हेटौँडा–काठमाडौँ जोड्ने छोटो दूरीको सडकमा सवारी रोक
काठमाडौं । कुलेखानी जलाशयमा पानीको सतह बढ्दै गएपछि हेटौँडा–काठमाडौँ जोड्ने छोटो दूरीको भीमफेदी–देउराली–कुलेखानी सडकखण्डमा १२ घण्टा सवारी आवागमन बन्द गरिने भएको छ । जिल्ला प्रशासन कार्यालय मकवानपुरले बाढी तथा पहिरोको जोखिमलाई ध्यानमा राख्दै शनिबार साँझ ५ बजेदेखि आइतबार बिहान ५ बजेसम्म उक्त सडकखण्डमा सबै प्रकारका सवारीसाधन सञ्चालनमा रोक लगाएको हो । जिल्ला प्रशासन मकवानपुुरले जारी गरेको सूचनाअनुुार शनिबार साँझ ४ बजेसम्म कुलेखानी जलाशय (इन्द्रसरोवर) को जलसतह १ हजार ५२९ मिटर पुगेको छ । निरन्तर वर्षाका कारण जलाशयको सतह बढिरहेको र आज राति वा भोलिसम्म अप्रत्याशित भारी वर्षा भए जलाशयको सुरक्षा तथा जलसतह सन्तुलन कायम राख्न बाँधका मुख्य गेटहरू खोल्नुपर्ने अवस्था आउन सक्ने प्रशासनले जनाएको छ । प्रशासनले त्यस क्षेत्रका बासिन्दालाई उच्च सतर्कता अपनाउन आग्रह गरेको छ । प्रशासनले शनिबार रातिको समयमा नदी किनारमा नजान, सुरक्षित स्थानमा रहन तथा सम्भावित बाढी र पहिरोको जोखिमप्रति सचेत रहन अनुरोध गरेको छ । सम्भावित विपद्बाट मानवीय तथा भौतिक क्षति हुन नदिन यस्तो सतर्कता अपनाउन आग्रह गरिएको हो ।
मुस्ताङको होटलबाट जेनजी आन्दोलनमा फरार बलात्कारका दोषी पक्राउ
काठमाडौं । जेनजी आन्दोलनका क्रममा कास्की कारागारबाट फरार भएका जबरजस्ती करणी मुद्दाका दोषी ४८ वर्षीय नारायण घिमिरे १५ महिनापछि मुस्ताङबाट पक्राउ परेका छन् । लमजुङको मर्स्याङ्दीमा होटल सञ्चालन गर्दा आफ्नै होटलमा कार्यरत १६ वर्षीया नाबालिकामाथि बलात्कार गरेको अभियोगमा लमजुङ जिल्ला अदालतले उनलाई ११ वर्ष ८ महिना १ दिन कैद सजाय सुनाएको थियो । २०८२ साउनमा वर्षाका कारण लमजुङ कारागार भत्किएपछि उनलाई कास्की स्थानान्तरण गरिएको थियो । तर, भदौ २४ गतेको आन्दोलनका क्रममा कारागारमा अशान्त स्थिति सिर्जना भएपछि उनी फरार भएका थिए । भदौ २५ गते बेलहिया नाका हुँदै भारत पुगेका घिमिरेले मुम्बई र दिल्लीका होटलमा परिचय बदलेर काम गरेका थिए । दिल्लीमा भेटिएका साथीको सल्लाहमा उनी पुस महिनामा नेपाल फर्केर उपल्लो मुस्ताङ पुगेका थिए । वारागुङ मुक्तिक्षेत्र–२, चैलेस्थित ‘प्रमिसा होटल’ मा नौ महिना र पछि ‘लिवन रेस्टुरेन्ट’ मा पहिचान लुकाएर काम गरिरहेका थिए । नेपाल प्रहरी प्रदेश कार्यालय पोखराका एसएसपी श्यामकृष्ण अधिकारीको निर्देशनमा खटिएको विशेष टोलीले कात्तिक १३ गते उनलाई लिवन रेस्टुरेन्टबाट नियन्त्रणमा लिई कात्तिक १४ गते पुनः कास्की कारागार बुझाएको छ । कास्कीबाट भागेका ७५३ कैदीमध्ये ११ विदेशीसहित ११० जना अझै फरार रहेकाले प्रहरीले विशेष खोजी अभियान जारी राखेको छ ।
हिमालयन बुलियनको आउटलेट न्युरोडमा खुल्दै, आइतबारदेखि कारोबार सुरु हुने
