‘रोड टु यूएफसी’को फाइनलमा रविन्द्र ढाँट
काठमाडौं । नेपाली एमएमए फाइटर रवीन्द्र ढाँट ‘रोड टु यूएफसी सिजन–५’ को फाइनलमा पुगेका छन् । चीनको सांघाईमा भएको प्रतिस्पर्धामा न्युजिल्यान्डका कासिब मर्डोकलाई पराजित गर्दै उनी फाइनल प्रवेश गरेका हुन् । तीन राउण्डको खेलमा स्प्लिट डिसिजनको आधारमा ढाँट विजयी भएका हुन् । उनले अब फाइनलमा र्यो ताजिमासँग खेल्नेछन् । ताजिमाले सेमिफाइनलमा भारतका चुङग्रेन कोरेनलाई पराजित गर्दै ढाँटसँगकाे भेट पक्का गरेका हुन् । फाइनल जितेमा ढाँट युएफसीका लागि छनोट हुनेछन् । ढाँटले मकाउमा फिलिपिन्सका किम्बर्ट अलिन्टोजोनलाई दोस्रो राउन्डमै टीकेओ (टेक्निकल नकआउट) मार्फत पराजित गर्दै सेमिफाइनलमा स्थान बनाएका थिए ।
इन्दु घिमिरे सचिवमा बढुवा, पहिलो पदस्थापनमै रक्षा मन्त्रालयको जिम्मेवारी
काठमाडौं । सरकारले वरिष्ठ सहसचिव इन्दु घिमिरेलाई सचिवमा बढुवा गर्दै रक्षा मन्त्रालयको सचिवमा पदस्थापन गरेको छ। शुक्रबार बसेको मन्त्रिपरिषद् बैठकले सचिवमा बढुवा सिफारिस समितिको पहिलो नम्बरमा रहेकी घिमिरेलाई सचिवमा बढुवा गर्ने निर्णय गरेको हो । मन्त्रिपरिषद्को निर्णयअनुसार घिमिरेले सचिवमा बढुवा भएलगत्तै संघीय सरकारको महत्वपूर्ण मन्त्रालयमध्ये एक रक्षा मन्त्रालयको प्रशासनिक नेतृत्व सम्हाल्ने भएकी छन् । उनी यसअघि संस्कृति, पर्यटन तथा नागरिक उड्डयन मन्त्रालयमा कार्यरत थिइन् । सरकारले रक्षा मन्त्रालयका वर्तमान सचिव केदारनाथ शर्मालाई गृह मन्त्रालयको सचिवमा सरुवा गर्ने निर्णयसमेत गरेको छ । शर्माको सरुवापछि रक्षा मन्त्रालयमा रिक्त हुने सचिव पदमा नवनियुक्त सचिव घिमिरेलाई जिम्मेवारी दिइएको हो । गृह मन्त्रालयमा भने अनिवार्य अवकाशको समय नजिकिएका राजकुमार श्रेष्ठको स्थानमा शर्मालाई ल्याइएको हो । श्रेष्ठको अवकाश हुन केही दिन मात्रै बाँकी रहेकाले सरकारले गृह प्रशासनको नेतृत्वमा नयाँ सचिव पठाउने निर्णय गरेको हो । घिमिरेको पहिलो पदस्थापन नै संघीय सरकारको केन्द्रीय मन्त्रालयमा भएको छ । प्रशासनिक वृत्तमा सचिवमा बढुवा भएका अधिकारीलाई प्रारम्भिक चरणमा प्रदेशको प्रमुख सचिवको जिम्मेवारी दिने र प्रदेशमा निश्चित अवधि काम गरेपछि संघीय मन्त्रालयमा ल्याउने अभ्यास रहँदै आएको थियो । तर पछिल्ला वर्षहरूमा सचिव व्यवस्थापनमा उक्त परम्परागत अभ्यास कमजोर हुँदै गएको देखिन्छ । सचिव बढुवासँगै संघीय मन्त्रालयमै