बाढी प्रभावित ५० बालबालिकाको पारिवारिक हेरचाह, ४०० परिवारलाई सहयोग गरिने
काठमाडौं । रसुवा, नुवाकोटलगायतका क्षेत्रमा आएको भोटेकोशी बाढीबाट अभिभावकको संरक्षण गुमाएका ५० बालबालिकालाई पारिवारिक वातावरणमा आधारित वैकल्पिक हेरचाह उपलब्ध गराइने भएको छ । बाढीबाट प्रभावित थप १०० बालबालिकालाई आफन्तको संरक्षणमा हुर्कन सहयोग गरिनेछ भने ४०० परिवारलाई शिक्षा, स्वास्थ्य, पोषण तथा जीविकोपार्जनमा सहयोग पु‍र्याइनेछ । जसका लागि लागि राष्ट्रिय बाल अधिकार परिषद् र एसओएस बालग्राम नेपालबीच पाँचवर्षे समझदारी भएको हो । बाढी प्रभावित बालबालिकाको तत्कालीन संरक्षणदेखि दीर्घकालीन हेरचाह र प्रभावित परिवारको सबलीकरणसम्मका कार्यक्रम सञ्चालन गर्ने गरी दुई संस्थाबीच सहकार्य भएको हो । समझदारीपत्रमा परिषद्का सदस्यसचिव दुर्गाप्रसाद चालिसे र एसओएस बालग्राम नेपालका राष्ट्रिय निर्देशक डा. गङ्गाबहादुर गुरुङले हस्ताक्षर गरेका छन् । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता बादीको उपस्थितिमा समझदारीपत्रमा हस्ताक्षर गरिएको हो । समझदारीअनुसार बाढीका कारण अभिभावकको हेरचाह तथा संरक्षण गुमाएका ५० बालबालिकाको व्यक्तिगत अवस्था मूल्याङ्कन गरिनेछ । त्यसपछि प्रत्येक बालबालिकाको सर्वोत्तम हित र निर्धारित सिफारिस प्रक्रियाका आधारमा एसओएस बालग्राम नेपालमा पारिवारिक वातावरणमा आधारित हेरचाहको व्यवस्था मिलाइनेछ । त्यस्तै, १०० जनासम्म बालबालिकालाई आफ्नै नातेदारको परिवारमा सुरक्षित रूपमा हुर्कन आवश्यक सहयोग उपलब्ध गराइनेछ । बालबालिकालाई सकेसम्म पारिवारिक वातावरणमै हुर्काउने र परिवारबाट अलग हुनुपर्ने जोखिम न्यूनीकरण गर्ने उद्देश्य समझदारीले लिएको छ । बाढीबाट प्रभावित ४०० परिवारलाई पनि आवश्यकताका आधारमा सहयोग गरिनेछ । उनीहरूको सुरक्षित बसोबास, बालबालिकाको शिक्षा, स्वास्थ्य, पोषण तथा परिवारको जीविकोपार्जनमा सहयोग पु‍र्याउनुका साथै सामाजिक सुरक्षा सेवामा पहुँच विस्तार गर्न सहकार्य गरिनेछ । प्रभावित प्रत्येक बालबालिकाको अवस्था र आवश्यकताअनुसार व्यक्तिगत दीर्घकालीन हेरचाह योजना तयार गरिनेछ । आवश्यकताका आधारमा परिवारको खोजतलास, पारिवारिक पुनर्मिलन र पुनःस्थापनालाई प्राथमिकता दिइनेछ । यसका साथै बालबालिकालाई मनोसामाजिक सहयोग उपलब्ध गराउने तथा उनीहरूको स्वास्थ्य, शिक्षा, सुरक्षा र हेरचाहको अवस्थाबारे नियमित अनुगमन गर्ने व्यवस्था पनि समझदारीमा समेटिएको छ । एसओएस बालग्राम नेपालका राष्ट्रिय निर्देशक डा। गुरुङले भोटेकोशी बाढीका कारण धेरै बालबालिकाले परिवार र अभिभावक गुमाएको तथा उनीहरूको पारिवारिक जीवनमा गम्भीर असर परेको बताए । उनले यस्तो अवस्थामा बालबालिकालाई सुरक्षित वातावरणमा हुर्कने अवसर प्रदान गर्न र उनीहरूका आधारभूत अधिकार सुनिश्चित गर्न समझदारी महत्त्वपूर्ण हुने विश्वास व्यक्त गरे । गुरुङका अनुसार साझेदारीमार्फत प्रभावित बालबालिकाको संरक्षण, परिवारको सबलीकरण र आवश्यकताअनुसार दीर्घकालीन हेरचाहका कार्यक्रम सञ्चालन गरिनेछन् । त्यस्तै, राष्ट्रिय बाल अधिकार परिषद्को नेतृत्वमा मुलुकको वैकल्पिक हेरचाह सेवाको गुणस्तर सुधार गर्ने, स्थानीय बाल संरक्षण प्रणालीलाई सुदृढ बनाउने र बालबालिका परिवारबाट अलग हुनुपर्ने जोखिम घटाउने कार्यक्रमसमेत सञ्चालन गरिने उनले बताए । समझदारीले स्थानीय तह तथा सम्बन्धित सरोकारवालासँगको समन्वयमा बाल संरक्षणसम्बन्धी आवश्यकता पहिचान, संरक्षणका लागि सिफारिस, घटना व्यवस्थापन तथा हेरचाहको अनुगमन प्रणालीलाई प्रभावकारी बनाउने लक्ष्य लिएको छ । बालबालिकासम्बन्धी ऐन, २०७५ र बालबालिकासम्बन्धी नियमावली, २०७८ लगायतका कानुनी व्यवस्थाअनुसार विशेष संरक्षण आवश्यक पर्ने तथा पारिवारिक वियोगको जोखिममा रहेका बालबालिकाको अधिकार सुनिश्चित गर्ने गरी कार्यक्रम सञ्चालन गरिनेछ । २०८३ असोज २९ गतेदेखि लागू हुने पाँचवर्षे समझदारीअन्तर्गत सञ्चालन हुने कार्यक्रमको संयुक्त अनुगमन र वार्षिक समीक्षा गरिनेछ । यसबाट सहकार्यका गतिविधिको प्रगति मूल्याङ्कन गर्दै आवश्यक सुधार गर्ने व्यवस्था मिलाइएको छ । एसओएस बालग्राम नेपाल अभिभावक गुमाएका वा अभिभावकीय संरक्षणबाट वञ्चित हुने जोखिममा रहेका बालबालिकाको संरक्षण तथा हेरचाहमा काम गर्दै आएको गैरनाफामूलक सामाजिक संस्था हो । सातै प्रदेशमा कार्यरत संस्थाले पारिवारिक वातावरणमा आधारित वैकल्पिक हेरचाह, नातागोता हेरचाह, युवा विकास, शिक्षा, तालिम तथा परिवार सबलीकरणका कार्यक्रम सञ्चालन गर्दै आएको छ ।
राजमार्गका होटललाई मूल्यसूची र बिल अनिवार्य, नियम मिचे कारबाही
