हाजिरी जमानीमा छुटे बले
काठमाडौं । कलाकार सागर लम्साल ‘बले हाजिरी जमानीमा छुटेका छन् । अभद्र व्यवहार गरेको भन्ने जाहेरीको आधारमा पक्राउ परेका उनी शुक्रबार हाजिरी जमानीमा छुटेका हुन् । आवश्यक परेको बेला उपस्थित हुनेगरी हाजिरी जमानीमा बले छुटेको जिल्ला प्रहरी परिसर, काठमाडौंका एसपी पवनकुमार भट्टराईले जानकारी दिए । उनलाई परिवारको जिम्मामा छाडिएको हो । बले गत शनिबार बिहान पक्राउ परेका थिए । अमेरिकामा बस्दै आएकी एक युवतीले सामाजिक सञ्जालमार्फत उनीविरुद्ध बलात्कारको आरोप लगाएकी थिइन् । प्रहरीले उजुरी र उजुरीकर्ताबारे खुलाएको भने छैन । प्रहरीका अनुसार उनीविरुद्ध जबरजस्ती करणी कसुरमा कुनै जाहेरी भने नपरेको जनाएको छ । बले पक्राउ प्रकरण : आरोप बलात्कारको, अनुसन्धान अभद्र व्यवहारको
उपभोग्य वस्तुमा एमआरपी र लेबल अनिवार्य, नियम मिचे कारबाही हुने
काठमाडौं । बजारमा वस्तुको मूल्यमा पारदर्शिता कायम गर्न र उपभोक्ताको संवैधानिक अधिकार सुनिश्चित गर्न सरकारले नयाँ कडाइ गरेको छ । वाणिज्य, आपूर्ति तथा उपभोक्ता संरक्षण विभागले एक सूचना जारी गर्दै अबदेखि सबै उपभोग्य वस्तुमा अधिकतम खुद्रा मूल्य अर्थात् एमआरपी र स्पष्ट लेबल अनिवार्य हुनुपर्ने व्यवस्था गरेको हो । विभागले आयातकर्ता, उत्पादक, थोक तथा खुद्रा विक्रेताका लागि स्पष्ट जिम्मेवारी तोक्दै नियम उल्लंघन गरेमा कडा कानुनी कारबाही गरिने चेतावनी दिएको छ । विभागका अनुसार अब विदेशबाट ल्याइने सामानमा भन्सार बिन्दुमै आयातकर्ताको पूर्ण विवरण र एमआरपीसहितको लेबल लगाउनुपर्नेछ । यसको नियमनका लागि भन्सार विभागलाई विशेष आग्रह गरिएको छ । नेपालमै उत्पादित वस्तुहरूको हकमा प्याकेजिङकै क्रममा मूल्य, ब्याच नम्बर, तौल र म्याद सकिने मिति स्पष्ट देखिने गरी स्थायी लेबल लगाउनुपर्नेछ । विभागले थोक तथा खुद्रा विक्रेताहरूलाई लेबल र एमआरपी नभएका कुनै पनि सामान खरिद-बिक्री नगर्न निर्देशन दिएको छ । विक्रेताले कुनै पनि बहानामा एमआरपीभन्दा बढी मूल्य असुल गर्न पाउने छैनन् । साथै, विभागले आम उपभोक्तालाई पनि सचेत गराउँदै भनेको छ, ‘कुनै पनि वस्तु खरिद गर्नुअघि अनिवार्य रूपमा एमआरपी र उपभोग गरिसक्नुपर्ने म्याद लगायतका विवरणहरू हेरेर मात्र खरिद गर्ने बानी बसालौं । ’ बजार अनुगमनलाई देशभर प्रभावकारी बनाउन उपभोक्ता संरक्षण ऐन २०७५ को दफा ३२ बमोजिम सबै जिल्ला प्रशासन कार्यालय र स्थानीय तहलाई अधिकार प्रत्यायोजन गरिएको छ । अब स्थानीय तह र प्रशासनले निरीक्षण अधिकृत तोकेर आफ्नो क्षेत्रमा लेबल र मूल्यको नियमित अनुगमन गर्नुपर्नेछ । विभागले हाल आफ्ना अनुगमन टोलीहरू परिचालन गरी बजारमा एमआरपी कार्यान्वयनको अवस्थाबारे तीव्र निरीक्षण गरिरहेको जनाएको छ । नियमको बर्खिलाप गर्ने व्यवसायीलाई प्रचलित कानुन बमोजिम कडा कारबाही गरिने विभागको सूचनामा उल्लेख छ ।
सहकारीमा एउटै व्यक्तिको ४५ करोड बचत भेटिएपछि...