पदस्थापन गर्ने तथा अनुभवी सचिवहरूलाई प्रदेशमा पठाउने क्रमसमेत देखिएको छ । यसअघि पनि सचिव व्यवस्थापनका क्रममा वरिष्ठ सचिवहरूलाई प्रदेशका प्रमुख सचिवको जिम्मेवारी दिँदै दुर्गम प्रदेशसम्म पठाइएका उदाहरण छन् । पछिल्लो निर्णयले भने सचिव बढुवा र पदस्थापनमा सरकारले अपनाउँदै आएको नयाँ अभ्यासलाई थप स्पष्ट पारेको छ । घिमिरेलाई रक्षा मन्त्रालयमा पदस्थापन गर्ने निर्णयसँगै मन्त्रालयको प्रशासनिक नेतृत्वमा परिवर्तन आएको छ भने शर्मा गृह मन्त्रालयको नेतृत्वमा जाने भएका छन् । दुवै सचिवको सरुवा तथा पदस्थापनलाई प्रशासनिक नेतृत्व व्यवस्थापनअन्तर्गतको नियमित निर्णयका रूपमा हेरिएको छ ।
केरुङमा पहिरोपछि बढ्यो ब्यारियर लेकको त्रास, जोखिम हटाउन चीनलाई सकस
काठमाडौं । चीनको सिजाङ (तिब्बत) स्वायत्त क्षेत्रस्थित जिरोङ (केरुङ) नाकामा गएको विनाशकारी पहिरोपछि बेपत्ता भएकाहरूको खोजी तथा उद्धार कार्यलाई शुक्रबारदेखि थप तिब्र पारिएको छ । समयसँग प्रतिष्पर्धा गर्दै उद्धारकर्मीहरू प्रभावित क्षेत्रमा परिचालित भएका छन् । चीनको राष्ट्रिय अग्नि तथा उद्धार प्रशासनकाअनुसार शुक्रबार बिहान १० बजेसम्म कुल ६ सय ८१ जना अग्नि नियन्त्रक तथा उद्धारकर्मी र ११३ वटा सवारी साधन विकट हिमाली क्षेत्रमा पुगेका छन् । यसका साथै ६ हजार ६१२ थान उद्धार उपकरण र आवश्यक बन्दोबस्तीका सामग्री जिरोङ गाउँतर्फ पठाइएको छ । नेपालतर्फबाट शुरु भएको पहिरो बुधवार बिहान जिरोङ काउन्टीको केरुङ नाकामा खसेको थियो । बिहीवार बिहान ८ बजेसम्मको प्राप्त विवरण अनुसार यस प्राकृतिक विपत्तिमा परी ३ जनाको मृत्यु भएको छ भने ५ सय ५८ जना अझै बेपत्ता छन् । दुईजना स्थानीय बासिन्दालाई भने सुरक्षित रूपमा उद्धार गरिएको छ । उद्धार कार्यका लागि बिहीबार बिहान १४१ जना उद्धारकर्मीको पहिलो टोली र उच्च उचाईमा उडान भर्न सक्ने हेलिकप्टर घटनास्थलमा पुगेका थिए । सोही दिन अपराह्न चीनको विशेष खोज तथा उद्धार टोलीका थप १११ जना सदस्यहरू जिरोङ आइपुगेका छन् । उद्धार कार्यलाई प्रभावकारी बनाउन तीनवटा विशेष टोली परिचालन गरिएको छ । यी टोलीहरूले रबरको डुङ्गामार्फत जलमार्ग, पैदल मार्गबाट जटिल हिमाली भू–भाग र ड्रोनको माध्यमबाट हवाई निरीक्षणका साथै राहत सामग्री ढुवानी गरिरहेका छन् , एक अग्रिम टोलीले मुख्य विपद् क्षेत्रको म्यापिङ, निगरानी र पहिरोले थुनिएको नदी (ब्यारियर लेक) को अवस्थाबारे अध्ययन