काठमाडौं । वाणिज्य, आपूर्ति तथा उपभोक्ता संरक्षण विभागले देशभरका राजमार्ग तथा राजमार्ग आसपासमा सञ्चालित होटल, रेस्टुरेन्ट र खाजा घरलाई मूल्यसूची अनिवार्य रूपमा राख्न, ग्राहकलाई बिल उपलब्ध गराउन तथा खाद्य स्वच्छता र गुणस्तर कायम गर्न निर्देशन दिएको छ । विभागले सार्वजनिक सूचना जारी गर्दै उपभोक्ताबाट प्राप्त उजुरी तथा गुनासोप्रति गम्भीर ध्यानाकर्षण भएको जनाएको हो । उपभोक्ताको स्वास्थ्य, सुरक्षा र हित संरक्षणका लागि स्वच्छ, सुरक्षित तथा गुणस्तरीय खाना, खाजा र पेय पदार्थ बिक्री-वितरण गर्न सम्बन्धित व्यवसायीलाई विभागले निर्देशन दिएको हो । विभागका अनुसार होटल तथा रेस्टुरेन्टले ग्राहकले सहजै देख्न सक्ने स्थानमा मूल्यसूची राख्नुपर्नेछ । बिक्री गरिएका वस्तु तथा प्रदान गरिएका सेवाको वास्तविक मूल्य खुल्ने गरी ग्राहकलाई अनिवार्य रूपमा बिल वा बिजक दिनुपर्नेछ । त्यस्तै, खाद्यवस्तुको तयारी, भण्डारण तथा बिक्री-वितरणमा स्वच्छता र गुणस्तरसम्बन्धी मापदण्ड पालना गर्न, भान्सा, भोजन कक्ष, भाँडाकुँडा, खानेपानी र शौचालयमा सरसफाइ कायम राख्न तथा म्याद गुज्रिएका, दूषित र खान अयोग्य खाद्यवस्तु बिक्री नगर्न विभागले निर्देशन दिएको छ । विभागले उपभोक्तालाई मर्यादित, पारदर्शी र गुणस्तरीय सेवा प्रदान गर्न पनि व्यवसायीहरूलाई आग्रह गरेको छ । अनुगमनका क्रममा प्रचलित कानुन तथा उपभोक्ता हित संरक्षणसम्बन्धी व्यवस्थाको उल्लङ्घन भएको पाइएमा कानुनबमोजिम आवश्यक कारबाही गरिने विभागले जनाएको छ । विभागको यस कदमले राजमार्गमा यात्रा गर्ने उपभोक्तालाई स्वच्छ खाद्यवस्तु, उचित मूल्य र पारदर्शी सेवा उपलब्ध गराउन सहयोग पुग्ने अपेक्षा गरिएको छ ।
कांग्रेस सहमहामन्त्री खस आर्यमा मनोजमणि आचार्य विजयी
काठमाडौं । नेपाली कांग्रेसको १५औं महाधिवेशनबाट खस आर्यतर्फ केन्द्रीय सहमहामन्त्रीमा मनोजमणि आचार्य निर्वाचित भएका छन् । आचार्यले २ हजार ६४८ मत प्राप्त गर्दै निकटतम प्रतिस्पर्धी जगदीश्वर नरसिंह केसीलाई ४४९ मतको अन्तरले पराजित गरेका हुन् । सहमहामन्त्री पदको अन्तिम मतपरिणामअनुसार केसीले २ हजार १९९ मत प्राप्त गरेका छन् । त्यस्तै, अर्का उम्मेदवार दिनेश कोइरालाले १ हजार २४६ मत प्राप्त गर्दा शुभराम बस्नेतले ५३५ मत पाएका छन् । खस आर्यतर्फको सहमहामन्त्री पदमा चार जना उम्मेदवार प्रतिस्पर्धामा थिए । मतपरिणामअनुसार आचार्यले २ हजार ६४८ मतसहित पहिलो स्थान हासिल गर्दा केसी २ हजार १९९ मतसहित दोस्रो स्थानमा रहे । आचार्य र केसीबीचको मतान्तर ४४९ रहेको छ । त्यसैगरी, कोइरालाले १ हजार २४६ मत र बस्नेतले ५३५ मत प्राप्त गरेका छन् । कांग्रेसको नयाँ केन्द्रीय कार्यसमिति चयनका लागि भएको निर्वाचनबाट आचार्य खस आर्यतर्फ सहमहामन्त्रीमा निर्वाचित भएका हुन् ।