काठमाडौं । चाँदीका बार तथा सिक्काको कारोबार गर्दै आएको हिमालयन बुलियन कम्पनीले काठमाडौंको न्युरोडमा नयाँ आउटलेट सञ्चालनमा ल्याउने भएको छ । कम्पनीले आगामी आइतबार कात्तिक १५ गते न्युरोड मलको पहिलो तलामा नयाँ आउटलेट उद्घाटन गर्ने तयारी गरेको हो । साढे दुई दशकभन्दा बढी समयदेखि शुद्ध चाँदीको कारोबार गर्दै आएको कम्पनीले हालसम्म ज्ञानेश्वरस्थित आउटलेटबाट मात्रै सेवा दिँदै आएको थियो । व्यवसाय विस्तारसँगै ग्राहकलाई थप सहज सेवा उपलब्ध गराउने उद्देश्यले न्युरोडमा आउटलेट सञ्चालन गर्न लागिएको कम्पनीका सञ्चालक भीष्म गौतमले जानकारी दिए । उनका अनुसार न्युरोड मलको पहिलो तलामा आउटलेट सञ्चालनका लागि आवश्यक तयारी पूरा भइसकेको छ। कम्पनीले आगामी दिनमा देशका अन्य प्रमुख सहरमा समेत आउटलेट विस्तार गर्ने योजना बनाएको छ। नयाँ आउटलेटबाट ग्राहकले चाँदीका बार तथा सिक्का प्रत्यक्ष अवलोकन गरेर खरिद गर्न सक्नेछन्। साथै, कम्पनीको मोबाइल एपमार्फत खरिद गरेको चाँदीसमेत उक्त आउटलेटबाट संकलन गर्न सकिनेछ। कम्पनीले चाँदीको कारोबारलाई सहज र पारदर्शी बनाउने उद्देश्यले घटस्थापनाको दिन आफ्नो मोबाइल एप ‘एचबीसी एप’ सार्वजनिक गरेको थियो। एपमार्फत ग्राहकले आफूअनुकूल चाँदीका सिक्का तथा बार खरिद गर्न सक्ने व्यवस्था गरिएको छ। एपमा खाता खोली ग्राहक पहिचान (केवाईसी) प्रक्रिया पूरा गरेपछि ग्राहकले दैनिक चाँदीको मूल्य हेर्न र खरिदको लक्ष्य निर्धारण गर्न सक्छन्। एपमार्फत १०, २०, ५० र १०० ग्रामका सिक्का तथा ५०० ग्राम वा सोभन्दा बढी तौलका चाँदीका बार खरिद गर्न सकिने कम्पनीले जनाएको छ। यसैगरी, कम्पनीले एप प्रयोगकर्तालाई १० लाख रुपैयाँसम्मको व्यक्तिगत दुर्घटना बीमा सुविधा उपलब्ध गराउने घोषणा गरेको छ। सगरमाथा लुम्बिनी इन्स्योरेन्स कम्पनी (सलिको) र हिमालयन बुलियनबीचको सहकार्यमा उपलब्ध हुने उक्त सुविधा बीमालेखका सर्त तथा प्रावधानअनुसार लागू हुनेछ। कम्पनीका अनुसार एपमार्फत चाँदी खरिद गरेको पटकका आधारमा ग्राहकलाई स्ट्यान्डर्ड, गोल्डेन र प्लाटिनम गरी तीन श्रेणीमा वर्गीकरण गरिएको छ। जसअनुसार स्ट्यान्डर्ड ग्राहकले एक लाख, गोल्डेन ग्राहकले पाँच लाख र प्लाटिनम ग्राहकले १० लाख रुपैयाँसम्मको दुर्घटना बीमा सुविधा पाउनेछन्। एचबीसी एप भौतिक चाँदी खरिद गर्ने माध्यम रहेको कम्पनीले स्पष्ट पारेको छ। एपमार्फत बुक गरेको चाँदीको सम्पूर्ण रकम भुक्तानी गरेपछि ग्राहकले कम्पनीको आउटलेटबाट संकलन गर्न सक्नेछन्। कम्पनीका अनुसार खरिद गरेको चाँदी तीन दिनपछि कम्पनीले प्रकाशित गरेको पुनः खरिद मूल्यमा हिमालयन बुलियनलाई नै बिक्री गर्न सकिनेछ। कम्पनीबाट उत्पादित चाँदीका सिक्का तथा बार प्रमाणिकताको प्रमाणपत्र र बिलसहित उपलब्ध हुनेछन्। ती उत्पादनमा ९९.९९ प्रतिशत शुद्धता रहेको कम्पनीको दाबी छ। कम्पनीले चाँदीका उत्पादन तयार गर्न दुबई र हङकङबाट चाँदीका ग्रान्युल्स आयात गर्दै आएको जनाएको छ।