काठमाडौं । सहकारीका बचतकर्ताको विषय देशकै ठूलो बहसको मुद्दा बनेको छ । सहकारीमा समस्या सिर्जना भएर बचकर्ताले बचत फिर्ता नपाएको विषय सडकदेखि संसदसम्म प्राथमिकताका साथ उठान भइरहेको छ । बचतफिर्ताको माग गर्दै बचतकर्ताहरु लामो समयदेखि सडकमा विरोध गर्दै आइरहेका छन् । सरकारले पनि बचतकर्ताको बचत कसरी फिर्ता गर्ने भन्ने विषय टाउको दुखाइको रुपमा लिइरहेको छ । राष्ट्रिय स्वतन्त्र पार्टी (रास्वपा) ले फागुन २१ मा भएको प्रतिनिधिसभा निर्वाचनमार्फत करिब एक तिहाइ सिट प्राप्त गरेर सरकार गठन भइसकेको छ । प्रधानमन्त्री वालेन्द्र शाह (बालेन) नेतृत्वको सरकारले पनि बचतकर्ताको बचत फिर्ताको विषयलाई प्राथमिकता साथ काम गरिरहेको छ । वर्तमान वालेन्द्र शाह (बालेन) नेतृत्वको सरकारले शासकीय सुधार सम्बन्धि एक सय कार्यसूची सार्वजनिक गर्दै सहकारीका साना बचतकर्ताको बचत फिर्ताको प्रक्रिया १०० दिनभित्रै सुरु गर्ने घोषणा गरेको थियो । सोही घोषणा अनुसार अहिले भूमी व्यवस्था, सहकारी तथा गरिवी निवारण मन्त्रालय त्यसको प्रक्रिया तीव्ररुपमा अगाडि बढाएको हो । मन्त्रालयले सो प्रक्रिया अगाडि बढाउँदा मन्त्रालयमा एउटा सहकारीमा एउटै व्यक्तिले ठूलो परिमाणमा बचत राखेको भेटिएको छ । भूमी व्यवस्था, सहकारी तथा गरिवी निवारण मन्त्रालयका एक उच्च अधिकारीका अनुसार काठमाडौंको एउटा सहकारीमा एक जना बचतकर्ताले ४५ करोड रुपैयाँ बचत राखेको भेटिएको हो । ‘हामी सहकारीलाई स–साना बचतकर्ताको बचत राख्ने संस्थाको रुपमा बुझ्दै आएका छौं । तर, एकै व्यक्तिले एउटे सहकारीमा ४५ करोड रुपैयाँ बचत राखेको भेटियो, सो परिमाणको रकम कहाँबाट र कसरी आयो ? भन्नेबारे अनुसन्धान हुन जरुरी छ,’ ती अधिकारीले भने । उनले ती व्यक्तिको सम्पत्ति छानबिन गर्नुपर्ने आवाज मन्त्रालयमा उठेको पनि बताए । उनका अनुसार सहकारीका ऋणीले ऋण लिँदा राखेको धितो बैंकमा पनि राखेको हुँदा समस्या सिर्जना भएको सुनाए । उनले यसले गर्दा ऋणीको सम्पत्ति बिक्री गरेर बचतकर्ताको बचत फिर्ता गर्न समस्या भइरहेको बताए । ‘ऋणीले सहकारीमा मात्रै धितो राखेको भए सो धितोलाई बिक्री गरेर बचतकर्ताको बचत सहज रुपमा फिर्ता गर्न सकिन्थ्यो । तर, सोही धितो बैंकमा पनि राखेर ऋण लिएका उदाहरण धेरै छन्, यो समस्याको समाधान कसरी गर्ने भन्ने बारे छलफल गर्दैछौं,’ उनले भने ।