अमेरिकाको एक प्राथमिक विद्यालयमा अन्धाधुन्ध गोलीबारी, ३ बालबालिकासहित ४ जनाको मृत्यु
काठमाडौं । अमेरिकाको ओरेगन राज्यस्थित एक प्राथमिक विद्यालयमा भएको गोलीबारीमा ४ जनाको मृत्यु भएको छ । जसमध्ये तीन बालबालिका र एक शिक्षक रहेका छन् । घटनामा अन्य दुई जना गम्भीर घाइते भएका छन् । बिहीबार ओरेगनको बेन्ड सहरस्थित सिल्भर रेल प्राथमिक विद्यालयमा १६ वर्षीय किशोरले अन्धाधुन्ध गोली चलाएका हुन् । अन्तर्राष्ट्रिय समाचार संस्था एसोसिएटेड प्रेस (एपी)का अनुसार मृत्यु हुने बालबालिका पाँच, आठ र ११ वर्षका छन् । गोलीबारीमा घाइते सात वर्षीय बालक र ५४ वर्षीय शिक्षकलाई गम्भीर अवस्थामा अस्पताल भर्ना गरिएको छ । प्रहरीका अनुसार आक्रमणकारीले विद्यालयको बन्द ढोकामा गोली चलाएर भित्र प्रवेश गरेका थिए । घटनापछि आक्रमणकारीलाई पछ्याउँदै विद्यालयभित्र पुगेका एक स्थानीय व्यक्तिले गोली हानी उनको हत्या गरेका थिए । गोलीबारीको सूचना पाएलगत्तै प्रहरी घटनास्थल पुगेको थियो । घटनापछि विद्यालयका विद्यार्थीलाई सुरक्षित स्थानमा सारिएको छ । ओरेगनकी गभर्नर टिना कोटेकले घटनाप्रति गहिरो दुःख व्यक्त गरेकी छन् । आक्रमणको उद्देश्य र विद्यालयसँग आक्रमणकारीको सम्बन्धबारे अनुसन्धान भइरहेको प्रहरीले जनाएको छ ।
यस्तो छ आजको मौसम
काठमाडौं । हाल देशमा पश्चिमी वायुको आंशिक प्रभाव रहेको छ । आज र भोलि पश्चिमी न्यूनचापीय प्रणालीको आंशिक प्रभाव रहने सम्भावना रहेको जल तथा मौसम विज्ञान विभागले जनाएको छ । विभागका अनुसार हाल कर्णाली र सुदूरपश्चिम प्रदेशमा साधारणतया बादल, लुम्बिनी प्रदेश लगायत बाँकी प्रदेशको हिमाली र पहाडी भूभागमा आंशिक बादल लागेको छ भने बाँकी भूभागमा मौसम मुख्यतया सफा रहेको छ । आज दिउँसो देशका हिमाली भूभागमा साधारणतया बादल लाग्नेछ भने देशका पहाडी भूभागमा आंशिक बादल लाग्नेछ । बागमती, गण्डकी, लुम्बिनी र सुदूरपश्चिम प्रदेशको तराई भूभागमा आंशिक बादल तथा बाँकी तराई भूभागमा मौसम मख्यतया सफा रहने विभागले जनाएको छ । देशको हिमाली भूभागका थोरै स्थानमा, लुम्बिनी र गण्डकी प्रदेशका पहाडी भूभागका थोरै स्थानमा तथा बाँकी पहाडी भूभागका एक/दुई स्थानमा मेघ गर्जन चट्याङ्गसहित मध्यम सम्मको वर्षा/हिमपातको सम्भावना छ । आज राति देशको हिमाली भूभागमा साधारणतया बादल र पहाडी भूभागमा आंशिक बादल लाग्नेछ । तराई भूभागमा बिहानपख केही स्थानमा हुस्सु/कुहिरो लाग्नेछ । कोशी, गण्डकी, कर्णाली र सुदूरपश्चिम प्रदेशको हिमाली भूभागका एक/दुई स्थानमा तथा हल्का वर्षा/हिमपातको सम्भावना छ ।