गरिरहेको छ । उद्धार प्रयासलाई प्राविधिक सहयोग पु¥याउन आपतकालीन व्यवस्थापन मन्त्रालय अन्तर्गतको साङ्घाई फायर रिसर्च इन्स्टिच्युटका १३ जना विज्ञहरू पनि घटनास्थल पुगेका छन् । यसैबीच, चीनको सरकारी स्वामित्वको इन्जिनियरिङ तथा उद्धार निकाय ‘चीन आनेन’ ले १५ सदस्यीय विशेषज्ञ टोली परिचालन गरेको छ । उक्त टोलीले ड्रोन, पोर्टेबल स्याटेलाइट स्टेशन र मोबाइल सर्भिलेन्स क्यामरामार्फत अवरुद्ध सडक र ब्यारियर लेकको अवस्थाको सूक्ष्म अध्ययन गरिरहेको छ । उद्धारकर्मीहरूका अनुसार नाकाभन्दा करिव ३ किलोमिटर माथिल्लो क्षेत्रमा थुप्रिएको लेदो र गेग्रान हटाउनुअघि ब्यारियर लेकबाट सिर्जना हुनसक्ने जोखिमलाई पूर्ण रूपमा न्युनिकरण गर्नु चुनौतीपूर्ण देखिएको छ ।
प्रधानमन्त्री दैवी प्रकोप उद्धार कोषलाई सूर्य नेपालले दियो १५ करोड रुपैयाँ
काठमाडौं । प्रधानमन्त्री दैवी प्रकोप उद्धार कोषलाई सूर्य नेपाल प्रालिले १५ करोड रुपैयाँ सहयोग गरेको छ । शुक्रबार अर्थमन्त्री डा. स्वर्णिम वाग्लेलाई भेटेर कम्पनीले उक्त रकम हस्तान्तरण गरेको हो । यो रकम प्रधानमन्त्री दैवी प्रकोप उद्धार कोषमा पूर्वजानकारी दिएर उपलब्ध गराइएको निजी क्षेत्रबाट प्राप्त सबैभन्दा ठूलो सहयोग रकम हो । अर्थमन्त्री डा. स्वर्णिम वाग्लेलाई सूर्य नेपाल प्रालिका प्रबन्ध निर्देशक गौरव तयाल, उपाध्यक्षद्वय डिप्रा लहेरी र रवि केसी एवं महाप्रबन्धक प्रेम अर्यालले उक्त रकमको चेक हस्तान्तरण गरे ।
नेपाल–चीन सम्बन्ध बिगार्ने गरी ‘चीनले बाढीको सूचना दिएन’ भन्ने आरोप अफवाहमात्र होः रेग्मी
काठमाडौं । सत्तारूढ दल राष्ट्रिय स्वतन्त्र पार्टी (रास्वपा)का सांसद डा. धनञ्जय रेग्मीले रसुवा–त्रिशूली करिडोरमा आएको भीषण बाढीको सन्दर्भमा चीनले नेपाली पक्षलाई समयमै पूर्वसूचना नदिएको आरोप ‘मिथ्या’ र ‘अफवाह’ भएको बताएका छन् । शुक्रवार न्युज एजेन्सी नेपालसँग कुरा गर्दै उनले यस्तो बताएका हुन् । उनले चीन र नेपालबीचको सुमधुर सम्बन्ध नै बिग्रने गरी ‘र्‍युमर’ फैलाइएको बताए । सांसद रेग्मीले प्राकृतिक रूपमा हिमालय क्षेत्रमा हुने हिमपहिरो, चट्टान खस्ने तथा हिमताल फुट्ने घटनाको ठ्याक्कै समय र स्थानबारे पूर्वसूचना दिन सम्भव हुने बताए । उनले निरन्तर निगरानी हुने सगरमाथा हिमालमा समेत पर्यटक र पथप्रदर्शकलाई जोगाउन नसकिएको उल्लेख गर्दै निगरानी नै नभएको हिमालयमा कुन ठाउँमा के घटना हुन्छ ? भन्ने