६ सय ६० जनालाई भन्सार एजेन्टमा रोजगारीको अवसर
काठमाडौं । भन्सार एजेन्टको इजाजतपत्र लिन इच्छुक व्यक्तिका लागि अनलाइन दरखास्त आह्वान खुला भएको छ । भन्सार विभागले सोमबार सार्वजनिक सूचना प्रकाशन गर्दै ६ सय ६० जनाका लागि आवेदन माग गरेको हो । भन्सार नियमावली, २०६४ को नियम ३७, उपनियम (१) बमोजिम भन्सार एजेन्टको इजाजतपत्रका लागि देहाय बमोजिम योग्यता पुगेका इच्छुक व्यक्तिले विभागको वेवसाइट मार्फत अनलाइन दरखास्त दिन सक्नेछन् । विभागको सूचना अनुसार २१ वर्ष पूरा गरेका नेपाली नागरिकले विभागको वेवसाइटमा गएर दरखास्त दिन सक्नेछन् । त्यसका लागि भन्सार एजेन्टको अनलाइन दरखास्त प्रणाली लिंकमार्फत् दरखास्त दिनुपर्नेछ । परीक्षा केन्द्र काठमाडौंमा मात्र हुनेछ । दरखास्त भर्न दस्तुर तीन हजार लाग्ने विभागको भनाइ छ । २०७८ वैशाख ५ गतेसम्म दरखास्त दिने समय छ । इच्छुक उम्मेदवार स्नातक तह उत्तिर्ण गरेको हुनुपर्नेछ । कम्प्युटर सम्बन्धी कम्तीमा तीन महिनाको आधारभूत तालिम लिएको हुनुपर्नेछ । नेपाली नागरिकताको प्रमाणपत्र, न्यूनतम शैक्षिक योग्यताको प्रमाणपत्र, कम्प्युटर तालिमको प्रमाणपत्र, भन्सार नियमावली, २०६४ को नियम ३७ को उपनियम (२) को खण्ड (ख) बमोजिमको योग्यता आवश्यक नपर्ने व्यक्तिको हकमा भन्सार नियमावली, २०६४ को नियम ३७ को उपनियम (३) बमोजिम सम्बन्धित भन्सार कार्यालयका प्रमुखले प्रमाणित गरेको कागजात स्क्यान गरी अपलोड गर्नुपर्नेछ । २० वर्षपछिको अबसर लामो समय पछि विभागले पहिलो पटक ठूलो संख्यामा एजेन्टको लाइसेन्सका लागि आवेदन माग गरेको हो । करिब २० वर्षअघि विभागले चार सय भन्सार एजेन्टलाई लाइसेन्स दिइएको थियो । लामो समयसम्म एजेन्टका लागि आवेदन नहुँदा हाल एक सय ७० जना मात्र एजेन्ट रहेका छन् । विभागले नयाँ माग गरेको एजेन्टका लागि लोकसेवा आयोगमार्फत लिखित तथा मौखित परीक्षा लिने तयारी गरेको छ । भन्सार एजेन्टका लागि आवेदन दिन बीए वा सोसरहको शैक्षिक योग्यता आवश्यक हुन्छ भने साधारण कम्प्युटर चलाउन सक्ने हुनुपर्छ । यसअघि भन्सार एजेन्टको अनुमतिपत्र दिने परीक्षा सञ्चालन गर्न खोज्दा सर्वोच्च अदालतमा मुद्दा परेपछि परीक्षा रोकिएको थियो । अदालतले ऐनमा व्यवस्था गरेर मात्र परीक्षा लिनुपर्ने आदेश दिएको थियो । भन्सार विभागले ऐन परिमार्जन गरी परीक्षा लिन लागिएको जनाएको छ । भन्सार एजेन्टले आयात निर्यातमा व्यापारी र भन्सार कर्मचारीबीच पुलको काम गर्छन् ।
नेपाल लाइफको सीईओमा नियुक्त भएका सन्तोष प्रसाईले पाए समितिको स्वीकृति
काठमाडौं । नेपाल लाइफ इन्स्योरेन्सको प्रमुख कार्यकारी अधिकृत (सीईओ)मा नियुक्त भएका सन्तोष प्रसाईले बीमा समितिको स्वीकृति पाएका छन् । समितिले उनलाई चैत ११ गते बुधबार नेपाल लाइफ इन्स्योरेन्सको सीईओ पदको लागि स्वीकृति दिएको हो । गत माघ २७ गते मंगलबार बसेको कम्पनीको सञ्चालक समितिले इन्स्योरेन्सको कार्यवाहक सीईओ प्रसाईलाई सीईओ पदमा नियुक्त गर्ने निर्णय गरेको थियो । जसको स्वीकृतिको लागि बीमा समितिमा पठाइएको थियो । करिब डेढ महिनापछि बीमा समितिले कम्पनीको सञ्चालक समितिको उक्त निर्णयलाई स्वीकृत गरेको हो । सीईओमा उनको नियुक्तीसँगै कम्पनीले नयाँ उचाई लिने सञ्चालक समितिको विश्वास रहेको छ । विगत साढे ३ वर्षदेखि नेपाल लाइफसँग आवद्ध रहेका प्रसाईले साउन १ गतेदेखि कार्यवाहक प्रमुख कार्यकारी अधिकृतको जिम्मेवारी सम्हालेका थिए । यसअघि पनि बीमा क्षेत्रको नियमनकारी निकाय बीमा समितिमा ७ वर्ष लामो अनुभव सम्हालेका थिए । सम्बन्धित समाचार नेपाल लाइफको सीईओमा सन्तोष प्रसाई नियुक्त, सञ्चालकमा दुई जना निर्वाचित
कालिका लघुवित्तका सीईओ महेन्द्र अधिकारीको कार्यकाल थपियो
काठमाडौं । कालिका लघुवित्त वित्तीय संस्थाको प्रमुख कार्यकारी अधिकृत (सीईओ) महेन्द्र अधिकारीको कार्यकाल थपिएको छ । चैत ११ गते बसेको संस्थाको वार्षिक साधारणसभाले अधिकारीको पदको कार्यभार थप २ वर्षको लागि थपेको हो । उनी गत असोज ३० गतेबाट २ वर्षको लागि संस्थाको सीईओ पदमा नियुक्त भएका थिए । तर हालै बसेको कम्पनी सञ्चालक समितिको बैठकले उनको पदावधि थपेर ४ वर्ष पुर्याएको हो । यससँगै, उनले आगामी चार वर्ष अर्थात २०८१ सालसम्म संस्थाको सीईओ पदको जिम्मेवारी सम्हाल्ने छन् ।