यस्तो छ आजको विनिमयदर
काठमाडौं । नेपाल राष्ट्र बैंकले आजका लागि विदेशी मुद्राको विनिमयदर निर्धारण गरेको छ । राष्ट्र बैंकका अनुसार अमेरिकी डलर एकको खरिददर १५१ रुपैयाँ ८० पैसा र बिक्रीदर १५२ रुपैयाँ ४० पैसा निर्धारण गरिएको छ । युरोपियन युरो एकको खरिददर १७० रुपैयाँ २७ पैसा र बिक्रीदर १७० रुपैयाँ ९५ पैसा, युके पाउन्ड स्ट्रलिङ एकको खरिददर २०१ रुपैयाँ ३० पैसा र बिक्रीदर २०२ रुपैयाँ १० पैसा, स्वीस फ्र्याङ्क एकको खरिददर १८२ रुपैयाँ ९९ पैसा र बिक्रीदर १८३ रुपैयाँ ७१ पैसा कायम गरिएको छ । अष्ट्रेलियन डलर एकको खरिददर १०४ रुपैयाँ ९६ पैसा र बिक्रीदर १०५ रुपैयाँ ३८ पैसा, क्यानेडियन डलर एकको खरिददर १०६ रुपैयाँ ८८ पैसा र बिक्रीदर १०७ रुपैयाँ ३० पैसा, सिङ्गापुर डलर एकको खरिददर ११८ रुपैयाँ ३९ पैसा र बिक्रीदर ११८ रुपैयाँ ८५ पैसा तोकिएको छ । त्यसैगरी, जापानी येन १० को खरिददर नौ रुपैयाँ ६३ पैसा र बिक्रीदर नौ रुपैयाँ ६६ पैसा, चिनियाँ युआन एकको खरिददर २२ रुपैयाँ ६९ पैसा र बिक्रीदर २२ रुपैयाँ ७८ पैसा, साउदी अरेबियन रियाल एकको खरिददर ४० रुपैयाँ ४५ पैसा र बिक्रीदर ४० रुपैयाँ ६१ पैसा, कतारी रियाल एकको खरिददर ४१ रुपैयाँ ६४ पैसा र बिक्रीदर ४१ रुपैयाँ ८१ पैसा कायम भएको छ । केन्द्रीय बैंकका अनुसार थाई भाट एकको खरिददर चार रुपैयाँ ५३ पैसा र बिक्रीदर चार रुपैयाँ ५५ पैसा, युएई दिराम एकको खरिददर ४१ रुपैयाँ ३३ पैसा र बिक्रीदर ४१ रुपैयाँ ४९ पैसा, मलेसियन रिङ्गेट एकको खरिददर ३७ रुपैयाँ १८ पैसा र बिक्रीदर ३७ रुपैयाँ ३३ पैसा, साउथ कोरियन वन १०० को खरिददर ११ रुपैयाँ २९ पैसा र बिक्रीदर ११ रुपैयाँ ३३ पैसा, स्वीडिस क्रोनर एकको खरिददर १५ रुपैयाँ २२ पैसा र बिक्रीदर १५ रुपैयाँ २८ पैसा र डेनिस क्रोनर एकको खरिददर २२ रुपैयाँ ७८ पैसा र बिक्रीदर २२ रुपैयाँ ८७ पैसा तोकिएको छ । त्यस्तै, राष्ट्र बैंकले हङकङ डलर एकको खरिददर १९ रुपैयाँ ३४ पैसा र बिक्रीदर १९ रुपैयाँ ४२ पैसा, कुवेती दिनार एकको खरिददर ४९२ रुपैयाँ ६२ पैसा र बिक्रीदर ४९४ रुपैयाँ ५६ पैसा, बहराइन दिनार एकको खरिददर ४०१ रुपैयाँ ९६ पैसा बिक्रीदर ४०३ रुपैयाँ ५५ पैसा, ओमनी रियाल एकको खरिददर ३९४ रुपैयाँ २८ पैसा र बिक्रीदर ३९५ रुपैयाँ ८४ पैसा तोकेको छ । भारतीय रुपैयाँ एक सयको खरिददर १६० रुपैयाँ र बिक्रीदर १६० रुपैयाँ १५ पैसा तोकेको छ ।