उपसभामुखमा रुबीकुमारी ठाकुर निर्वाचित
काठमाडौं । प्रतिनिधिसभाको उपसभामुखमा श्रम संस्कृति पार्टीकी सांसद रुबीकुमारी ठाकुर निर्वाचित भएकी छन्। शुक्रबार (आज) भएको निर्वाचनमा राष्ट्रिय प्रजातन्त्र पार्टी (राप्रपा)की सरस्वती लामालाई हराउँदै उनी उपसभामुखमा निर्वाचित भएकी हुन् । रुबीकुमारीले २१५ मत पाउँदा राप्रपाकी लामाले ५ मत मात्रै पाइन् । वर्तमान संसद्की सबैभन्दा कान्छी सदस्य रुबीकुमारीले २५ वर्षकै उमेरमा नेपालकै कम उमेरको उपसभामुख बनेर नयाँ इतिहास रचेकी छिन् । उनलाई श्रम संस्कृति पार्टीले मधेसी महिला कोटाबाट समानुपातिक सांसद बनाएको थियो ।
नागरिक एपमा अब एनओसी र लोकसेवाका परीक्षार्थीको प्रवेशपत्र पनि राखिने
काठमाडौं । सरकारले डिजिटल सुशासनलाई थप सुदृढ गर्ने लक्ष्यसहित नागरिकसँग प्रत्यक्ष रूपमा जोडिएका सेवालाई अनलाइन माध्यमबाट उपलब्ध गराउने अभियानलाई तीव्रता दिएको छ । सोही क्रममा अब निजामती कर्मचारीको व्यक्तिगत विवरण, लोकसेवा आयोगका परीक्षार्थीको प्रवेशपत्र तथा वैदेशिक अध्ययनका लागि आवश्यक ‘नो अब्जेक्सन सर्टिफिकेट’ (एनओसी) नागरिक एपबाट प्राप्त गर्न सकिने व्यवस्था अन्तिम चरणमा पुगेको छ । सूचना प्रविधि विभागका महानिर्देशक चन्द्र साहले हाल उक्त प्रणाली परीक्षणको चरणमा रहेको बताउँदै आगामी एक साताभित्र पूर्ण रूपमा कार्यान्वयनमा आइसक्ने जानकारी दिए । उनका अनुसार सञ्चार तथा सूचना प्रविधि मन्त्रालयको कार्ययोजनाअनुसार नागरिक एपमा थप सेवा उपलब्ध गराउने व्यवस्था मिलाउने तथा ४५ दिनभित्र सञ्चालनमा ल्याउने लक्ष्य राखिएको छ । सञ्चारमन्त्री डा. विक्रम तिमिल्सिनाले तोकिएको अवधिभन्दा अघि यी कामहरू सम्पन्न गर्न विभागलाई निर्देशन दिएका छन् । यस पहललाई अघि बढाउन उनले विशेष चासो देखाउँदै नागरिक एपमा थप सेवा एकीकृत गर्नसमेत निर्देशन दिएका हुन् । सोही निर्देशनअनुसार विभागले विभिन्न निकायसँग समन्वय गर्दै प्रणाली विकास तथा परिमार्जनको काम भइरहेको जनाएको छ । नेपाल इन्जिनियरिङ परिषद्सँग सम्झौता गरी परिषदबाट जारी हुने व्यावसायिक इन्जिनियर प्रमाणपत्र पनि नागरिक एपबाटै उपलब्ध हुने प्रक्रियासमेत अघि बढिसकेको विभागका महानिर्देशक साहले जानकारी दिए । नयाँ प्रणाली लागू भएपछि लोकसेवा आयोगका परीक्षार्थीका लागि आवश्यक प्रवेशपत्र, वैदेशिक अध्ययन स्वीकृतिपत्र