सूचना प्रदान गर्न नसकिने बताए। रेग्मीले बाढीका सम्बन्धमा चीनसँग पूर्वसूचना भएपनि नेपाललाई नदिएको भन्ने आरोप लगाएर दुई देशबीचको सुमधुर सम्बन्ध बिगार्न नहुने कुरामा सबै पक्ष जिम्मेवार हुनुपर्ने बताए । उनले सामाजिक सञ्जालमार्फत अपुष्ट सूचना र अफवाह फैलाउने कार्य भइरहेको भन्दै जिम्मेवार बन्न समेत आग्रह गरे । उनले विगतमा नेपालमै भएका कयौं प्राकृतिक विपद्का घटनाको उदाहरण दिँदै यस्ता घटनामा पूर्वसूचना प्रदान गर्न सम्भव नहुने बताए । उनले हिमनदी, हिमताल र प्राकृतिक विपद्सम्बन्धी विषयमा जथाभावी टिप्पणी नगरी ग्ल्यासियोलोजी तथा सम्बन्धित विषयका विज्ञसँग मात्र धारणा लिनसमेत सञ्चारमाध्यमहरुलाई आग्रह गरे ।
बाढीपीडितका लागि हिमालयन बुलियन कम्पनीको १ करोड १ लाख सहयोग
काठमाडौं । हिमालयन बुलियन कम्पनी लिमिटेडले रसुवा, नुवाकोट, धादिङलगायत भोटेकोशी तटीय क्षेत्रमा आएको विनाशकारी बाढीबाट प्रभावित नागरिकको राहत तथा उद्धारका लागि प्रधानमन्त्री दैवी प्रकोप उद्धार कोषमा १ करोड १ लाख रुपैयाँ सहयोग गर्ने घोषणा गरेको छ । कम्पनीले जारी गरेको विज्ञप्तिअनुसार भदौ ११ गते प्रधानमन्त्री दैवी प्रकोप उद्धार कोषमा २१ लाख रुपैयाँ जम्मा गरिएको थियो । त्यसमा थप ८० लाख रुपैयाँ सहयोग गर्ने निर्णयसँगै कुल सहयोग रकम १ करोड १ लाख रुपैयाँ पुगेको हो । कम्पनीका प्रतिनिधि राकेश कुमार अडुकिया, रोहन अडुकिया, भीष्म प्रसाद गौतम, जीवन घिमिरे र राजेन्द्र न्यौपानेले भदौ १२ गते अर्थ मन्त्रालयमा अर्थमन्त्री डा. स्वर्णिम वाग्लेलाई उक्त सहयोग रकमको चेक हस्तान्तरण गरेका छन् । हिमालयन बुलियन कम्पनीले भोटेकोशी बाढीबाट रसुवा, नुवाकोट, धादिङलगायत क्षेत्रमा भएको ठूलो मानवीय तथा भौतिक क्षतिप्रति गहिरो दुःख व्यक्त गरेको छ । बाढीमा ज्यान गुमाउने नागरिकप्रति श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना प्रकट गरेको कम्पनीले जनाएको छ । साथै, बाढीमा घाइते भएका सबैको शीघ्र स्वास्थ्यलाभको कामना गर्दै पीडित परिवारको दुःखमा आफूहरू साथमा रहेको कम्पनीले उल्लेख गरेको छ । कम्पनीले प्राकृतिक विपद्को यस कठिन घडीमा खोज, उद्धार, राहत तथा पुनःस्थापनामा सहयोग पुर्याउनु आफ्नो सामाजिक र मानवीय दायित्व भएको जनाएको छ ।
रसुवा जोड्ने प्रमुख सडकखण्ड सञ्चालनमा