कांग्रेसको पेशागत केन्द्रीय सदस्यमा केदार नरसिंह केसीलाई सर्वाधिक मत
काठमाडौं । नेपाली कांग्रेसको १५औं महाधिवेशनअन्तर्गत पेशागततर्फको केन्द्रीय सदस्य निर्वाचनमा डा. केदार नरसिंह केसी सर्वाधिक मतसहित विजयी भएका छन् । पेशागततर्फ पाँच केन्द्रीय सदस्य पदका लागि भएको निर्वाचनमा केसीले ३ हजार २५३ मत प्राप्त गर्दै पहिलो स्थान हासिल गरेका हुन् । अन्तिम मतपरिणामअनुसार प्रा. डा. जगदीशचन्द्र पोखरेल २ हजार ५७७ मतसहित दोस्रो स्थानमा निर्वाचित भएका छन् । त्यस्तै, अधिवक्ता सीताराम केसी १ हजार ५३६ मतसहित तेस्रो, डा. प्रदीप मिश्र १ हजार ४७८ मतसहित चौथो र केशव निरौला १ हजार २३२ मतसहित पाँचौं स्थानमा रहेर केन्द्रीय सदस्य निर्वाचित भएका छन् । निर्वाचनमा शिवशंकर रिजाल १२ मतले केन्द्रीय सदस्य बन्नबाट चुकेका छन् । उनले १ हजार २२० मत प्राप्त गरेका छन् । त्यस्तै, डा. नहकुल केसीले १ हजार १६६, भरतराज ढकालले १ हजार १४८, सीए पदम भण्डारीले १ हजार ११७, प्रकाश कटुवालले १ हजार ७७ र इन्जिनियर मनोज घिमिरेले १ हजार ५९ मत प्राप्त गरेका छन् । यसैगरी, इन्जिनियर धनेन्द्र केसीले ८७५, इन्जिनियर दीपेन्द्र क्षेत्रीले ८६८, गोपालप्रसाद पोखरेलले ५९४, काशीनाथ चुडालले ५७१, विज्ञान प्रसाईंले ४८१, लक्ष्मीकिशोर सुवेदीले ४७८, शमिरजंग शाहले ४५७ र धर्मानन्द जोशीले ४५४ मत प्राप्त गरेका छन् । सुवास अधिकारीले ४४६, विनोदकुमार यादवले ४२७, शिव लम्सालले ४२४, मोहन लम्सालले ४०६, ज्ञानिन्द्र झाले ३८६ र शत्रुघ्नप्रसाद गुप्ताले ३७४ मत प्राप्त गरेका छन् । त्यस्तै, इन्जिनियर सुदर्शन शर्माले ३४७, डा. विनायक पण्डितले ३२९, इन्जिनियर यमकृष्ण पौडेलले ३०५, डा. शिवचन्द्र शाहीले ३०१, हरिप्रसाद कार्कीले २७५, सुशीलप्रसाद फुँयालले १९० र विश्वदीप लामिछानेले १८६ मत प्राप्त गरेका छन् । महिलातर्फ सीता पोखरेल र बाला अधिकारी निर्वाचित पेशागततर्फ महिलाका लागि छुट्याइएका दुई केन्द्रीय सदस्य पदमा डा. सीता पोखरेल घिमिरे र बाला अधिकारी निर्वाचित भएका छन् । अन्तिम मतपरिणामअनुसार घिमिरेले २ हजार ६५० मत प्राप्त गर्दै पहिलो स्थान हासिल गरेकी छन् । अधिकारी २ हजार १९४ मतसहित दोस्रो स्थानमा निर्वाचित भएकी हुन् । प्रतिस्पर्धामा रहेकी इन्जिनियर मेली साह भने सात मतले पराजित भएकी छन् । उनले २ हजार १८७ मत प्राप्त गरेकी छन् । त्यस्तै, इन्जिनियर निर्मला लामाले २ हजार १४, रञ्जिता कार्कीले १ हजार ८३२ र सुधा रिजालले ७२८ मत प्राप्त गरेका छन् । यससँगै कांग्रेसको १५औं महाधिवेशनबाट पेशागततर्फ पाँच खुला र दुई महिला गरी सात जना केन्द्रीय सदस्य निर्वाचित भएका छन् ।