तथा निजामती कर्मचारीले आफ्नो व्यक्तिगत विवरणहरू नागरिक एपबाटै डाउनलोड गर्न सक्नेछन् । यसका लागि हाल प्रणालीको परीक्षण जारी छ भने नयाँ संस्करण सार्वजनिक भएपछि उक्त सुविधासहितको नागरिक एप डाउनलोड गर्न सकिनेछ । सार्वजनिक सेवामा पारदर्शिता, सहजता र डिजिटल पहुँच विस्तार गर्ने लक्ष्यसहित मन्त्रिपरिषद्को बैठकबाट यही चैत १३ गते स्वीकृत ‘शासकीय सुधारसम्बन्धी एक सय कार्यसूची’ को बुँदा नम्बर ३५ मा पनि यो विषय उल्लेख छ। नागरिक एपमार्फत प्रहरी चारित्रिक प्रमाणपत्र (पुलिस क्लियरेन्स रिपोर्ट) डाउनलोड गर्न सकिने सुविधा भने हाल सञ्चालनमा आइसकेको छ । नयाँ सेवाहरू थपिएसँगै नागरिक एपलाई वन–स्टप डिजिटल सेवा प्लेटफर्म’ बनाउने सरकारको उद्देश्य अझ सशक्त हुने अपेक्षा गरिएको छ । डिजिटल माध्यमबाट सेवा उपलब्ध गराउने यस कदमले सेवाग्राहीलाई समय, लागत र प्रक्रियागत झन्झटबाट राहत दिने विश्वास गरिएको छ भने सरकारी सेवा प्रवाहलाई पनि थप पारदर्शी, प्रभावकारी र आधुनिक बनाउने दिशामा महत्त्वपूर्ण उपलब्धि मानिएको छ ।
साना उद्यमीको रोजाइ बन्दै इनड्राइभ.कुरियर्स
काठमाडौं । इनड्राइभल डेलिभरी सेवा इनड्राइभ.कुरियर्सप्रति उल्लेखनीय रूपमा माग बढेको जनाएको छ । विशेषगरी साना तथा मध्यम व्यवसायहरूले यस वृद्धिमा महत्त्वपूर्ण भूमिका खेलेको इन्ड्राइभले जनाएको छ । इनड्राइभ.कुरियर्स एक अन–डिमान्ड डेलिभरी सेवा हो, जसले व्यक्तिहरू र व्यवसायहरूलाई छिटो, भरपर्दो र पारदर्शी रूपमा सामान पठाउन कुरियर सेवासँग जोड्छ । यस सेवामार्फत ग्राहक र कुरियरबीच सिधै सहमतिमा उचित भाडा निर्धारण गरी शहरभित्र पार्सल पठाउन सकिन्छ । औसतमा, कुरियरहरू ५–६ मिनेटमै पिकअप स्थानमा पुग्छन् भने ४० सेकेन्डभन्दा कम समयमा अर्डर मिलान हुन्छ । औसत डेलिभरी दूरी करिब ६ किलोमिटर रहेको छ । इनड्राइभको तथ्यांकअनुसार सन् २०२५ को नेपाली नयाँ वर्षको अवधिमा डेलिभरी अर्डर संख्या अघिल्लो वर्षको तुलनामा २०० प्रतिशतभन्दा बढीले बढेको थियो । साथै कुल प्रयोगकर्ता संख्या र साना तथा मध्यम व्यवसाय साझेदारहरू, जसमा स्थानीय पसल, अनलाइन विक्रेता र घरबाट सञ्चालन हुने व्यवसायहरू समावेश छन्, दुवैमा उल्लेखनीय वृद्धि भएको देखिएको छ । अघिल्लो वर्षको तुलनामा सक्रिय व्यवसाय प्रयोगकर्ताको संख्या २.