत्वको नयाँ सरकार गठन हुँदा कानुन, न्याय तथा संसदीय मामिलामन्त्रीमा सोविता गौतम, कृषि तथा पशुपन्छी विकासमन्त्रीमा गीता चौधरी, महिला बालबालिका तथा ज्येष्ठ नागरिकमन्त्रीमा सीता वादी, स्वास्थ्य तथा जनसङ्ख्यामन्त्रीमा निशा मेहेता नियुक्त भइन् । प्रधानमन्त्री शाहको सिफारिसमा राष्ट्रपति रामचन्द्र पौडेलले आजै उद्योग, वाणिज्य तथा आपूर्तिमन्त्रीमा गौरीकुमारी यादवलाई नियुक्त भइन् । नेपालको संविधानले राज्यका निकायमा कम्तीमा ३३ प्रतिशत महिला सहभागिता सुनिश्चित गरे पनि विगतका सरकारमा यो लक्ष्य प्रायः पूरा हुनसकेको थिएन । यसपटकको सरकारले उक्त संवैधानिक सीमालाई पार गर्दै करिब ४० प्रतिशत महिला सहभागिता पुर्याएको भन्दै अधिकारकर्मीले यसलाई सकारात्मक रूपमा लिनुपर्ने भन्दै समावेशी शासनतर्फ सकारात्मक कदमका रूपमा हेरिएको प्रतिक्रिया दिएका छन् । यस कदमले समावेशी लोकतन्त्रलाई मजबुत बनाउनका लागि महिलामैत्री नीति निर्माणमा सहयोग पुग्ने उनीहरूको बुझाइ छ । राष्ट्रिय मानवअधिकार आयोगकी पूर्वसदस्य मोहना अन्सारीले मन्त्रिपरिषद्मा महिलाको यस्तो उच्च सहभागिता मुलुकको इतिहासमा पहिलो भएको बताउँदै यसलाई महत्त्वपूर्ण र सकारात्मक उपलब्धिका रूपमा लिनुपर्नेमा जोड दिइन् । ‘सङ्ख्याका आधारमा मन्त्रिपरिषदमा यति धेरै महिला सहभागिता पहिलोपटक भएको हो,’ उनले भनिन्, ‘१६ सदस्यीय मन्त्रिपरिषदमा छ जना महिला सहभागी हुनु भनेको महिला नेतृत्वमा समावेशीतर्फ एक उदाहरणीय कदम हो । साथै आजै रुबी ठाकुरलाई उपसभामुखमा चयन गर्नु समावेशी एजेन्डाप्रति सरकारको संवेदनशीलताको बलियो सङ्केत हो ।’ वरिष्ठ अधिवक्ता मीरा ढुङ्गानाका अनुसार यो सहभागिता सन्तोषजनकमात्र नभई नीतिगत संवेदनशीलता बढाउने अवसर पनि हो । ‘महिलाको सहभागिताले महिलासम्बन्धी मुद्दामा संवेदनशील निर्णय लिन सहयोग पुग्नेछ’, उनले विश्वास व्यक्त गरिन् । उनले निकट भविष्यमा महिला सहभागिता ५० प्रतिशतसम्म पु¥याउनुपर्ने सुझाव पनि दिइन्। अधिवक्ता भावना दाहालले सङ्ख्यासँगै विविधता पनि महत्त्वपूर्ण हुने बताउँदै वर्तमान मन्त्रिपरिषद्ले सकारात्मक सन्देश दिएको धारणा राखिन् । ‘सङ्ख्यामात्र होइन, महिला नेतृत्वमा विविधता हुनु पनि सकारात्मक सङ्केत हो,’ उनले भनिन् ।
पाटनमा हत्या गरेर भागेका अभियुक्तलाई नियन्त्रणमा लिने महिला प्रहरी सम्मानित
काठमाडौं । ललितपुरको पाटनस्थित कृष्ण मन्दिर परिसरमा भएको हत्यामा संलग्न अभियुक्तलाई नियन्त्रणमा लिन सफल महिला प्रहरी सम्मानित भएकी छन् । जिल्ला प्रहरी परिसर ललितपुरका प्रमुख होविन्द्र बोगटी तथा घटनामा सक्रिय भूमिका निर्वाह गर्ने महिला प्रहरी शाहाना बोहरालाई नगदसहित पुरस्कृत गरिएको हो । उनीहरूले हतियारसहित भाग्दै गरेका अभियुक्तलाई पछ्याउँदै नियन्त्रणमा लिएका थिए । काठमाडौं उपत्यका प्रहरी कार्यालयका प्रमुख (प्रहरी अतिरिक्त महानिरीक्षक) ईश्वर कार्कीको उपस्थितिमा प्रदान गरिएको छ । प्रहरीका अनुसार बुधबार साँझ करिब ७ : ४० बजे भएको घटनामा सिर्जन नेम्बाङ र सुमीत नेम्बाङमाथि धारिलो हतियार प्रयोग गरी आक्रमण हुँदा ज्यान गएको थियो ।