नबिल बैंकले ल्यायो ‘नबिल भर्चुअल क्रेडिट कार्ड’
काठमाडौं । नबिल बैंकले ग्राहकहरूको डिजिटल बैंकिङ अनुभवलाई थप सहज, सुरक्षित र आधुनिक बनाउने उद्देश्यले ‘नबिल भर्चुअल क्रेडिट कार्ड’सञ्चालनमा ल्याएको छ । बिहीबार (आज)देखि सुरु भएको भर्चुअल क्रेडिट कार्ड बैंकको एनबैंक एपमार्फत प्राप्त तथा प्रयोग गर्न सकिने बैंकले जनाएको छ । बैंकका अनुसार ग्राहकहरूले अब परम्परागत क्रेडिट कार्डसँग सम्बन्धित कागजी प्रक्रिया तथा अन्य औपचारिक झन्झटहरू पूरा गर्नुपर्ने आवश्यकता बिना नै एनबैंक एपको होमपेजमा रहेको ‘अपलाइ नाउ’ अप्सनमार्फत भर्चुअल क्रेडिट कार्डका लागि आवेदन दिन तथा प्राप्त गर्न सक्नेछन् । साथै दैनिक आवश्यक विभिन्न डिजिटल कारोबारहरूमा यसको प्रयोग गर्न सक्नेछन्। पूर्ण रूपमा डिजिटल स्वरूपमा उपलब्ध यो क्रेडिट कार्ड ग्राहकहरूलाई छिटो, सुरक्षित तथा झन्झटरहित रूपमा कर्जा सुविधा उपयोग गर्ने अवसर प्रदान गर्न डिजाइन गरिएको हो। यसमार्फत ग्राहकहरूले आफ्नो मोबाइल बैंकिङ एपबाटै क्रेडिट कार्ड प्राप्त गरी दैनिक कारोबारहरू सुरक्षित र सहज रूपमा गर्न सक्नेछन् । बैंकले आफ्नै डेटामा आधारित विश्लेषणात्मक प्रणालीमार्फत योग्य ग्राहकहरूलाई पूर्व–स्वीकृत गरिसकेको छ । योग्य ग्राहकहरूले एपको होमपेजमा स्वचालित रूपमा ‘अपलाइ नाउ’ अप्सन देख्न सक्नेछन् । भर्चुअल क्रेडिट कार्ड फोनपे मर्चेन्ट क्यूआरमार्फत गरिने क्यूआरमा आधारित भुक्तानीका लागि प्रयोग गर्न सकिनेछ । नबिल बैंकले ‘नबिल भर्चुअल क्रेडिट कार्ड’ नेपालको डिजिटल बैंकिङ यात्रामा एक महत्त्वपूर्ण उपलब्धिका रूपमा स्थापित हुने विश्वास लिएको छ । डिजिटल वित्तीय सेवाप्रतिको बढ्दो ग्राहक मागलाई मध्यनजर गर्दै विकास गरिएको यस कार्डले ग्राहकहरूलाई सुरक्षित, सरल तथा निर्वाध भुक्तानी अनुभव प्रदान गर्ने अपेक्षा गरिएको छ । यस कार्ड सञ्चालनका लागि नबिल बैंक लिमिटेड र फोनपे पेमेन्ट सर्भिस लिमिटेडबीच बुधबार एक समझदारीपत्रमा हस्ताक्षर भएको थियो । यस सहकार्यसँगै ग्राहकहरूले भर्चुअल क्रेडिट कार्डमार्फत फोनपे मर्चेन्ट क्यूआरमार्फत भुक्तानी स्वीकार गर्ने विभिन्न व्यापारिक प्रतिष्ठानहरूमा सुरक्षित, सहज तथा निर्बाध रूपमा कारोबार गर्न सक्ने बैंकले जनाएको छ ।