दाङका ८ भूमिहिन परिवारले पाए लालपुर्जा
काठमाडौं । जिल्ला भूमि समस्या समाधान समिति दाङले ८ भूमिहिन परिवारलाई लालपुर्जा वितरण गरेको छ। समितिका अनुसार साविकको गोवरडिया गाविस वडा नं ६ ख (हाल गढवा ३) का ५ जना, साविक सोनपुर लमही नगरपालिका ३० का २ जना र साविक लालमाटियाका १ जना भूमिहिन दलित परिवारलाई जग्गाधनी पुर्जा वितरण गरेको हो। लामो समयदेखि आफ्नो नाममा जग्गाको स्वामित्व नपाएका स्थानीयले जग्गाधनी पुर्जा प्राप्त गरेसँगै उनीहरू कानुनी रूपमा जग्गाधनी बनेका छन्। सरकारले भूमिहीन दलित, भूमिहीन सुकुम्बासी तथा अव्यवस्थित बसोबासीको समस्या समाधानलाई उच्च प्राथमिकतामा राखेको छ। भूमिहीन दलित, भूमिहीन सुकुम्बासी र अव्यवस्थित बसोबासीको समस्या दीर्घकालीन रूपमा समाधान गर्दै उनीहरूलाई कानुनी रूपमा जग्गाधनी बनाउने सरकारको लक्ष्यअनुसार लालपुर्जा वितरणलाई थप प्रभावकारी रूपमा अघि बढाइएको हो।
नेपाललाई मेडिकल हब बनाउने सरकारको तयारी, कार्यदल गठन गर्ने निर्णय
सरकारले नेपाललाई क्षेत्रीय ‘मेडिकल हब’ का रूपमा विकास गर्ने उद्देश्यसहित चिकित्सा सेवा पर्यटन (मेडिकल सर्भिस टुरिजम) प्रवद्र्धनका लागि कार्यदल गठन गर्ने निर्णय गरेको छ । प्रधानमन्त्री तथा मन्त्रिपरिषद्को कार्यालयमा बिहीबार बसेको बैठकले चिकित्सा सेवा पर्यटनको विकास र प्रवद्र्धनका लागि कार्यदल गठन गरी चाँडै काम अघि बढाउने निर्णय गरेको हो । प्रधानमन्त्री वालेन्द्र शाहका स्वास्थ्य सल्लाहकार जगदीशप्रसाद अग्रवालको अध्यक्षतामा बसेको बैठकमा सम्बन्धित मन्त्रालयका सचिवहरू तथा निजी अस्पतालका सञ्चालक र प्रतिनिधिहरूको सहभागिता थियो । बैठकमा गुणस्तरीय र सुलभ उपचार सेवा लिन नेपाल आउने विदेशी बिरामीका लागि चिकित्सा सेवा पर्यटनलाई व्यवस्थित बनाउने विषयमा छलफल भएको थियो । यसका लागि आवश्यक नियमनकारी संरचना निर्माण गर्ने, अस्पतालको गुणस्तर र बिरामी सुरक्षाको मापदण्ड तय गर्ने, तथा विदेशी बिरामी र उनका सहयोगीका लागि मेडिकल भिसाको व्यवस्था गर्ने विषयमा समेत छलफल भएको थियो । चिकित्सा सेवा पर्यटनको विकासले विदेशी मुद्रा आर्जनमा मात्र होइन, नेपाली नागरिकलाई उपचारका लागि विदेश जानुपर्ने बाध्यता घटाउन र देशभित्रै विशेषज्ञ सेवा सुदृढ गर्न पनि सहयोग पुग्ने छ । नेपाललाई चिकित्सा सेवा पर्यटनको भरपर्दो गन्तव्यका रूपमा स्थापित गर्न सरकारले आवश्यक नीतिगत तथा संस्थागत सुधारलाई प्राथमिकतामा राखेको छ ।
२५ हजार रुपैयाँका नक्कली नोटसहित दुई जना प्रहरी नियन्त्रणमा