६ गुणाले बढेको छ, जसले साना व्यवसायहरूमा डेलिभरी सेवाको प्रयोग तीव्र रूपमा बढिरहेको देखाउँछ । अर्डर संख्यामा काठमाडौंले अग्रणी भूमिका खेलेको छ । साथै पोखरा र भरतपुरजस्ता सहरहरूमा पनि स्थिर विस्तार भइरहेको छ । इनड्राइभ.कुरियर्सले नेपालका साना व्यवसायहरूका लागि भरपर्दो डेलिभरी समाधानका रूपमा आफ्नो स्थान अझ सुदृढ बनाउँदै जाने प्रतिबद्धतासमेत व्यक्त गरेको छ ।
अब घरमै बसेर पेन्सन पाइने
काठमाडौं । सेवा निवृत्त कर्मचारीहरूलाई प्रदान गरिने पेन्सन सेवालाई थप प्रभावकारी र डिजिटलमैत्री बनाइएको छ । सरकारले सो सेवालाई थप सरल, सहज र नागरिकमैत्री बनाउने उद्देश्यले विकसित गरिएको ‘पेन्सन व्यवस्थापन सूचना प्रणाली’ शुक्रबार औपचारिक रूपमा शुभारम्भ गर्दै घरमै बसेर पेन्सन पाइने सुविधा गरेको हो । शुक्रबार आयोजित एक कार्यक्रममा अर्थमन्त्री डा. स्वर्णिम वाग्लेले उक्त प्रणालीको उद्घाटन गरे । महालेखा नियन्त्रक कार्यालय र मातहतका निकायहरूबाट प्रदान गरिँदै आएका सेवाहरूलाई प्रविधिमैत्री बनाउने लक्ष्यसहित यो प्रणाली विकास गरिएको हो । नयाँ प्रणालीमार्फत अब सेवा निवृत्त कर्मचारीहरू- निजामती, शिक्षक, नेपाली सेना तथा प्रहरीले घरमै बसेर अनलाइन माध्यमबाट पेन्सनसम्बन्धी सेवा लिन सक्ने भएका छन् । यसका लागि निवृत्तभरण व्यवस्थापन कार्यालयको वेबसाइटमा गई ‘हाम्रो सेवाहरू’ अन्तर्गत रहेको सम्बन्धित बटनमा क्लिक गर्नुपर्नेछ । साथै, सेवासम्बन्धी जिज्ञासा वा समस्या समाधानका लागि प्रणालीमै ‘भिडियो ट्युटोरियल’ समेत उपलब्ध गराइएको छ, जसले प्रयोगकर्तालाई सहजता प्रदान गर्ने विश्वास गरिएको छ । यस प्रणालीको कार्यान्वयनसँगै अब पेन्सन लिइरहेका कर्मचारीहरूले वार्षिक रूपमा बैंकमा उपस्थित भई प्रमाणीकरण गराउनु पर्ने झन्झट हटेको छ । त्यस्तै, पेन्सन खाता खोल्नका लागि निवृत्तभरण व्यवस्थापन कार्यालय धाउनुपर्ने बाध्यता पनि अन्त्य भएको छ । सरकारले यो प्रणालीबाट सेवा निवृत्त कर्मचारीहरूलाई थप सहज, मितव्ययी र प्रभावकारी रूपमा सेवा उपलब्ध हुने अपेक्षा गरेको छ ।
सिजीले गर्यो समिट होटलको शिलान्यास, दुई वर्षभित्रै सञ्चालनमा आउने