काठमाडौं । बाढीपहिरोका कारण अवरुद्ध भएको रसुवा जोड्ने प्रमुख सडकखण्ड सञ्चालनमा आएको छ । टोखा–छहरे–गड्खार पुल–आप्र–नर्जा–लच्याङ–सरमथली–पाटीखर्क हुँदै बोगटीटार–कालिकास्थान–धुन्चे सडकखण्ड ४ चक्के साना सवारीसाधन सञ्चालन हुने गरी सुचारु गरिएको हो । सडकखण्ड सुचारु भएसँगै लामो समयदेखि सडक सञ्जालबाट अलग भएको रसुवा पुनः राष्ट्रिय सडक सञ्जालसँग जोडिएको छ । सडक सञ्चालनमा आएपछि रसुवा आवतजावत गर्ने यात्रु तथा स्थानीयवासीलाई सहज हुने भएको छ । साथै प्रभावित क्षेत्रमा राहत तथा उद्धार सामग्री पुर्याउन र दैनिक उपभोग्य वस्तुको आपूर्ति सहज बनाउन समेत सहयोग पुग्ने अपेक्षा गरिएको छ । प्रतिकूल मौसम र बाढीपहिरोका कारण सडकका विभिन्न स्थानमा क्षति पुगेपछि यातायात सेवा प्रभावित भएको थियो ।
प्रधानमन्त्री दैवी प्रकोप उद्धार कोषमा ३६ घण्टामै १ अर्ब ९१ करोड सहयोग
काठमाडौं । प्रधानमन्त्री दैवी प्रकोप उद्धार कोषमा ३६ घण्टामै १ अर्ब ९१ करोड रुपैयाँभन्दा बढी सहयोग रकम संकलन भएको छ । अर्थ मन्त्रालयका अनुसार बुधबार मध्याह्नदेखि बिहीबार राति १२ बजेसम्म विभिन्न १० वाणिज्य बैंकमा रहेका कोषका खातामा १ अर्ब ९१ करोड ८६ लाख ५० हजार ९११ रुपैयाँ जम्मा भएको हो । बुधबार बिहान नेपाल–चीन सीमा हुँदै बग्ने भोटेकोशी नदीमा आएको भीषण बाढीबाट ठूलो जनधनको क्षति भएपछि सरकारले प्रभावित क्षेत्रलाई संकटग्रस्त क्षेत्र घोषणा गरेको थियो । त्यससँगै बाढीपीडितको उद्धार तथा राहतका लागि व्यक्ति तथा विभिन्न संघसंस्थाले कोषमा सहयोग रकम जम्मा गर्न थालेका हुन् । सरकारले कोषमा रकम संकलन तथा त्यसको समन्वयका लागि अर्थ मन्त्रालयलाई फोकल मन्त्रालय तोकेको छ । संस्थागततर्फ एक करोड रुपैयाँ वा सोभन्दा बढी सहयोग गर्ने दाताको रकम अर्थमन्त्री डा. स्वर्णिम वाग्लेले स्वयंमार्फत स्वीकार गरिरहेको मन्त्रालयले जनाएको छ । व्यक्तिगततर्फको नगद सहयोग भने दाताले अर्थ मन्त्रालयमै पुगेर प्रदान गर्न सक्ने व्यवस्था गरिएको छ । नयाँ सहयोगसँगै प्रधानमन्त्री दैवी प्रकोप उद्धार कोषमा रहेको बचत रकम ४ अर्ब ९ करोड ११ लाख ६० हजार रुपैयाँ पुगेको छ । यसअघि कोषमा २ अर्ब १७ करोड २५ लाख ९ हजार ७५९ रुपैयाँ बचत थियो । यसैबीच, बिहीबार मात्रै ६ घण्टाको अवधिमा निजी क्षेत्रका दाताबाट अर्थ मन्त्रालयमार्फत २७ करोड ३३ लाख रुपैयाँ सहयोग प्राप्त भएको थियो । मन्त्रालयका अनुसार कोषमा संकलित उक्त सहयोगमा विभिन्न मित्रराष्ट्रले घोषणा गरेका सहयोग रकम भने समावेश गरिएको छैन ।