काठमाडौं । सिरहा प्रहरीले नक्कली नेपाली नोटजस्तो देखिने २५ हजार ५०० रुपैयाँसहित दुई जनालाई पक्राउ गरेको छ। जिल्ला प्रहरी कार्यालय सिरहाका अनुसार शनिबार राति करिब ११ बजे सिरहा नगरपालिका–७ स्थित महावीर चोकदेखि शिव चोक जाने हुलाकी सडकखण्डमा शंकास्पद रूपमा हिँडिरहेका दुई जनालाई चेकजाँच गर्दा उक्त रकम फेला परेको हो । पक्राउ पर्नेमा कल्याणपुर नगरपालिका–८ निवासी ३५ वर्षीय मोहम्मद मुस्तुफा हुसेन र ३२ वर्षीय समिर मियाँ रहेका छन् । प्रहरीका अनुसार उनीहरूको साथबाट ५०० रुपैयाँ दरका तीन थान र एक हजार रुपैयाँ दरका २४ थान गरी कुल २५ हजार ५०० रुपैयाँ बराबरका नक्कली नोटजस्तो देखिने रकम बरामद भएको छ । बरामद रकमसहित दुवै जनालाई नियन्त्रणमा लिएर जिल्ला प्रहरी कार्यालय सिरहामा राखिएको छ । घटनाबारे थप अनुसन्धान भइरहेको प्रहरीले जनाएको छ ।
रास्वपा सांसद बास्कोटाले उद्घाटन गर्ने अस्पतालमा गोली चल्दा पासवान घाइते
काठमाडौं । बाराको अस्पताल उद्घाटनको विषयमा विवादले उग्र रुप लिएपछि गोली चलेको छ। फेटा गाउँपालिका–३ मा अस्पताल उद्घाटनको क्रममा विवाद बढेपछि गोली लागेर १५ वर्षीय किशोर आदित्य पासवान घाइते भएका छन् । उनको वीरगञ्जस्थित नेशनल मेडिकल कलेज शिक्षण अस्पतालमा उपचार भइरहेको छ । उनको अवस्था स्थिर रहेको छ । झडपका क्रममा करिब १० वटा मोटरसाइकलमा आगजनी भएको छ । नेपाल प्रहरीका दुई जना कर्मचारीसहित दुवै पक्षका केही व्यक्ति घाइते भएका छन्। बाराका प्रमुख जिल्ला अधिकारी खडानन्द अधिकारीका अनुसार गाउँपालिका–३ मा नगर अस्पताल उद्घाटन गर्ने कार्यक्रम तय गरिएको थियो । गाउँपालिका अध्यक्षले आयोजना गरेको उक्त कार्यक्रममा प्रतिनिधिसभा सदस्य समीक्षा बास्कोटासमेत सहभागी हुने कार्यक्रम थियो। तर, अस्पताल उद्घाटन गर्ने विषयलाई लिएर स्थानीयस्तरमा पहिलेदेखि नै असन्तुष्टि रहँदै आएको थियो। गाउँपालिकाले भवन निर्माण गरे पनि लामो समयसम्म सेवा सञ्चालन नगरेको भन्दै असन्तुष्ट पक्षले विरोध गर्दै आएको थिए । उद्घाटन कार्यक्रम नगर्न स्थानीयस्तरबाट सुझावसमेत आएको थियो। विरोध हुन सक्ने सूचना पाएपछि प्रमुख जिल्ला अधिकारी अधिकारीले गाउँपालिका अध्यक्षलाई कार्यक्रम नगर्न सुझाव दिएका थिए। तर, अध्यक्षले कार्यक्रम अघि बढाउने अडान लिएपछि सम्भावित सुरक्षा चुनौतीलाई ध्यानमा राख्दै प्रहरीसमेत परिचालन गरिएको थियो। बिहान करिब ९ बजे विरोधमा उत्रिएको समूह गाउँपालिका परिसरमा प्रवेश गरेको थियो। तोडफोड र आगजनी हुन थालेपछि अवस्था तनावपूर्ण बनेको अधिकारीले जानकारी दिए। सुरुमा कार्यक्रमस्थल बाहिरै विरोध गर्ने भनिएको भए पनि विवादले राजनीतिक रूप लिँदै उग्रता पाएको प्रमुख जिल्ला अधिकारी उनको भनाइ छ । उनले विरोधमा विभिन्न राजनीतिक दलसँग आबद्ध व्यक्तिहरूको समेत सहभागिता रहेको प्रारम्भिक