काठमाडौं । चौधरी ग्रुपअन्तर्गतको सीजी हस्पिटालिटीले गोर्खालाई अन्तर्राष्ट्रिय स्तरको लक्जरी पर्यटन गन्तव्यका रूपमा विकास गर्ने उद्देश्यसहित लक्जरी हेरिटेज ‘समिट होटल’ को बिहीबार शिलान्यास गरेको छ । काठमाडौंको ‘समिट होटल’बाट प्रेरित यस परियोजना आधुनिक सुविधा र नेपाली मौलिकता समेटिएको स्तरीय लक्जरी रिसोर्टका रूपमा विकास गरिने सीजी हस्पिटालिटीले जनाएको छ । सीजी हस्पिटालिटीका अनुसार सन् १९७८ मा स्थापित काठमाडौंको समिट होटलको विरासतलाई नयाँ स्वरूप दिँदै गोर्खामा निर्माण हुन लागेको यो परियोजनाले आधुनिक सुविधाहरूका साथै नेपाली मौलिकता प्रदान गर्नेछ । करिब ३० रोपनी क्षेत्रफलमा फैलिने यो परियोजना आगामी दुई वर्षभित्र सम्पन्न गर्ने लक्ष लिइएको छ । करिब ३० वटा लक्जरी कोठाहरू रहने यस होटलको रुम रेट करिब ५०० अमेरिकी डलर आसपास रहने छ । समिट होटलले नेपालभित्रका तथा विदेशबाट आउने पर्यटकलाई लक्षित गर्दै स्तरीय सेवा प्रदान गर्नेछ । सीजी हस्पिटालिटीका अनुसार यस परियोजनाको मुख्य उद्देश्य गोर्खालाई नेपालका प्रमुख लक्जरी पर्यटन गन्तव्यहरूको सर्किटमा जोड्नु हो । ऐतिहासिक तथा सांस्कृतिक दृष्टिले महत्त्वपूर्ण गोर्खा दरबार नजिकै निर्माण हुने यो परियोजनाले नेपालको इतिहास, मौलिकता र संस्कृतिलाई अन्तर्राष्ट्रिय स्तरमा प्रवर्द्धन गर्ने अपेक्षा गरिएको छ । गोर्खा त्यही स्थल हो जहाँबाट पृथ्वीनारायण शाहले नेपाल राज्यको एकीकरण गर्दै आधुनिक नेपालको निर्माण गरेका थिए । सीजी हस्पिटालिटी ग्लोबलका प्रबन्ध निर्देशक एवं कार्यकारी अधिकृत राहुल चौधरीले यो परियोजना नेपालको पर्यटन क्षेत्रमा चौधरी ग्रुपको निरन्तर विश्वास र प्रतिबद्धताको अर्को एउटा महत्त्वपूर्ण कदम रहेको बताए । समिट होटलले गोर्खा क्षेत्रमा रोजगारी सिर्जना, स्थानीय अर्थतन्त्र सुदृढीकरण तथा नयाँ लगानी आकर्षित गर्ने अपेक्षा गरिएको छ । यसले पर्यटनमार्फत क्षेत्रीय विकासलाई गति दिने विश्वाससमेत गरिएको छ । केही दिनअघि मात्रै चौधरी ग्रुपले विश्वप्रसिद्ध होटल म्यारियट इन्टरनेसनलसँगको साझेदारीमा प्रतिष्ठित लक्जरी ब्रान्ड ‘द रिट्ज–कार्लटन होटलको शिलान्यास काठमाडौंको प्रमुख पर्यटकीय केन्द्र ठमेलमा गरेको थियो । सीजी हस्पिटालिटी ग्लोबलले हाल प्रमुख अन्तर्राष्ट्रिय होटल ब्रान्डहरूसँग साझेदारी गर्दै आफ्नो विश्वव्यापी उपस्थितिलाई विस्तार गरिरहेको छ । हाल यसको पोर्टफोलियोमा १२ देशका १३० गन्तव्यमा २३० भन्दा बढी होटल तथा रिसोर्ट सञ्चालनमा रहेका छन्, जसमा १५ हजारभन्दा बढी रुम क्यापासिटी रहेको छ ।