जानकारी आएको बताए। गाउँपालिका अध्यक्ष र विरोधमा उत्रिएको पक्षबीचको राजनीतिक तथा स्थानीय असन्तुष्टिले घटनालाई थप जटिल बनाएको देखिएको छ। झडपका क्रममा करिब १० वटा मोटरसाइकलमा आगजनी भएको प्रमुख जिल्ला अधिकारी अधिकारीले जानकारी दिए। घटनामा नेपाल प्रहरीका दुई जना कर्मचारी घाइते भएका छन् भने विरोधमा संलग्न पक्षका दुईदेखि तीन जना सामान्य घाइते भएका छन्। गोली कसरी र कुन परिस्थितिमा चल्यो भन्ने विषयमा भने प्रहरीले थप अनुसन्धान गर्नुपर्ने अवस्था रहेको प्रमुख जिल्ला अधिकारी अधिकारीले बताए । घटनापछि स्थानीय क्षेत्रमा हालसम्म कर्फ्यु जारी नगरिएको अधिकारीले स्पष्ट पारे। सुरक्षा निकायले अवस्थाको विश्लेषण गरिरहेको र अहिले स्थिति सामान्य बन्दै गएको उनको भनाइ छ।
नर खोला हाइड्रोको रेटिङ पुनः पुष्टि, ९.६३ अर्बको ऋण सुविधालाई ‘डबल बी माइनस’
काठमाडौं । केयर रेटिंग्स नेपालले नर खोला जलविद्युत आयोजनाको दिर्घकालिन बैंक सुविधाको रेटिङलाई पुनः पुष्टि गरेको छ । केयर रेटिङले ९ अर्ब ६३ करोड रुपैयाँ बराबरको बैंक सुविधाको रेटिङलाई ‘केयर–एनपी डबल बी माइनस’ पुनः पुष्टि गरेको छ । कम्पनीले मनाङ जिल्लामा ६१.११ मेगावाट क्षमताको नर खोला पीआरओआर जलविद्युत आयोजना निर्माण गरिरहेको छ । यस आयोजनाको कुल अनुमानित लागत १२ अबृ ८४ करोड रुपैयाँ रहेको छ । यसलाई ७५ः२५ को ऋण–इक्विटी अनुपातमा वित्तपोषण गर्ने प्रस्ताव गरिएको छ । उत्पादित विद्युत आयोजनास्थलबाट ६ किलोमिटर लामो प्रसारण लाइन निर्माण गरी मनाङ जिल्लामै निर्माणाधीन २२०/१३२ केभी धारापानी सबस्टेशनमा जोडिनेछ । सन् २०२६ को सेप्टेम्बरको मध्यसम्ममा कम्पनीको वित्तीय प्रगति १४ प्रतिशत पुगेको छ । आयोजना सन् २०२८ जुनमा व्यवसायिक रुपमा सञ्चालनमा ल्याउने तयारी छ । रेटिङ एजेन्सीका अनुसार आयोजना सुरुवाती चरणमा रहेको हुनाले लागत र समय बढ्ने अनुमान छ । जोखिम, भौगोलिक अनिश्चितता, विद्युत निकासीसम्बन्धी जोखिम, नदीको बहावमा आधारित ( उत्पादन प्रणालीका कारण आउने जलविज्ञानसम्बन्धी जोखिम, प्राकृतिक प्रकोपको सम्भावना तथा ब्याजदरको उतारचढाव जस्ता कमजोर पक्षहरु प्रमुख चुनौतीका रुपमा औंल्याएका छन् । यद्यपि, हाइड्रोपावर तथा निर्माण क्षेत्रमा दुई दशकभन्दा बढीको अनुभव भएका अनुभवी प्रवद्र्धक तथा व्यवस्थापन टोलीको संलग्नता यस आयोजनाको सबल पक्ष रहेको छ । यसबाहेक, नेपाल विद्युत प्राधिकरसँग ३० वर्षका लागि विद्युत खरिद सम्झौता भइसकेको हुनाले अफटेक जोखिम न्यून रहेको छ । नेपाल सरकारको अनुकुल ऊर्जा नीति, कर छुटका सुविधाहरू तथा ऊर्जा क्षेत्रमा लगानी गर्न बैंक तथा वित्तीय संस्थाहरूलाई नेपाल राष्ट्र बैंकको निर्देशन जस्ता पक्षहरूले यस परियोजनालाई दीर्घकालीन रूपमा सहयोग पुग्ने देखिन्छ ।
